Јеһованын сәнә суаллар вермәсинә јол верирсәнми?
МҮГӘДДӘС ЈАЗЫЛАРДА үрәјин дәринликләринә ишләјән јүзләрлә суаллар вар. Јеһова Аллаһ Өзү ваҹиб һәгигәтләри өјрәтмәк үчүн суаллардан истифадә едир. Мәсәлән, Јеһова Габили мәһвә апаран јолдан чәкиндирмәк үчүн она бир нечә суал вермишди (Јар. 4:6, 7). Бәзән исә Јеһованын бир суал вермәси кифајәт иди ки, инсан һәрәкәтә тәшвиг олунсун. Јеһованын «Кими ҝөндәрим? Бизим үчүн ким ҝедәҹәк?» суалыны ешидән кими Јешаја пејғәмбәр ҹаваб вермишди: «Мән бурадајам. Мәни ҝөндәр» (Јешаја 6:8).
Бөјүк Мүәллим Иса да суаллардан еффектив шәкилдә истифадә едирди. Мүждәләрдә Исанын 280-дән чох суалы гәләмә алыныб. Бәзән о, суаллары тәнгидчиләрини сусдурмаг үчүн версә дә, чох вахт онун мәгсәди динләјиҹиләрини өз руһани вәзијјәтләринин нә јердә олдуғунун үзәриндә дүшүнмәјә вадар етмәк вә онларын үрәјинә јол тапмаг иди (Мат. 22:41—46; Јәһ. 14:9, 10). Јунанҹа Мүгәддәс Јазыларын 14 китабыны јазан һәвари Павел дә суаллардан инандырыҹы тәрздә истифадә едирди (Ром. 10:13—15). Мәсәлән, онун ромалылара үнванладығы мәктубда хејли суаллар вар. Павелин суаллары охуҹуларыны «Аллаһын зәнҝинлик вә һикмәт вә елминин дәринлији» барәдә өјрәнмәјә вә онлары гијмәтләндирмәјә тәшвиг едир (Ром. 11:33).
Бәзи суаллар ҹаваб тәләб етдији һалда, диҝәрләри дәриндән дүшүнмәјә тәшвиг едир. Мүждәләрдән ҝөрүрүк ки, Иса икинҹи вариантдан ҝениш истифадә едирди. Бир дәфә о, шаҝирдләрини хәбәрдар едәрәк деди: «Диггәтли олун! Фәрисејләрин мајасындан вә Һиродун мајасындан горунун», бунунла Иса онларын икиүзлүлүјүнү вә јалан тәлимләрини нәзәрдә тутурду (Марк 8:15; Мат. 16:12). Шаҝирдләри ону баша дүшмәдиләр вә чөрәк ҝәтирмәји унутдугларыны дүшүнәрәк мүбаһисә етдиләр. Бундан сонра гыса сөһбәт әрзиндә Исанын суаллардан неҹә истифадә етдијинә фикир верин. «Иса... онлара деди: “Нә үчүн чөрәјиниз олмадығы һагда мүбаһисә едирсиниз? Һәлә дә ағлыныза ҝәлмирми, анламырсынызмы? Зеһниниз күтләшибми? Ҝөзләриниз олан һалда ҝөрмүрсүнүзмү? Гулагларыныз ола-ола ешитмирсинизми?.. Һәлә анламырсынызмы?”» Бу суаллары вермәкдә Исанын мәгсәди о иди ки, шаҝирдләри дедији сөзләрин әсил мәнасы үзәриндә дүшүнсүнләр (Марк 8:16—21).
«Суал верәҹәјәм, Мәнә ҹаваб вер»
Јеһова Аллаһ хидмәтчиси Әјјубун дүшүнҹә тәрзинә дүзәлиш вермәк үчүн она чохлу суаллар верди. Бу суалларын көмәји илә О, Әјјуба өз Јараданы илә мүгајисәдә нә гәдәр кичик олдуғуну ҝөстәрди (Әјјуб, фәсилләр 38—41). Јеһова һәр суалына ҹаваб ҝөзләјирдими? Ҝөрүнүр ки, јох. «Мән јерин тәмәлини гојаркән һарадајдын?» кими суалларла Аллаһ Әјјубун үрәјинә тәсир етмәк вә ону дүшүнмәјә тәшвиг етмәк истәјирди. Белә ҝүҹлү сорғу-суалдан сонра Әјјубун демәјә сөзү јох иди. О, садәҹә деди: «Сәнә неҹә ҹаваб верим, ағзымы әлимлә тутмушам» (Әјј. 38:4; 40:4). Әјјуб Јеһованын нә демәк истәдијини баша дүшүб, тәвазөкарлыг ҝөстәрди. Лакин Јеһованын мәгсәди Әјјуба садәҹә тәвазөкарлығы өјрәтмәк дејилди. Аллаһ онун дүшүнҹә тәрзинә дүзәлиш верди. Неҹә?
Әјјуб салеһ вә нөгсансыз инсан олса да, онун сөзләриндән ҝөрүнүрдү ки, бәзи шејләрә даир онун бахышлары јанлышдыр. Елиһу буну ҝөрүб ону мәзәммәт етди, чүнки о, ‘өзүнү Аллаһдан да салеһ сајырды’ (Әјј. 1:8; 32:2; 33:8—12). Беләликлә, Јеһова суаллар вермәклә һәм дә Әјјубун дүшүнҹә тәрзинә дүзәлиш верди. Гасырғанын ичиндән Әјјуба мүраҹиәт едәрәк Аллаһ деди: «Мәсләһәти савадсыз сөзләрлә гаранлыға салан бу кимдир? Инди киши кими белинә гуршаг бағла, суал верәҹәјәм, Мәнә ҹаваб вер» (Әјј. 38:1—3). Сонра суаллар васитәсилә Јеһова онун диггәтини мөһтәшәм ишләриндә өзүнү бүрузә верән һәдсиз мүдриклик вә ҝүҹүнә јөнәлтди. Бүтүн бунлары анламағын сајәсиндә Әјјуб Јеһованын һөкмләринә вә һәрәкәт тәрзинә даһа чох етибар етмәјә башлады. Гадир Аллаһ тәрәфиндән сорғу-суал едилмәк Әјјуб үчүн неҹә дә һејрәтамиз иди!
Јеһованын бизә суаллар вермәсинә неҹә јол верә биләрик?
Бәс бизим һаггымызда нә демәк олар? Мүгәддәс Китабда јазылан суаллардан биз дә фајдалана биләрикми? Бәли, бу суалларын үзәриндә дајаныб дүшүнмәјимиз руһани ҹәһәтдән бизә бөјүк хејир-дуалар ҝәтирә биләр. Аллаһын Кәламыны еффектив едән шејләрдән бири дә орада олан тәсирли суаллардыр. Һәгигәтән дә, ‘Аллаһын кәламы тәсирлидир, үрәјин дүшүнҹә вә нијјәтләрини ајырд едир’ (Ибр. 4:12). Анҹаг даһа чох фајда әлдә етмәк үчүн биз һәмин суаллары өзүмүзә јөнәлтмәлијик, санки, бу суаллары Јеһова шәхсән бизә үнванлајыб (Ром. 15:4). Бир нечә нүмунәни нәзәрдән кечирәк.
«Бүтүн дүнјанын Һакими белә әдаләтсизлик едәрми?» (Јар. 18:25, ЈД). Ибраһим бу риторик суалы Јеһова Содом вә Һоморраны мәһв етмәк гәрарыны чыхаранда вермишди. Ибраһим һесаб едирди ки, Јеһованын писләрлә бирҝә салеһләри дә мәһв едиб әдаләтсизлијә јол вермәси гејри-мүмкүндүр. Онун бу суалы Јеһованын әдаләтли олдуғуна даир дәрин иманыны әкс етдирирди.
Бу ҝүн бәзиләри Јеһованын ҝәләҹәк һөкмләри — Һар-Меҝидондан кимләрин сағ чыхаҹағы, кимләрин дириләҹәји кими мәсәләләр барәдә фәрзијјәләр ирәли сүрә биләрләр. Бу кими фикирләрин бизи нараһат етмәсинә јол вермәк әвәзинә, јахшы оларды ки, Ибраһимин суалыны јадымыза салаг. Ибраһим кими, бизим дә Јеһованы хејирхаһ сәмави Ата кими танымағымыз вә Онун әдаләтли вә мәрһәмәтли олдуғуна әминлијимиз бизи вахтымызы вә гүввәмизи алан јерсиз нараһатчылыгдан, руһән зәифләдән шүбһәләрдән вә бош мүбаһисәләрдән горујур.
«Сизләрдән ким гајғы чәкмәклә бојуну бир аршын артыра биләр?» (Мат. 6:27). Иса арасында шаҝирдләринин дә олдуғу бөјүк издиһама бу суалы вермәклә өзләрини Јеһованын гајғыкеш әлләринә һәвалә етмәләринин ваҹиблијини вурғулады. Бу пис системин сонунда јашадығымыз үчүн чохлу гајғыларымыз ола биләр, лакин бүтүн фикримизи онлара ҹәмләмәклә һәјатымызы нә азад, нә дә ки јахшылашдыра биләрик.
Өзүмүзә вә доғмаларымыза ҝөрә нараһатчылыг кечирәндә Исанын суалыны јада салмаг бизи нараһат едән шејләрә дүзҝүн бахмаға, һәмчинин әгли, емосионал вә физики ҹәһәтдән әлдән салан нараһатчылыға гапылмамаға вә мәнфи фикирләри башымыздан атмаға көмәк едә биләр. Исанын бизи әмин етдији кими, ҝөјүн гушларыны једиздирән вә чөл биткиләрини ҝејиндирән сәмави Атамыз нәјә еһтијаҹ дујдуғумузу јахшы билир (Мат. 6:26—34).
«Бир киши гојнуна од аланда әјин-башы јанмазмы?» (Сүл. мәс. 6:27). «Сүлејманын мәсәлләри» китабынын илк 9 фәсли елә тәртиб олунуб ки, санки, ата оғлуна практики мүдриклик ашыламаг үчүн она гыса һекајәләр данышыр. Абзасын әввәлиндә верилән суал әхлагсызлығын аҹы нәтиҹәләрә ҝәтириб чыхардығыны ҝөстәрир (Сүл. мәс. 6:29). Әҝәр ҝөрсәк ки, киминләсә ешгбазлыға јол верир вә ја бејнимиздә әхлагсыз фикирләр долашыр, бу суал һәјәҹан тәбили кими бизи ајылтмалыдыр. Үмумиликдә ҝөтүрсәк, инсан һәр һансы ширникдириҹи вәзијјәтлә үзләшәндә бу суалы өзүнә вермәлидир. Бурада Мүгәддәс Китабын «инсан нәји әкәрсә, ону да бичәҹәкдир» принсипи неҹә дә јеринә дүшүр! (Галат. 6:7).
«Сән кимсән ки, башгасынын гулуну мүһакимә едирсән?» (Ром. 14:4). «Ромалылара мәктуб»унда һәвари Павел биринҹи әсрдәки јығынҹагда јаранмыш проблемләри мүзакирә едир. Мүхтәлиф мәдәнијјәтләрдән олдуглары үчүн бәзи мәсиһчиләр һәмиманлыларынын гәрарларыны вә һәрәкәтләрини мүһакимә етмәјә мејилли идиләр. Павелин суалы онлара бир-бирләрини севинҹлә гаршыламалы вә мүһакимәни Јеһованын өһдәсинә бурахмалы олдугларыны хатырладырды.
Бу ҝүн дә Јеһованын халгы мүхтәлиф мәншәли вә шәраитләри фәргли олан инсанлардан ибарәтдир. Анҹаг Јеһова бизи бир јерә топлајыб вә бирләшдириб. Бирлијин олмасы үчүн сән өз төһфәни верирсәнми? Әҝәр биз гардашымызы виҹданына әсасән етдији һәрәкәтә ҝөрә дәрһал мүһакимә етмәјә мејиллијиксә, онда јахшы оларды ки, Павелин бу суалыны өзүмүзә верәк.
Суаллар бизи Јеһоваја јахынлашдырыр
Бу бир нечә нүмунә Аллаһын Кәламындакы суалларын нә дәрәҹәдә ҝүҹлү тәсир гүввәсинә малик олдуғуну ҝөстәрир. Һәр суалын контекстини нәзәрдән кечирсәк, ону өз вәзијјәтимизә тәтбиг едә биләрик. Мүгәддәс Китабы охујанда биз орада башга фајдалы суаллар да тапаҹағыг. (14-ҹү сәһифәдәки чәрчивәјә бахын.)
Аллаһын Кәламындакы тәсирли суалларын үрәјимизин дәринликләринә ишләмәсинә јол вермәјин сајәсиндә дүшүнҹә вә үрәјимизи Аллаһын әдаләтли нормаларына ујғунлашдыраҹағыг. Јеһова Әјјуба суаллар вердикдән сонра о етираф етди: «Гулагларыма сорағын чатмышды, индисә Сәни ҝөзләримлә ҝөрүрәм» (Әјј. 42:5). Бәли, Јеһова Әјјуб үчүн даһа реал олду, санки, дүз онун ҝөзүнүн габағында дајанмышды. Шаҝирд Јагуб исә буну белә ифадә едир: «Аллаһа јахынлашын, О да сизә јахынлашар» (Јаг. 4:8). Гој Аллаһын Кәламынын һәр бир һиссәси, еләҹә дә орадакы суаллар бизә руһән бөјүмәјә вә Јеһованы даһа ајдын ‘ҝөрмәјә’ көмәк етсин!
[14-ҹү сәһифәдәки чәрчивә]
Нөвбәти суалларын үзәриндә дүшүнмәк Јеһованын нөгтеји-нәзәрини мәнимсәмәјә неҹә көмәк едә биләр?
▪ «Рәбб Өз сөзүнә итаәт едилмәсиндән хошу ҝәлдији гәдәр јандырма гурбаны вә башга гурбанлардан хошу ҝәләрми?» (1 Шам. 15:22).
▪ «Ҝөзләрә гурулуш верән ҝөрмәзми?» (Мәз. 94:9).
▪ «Еј тәнбәл, нә гәдәр јатаҹагсан? Нә вахт јухудан ојанаҹагсан?» (Сүл. мәс. 6:9).
▪ «Һирсләнмәјин јахшы ишдирми?» (Јун. 4:4).
▪ «Инсан бүтүн дүнјаја јијәләниб өз ҹаныны итирәрсә, она нә фајда олаҹагдыр?» (Мат. 16:26).
▪ «Бизи Мәсиһин мәһәббәтиндән ким мәһрум едәҹәк?» (Ром. 8:35).
▪ «Алмадығын нәјин вар?» (1 Кор. 4:7).
▪ «Ишыгла гаранлыг арасында нә шәриклик ола биләр?» (2 Кор. 6:14).
[15-ҹи сәһифәдәки шәкил]
Әјјуб Јеһованын суалларындан нә өјрәнди?