«Өјүдләриндән зөвг алырам»

«Бундан әввәл јазыланларын һамысы бизә тә’лим олараг јазылды» (РОМАЛЫЛАРА 15:4).

1. Јеһова өјүдләрини бизә неҹә хатырладыр вә бизим онлара нә үчүн еһтијаҹымыз вар?

ЈАШАДЫҒЫ чәтин ҝүнләрин өһдәсиндән ҝәлмәк үчүн Јеһова Аллаһ өјүдләрини Өз халгына даима хатырладыр. Аллаһ буну шәхси өјрәнмә, јығынҹаг ҝөрүшләриндә ешитдијимиз мә’рузәләр вә шәрһләр васитәсилә едир. Чох вахт охудуғумуз вә ешитдијимиз фикирләр бизим үчүн јени дејил. Амма унутганлыға мејллилијимиздән, Јеһованын нијјәти, ганун вә нәсиһәтләрини даима јаддашымызда тәзәләмәлијик. Ганунларыны бизә тәкрарән хатырлатдығына ҝөрә Она миннәтдар олмалыјыг, чүнки онлар бизи руһландырыр, Аллаһын јолуна нә үчүн гәдәм басдығымызы јаддан чыхармаға гојмур. Мәзмурчу Јеһоваја охујурду: «Өјүдләриндән зөвг алырам» (Мәзмур 119:24).

2, 3. а) Јеһова нәјә ҝөрә Мүгәддәс Китабда инсанларын һәјат нүмунәләрини горујуб сахламышдыр? б) Бу мәгаләдә Мүгәддәс Китабдан һансы һадисәләрә бахылаҹаг?

² Әсрләр әввәл гәләмә алынмасына бахмајараг, Аллаһын Кәламы өз тә’сирли гүввәсини итирмәјиб (Ибраниләрә 4:12). Орада, гәдимдә јашамыш инсанларын һәјат нүмунәләри сахланылыб. Адәт-ән’әнәләр вә бахышлар дәјишсә дә, о вахт олдуғу кими, бу ҝүн дә инсанлар ејни проблемләрлә үзләширләр. Мүгәддәс Китабда, чәтин һәјат шәраитләринә бахмајараг, Јеһованы севән вә Она сәдагәтлә хидмәт едән инсанларын тә’сирли нүмунәләри, Аллаһын нифрәт етдији давраныш тәрзиндән бәһс едилир. Јеһова гајғы ҝөстәрмишдир ки, һәм пис, һәм дә јахшы һәјат нүмунәләри Мүгәддәс Китаба көчүрүлсүн вә Онун ганунларына риајәт етмәјин ваҹиблијини јадымыза салсын. Әлбәттә, онлары охумаг бизим үчүн хејирли олаҹаг. Һәвари Павел белә демишди: «Бундан әввәл јазыланларын һамысы бизә тә’лим олараг јазылды ки, тәһәммүл вә Мүгәддәс Јазыларын тәсәллиси илә үмидимиз олсун» (Ромалылара 15:4).

³ Ҝәлин Мүгәддәс Јазылардан үч һадисәјә диггәтлә фикир верәк. Бунлар Давудла Шаулун мүнасибәтләри, Һананја илә Шапиранын һәрәкәти вә Јусифин Потифарын арвады илә давранышы һаггындакы епизоддур. Бу нүмунәләрдән һәр бири бизә ибрәт дәрси верир.

Аллаһын тәдбирләринә гаршы сәдагәт

4, 5. а) Падшаһ Шаулла Давудун арасында һансы мүнасибәтләр вар иди? б) Давуд Шаулун әдавәтинә неҹә мүнасибәт бәсләјирди?

⁴ Падшаһ Шаул Јеһова Аллаһа гаршы сәдагәтсиз чыхдығындан артыг Онун халгыны идарә етмәјә лајиг дејилди. Аллаһ ону рәдд етди вә пејғәмбәри Шамуели ҝөндәрди ки, Исраилин падшаһы олмаг үчүн Давуду мәсһ етсин. Давуд дөјүшләрдә шүҹаәт ҝөстәриб халгын рәғбәтини газанмагла Шаулун ҝөзүндә ҝүҹлү бир рәгибә чеврилди. Шаул һәтта бир нечә дәфә ону өлдүрмәк истәди, лакин Давуд һәр дәфә сағ галырды, чүнки Јеһова онунла иди (1 Шамуел 18:6-12, 25; 19:10, 11).

⁵ Узун илләр әрзиндә Давуд гачаг кими јашамаға мәҹбур олду. Давудун әлинә бир нечә дәфә Шаулу өлдүрмәјә фүрсәт дүшмүшдү. Јолдашлары, дүшмәнинин онун әлинә Јеһова тәрәфиндән верилдијини десәләр дә, Давуд бундан имтина етди. Давуд Јеһоваја сәдагәтли олмаг, Шаулун исә, Аллаһын халгынын мәсһ едилмиш падшаһы олдуғундан, һөрмәтини сахламаг истәјирди. Мәҝәр Шаулу падшаһ тә’јин едән Јеһова дејилдими? Демәли, лазым билдији вахтда Өзү дә ону вәзифәсиндән кәнар едәҹәк. Бәли, Давуд бу ҹүр дүшүнүрдү. О јахшы анлајырды ки, бу ишә мүдахилә етмәјә онун һаггы јохдур. Шаулла барышмаг ҹәһдләриндән сонра о белә гәнаәтә ҝәлди: «Рәбб ону мүтләг вураҹаг. Елә ҝүн ҝәләҹәк ки, өз әҹәли илә өләҹәк ја да дөјүшдә һәлак олаҹаг. Гој Рәббин мәсһ етдијинә әл галдырмагдан Рәбб Өзү мәни узаг етсин» (1 Шамуел 24:3-15; 26:7-20).

6. Давудла Шаулун һекајәти бизи нә үчүн марагландырмалыдыр?

⁶ Бу һадисәдән өзүмүз үчүн ибрәт дәрси ала биләрик. Мәсиһчи јығынҹағында мүәјјән проблемләрин нәјә ҝөрә јарандығыны һеч өзүндән сорушмусанмы? Ола биләр, јығынҹаг үзвләриндән кимсә әдәб-әрканла давранмыр. Ҝүнаһ иш ҝөрмәсә дә, онун һәрәкәтләри сәни нараһат едир. Буна неҹә мүнасибәт бәсләмәлисән? Мәсиһчи мәһәббәтиндән вә Јеһова Аллаһа сәдагәтдән ирәли ҝәләрәк, аранызда олан анлашылмазлығы һәлл етмәк үчүн јәгин онунла меһрибанҹасына данышмаг истәјәрсән. Бүтүн сә’јләринә бахмајараг, проблем һәлл олунмурса, онда неҹә? Бу һалда мәсәләни Јеһованын өһдәсинә бурахмаг јахшы олар. Давуд мәһз белә дә етмишди.

7. Әдаләтсизлик вә пис мүнасибәтлә гаршылашанда Давуддан неҹә нүмунә ҝөтүрә биләрик?

⁷ Ола биләр, сосиал мөвгејинизә вә дини бахышла­рыныза ҝөрә инсанлар сизә дүзҝүн мүнасибәт бәсләмирләр. Белә вәзијјәтдә өзүнүзү аҹиз һисс едә биләрсиниз, чүнки бу ҹүр проблемләрә ҝүнбәҝүн таб ҝәтирмәк асан иш дејил. Давудун әдаләтсизлијә мүнасибәтиндән сиз өзүнүзә дәрс ҝөтүрә биләрсиниз. Давуд чох тә’сирли мәзмурлар јазмышды. Лакин онларын мөвзусу јалныз Шаулун әлиндән гуртулмаг јалварышлары дејилди, Давуд мәзмурларында Јеһова Аллаһа олан сәдагәтиндән вә Онун исминин иззәтләнмәсиндән охујурду (Мәзмур 18:1-6, 25-27, 30-32, 48-50; 57:1-11). Шаул Давуда илләр узуну әдавәт бәсләсә дә, Давудун Јеһова Аллаһа сәдагәти сојумамышды. Пајымыза дүшән әдаләтсизлијә вә инсанларын мүнасибәтинә бахмајараг, биз дә Јеһоваја вә Онун тәшкилатына сәдагәтимизи горумалыјыг. Әмин ола биләрик ки, Јеһова нә чәкдијимизи билир (Мәзмур 86:2).

8. Мозамбикдәки Шаһидләрин Аллаһа сәдагәтләри сынананда онлар өзләрини неҹә апардылар?

⁸ Мозамбикдә јашајан мәсиһчи гардашларымыз да ағыр сынаглар заманы Јеһоваја садигликләрини горумушлар. 1984-ҹү илдә гаршыдурма һәрәкатынын силаһлы үзвләри онларын кәндләринә бир нечә дәфә басгын етмиш, евләрини гарәт едиб јандырмыш вә бә’зиләрини өлдүрмүшләр. Садиг мәсиһчиләр бу вәзијјәтдә нә едә биләрдиләр? Һәрәкатын үзвләри о әразидә јашајанлара тәзјиг ҝөстәрирдиләр ки, онлар һәрби һәрәката гошулсунлар вә ја ону диҝәр јолларла дәстәкләсинләр. Јеһованын Шаһидләри буну мәсиһчи битәрәфлији мөвгеләринә зидд һәрәкәт кими гијмәтләндирәрәк, һәрәкат үзвләринин тәләбләринә рәдд ҹавабы вердиләр. Ҹаваб шиддәтли гәзәб доғурду. О гызғын вахтда отуза јахын Шаһид өлдүрүлдү. Амма өлүмлә үз-үзә ҝәлдикдә белә, Аллаһын халгы садиглијиндән дөнмәдиa. Давуд кими, онлар да әдаләтсизлијә гатлашдылар, амма сонда галиб чыхдылар.

Хәбәрдарлыг нүмунәси

9, 10. а) Мүгәддәс Јазылардакы нүмунәләрдән һансы фајданы әлдә етмәк олар? б) Һананја илә Шапиранын һәрәкәтиндә сәһв олан нә иди?

⁹ Мүгәддәс Јазыларда давраныш тәрзинә даир хәбәрдаредиҹи нүмунәләрдән бәһс едилир. Орада, Аллаһын хидмәтчиләрини дә дахил етмәклә инсанларын ҝөрдүкләри пис ишләр вә онларын ҝәтирдији ағыр нәтиҹәләр јазылмышдыр (1 Коринфлиләрә 10:11). Белә һекајәтләрдән бири Һананја илә Шапиранын нүмунәсидир. Бу әр-арвад биринҹи әсрдә јашамыш вә Јерусәлимдәки мәсиһчи јығынҹағынын үзвү идиләр.

¹⁰ Ерамызын 33-ҹү или, Пентикост ҝүнүндән сонра һәгигәтә јениҹә гошулмуш иманлылар Јерусәлимдә галыб һәвариләрлә үнсијјәт етмәк гәрарына ҝәлдиләр. Онларын гајғысына галмаг лазым иди. Она ҝөрә дә јығынҹаг үзвләриндән бә’зиләри мүлкләрини сатдылар ки, баҹы вә гардашларынын һеч нәјә еһтијаҹы олмасын (Һәвариләрин ишләри 2:41-45). Һананја илә Шапира да тарлаларыны сатдылар. Лакин һәвариләрә пулун јалныз бир гисмини ҝәтириб дедиләр ки, сатышдан әлдә етдикләри бүтүн пулу гардашлары үчүн ианә едирләр. Һананја илә Шапирадан конкрет бир мәбләғдә пул ианә етмәләрини тәләб едән јох иди, көнүлләри нә гәдәр истәсә, о гәдәр дә верә биләрдиләр. Анҹаг үрәкләринин нијјәти пис иди, онлар виҹданла һәрәкәт етмәдиләр. Һананја илә Шапира истәјирдиләр ки, һәвариләр вә бүтүн јығынҹаг онларын нә гәдәр «әлиачыг» олдуғуну ҝөрсүнләр. Мүгәддәс руһун тә’сири илә һәвари Петер онлары ифша етди, онларын икиүзлүлүјү вә әјрилији һамыја мә’лум олду. Јеһова онлары өлүмлә ҹәзаландырды (Һәвариләрин ишләри 5:1-10).

11, 12. а) Мүгәддәс Китабдан һансы нүмунәләр бизә дүзҝүнлүјүн ваҹиблијини хатырладыр? б) Дүзҝүнлүјүн ҝәтирдији хејир-дуалары садалајын.

¹¹ Инсанларын рәғбәтини газанмаг үчүн үрәјимиздән һәгигәти тәһриф етмәк арзусу кечсә, гој Һананја илә Шапиранын нүмунәси ҝөзүмүзү ачыб бизи вахтында ојатсын. Инсанлары алдатмаг олар, Јеһова Аллаһы исә һеч вахт! (Ибраниләрә 4:13) Мүгәддәс Јазылар бизи дәфәләрлә тәшвиг едир ки, бир-биримизлә дүзҝүнлүклә давранаг, чүнки һагсызлыгдан тәмизләнмиш јер үзүндә јаланчылара јер олмајаҹаг (Сүлејманын мәсәлләри 14:2; Вәһј 21:8; 22:15). Бунун сәбәби ајдындыр: һәр ҹүр јаланын мәнбәји — Шејтан Иблисдир (Јәһја 8:44).

¹² Доғрулуг јолунда јеримәклә бир чох хејир-дуалар газанырыг. Бунлар тәмиз виҹдан, инсанларын бизә е’тибар етмәси, бундан алдығымыз мәмнунлуг һиссидир. Бир чох һалларда мәсиһчиләрә дүзҝүнлүкләринә ҝөрә иш тәклиф едибләр. Диҝәр һалларда ејни сәбәбдән онлар ишләрини итирмәјибләр. Ән әсасы исә, дүзҝүнлүкләринә ҝөрә Гадир Аллаһ Јеһова илә достлуг мүнасибәтләри гура биләрик (Мәзмур 15:1, 2).

Әхлаги тәмизлијимизи горујуруг

13. Јусиф һансы вәзијјәтә дүшдү вә неҹә давранды?

¹³ Гәбилә башчысы Јагубун оғлу Јусиф 17 јашында икән көләлијә сатылмышды. Бир мүддәтдән сонра о, Потифар адлы мисир ә’јанынын евиндә ишләмәјә башлајыр. Јарашыглы бир ҹаван олдуғу үчүн Потифарын арвадынын она ҝөзү дүшүр. Арвадын үрәјиндән Јусифлә јахынлыг етмәк истәји кечир вә бүтүн ҝүнү она дејир: «Ҝәл мәнимлә јат». Јусиф валидејнләриндән узаг, гәриб бир өлкәдә иди. О, гадынла јахынлыг едәр вә сонра да буну ҝизләдә биләрди. Амма Потифарын арвады ондан јапышанда Јусиф гачды (Јарадылыш 37:2, 18-28; 39:1-12).

14, 15. а) Јусифин һекајәси бизим үчүн нәјә ҝөрә мараглыдыр? б) Бир мәсиһчи гадын Аллаһа нә үчүн миннәтдардыр?

¹⁴ Јусиф Аллаһ горхусуна малик аиләдә бөјүмүшдү вә билирди ки, никаһда олмајан шәхсләрин бир-бири илә ҹинси јахынлыг етмәси дүзҝүн дејил. Она ҝөрә дә демишди: «Мән неҹә бу бөјүк пислији едиб Аллаһын өнүндә ҝүнаһа бата биләрәм?» Аллаһын Еден бағында гојдуғу гајдадан онун хәбәри варды: ҹинси әлагә јалныз әр илә арвад арасында олмалыдыр (Јарадылыш 2:24). Јусифин давранышы үзәриндә дүшүнмәк бизим үчүн дә хејирлидир. Бә’зи јерләрдә инсанлар ҹинси мүнасибәтләрә о гәдәр сәрбәст јанашырлар ки, мәсиһчи ҝәнҹләр бу ҹүр јахынлыгдан имтина едәндә јашыдлары онлара ҝүлүр. Евли инсанлар арасында һәјат јолдашына хәјанәт едәнләр дә аз дејил. Ҝөрдүјүмүз кими, Јусифин һекајәси чох актуалдыр. Аллаһын зинаја вә әхлагсызлыға нөгтеји-нәзәри дәјишмәјиб, Онун ҝөзүндә бу һәрәкәтләр ҝүнаһдыр (Ибраниләрә 13:4). Тәзјигә таб ҝәтирмәјиб әхлагсызлыг етмиш ҝәнҹләрин чоху вахтында дајанмадыгларына ҝөрә инди пешманчылыг чәкирләр. Әхлагсызлығын арзуолунмаз нәтиҹәләри арасында виҹдан әзабы, өз ҝөзүндә һөрмәтдән дүшмә, гысганҹлыг, һамиләлик вә ҹинси јолла өтүрүлән хәстәликләри садаламаг олар. Мүгәддәс Китаб хатырладыр ки, әхлагсызлыг едән «бәдәнинә гаршы ҝүнаһ ишләдир» (1 Коринфлиләрә 5:9-12; 6:18; Сүлејманын мәсәлләри 6:23-29, 32).

¹⁵ Ҹенниb адлы субај бир мәсиһчи гыз Јеһованын Өз өјүдләрини хатырлатдығы үчүн Она чох миннәтдардыр. Ишдә јарашыглы бир әмәкдашы она мараг ҝөстәрирди. Ҹенни оғланын ҹәһдләринә реаксија вермәдикҹә, о даһа да ҹәсарәтләнирди. Ҹенни е’тираф едир: «Әхлаги ҹәһәтдән тәмиз галмаг асан дејил, чүнки әкс ҹинсдән олан бир адамын сәнә мараг ҝөстәрмәси сәнин дә хошуна ҝәлир». Баҹымыз баша дүшдү ки, оғлан, садәҹә олараг, ҹинси јахынлыг етдији гадынлар сијаһысына онун да адыны әлавә етмәк истәјир. Тәзјиг гаршысында зәифләдијини һисс едән кими, баҹымыз Јеһоваја дуа етмәјә башлады. О, садиглијини горумаг үчүн Аллаһдан гүввә диләјирди. Ҹенни дејир ки, Мүгәддәс Китабы вә нәшрләри арашдыраркән тапдығы мә’лумат лап вахтында иди вә ону ајыг олмаға сөвг етди. Тапдығы нүмунәләрдән бири елә Јусифлә Потифарын арвадынын әһвалаты иди. «Јеһованы нә гәдәр чох севдијими өзүмә хатырлатдыгҹа, артыг горхмурам ки, бу бөјүк пислији едиб Аллаһын өнүндә ҝүнаһа батарам».

Аллаһын өјүдләринә һај верин!

16. Мүгәддәс Китабда тәсвир едилән инсанларын һәјат нүмунәләри үзәриндә дүшүнмәкдән биз һансы фајданы әлдә едә биләрик?

¹⁶ Инсанларын һәјат нүмунәләрини Аллаһын Мүгәддәс Китаба нәјә ҝөрә јаздырдығыны баша дүшмәјә чалышанда Онун нормаларына олан миннәтдарлығымыз даһа да артыр. Онлар бизә нә өјрәдир? О адамларын һансы кејфијјәтләрини вә ја мејлләрини тәглид етмәли, һансыларындан чәкинмәлијик? Аллаһын Кәламында, демәк олар ки, јүзләрлә инсанын симасы ҹанланыр. Аллаһын нәсиһәтләрини севән һәр бир кәс һәјат бәхш едән мүдриклијә ҹан атмалы, Јеһованын бизим үчүн горујуб сахладығы бу һәјат нүмунәләриндән ибрәт дәрси ҝөтүрмәлидир. Бу журналда да тез-тез фајдалы тәрҹүмеји-һаллар дәрҹ едилир. Нәјә ҝөрә онлары бир даһа нәзәрдән кечирмәјәсиниз?

17. Јеһованын тәкрар-тәкрар вердији өјүдләрә гаршы сән нә дујурсан вә нә үчүн?

¹⁷ Биз Јеһоваја миннәтдар олмалыјыг, белә ки О, ирадәсини јеринә јетирмәјә чалышан инсанлара гајғы ҝөстәрир. Биз вә Мүгәддәс Китабда һагларында данышылан инсанлар камил дејилик. Бунунла белә, онларын һәрәкәтләринин, мүсбәт нүмунәләринин бизим үчүн дәјәри бөјүкдүр. Јеһованын тәкрар-тәкрар вердији өјүдләрә риајәт етмәклә өзүмүзү ҹидди ҝүнаһлардан горујур, салеһлик јолу илә јеријәнләрин ҝөзәл нүмунәсини тәглид едә билирик. Белә олан тәгдирдә биз дә мәзмурчу илә сәс-сәсә вериб охуја биләрик: «Нә бәхтијардыр Онун өјүдләринә әмәл едәнләр, бүтүн гәлби илә Ону ахтаранлар. Өјүдләринә үрәкдән бағланмышам, онлары чох севирәм!» (Мәзмур 119:2, 167).

[Һашијәләр]

Неҹә ҹаваб верәрдиниз?

• Давудун Шаула гаршы мүнасибәтиндән биз нә өјрәнирик?

• Һананја илә Шапиранын һадисәси бизә нә өјрәдир?

• Јусифин нүмунәси нәјә ҝөрә бу ҝүн хүсусилә актуалдыр?

[18-ҹи сәһифәдәки шәкил]

Давуд Шаулун өлдүрүлмәсинә нә үчүн јол вермәди?

[19-ҹу сәһифәдәки шәкил]

Һананја илә Шапиранын әһвалатындан нә өјрәнирик?

[20-ҹи сәһифәдәки шәкил]

Јусиф нәјә ҝөрә әхлагсыз тәклифләри рәдд етди?