Һәјат вә сүлһ наминә руһла јашајын
«Бәдәнин истәкләри илә јох, руһла [јашајын]» (РОМ. 8:4).
1, 2. а) Сүкан архасында олан сүрүҹүнүн диггәтинин јајынмасы һансы фәсадлар төрәдә биләр? б) Нәјә ҝөрә мәсиһчи үчүн руһани сајыглығыны итирмәк тәһлүкәлидир?
«СҮРҮҸҮЛӘРИН сүкан архасында диггәтләринин јајынма һаллары артыг епидемик характер алыб вә вәзијјәт илдән-илә писләшир», — дејә АБШ-ын нәглијјат назири гејд етмишди. Мобил телефонлар сүрүҹүләри сүкан архасында оларкән етмәли олдуглары јеҝанә ишдән — машын сүрмәкдән јајындыран ҹиһазлардан биридир. Бир сорғуда иштирак едәнләрин үчдә бири башгаларынын сүкан архасында телефонла данышмасы уҹбатындан ја аз гала гәзаја уғрајаҹағыны, ја да гәзаја уғрадығыны демишди. Инсанлар дүшүнүрләр ки, сүкан архасында мобил телефонла данышмагла вахта гәнаәт етмиш олурлар, лакин бу, фәлакәтлә нәтиҹәләнә биләр.
2 Буну бизим руһани фираванлығымыза да аид етмәк олар. Диггәти јајынмыш сүрүҹү чох вахт тәһлүкәдән хәбәр верән ишарәләри ҝөрмәјиб бәлаја дүшдүјү кими, руһани сајыглығыны итирән мәсиһчи дә асанлыгла бәлаја дүшә биләр. Әҝәр биз һәгигәт јолундан вә теократик мәшғулијјәтләрдән узаглашсаг, иманымыз ҝәми кими гәзаја уғрајаҹаг (1 Тим. 1:18, 19). Һәвари Павел Ромадакы һәмиманлыларына јаздығы мәктубда онлары бу тәһлүкә барәдә хәбәрдар етмишди: «Даима бәдәнин истәкләри һаггында дүшүнмәк өлүм, руһани шејләр барәсиндә дүшүнмәк исә һәјат вә сүлһ ҝәтирир» (Ром. 8:6). Павел бу сөзләрлә нә демәк истәјирди? «Бәдәнин истәкләри һаггында» јох, «руһани шејләр барәсиндә дүшүнмәк» үчүн биз нә етмәлијик?
Онлар «мәһкум едилмирләр»
3, 4. а) Павелин дахилиндә һансы мүбаризә ҝедирди? б) Павелин вәзијјәти бизи нәјә ҝөрә марагландырмалыдыр?
3 Һәвари Павел Ромадакы мәсиһчиләрә үнванладығы мәктубунда апардығы мүбаризәдән — бәдәни илә ағлы арасындакы мүбаризәдән данышды. (Ромалылара 7:21—23 ајәләрини оху.) Павел буну өзүнә бәраәт газандырмаг вә ја өзүнә јазығы ҝәлдији үчүн демәди; о, ҝүнаһлы олдуғуну билсә дә, фикирләшмирди ки, белә бир вәзијјәтдә дүзҝүн оланы етмәк онун үчүн гејри-мүмкүндүр. Ахы о, јеткин, руһла мәсһ олунмуш вә «диҝәр халглара ҝөндәрилмиш бир һәвари» иди (Ром. 1:1; 11:13). Бәс онда нәјә ҝөрә Павел дахилиндә ҝедән бу мүбаризәдән јазды?
4 Павел бојнуна алырды ки, истәдији кими Аллаһын ирадәсини јеринә јетирә билмир. Нәјә ҝөрә? Чүнки һамы ҝүнаһ ишләдиб вә Аллаһын иззәтини әкс етдирә билмир (Ром. 3:23). Адәмдән төрәјән бүтүн инсанлар кими, Павел дә ҝүнаһын гејри-камил бәдәнә ҝөстәрдији тәсирдән азад дејилди. Онун һиссләри бизә чох ҝөзәл танышдыр, чүнки биз дә гејри-камилик вә һәр ҝүн ејни мүбаризәни апармалы олуруг. Үстәлик, бу дүнјада диггәтимизи јајындыра, еләҹә дә әбәди һәјата апаран енсиз јолдан аздыра биләҹәк шејләр истәнилән гәдәрдир (Мат. 7:14). Лакин Павел үчүн үмид олдуғу кими, бизим үчүн дә вар.
5. Павел көмәји вә гуртулушу һарадан алды?
5 Павел јазмышды: «Мәни ким хилас едәҹәк? Аллаһымыз! Она Ағамыз Иса Мәсиһ васитәсилә шүкүрләр олсун!» (Ром. 7:24, 25). Сонра о, «Мәсиһ Иса илә вәһдәтдә оланлар»а, јәни мәсһ олунмуш мәсиһчиләрә мүраҹиәт етди. (Ромалылара 8:1, 2 ајәләрини оху.) Јеһова мүгәддәс руһу илә онлары оғуллуға ҝөтүрәрәк Мәсиһин һәмварисләри едир (Ром. 8:14—17). Аллаһын руһу вә Исанын фидјә гурбанлығына ҝөстәрдикләри иман сајәсиндә онлар Павелин һаггында данышдығы мүбаризәдә гәләбә газанырлар, буна ҝөрә дә «мәһкум едилмирләр». Онлар «ҝүнаһ вә өлүм ганунундан» азад едилирләр.
6. Нәјә ҝөрә Аллаһын бүтүн хидмәтчиләри Павелин сөзләринә диггәт јетирмәлидирләр?
6 Дүздүр, Павел бу сөзләри мәсһ олунмуш мәсиһчиләрә үнванламышды. Лакин истәр ҝөјләр, истәрсә дә јер үзүндә јашамаг үмидинә малик олмаларындан асылы олмајараг, Јеһованын бүтүн хидмәтчиләри онун Аллаһын руһу вә Мәсиһин фидјә гурбанлығы барәсиндә дедикләриндән фајда әлдә едә биләрләр. Павелин мәсләһәтләри Аллаһ тәрәфиндән илһамландырылыб, буна ҝөрә дә чох ваҹибдир ки, һамымыз һәмин мәсләһәтләри баша дүшүб онлара әмәл едәк.
Аллаһ «бәдәндәки ҝүнаһы» неҹә «мәһкум етди»?
7, 8. а) Һансы мәнада «Ганун аҹиз иди»? б) Мүгәддәс руһу вә фидјә гурбанлығы сајәсиндә Аллаһ һансы иши һәјата кечириб?
7 Павел «Ромалылара мәктуб»ун 7-ҹи фәслиндә гејд едир ки, ҝүнаһ гејри-камил бәдәнә тәсир ҝөстәрир. 8-ҹи фәсилдә исә о, мүгәддәс руһун ҝүҹүндән бәһс едир. Бурада Павел ҝүнаһын ҝүҹүнә гаршы апардыглары мүбаризәдә мүгәддәс руһун мәсиһчиләрә неҹә көмәк етдијини, еләҹә дә Аллаһын ирадәсини неҹә јеринә јетирмәји вә Онун лүтфүнү неҹә газанмағы изаһ едир. Павел ҝөстәрир ки, Јеһова Өз мүгәддәс руһунун вә Оғлунун фидјә гурбанлығынын көмәјилә Мусанын Ганунунун едә билмәдији иши һәјата кечириб.
8 Бир чох бәндләрдән ибарәт олан Ганун ҝүнаһкарлары мүһакимә едирди. Үстәлик, Исраилдә баш каһин кими хидмәт едән кәсләр гејри-камил иди вә ҝүнаһын јујулмасы үчүн мүнасиб гурбан тәгдим едә билмирдиләр. Бәли, «инсан ҝүнаһлы олдуғу үчүн Ганун аҹиз иди». Лакин Аллаһ «Оғлуну ҝүнаһлы инсанын бәдәнинә бәнзәр бир бәдәндә» ҝөндәрәрәк ону фидјә гурбанлығы кими тәгдим етмәклә «бәдәндәки ҝүнаһы мәһкум етди», бунунла да Ганунун аҹизлијини арадан галдырды. Нәтиҹәдә, мәсһ олунмуш мәсиһчиләр Исанын фидјә гурбанлығы сајәсиндә салеһ һесаб олунурлар. Павел онлара «бәдәнин истәкләри илә јох, руһла [јашамағы]» мәсләһәт ҝөрүрдү. (Ромалылара 8:3, 4 ајәләрини оху.) Онлар буну јер үзүндәки һәјатларыны баша вуранадәк етмәлидирләр вә әҝәр садиг галсалар, «һәјат таҹыны» алаҹаглар (Вәһј 2:10).
9. Ромалылара 8:2 ајәсиндә истифадә олунан «ганун» сөзү һансы мәнаны кәсб едир?
9 «Ганун»дан савајы, Павел «руһун гануну»ндан, еләҹә дә «ҝүнаһ вә өлүм ганунундан» данышыр (Ром. 8:2). Бу, һансы ганунлардыр? Бу ајәдәки «ганун» сөзү алтында Мусанын Ганунундакы ганунлара бәнзәр гајдалар нәзәрдә тутулмур. Бир китабда дејилир: «Јунан мәтниндә бу ајәдә истифадә олунан ганун сөзү алтында јахшы вә ја пис олмаларындан асылы олмајараг, инсанларын һәрәкәтләрини ганун кими идарә едән дахили принсипләр нәзәрдә тутулур. Һәмин сөз һәмчинин инсанларын әлдә рәһбәр тутдуглары нормалара да аид ишләнир».
10. Ҝүнаһ вә өлүм гануну бизи неҹә идарә едир?
10 Һәвари Павел јазмышдыр: «Ҝүнаһ бир адам васитәсилә, өлүм дә ҝүнаһ васитәсилә дүнјаја ҝирдији кими, өлүм бүтүн адамлара кечди, чүнки һамы ҝүнаһ ишләјиб» (Ром. 5:12). Адәмин нәслиндән олдуғумуз үчүн һамымызы ҝүнаһ вә өлүм гануну идарә едир. Ҝүнаһлы бәдәнимиз бизи даима Аллаһа мәгбул олмајан ишләри ҝөрмәјә тәһрик едир. Лакин бунун нәтиҹәси өлүмдүр. Галатијалылара јаздығы мәктубда Павел бу кими шејләри «ҝүнаһлы бәдәнин әмәлләри» адландырды. Сонра исә о әлавә етди: «Белә ишләрлә мәшғул оланлар Аллаһын падшаһлығына ҝирмәјәҹәкләр» (Галат. 5:19—21). «Ҝүнаһлы бәдәнин әмәлләри»ни иҹра едәнләр бәдәнин истәкләри илә јашајан инсанлардыр (Ром. 8:4). Онларын «дахили принсипләр»и вә «әлдә рәһбәр тутдуглары нормалар» тамамилә ҹисманидир. Демәк олармы ки, јалныз зина, бүтпәрәстлик вә спиритизм кими ҹидди ҝүнаһлар ишләдән инсанлар бәдәнин истәкләри илә јашајырлар? Хејр! Чүнки ҝүнаһлы бәдәнин әмәлләри дејилдикдә, бәзи инсанларын садәҹә инсан хасијјәтинин гүсурлары адландырдыглары һиддәт, гәзәб, дидишмә вә пахыллыг кими шејләр дә нәзәрдә тутулур. Мәҝәр кимсә өзүнү бәдәнин истәкләриндән тамамилә тәмизләдијини дејә биләр?
11, 12. Јеһова ҝүнаһ вә өлүм ганунундан гуртулмағымыз үчүн нә едиб вә биз Аллаһын лүтфүнү неҹә газана биләрик?
11 Биз неҹә дә хошбәхтик ки, Јеһова ҝүнаһ вә өлүм ганунундан гуртулмағымыз үчүн шәраит јарадыб! Иса демишди: «Аллаһ дүнјаны о гәдәр севир ки, јеҝанә Оғлуну онун уғрунда гурбан верди; буну она ҝөрә етди ки, она иман едәнләрин һеч бири мәһв олмасын, һамысы әбәди јашасын». Аллаһын мәһәббәтинә һај вермәклә вә Иса Мәсиһин фидјә гурбанлығына иман етмәклә мирас алдығымыз ҝүнаһын нәтиҹәси олан мәһкумијјәтдән хилас ола биләрик (Јәһ. 3:16—18). Онда биз дә Павелин нөвбәти сөзләринә шәрик олаҹағыг: «[Аллаһа] Ағамыз Иса Мәсиһ васитәсилә шүкүрләр олсун!»
12 Бизи ағыр бир хәстәликдән сағалмаг үзрә олан инсанла мүгајисә етмәк олар. Лакин там сағалмаг үчүн биз һәкимин бүтүн ҝөстәришләринә әмәл етмәлијик. Фидјә гурбанлығына иман ҝәтирмәјимиз бизи ҝүнаһ вә өлүм ганунундан азад етсә дә, биз һәлә дә гејри-камил вә ҝүнаһлыјыг. Руһән сағлам олмаг, еләҹә дә Аллаһын лүтфүнү вә хејир-дуаларыны газанмаг истәјириксә, биздән даһа бир шеј етмәк тәләб олунур. «Ганундакы әдаләтли тәләбләри» иҹра етмәклә әлагәдар Павел һәмчинин дејир ки, биз «руһла [јашамалыјыг]».
Руһла јашамаг нә демәкдир?
13. Руһла јашамаг нә демәкдир?
13 Руһла јашамаг дедикдә руһани ҹәһәтдән камил олмаг јох, даима ирәли ҝетмәк нәзәрдә тутулур (1 Тим. 4:15). Ҝүнбәҝүн руһун рәһбәрлијинә ҝөрә јеримәк, јәни јашамаг үчүн биз әлимиздән ҝәләни етмәлијик. Руһун рәһбәрлији алтында јашајанлар Аллаһын лүтфүнү газанмыш олурлар (Галат. 5:16).
14. «Бәдәнин истәкләринин далынҹа [дүшәнләр]» нәјә мејил ҝөстәрирләр?
14 Сонра Павел бу мәктубда бир-бириндән тамамилә фәргли дүшүнҹә тәрзләринә малик олан ики груп инсандан сөз ачыр. (Ромалылар 8:5 ајәсини оху.) Бурада «бәдән» сөзү алтында садәҹә инсанын физики бәдәни нәзәрдә тутулмур. Мүгәддәс Китабда «бәдән» сөзү бәзән гејри-камиллијимизә аид едилир. Әввәлки ајәләрдә һәвари Павелин гејд етдији кими, гејри-камиллик бәдәнлә ағыл арасында мүбаризәјә сәбәб олур. Лакин Павелдән фәргли олараг, «бәдәнин истәкләринин далынҹа [дүшәнләр]» мүбаризәјә башламағы һеч ағылларына белә ҝәтирмирләр. Бу инсанлар Аллаһын онлардан нә тәләб етдији һагда дүшүнмүрләр вә Онун тәклиф етдији көмәји гәбул етмирләр: онларын «фикри-зикри ҹисмани шејләрдәдир». Онлары чох вахт өз раһатлыглары вә ҹисмани арзуларыны тәмин етмәк дүшүндүрүр. Анҹаг «руһла јашајанлар даима руһани шејләр», јәни Аллаһын руһани әнамлары вә теократик фәалијјәт барәдә дүшүнүрләр.
15, 16. а) Диггәтимизи јөнәлтдијимиз шејләр дүшүнҹә тәрзимизә неҹә тәсир ҝөстәрир? б) Бу ҝүн әксәр инсанларын фикри-зикри нәдәдир?
15 Ромалылара 8:6 ајәсини оху. Јахшы вә ја пис олмасындан асылы олмајараг, инсан һансыса иши етмәздән өнҹә бүтүн диггәтини она ҹәмләјир. Даима ҝүнаһлы бәдәнләринин истәкләрини тәмин едән инсанларда ҝеҹ-тез тамамилә ҹисмани шејләрә јөнәлән дүшүнҹә тәрзи формалашыр. Онларын дүшүнҹәләри, мараглары вә севдикләри шејләр, адәтән, јалныз бунларла бағлы олур.
16 Бу ҝүн инсанлары ән чох марагландыран нәдир? Һәвари Јәһја јазмышды: «Дүнјадакы һәр шеј — бәдәнин истәји, ҝөзләрин истәји вә инсанын өз вары илә ловғаланмасы Атадан дејил, дүнјадандыр» (1 Јәһ. 2:16). Бу истәк вә арзулар әхлагсызлыгла, ад-сан газанмагла вә вар-дөвләт топламагла бағлыдыр. Китаблар, журналлар, гәзетләр, филмләр, шоу-програмлар вә Интернет бу кими шејләрлә долуб-дашыр, чүнки әслиндә әксәр инсанларын фикри-зикри бундадыр. Лакин «бәдәнин истәкләри һаггында дүшүнмәк» индики дөврдә руһани, јахын ҝәләҹәкдә исә физики өлүм ҝәтирәҹәк. Нәјә ҝөрә? «Чүнки ҹисмани дүшүнҹә тәрзи Аллаһла дүшмәнчилијә ҝәтирир, белә ки, бәдән өз истәкләри илә Аллаһын ганунуна табе олмур вә буну һеч баҹармыр да. Демәли, бәдәнин истәкләринин далынҹа дүшәнләр Аллаһы разы сала билмәзләр» (Ром. 8:7, 8).
17, 18. Руһани шејләр барәсиндә дүшүндүјүмүзү неҹә ҝөстәрә биләрик вә бу, һансы хејир-дуалары ҝәтирир?
17 Лакин «руһани шејләр барәсиндә дүшүнмәк... һәјат вә сүлһ ҝәтирир», јәни ҝәләҹәкдә әбәди һәјат, индики дөврдә исә гәлб раһатлығы верир вә Аллаһла сүлһ мүнасибәти јаратмаға көмәк едир. «Руһани шејләр барәсиндә [дүшүндүјүмүзү]» неҹә ҝөстәрә биләрик? Бунун үчүн биз һәмишә Аллаһын вә Онун мүгәддәс руһунун рәһбәрлијини изләмәлијик, онда биздә Онун дүшүнҹә тәрзинә ујғун дүшүнҹә тәрзи формалашаҹаг. Биз истәјирик ки, дүшүнҹә тәрзимиз «Аллаһын ганунуна табе [олсун]» вә Онун кими дүшүнәк. Ширникдириҹи вәзијјәтләрлә үзләшәндә чашыб галмајаҹағыг, чүнки һансы јолу тутмалы олдуғумузу дәгиг биләҹәјик. Биз дүзҝүн — руһа ујғун гәрар верәҹәјик.
18 Буна ҝөрә дә даима руһани шејләр барәсиндә дүшүнмәк олдугҹа ваҹибдир. Бунун үчүн биз нөвбәти мәсләһәтә әмәл етмәлијик: «Ағлынызы ҹәмләшдириб фәалијјәтә һазыр олун». Бу, нә демәкдир? Јәни биз һәјатымызы руһани ишләрин әтрафында гурмалыјыг: даима дуа етмәли, Мүгәддәс Китабы охујуб арашдырмалы, јығынҹагларда иштирак етмәли вә тәблиғ етмәлијик (1 Пет. 1:13). Бәдәнин истәкләринин диггәтимизи јајындырмасына јол вермәк әвәзинә, ҝәлин даима руһани шејләр барәсиндә дүшүнәк. Белә етмәклә биз руһа ҝөрә јашајаҹағыг. Онда биз бөјүк хејир-дуалар бичәҹәјик, чүнки руһани шејләр барәсиндә дүшүнмәк һәјат вә сүлһ ҝәтирир (Галат. 6:7, 8).
Изаһ едә биләрсинизми?
• «Ганун аҹиз»дир дејилдикдә нә нәзәрдә тутулур вә Аллаһ бу аҹизлији неҹә арадан галдырды?
• «Ҝүнаһ вә өлүм [гануну]» нәдир вә биз ондан неҹә азад ола биләрик?
• «Руһани шејләр барәсиндә дүшүнмәк» үчүн биз нә етмәлијик?
[12 вә 13–ҹү сәһифәләрдәки шәкилләр]
Сән бәдәнин истәкләрилә, јохса руһа ҝөрә јашајырсан?