Гој ҝүвәндијин Јеһова олсун

“Үмидим сәнсән, ја Рәбб Јеһова; ҝәнҹлијимдән бәри ҝүвәндијим сәнсән” (МӘЗМУР 71:5).

1. Ҝәнҹ чобан Давуд һансы тәләби гәбул етди?

ОНУН боју тәхминән үч метр иди. Исраил дөјүшчүләриндән һеч кимин она гаршы чыхмаға ҹүр’әт етмәмәси тәәҹҹүблү дејил! Филистимли пәһләван Голјат бир нечә һәфтә ҝеҹә-ҝүндүз Исраил дөјүшчүләринә мејдан охујараг, онунла дөјүшмәк үчүн ҹәнҝавәр ҝөндәрмәләрини тәләб едирди. Нәһајәт ки, онун тәләби ҹәнҝавәр јох, лакин садә бир ҝәнҹ тәрәфиндән гәбул олунду. Ҝәнҹ чобан Давуд, пәһләванын јанында олдугҹа ҹылыз ҝөрүнүрдү. Јәгин ки, о, чәкидә Голјатын дәбилгәсиндән вә силаһындан да јүнҝүл ҝәләрди! Јенә дә, һәмин ҝәнҹ филистимли пәһләвана гаршы чыхды вә узун әсрләр боју иҝидлик рәмзи олду (1 Самуел 17:1-51).

2, 3. а) Нәјә ҝөрә Давуд Голјата гаршы бу ҹүр әминликлә чыхды? б) Ҝүвәндијимиз Јеһова олсун дејә, һансы ики аддымы атмалыјыг?

² Давуд бу ҹүр иҝидлији һарадан әлдә етмишди? Давудун, еһтимал ки, бөјүдүкдән сонра јаздығы сөзләри нәзәрдән кечирәк: “Үмидим сәнсән, ја Рәбб Јеһова; ҝәнҹлијимдән бәри ҝүвәндијим сәнсән” (Мәзмур 71:5). Бәли, Давуд артыг ҝәнҹ јашларындан Јеһоваја бел бағлајырды. О, Голјатын гаршысына нөвбәти сөзләрлә чыхды: “Сән гылынҹла вә мизрагла вә гарғы илә үзәримә ҝәлирсән; фәгәт мән мејдан охудуғун Исраил сыраларынын Аллаһы, ордулар Рәббинин исмилә сәнин үзәринә ҝәлирәм” (1 Самуел 17:45). Голјат өз бөјүк гүввәсинә вә силаһларына ҝүвәндији һалда, Давуд Јеһоваја ҝүвәнирди. Каинатын Һөкмдарындан дәстәк алараг, Давуд нәһәнҝ вә јахшы силаһланмыш ади инсандан горхмалы идими?

³ Давуд һаггында охујаркән Јеһоваја даһа мөһкәм ҝүвәнмәји өјрәнмәк истәјин јаранмырмы? Чох ҝүман ки, чохумузда бу ҹүр истәк јараныр. Буна ҝөрә дә ҝәлин, Јеһоваја ҝүвәнә билмәјимизә көмәк едән ики аддымы нәзәрдән кечирәк. Биринҹиси, бу ҹүр ҝүвәнмәјимизә мане олан ҝениш јајылмыш манеәләри арадан галдырмалы вә онларын бир даһа јолумузда дурмасына јол вермәмәлијик. Икинҹиси, Јеһоваја бел бағла­мағын нә демәк олдуғуну ајдын баша дүшмәлијик.

Јеһоваја ҝүвәнмәјә мане олан ҝениш јајылмыш манеәләр

4, 5. Нәјә ҝөрә бир чох инсанлара Аллаһа ҝүвәнмәк чәтиндир?

⁴ Аллаһа ҝүвәнмәкдә инсанлара мане олан нәдир? Чох вахт бәдбәхтликләрин сәбәбини билмәмәләри. Чохларыны өјрәдирләр ки, изтираблара Аллаһ ҹавабдеһдир. Фаҹиә баш верәндә вә инсанлар һәлак оланда кешишләр бә’зән дејирләр ки, һәлак олан шәхси Аллаһ ҝөјә, Өз јанына “ҝөтүрүб”. Бундан савајы, дин рәһбәрләринин чоху өјрәдир ки, бу дүнјада баш верән һәр шеји, о ҹүмләдән бәдбәхтликләри вә писликләри Аллаһ габагҹадан мүәјјән едиб. Белә бир мәрһәмәтсиз Аллаһа ҝүвәнмәк чәтиндир. Иман ҝәтирмәјәнләрин ағылларыны кор едән Шејтан, ‘ҹинләрин [бу ҹүр] тә’лимләрини’ јајмаға сә’јлә ҹан атыр (1 Тимотејә 4:1; 2 Коринфлиләрә 4:4).

⁵ Шејтан истәјир ки, инсанлар Јеһоваја ҝүвән­мәсинләр. Аллаһын бу дүшмәни инсан изтирабларынын әсл сәбәбләрини биздән ҝизләтмәк истәјир. Вә әҝәр биз бу сәбәбләри артыг Мүгәддәс Китабдан өјрәнмишиксә, Шејтан истәјәрди ки, биз онлары унудаг. Буна ҝөрә дә, дүнјада баш верән изтирабларын үч әсас сәбәбини вахташыры олараг өзүмүзә хатырлатмаг фајдалы оларды. Белә етмәклә үрәјимизи әмин едә биләрик ки, һәјатда гаршылашдығымыз фәлакәтләрә ҝөрә Јеһова ҹавабдеһ дејил (Филипилиләрә 1:9, 10).

6. 1 Петер 5:8 ајәси инсан изтирабларынын сәбәбләриндән биринә неҹә ишарә едир?

⁶ Инсан изтирабларынын биринҹи сәбәби ондадыр ки, Шејтан Јеһованын садиг хидмәтчиләринин нөгсансызлығыны гырмаг истәјир. Шејтан Ејубун да нөгсансызлығыны гырмаға чалышырды. Ејубун һадисәсиндә буна наил ола билмәди, лакин өз ҹәһдләринә сон гојмады. Бу дүнјанын һөкмдары кими, о, Јеһованын садиг хидмәтчиләрини ‘ашырмаға’ чалышыр (1 Петер 5:8). Бизим һәр биримиз онун һәдәфијик. Шејтан бизи мәҹбур етмәк истәјир ки, Јеһоваја хидмәтимизи дајандыраг. Буна ҝөрә дә о, чох вахт тә’гибләрә әл атыр. Изтираблара мә’руз галсаг да, сарсылмазлығы горујуб сахламаг үчүн әсаслы дәлилләримиз вар. Чүнки сарсылмаз галмагла Шејтанын јаланчы олдуғуну сүбут едирик, бунунла да Јеһованы севиндиририк (Ејуб 2:4; Сүлејманын мәсәлләри 27:11). Јеһова тә’гибләрә таб ҝәтирмәкдә бизә гүввә вердији үчүн исә Она даһа мөһкәм ҝүвәнирик (Мәзмур 9:9, 10).

7. Галатијалылара 6:7 ајәси изтирабларын һансы сәбәбини ајдынлашдырмаға көмәк едир?

⁷ Изтирабларын икинҹи сәбәби “инсан нәји әкәрсә, ону да бичәҹәкдир” принсипи илә бағлыдыр (Галатијалылара 6:7). Бә’зән инсанлар дүшүнҹәсиз гәрарлар “әкирләр”, нәтиҹәдә исә изтираб “бичирләр”. Мәсәлән, ким исә јол һәрәкәти гајдаларыны позур вә сонра гәзаја уғрајыр. Чохлары сигарет чәкир вә үрәк хәстәликләриндән, һәмчинин ағ ҹијәрин хәрчәнҝ хәстәлијинә тутулмасындан әзијјәт чәкирләр. Әхлагсыз ҹинси һәјат тәрзи сүрмәк гәрарына ҝәләнләр давранышларынын изтираблы нәтиҹәләрилә: аиләнин дағылмасы, шәхси ләјагәт һиссинин итмәси, ҹинсијјәт органлары васитәсилә өтүрүлән хәстәликләр вә арзуолунмаз һамиләлик кими проблемләрлә тоггуша биләрләр. Инсанлар бу ҹүр изтирабларда Аллаһы тәгсирләндирмәјә мејллидирләр, әслиндә исә онлар өзләринин дүшүнҹәсиз гәрарларынын гурбаны олурлар (Сүлејманын мәсәлләри 19:3).

8. Ваиз 9:11 ајәсинә әсасән, инсанлар нәјә ҝөрә әзијјәт чәкирләр?

⁸ Изтирабларын үчүнҹү сәбәби һаггында Ваиз 9:11 ајәсиндә данышылыр: “Дөндүм вә ҝүнәш алтында ҝөрдүм ки, јарыш ајагдан тез оланлар үчүн дејил вә ҹәнҝ иҝидләр үчүн дејил, чөрәк дә һикмәтлиләр үчүн дејил, зәнҝинлик дә анлајышлы адамлар үчүн дејил, инајәт дә биликли адамлар үчүн дејил; чүнки онларын һамысыны вахт вә тәсадүф гаршылар”. Бә’зән инсанлар садәҹә олараг мүнасиб олмајан јердә вә вахтда пејда олурлар. Мөһкәмлијимиздән вә ја зәифлијимиздән асылы олмајараг, изтираб вә өлүм истәнилән вахт ҝөзләнилмәдән һәр биримизи јахалаја биләр. Мәсәлән, Исанын ҝүнләриндә Јерусәлимдә бир гүллә учуб 18 адамын өлүмүнә сәбәб олду. Иса баша салды ки, бу, онларын әввәлки ҝүнаһларына ҝөрә Аллаһын вердији ҹәза дејилди (Лука 13:4). Бу ҹүр фәлакәтләрә Јеһова ҹавабдеһ дејил.

9. Инсанлар изтираблара даир һансы суала ҹаваб тапа билмирләр?

⁹ Изтирабларын сәбәбини баша дүшмәк ваҹибдир. Лакин бунунла әлагәли чохларынын ҹаваб тапа билмәдикләри даһа бир суал галыр: Јеһова Аллаһ изтираблара нә үчүн јол верир?

Јеһова изтираблара нә үчүн јол верир?

10, 11. а) Ромалылара 8:19-22 ајәләринә әсасән “бүтүн хилгәт”ин башына нә ҝәлмишдир? б) Хилгәти вурнухмаја табе етдирән кәси неҹә мүәјјән едә биләрик?

¹⁰ Һәвари Павелин ромалылара мәктубунун бир парчасы, бу ваҹиб суала ајдынлыг ҝәтирир. Павел јазырды: “Хилгәт Аллаһын оғулларынын зүһуруну бөјүк һәсрәтлә ҝөзләјир. Она ҝөрә ки, хилгәт өз ирадәси илә дејил, табе Етдирәнин ирадәси илә вурнухмаја табе етдирилди, бу үмидлә ки, хилгәт өзү дә чүрүклүјә олан көләлијиндән азад олунуб Аллаһын өвладларынын иззәтли азадлығына говушаҹагдыр. Чүнки билирик ки, бүтүн хилгәт индијә кими бирликдә фәрјад едиб доғум ағрысы чәкир” (Ромалылара 8:19-22).

¹¹ Бу ајәләрдәки фикри баша дүшмәк үчүн, биз әввәлҹә бә’зи әсас мәсәләләри ајдынлашдырмалыјыг. Мәсәлән, хилгәти вурнухмаја табе етдирән кимдир? Бә’зиләри дејир ки, бу Шејтандыр, диҝәрләри исә — Адәм. Лакин буну онларын һеч бири едә билмәзди. Нәјә ҝөрә? Она ҝөрә ки, хилгәти вурнухмаја табе етдирән, буну “үмидлә” — садиг инсанларын нәһајәтдә ‘чүрүклүјә олан көләликдән азад олунаҹаглары’ үмиди илә етмишдир. Бу ҹүр үмиди нә Адәм, нә дә Шејтан верә биләрди. Буну јалныз Јеһова едә биләрди. Ајдындыр ки, хилгәти вурнухмаја јалныз О, табе етдирмишдир.

12. “Бүтүн хилгәт” ифадәси илә әлагәдар һансы долашыглыг мөвҹуддур вә бунун нә мә’на дашыдығыны неҹә мүәјјән етмәк олар?

¹² Бу парчада һаггында бәһс едилән “бүтүн хилгәт” нәдир? Бә’зиләри сүбут етмәјә чалышыр ки, “бүтүн хилгәт” ифадәси алтында бүтүн тәбиәт, о ҹүмләдән һејванат вә битки аләми нәзәрдә тутулур. Лакин һејванлар вә биткиләр “Аллаһын өвладларынын иззәтли азадлығына” говушмаға үмид едирләрми? Јох (2 Петер 2:12). Демәли, “бүтүн хилгәт” ифадәси јалныз инсанлара аид едилә биләр. Бу о хилгәтдир ки, Еден бағындакы гијамын нәтиҹәсиндә ҝүнаһ вә өлүмдән әзијјәт чәкир вә үмидә чох бөјүк еһтијаҹ дујур (Ромалылара 5:12).

13. Едендәки гијам инсанлара нә ҝәтирди?

¹³ Һәмин гијам инсанлара нә ҝәтирди? Павел буну бир сөзлә ифадә едир: вурнухмаa. Бир арајыш китабчасына әсасән, бу сөз “өз тә’јинатына ҝөрә тәтбиг едилә билмәјән әшјанын фајдасызлығыны” тәсвир едир. Инсанларын тә’јинаты — әбәди јашамаг, јер үзүндә Ҹәннәтин гајғысына галмагда меһрибан, камил бир аилә кими чалышмагдыр. Бунун әвәзинә онлар гыса, изтираблы, чох вахт да мә’насыз һәјат сүрүрләр. Ејубун дедији кими, “инсан ки, гадындан доғулуб, ҝүнләри гысадыр вә сыхынтыја дојар” (Ејуб 14:1). Һәгигәтән дә вурнухмадыр!

14, 15. а) Јеһованын бәшәријјәтә кәсдији һөкм нәјә ҝөрә әдаләтли иди? б) Павел нәјә ҝөрә хилгәтин вурнухмаја “өз ирадәси илә” табе етдирилмәдијини сөјләди?

¹⁴ Инди исә әсас суала чатдыг: Нәјә ҝөрә “бүтүн дүнјанын Һакими” инсанлары бу ҹүр изтираблы вә мә’насыз һәјата табе етдириб? (Јарадылыш 18:25, МКШ). Онун давранышы әдаләтлидирми? Буну мүәјјән етмәк үчүн улу валидејнләримизин нә етдикләрини јада салаг. Онлар Аллаһа гаршы гијам галдырараг, Јеһованын һөкмранлығынын әдаләтли олдуғуну ачыг сурәтдә шүбһә алтына алан Шејтанын тәрәфини тутдулар. Онлар өз әмәлләри илә, әҝәр инсанлар өзләрини гијамчы руһани варлығын рәһбәрлији алтында идарә едәрләрсә, ҝуја Јеһовасыз да кечинә биләрләр фикрини дәстәкләдиләр. Гијамчылара һөкм чыхармагла Јеһова әслиндә онлара, онларын истәдикләрини верди. Јеһова онлара, Шејтанын рәһбәрлији алтында олараг өзләрини идарә етмәјә имкан верди. Бу ҹүр шәраитләрдә бәшәријјәти вурнухмаја табе етдирмәкдән, лакин буну үмидлә етмәкдән даһа әдаләтли гәрар ола биләрдими?

¹⁵ Сүбһәсиз ки, хилгәт вурнухмаја “өз ирадәси илә” табе етдирилмәмишди. Биз ҝүнаһ вә чүрүклүјүн көләләри олараг доғулуруг, бу ҹәһәтдән бизим һеч бир әлаҹымыз јохдур. Лакин Јеһова Өз мәрһәмәти илә Адәм вә Һәвваја јашајыб, нәсил төрәтмәк имканы верди. Онларын нәсли олан бизләр ҝүнаһ вә өлүмүн вурнухмасына табе етдирилсәк дә, бизим Адәм вә Һәвванын етмәдикләрини етмәк имканымыз вар. Биз Јеһоваја итаәт ҝөстәрә вә Онун һөкмранлығынын әдаләтли вә мүкәммәл олдуғуну анладығымыз һалда, Онсуз инсан һөкмранлығынын јалныз изтираб, мә’насызлыг вә вурнухма ҝәтирдијини дәрк едирик (Јеремја 10:23; Вәһј 4:11). Шејтанын тә’сири исә вәзијјәти анҹаг ҝәрҝинләшдирир. Тарих бу һәгигәтләри тәсдиг едир (Ваиз 8:9).

16. а) Бу ҝүн дүнјада ҝөрдүјүмүз изтираблара Јеһованын ҹавабдеһ олмадығына нәјә ҝөрә әмин ола биләрик? б) Јеһова садиг инсанлара һансы үмиди мәһәббәтлә вериб?

¹⁶ Ҝөрдүјүмүз кими, бәшәријјәти вурнухмаја табе етдирмәк үчүн Јеһованын тутарлы сәбәбләри варды. Бу о демәкдирми ки, бу ҝүн бизим һәр биримизи јахалајан вурнухма вә изтирабын сәбәбкары Јеһовадыр? Һакимин ҹинајәткара әдаләтлә һөкм кәсдији бир вәзијјәти тәсәввүр едәк. Дустаг ҹәзасыны чәкдији мүддәтдә чох изтираб чәкә биләр, лакин һакими өз бәлаларынын сәбәбкары сајмаға онун һаггы вармы? Әлбәт ки, јох! Бундан савајы, Јеһова һеч заман пислик мәнбәји ола билмәз. Јагуб 1:13 ајәсиндә дејилир: “Аллаһ писликлә имтаһан олунмур вә Өзү дә һеч кими имтаһан етмир”. Һәм дә унутмајаг ки, Јеһова бу һөкмү “үмидлә” кәсиб. О, мәһәббәтлә өлчү ҝөтүрдү ки, Адәмлә Һәвванын садиг өвладлары вурнухманын сонуну ҝөрсүнләр вә “Аллаһын өвладларынын иззәтли азадлығына” говуша билсинләр. Садиг инсанлар бир даһа, бүтүн хилгәтин изтираблы вурнухмаја табе етдириләҹәјиндән әбәдијјәт боју еһтијат етмәјәҹәкләр. Мүбаһисәли суалы әдаләтли тәрздә һәлл едәрәк, Јеһова һөкмранлығынын гануни олдуғуну һәмишәлик сүбут едәҹәкдир (Ишаја 25:8).

17. Инсан изтирабларынын сәбәбләрини тәкрар етмәјимиз бизи нәјә тәшвиг едир?

¹⁷ Инсан изтирабларынын сәбәбләрини нәзәрдән кечирәндән сонра, Јеһованы пислијин сәбәбкары сајмаға вә ја Она гаршы е’тибарымызы итирмәјә зәррә гәдәр дә олса әсасымыз галырмы? Әксинә, бу ҹүр тәдгигат бизи Мусанын сөзләрини тәкрар етмәјә тәшвиг едир: “Гајадыр, онун иши тамдыр; чүнки бүтүн јоллары һагдыр; сәдагәт Аллаһыдыр вә һагсызлыг етмәз, садиг вә доғру олан одур” (Тәснијә 32:4). Ҝәлин вахташыры олараг бу фикирләр үзәриндә дүшүнәрәк, онлары јаддашымызда тәзәләјәк. Белә олдугда сынагларла гаршылашанда, Шејтанын бизим зеһнимизә шүбһә тохуму сәпмәк ҹәһдләринә гаршы дура биләҹәјик. Бәс әввәлдә хатырланан икинҹи аддым барәдә нә демәк олар? Јеһоваја бел бағламаг нә демәкдир?

Јеһоваја бел бағламаг нә демәкдир?

18, 19. Мүгәддәс Китаб бизи Јеһоваја бел бағламаға неҹә тәшвиг едир, лакин бу ҹәһәтдән бә’зиләри һансы јанлыш тәсәввүрләрә маликдирләр?

¹⁸ Аллаһын Кәламы бизи тәшвиг едир: “Бүтүн үрәјинлә Рәббә ҝүвән вә өз анлајышына архаланма; бүтүн јолларында ону таны [“Ону нәзәрә ал”, ЈД], о да сәнин јолларыны доғрулдар” (Сүлејманын мәсәлләри 3:5, 6). Неҹә дә ҝөзәл, тәсәлливериҹи сөзләрдир! Һәгигәтән дә Каинатда һеч кәс бизим истәкли сәмави Атамыз кими бөјүк е’тибара лајиг дејил. Лакин бу сөзләри “Сүлејманын мәсәлләри” китабындан охумаг, онлара әсасән јашамагдан асандыр.

¹⁹ Чохлары Јеһоваја бел бағламағын, јә’ни Она ҝүвәнмәјин нә демәк олдуғуну сәһв баша дүшүрләр. Бә’зиләринин фикринә ҝөрә, бу ҹүр ҝүвәнмәк — јалныз һисс, үрәкдә өзбашына олараг доғулан хошбәхтлик дујғусудур. Диҝәрләри јәгин дүшүнүр ки, Аллаһа бел бағламаг — Онун бизи бүтүн хошаҝәлмәз һаллардан горујаҹағына, һәр чәтинликләримизи арадан галдыраҹағына вә ҝүндәлик проблемләримизи мәһз бизим ҝөзләдијимиз кими, һәм дә дәрһал һәлл едәҹәјинә үмид етмәк демәкдир! Лакин бу ҹүр нөгтеји-нәзәр әсассыздыр. Аллаһа ҝүвәнмәк, садәҹә һиссләрдән даһа бөјүк мә’на кәсб едир вә бош арзуларла әлагәли дејил. Әҝәр јеткин инсанлардан данышсаг, Аллаһа ҝүвәнмәк — дүшүнүлмүш, әсаслы гәрарларда әкс олунур.

20, 21. Јеһоваја бел бағламаг нә демәкдир? Мисал чәкин.

²⁰ Сүлејманын мәсәлләри 3:5 ајәсинә јенә диггәт јетирәк. Бу ајәдән ҝөрүнүр ки, ејни заманда һәм Јеһоваја ҝүвәнмәк, һәм дә өз анлајышына архаланмаг мүмкүн дејил. Бу о демәкдирми ки, биз дүшүнҹәмизи истифадә едә билмәрик? Јох, әксинә, бизә дүшүнҹә верән Јеһова ҝөзләјир ки, Она хидмәтдә дүшүнҹәмизи истифадә едәҹәјик (Ромалылара 12:1). Бәс биз нәјә бел бағлајыр вә ја ҝүвәнирик? Әҝәр дүшүнҹәмиз Јеһованын дүшүнҹәси илә үст-үстә дүшмүрсә, Онун бизимкиндән һәдсиз дәрәҹәдә үстүн олан мүдриклијини гәбул едирикми? (Ишаја 55:8, 9). Јеһоваја бел бағламаг — Онун дүшүнҹәсинин бизим дүшүнҹәмизә истигамәт вермәсинә изн вермәк демәкдир.

²¹ Бир нүмунәни нәзәрдән кечирәк. Автомобилин арха отураҹағында ушаг, габагдакыларда исә онун валидејнләри әјләшиб. Автомобили ушағын атасы идарә едир. Бирдән чәтинлик јараныр: һава јахуд јолдакы вәзијјәт дәјишир вә ја машыны мүәјјән истигамәтә чевирмәк барәдә гәрар гәбул етмәк ҝәрәкдир. Бу ҹүр шәраитдә сөзәбахан, валидејнләринә е’тибар едән ушаг неҹә давраныр? Арха отураҹагдан атасына машыны неҹә сүрмәјә даир ҝөстәриш верәрәк гышгырырмы? Валидејнләринин гәрарларыны шүбһә алтына гојурму? Валидејнләри она тәһлүкәсизлик кәмәрини ачмамағы хатырладанда мүгавимәт ҝөстәрирми? Хејр, ушаг е’тибар едир ки, валидејнләри гејри-камил олсалар да, бу ҹүр чәтинликләрин өһдәсиндән ҝәләҹәкләр. Јеһова исә камил Атадыр. Биз Она, хүсусилә дә чәтин вәзијјәтләрә дүшәркән бүтүнлүклә бел бағламалы дејиликми? (Ишаја 30:21).

22, 23. а) Чәтинликләр јаранаркән биз Јеһоваја нәјә ҝөрә бел бағламалыјыг вә буну неҹә едә биләрик? б) Нөвбәти мәгаләдә нә мүзакирә едиләҹәк?

²² Лакин Сүлејманын мәсәлләри 3:6 ајәсиндән ҝөрүрүк ки, биз Јеһованы јалныз чәтин вәзијјәтләрлә гаршылашанда јох, ‘бүтүн јолларымызда нәзәрә алмалыјыг’. Буна ҝөрә дә Јеһоваја бел бағладығымызы ҝүндәлик гәрарларымыз ҝөстәрмәлидир. Чәтинликләрлә гаршылашаркән, кәдәрләнмәли, горхмалы вә ја Јеһованын даһа јахшы чыхыш јолу ҝөстәрәрәк бизә вердији рәһбәрлијинә мүгавимәт ҝөстәрмәли дејилик. Биз сынаглара, Јеһованын һөкмранлығыны дәстәкләмәк, Шејтанын јаланчы олдуғуну сүбут етмәк имканы кими бахмалы, һәмчинин итаәткарлыг вә Јеһоваја мәгбул олан диҝәр кејфијјәтләри инкишаф етдирмәлијик (Ибраниләрә 5:7, 8).

²³ Нә гәдәр дә горхулу чәтинликләрлә гаршылашсаг, Јеһоваја ҝүвәнә биләрик. Биз буну, дуаларымызы Аллаһа истигамәтләндирмәклә, һәмчинин бизә рәһбәрлик вермәси үчүн Онун Кәламына вә тәшкилатына мүраҹиәт етмәклә едирик. Бәс буҝүнкү дүнја үчүн ади олан проблемләрлә гаршылашаркән мәһз биз Јеһоваја неҹә ҝүвәнә биләрик? Бу суалы нөвбәти мәгаләдә мүзакирә едәҹәјик.

[Һашијә]

Неҹә ҹаваб верәрдиниз?

• Јеһоваја ҝүвәндијини Давуд неҹә ҝөстәрди?

• Инсан изтирабларынын үч сәбәби нәдәдир вә вахташыры олараг онлары хатырламаг нәјә ҝөрә фајдалыдыр?

• Јеһова бәшәријјәтә һансы һөкмү чыхарыб вә бу һөкм нәјә ҝөрә әдаләтли иди?

• Јеһоваја бел бағламаг нә демәкдир?

[22-ҹи сәһифәдәки шәкилләр]

Давуд Јеһоваја ҝүвәнирди.

[24-ҹү сәһифәдәки шәкил]

Иса изаһ етди ки, Јерусәлимдәки гүлләнин ашмасында Јеһова ҹавабдеһ дејил.