Мәләкләр ‘хидмәтчи руһлардыр’

«Онларын һамысы гуртулушу мирас алаҹаг оланлара јардым етмәк үчүн ҝөндәрилән хидмәтчи руһлар дејилләрми?» (ИБР. 1:14).

1. Матта 18:10 вә Ибраниләрә 1:14 ајәләриндән һансы тәсәллини ала биләрик?

ИСА МӘСИҺ давамчыларыны бүдрәдә биләҹәк һәр кәсә хәбәрдарлыг етмишди: «Бу кичикләрдән биринә хор бахмагдан чәкинин; чүнки сизә дејирәм ки, онларын ҝөјдәки мәләкләри даим Сәмави Атамын үзүнү ҝөрүрләр» (Мат. 18:10). Салеһ мәләкләр һаггында данышаркән һәвари Павел јазмышды: «Онларын һамысы гуртулушу мирас алаҹаг оланлара јардым етмәк үчүн ҝөндәрилән хидмәтчи руһлар дејилләрми?» (Ибр. 1:14). Бу тәсәлливериҹи сөзләр Аллаһын инсанлара көмәк етмәк үчүн сәмави варлыглардан истифадә етдијинә бизи әмин едир. Мүгәддәс Китаб мәләкләр һаггында нә дејир? Онлар бизә неҹә көмәк едир? Онларын нүмунәсиндән нә өјрәнә биләрик?

2, 3. Сәмави руһани варлыгларын бәзи вәзифәләри нәдән ибарәтдир?

² Ҝөјләрдә милјонларла садиг мәләкләр вар. Онларын һамысы Аллаһын «сөзүнә бахыб иҹра едән гүдрәтли» варлыглардыр. (Мәз. 103:20; Вәһј 5:11 ајәсини оху.) Аллаһын руһани оғулларынын һәр бири ајрылыгда шәхсијјәт олмагла јанашы, илаһи хүсусијјәтләрә вә ирадә азадлығына маликдирләр. Онлар мүкәммәл шәкилдә тәшкил олунмушлар вә Аллаһын гурулушунда јүксәк мөвгејә маликдирләр. Баш мәләк Микајылдыр (Исанын сәмави ады) (Дан. 10:13; Јәһуда 9). О, «бүтүн хилгәтин фөвгүндә дуран, илк доғулан» «Кәлам»дыр, јәни Аллаһын Нүмајәндәсидир вә Јеһова бүтүн башга ишләри онун васитәсилә едиб (Колос. 1:15-17; Јәһ. 1:1-3).

³ Баш мәләкдән сонра Јеһованын мүгәддәслијини бәјан едән вә халгынын руһани тәмизлијини һифз едән серафлар ҝәлир. Һәмчинин Аллаһын әзәмәтини дәстәкләјән керувлар да вар (Јар. 3:24; Јешаја 6:1-3, 6, 7). Диҝәр мәләкләр, јәни мүждәчиләр Аллаһын ирадәсинин һәјата кечирилмәсиндә мүхтәлиф тапшырыглары јеринә јетирирләр (Ибр. 12:22, 23).

4. Јерин тәмәли гојуланда мәләкләр һансы һиссләри кечирирдиләр вә ирадә азадлығындан дүзҝүн истифадә етмәк инсанлар үчүн нә демәк иди?

⁴ ‘Јерин тәмәли гојуларкән’ бүтүн мәләкләр севинир вә Јер күрәси бәшәр евинә чевриләндә онлара һәвалә олунан тапшырыглары јеринә јетирмәкдән һәзз алырдылар (Әјј. 38:4, 7). Јеһова инсаны ‘мәләкләрдән бир аз ашағы тутса’ да, ону ‘Өз сурәтиндә’ јаратды, бунунла да Јарадан инсанлара Өз мөһтәшәм хүсусијјәтләрини әкс етдирмәк габилијјәтини верди (Ибр. 2:7; Јар. 1:26). Улу валидејнләримиз ирадә азадлығындан дүзҝүн истифадә етсәјдиләр, ҝәләҹәк өвладлары илә бирҝә Јеһованын шүурлу варлыглардан ибарәт аиләсинин бир һиссәси кими јерүзү ҹәннәтдә јашамагдан һәзз ала биләрдиләр.

5, 6. Ҝөјдә һансы үсјан галдырылды вә Аллаһ буна неҹә ҹаваб верди?

⁵ Аллаһын аиләсиндә баш галдыран үсјаны ҝөрән садиг мәләкләр, сөзсүз ки, дәһшәт ичиндә идиләр. Онлардан бири артыг Јеһоваја һәмд етмәкдән мәмнунлуг дујмурду вә она ибадәт едилмәсини истәјирди. О, Јеһованын һөкмранлығынын әдаләтли олдуғуну шүбһә алтына алараг вә шөһрәтпәрәстликлә рәгиб һакимијјәт гурмаға ҹәһд ҝөстәрәрәк Шејтан (мәнасы «дүшмән») олду. Шејтан һијләҝәрҹәсинә јалана әл атараг илк инсан ҹүтүнү мәһәббәтли Јараданларына гаршы үсјанда она гошулмаға тәһрик етди (Јар. 3:4, 5; Јәһ. 8:44).

⁶ Мүгәддәс Китабда јазылан илк пејғәмбәрлији сөјләмәклә Јеһова Шејтана гаршы дәрһал һөкм кәсди: «Мән сәнинлә гадын арасына, сәнин баланла онун өвлады арасына дүшмәнчилик салырам. Бу өвлад сәнин башындан вураҹаг, сән дә ону дабанындан санҹаҹагсан» (Јар. 3:15). Шејтанла Аллаһын ‘гадыны’ арасында дүшмәнчилик олаҹагды. Бәли, Јеһова садиг мәләкләрдән ибарәт сәмави тәшкилатына Әринә сых бағлы олан севимли ‘гадыны’ кими бахырды. Бу пејғәмбәрлик ҝәләҹәјә әсаслы үмид верирди, бахмајараг ки, мүгәддәс сиррин тәфсилатлары тәдриҹән ачылаҹагды. Аллаһын нијјәти ондан ибарәт иди ки, Онун тәшкилатынын сәмави һиссәсиндән олан бир шәхс бүтүн үсјанкарлары мәһв етсин вә онун васитәсилә ‘һәм ҝөјләрдә, һәм дә јердә олан шејләр’ бирләшдирилсин (Ефес. 1:8-10).

7. Нуһун ҝүнләриндә бәзи мәләкләр нә етдиләр вә бу, онлар үчүн нә илә нәтиҹәләнди?

⁷ Нуһун ҝүнләриндә бәзи мәләкләр «мәскәнләрини» тәрк етдиләр вә худбин еһтирасларыны тәмин етмәк үчүн инсан ҹилдиндә јерә ендиләр (Јәһуда 6; Јар. 6:1-4). Јеһова бу үсјанкарлары зүлмәт гаранлыға атды, бунунла да онлар Шејтана гошулараг ‘пис руһи гүввәләр’ олдулар вә Аллаһын хидмәтчиләри үчүн тәһлүкәли дүшмәнә чеврилдиләр (Ефес. 6:11-13; 2 Пет. 2:4).

Мәләкләр бизә неҹә көмәк едир?

8, 9. Јеһова инсанлара көмәк етмәк үчүн мәләкләрдән неҹә истифадә етмишдир?

⁸ Мәләкләрдән көмәк аланларын сырасында Ибраһимин, Јагубун, Мусанын, Јешуанын, Јешајанын, Даниелин, Исанын, Петерин, Јәһјанын вә Павелин адларыны чәкмәк олар. Садиг мәләкләр Аллаһын һөкмләрини иҹра едир, Мусанын Гануну да дахил олмагла, пејғәмбәрликләри вә ҝөстәришләри чатдырырдылар (2 Пад. 19:35; Дан. 10:5, 11, 14; Һәв. иш. 7:53; Вәһј 1:1). Бу ҝүн Аллаһын Кәламы әлимиздә бүтөв шәкилдә олдуғу үчүн мәләкләрин Аллаһын хәбәрини чатдырмаларына еһтијаҹ олмаја биләр (2 Тим. 3:16, 17). Лакин мәләкләр руһани аләмдә Аллаһын ирадәсини јеринә јетирмәклә вә Онун хидмәтчиләринә көмәк етмәклә мәшғулдурлар.

⁹ Мүгәддәс Китаб бизи әмин едир: «Рәбдән горханлары Онун мәләји мүдафиә едәр, онлара зәфәр верәр» (Мәз. 34:7; 91:11). Нөгсансызлыға даир мүбаһисәли суал галдырылдығына ҝөрә Јеһова Шејтанын бизи мүхтәлиф јолларла сынамасына изин верир (Лука 21:16-19). Лакин Аллаһ ҝүҹүмүздән артыг имтаһан олунмағымыза јол вермәз, чүнки О, нөгсансызлығымызы сүбут етмәк үчүн нә вахта гәдәр сынаға таб ҝәтирә биләҹәјимизи билир. (1 Коринфлиләрә 10:13 ајәсини оху.) Мәләкләр Аллаһын ирадәсинә ујғун шәкилдә һәрәкәтә кечмәјә һәмишә һазырдырлар. Онлар Шадракы, Мешакы, Авед-Негону, Даниели вә Петери хилас етсәләр дә, Стефанын вә Јагубун дүшмәнләр тәрәфиндән өлдүрүлмәсинә мане олмадылар (Дан. 3:17, 18, 28; 6:22; Һәв. иш. 7:59, 60; 12:1-3, 7, 11). Бу иманлы инсанларын дүшдүјү шәраит вә вәзијјәтләр мүхтәлиф олмушдур. Ејнилә насист дүшәрҝәләриндә бәзи гардашлар едам олунса да, Јеһова онларын әксәријјәтинин сағ галмасынын гајғысына галмышды.

10. Мәләкләрин көмәјиндән савајы, даһа һансы көмәјә маликик?

¹⁰ Мүгәддәс Јазылар һәр бир инсанын горујуҹу мәләји олдуғуну өјрәтмир. Биз там әминик ки, Аллаһын «ирадәсинә ујғун шәкилдә бир шеј диләјириксә, О бизи ешидир» (1 Јәһ. 5:14). Әлбәттә, Јеһова бизә көмәк етмәк үчүн мәләк ҝөндәрә биләр, анҹаг көмәји мүхтәлиф јолларла да ала биләрик. Һәмиманлыларымыз бизә јардым етмәјә вә тәсәлли вермәјә тәшвиг олуна биләрләр. ‘Шејтанын мәләји’ ‘бәдәнимизи нештәрләјәрәк’ бизи дилхор едәндә таб ҝәтирә билмәјимиз үчүн Аллаһ бизә мүдриклик вә дахили ҝүҹ верә биләр (2 Кор. 12:7-10; 1 Салон. 5:14).

Исаны тәглид един

11. Исаја көмәк етмәк үчүн Јеһова мәләкләрдән неҹә истифадә етмишди вә онун Аллаһа садиг галмасы сајәсиндә нә ајдын олду?

¹¹ Исаја көмәк етмәк үчүн Јеһованын мәләкләрдән неҹә истифадә етдијини нәзәрдән кечирәк. Онлар онун доғулмасыны вә дирилмәсини бәјан етмиш, јер үзүндә оларкән она хидмәт етмишләр. Мәләкләр онун һәбс олунмасына вә ишҝәнҹәли өлүмүнә әнҝәл ола биләрдиләр. Анҹаг бунун әвәзиндә, ону мөһкәмләндирмәк үчүн бир мәләк ҝөндәрилди (Мат. 28:5, 6; Лука 2:8-11; 22:43). Јеһованын нијјәтинә ујғун олараг, Иса һәјатыны гурбан верди вә бунунла сүбут етди ки, камил инсан ән шиддәтли сынаглар гаршысында белә Аллаһа садиглијини горуја биләр. Буна ҝөрә дә Јеһова Исаны ҝөјләрдә өлмәз һәјата дирилдәрәк ‘бүтүн һакимијјәти’ она верди вә мәләкләри она табе етдирди (Мат. 28:18; Һәв. иш. 2:32; 1 Пет. 3:22). Бунунла да Иса ҝөстәрди ки, Аллаһын ‘гадынынын’ ‘өвладынын’ әсас һиссәсидир (Јар. 3:15; Галат. 3:16).

12. Биз Иса кими неҹә ‘сағламдүшүнҹәли’ ола биләрик?

¹² Иса билирди ки, мәләкләрин көмәјинә архаланыб дүшүнҹәсиз давранараг Јеһованы сынаға чәкмәк дүзҝүн дејил. (Матта 4:5-7 ајәләрини оху.) Буна ҝөрә дә ҝәлин ‘сағламдүшүнҹәли’ (ЈД) һәјат сүрмәклә, лазымсыз рискләрдән гачмагла, еләҹә дә сынагларла үзләшәндә мәтин олмагла Исаны тәглид едәк (Тит. 2:12).

Садиг мәләкләрдән нә өјрәнә биләрик?

13. 2 Петер 2:9-11 ајәләриндә хатырланан садиг мәләкләрин нүмунәсиндән нә өјрәнә биләрик?

¹³ Һәвари Петер Јеһованын мәсһ олунмушларына ‘күфр едәнләри’ мәзәммәт едәрәк садиг мәләкләрин ҝөзәл нүмунәсинә истинад едир. Мәләкләр бөјүк гүдрәтә малик олсалар да, тәвазөкарлыг ҝөстәрәрәк «Рәббин һүзурунда» кимисә мүһакимә етмәкдән чәкинирләр. (2 Петер 2:9-11 ајәләрини оху.) Ҝәлин биз дә јерсиз мүһакимә етмәјәк, јығынҹагда рәһбәрлик һәвалә олунан кәсләрә һөрмәтлә јанашаг вә мәсәләни Али Һаким олан Јеһованын өһдәсинә бурахаг (Ром. 12:18, 19; Ибр. 13:17).

14. Тәвазөкарлыг тәзаһүр етдирмәкдә мәләкләрдән нә өјрәнә биләрик?

¹⁴ Јеһованын мәләкләри тәвазөкарлыгла хидмәт етмәкдә бизә ҝөзәл нүмунәдирләр. Бәзи мәләкләр адларыны инсанлара ачмагдан имтина етмишләр (Јар. 32:29; Һак. 13:17, 18). Ҝөјдә милјонларла мәләкләрин олмасына бахмајараг, Мүгәддәс Китабда јалныз Микајыл вә Ҹәбрајылын ады чәкилир. Бу, бизи мәләкләрә һәдсиз еһтирам ҝөстәрмәкдән горуја биләр (Лука 1:26; Вәһј 12:7). Һәвари Јәһја мәләјин гаршысында диз чөкүб сәҹдә едәндә мәләк ону чәкиндирәрәк деди: «Бах, буну етмә! Мән сәнин пејғәмбәр гардашларынын... һәмкарыјам» (Вәһј 22:8, 9). Дуаларымыз да дахил олмагла, биз јалныз Аллаһа ибадәт етмәлијик. (Матта 4:8-10 ајәләрини оху.)

15. Мәләкләр сәбир етмәкдә бизә һансы нүмунәни верирләр?

¹⁵ Мәләкләр сәбирли олмагда да бизә нүмунәдирләр. Онлар Аллаһын мүгәддәс сирләри илә јахындан мараглансалар да, һәр шеји билмирләр. Мүгәддәс Китабда дејилир: «Бу һәгигәтләри мәләкләр дә тәдгиг етмәк истәјирләр» (1 Пет. 1:12). Буна бахмајараг, онлар Аллаһын ‘чохҹәһәтли һикмәтини иманлылар ҹәмијјәти васитәсилә’ ачмасыны сәбирлә ҝөзләјирләр (Ефес. 3:10, 11).

16. Бизим давранышымыз мәләкләрә неҹә тәсир едә биләр?

¹⁶ Сынаглара мәруз галан мәсиһчиләр ‘мәләкләр үчүн тамашаја’ чеврилирләр (1 Кор. 4:9). Мәләкләр бөјүк мәмнунијјәтлә садиглијимизи неҹә горудуғумузу сејр едир вә һәтта төвбә едән бир ҝүнаһкар үчүн севинирләр (Лука 15:10). Мәсиһчи гадынларын Аллаһа мәгбул давранышы мәләкләрин нәзәриндән гачмыр. Мүгәддәс Китаб ҝөстәрир ки, «мәләкләрин хатиринә гадын өз башы үзәриндә һакимијјәт рәмзинә малик олмалыдыр» (1 Кор. 11:3, 10). Бәли, мәсиһчи гадынларын вә Аллаһын јер үзүндәки диҝәр хидмәтчиләринин теократик гајда-ганунлара вә башчылыг принсипинә табе олмалары мәләкләри мәмнун едир. Бу ҹүр табечилик Аллаһын сәмави оғулларына мүнасиб хатырлатма кими хидмәт едир.

Мәләкләр тәблиғ ишини фәал сурәтдә дәстәкләјирләр

17, 18. Тәблиғ ишиндә мәләкләрин бизи дәстәкләдијини нәјә ҝөрә дејә биләрик?

¹⁷ Мәләкләр «Рәббин ҝүнүндә» һәјата кечән бәзи мөһтәшәм ишләрдә иштирак едирләр. Бу ишләрә 1914-ҹү илдә Падшаһлығын доғулмасы, Шејтанын вә онун ҹинләринин «Микајыл вә онун мәләкләри» тәрәфиндән јерә атылмасы дахилдир (Вәһј 1:10; 11:15; 12:5-9). Һәвари Јәһја ‘ҝөјүн ортасында учан бир мәләји ҝөрдү. Онун әбәди бир Мүждәси вар иди ки, јер үзүндә јашајанлара тәблиғ етсин’. Мәләк бәјан едирди: «Аллаһдан горхун! Она иззәт верин! Чүнки Онун һөкмүнүн вахты ҝәлди. Ҝөјү, јери, дәнизи вә су булагларыны Јарадана сәҹдә един!» (Вәһј 14:6, 7). Буна ҝөрә дә Јеһованын хидмәтчиләри әминдирләр ки, Шејтанын ҝүҹлү мүгавимәтләринә бахмајараг, тәсис олунмуш Падшаһлыг һаггында хош хәбәри тәблиғ етдикләри тәгдирдә мәләкләр онлары дәстәкләјир (Вәһј 12:13, 17).

¹⁸ Мәләк Филиплә данышараг ону һәбәшистанлы хәдимә јөнәлтдији кими, бу ҝүн мәләкләр сәмими-гәлбли инсанлара тәрәф јөнәлтмәк үчүн бизимлә данышмырлар (Һәв. иш. 8:26-29). Лакин бу ҝүн бир чох нүмунәләр ҝөстәрир ки, биз мәләкләри ҝөрмәсәк дә, онлар Падшаһлығын тәблиғ ишиндә бизи дәстәкләјир вә ‘әбәди һәјата мејлли оланлары’ (ЈД) тапмаға јөнәлдирләрa (Һәв. иш. 13:48). Атаја ‘руһән вә һәгигәтән ибадәт етмәк’ истәјәнләри тапа билмәк үчүн хидмәтдә мүнтәзәм иштирак етмәјимиз неҹә дә ваҹибдир! (Јәһ. 4:23, 24).

19, 20. Мәләкләр ‘дөврүн сонунда’ баш верән һадисәләрдә һансы ролу ојнајыр?

¹⁹ Иса бизим ҝүнләрә ишарә едәрәк ‘дөврүн сонунда’ мәләкләрин ‘писләри салеһләрин арасындан кәнар едәҹәјини’ демишди (Мат. 13:37-43, 49). Мәләкләр мәсһ олунмушларын јығымынын сонунда вә сон мөһүрләнмәдә иштирак едирләр. (Матта 24:31 ајәсини оху; Вәһј 7:1-3) Үстәлик, Иса ‘гојунлары кечиләрдән ајыранда’ мәләкләр дә онунла олаҹаглар (Мат. 25:31-33, 46).

²⁰ ‘Иса гүдрәтли мәләкләри илә ҝөјдән зүһур етдији заман’ ‘Аллаһы танымајан вә Өзү барәсиндәки Мүждәјә итаәт етмәјәнләрин’ һамысы мәһв едиләҹәк (2 Салон. 1:6-10). Јәһја һәмин һадисәни ҝөрүнтүдә ҝөрәндә Исаны вә мәләкләр ордусуну әдаләтли мүһарибә апармаг үчүн ағ атларын белиндә ҝетдикләрини тәсвир едир (Вәһј 19:11-14).

21. «Әлиндә дибсиз дәринликләрин ачары вә бөјүк бир зәнҹир» олан мәләк Шејтана вә онун ҹинләринә гаршы һансы тәдбири ҝөрәҹәк?

²¹ Јәһја һәмчинин ‘ҝөјдән енән бир мәләји ҝөрдү. Әлиндә дибсиз дәринликләрин ачары вә бөјүк бир зәнҹир варды’. Мәһз Баш мәләк Микајыл Иблиси вә чох еһтимал ки, онун ҹинләрини зәнҹирләјиб дибсиз дәринликләрә атаҹаг. Онлар Мәсиһин Миниллик Һөкмранлығынын сонунда камил бәшәријјәти сонунҹу сынаға чәкмәк үчүн гыса мүддәтә азадлыға бурахылаҹаглар. Бундан сонра Шејтан вә диҝәр үсјанчылар мәһв едиләҹәкләр (Вәһј 20:1-3, 7-10; 1 Јәһ. 3:8). Аллаһа гаршы үсјан галдыранларын һамысы арадан галдырылаҹаг.

22. Тезликлә баш верәҹәк һадисәләрдә мәләкләр неҹә иштирак едәҹәкләр вә онларын ролу һагда сән нә дүшүнүрсән?

²² Тезликлә биз Шејтанын пис системиндән азад олаҹағыг. Мәләкләр Јеһованын али һөкмранлығынын бәраәт газанмасында, јерә вә бәшәријјәтә даир нијјәтләринин һәјата кечмәсиндә ваҹиб рол ојнајаҹаглар. Садиг мәләкләр һәгигәтән дә ‘гуртулушу мирас алаҹаг оланлара јардым етмәк үчүн ҝөндәрилән хидмәтчи руһлардырлар’. Буна ҝөрә дә ҝәлин ирадәсини јеринә јетирмәкдә вә әбәди һәјата наил олмагда бизә мәләкләр васитәсилә көмәк етдијинә ҝөрә Јеһова Аллаһа миннәтдар олаг.

[Һашијә]

Неҹә ҹаваб верәрдиниз?

• Ҝөјдәки руһани варлыглар неҹә тәшкил олунублар?

• Нуһун ҝүнләриндә бәзи мәләкләр нә етдиләр?

• Мәләкләр васитәсилә Аллаһ бизә неҹә көмәк едир?

• Бизим ҝүнләрдә садиг мәләкләр һансы ишлә мәшғулдурлар?

[21-ҹи сәһифәдәки шәкил]

Мәләкләр Аллаһын ирадәсинин јеринә јетмәсиндән севинҹ дујурлар

[23-ҹү сәһифәдәки шәкил]

Даниелин һадисәсиндә олдуғу кими, мәләкләр Аллаһын ирадәсинә ујғун шәкилдә һәрәкәт етмәјә һәмишә һазырдырлар

[24-ҹү сәһифәдәки шәкил]

Мәтин ол, чүнки мәләкләр Падшаһлығын тәблиғ ишиндә бизә архадырлар!

[Иҹазә илә]

Globe: NASA photo