Ҝөјләрдә вә јердә олан һәр шејин топланмасы
‘Аллаһын илтифаты һәм ҝөјләрдә, һәм дә јердә олан һәр шеји Мәсиһин башчылығы алтында [«јенидән топламагдыр», ЈД]’ (ЕФЕСЛИЛӘРӘ 1:9, 10).
1. Јеһованын ҝөј вә јер үчүн ‘илтифаты’ нәдән ибарәтдир?
КАИНАТДА әмин-аманлығын һөкм сүрмәси — «сүлһ мәнбәји олан» Јеһова Аллаһын иззәтли нијјәтидир! (Ибраниләрә 13:20). Һәвари Павел мүгәддәс руһун тә’сири алтында јазмышдыр ки, Јеһованын ‘илтифаты’ — «һәм ҝөјләрдә, һәм дә јердә олан һәр шеји Мәсиһин башчылығы алтында [«јенидән топламагдыр», ЈД]» (Ефеслиләрә 1:9, 10). Бу ајәдә «јенидән топламаг» кими тәрҹүмә олунан фе’л һансы мә’наны дашыјыр? Мүгәддәс Китаб алими Ҹ. Б. Лајтфут гејд едир: «Бу ифадә Каинатда һөкм сүрән там һармонијаны билдирир. Артыг орада јад вә аһәнҝсиз үнсүрләрә јер олмајаҹаг, лакин бүтүн тәркиб һиссәләр Мәсиһин әтрафында бирләшәҹәк. Ҝүнаһ, өлүм, кәдәр, уғурсузлуг вә изтираблар битәҹәк».
‘Ҝөјләрдә оланлар’
2. ‘Ҝөјләрдә оланларын’ топланмасы дедикдә кимләр нәзәрдә тутулур?
2 Һәвари Петер мәсиһчиләрин малик олдуглары ҝөзәл үмид һаггында јазырды: «Биз Онун вә’динә ҝөрә јени ҝөјләр вә јени јер ҝөзләјирик ки, онларда салеһлик өмүр сүрүр» (2 Петер 3:13). Бурада вә’д едилән «јени ҝөјләр» алтында јени һөкумәт — Хиласкар Падшаһлыг нәзәрдә тутулур. Һәвари Павелин ефеслиләрә јаздығы мәктубунда хатырланан ‘ҝөјләрдә оланлар’ ‘Мәсиһин башчылығы алтында’ топланмалыдырлар. Онлар, Мәсиһлә ҝөјдә һөкмранлыг едәҹәк мәһдуд сајлы 144 000 нәфәр инсандыр (1 Петер 1:3, 4). Мәсһ едилмиш мәсиһчиләр Иса Мәсиһин сәмави Падшаһлығынын һәмварисләри олмаг үчүн «јер үзүндән», ‘инсанлар арасындан сатын алынырлар’ (Вәһј 5:9, 10; 14:3, 4, И–93; 2 Коринфлиләрә 1:21; Ефеслиләрә 1:11; 3:6).
3. Мәсһ едилмиш мәсиһчиләр һәлә јер үзүндә икән, һансы мә’нада ‘сәмави аләмдә отурурлар’?
3 Мәсһ едилмиш мәсиһчиләр Јеһованын руһани өвладлары олмаг үчүн мүгәддәс руһдан јенидән доғулурлар (Јәһја 1:12, 13; 3:5-7). Јеһованын онлары ‘оғуллуға’ ҝөтүрмәси нәтиҹәсиндә онлар Исанын гардашлары олурлар (Ромалылара 8:15; Ефеслиләрә 1:5). Буна ҝөрә, һәлә јер үзүндә јашајаркән бу мәсиһчиләр һагда дејилир ки, онлар ‘Мәсиһлә бәрабәр сәмави аләмдә отурурлар’ (Ефеслиләрә 1:3; 2:6). Онлар ҝөјләрдә һазырланмыш белә уҹа руһани мөвгејә ‘мирасларынын рәһни олан вә’д олунмуш Мүгәддәс Руһ илә мөһүрләндикләри’ үчүн саһибдирләр (Ефеслиләрә 1:13, 14; Колослулара 1:5). Демәли, топланмалы олан ‘ҝөјләрдә оланлар’, Јеһованын үмуми сајыны габагҹадан мүәјјән етдији мәсһ едилмиш мәсиһчиләрдир.
Топланыш башланыр
4. ‘Ҝөјләрдә оланларын’ топланмасы нә вахт вә неҹә башланды?
4 Јеһованын ‘ишләри идарә’ етмәк үсулуна мүвафиг олараг ‘ҝөјләрдә оланларын’ топланмасы «вахт тамам олдугда» башланмалы иди (Ефеслиләрә 1:10). Ҝөзләнилән бу «вахт», ерамызын 33-ҹү илинин Пентикост ҝүнүндә јетишди. Һәмин ҝүн Мәсиһин һәвариләринин вә диҝәр шаҝирдләрин, киши вә гадынларын үзәринә Аллаһын мүгәддәс руһу төкүлмүшдү (Һәвариләрин ишләри 1:13-15; 2:1-4). Бу, јени әһдин гүввәјә минмәсини, мәсиһчи јығынҹағынын вә ‘Аллаһын Исраилинин’, јә’ни јени руһани Исраил халгынын доғулмасыны сүбут етди (Галатијалылара 6:16; Ибраниләрә 9:15; 12:23, 24).
5. Јеһова нәјә ҝөрә ҹисмани Исраили әвәз едән јени ‘халг’ јаратды?
5 Ҹисмани Исраиллә Ганун әһди бағланса да, онлар ҝөјдә әбәдијјән хидмәт едәҹәк ‘каһинләр сәлтәнәти [вә] мүгәддәс милләт’ ола билмәди (Чыхыш 19:5, 6). Иса јәһуди дин рәһбәрләринә демишди: «Аллаһын Сәлтәнәти [Падшаһлығы] сиздән алыныб, онун мејвәләрини јетишдирәҹәк бир халга вериләҹәкдир» (Матта 21:43). Бу халг, јени әһдә дахил олан мәсһ едилмиш мәсиһчиләрдән ибарәт руһани Исраилдир. Һәвари Петер бу мәсиһчиләрә јазмышды: «Сиз исә, сечилмиш нәсил, Һөкмдарын каһин тајфасы, мүгәддәс милләт, Аллаһа мәхсус халгсыныз ки, сизи гаранлыгдан Өз валеһедиҹи нуруна чағыранын фәзиләтләрини е’лан едәсиниз. Сиз бир заманлар халг дејилдиниз, инди исә Аллаһын халгысыныз» (1 Петер 2:9, 10). Јеһова ҹисмани Исраиллә әһдинә сон гојду, онлар артыг Аллаһын халгы дејилди (Ибраниләрә 8:7-13). Исанын пејғәмбәрлик етдији кими, Хиласкар Падшаһлығын бир һиссәси олмаг үстүнлүјү онлардан алыныб, 144 000 нәфәрдән ибарәт руһани Исраилә верилди (Вәһј 7:4-8).
Падшаһлыг әһдинә гәбул едиләнләр
6, 7. Иса мүгәддәс руһдан доғулмуш гардашлары илә һансы хүсуси әһди бағлады вә онлар үчүн бу нә демәкдир?
6 Иса Мәсиһ, өлүмүнүн Хатирә Ҝеҹәсини тә’сис едән ахшам садиг һәвариләринә демишди: «Кечирдијим сынагларда Мәнимлә бәрабәр оланлар сизсиниз вә Атам Мәнә бир сәлтәнәт [падшаһлыг] тапшырдығы кими Мән дә сизә бир сәлтәнәт [падшаһлыг] тапшырырам ки, Мәним Сәлтәнәтимдә [Падшаһлығымда] сүфрәмдә јејиб-ичәсиниз вә Исраилин он ики гәбиләсинә һөкм етмәк үчүн тахтларда отурасыныз» (Лука 22:28-30). Иса бурада хүсуси әһди — 144 000 нәфәрдән ибарәт мүгәддәс руһдан доғулан гардашлары илә бағладығы әһди нәзәрдә тутурду. Онлар «өлүмәдәк» садиг галаҹаг вә ‘галиб ҝәләҹәкдиләр’ (Вәһј 2:10; 3:21).
7 Бу кичик група дахил оланлар јер үзүндә инсан кими әбәди јашамаг үмидиндән имтина етдиләр. Онлар бәшәријјәтә һөкм етмәк үчүн ҝөјдә Иса илә бирликдә һакимијјәт сүрәҹәкләр (Вәһј 20:4, 6). Ҝәлин јалныз мәсһ едилмишләрә аид олан вә ‘башга гојунларын’ чөрәк вә шәраб символларындан нијә гәбул етмәдикләрини изаһ едән диҝәр Мүгәддәс Китаб ајәләрини тәдгиг едәк (Јәһја 10:16).
8. Мәсһ едилмиш мәсиһчиләрин чөрәкдән гәбул етмәләри нәји тәмсил едир? (13-ҹү сәһифәдә олан чәрчивәјә бахын.)
8 Мәсһ едилмиш мәсиһчиләр Исанын изтирабларына шәрикдирләр вә Иса кими өлүмә белә ҝетмәјә һазырдырлар. Онлардан бири олан Павел ‘Мәсиһи әлдә етмәк, Онун дирилмә гүдрәтини дәрк етмәк, Онун изтирабларына шәрик олмаг үчүн’ һәр ҹүр гурбанлар вермәјә һазыр олдуғу һаггында јазмышды. Бәли, Павел ‘[Исанын] өлүмүндә Она бәнзәмәјә’ белә һазыр иди (Филипилиләрә 3:8, 10). Бир чох мәсһ едилмиш мәсиһчиләр физики бәдәнләриндә ‘Исанын өлүмүнү ҝәздирирләр’, јә’ни онун мә’руз галдығы изтираблара мә’руз галырлар (2 Коринфлиләрә 4:10).
9. Хатирә Ҝеҹәсиндә истифадә олунан чөрәк һансы мә’нада бәдәнин рәмзидир?
9 Иса Хатирә Ҝеҹәсини тә’сис едәндә демишди: «Бу Мәним бәдәнимдир» (Марк 14:22). О, тезликлә дөјүләҹәк вә гана бојанаҹаг бәдәниндән данышырды. Мајасыз чөрәк Исанын бәдәнинин мүвафиг рәмзи иди. Нәјә ҝөрә? Чүнки Мүгәддәс Китабда маја ҝүнаһ вә нөгсанлылыға ишарә едир (Матта 16:4, 11, 12; 1 Коринфлиләрә 5:6-8). Иса камил инсан иди, онун инсан бәдәни ҝүнаһсыз иди. Буна ҝөрә дә, Мәсиһ өз бәдәнини әфв тә’мин едән гурбан кими верә биләрди (Ибраниләрә 7:26; 1 Јәһја 2:2). Онун гурбаны бүтүн мәсиһчиләрә — һәм ҝөјләр, һәм дә јер үзү Ҹәннәтдә әбәди јашамаг үмиди оланлара фајда ҝәтирәҹәк (Јәһја 6:51).
10. Хатирә Ҝеҹәсиндә шәрабдан гәбул едәнләр «Мәсиһин ганына» неҹә ‘шәрик’ олурлар?
10 Хатирә Ҝеҹәсиндә мәсһ едилмиш мәсиһчиләрин ичдикләри шәраба ҝәлдикдә исә Павел јазмышды: «Шүкүр етдијимиз шүкран касасы Мәсиһин ганына шәриклик дејилми?» (1 Коринфлиләрә 10:16). Шәрабдан гәбул едәнләр һансы мә’нада ‘Мәсиһин ганына шәрикдирләр’? Әлбәттә ки, онлар фидијә гурбанынын ҝәтирилмәсиндә иштирак етмирләр, чүнки онларын өзләринин ҝүнаһларынын бағышланмасына еһтијаҹлары вар. Мәсиһин, ҝүнаһлары јумаг ҝүҹүнә малик олан ганына иман ҝәтирмәләри сајәсиндә, онларын ҝүнаһлары бағышланыр вә ҝөјдә јашамаг үчүн салеһ е’лан едилирләр (Ромалылара 5:8, 9; Титуса 3:4-7). Мәсиһин төкүлмүш ганы васитәсилә, онун 144 000 Падшаһлыг шәрики ‘мүгәддәсләр’ олмаг үчүн ‘тәгдис едилир’, ајрылыр вә ҝүнаһлардан тәмизләнир (Ибраниләрә 10:29; Даниел 7:18, 27; Ефеслиләрә 2:19). Бәли, мәһз төкүлмүш ганынын васитәсилә Мәсиһ ‘һәр гәбиләдән, дилдән, халгдан вә милләтдән [онлары] Аллаһ үчүн сатын алды, Аллаһа хидмәт үчүн падшаһ вә каһин тә’јин етди вә [онлар] дүнја үзәриндә сәлтәнәт сүрәҹәкләр’ (Вәһј 5:9, 10).
11. Мәсһ едилмиш мәсиһчиләр Хатирә Ҝеҹәсиндә шәрабдан ичмәклә нәји билдирирләр?
11 Иса Хатирә Ҝеҹәсини тә’сис едәндә, бир каса шәраб ҝөтүрүб, ону шаҝирдләринә узадараг деди: «Бундан һамыныз ичин! Чүнки бу, Мәним ганым, ҝүнаһларын бағышланмасы үчүн бир чохлары уғрунда төкүлән Әһди-Ҹәдидин ганыдыр» (Матта 26:27, 28). Буға вә тәкәләрин ганы Аллаһла Исраил халгы арасында бағланан Ганун әһдинә гануни гүввә вердији кими, Мәсиһин төкүлән ганы да Јеһованын руһани Исраиллә бағладығы јени әһдә ерамызын 33-ҹү илинин Пентикост ҝүнүндән башлајараг гануни гүввә верди (Чыхыш 24:5-8; Лука 22:20; Ибраниләрә 9:14, 15). ‘Әһди-Ҹәдидин ганынын’ рәмзи олан шәрабы ичмәклә мәсһ едилмиш мәсиһчиләр бу јени әһдә гәбул олундугларыны ҝөстәрир вә онун хејир-дуаларыны алырлар.
12. Мәсһ едилмиш мәсиһчиләр Мәсиһин өлүмүнә неҹә вәфтиз олунурлар?
12 Мәсһ едилмиш мәсиһчиләрә бир шеји дә јадда сахламаг лазымдыр. Иса садиг шаҝирдләринә демишди: «Мәним ичәҹәјим касадан ичәҹәксиниз вә Мән вәфтиз олдуғум кими вәфтиз олаҹагсыныз» (Марк 10:38, 39). Бир гәдәр сонра һәвари Павел демишдир ки, мәсиһчиләр Мәсиһин ‘өлүмүнә вәфтиз олунурлар’ (Ромалылара 6:3). Мәсһ едилмиш мәсиһчиләр һәјатларыны гурбан верирләр, јә’ни онлар јер үзүндә әбәди јашамаг үмидиндән имтина едирләр. Мәсиһин өлүмүнә вәфтиз олунмалары садиг галараг өлүб, Иса илә бирликдә ҝөјдә ‘сәлтәнәт [падшаһлыг] етмәк’ үчүн руһани мәхлуглар кими дириләндән сонра баша чатыр (2 Тимотејә 2:10-12; Ромалылара 6:5; 1 Коринфлиләрә 15:42-44, 50).
Символлардан гәбул етмәк
13. Јер үмиди оланлар нәјә ҝөрә символлардан гәбул етмир, лакин нәјә ҝөрә Хатирә Ҝеҹәсинә ҝәлирләр?
13 Хатирә ҝеҹәсиндә чөрәк вә шәрабдан гәбул етмәк садаладығымыз мә’налары дашыдығындан ајдындыр ки, јер үмиди оланларын бу символлардан гәбул етмәси јерсиз оларды. Онлар баша дүшүрләр ки, Мәсиһин бәдәнинин мәсһ едилмиш үзвләри дејилләр вә Јеһованын Иса Мәсиһин һәмварисләри илә бағладығы јени әһдә дахил едилмирләр. «Каса» јени әһди тәмсил етдији үчүн, јалныз бу әһддә оланлар символлардан гәбул едир. Камил инсан кими Падшаһлығын рәһбәрлији алтында јердә әбәдијјән јашамаг үмиди оланлар Исанын өлүмүнә вәфтиз олмадыглары кими, ҝөјләрдә һөкмранлыг етмәк үчүн дә чағрылмајыблар. Символлардан гәбул етмәләри ҝөстәрәҹәк ки, онлар өзләринә аид олмајан шејин иддиасындадырлар. Һөрмәтҹил мүшаһидәчиләр кими мәрасимдә иштирак етсәләр дә, онлар символлардан гәбул етмирләр. Бу мәсиһчиләр Јеһованын онлар үчүн етдији һәр шејә, һәмчинин Оғлунун төкүлмүш ганы васитәсилә ҝүнаһларыны бағышладығына ҝөрә Она дәриндән миннәтдардырлар.
14. Мәсһ едилмиш мәсиһчиләр чөрәк вә шәрабдан гәбул едәрәк руһани ҹәһәтдән неҹә мөһкәмләнирләр?
14 Мәсиһлә бирҝә ҝөјдә һөкмранлыг едәҹәк нисбәтән азсајлы мәсиһчиләрин гәти олараг мөһүрләнмәси баша чатмаг үзрәдир. Мәсһ едилмиш мәсиһчиләр гурбан вердикләри һәјатларынын сонунадәк символлардан гәбул едәндә руһән мөһкәмләнирләр. Онлар, Мәсиһин бәдәнинин үзвләри кими, мәсһ олунмуш диҝәр баҹы вә гардашлары илә вәһдәтдә олдугларыны һисс едирләр. Символик мә’на дашыјан чөрәк вә шәрабдан гәбул етмәләри мәсһ едилмишләрә өлүмәдәк садиг галмаг мәс’улијјәтләрини хатырладыр (2 Петер 1:10, 11).
‘Јердә оланларын топланмасы’
15. Мәсһ едилмиш мәсиһчиләрин әтрафына кимләр топланмаға башлады?
15 1930-ҹу илләрин орталарындан е’тибарән мәсһ едилмиш мәсиһчиләрин тәрәфини тутан ‘диҝәр гојунларын’ сајы ҝет-ҝедә артыр. ‘Кичик сүрүнүн’ үзвләри олмајан бу инсанлар јер үзүндә јашајаҹаглар (Јәһја 10:16; Лука 12:32; Зәкәријјә 8:23). Онлар «Сәмави Сәлтәнәт [Падшаһлыг] һаггында олан... Мүждә» барәдә бүтүн милләтләрә шаһидлик етмәкдә әвәзсиз көмәк ҝөстәрмәклә Мәсиһин гардашларынын садиг һәмкарлары олдулар (Матта 24:14; 25:40). Буна ҝөрә, Мәсиһ онлары өз ‘гојунлары’ һесаб едәҹәк вә милләтләрә һөкм вермәк вахты ҝәләндә, онлары сағ тәрәфинә гојаҹаг (Матта 25:33-36, 46). Мәсиһин ганына иман ҝәтирдикләри үчүн онлар «бөјүк мәшәггәтдән» сағ чыхаҹаг ‘бөјүк издиһамы’ тәшкил едәҹәкләр (Вәһј 7:9-14).
16. ‘Јердә оланлара’ кимләр дахилдир вә онларын һамысы ‘Аллаһын өвладлары’ неҹә ола биләрләр?
16 Јүз гырх дөрд мин нәфәрин гәти олараг мөһүрләнмәси баша чатдыгдан сонра дағыдыҹы ‘күләкләр’ Шејтанын јер үзүндәки пис системини мәһв едәҹәк (Вәһј 7:1-4). Мәсиһин вә диҝәр каһин-падшаһларын Миниллик Һөкмранлығы заманы сајы-һесабы мә’лум олмајан дириләнләр бөјүк издиһама гошулаҹаглар (Вәһј 20:12, 13). Онларын Хиласкар Падшаһ Иса Мәсиһин даими тәбәәләри олмаг имканы олаҹагдыр. Миниллик Һөкмранлығын сонунда ‘јердә оланлар’ сон имтаһандан кечәҹәкләр. Салеһ галанлар Аллаһын јер ‘өвладлары’ олаҹаглар (Ефеслиләрә 1:10; Ромалылара 8:21; Вәһј 20:7, 8).
17. Јеһованын нијјәти неҹә һәјата кечириләҹәк?
17 Беләликлә, Јеһова мисилсиз мүдриклији илә ‘ишләри идарә’ едәрәк ‘һәм ҝөјләрдә, һәм дә јердә олан һәр шеји Мәсиһин башчылығы алтында јенидән топламаг’ нијјәтини һәјата кечирәҹәк. Бүтүн Каинатда сүлһ бәргәрар олунаҹаг. Ҝөјдә вә јердә олан бүтүн сүурлу мәхлуглар топланараг бөјүк нијјәтләр Аллаһы Јеһованын адил һөкмранлығына севинҹлә табе олаҹаглар.
18. Мәсһ едилмиш мәсиһчиләр вә онларын әмәкдашлары Хатирә Ҝеҹәсиндән һансы фајданы әлдә едәҹәкләр?
18 2006-ҹы ил апрелин 12-дә кечириләҹәк ҝөрүш сајҹа аз олан мәсһ едилмиш мәсиһчиләрин вә онларын әмәкдашлары олан милјонларла ‘диҝәр гојунларын’ иманыны мөһкәмләндирәҹәк. Онлар, Исанын тапшырдығы кими, Мәсиһин өлүмүнүн Хатирә Ҝеҹәсини гејд едәҹәкләр: «Буну Мәни анмаг үчүн един» (Лука 22:19). Бүтүн иштирак едәнләр Јеһованын севимли Оғлу Иса Мәсиһин васитәсилә онлар үчүн етдијини јаддан чыхармамалыдырлар.
Тәкрар үчүн суаллар
• ‘Ҝөјләрдә вә јердә олан һәр шеј’ үчүн Јеһованын нијјәти нәдән ибарәтдир?
• ‘Ҝөјләрдә оланлар’ кимләрдир вә онлар неҹә топланыблар?
• ‘Јердә оланлар’ кимләрдир вә онларын һансы үмиди вар?
[13-ҹү сәһифәдәки чәрчивә]
‘Мәсиһин бәдәни’
Павел 1 Коринфлиләрә 10:16, 17 ајәләриндә чөрәјин Мәсиһин руһла мәсһ едилмиш гардашлары үчүн хүсуси әһәмијјәт кәсб етдијини мүзакирә едәркән «бәдән» сөзүнү хүсуси мә’нада ишләтмишди: «Бөлдүјүмүз чөрәк, Мәсиһин бәдәнинә шәриклик дејилми? Мадам ки, чөрәк бирдир, демәли чох олан бизләр дә бир бәдәник; чүнки һамымыз бир чөрәкдән пај алырыг». Мәсһ едилмиш мәсиһчиләрин јығынҹағы санки башы Мәсиһ олан бир бәдәндир. Мәсһ едилмиш мәсиһчиләр Хатирә Ҝеҹәсиндә чөрәкдән ‘пај аланда’ һәмин јығынҹаг илә вәһдәтдә олдугларыны е’лан едирләр (Матта 23:10; 1 Коринфлиләрә 12:12, 13, 18).
[13-ҹү сәһифәдәки шәкилләр]
Нәјә ҝөрә чөрәк вә шәрабдан јалныз мәсһ едилмиш мәсиһчиләр гәбул едирләр?
[15-ҹи сәһифәдәки шәкил]
‘Ишләри идарә етмәк’ үсулу васитәсилә Јеһова ҝөјдә вә јердә олан бүтүн мәхлуглары бирләшдирәҹәк.