«Биз јекдилликлә гәрара алдыг»

1, 2. а) Биринҹи әсрдәки рәһбәрлик шурасы һансы ҹидди суалларла үзләшир? б) Јеһованын рәһбәрлијини анламаг үчүн гардашлар һансы амилләри нәзәрдән кечирирләр?

ҺӘЛЛЕДИҸИ мәгам јетишиб. Јерусәлимдә бир јерә топлашан һәвариләр вә ағсаггаллар ваҹиб гәрар гәбул етмәк үзрәдир. Сүннәт мәсәләси ҹидди суаллара сәбәб олуб: мәсиһиләр Мусанын ганунуна табе олмалыдырлармы? Јәһуди вә гејри-јәһуди мәсиһиләр арасында фәрг гојулмалыдырмы?

² Гардашлар артыг бир чох дәлилләри — Аллаһын Кәламындакы пејғәмбәрликләри, еләҹә дә Јеһованын немәтләр вердијини ҝөстәрән вә шәхсән шаһиди олдуглары сүбутлары нәзәрдән кечирибләр. Һамы өз фикрини ајдын вә там шәкилдә билдириб. Бу мәсәлә илә бағлы онларын әлиндә кифајәт гәдәр дәлил вар. Мүгәддәс руһун рәһбәрлији ачыг-ашкар ҝөрүнүр. Ҝөрәсән гардашлар бу рәһбәрлијә табе олаҹаглар?

3. «Һәвариләрин ишләри» китабынын 15-ҹи фәслиндә јазылан әһвалатын бизә һансы хејри дәјә биләр?

³ Бу мәсәләдә мүгәддәс руһун рәһбәрлијинә табе олмаг үчүн һәвариләрдән вә ағсаггаллардан ҝүҹлү иман вә ҹәсарәт тәләб олунур. Верәҹәкләри гәрар јәһуди дин рәһбәрләринин онлара гаршы олан нифрәтини артыра биләр. Үстәлик, јығынҹағын ичиндә дә вәзијјәт үрәкачан дејил. Бәзиләри истәјир ки, Аллаһын халгы јенидән Мусанын ганунуна риајәт етсин. Ҝөрәсән, рәһбәрлик шурасы неҹә давранаҹаг? Бу һадисәни арашдырдыгҹа онларын мәсәләни неҹә һәлл етдијини вә бунунла да мүасир Рәһбәрлик Шурасы үчүн һансы нүмунәни гојдуғуну өјрәнәҹәјик. Әслиндә, бизләрдән һәр биримиз бир мәсиһи кими һәјатда чәтинликләрлә үзләшәндә вә ја гәрар гәбул етмәли оланда онларын нүмунәсини изләмәлијик.

«Пејғәмбәрләрин китабында јазыланлар... үст-үстә дүшүр» (Һәвариләрин ишләри 15:13—21)

4, 5. Јагуб Аллаһын Кәламындан һансы пејғәмбәрлији ситат ҝәтирди?

⁴ Исанын гардашы Јагуб сөзә башладыa. Ҝөрүнүр, ҝөрүшә о, сәдрлик едирди. Јагубун сөзләри гардашларын һамылыгла ҝәлдији нәтиҹәни конкретләшдирди. О деди: «Аллаһын диҝәр халглардан Өз адыны дашыјан бир халг тәшкил етмәк үчүн онлара илк дәфә неҹә нәзәр салдығыны Шәмун әтрафлы нәгл етди. Пејғәмбәрләрин китабында јазыланлар да бунунла үст-үстә дүшүр» (Һәв. 15:14, 15).

⁵ Еһтимал ки, Шәмун, јәни Шимон Бутрусун нитги, еләҹә дә Барнәба вә Булусун тәгдим етдији дәлилләр Јагуба мүзакирә олунан мөвзуја аид бәзи ајәләри хатырлатды (Јәһ. 14:26). «Пејғәмбәрләрин китабында јазыланлар да бунунла үст-үстә дүшүр» дејәндән сонра Јагуб Амус 9:11, 12 ајәләрини ситат ҝәтирди. О вахтлар «Амус» китабы Төвратда «Пејғәмбәрләрин китаблары» адланан бөлмәјә дахил иди (Мәт. 22:40; Һәв. 15:16—18). Әҝәр диггәт јетирсән, ҝөрәҹәксән ки, Јагубун ҝәтирдији ситат һазырда «Амус» китабында јазылан сөзләрдән бир гәдәр фәргләнир. Еһтимал ки, Јагуб Төвратын јунанҹа тәрҹүмәси олан «Септуаҝинта»дан ситат ҝәтирмишди.

6. Мүгәддәс Јазылар мүзакирәнин ҝедишатына неҹә көмәк етди?

⁶ Амус пејғәмбәр васитәсилә Јеһова габагҹадан демишди ки, ҝүнләрин бир ҝүнү «Давудун... чардағыны» гураҹаг, јәни падшаһлығы Давудун нәслиндән олан Мәсиһә верәҹәк (Һизг. 21:26, 27). Бәс бу о демәкдирми ки, Јеһова јенидән јалныз вә јалныз јәһудиләри Өзүнүн халгы едәҹәк? Хејр. Пејғәмбәрликдә даһа сонра дејилир ки, «диҝәр халглардан олан [адамлар]» Аллаһын ады илә адланан халг кими бир јерә јығылаҹаг. Јадындадырса, бир аз бундан әввәл Бутрус вурғуламышды ки, Аллаһ јәһуди вә гејри-јәһуди мәсиһиләр «арасында һеч бир фәрг гојмады вә иман васитәсилә онларын [гејри-јәһудиләрин] үрәјини тәмизләди» (Һәв. 15:9). Башга сөзлә, Аллаһ истәјирди ки, јәһудиләрлә бәрабәр гејри-јәһудиләр дә Падшаһлығын варисләри олсунлар (Ром. 8:17; Ефес. 2:17—19). Һеч бир пејғәмбәрликдә дејилмирди ки, гејри-јәһудиләрдән олан иманлылар сүннәт олунмалы вә ја јәһуди динини гәбул етмәлидирләр.

7, 8. а) Јагуб һансы тәклифи ирәли сүрдү? б) Јагубун «буна ҝөрә дә белә һесаб едирәм» сөзләри нәји ҝөстәрир?

⁷ Аллаһын Кәламындан олан бу дәлилләри вә гардашларын инандырыҹы сөзләрини динләјәндән сонра Јагуб тәклиф етди: «Буна ҝөрә дә белә һесаб едирәм ки, диҝәр халглардан Аллаһа тәрәф дөнән инсанлар үчүн чәтинлик јаратмамалыјыг. Ҝәлин онлара јазаг ки, бүтпәрәстликлә мурдарланмыш шејләрдән, әхлагсызлыгдан, боғулмуш һејван әтиндән вә гандан узаг дурсунлар. Чүнки та гәдимдән һәр шәһәрдә Мусанын јаздыгларыны изаһ едән адамлар вар. Онлар һәр шәнбә ҝүнү онун китабларыны синагогларда уҹадан охујурлар» (Һәв. 15:19—21).

⁸ Бәлкә, Јагуб ҝөрүшүн сәдри кими она верилән сәлаһијјәти ашараг һамынын јеринә гәрар гәбул едирди? Гәтијјән! Јагубун «буна ҝөрә дә белә һесаб едирәм» сөзләри ҝөстәрир ки, о, рәһбәрлик шурасында ағалыг етмәјә чалышмырды, садәҹә бу мәсәлә илә бағлы Мүгәддәс Јазыларда дејиләнләрә вә гардашларын дәлил кими ҝәтирдији диҝәр фактлара әсасланан бир тәклифи онларын нәзәринә чатдырырды.

9. Јагубун тәклифи һансы фајдалары ҝәтирәҹәкди?

⁹ Јагубун ирәли сүрдүјү фикир ағлабатан идими? Бәли, чүнки һәвариләр вә ағсаггаллар бир гәдәр сонра онун тәклифини гәбул етдиләр. Бәс бунун фајдасы нәдә иди? Әввәла, бу тәклифин әсасында чыхарылан гәрар гејри-јәһудиләр үчүн чәтинлик јаратмајаҹагды, јәни онлардан Мусанын ганунуна ујғун јашамаг тәләб олунмајаҹагды (Һәв. 15:19). Икинҹиси, бу гәрар ҝөстәрәҹәкди ки, гардашлар илләр узуну «һәр шәнбә ҝүнү онун [Мусанын] китабларынын синагогларда уҹадан» охундуғуну ешидән јәһуди мәсиһиләрин виҹданына һөрмәтлә јанашырларb (Һәв. 15:21). Сөзсүз ки, белә рәһбәрлик јәһуди вә гејри-јәһуди мәсиһиләр арасындакы гардашлыг телләрини мөһкәмләндирәҹәкди. Ән ваҹиби исә, бу, Јеһова Аллаһын нијјәтинә ујғун олдуғундан Ону разы салаҹагды. Нәһајәт ки, Аллаһын халгынын бирлијини вә рифаһыны тәһлүкә алтына алан проблемин һәлли тапылды! Үстәлик, мәсәләни бу ҹүр мүдрикликлә јолуна гојмагла гардашлар мүасир мәсиһиләр үчүн дә ҝөзәл нүмунә ҝөстәрдиләр.

10. Мүасир Рәһбәрлик Шурасы биринҹи әсрдәки рәһбәрлик шурасынын нүмунәсини неҹә изләјир?

¹⁰ Өтән фәсилдә гејд олундуғу кими, мүасир дөврдә Јеһованын Шаһидләринин Рәһбәрлик Шурасы биринҹи әсрдәки рәһбәрлик шурасындан нүмунә ҝөтүрәрәк, бүтүн мәсәләләрин һәллиндә Каинатын Һөкмдары Јеһова Аллаһын вә јығынҹағын башы Иса Мәсиһин рәһбәрлијини ахтарырларc (1 Кор. 11:3). Онлар буну неҹә едирләр? 1974-ҹү илдән 2006-ҹы илин март ајына, јер үзүндәки һәјатынын сонунадәк Рәһбәрлик Шурасында хидмәт едән Алберт Шрөдер демишди: «Чәршәнбә ҝүнү Рәһбәрлик Шурасы ҝөрүш кечирир. Ҝөрүшүн әввәлиндә гардашлар дуа едиб Јеһовадан мүгәддәс руһу илә рәһбәрлик етмәсини хаһиш едирләр. Онлар әлләриндән ҝәләни едирләр ки, һәлл етдикләри һәр бир мәсәлә вә гәбул етдикләри һәр бир гәрар Аллаһын Кәламына әсаслансын». Јер үзүндәки һәјатыны 2003-ҹү илин март ајында баша вуран вә узун мүддәт Рәһбәрлик Шурасынын үзвү олан Милтон Һеншел дә Ҝилад Мәктәбинин 101-ҹи синфини битирән тәләбәләрә мүраҹиәт едәркән бу мәгамы белә бир суалла вурғуламышды: «Јер үзүндә елә тәшкилат вармы ки, онун рәһбәрләри мүһүм гәрар гәбул етмәздән әввәл Мүгәддәс Китаба мүраҹиәт етсин?» Ҹаваб бәллидир.

«Јәһуданы вә Силаны сечиб» ҝөндәрдиләр (Һәвариләрин ишләри 15:22—29)

11. Рәһбәрлик шурасы чыхардығы гәрары јығынҹаглара неҹә чатдырды?

¹¹ Јерусәлимдә јерләшән рәһбәрлик шурасы сүннәт мәсәләсиндә јекдил гәрара ҝәлди. Амма јығынҹагдакы гардашларын да бу гәрары гәбул едиб һәмрәј олмасы үчүн һәмин гәрары онлара меһрибанлыгла вә ајдын шәкилдә чатдырмаг лазым иди. Буну неҹә етмәк оларды? Лука сөзүнә белә давам едир: «Һәвариләр, ағсаггаллар вә бүтүн јығынҹаг өз араларындан Барсәбас адланан Јәһуданы вә Силаны сечиб Булус вә Барнәба илә Антакјаја ҝөндәрмәк гәрарына ҝәлдиләр. Сечиләнләр јығынҹагда мәсул гардашлар идиләр». Бундан әлавә, гардашлар онларын әлинә мәктуб да јазыб вердиләр ки, Антакја, Сурија вә Киликија јығынҹагларында охусунлар (Һәв. 15:22—26).

12, 13. а) Сила вә Јәһуданын гардашларла ҝөндәрилмәси нә үчүн мүдрик һәрәкәт иди? б) Нәјә ҝөрә мәктубдакы ҝөстәришләр мүһүм әһәмијјәт кәсб едирди?

¹² «Јығынҹагда мәсул гардашлар» олан Јәһуда вә Сила рәһбәрлик шурасынын тәмсилчиси олмаға там лајиг иди. Дөрд нәфәрдән ибарәт бу групун ҝәлиши ајдын ҝөстәрәҹәкди ки, онларын ҝәтирдији хәбәр садәҹә јаранан суала ҹаваб дејил, рәһбәрлик шурасындан олан конкрет ҝөстәришдир. Һәмчинин Јәһуда илә Силанын ҝәлмәси Јерусәлимдәки јәһуди мәсиһиләрлә башга јерләрдәки гејри-јәһуди мәсиһиләр арасындакы бирлији мөһкәмләндирәҹәкди. Бу неҹә дә мүдрик һәрәкәт иди! Шүбһә јохдур ки, гардашларын мәһәббәтдән ирәли ҝәләрәк атдыглары бу аддым Аллаһын халгы арасында бирлији вә сүлһү горумаға көмәк етди.

¹³ Мәктубда гејри-јәһуди мәсиһиләр үчүн тәкҹә сүннәт мәсәләсинә даир рәһбәрлик тәгдим олунмамышды. Орада һәмчинин Јеһованы разы салмаг вә Ондан немәтләр алмаг үчүн диҝәр ҝөстәришләр дә верилирди. Мәктуба белә јекун вурулурду: «Биз мүгәддәс руһун көмәји илә гәрара ҝәлдик ки, үзәринизә бу зәрури шејләрдән әлавә јүк гојмајаг: бүтләрә гурбан ҝәтирилмиш шејләрдән, гандан, боғулмуш һејван әтиндән вә әхлагсызлыгдан узаг дурун. Әҝәр диггәтли олуб өзүнүзү бу шејләрдән узаг сахласаныз, хејир тапарсыныз. Сағлыгла галын!» (Һәв. 15:28, 29).

14. Парчаланманын һөкм сүрдүјү мүасир дүнјада Јеһованын халгы бирлији неҹә горујур?

¹⁴ Бу ҝүн 100 000-дән чох јығынҹагда 8 000 000-дан чох Јеһованын Шаһиди чијин-чијинә Аллаһа хидмәт едир. Онларын һәмфикир олмасы өзүнү һәм онларын етигадында, һәм дә фәалијјәтиндә бүрузә верир. Өзбашыналығын вә парчаланманын ҝениш јајылдығы мүасир дүнјада бу ҹүр һәмрәјлик ҝөрәсән нәјин сајәсиндә мөвҹуддур? Ән биринҹиси, јығынҹағын башы олан Иса Мәсиһин рәһбәрлији сајәсиндә. О, «садиг вә ағыллы нөкәр», јәни Рәһбәрлик Шурасы васитәсилә јығынҹаглара ајдын вә конкрет ҝөстәришләр верир (Мәт. 24:45—47). Һәмчинин үмумдүнја гардашлығын Рәһбәрлик Шурасына һәвәслә табе олмасы сајәсиндә бу ҹүр бирлик мөвҹуддур.

«Руһландырыҹы сөзләри охујанда севиндиләр» (Һәвариләрин ишләри 15:30—35)

15, 16. Сүннәт мәсәләсинин һәллинә јығынҹаглар неҹә мүнасибәт ҝөстәрди вә буна сәбәб нә олду?

¹⁵ Јерусәлимдән ҝәлән гардашлар Антакјаја чатанда «шаҝирдләри топладылар вә мәктубу онлара вердиләр». Јығынҹагдакы гардашлар рәһбәрлик шурасынын ҝөстәришини неҹә гаршыладылар? «Онлар мәктубда јазылан бу руһландырыҹы сөзләри охујанда севиндиләр» (Һәв. 15:30, 31). Бундан әлавә, Јәһуда вә Сила «гардашлары бир чох сөзләрлә руһландырыб мөһкәмләндирдиләр». Буна ҝөрә онлар Барнәба, Булус вә диҝәрләри кими «пејғәмбәр» адланырдылар. «Пејғәмбәр», адәтән, Аллаһын ирадәсини чатдыран адамлара дејилирди (Һәв. 13:1; 15:32; Чых. 7:1, 2).

¹⁶ Јеһова бу мәсәләнин уғурла һәлл олунмасы үчүн ҝөрүлән бүтүн ишләри аванд едирди. Јығынҹагларын гардашларын гәрарыны јахшы гәбул етмәсиндә һәлледиҹи ролу нә ојнады? Шүбһәсиз ки, рәһбәрлик шурасынын Аллаһын Кәламына әсасланан вә мүгәддәс руһун рәһбәрлији илә вахтында вә ајдын шәкилдә вердији ҝөстәриш. Үстәлик, һәмин гәрарын јығынҹаглара бөјүк диггәт вә һәссаслыгла чатдырылмасы да бунда бөјүк рол ојнады.

17. Мүасир дөврдәки рајон нәзарәтчиләри биринҹи әсрдәки гардашлардан нәдә өрнәк ҝөтүрүрләр?

¹⁷ Биринҹи әсрдәки рәһбәрлик шурасынын нүмунәсини изләјәрәк бу ҝүн дә Јеһованын Шаһидләринин Рәһбәрлик Шурасы үмумдүнја мәсиһи ҹәмијјәтинә лазыми рәһбәрлији тәгдим едир. Гәбул олунан гәрарлар јығынҹаглара ајдын вә конкрет шәкилдә чатдырылыр. Бунун үчүн Рәһбәрлик Шурасы бир сыра үсуллардан истифадә едир. Мәсәлән, рајон нәзарәтчиләри бир-бир јығынҹаглары зијарәт едәрәк бу рәһбәрлији онлара тәгдим едир вә баҹы-гардашлары руһландырырлар. Булус вә Барнәба кими, бу фәдакар гардашлар да өзләрини хидмәтә һәср едәрәк «бир чох шаҝирдлә бәрабәр Јеһованын сөзү һаггындакы мүждәни тәблиғ едир» вә өјрәдирләр (Һәв. 15:35). Һәмчинин Јәһуда вә Сила кими, онлар гардашлары бир чох руһландырыҹы сөзләрлә мөһкәмләндирирләр.

18. Мәсиһиләр һәмишә Јеһовадан немәтләр алмаг истәјирләрсә, нәјә ҹан атмалыдырлар?

¹⁸ Бәс јығынҹаглар һаггында нә демәк олар? Мүасир јығынҹаглара бу дүнјанын руһуна јолухмамаға, сүлһү вә бирлији горумаға нә көмәк едә биләр? Хатырлатмаг истәјәрдик ки, мәһз Јагуб сонралар јазмышды: «Јухарыдан назил олан һикмәт илк нөвбәдә сафдыр, сонра сүлһпәрвәр, мүлајим, итаәткардыр... Салеһлик бәһрәсинин тохуму исә сүлһпәрвәрләр үчүн әмин-аманлыг шәраитиндә әкилир» (Јаг. 3:17, 18). Бу сөзләри јазаркән Јагубун Јерусәлимдәки ҝөрүшү нәзәрдә тутуб-тутмадығыны дәгиг дејә билмәрик. Лакин «Һәвариләрин ишләри» китабынын 15-ҹи фәслиндә јазылан һадисәләри нәзәрдән кечирдикдән сонра әминликлә дејә биләрик ки, Јеһованын немәтләри јалныз бирлијин вә әмәкдашлығын һөкм сүрдүјү јердә ола биләр.

19, 20. а) Антакја јығынҹағында сүлһүн вә бирлијин олдуғу нәдән ҝөрүнүрдү? б) Булусла Барнәба инди өз ҝүҹләрини нәјә сәрф едә биләрдиләр?

¹⁹ Антакја јығынҹағында сүлһүн вә бирлијин олдуғу инди ајдын ҝөрүнүрдү. Онлар Јерусәлимдән ҝәлән гардашларла мүбаһисә етмәдиләр, әксинә, Јәһуда илә Силанын ҝәлишини јүксәк гијмәтләндирдиләр. Ајәдә дејилир: «Бир мүддәт орада галандан сонра гардашлар онлары ҝеријә, онлары ҝөндәрмиш гардашларын јанына сағ-саламат јола салдылар»d (Һәв. 15:33). Биз әмин ола биләрик ки, Јерусәлимдәки диндашлар да һәмин ики гардашын өз сәјаһәтләри һаггында данышдыгларыны ешидәндә чох севинмишдиләр. Јеһованын лүтфү сајәсиндә гардашлар онлара тапшырылан иши уғурла баша чатдырдылар!

²⁰ Антакјада галан Булусла Барнәба инди бүтүн ҝүҹләрини тәблиғ ишинә вә онун тәшкилинә сәрф едә биләрдиләр. Бу ҝүн рајон нәзарәтчиләри дә јығынҹаглара баш чәкәндә ејни ишлә мәшғул олурлар (Һәв. 13:2, 3). Бу, Јеһованын халгы үчүн әсл немәтдир! Бәс Јеһова бу ики чалышган тәблиғчидән даһа сонра неҹә истифадә етди вә онлар даһа һансы немәтләри алдылар? Буну нөвбәти фәсилдән өјрәнәҹәјик.