Дирилмәјә олан үмид инандырыҹыдыр!
“Аллаһа үмид едирәм ки... өлүләрин дирилмәси олаҹагдыр” (ҺӘВАРИЛӘРИН ИШЛӘРИ 24:15).
1. Нә үчүн дирилмәјә үмид етмәк олар?
ДИРИЛМӘЈӘ үмид етмәк үчүн, Јегова бизә инандырыҹы сәбәбләр верир. О, бизә вә’д едир ки, өлүләри дирилдәҹәк, јенидән һәјата гајтараҹаг. Онун, өлүм јухусунда оланлара аид нијјәти мүтләг јеринә јетәҹәк (Јешаја 55:11; Лука 18:27). Бундан әлавә, Аллаһ, өлүләри дирилтмәјә гадир олдуғуну артыг ҝөстәриб.
2. Дирилмәјә олан үмид бизә неҹә көмәк едә биләр?
2 Оғлу Иса Мәсиһин васитәсилә Аллаһын өлүләри дирилдәҹәјинә иман етмәк, чәтин анларда бизә көмәк едә биләр. Дирилмәјә олан үмидин мөһкәмлији, сәмави Атамызын гаршысында, һәтта өләнә гәдәр нөгсансызлығы горујуб сахламагда бизә көмәк едәр. Мүгәддәс Китабда тәсвир едилән дирилмә һадисәләрини нәзәрдән кечирмәклә, чох еһтимал ки, бу үмиддә даһа мөһкәм оларыг. Бүтүн бу мө’ҹүзәләр, Күлл-Ихтијар Рәбб Јегованын ҝүҹү илә едилмишдир.
Онлар “өз өлүләрини дирилмиш ҝери алдылар”
3. Сарафат шәһәриндән олан дул гадынын оғлу өләндә, Аллаһдан гүввә алан Илјас нә етди?
3 Јегованын мәсиһчиликдән әввәл олан шаһидләринин иманы һаггындакы ҹәлбедиҹи мә’луматында һәвари Павел јазырды: “Гадынлар... өз өлүләрини дирилмиш ҝери алдылар” (Ибраниләрә 11:35; 12:1). Һәмин гадынлардан бири, Финикијанын Сарафат шәһәриндән олан јохсул дул гадын иди. Аллаһын пејғәмбәри Илјаса гонагпәрвәрлик ҝөстәрдији үчүн бу гадынын уну вә јағы мө’ҹүзәли шәкилдә түкәнмәди; әкс тәгдирдә, онун өзү вә оғлу аҹындан өлә биләрдиләр. Сонрадан, онун оғлу өләндә, Илјас ону јатаға гојду, дуа едиб, үч дәфә онун үстүнә узанды вә јалварды: “Ја Аллаһым РӘБ, сәнә јалварырам, бу ушағын ҹаны өзүнә гајытсын”. Аллаһын ирадәси илә ушағын ҹаны вә ја һәјаты өзүнә гајытды (1 Краллар 17:8—24). Дул гадынын севинҹини вә әзиз оғлунун дирилдилмәсини, јә’ни иманына ҝөрә алдығы илк мүкафаты тәсәввүр един!
4. Елиша Шунемдә һансы мө’ҹүзәни ҝөстәрди?
4 Өз өлүсүнү дирилмиш ҝери алан диҝәр гадын Шунем шәһәриндә јашајырды. Әри артыг гоҹалмыш бир вахтда, бу гадын пејғәмбәр Елишаја вә онун гуллугчусуна хејирхаһлыг етмишди. Мүкафат олараг гадынын бир оғлу олду. Амма бир нечә илдән сонра бу гадын пејғәмбәри чағырды вә пејғәмбәр онун евинә ҝәлдикдә ушағы өлмүш ҝөрдү. Елиша дуа етдикдән вә мүәјјән тәдбир ҝөрдүкдән сонра, “ушағын бәдәни исинди. [...] Ушаг једди дәфә асгырды вә ...ҝөзләрини ачды”. Шүбһәсиз ки, бу дирилдилмә һәм анаја, һәм дә онун оғлуна бөјүк севинҹ бәхш етди (2 Краллар 4:8—37; 8:1—6). Онлар, бир даһа өлмәмәк имканы алараг, “даһа јахшы дирилмә” (ЈД) вахты јер үзүндә һәјата гајтарылан заман алаҹаглары севинҹ неҹә дә бөјүк олаҹаг! Бу, өлүләри дирилдән мәһәббәтли Аллаһ Јеговаја миннәтдар олмаг үчүн неҹә дә бөјүк бир сәбәбдир! (Ибраниләрә 11:35; 12:1).
5. Елиша, һәтта өлдүкдән сонра да һансы мө’ҹүзәнин баш вермәсиндә иштирак етди?
5 Һәтта Елиша өлдүкдән вә басдырылдыгдан сонра да, Аллаһ мүгәддәс руһунун васитәсилә онун сүмүкләринә гүввә верди. Биз охујуруг: “[Исраиллиләр] бир адамы дәфн едәркән, будур, бир гошун [моаблылары] ҝөрдүләр; вә о адамы Елишанын гәбринә атдылар; вә [өлмүш] адам дүшүб Елишанын сүмүкләринә тохунан кими дирилди вә ајаға галхды” (2 Краллар 13:20, 21). Јәгин ки, һәмин адам чох тәәҹҹүбләнди вә севинди! Јегова Аллаһын дәјишмәз нијјәти әсасында бизә әзиз олан инсанларын һәјата гајтарылаҹаглары заман һөкм сүрәҹәк севинҹи тәсәввүр един!
Аллаһын Оғлу өлүләри дирилдирди
6. Наин шәһәринин јахынлығында Иса һансы мө’ҹүзәни етди вә бу һадисә бизә неҹә тә’сир ҝөстәрә биләр?
6 Өлүләрин әбәди јашамаг үмиди илә һәјата гајтарыла биләҹәкләринә даир Аллаһын Оғлу Иса Мәсиһ бизә инандырыҹы сәбәбләр верди. Наин шәһәринин јахынлығында баш верән һадисә, белә мө’ҹүзәнин Аллаһын вердији гүввә сајәсиндә мүмкүн олдуғуну анламагда бизә көмәк едә биләр. Иса, шәһәрдән кәнарда бир ҝәнҹ оғланын дәфн мәрасиминә раст ҝәлди. О, дул гадынын јеҝанә өвлады иди. Иса гадына деди: “Ағлама!” Сонра о, ҹәназә апарылан хәрәјә тохунуб, деди: “Еј ҝәнҹ, сәнә дејирәм: Дур!” Ҝәнҹ галхыб отурду вә данышмаға башлады (Лука 7:11—15). Бу мө’ҹүзә, шүбһәсиз бизи бир даһа әмин едир ки, дирилмәјә олан үмид инандырыҹыдыр.
7. Јаирин гызы илә бағлы һансы һадисә баш верди?
7 Ҝәлин, Кефернаһумдакы синагогун рәиси Јаирин башына ҝәлән әһвалаты да нәзәрдән кечирәк. О, Исадан хаһиш етди ки, ҝәлиб, өлүм ајағында олан 12 јашлы севимли гызына көмәк етсин. Елә бундан тез сонра Јаирә гызынын өлүм хәбәрини чатдырдылар. Иса, кәдәр ичиндә олан Јаири иман етмәјә руһландырараг, онунла бәрабәр онун евинә ҝетди; ев, һөнкүр-һөнкүр ағлајан адамларла долу иди. Иса: “Ушаг өлмәјиб, анҹаг јатыб” дедикдә, онлар ҝүлдүләр. Әслиндә гыз өлмүшдү, амма Иса ҝөстәрмәк истәјирди ки, инсанлар, дәрин јухудан ојадылан кими, һәјата гајтарыла биләрләр. О, гызын әлиндән тутараг, деди: “Еј гыз, галх!” Гыз дәрһал галхды вә онун ата-анасы “чох һејрәтләндиләр” (Марк 5:35—43; Лука 8:49—56). Шүбһәсиз ки, өлән әзизләри ҹәннәт дүнјасында дирилдиләндә, инсанлар “һејрәтләнәҹәкләр”.
8. Иса Лазарын гәбири јанында нә етди?
8 Иса Лазарын гәбиринә јахынлашанда вә ҝирәҹәкдә олан дашы галдырмағы хаһиш едәндә, Лазар артыг дөрд ҝүн иди ки, өлмүшдү. Иса, Аллаһын вердији гүввәјә архаландығыны орадакы адамлара ҝөстәрмәк мәгсәдилә һүндүрдән дуа етдикдән сонра, уҹа сәслә деди: “Лазар, чөлә чых!” О, чыхды! Лазарын ајаглары вә әлләри дәфн сарыглары илә бағланмышды, үзү исә дәсмал илә өртүлмүшдү. Иса деди: “Ону ачын вә бурахын ҝетсин”. Лазарын баҹылары Мәрјәмлә Мартаја тәсәлли вермәк үчүн ораја ҝәлән адамлардан чоху, бу мө’ҹүзәни ҝөрдүкдә Исаја иман етдиләр (Јәһја 11:1—45). Мәҝәр бу һадисә, өлән әзизләримизин Аллаһын јени дүнјасында дирилдиләләҹәкләринә үмидимизи артырмырмы?
9. Биз нәјә ҝөрә әмин ола биләрик ки, инди Исанын өлүләри дирилтмәк гүдрәти вар?
9 Вәфтизчи Јәһја һәбсдә олдуғу заман, Иса она бу руһландырыҹы хәбәри ҝөндәрди: “Корлар ҝөрүр... өлүләр дирилир” (Матта 11:4—6). Иса јер үзүндә оларкән өлүләри дирилдирдисә, әлбәттә ки, Аллаһдан сәлаһијјәт алмыш ҝүҹлү руһани варлыг оларкән дә буну етмәјә гадирдир. Иса “дирилмә вә һәјат”дыр вә неҹә дә тәсәлливериҹидир ки, јахын ҝәләҹәкдә “гәбирләрдә оланларын һамысы Онун сәсини ешидәҹәкләр вә гәбирләрдән чыхаҹаглар”! (Јәһја 5:28; 11:25).
Диҝәр дирилмә һадисәләри бизим үмидимизи мөһкәмләндирир
10. Һәвари тәрәфиндән илк дәфә өлүнүн дирилдилдији һагда мә’луматы тәсвир един.
10 Иса өз һәвариләрини Падшаһлығы тәблиғ етмәјә ҝөндәрәндә деди: “Өлүләри дирилдин” (Матта 10:5—8). Шүбһәсиз ки, бунун үчүн онлара Аллаһын гүввәсинә бел бағламаг лазым иди. Ерамызын 36-ҹы илиндә, Јаффада Ҹејран (Табита) адлы мө’мин бир гадын өлүм јухусуна ҝетди. Онун хејирхаһ әмәлләри варды, мәсәлән, инди онун өлүмү үчүн кәдәр ичиндә ағлајан еһтијаҹлы дул гадынлара палтар тикирди. Шаҝирдләр гадыны дәфн мәрасиминә һазырладылар вә Петерин далынҹа, бәлкә дә тәсәлли үчүн, адам ҝөндәрдиләр (Һәвариләрин ишләри 9:32—38). Петер һамыны отагдан чыхартды, дуа едиб, деди: “Табита, дур!” О, ҝөзләрини ачды вә јатагда отурду, Петерин әлиндән тутду вә Петер ону ајаға галдырды. Бу, һәвари тәрәфиндән өлүнүн дирилдилмәси барәдә илк мә’луматдыр; буну биләнләрин чоху иман етдиләр (Һәвариләрин ишләри 9:32—42). Бизим үчүн исә бу, дирилмәјә үмид етмәјә даһа бир сәбәбдир.
11. Мүгәддәс Китабда ахырынҹы олараг кимин дирилдилмәси хатырланыр?
11 Мүгәддәс Китабда тәсвир едилән сонунҹу дирилмә Троасда баш вермишди. Бир дәфә, үчүнҹү миссионерлик сәјаһәти заманы орада галаркән, Павел “ҝеҹә јарысына гәдәр сөзүнә давам етди”. Јорғун олан вә бәлкә дә јанан чохлу чырагларын вә јығылан издиһамын боғанағындан, Ефтик адлы бир ҝәнҹ јухуја ҝедиб, үчүнҹү мәртәбәнин пәнҹәрәсиндән јыхылды. О, јердән өзүндән ҝетмиш һалда јох, “өлү кими галдырылды”. Павел Ефтикин “үзәринә јыхылды”, ону гуҹаглады вә бу һадисәјә тамаша едәнләрә деди: “Нараһат олмајын, чүнки онун ҹаны өзүндәдир”. Павел, ҝәнҹин һәјатынын өзүнә гајтарылдығыны нәзәрдә тутурду. Орада оланлар “бөјүк тәсәлли алдылар” (Һәвариләрин ишләри 20:7—12). Бу ҝүн Аллаһын хидмәтчиләри, өлән химдәт јолдашларынын дирилмәјә бәсләдикләри үмидин бир заман јеринә јетәҹәјини билмәкдән бөјүк тәсәлли тапырлар.
Дирилмәјә үмид чохдан мөвҹуддур
12. Рома валиси Феликсин гаршысында чыхыш едәрәк, Павел өз әминлијини нәдә ҝөстәрди?
12 Мәһкәмәдә Рома валиси Феликсин гаршысында чыхыш едән заман, Павел шәһадәтлик етди: “Мән... Мүгәддәс Ганунда вә пејғәмбәрләрин китабларында јазылан шејләрин һамысына иман едирәм... Аллаһа үмид едирәм ки, һәм салеһ, һәм дә салеһ олмајан өлүләрин дирилмәси олаҹагдыр” (Һәвариләрин ишләри 24:14, 15). Аллаһын Кәламынын ајры-ајры һиссәләри, мәсәлән, “Мүгәддәс Ганун” өлүләрин дирилмәсини неҹә гејд едир?
13. Биз нә үчүн дејә биләрик ки, илк пејғәмбәрлији дејән заман Аллаһ дирилмәјә ишарә етмишдир?
13 Әдән бағында илк пејғәмбәрлији вердији заман Аллаһын өзү дирилмәјә ишарә етмишдир. “Гәдим илан” олан Шејтан Иблисә һөкм верәркән, Аллаһ деди: “Сәнинлә гадын арасына вә сәнин зүрјәтинлә онун зүрјәти арасына дүшмәнчилик гојаҹағам; о, сәнин башына зәрбә ендирәҹәк вә сән онун топуғуну чалаҹагсан” (Вәһј 12:9; Тәквин 3:14, 15). Гадынын зүрјәтинин топуғундан чалынмасы о демәк иди ки, Иса Мәсиһ өлдүрүләҹәкди. Әҝәр сонрадан бу Зүрјәт иланын башына зәрбә ендирмәли идисә, демәли, Мәсиһ өлүмдән дирилмәли иди.
14. Јегова һансы мә’нада “өлүләрин дејил, дириләрин Аллаһыдыр”?
14 Иса деди: “Өлүләрин дирилдијини Муса да кол һаггындакы рәвајәтдә Рәбби Ибраһимин Аллаһы, Исһагын Аллаһы вә Јагубун Аллаһы адландырдығы заман ҝөстәриб. Аллаһ исә өлүләрин дејил, дириләрин Аллаһыдыр, чүнки Онун јанында һамы диридир” (Лука 20:27, 37, 38; Чыхыш 3:6). Ибраһим, Исһаг вә Јагуб өлмүшдүләр, лакин Аллаһын онлары дирилтмәк нијјәти о дәрәҹәдә дәјишмәздир ки, онлар Аллаһ үчүн ҹанки диридирләр.
15. Нәјә ҝөрә дирилмәјә инанмаг үчүн Ибраһимин әсасы варды?
15 Дирилмәјә үмид етмәк үчүн Ибраһимин әсасы варды. Ибраһим вә арвады Сара гоҹалмышдылар вә артыг дүнјаја ушаг ҝәтирә билмәдикләри үчүн бу мә’нада өлү олдуглары бир вахтда, Аллаһ мө’ҹүзә илә онларын доғуб-төрәмәк габилијјәтләрини бәрпа етди. Бу, дирилмәјә бәнзәр иди (Тәквин 18:9—11; 21:1—3; Ибраниләрә 11:11, 12). Онларын оғлу Исһаг тәхминән 25 јашында оланда, Аллаһ Ибраһимә әмр етди ки, ону гурбан ҝәтирсин. Лакин Ибраһим Исһагы өлдүрмәк үзрә олдуғу бир мәгамда, Јегованын мәләји ону дајандырды. Ибраһим “Аллаһы, Исһагы өлүмдән дирилтмәјә гадир сајды; буна ҝөрә дә ону, тә’бири ҹаизсә, өлүмдән ҝери алды” (Ибраниләрә 11:17—19; Тәквин 22:1—18).
16. Өлүм јухусунда олан Ибраһими нә ҝөзләјир?
16 Ибраһим, вә’д едилмиш Зүрјәт олан Мәсиһин рәһбәрлији заманы баш верәҹәк дирилмәјә үмид едирди. Аллаһын Оғлу һәлә ҝөјдә оларкән Ибраһимин иманына нәзәр салмышды. Буна ҝөрә дә, Иса Мәсиһ инсан олан заман јәһудиләрә деди: “Атаныз Ибраһим Мәним ҝүнүмү ҝөрәҹәји үчүн шад олду” (Јәһја 8:56—58; Сүлејманын мәсәлләри 8:30, 31). Ибраһим инди өлүм јухусундадыр вә Аллаһын Хиласкар Падшаһлығынын рәһбәрлији заманы ону јер үзүндә һәјата гајтарылма ҝөзләјир (Ибраниләрә 11:8—10, 13).
Ганун вә Мәзмурлардан шәһадәтлик
17. “Ганунда јазыланлар” Иса Мәсиһин дирилмәсини неҹә гејд едир?
17 Павелин дирилмәјә олан үмиди, “ганунда јазыланлара” мүвафиг иди. Аллаһ исраиллиләрә демишди: “Мәһсулунузун илк бағламасыны каһинә ҝәтирәҹәксиниз; вә сизин үчүн гәбул олунсун дејә [16 нисанда, каһин] бағламаны РӘББИН гаршысында саллајаҹаг” (Левилиләр 23:9—14). Бәлкә дә елә бу гануну нәзәрдә тутараг, Павел јазырды: “Мәсиһ вәфат едәнләрин илк нүмунәси [“илк мәһсулу”, ЈД] олараг, өлүләрдән дирилди”. Иса, “илк мәһсул” кими, ерамызын 33-ҹү илинин 16 нисанында дирилдилмишди. Сонралар, Исанын иштиракы заманы, диҝәр “мәһсулларын”, јә’ни онун руһла мәсһ едилмиш давамчыларынын дирилмәси олмалы иди (1 Коринфлиләрә 15:20—23; 2 Коринфлиләрә 1:21; 1 Јәһја 2:20, 27).
18. Петер неҹә ҝөстәрди ки, Исанын дирилмәси Мәзмурларда әввәлҹәдән дејилмишдир?
18 Дирилмә үмиди Мәзмурларда да тәсдиг олунур. Ерамызын 33-ҹү илинин Пентикост ҝүнүндә һәвари Петер Мәзмур 16:8—11 ајәләриндән ситат ҝәтирәрәк дејирди: “Давуд Онун [Мәсиһ] үчүн дејир: Рәбби даим гаршымда ҝөрдүм, чүнки сарсылмајым дејә О мәним сағымдадыр. Буна ҝөрә үрәјим севинди вә дилим шадланды; һәтта бәдәним дә үмидлә јашајаҹаг. Чүнки Сән ҹанымы өлүләр аләминдә тәрк етмәзсән вә Мүгәддәсини чүрүмәјә гојмазсан”. Петер әлавә едир: “[Давуд] Мәсиһин дирилмәсиндән бәһс едиб деди: О, нә өлүләр аләминә тәрк едилди, нә дә бәдәни чүрүдү. Бу Исаны Аллаһ дирилтди” (Һәвариләрин ишләри 2:25—32).
19, 20. Петер, Мәзмур 118:22 ајәсини нә вахт ситат ҝәтирмишдир вә бу ајәләр Исанын өлүмү вә дирилмәси илә неҹә бағлыдыр?
19 Бир нечә ҝүндән сонра Петер Синедрионун гаршысында дурду вә јенидән Мәзмурлардан ситат ҝәтирди. Ахсајан јохсула неҹә шәфа вердијини сорушдугда, һәвари деди: “Һамыныза вә бүтүн Исраил халгына мә’лум олсун ки, чармыха чәкдијиниз вә Аллаһын өлүләрдән дирилтдији Назаретли Иса Мәсиһин ады илә бу адам гаршынызда сағлам дурур. Иса о Дашдыр ки, сиз бәнналар Она хор бахдыныз. Лакин О, күнҹүн башы олду. Вә башга һеч кимдә хилас јохдур; чүнки сәма алтында инсанлара верилмиш башга бир ад јохдур ки, онунла хилас ола биләк” (Һәвариләрин ишләри 4:10—12).
20 Петер бурада Мәзмур 118:22 ситат ҝәтириб, һәмин ајәләри Исанын өлүмүнә вә дирилмәсинә тәтбиг етмишди. Јәһудиләр, өз дин рәһбәрләри тәрәфиндән тәһрик едиләрәк, Исаны рәдд етдиләр (Јәһја 19:14—18; Һәвариләрин ишләри 3:14, 15). “Бәнналарын” бу “дашы” рәдд етмәләри Исанын өлүмүнә сәбәб олду, лакин дашын “күнҹүн башы” олмасы, Исанын ҝөјләр иззәтинә дирилдилмәси демәк иди. Мәзмурчунун габагҹадан хәбәр вердији кими, “бу, РӘББДӘН олду” (Мәзмур 118:23). Бу “дашын” күнҹүн Башы олмасы, һәмчинин Мәсиһин ҝәләҹәкдә Падшаһ тә’јин едилдијини дә ҝөстәрирди (Ефеслиләрә 1:19, 20).
Дирилмәјә олан үмид көмәк едир
21, 22. Ејуб 14:13—15 ајәләринә әсасән, Ејуб һансы үмиди ҝөстәрмишди вә бу, әзизини итирмиш адамлара бу ҝүн неҹә тәсәлли верә биләр?
21 Бир кимсәнин һәјата гајтарылдығыны өзүмүз шәхсән ҝөрмәсәк дә, Мүгәддәс Китабдан, дирилмәнин мүмкүн олдуғуна бизи әмин едән мүәјјән һадисәләри нәзәрдән кечирдик. Буна ҝөрә дә биз, салеһ Ејубун ифадә етдији үмиди бәсләјә биләрик. О, әзаб чәкәркән јалварды: “[Јегова], каш ки, өлүләр дијарында мәни ҝизләдәјдин... мәнә мөһләт верәјдин дә, о вахт мәни анајдын! Инсан өлүрсә дириләрми?... Сән чағырардын, мән дә сәнә ҹаваб верәрдим; Әлләринин ишинин һәсрәтини чәкәрдин” (Ејуб 14:13—15). Аллаһ “әлләринин ишинин һәсрәтини” чәкир; О, Ејубу дирилтмәји чох арзулајыр. Бу, бизә үмид верир!
22 Аллаһдан горхан аилә үзвләриндән бири, Ејуб кими, ҹидди хәстәләнәр вә һәтта дүшмән сајылан өлүм гаршысында таб ҝәтирмәјә биләр. Лазарын өлүмүнә ағлајан Иса кими, гоһумлар кәдәр јашлары ахыда биләрләр (Јәһја 11:35). Лакин Аллаһын сәсләјәҹәјини вә Онун јаддашында оланларын ҹаваб верәҹәкләрини билмәк неҹә дә тәсәлливериҹидир! Онлар, санки сәјаһәтдән гајыдаҹаглар - хәстә вә ја үзҝүн јох, тамамилә сағлам олаҹаглар.
23. Дирилмә үмидинә әмин олдугларыны бә’зи шәхсләр неҹә билдирирләр?
23 Јашлы садиг бир мәсиһчи гадынын өлүмү, һәмиманлыларыны бу сөзләри јазмаға тәшвиг етди: “Ананын өлүмү үчүн сәнинлә бәрабәр кәдәрләнирик. Чох тезликлә биз ону јенидән, ҝөзәл вә јашајан ҝөрәҹәјик!” Оғулларыны итирмиш валидејнләр дејирдиләр: “Ҹејсонун ојанаҹағы ҝүнү сәбирсизликлә ҝөзләјирик! О, әтрафына бахаҹаг вә узун мүддәт арзусуну чәкдији Ҹәннәти ҝөрәҹәк... Бу, ону севән бизләри тәшвиг едир ки, орада олмаг үчүн әлимиздән ҝәләни едәк”. Биз, дирилмәјә олан үмидин мөһкәм инандырыҹы олдуғуна неҹә дә миннәтдарыг!
Сиз неҹә ҹаваб верәрдиниз?
• Өлүләрин дирилдилмәси үчүн Аллаһын ҝөрдүјү тәдбирә иман бизә неҹә көмәк едә биләр?
• Мүгәддәс Китабда тәсвир едилән һансы һадисәләр дирилмәјә үмид етмәјә бизә әсас верир?
• Нәјә ҝөрә демәк олар ки, дирилмәјә үмид артыг чохдан мөвҹуддур?
• Өләнләрә мүнасибәтдә биз һансы мөһкәмләндириҹи үмиди бәсләјә биләрик?
[8-ҹи сәһифәдәки шәкил]
Јегованын вердији гүввә илә Илјас дул гадынын оғлуну һәјата гајтарды
[10-ҹу сәһифәдәки шәкил]
Иса Јаирин гызыны дирилтдикдә, гызын валидејнләри “чох һејрәтләндиләр”
[13-ҹү сәһифәдәки шәкил]
Ерамызын 33-ҹү илинин Петнтикост ҝүнүндә һәвари Петер, Исанын өлүләрдән дирилдилдијинә ҹәсарәтлә шәһадәтлик етди