Аллаһын Падшаһлығы нәләр едәҹәкдир?
“Падшаһлығын ҝәлсин; ҝөјдә олдуғу кими, јердә дә Сәнин ирадән олсун” (МАТТА 6:10, И—93).
1. Аллаһын Падшаһлығынын ҝәлиши нә мә’на дашыјаҹагдыр?
ИСА давамчыларына Аллаһын Падшаһлығы һаггында дуа етмәји өјрәдәркән, билирди ки, Падшаһлығын ҝәлиши илә минилликләр боју Аллаһа табе олмајан инсан рәһбәрлији сона чатаҹагдыр. Бүтүн бу вахт әрзиндә Аллаһын ирадәси, үмуми ҝөтүрдүкдә јер үзүндә јеринә јетирилмирди (Мәзмур 147:19, 20). Лакин ҝөјдә Падшаһлыг гурулдугдан сонра, Аллаһын ирадәси һәр јердә јеринә јетирилмәлидир. Инсан рәһбәрлијиндән Аллаһын сәмави Падшаһлығынын рәһбәрлијинә тәнтәнәли кечид дөврү сүр’әтлә јахынлашыр.
2. Инсан рәһбәрлијинин Аллаһын Падшаһлығынын рәһбәрлији илә әвәз олунмасына әламәт нә олаҹагдыр?
2 Һакимијјәтин кечид дөврү, Исанын - “дүнјанын башланғыҹындан индијәдәк олмамыш вә һеч олмајаҹаг” “бөјүк мәшәггәт” адландырдығы дөврә тәсадүф едәҹәкдир (Матта 24:21). Мүгәддәс Китаб, бу дөврүн нә гәдәр чәкәҹәјини сөјләмир, анҹаг бу дөврүн өзү илә ҝәтирәҹәји фәлакәтләри дүнја һеч заман ҝөрмәмишдир. Бөјүк мәшәггәтин башланғыҹында дүнја әһалисинин бөјүк һиссәсини сарсыдаҹаг бир иш баш верәҹәк: бүтүн јалан динләр мәһв едиләҹәк. Лакин бу Јегованын Шаһидләрини сарсытмајаҹагдыр, чүнки, онлар буну артыг чохдан ҝөзләјирләр (Вәһј 17:1, 15—17; 18:1—24). Аллаһын Падшаһлығы Шејтанын бүтүн системини мәһв едәркән, бөјүк мәшәггәт Һар-Меҝидонла баша чатаҹагдыр (Даниел 2:44; Вәһј 16:14, 16).
3. Јеремја итаәтсизләрин агибәтини неҹә тәсвир едир?
3 Бу, “Аллаһы танымајан” вә Онун, Мәсиһә табе етдирдији сәмави Падшаһлығы һаггындакы “Мүждәјә итаәт етмәјәнләр” үчүн нә мә’на дашыјаҹагдыр? (2 Салониклиләрә 1:6—9). Мүгәддәс Китаб пејғәмбәрлијиндә дејилир: “Будур, милләтдән милләтә бәла чыхаҹаг вә дүнјанын уҹларындан бөјүк гасырға гопаҹаг. Вә о ҝүн јерин бир уҹундан јерин о бири уҹуна гәдәр РӘББИН өлдүрдүјү адамлар олаҹаг; онлар үчүн аһ-налә етмәјәҹәкләр вә онлар топланылыб дәфн едилмәјәҹәк; торпағын үзүндә ҝүбрә олаҹаглар” (Јеремја 25:32, 33).
Пислијин сону
4. Нәјә ҝөрә Јегованын бу пис системә сон гојмаға һаггы вардыр?
4 Јегова Аллаһ мин илләрдир ки, пислијә сәбир едир. Инсан рәһбәрлијинин мәһведиҹи олдуғуну ҝөрмәк үчүн, сәмими гәлбли инсанлара бу гәдәр вахт кифајәт едәр. Мәсәлән, бир мәнбәјә әсасән, тәкҹә ХХ әсрдә мүһарибәләр, ингилаблар вә диҝәр иғтишашлар 150 милјондан артыг инсан һәјатыны мәһв етмишдир. Инсан гәддарлығы, хүсусилә дә Икинҹи дүнја мүһарибәси заманы, 50 милјона јахын инсан һәлак оларкән ајдын шәкилдә әкс олунду; бу инсанлардан бир чохлары насист һәбс дүшәрҝәләриндә дәһшәтли әзијјәтләрлә өлмүшләр. Мүгәддәс Китабын габагҹадан дедијинә там мүвафиг олараг, бизим ҝүнләримиздә “пис адамлар вә сахтакарлар... писликдә инкишаф” едирләр (2 Тимотејә 3:1—5, 13, И—93). Әхлагсызлыг, ҹинајәт, зоракылыг, рүшвәтхорлуг вә Аллаһын нормаларына һөрмәтсизлик, бу ҝүн сон дәрәҹә ҝениш јајылмышдыр. Буна ҝөрә дә, Јегованын бу пис системә сон гојмаға там һаггы вардыр.
5, 6. Гәдим Кән’ан дијарынын әхлагсызлыгларыны тәсвир един.
5 Буҝүнкү вәзијјәт, тәхминән 3 500 ил бундан әввәл Кә’нан дијарында олан вәзијјәти хатырладыр. Мүгәддәс Китаб дејир: “Онлар РӘББИН нифрәт етдији һәр мәкруһ шеји өз илаһиләри үчүн етдиләр; чүнки илаһиләри үчүн оғулларыны вә гызларыны белә атәшдә јандырарлар” (Тәснијә 12:31). Јегова Исраил халгына деди: “Бу милләтләрин пислијиндән өтүрү... Аллаһын РӘБ онлары сәнин өнүндән говур” (Тәснијә 9:5). Мүгәддәс Китаб тарихчиси Һенри Һаллеј гејд етди: “Баала, Астартаја вә башга Кән’ан танрыларына ибадәт ән алчаг вә гүсурлу ејш-ишрәтләрлә мүшајиәт олунурду вә бу танрыларын мә’бәдләри һәр ҹүр ијрәнҹ һәрәкәтләрин мәскәни иди”.
6 Һаллеј, кән’анлыларын етдикләри писликләрин нә дәрәҹәдә горхунҹ олдуғуну ҝөстәрди. Археологлар бу ҹүр чохсајлы јерләрдән бириндә, “ичәрисиндә Баала гурбан ҝәтирилмиш ушагларын сүр-сүмүкләри илә долу чохлу күпләр” тапмышлар. Һаллеј дејир: “Бу јер ушаг гәбиристанлығыны хатырладырды. [...] Беләликлә, кән’анлылар бүтләр гаршысында өз дини ибадәтләрини әхлагсыз ән’әнәләрлә һәјата кечирир вә илк доғулан көрпәләри бу танрылара гурбан ҝәтирирдиләр. Бундан ҝөрүнүр ки, Кән’ан дијарынын чох һиссәси, милли мигјасда Содом вә Гоморраны тәмсил едирди. [...] Белә ијрәнҹ вә алчаг мәдәнијјәтин мөвҹуд олмаға һаггы вардымы? [...] Кән’ан дијарында газынтылар апаран археологлар, Аллаһын бу халгы даһа тез мәһв етмәдијинә тәәҹҹүб едирләр”.
Јер үзүнү мирас аланлар
7, 8. Аллаһ јер үзүнү неҹә тәмизлијәҹәк?
7 Аллаһ Кән’ан дијарыны тәмизләдији кими, чох јахынларда бүтүн јер үзүнү тәмизләјәҹәк вә ону, ирадәсини јеринә јетирән инсанлара верәҹәкдир. “Мәмләкәтдә доғру адамлар јашајаҹаглар вә камилләр орада галаҹаглар. Фәгәт пис адамлар мәмләкәтдән атылаҹаглар вә хаинләр ондан јох едиләҹәкләр” (Сүлејманын мәсәлләри 2:21, 22). Мәзмурчу дејир: “Бир аз ҝөзлә вә пис јох олаҹагдыр... Фәгәт һәлимләр дүнјаны мирас алаҹаглар вә сүлһ боллуғунда ләззәт тапаҹаглар” (Мәзмур 37:10, 11). Бундан әлавә, “мин ил тамам олунҹаја кими бир дә халглары аздырмасын” дејә, Шејтан арадан галдырылаҹагдыр (Вәһј 20:1—3). Бәли, “дүнја вә онун еһтирасы кечиб ҝедир, амма Аллаһын ирадәсини јеринә јетирән әбәди јашајыр” (1 Јәһја 2:17).
8 Иса, јер үзүндә әбәдијјән јашамаг истәјән инсанларын үмидини белә тәсвир етди: “Һәлимләр нә бәхтијардырлар! Чүнки јери мирас алаҹаглар” (Матта 5:5). О, јәгин ки, Мәзмур 37:29-ҹу ајәсинә истинад едирди. Орада дејилир: “Салеһләр јери мирас алар вә онда әбәдијјән јашајарлар”. Иса билирди ки, Јегованын нијјәтинә ҝөрә, дүзҝүн дүшүнҹә тәрзи олан инсанлар әбәдијјән јер үзү ҹәннәтдә јашајаҹаглар. Јегова дејир: “Дүнјаны, үзәриндә олан инсаны вә һејваны гүдрәтимлә... мән јаратдым вә ону ҝөзүмдә доғру олана верирәм” (Јеремја 27:5).
Валеһедиҹи јени дүнја
9. Аллаһын Падшаһлығы һансы дүнјаја јол ачаҹагдыр?
9 Һар-Меҝидондан сонра, Аллаһын Падшаһлығы “салеһлик өмүр” сүрән валеһедиҹи “јени јер” јарадаҹагдыр (2 Петер 3:13). Һар-Меҝидондан сағ чыхан инсанлар, бу истисмаредиҹи пис әшјалар системиндән хилас оларкән, неҹә дә раһат нәфәс алаҹаглар! Онлар, валеһедиҹи хејир-дуалар вә әбәди һәјат үмиди илә сәмави Падшаһлыг тәрәфиндән идарә олунан әдаләтли јени дүнјаја дахил оларкән, неҹә дә бөјүк севинҹ дујаҹаглар! (Вәһј 7:9—17).
10. Падшаһлығын рәһбәрлији заманы һансы писликләр јох едиләҹәк?
10 Ҹинајәт, аҹлыг вә һәтта јыртыҹы һејванлар белә бир даһа инсанлара тәһлүкә јаратмајаҹаглар. “Онларла [халгымла] сүлһ әһди кәсәҹәјәм вә мәмләкәтдән вәһши һејванлары јох едәҹәјәм... Вә сәһра ағаҹы мејвәсини верәҹәк вә јер мәһсулуну верәҹәк вә өз торпаглары үзәриндә тәһлүкәсиз олаҹаглар”. “Гылынҹларыны котан вә мизрагларыны бағча бычаглары едәҹәкләр; милләт милләтә гаршы гылынҹ галдырмајаҹаг вә артыг дөјүшмәји өјрәнмәјәҹәкләр. Фәгәт һәр кәс өз асмасы алтында вә өз әнҹир ағаҹы алтында отураҹаг; вә онлары горхудан олмајаҹаг; чүнки буну ордулар РӘББИНИН ағзы сөјләди” (Һезекиел 34:25—28; Мика 4:3, 4).
11. Биз нәјә ҝөрә әмин ола биләрик ки, бүтүн физики чатышмазлыглара сон гојулаҹагдыр?
11 Хәстәликләрә, кәдәрә вә һәтта өлүмә сон гојулаҹагдыр. “Орада јашајан: “Хәстәјәм” демәјәҹәк; орада јашајан халгын фәсады бағышланаҹаг” (Ишаја 33:24). “Аллаһ онларын ҝөзләриндән бүтүн јашлары силәҹәкдир. Артыг өлүм мөвҹуд олмајаҹаг; артыг нә кәдәр, нә фәрјад, нә дә ағры олаҹагдыр, чүнки әввәлки шејләр кечиб ҝетди... Будур, Мән һәр шеји јениләшдирирәм” (Вәһј 21:4, 5). Иса јер үзүндә јашајаркән ҝөстәрди ки, бүтүн бунлары Аллаһын вердији ҝүҹ васитәсилә һәјата кечирәҹәк. Иса Фәләстин боју ҝәзир, мүгәддәс руһун көмәји илә топаллара вә хәстәләрә шәфа верирди (Матта 15:30, 31).
12. Өләнләр үчүн һансы үмид мөвҹуддур?
12 Иса даһа артыг иш ҝөрүрдү. О, өлүләри дирилдирди. Тәвазөкар инсанлар буна неҹә мүнасибәт бәсләјирдиләр? Иса 12 јашлы гызы дирилдәндә, гызын валидејнләри “чох һејрәтләндиләр” (Марк 5:42). Бу, Падшаһлығын рәһбәрлији заманы Исанын бүтүн јер үзүндә едәҹәји ишләрә даһа бир нүмунәдир, белә ки, о заман “һәм салеһ, һәм дә салеһ олмајан өлүләрин дирилмәси олаҹагдыр” (Һәвариләрин ишләри 24:15). Өлүләр груп һалында дирилдилиб, доғмалары илә ҝөрүшән заман јашанаҹаг бөјүк севинҹи тәсәввүр един! Шүбһәсиз ки, Падшаһлығын рәһбәрлији алтында бөјүк маарифләндирмә иши кечириләҹәк, бунун сајәсиндә исә “сулар дәнизи неҹә долдурурса, дүнја да РӘБ билҝиси илә долу олаҹаг” (Ишаја 11:9).
Јегованын али һөкмранлығы бәраәт газаныр
13. Аллаһын рәһбәрлијинин әдаләтли олдуғу неҹә ҝөстәриләҹәкдир?
13 Миниллик рәһбәрлијин сонуна доғру инсанлар јенидән камил ағыла вә бәдәнә малик олаҹаглар. Бүтүн јер үзү Әдән бағына - ҹәннәтә чевриләҹәкдир. Сүлһ, хошбәхтлик, тәһлүкәсизлик бүтүн јер үзүнә һаким олаҹаг вә мәһәббәтлә долу инсан ҹәмијјәти јаранаҹаг. Падшаһлығын һәјата кечирәҹәји ишләри бәшәријјәт һәлә ҝөрмәмишдир. Мин илләр әрзиндә давам едән аҹынаҹаглы инсан рәһбәрлији илә сәмави Падшаһлығын парлаг Миниллик рәһбәрлији арасындакы тәзад нә гәдәр ајдын ҝөрүнәҹәк! Падшаһлыг васитәсилә, Аллаһын рәһбәрлијинин инсан рәһбәрлијиндән һәр ҹәһәтҹә үстүн олдуғу мә’лум олаҹаг. Аллаһын рәһбәрлик етмәк һүгугу, Онун али һөкмранлығы шүбһәсиз ки, бәраәт газанаҹагдыр.
14. Миниллијин сонунда гијамчыларла нә баш верәҹәк?
14 Миниллијин сонунда, Јегова камил инсанлара ирадә азадлыгларыны истифадә етмәјә вә кимә хидмәт етмәк истәдикләринә гәрар вермәјә имкан верәҹәкдир. Мүгәддәс Китаб ҝөстәрир ки, “шејтан атылдығы зиндандан азад едиләҹәк”. О, јенидән инсанлары алдатмаға чалышаҹаг вә бә’зиләри Аллаһдан асылы олмамағы үстүн тутаҹагдыр. “Икинҹи дәфә сыхынты” тәкрар олунмасын дејә, Јегова Шејтаны, онун ҹинләрини вә Јегованын рәһбәрлијинә гаршы дуран һәр бир кәси мәһв едәҹәкдир. О заман һеч ким, әбәдијјән мәһв едилән инсанлара дүзҝүн јол тутмаг имканы верилмәдијини сөјләмәјәҹәк вә ја јанлыш һәрәкәтин гејри-камиллик уҹбатындан баш вердијини дүшүнмәјәҹәк. Чүнки онлар да, Јегованын әдаләтли рәһбәрлијинә гаршы биләрәкдән үсјан галдыран камил Адәм вә Һәвва кими олаҹаглар (Вәһј 20:7—10; Наһум 1:9).
15. Садиг инсанлар Јегова илә һансы мүнасибәтдә олаҹаглар?
15 Лакин инсанларын бөјүк әксәријјәти, чох еһтимал ки, Јегованын рәһбәрлијини үстүн тутаҹагдыр. Бүтүн гијамчылар мәһв едилән заман салеһләр ахырынҹы сәдагәт сынағындан кечәрәк, Јегованын гаршысында дураҹаглар. О заман Јегова бу садиг инсанлары оғуллары вә гызлары кими гәбул едәҹәкдир. Јә’ни онларын Аллаһла мүнасибәти, Адәмлә Һәвванын ҝүнаһ ишләтмәздән әввәл саһиб олдуглары мүнасибәти хатырладаҹаг. Ромалылара 8:21-ҹи ајәсиндәки сөзләр јеринә јетәҹәкдир: “Хилгәт [бәшәријјәт] өзү дә чүрүклүјә олан көләлијиндән азад олунуб Аллаһын өвладларынын иззәтли азадлығына говушаҹагдыр”. Ишаја пејғәмбәр габагҹадан сөјләјир: “Өлүмү әбәдијјән удду; вә РӘБ Јегова бүтүн үзләрдән ҝөз јашларыны силәҹәк” (Ишаја 25:8).
Әбәди һәјата үмид
16. Мүкафат олараг әбәди һәјаты алаҹағымыза үмид етмәк нә үчүн мәнтигидир?
16 Аллаһ садиг инсанлары руһани вә мадди ҹәһәтдән әбәдијјән тә’мин едәҹәји үчүн, онлары неҹә дә ҝөзәл ҝәләҹәк ҝөзләјир! Мәзмурчу әдаләтли олараг деди: “Әлини ачырсан вә һәр јашајаны диләјинә ҝөрә дојурурсан” (Мәзмур 145:16). Јегова истәјир ки, јер үзүндә јашајаҹаг инсанларын Ҹәннәтә олан үмидләри, Она иманын тәркиб һиссәсини тәшкил етсин. Јегованын һөкмранлығы һаггындакы суал, шүбһәсиз ки, даһа ваҹиб јер тутур, амма О өз халгындан тәләб етмир ки, мүкафат ҝөзләмәдән Она хидмәт етсинләр. Бүтүн Мүгәддәс Китабда Аллаһа сәдагәт вә әбәди һәјата үмид, мәсиһчинин Аллаһа олан иманынын тәркиб һиссәси кими, бир-бири илә ајрылмаз тәрздә бағлыдыр. “Иман етмәдән Аллаһа мәгбул олмаг исә гејри-мүмкүндүр. Чүнки Аллаһа јахынлашан иман етмәлидир ки, О вар вә Ону ахтаранлара мүкафат верир” (Ибраниләрә 11:6).
17. Иса, үмидимиздән гүввәт алмағын дүзҝүн олдуғуну неҹә ҝөстәрди?
17 Иса деди: “Әбәди һәјат о демәкдир ки, Сәни, ваһид һәгиги Аллаһы вә ҝөндәрдијин Иса Мәсиһи танысынлар” (Јәһја 17:3). Иса, Аллаһ вә Онун нијјәтләри һаггында әлдә едилән билији, һәмин билијин ҝәтирдији мүкафатла әлагәләндирди. Мисал үчүн, ҹинајәткарлардан бири Исадан, Падшаһлығына ҝәлдији заман ону хатырламасыны хаһиш едәндә, Иса деди: “Мәнимлә бәрабәр ҹәннәтдә олаҹагсан” (Лука 23:43). Иса о адама, мүкафат ҝөзләмәдән иман етмәји бујурмады. Иса билирди ки, Јегова, хидмәтчиләринин јер үзү ҹәннәтдә әбәди һәјата үмидләри олмасыны вә бу үмидин онлара бу дүнјада мүхтәлиф сынаглары гаршыламаға көмәк етмәсини истәјир. Буна ҝөрә дә мүкафат ҝөзләмәк, мәсиһчи јолунда чәтинликләрә таб ҝәтирмәк үчүн чох гијмәтли көмәкдир.
Падшаһлығын ҝәләҹәји
18, 19. Миниллик рәһбәрликдән сонра, Падшаһ вә онун Падшаһлығы неҹә олаҹаг?
18 Сәмави Падшаһлыг, Јегованын јер үзүнү ҹәннәтә чевирмәк, үзәриндә јашајан инсанлары камиллијә чатдырмаг вә Өзү илә барышдырмаг мәгсәдилә истифадә етдији көмәкчи бир һөкумәт олдуғу үчүн, мин илдән сонра Падшаһ Иса Мәсиһин вә 144 000 падшаһ вә каһинләрин ролу нәдән ибарәт олаҹаг? “О, Падшаһлығы Аллаһа вә Атаја тәслим етдикдән, һәр ҹүр рәислији, һакимијјәти вә гүдрәти ләғв етдикдән сонра сон олаҹагдыр; зира Аллаһ, Онун бүтүн дүшмәнләрини ајагларынын алтына салынҹаја кими О, падшаһлыг етмәлидир” (1 Коринфлиләрә 15:24, 25, И—93).
19 Әҝәр Мәсиһ Падшаһлығы Аллаһа гајтараҹагса, Падшаһлығын әбәди олмасы һаггында јазылан ајәләри неҹә баша дүшмәли? Падшаһлығын наилијјәтләри әбәди олараг галаҹаг. Исаја, Аллаһын һөкмранлығына бәраәт газандырмаг үчүн ојнадығы рола ҝөрә һәмишә еһтирам едиләҹәк. Лакин ҝүнаһ вә өлүм бүтүнлүклә арадан галдырылдығы, бәшәријјәт исә бағышландығы үчүн, Исанын, Хиласедиҹи кими ролу баша чатаҹагдыр. Бундан әлавә, Падшаһлығын Миниллик рәһбәрлији өз ишини мүвәффәгијјәтлә баша чатдыраҹаг вә Јегова илә итаәткар бәшәријјәт арасында көмәкчи һөкумәтә еһтијаҹ олмајаҹаг. Беләликлә, “Аллаһ һәр шејдә һәр шеј” олаҹаг (1 Коринфлиләрә 15:28).
20. Мәсиһ вә онун һакимијјәт шәрикләринин ҝәләҹәкләрини неҹә өјрәнә биләрик?
20 Миниллик рәһбәрликдән сонра, Мәсиһ вә онун һакимијјәт шәрикләри һансы ролу ојнајаҹаглар? Мүгәддәс Китаб бу барәдә һеч нә демир. Лакин биз әмин ола биләрик ки, Јегова онлара иҹра етмәләри үчүн башга шәрәфли тапшырыглар верәҹәкдир. Ҝәлин һәр биримиз Јегованын һөкмранлығына тәрәф олаг вә әбәди һәјат мүкафатыны алыб, Јегованын Падшаһа, онун шәрикләри олан падшаһлар вә каһинләр, еләҹә дә бүтүн каинат үчүн һазырладығы мүәјјән олана гәдәр јашајаг!
Тәкрар үчүн бәндләр
• Јахын ҝәләҹәкдә рәһбәрликлә әлагәдар һансы дәјишиклик ҝөзләнилир?
• Аллаһ ҝүнаһкарлары вә салеһләри неҹә мүһакимә едәҹәк?
• Јени дүнјада һансы шәраитләр һөкм сүрәҹәк?
• Јегованын һөкмранлығы бүтүнлүклә неҹә бәраәт газанаҹагдыр?
[15-ҹи сәһифәдәки шәкилләр]
“Һәм салеһ, һәм дә салеһ олмајан өлүләрин дирилмәси олаҹагдыр”.
[16-ҹы сәһифәдәки шәкил]
Садиг инсанлар Јегова илә лазыми мүнасибәтләрә наил олаҹаглар.