Азадлыг бәхш едән Аллаһа хидмәт ет

«Аллаһы севмәк Онун әмрләринә риајәт етмәк демәкдир, Онун әмрләри исә ағыр дејил» (1 ЈӘҺ. 5:3).

ҸАВАБ ВЕРӘ БИЛӘРСӘНМИ?

Аллаһын ганунлары ҝөзүмүздә ағыр ҝөрүнсүн дејә Шејтан нә едир?

Нәјә ҝөрә кимләрлә отуруб-дурдуғумуза ҹидди фикир вермәлијик?

Азадлыг бәхш едән Аллаһа садиг галмагда бизә нә көмәк едәҹәк?

1. Јеһова Өз азадлығындан неҹә истифадә едир? Бу, Онун Адәм вә Һәвва илә мүнасибәтиндән неҹә ҝөрүнүрдү?

СОНСУЗ азадлыға саһиб олан јеҝанә Шәхс Јеһовадыр. Анҹаг О нә Өз азадлығындан суи-истифадә едир, нә дә һәр хырда шејә ҝөрә Өз хидмәтчиләринин ишинә мүдахилә едир. Әксинә, О, онлара ирадә азадлығы бәхш едиб. Бу ирадә азадлығы онлара гәрарлар вермәк вә бүтүн дүзҝүн арзуларыны һәјата кечирмәк имканы верир. Мәсәлән, Аллаһ Адәмлә Һәвваја јалныз бир шеји — «хејирлә шәри билмә ағаҹынын» мејвәсиндән јемәји гадаған етмишди (Јар. 2:17). Беләликлә, онлар һәм Јараданын ирадәсини јеринә јетирә, һәм дә һејрәтамиз азадлыгдан зөвг ала биләрдиләр!

2. Нәјә ҝөрә улу валидејнләримиз Јараданын онлара бәхш етдији азадлығы итирдиләр?

² Нәјә ҝөрә Аллаһ улу валидејнләримизә бу гәдәр азадлыг вермишди? Чүнки онлары Өз сурәтиндә јаратмышды вә онлара виҹдан бәхш етмишди. Јеһова һаглы олараг Адәмлә Һәввадан ҝөзләјирди ки, онлар Јараданларына мәһәббәтдән ирәли ҝәләрәк Онун ҝөзүндә доғру оланы едәҹәкләр (Јар. 1:27; Ром. 2:15). Әфсуслар олсун ки, Адәмлә Һәвва онлара һәјат верән Аллаһын вә Ондан алдыглары азадлығын гәдрини билмәдиләр. Онлар Шејтанын тәклиф етдији ганунсуз азадлығы, башга сөзлә, Аллаһын мәнәви ганунларындан азад олмағы үстүн тутдулар. Адәмлә Һәвва даһа бөјүк азадлыға говушаҹагларыны дүшүнүрдүләр, әслиндә исә, өзләрини вә ҝәләҹәк өвладларыны ҝүнаһын көләлијинә сатдылар вә бунун аҹы нәтиҹәләрини даддылар (Ром. 5:12).

3, 4. Шејтан бизи Јеһованын тәләбләринин ағыр олдуғуна неҹә инандырмаға чалышыр?

³ Әҝәр Шејтан ики камил инсаны, еләҹә дә чохлу сајда руһани варлыглары Аллаһын али һөкмранлығындан имтина етмәјә тәһрик едә билдисә, бизи дә алдада биләр. Онун әл атдығы үсуллар демәк олар ки, дәјишилмәз олараг галыб. Шејтан мүхтәлиф јаланларла бизи инандырмаға чалышыр ки, Аллаһын тәләбләри олдугҹа ағырдыр вә бизи севинҹдән мәһрум едир (1 Јәһ. 5:3). Әҝәр бу ҹүр дүшүнән инсанларла даима отуруб-дурсаг, биз дә онлар кими дүшүнмәјә башлаја биләрик. Әввәлләр әхлагсызлыг етмиш 24 јашлы бир баҹы дејир: «Мән пис достларымын тәсиринә чох тез дүшүрдүм, хүсусилә она ҝөрә ки, һәмјашыдларымдан фәргли дүшүнҹәјә саһиб олмагдан горхурдум». Ола билсин, сән дә һәмјашыдларынын тәзјигинә мәруз галырсан.

⁴ Әфсуслар олсун ки, бәзән ҝәнҹләр мәсиһчи јығынҹағында да пис тәсирлә үзләширләр. Јеһованын Шаһиди олан бир ҝәнҹ гардаш дејир: «Мән јығынҹагда елә ҝәнҹләри таныјырдым ки, Јеһоваја хидмәт етмәјән инсанларла ҝөрүшүрдүләр. Онларла даһа чох үнсијјәт етдикҹә ҝет-ҝедә онлара охшајырдым. Руһән ҝүнү-ҝүндән дала дүшүрдүм. Јығынҹаг ҝөрүшләриндән артыг севинҹ дујмурдум вә хидмәтә надир һалларда чыхырдым. Бу, достларымла әлагәни кәсмәк үчүн бир ишарә иди вә мән белә дә етдим!» Бәс сән достларынын сәнә нә дәрәҹәдә бөјүк тәсир ҝөстәрә биләҹәјини дәрк едирсәнми? Ҝәлин бизим дөврдә дә өз әһәмијјәтини итирмәјән бир Мүгәддәс Китаб нүмунәсинә бахаг (Ром. 15:4).

ОНЛАРЫН «КӨНЛҮНҮ... ӘЛӘ АЛАРДЫ»

5, 6. Авшалом башгаларыны неҹә товлады вә онун гурдуғу план уғурлу олдуму?

⁵ Мүгәддәс Китабда башгаларына пис тәсир ҝөстәрән бир чох инсанлардан бәһс олунур. Онлардан бири Давуд падшаһын оғлу Авшалом иди. Авшалом чох јарашыглы иди. Лакин бир мүддәтдән сонра о, Шејтан кими, шөһрәтпәрәстлијә гапылды вә ихтијары олмадығы бир шејә — атасынын тахт-таҹына ҝөз дикдиa. Һакимијјәти әлә кечирмәк мәгсәдилә о, һијләјә әл атды. Авшалом өзүнү елә ҝөстәрирди ки, ҝуја сојдашларына ҝөрә чох нараһатдыр вә падшаһын онларын вәзијјәти илә гәтијјән марагланмадығына мәһарәтлә ејһам вурурду. Еден бағындакы Иблис кими, Авшалом да өзүнү хејријјәчи кими ҝөстәрди вә ејни заманда атасына бөһтан атды (2 Шам. 15:1—5).

⁶ Авшаломун усталыгла гурдуғу план баш тутдуму? Мүәјјән мәнада һә. Чүнки Мүгәддәс Китабда дејилир: «Авшалом... исраиллиләрин көнлүнү бу сурәтдә әлә аларды» (2 Шам. 15:6). Лакин Авшаломун тәкәббүрлүлүјү ону сүгута уғратды. Ән писи исә о иди ки, бу һәм ону, һәм дә онун фәндләринә ујан минләрлә исраиллиләри өлүмүнә сүрүкләди (2 Шам. 18:7, 14—17).

7. Авшаломун башына ҝәләнләрдән биз өзүмүзә һансы ибрәт дәрси ҝөтүрә биләрик? (14-ҹү сәһифәдәки шәклә бах.)

⁷ Нәјә ҝөрә һәмин исраиллиләр белә асанлыгла алдандылар? Ола билсин ки, Авшаломун вердији вәдләр халгын истәкләри илә үст-үстә дүшмүшдү вә ја онлар Авшаломун заһири ҝөрүнүшүнә алданмышдылар. Сәбәбин нә олмасындан асылы олмајараг, биз бир шејә әминик: онлар Јеһоваја вә Онун тәјин етдији падшаһа садиг дејилдиләр. Бу ҝүн дә Шејтан Авшалом кими инсанлардан истифадә едәрәк Јеһованын хидмәтчиләринин үрәкләрини оғурламаға чалышыр. Онлар белә дејә биләрләр: «Јеһованын ганунларында “олмазлар” чохдур. Ҝөзүнү ач бир әтрафа бах — ҹамаат кеф еләјир!» Бу кими сөзләр ешидәндә онларын ағ јалан олдуғуну сезирсәнми вә Јеһоваја садиг галырсанмы? Дәрк едирсәнми ки, јалныз Јеһованын камил гануну, јәни Мәсиһин гануну сәни әсил азадлыға доғру апара биләр? (Јаг. 1:25). Белә исә, бу гануну севдијини ҝөстәр вә һеч вахт мәсиһчи азадлығындан пис мәгсәдләр үчүн истифадә етмәк тәклифләринә ујма. (1 Петер 2:16 ајәсини оху.)

8. Реал һәјатдан олан һансы нүмунәләр ҝөстәрир ки, Јеһованын ганунларыны позмаг инсана хошбәхтлик ҝәтирмир?

⁸ Шејтанын һәдәфи хүсусилә ҝәнҹләрдир. Отуз јашларында олан бир гардаш јенијетмәлик илләрини јада салараг дејир: «О вахтлар Јеһованын әхлаг нормаларына мүдафиә јох, азадлығымы мәһдудлашдыран бир шеј кими бахырдым». Нәтиҹәдә, о әхлагсызлыг етди. Лакин бу, она гәтијјән хошбәхтлик ҝәтирмәди. О, сөзүнә давам едир: «Узун илләр әрзиндә виҹдан әзабы вә дәрин пешманчылыг һисси мәнә раһатлыг вермәди». Јенијетмә јашларыны хатырлајараг бир баҹы јазыр: «Әхлагсызлыг етдикдән сонра дахилимдә бошлуг... әмәлә ҝәлди. Бу һадисәнин үстүндән 19 ил кечсә дә, пис хатирәләри јаддашымдан һәлә дә силиб ата билмирәм». Бир башга баҹы исә дејир: «Һәрәкәтим мәним үчүн чох әзиз олан инсанлара нә гәдәр бөјүк ағры ҝәтирдији һагда фикирләшәндә бу, мәнә мәнәви, руһани вә емосионал әзаб верир. Јеһованын лүтфү олмадан јашамаг чох чәтиндир!» Шејтан истәмир ки, сән ҝүнаһын белә нәтиҹәләри һагда дүшүнәсән.

9. а) Јеһоваја, еләҹә дә Онун ганун вә принсипләринә олан бахышымызы тәһлил етмәјә бизә һансы суаллар көмәк едә биләр? б) Аллаһы јахшы танымаг нәјә ҝөрә ваҹибдир?

⁹ Неҹә дә аҹынаҹаглыдыр ки, һәгигәтдә олан бир чох ҝәнҹләр, һәтта јеткин јашда олан бәзи инсанлар белә башлары дашдан-даша дәјәндән сонра нәтиҹә чыхарырлар! (Галат. 6:7, 8). Буна ҝөрә өзүндән соруш: «Шејтанын истифадә етдији үсулларын әслиндә гәддар јалан олдуғуну дәрк едирәмми? Јеһованы һәмишә һәгигәти сөјләјән вә мәним јахшылығымы истәјән ән јахын Дост кими ҝөрүрәмми? Мәнә хејир ҝәтирәҹәк вә мәни хошбәхт едәҹәк шејләрдән Онун мәни һеч вахт мәһрум етмәдијинә тамамилә әминәмми?» (Јешаја 48:17, 18 ајәләрини оху.) Бүтүн бу суаллара үрәкдән «һә» ҹавабыны вермәк үчүн Јеһова һаггында сәтһи биликләрә малик олмаг кифајәт дејил. Сән Ону јахындан танымалысан вә дәрк етмәлисән ки, Мүгәддәс Китабдакы ганун вә принсипләр сәни мүәјјән чәрчивә дахилиндә сахламаг үчүн јох, сәнә мәһәббәтдән ирәли ҝәләрәк верилмишди (Мәз. 25:14).

АЛЛАҺДАН ҺИКМӘТЛИ ВӘ ИТАӘТКАР ҮРӘК ИСТӘ

10. Нәјә ҝөрә биз ҝәнҹ Сүлејман падшаһы тәглид етмәјә чалышмалыјыг?

¹⁰ Һәлә ҝәнҹ икән Сүлејман тәвазөкарҹасына дуа етмишди: «Мән чох ҹаванам, нә едиб-етмәјәҹәјими билмирәм». Сонра о, Аллаһдан мүдрик вә итаәткар үрәк истәди (1 Пад. 3:7—9, 12). Јеһова Сүлејманын бу сәмими хаһишини ҹавабсыз гојмады. Һансы јашда олмағындан асылы олмајараг, Јеһова сәнин дә бу кими хаһишләрини јеринә јетирәҹәк. Әлбәттә, Јеһова дәрракә вә мүдриклији сәнә мөҹүзәви шәкилдә вермәјәҹәк. Лакин әҝәр сән Онун Кәламыны арашдырмаға ҹидди јанашсан, мүгәддәс руһ үчүн дуа етсән вә мәсиһчи ҝөрүшләриндә верилән ҝөстәриш вә рәһбәрлијә там риајәт етсән, мүдриклијә јијәләнәрсән (Јаг. 1:5). Јеһова бу үсулларла һәтта ҝәнҹ хидмәтчиләрини белә өзүнү «һикмәтли вә ағыллы» адландыран вә Онун ҝөстәришләринә сајмазјана јанашан инсанларын һамысындан даһа мүдрик едир (Лука 10:21; Мәзмур 119:98—100 ајәләрини оху).

11-13. а) Мәзмур 26:4, Сүлејманын мәсәлләри 13:20 вә 1 Коринфлиләрә 15:33 ајәләриндән биз һансы ибрәт дәрсләри ҝөтүрә биләрик? б) Сән Мүгәддәс Јазылардакы бу принсипләри неҹә тәтбиг едәрдин?

¹¹ Инди исә ҝөрәк Мүгәддәс Китабы арашдырмаг вә үзәриндә дәриндән дүшүнмәк Јеһованы јахындан танымагда нә дәрәҹәдә ваҹиб рол ојнајыр. Бунун үчүн дүзҝүн дост сечиминдә бизә көмәк едәҹәк бир нечә ајәјә нәзәр салаҹағыг: «Јаланчы инсанларла отурмурам, икиүзлүләрлә јолдашлыг етмирәм» (Мәз. 26:4). «Һикмәтли илә отуруб-дуран һикмәт газанар, ахмагларла ајаглашан бәдбәхт олар» (Сүл. мәс. 13:20). «Пис достлар јахшы вәрдишләри корлајыр» (1 Кор. 15:33).

¹² Бу ајәләрдән һансы ваҹиб дәрсләри өјрәнирик? 1) Јеһова дост сечиминдә бизим диггәтли олмағымызы истәјир. О, бизи мәнәви вә руһани зәрәрдән горумаға чалышыр. 2) Үнсијјәт етдијимиз инсанлар бизә ја јахшы, ја да пис тәсир ҝөстәрир. Бу, данылмаз фактдыр. Һәмин ајәләрдәки фикирләрин ифадә тәрзи ҝөстәрир ки, Јеһова онларын васитәсилә үрәјимизә тәсир ҝөстәрмәјә чалышыр. Неҹә? Фикир вер ки, бу ајәләрин һеч бири бизим садәҹә олараг нә исә етмәмәли олдуғумузу демир. Әксинә, онлар сүбута һеч бир еһтијаҹы олмајан бир фикир кими јазылыб. Јеһова, санки, бизә дејир: «Фактлар ҝөзүнүн габағындадыр. Сән неҹә давранаҹагсан? Үрәјиндән нә кечир?»

¹³ Бундан башга, бу үч ајә факт кими јазылдығы үчүн онлар, кечмиш дөврләрдә олдуғу кими, бизим дөврдә дә актуалдыр вә онлары һәјатымызын бир чох саһәләриндә тәтбиг етмәк олар. Буну әјани шәкилдә ҝөрмәк үчүн өзүнә нөвбәти суаллары вер: «“Икиүзлүләрлә” достлуг етмәкдән неҹә гача биләрәм? Һансы вәзијјәтләрдә гаршыма бу ҹүр инсанлар чыха биләр? (Сүл. мәс. 3:32; 6:12). Јеһованын мәним достлуг етмәк истәдији һикмәтли инсанлар кимләрдир? Бәс Јеһованын мәним достлуг етмәк истәмәдији ахмаг инсанлар кимләрдир? (Мәз. 111:10; 112:1; Сүл. мәс. 1:7). Пис достлуг нәтиҹәсиндә мән һансы “јахшы вәрдишләри”ми тәрҝидә биләрәм? Пис достлар јалныз мәсиһчи олмајан инсанлардыр? (2 Пет. 2:1—3)». Бу суаллара сән неҹә ҹаваб верәрдин?

14. Сән аиләви ибадәти неҹә мараглы вә долғун кечирә биләрсән?

¹⁴ Бу ајәләрин үзәриндә дүшүндүјүмүз кими, сән өзүнү вә ја аилә үзвләрини нараһат едән мәсәлә илә әлагәдар Јеһованын нөгтеји-нәзәрини өјрәнмәк үчүн мүвафиг ајәләри арашдыра биләрсәнb. Валидејнләр, бу кими мөвзулары аиләви ибадәт заманы мүзакирә един. Лакин јадда сахлајын ки, сизин мәгсәдиниз аиләнин һәр бир үзвүнә Аллаһын ганун вә принсипләриндә әкс олунан дәрин мәһәббәтини там шәкилдә анламаға көмәк етмәкдир (Мәз. 119:72). Бу ҹүр кечирилән аиләви ибадәт аиләнин бүтүн үзвләрини Јеһоваја вә бир-бириләринә јахынлашдыраҹаг.

15. Мүдрик вә итаәткар үрәк инкишаф етдирдијини неҹә мүәјјән едә биләрсән?

¹⁵ Сән мүдрик вә итаәткар үрәк инкишаф етдирдијини неҹә мүәјјән едә биләрсән? Үсуллардан бири дүшүнҹә тәрзини кечмишдә јашамыш Аллаһын садиг хидмәтчиләринин дүшүнҹә тәрзи илә мүгајисә етмәкдир. Мәсәлән, Давуд падшаһ јазмышды: «Еј Аллаһым, Сәнин истәјинә әмәл етмәк мәнә зөвг верир, ганунун гәлбимдәдир» (Мәз. 40:8). Ејнилә, 119-ҹу мәзмурун јазычысы дејирди: «Ганунуну нә гәдәр севирәм! Һәмишә онун үзәриндә дәриндән дүшүнүрәм» (Мәз. 119:97). Бу ҹүр мәһәббәтин үрәјимиздә дәрин көк салмасы әтрафлы арашдырма апармағын, дуа етмәјин, дәриндән дүшүнмәјин вә шәхси тәҹрүбәнин, јәни Аллаһын ганунларына риајәт етмәјин ҝәтирдији сајсыз-һесабсыз хејир-дуалары ҝөрмәјин бәһрәсидир (Мәз. 34:8).

МӘСИҺЧИ АЗАДЛЫҒЫН ҮЧҮН МҮБАРИЗӘ АПАР!

16. Әсил азадлыг уғрунда ҝедән мүһарибәдә галиб ҝәлмәк үчүн нәји јадда сахламалыјыг?

¹⁶ Тарих боју халглар азадлыг уғрунда амансыз мүһарибәләр апармышлар. Бир мәсиһчи кими, азадлығыны горумаг үчүн сән дә руһани мүһарибәдә даһа әзмли олмалысан! Јадда сахламалысан ки, сәнин дүшмәнләрин јалныз Шејтан, бу дүнја вә онун зәһәрли руһу дејил. Сән һәмчинин өз гејри-камиллијинлә вә һијләҝәр үрәјинлә дә мүбаризә апармалысан (Јер. 17:9; Ефес. 2:3). Јеһованын көмәјилә сән бу дөјүшдән галиб чыха биләрсән. Үстәлик, бөјүк вә ја кичик олмасындан асылы олмајараг, һәр гәләбәнин ән азындан ики јахшы нәтиҹәси олаҹаг. Биринҹиси, сән Јеһованын гәлбини севиндирмиш олаҹагсан (Сүл. мәс. 27:11). Икинҹиси, «азадлығын камил ганунуна» риајәт етмәјинин сәнә ҝәтирдији фајданы ҝөрәндә әбәди һәјата апаран дар јолда галмаг әзмин даһа да артаҹаг. Ҝәләҹәкдә исә Јеһованын бүтүн садиг бәндәләринә вәд етдији даһа бөјүк азадлыға говушаҹагсан (Јаг. 1:25; Мат. 7:13, 14).

17. Сәһвә јол верәндә нә үчүн руһдан дүшмәмәлијик вә белә һалларда Јеһова бизә неҹә көмәк едир?

¹⁷ Әлбәттә, биз һамымыз бәзән сәһвләрә јол веририк (Ваиз 7:20). Белә һалларда руһдан дүшмә вә лазымсыз олдуғуну дүшүнмә. Мәҹази диллә десәк, әҝәр сән бүдрәјиб јыхылмысанса, ајаға галх вә јолуна давам ет. Һәтта лазым ҝәлсә, көмәк үчүн ағсаггаллара мүраҹиәт ет. Јагуб јазмышды: «Иманла едилән дуа хәстәни сағалдаҹаг вә Јеһова ону ајаға галдыраҹаг. Әҝәр ҝүнаһ ишләјибсә, тәгсири бағышланаҹаг» (Јаг. 5:15). Һеч вахт јаддан чыхартма ки, Јеһова һәгигәтән дә мәрһәмәтли Аллаһдыр вә сәни јығынҹаға О ҹәлб едиб, чүнки О, сәндә јахшы хүсусијјәтләр олдуғуну ҝөрмүшдү вә бунлары инкишаф етдирмәјин мүмкүн олдуғуну билирди. (Мәзмур 103:8, 9 ајәләрини оху.) Нә гәдәр ки Јеһоваја сәмими-гәлбдән хидмәт едирсән, О, сәни һеч вахт атмајаҹаг (1 Салн. 28:9).

18. Биз Исанын Јәһја 17:15 ајәсиндә јазылан дуасына әсасән неҹә даврана биләрик?

¹⁸ Өлүмүндән әввәлки ҝеҹә Иса 11 садиг һәвариси илә дуа едәркән онлар үчүн бу унудулмаз сөзләри демишди: «Хаһиш едирәм ки, онлары Шәрирдән горујасан» (Јәһ. 17:15). Иса јалныз өз һәвариләринә ҝөрә јох, ҝәләҹәкдәки бүтүн давамчыларына ҝөрә дә нараһат олурду. Биз әмин ола биләрик ки, Јеһова Исанын дуасына ҹаваб олараг бу кешмәкешли ҝүнләрдә бизи горујаҹаг. Јеһова «камалла ҝәзәнләрә сипәр олур» вә «мөминләрин јолларыны һифз едир» (Сүл. мәс. 2:7, 8). Нөгсансызлыг јолунун өзүнәмәхсус чәтинликләри олса да, бу, әбәди һәјата вә әсил азадлыға апаран јеҝанә јолдур (Ром. 8:21). Һеч кәсә сәни бу јолдан сапдырмаға иҹазә вермә!

[Һашијәләр]

[14–ҹү сәһифәдәки шәкилләр]

Бизим ҝүнләрдә Авшалом кимиләрини мүәјјән етмәјә вә өзүмүзү онлардан горумаға нә көмәк едәҹәк?