Дирилмәјә олан үмидин гүввәси вар
“Һәр шеји зијан... сајырам ки... Ону [Иса Мәсиһи] вә Онун дирилмә гүдрәтини дәрк едим” (ФИЛИПИЛИЛӘРӘ 3:8—10).
1, 2. а) Чох илләр әввәл бир дин хадими дирилмәни неҹә тәсвир етмишди? б) Дирилмә неҹә баш верәҹәк?
БРУКЛИНДӘ (Нју-Јорк, АБШ) олан бир дин хадиминин тәәҹҹүблү тәблиғи барәдә, 1890-ҹы илләрин башланғыҹында дәрҹ олунан дөври мәтбуатда мә’лумат верилирди. О, дејирди ки, дирилмә заманы, бир вахтлар инсан бәдәнини тәшкил едән бүтүн сүмүкләр вә әт - атәшдә јанмағындан вә ја бәдбәхт һадисәдә мәһв едилмәсиндән, вәһши һејванларын јемәсиндән вә ја ҝүбрәјә чеврилмәсиндән асылы олмајараг - бир јерә јығылаҹаг вә јенидән һәјата ҹанланаҹаглар. Тәблиғчинин сөзләринә ҝөрә 24 саат давам едән мүәјјән бир ҝүндә јер үзү милјардларла өлмүш адамларын әлләри, ајаглары, бармаглары, сүмүкләри, вәтәрләри вә дәриләри илә долаҹаг. Бу һиссәләр, һәмин адама мәхсус олан диҝәр һиссәләри ахтараҹаглар. Сонра ҹанлар ҹәннәт вә ҹәһәннәмдән гајыдаҹаг вә дирилән бәдәнә дахил олаҹаглар.
2 Әввәлки атомларын јенидән бирләшмәси јолу илә баш верән дирилмә мәнтигә ујғун дејил вә бундан башга, инсанда өлмәз ҹан јохдур (Ваиз 9:5, 10; Һезекиел 18:4). Өлүләри дирилдән Јегова Аллаһа, инсан бәдәнини илк әввәл тәшкил едән атом маддәләрини бир јерә јығмаг лазым ҝәлмир. О, дириләнләр үчүн јени бәдән јарада биләр. Јегова Оғлу Иса Мәсиһә, өләнләри һәјата гајтармаг, онлара әбәди јашамаға имкан вермәк гүввәсини вериб (Јәһја 5:26). Буна ҝөрә дә, Иса деди: “Дирилмә вә һәјат Мәнәм; Мәнә иман едән өлсә дә јашајар” (Јәһја 11:25, 26). Неҹә дә севиндириҹи вә’ддир! Бу вә’д, сынаглара таб ҝәтирмәк үчүн бизә гүввә верир вә һәтта бизи, Јегованын садиг Шаһидләрини, өлүм гаршысында да мөһкәмләндирир.
3. Павел нәјә ҝөрә дирилмә һаггындакы тә’лими мүдафиә етмәли олду?
3 Дирилмә, инсанда өлмәз ҹанын олмасы тә’лими илә ујғунлашмыр - бу тә’лими јунан философу Платон ирәли сүрмүшдүр. Елә буна ҝөрә, һәвари Павел, Афина Ареопагындакы ҝөркәмли јунанлара шәһадәтлик едәркән, Исаја истинад едиб, Аллаһын ону дирилтдијини сөјләдикдә нә баш верди? Мүгәддәс Китабда дејилир: “Өлүләрдән дирилмәји ешитдикдә, бә’зиләри кинајә илә ҝүлдү” (Һәвариләрин ишләри 17:29—34). Исаны дирилмиш ҝөрәнләрин чоху һәлә сағ иди вә ришхәндчилијә бахмајараг, онун өлүләрдән дирилдилдији барәдә шәһадәтлик едирдиләр. Лакин Коринф јығынҹағындакы јаланчы мүәллимләр дирилмәнин олмадығыны иддиа едирдиләр. Буна ҝөрә Павел, коринфлиләрә ҝөндәрдији биринҹи мәктубун 15-ҹи фәслиндә, бу мәсиһчи тә’лимини гәти сурәтдә мүдафиә етди. Онун ҝәтирдији сүбутларын дәриндән мүшаһидә едилмәси, дирилмәјә олан үмидин инандырыҹы вә тә’сирли гүввәси олмасына һеч бир шүбһә јери гојмур.
Исанын дирилмәсинин инандырыҹы сүбуту
4. Павел, Исанын дирилмәсинә шаһид оланларын һансы шәһадәтлијини ҝөстәрди?
4 Павелин өз мүдафиәсини нәдән башладығына диггәт јетирин (1 Коринфлиләрә 15:1—11). Коринфлиләр хилас һаггындакы хош хәбәрә гәти шәкилдә тәрәф дураҹаглар, әкс тәгдирдә елә чыхарды ки, онлар әбәс јерә иман етмишдиләр. Мәсиһ бизим ҝүнаһларымыза ҝөрә өлмүш, дәфн едилмиш вә сонра дирилдилмишдир. Дирилән Иса, Кефаја, “сонра да Оникиләрә ҝөрүндү” (Јәһја 20:19—23). Ону тәхминән 500 адам ҝөрдү; бу, ола билсин ки, онун: “Ҝедин, бүтүн халглары шаҝирдим един” - дејә, бујурдуғу заман олмушдур (Матта 28:19, 20). Бүтүн башга садиг һәвариләрлә бәрабәр, ону Јагуб да ҝөрдү (Һәвариләрин ишләри 1:6—11). Иса Дәмәшгә јахын бир мәсафәдә, “вахтындан әввәл доғулан кими олан”, јә’ни санки артыг руһани аләмдә һәјата дирилдилмиш олан Шаула ҝөрүндү (Һәвариләрин ишләри 9:1—9). Коринфлиләр, Павелин онлара тәблиғ етмәси сајәсиндә иманлы олдулар вә хош хәбәри гәбул етдиләр.
5. Павел, 1 Коринфлиләрә 15:12—19 ајәләриндә һансы дәлилләри ҝөстәрди?
5 Павелин дәлилләринә диггәт јетирәк (1 Коринфлиләрә 15:12—19). Мәсиһин дирилмәсинә шаһид оланлар бу барәдә тәблиғ етдикләри бир вахтда, дирилмәни неҹә инкар етмәк олар? Әҝәр Иса дирилдимәмишдирсә, бизим тәблиғимиз вә иманымыз мә’насыз оларды вә биз, Аллаһын һаггында, “Мәсиһи дирилтди дејәрәк”, јалан шәһадәт етмиш олардыг. Өлүләр дирилмирләрсә, демәли, “биз һәлә өз ҝүнаһларымызын ичиндәјик” вә Мәсиһдә өләнләр һәлак олдулар. Бундан әлавә, “әҝәр биз, јалныз бу һәјатда Мәсиһә үмид бәсләјириксә, бизә бүтүн инсанлардан чох аҹымаг лазымдыр”.
6. а) Исанын дирилдијини тәсдиг етмәк үчүн, Павел нә деди? б) “Ахырынҹы дүшмән” нәдир вә неҹә јох едиләҹәк?
6 Павел, Исанын дирилдијини тәсдиг едир (1 Коринфлиләрә 15:20—28). Мәсиһ, өлүм јухусунда јатанлардан “илк нүмунә” вә ја “илк мәһсул” (ЈД) олдуғу үчүн, диҝәр инсанлар да дирилдиләҹәкләр. Өлүм, инсан олан Адәмин итаәтсизлији нәтиҹәсиндә пејда олдуғу кими, дирилмә дә Исанын васитәсилә мүмкүндүр. Исаја мәхсус оланлар, онун иштиракы заманы дирилдилмәлидирләр. Мәсиһ, Аллаһын һөкмранлығына зидд ҝедән “һәр ҹүр рәислији, һакимијјәти вә гүдрәти ләғв” едәҹәк вә Јегова бүтүн дүшмәнләри онун ајаглары алтына гојана гәдәр Падшаһлыг едәҹәкдир. Һәтта Адәмдән мирас алынмыш “ахырынҹы дүшмән” олан өлүм дә, Исанын гурбанлығынын дәјәри сајәсиндә јох едиләҹәк. О заман Мәсиһ Падшаһлығы, Аллаһы вә Атасы олан Јеговаја верәҹәк вә “Она һәр шеји табе Етдирәнә табе олаҹаг ки, Аллаһ һәр шејдә һәр шеј олсун”.
Өлүләр үчүн вәфтиз олунмушлар?
7. “Өлү олмаг мәгсәдилә вәфтиз олунанлар” кимләрдир вә онлар үчүн бу нә демәкдир?
7 Павел, дирилмәни инкар едәнләрдән сорушурду: “Өлүләр үчүн вәфтиз олунанлар нә едәҹәкләр [“Өлү олмаг мәгсәдилә вәфтиз олунанлар нә етмәлидир”, ЈД]?” (1 Коринфлиләрә 15:29). Павел демәк истәмирди ки, дириләр өләнләрин хејринә вәфтиз олунмалыдырлар, чүнки Мәсиһин шаҝирдләри өзләри шәхсән һәгигәти өјрәнмәли, иман етмәли вә вәфтиз олунмалыдырлар (Матта 28:19, 20; Һәвариләрин ишләри 2:41). Мәсһ едилмиш мәсиһчиләр, онлары өлүмә вә дирилмәјә апаран һәјат јолуна гәдәм гојараг, “өлү олмаг мәгсәдилә вәфтиз олунурлар”. Бу ҹүр вәфтиз, Аллаһын руһу онларда ҝөјләр үмиди јараданда башлајыр вә онлар ҝөјләрдә өлмәз һәјата дириләндә сона чатыр (Ромалылара 6:3—5; 8:16, 17; 1 Коринфлиләрә 6:14).
8. Мәсиһчиләр, һәтта әҝәр Шејтанын вә онун хидмәтчиләри тәрәфиндән өлүм тәһлүкәсиндә олсалар да, нәјә әмин ола биләрләр?
8 Павелин сөзләриндән ҝөрүндүјү кими, дирилмәјә олан үмид мәсиһчиләрә, Падшаһлыг һаггындакы мүждәни тәблиғ етдикләринә ҝөрә һәр саат тәһлүкәјә мә’руз галанда вә һәр ҝүн өлүмлә үз-үзә ҝәләндә мөһкәм дајанмалары үчүн гүввәт верир (1 Коринфлиләрә 15:30, 31). Бу мәсиһчиләр билирләр ки, әҝәр Јегова онларын Шејтан вә онун хидмәтчиләри тәрәфиндән өлдүрүлмәсинә јол верирсә, онлары дирилдә биләр. Онларын ҹаныны вә ја һәјатларыны, әбәди мәһвин символу олан ҹәһәннәмдә јалныз Јегова һәлак едә биләр (Лука 12:5).
Еһтијатлы олмағын ҝәрәклији
9. Әҝәр дирилмәјә олан үмидин һәјатымызда бизә көмәк етмәсини истәјириксә, нәдән узаг олмалыјыг?
9 Дирилмәјә олан үмид Павели руһландырырды. Павел Ефесдә оланда, еһтимала ҝөрә, дүшмәнләри ону вәһши һејванларла мүбаризә апармаг үчүн мејдана бурахмышдылар (1 Коринфлиләрә 15:32). Әҝәр белә һадисә баш вермишдисә, ширләрдән хилас едилән Даниел кими, Павел дә һәлакдан гуртулмушдур (Даниел 6:16—22; Ибраниләрә 11:32, 33). Павел, дирилмәјә үмид етдији үчүн, Јешајанын ҝүнләриндә Јәһудејада јашајан дөнүкләрин нөгтеји-нәзәрләринә шәрик олмурду. Онлар дејирдиләр: “Јејәк вә ичәк, чүнки сабаһ өләҹәјик” (Јешаја 22:13). Дирилмәјә олан үмид һәјатымызда бизи дә, Павел кими, руһландырсын дејә белә зәрәрли руһу ҝөстәрән инсанлардан узаг олмалыјыг. Павел хәбәрдарлыг едирди: “Алданмајын: пис достлуг јахшы әхлагы позар” (1 Коринфлиләрә 15:33). Бу принсип, шүбһәсиз ки, һәјатын мүхтәлиф саһәләринә аиддир.
10. Дирилмәјә олан үмиди неҹә горујуб сахламаг олар?
10 Дирилмәјә шүбһә едәнләрә Павел деди: “Неҹә лазымса, ајылын вә ҝүнаһ ишләтмәјин; утанманыз үчүн дејим ки, сизләрдән бә’зиләри Аллаһы һеч танымыр” (1 Коринфлиләрә 15:34). Биз бу “сонун вахтында”, Аллаһ вә Мәсиһ һаггындакы дәгиг билијә мүвафиг олараг давранмалыјыг (Даниел 12:4, ЈД; Јәһја 17:3). Бу, дирилмәјә олан үмидимизи горујуб сахламагда бизә көмәк едәҹәк.
Һансы бәдәнлә дириләҹәкләр?
11. Мәсһ едилмиш мәсиһчиләрин дирилмәсини Павел нә илә мүгајисә етди?
11 Павел сонра бә’зи суаллары изаһ едир (1 Коринфлиләрә 15:35—41). Фәрз едәк ки, дирилмәни шүбһә алтына гојмаг мәгсәдилә, бир кимсә соруша биләр: “Өлүләр неҹә дириләҹәкләр? Онлар һансы бәдәнлә ҝәләҹәкләр?” Павелин ҝөстәрдији кими, сәпилән тохум ҹүҹәрәндә, нәтиҹәдә өлүр. Бунун кими, руһдан доғулан инсанлар да өлмәлидирләр. Тохумдан бој атан битки јени “бәдәни” тәгдим едир, буна ҝөрә дә, мәсһ едилмиш мәсиһчинин дирилмиш бәдәни артыг инсан бәдәни дејил. Бахмајараг ки, белә мәсиһчи өлмәздән әввәлки хасијјәт вә дүшүнҹә тәрзиндә галыр, о, ҝөјләрдә јашамаға гадир олан руһани бәдәнли јени варлыг кими дирилир. Јер үзүндә дириләҹәк инсанларын исә, тәбиидир ки, инсан бәдәни олаҹаг.
12. “Сәмави бәдән” вә “дүнјәви бәдән” ифадәләринин мә’насы нәдир?
12 Павелин дедији кими, инсан бәдәни һејванларын бәдәниндән фәргләнир. Һәтта бир һејванын бәдәни диҝәриндән фәргләнир (Тәквин 1:20—25). Руһани варлыглара аид олан (түрк.) “сәмави бәдәнләр... дүнјәви бәдәнләр”дән иззәтләринә ҝөрә фәргләнирләр. Иззәтдә Ҝүнәш, Ај вә улдузлар да фәргләнирләр. Лакин дирилән бир мәсһ едилмишин иззәти, ҝөј ҹисимләринин иззәтиндән чох бөјүкдүр.
13. 1 Коринфлиләрә 15:42—44 әсасән, нә әкилир вә нә дирилир?
13 Бу фәргләри хатырладараг, Павел әлавә етди: “Өлүләрин дирилмәси дә беләдир” (1 Коринфлиләрә 15:42—44). О деди: “Фаниликдә әкилир, гејри-фаниликдә дирилир”. Јәгин ки, Павел бурада, мәсһ едилмишләр барәсиндә, бир груп кими бәһс едирди. Бу груп “фаниликдә әкилир”, амма ҝүнаһдан азад олараг гејри-фаниликдә дирилир. Бу дүнјада мәсиһчиләрә һөрмәтсизлик ҝөстәрилмәсинә бахмајараг, онлар ҝөјләр һәјатына дирилдиләҹәкләр вә иззәтдә Мәсиһлә зүһур едәҹәкләр (Һәвариләрин ишләри 5:41; Колослулара 3:4). Өлүм заманы “тәбии ҹисим әкилир” вә “руһани ҹисим дирилир”. Бу вәзијјәтин руһдан доғуланларла баш вермәси мүмкүн олдуғу үчүн биз әмин ола биләрик ки, диҝәр инсанлар јер үзүндәки һәјат үчүн дирилдилә биләрләр.
14. Мәсиһ илә Адәми Павел неҹә мүгајисә етди?
14 Павел даһа сонра Мәсиһлә Адәми мүгајисә едир (1 Коринфлиләрә 15:45—49). Илк инсан олан Адәм “јашајан ҹан олду” (Тәквин 2:7). “Сонунҹу Адәм” олан Иса “һәјат верән руһ олду”. О өз һәјатыны, илк нөвбәдә өзүнүн мәсһ едилмиш давамчылары үчүн, фидијә олараг гурбан верди (Марк 10:45). Онлар инсан оларкән “торпагдан һасил олунмушун сурәтини” ҝәздирирләр, дирилән заман исә ахырынҹы Адәм кими олурлар. Мәсиһин гурбанлығы, әлбәттә ки, бүтүн итаәткар инсанларын, о ҹүмләдән јер үзүндә дирилдиләнләрин дә хејринә хидмәт едәҹәкдир (1 Јәһја 2:1, 2).
15. Мәсһ едилмиш мәсиһчиләр нә үчүн ҹисмани бәдәндә дирилмирләр вә Исанын иштиракы заманы онлар неҹә дирилирләр?
15 Мәсһ едилмиш мәсиһчиләр өләндә ҹисмани бәдәндә дирилмирләр (1 Коринфлиләрә 15:50—53). Әт вә гандан ибарәт олан фани бәдән гејри-фанилији вә ҝөјләрин Падшаһлығыны мирас ала билмәз. Мәсһ едилмишләрин бә’зисинә узун мүддәт өлүм јухусунда јатмаг лазым ҝәлмәјәҹәк. Онлар, Мәсиһин иштиракы заманы јер үзүндәки сәјаһәтләрини сәдагәтлә баша вурараг, “бир ан ичиндә, бир ҝөз гырпымында” дәјишилирләр. Онлар, гејри-фаниликдә вә иззәтдә јашамаг үчүн, руһани варлыглар кими бир ан ичиндә дирилирләр. Нәтиҹәдә, Мәсиһин ҝөјләр “ҝәлини” 144 000 нәфәр олаҹаг (Вәһј 14:1; 19:7—9; 21:9; 1 Салониклиләрә 4:15—17).
Өлүм үзәриндә гәләбә!
16. Павелин вә гәдим зәманәнин пејғәмбәрләринин сөзләринә ҝөрә, ҝүнаһкар Адәмдән мирас алынмыш өлүмә нә олаҹаг?
16 Павел тәнтәнәли сурәтдә е’лан етди ки, өлүм әбәдијјән јох едиләҹәк (1 Коринфлиләрә 15:54—57). Фани вә өлүмлү инсанлар гејри фанилији вә өлмәзлији “ҝејиндикдә”, бу сөзләр јеринә јетәҹәк: “[Аллаһ] өлүмү әбәдијјән јох едәҹәк”. “Еј өлүм, нештәрин һаны? Еј өлүләр аләми, һәлак етмәјин [“гәләбән”, ЈД] һаны?” (Јешаја 25:8; Һошеа 13:14). Өлүмә сәбәб олан нештәр ҝүнаһдыр, ҝүнаһын ҝүҹү исә, ҝүнаһкарлары өлүмә мәһкум едән Ганун иди. Лакин Исанын гурбанлығы вә дирилмәси сајәсиндә, ҝүнаһкар Адәмдән мирас алынмыш өлүм бир даһа галиб ҝәлмәјәҹәк (Ромалылара 5:12; 6:23).
17. 1 Коринфлиләрә 15:58 олан сөзләр бу ҝүн неҹә тәтбиг едилир?
17 Павел дејирди: “Беләликлә, еј севимли гардашларым, мөһкәм, сарсылмаз олун, һәр заман Рәббин ишиндә тәрәгги един вә билин ки, Рәббин јолунда чәкдијиниз әмәк әбәс дејилдир” (1 Коринфлиләрә 15:58). Бу сөзләр, мәсһ едилмишләрин буҝүнкү галыгларына вә бу ахыр ҝүнләрдә өлмәләринә бахмајараг, Исанын “башга гојунларына” да аиддир (Јәһја 10:16). Падшаһлығын тәблиғиндә онларын чәкдикләри әмәк әбәс дејил, чүнки онлары дирилмә ҝөзләјир. Буна ҝөрә дә, ҝәлин Јегованын хидмәтчиләри кими Рәббин иши илә мәшғул олмаға давам едәрәк, севинҹлә “Өлүм, сәнин гәләбән һаны?” дејәҹәјимиз ҝүнү ҝөзләјәк.
Дирилмәјә олан үмид јеринә јетир!
18. Павелин дирилмәјә олан үмиди нә дәрәҹәдә мөһкәм иди?
18 Павелин Коринфлиләрә јаздығы биринҹи мәктубун 15-ҹи фәслиндәки сөзләриндән ҝөрүнүр ки, дирилмәјә олан үмид онун һәјатына ҝүҹлү тә’сир етмишдир. О, Исанын дирилдијинә вә башгаларынын да бәшәријјәтин үмуми мәзарындан азад едиләҹәкләринә гәти сурәтдә әмин иди. Белә мөһкәм әминлик сиздә дә вармы? Павел, худбинҹәсинә олан ҹәһдләри “зибил” сајырды; Мәсиһи вә “Онун дирилмә гүдрәтини дәрк” етмәк үчүн “һәр шеји зијан һесаб” едирди. Бу һәвари, “дирилмәни [“еркән дирилмәни”, ЈД]” алмаг үмидиндә олараг, Мәсиһ кими, һәтта өлмәјә белә һазыр иди. Бу һәмчинин “илк дирилмә” адланыр вә ону Исанын мәсһ едилмиш 144 000 давамчысы алыр. Бәли, онлар руһани варлыглар кими ҝөјләр һәјатына дирилирләр, “өлүләрин диҝәрләри исә” јер үзүндә дирилдиләҹәкләр (Филипилиләрә 3:8—11; Вәһј 7:4; 20:5, 6).
19, 20. а) Мүгәддәс Китабда бәһс едилән инсанлардан һансылары јер үзүндә һәјата гајтарылаҹаглар? б) Сиз кимләрин дирилмәсини ҝөзләјирсиниз?
19 Өләнә гәдәр садиг галан мәсһ едилмишләр, дирилмәјә олан үмидин иззәтлә јеринә јетдијини ҝөрдүләр (Ромалылара 8:18; 1 Салониклиләрә 4:15—18; Вәһј 2:10). “Бөјүк мәшәггәтдән” сағ чыханлар, “дәниз, өзүндә олан өлүләри... өлүм вә өлүләр аләми дә өзләриндә олан өлүләри тәслим” етдији заман, дирилмәјә олан үмидин јер үзүндә неҹә јеринә јетәҹәјини ҝөрәҹәкләр (Вәһј 7:9, 13, 14; 20:13). Једди оғлуну вә үч гызыны итирмиш Ејуб, јер үзүндә һәјата гајтарыланлар арасында олаҹаг. Тәсәввүр един ки, Ејуб онлары неҹә севинҹлә гаршылајаҹаг вә онлар, өзләринин даһа једди гардашы вә үч ҝөзәл баҹысы олдуғуна неҹә шадланаҹаглар! (Ејуб 1:1, 2, 18, 19; 42:12—15).
20 Ибраһимин, Саранын, Исһагын, Ребекканын вә бир чох башгаларынын, о ҹүмләдән “бүтүн пејғәмбәрләрин” јер үзүндә һәјата гајтарылмалары неҹә хејир-дуа олаҹаг! (Лука 13:28). Бу пејғәмбәрләрдән бири, Мәсиһин рәһбәрлији заманы дириләҹәји вә’дини алан Даниелдир. Артыг 2 500 илдир ки, Даниел гәбирдә раһат јатыр, лакин дирилмә сајәсиндә о, тезликлә “өз пајыны” алмаг үчүн галхаҹаг вә “бүтүн дүнјада... рәис” оланлардан бири олаҹаг (Даниел 12:13; Мәзмур 45:16). Јалныз кечмишдә јашамыш садиг инсанларла дејил, еләҹә дә дүшмән сајылан өлүмүн әлимиздән алдығы доғма атамыз, анамыз, оғлумуз, гызымыз вә јахуд бизә әзиз олан инсанларла јенидән ҝөрүшмәк неҹә дә севиндириҹи олаҹаг!
21. Биз нәјә ҝөрә башгаларына хејирхаһлыг етмәкдә ләнҝимәмәлијик?
21 Ола билсин, достларымыздан вә әзизләримиздән ким исә он илләрдир ки, Аллаһа хидмәт едир вә артыг гоҹалыб. Јашлы олдуглары үчүн һәјатдакы чәтинликләрин өһдәсиндән ҝәлмәк онлара асан дејил. Артыг индидән әлимиздән ҝәлән бир көмәклији етмәклә, биз онлара неҹә дә гајғы вә диггәт ҝөстәрмиш оларыг! Әҝәр өлүм онлара галиб ҝәләрсә дә, белә давранмагла тәссүфләнмәјәҹәјик ки, онлар үчүн бир шеј етмәдик (Ваиз 9:11; 12:1—7; 1 Тимотејә 5:3, 8). Биз әмин ола биләрик ки, јашындан вә вәзијјәтиндән асылы олмајараг, башгаларына етдијимиз хејирхаһ ишләри Јегова унутмајаҹаг. Павел јазырды: “Нә гәдәр фүрсәтимиз варса, һамыја, хүсусән иманлылар аиләсинә јахшылыг едәк” (Галатијалылара 6:10; Ибраниләрә 6:10).
22. Дирилмәјә олан үмид јеринә јетәнә гәдәр биз нәјә гәрарлы олмалыјыг?
22 Јегова “мәрһәмәтли Ата вә һәр ҹүр тәсәлли верән Аллаһдыр” (2 Коринфлиләрә 1:3, 4). Онун Кәламы бизә тәсәлли верир вә бизә көмәк едир ки, гүввәт верән дирилмә үмиди илә башгаларына тәсәлли верәк. Биз һәлә ки, өлүләрин јер үзүндә һәјата гајтарылаҹаглары һаггында олан үмидин јеринә јетдијини ҝөрмүрүк, ҝәлин дирилмәјә инанан Павел кими олаг. Ҝәлин хүсусилә дә, Аллаһын өлүләри дирилтмәк гүдрәтиндә олдуғуна бел бағлајан вә өлүмдән һәјата гајтарылан Исадан нүмунә ҝөтүрәк. Јаддашлыг мәзарларында оланлар тезликлә Мәсиһин сәсини ешидәҹәкләр вә гәбирләриндән чыхаҹаглар. Гој бу бизә тәсәлли вә севинҹ ҝәтирсин. Ән башлыҹасы, ҝәлин Рәббимиз Иса Мәсиһ васитәсилә өлүм үзәриндә гәләбәни мүмкүн едән Јеговаја миннәтдар олаг!
Сиз неҹә ҹаваб верәрдиниз?
• Павел, Исанын дирилмәсинә шаһид оланларын һансы шәһадәтлијинә истинад етди?
• “Ахырынҹы дүшмән” нәдир вә о неҹә јох едиләҹәк?
• Мәсһ едилмиш мәсиһчиләрлә әлагәдар нә әкилир вә нә дирилир?
• Мүгәддәс Китабда һаггында бәһс едилән инсанлар јер үзүндә һәјата гајтарылдыгда, онлардан киминлә ҝөрүшмәк истәјәрдиниз?
[14-ҹү сәһифәдәки шәкил]
Һәвари Павел гәти сурәтдә дирилмә тә’лимини мүдафиә етди
[18-ҹи сәһифәдәки шәкилләр]
Ејубун, онун аиләсинин вә бир чох башга инсанларын дирилмәси, һәдсиз севинҹә сәбәб олаҹаг!