Сиз Ағанын етибар етдији нөкәрбашысыныз!
«Сиз өзүнүзә мәхсус дејилсиниз» (1 КОР. 6:19).
НЕҸӘ ҸАВАБ ВЕРӘРДИН?
Гәдимдә нөкәрбашынын вәзифәси нәдән ибарәт иди?
Аллаһа хидмәт едән нөкәрбашыларын һамысы һансы мәсулијјәтләри јеринә јетирирләр?
Биз нөкәрбашы кими дашыдығымыз мәсулијјәтә неҹә јанашмалыјыг?
1. Јашадығымыз дүнја азадлыға неҹә јанашыр?
ТӘХМИНӘН 2500 ил бундан әввәл јунан драматургу белә сөзләр јазмышды: «Һеч ким көнүллү олараг көләлик бојундуруғу алтына ҝирмир». Бу ҝүн чохлары бу сөзләрлә разылашырлар. Көләлик дедикдә чохларынын ҝөзү гаршысында әзијјәт вә зүлм чәкән, башгаларына хидмәт едән вә өзүнүн јох, мәхсус олдуғу ағасынын мәнафејини дүшүнән нөкәр ҹанланыр.
2, 3. а) Мәсиһин гуллары, јәни хидмәтчиләри көнүллү олараг һансы мөвгеји тутурлар? б) Нөкәрбашынын ролу барәдә һансы суаллары нәзәрдән кечирәҹәјик?
2 Иса демишди ки, онун шаҝирдләри тәвазөкар хидмәтчи, јәни нөкәр олаҹаглар. Анҹаг мәсиһчиләрин нөкәр кими хидмәт етмәсинә алчалдылмаг вә ја зүлм чәкмәк дахил дејил. Бу нөкәрләрә етибар вә һөрмәт едилир. Мәсәлән, ҝәлин Исанын өлүмүндән әввәл бир «нөкәр» һаггында дедикләринә нәзәр салаг. Мәсиһ «садиг вә ағыллы нөкәр» тәјин едәҹәјини демишди (Мат. 24:45—47).
3 Паралел ајәләрдән ҝөрүндүјү кими, нөкәр ејни заманда «нөкәрбашы» да адланыр. (Лука 12:42—44 ајәләрини оху.) Буҝүнкү мәсиһчиләрин һамысы садиг нөкәрбашы синфинин үзвләри дејилләр. Лакин Мүгәддәс Китабда ҝөстәрилир ки, Аллаһын бүтүн хидмәтчиләри, мүәјјән мәнада, нөкәрбашыдырлар. Онларын мәсулијјәтләри нәдән ибарәтдир? Вә бу мәсулијјәтләрә неҹә јанашмаг лазымдыр? Ҝәлин гәдимдә нөкәрбашынын ролунун нәдән ибарәт олдуғуна нәзәр салаг.
НӨКӘРБАШЫ ВӘ ОНУН РОЛУ
4, 5. Гәдимдә нөкәрбашынын һансы мәсулијјәтләри вар иди? Нүмунәләр чәкин.
4 Гәдимдә чох вахт нөкәрбашыја ев ишләрини вә ја ағасынын ваҹиб тапшырыгларыны јеринә јетирмәк һәвалә олунурду. Һәмчинин о, ағасынын мүлкү вә ја пулу, еләҹә дә диҝәр нөкәрләри үзәриндә нәзарәт едирди. Буну чохлу вар-дөвләтә саһиб олан Ибраһимин мүлкүнүн гајғысына галан Елиезерин нүмунәсиндән ҝөрә биләрик. Чох еһтимал ки, Ибраһим оғлу Исһага һәјат јолдашы сечмәк үчүн Месопотамијаја мәһз ону ҝөндәрмишди. Бу неҹә дә бөјүк үстүнлүк иди! (Јар. 13:2; 15:2; 24:2—4).
5 Ибраһимин нәтиҹәси Јусиф Потифарын евинин гајғысына галырды (Јар. 39:1, 2, 4). Сонралар Јусифин өз евинә нәзарәт едән нөкәрбашысы олду. Һәмин нөкәрбашы Јусифин он гардашына гонагпәрвәрлик ҝөстәрмишди. Һәмчинин Јусиф ҝүмүш касанын оғурланмасыны тәшкил етмәји она тапшырмышды. Ҝөрүндүјү кими, нөкәрбашылар бөјүк етибар саһиби идиләр (Јар. 43:19—25; 44:1—12).
6. Мәсиһчи ағсаггалларын үзәринә һансы мәсулијјәтләр дүшүр?
6 Јүзилликләр сонра һәвари Павел јазмышды ки, мәсиһчи нәзарәтчиләр «Аллаһын нөкәрбашысы» олмалыдырлар (Тит. 1:7). «Аллаһын... әманәт етдији сүрүнү»н гајғысына галан чобанлар, јәни нәзарәтчиләр јығынҹагда ҝөстәришләр верир вә рәһбәрлији үзәрләринә ҝөтүрүрләр (1 Пет. 5:1, 2). Дүздүр, јығынҹагда мәсулијјәтләр мүхтәлиф олур. Мәсәлән, бу ҝүн нәзарәтчиләрин әксәријјәти јалныз бир јығынҹагда хидмәт едир. Амма сәјјар нәзарәтчиләр чохлу јығынҹаглара хидмәт едирләр. Филиалын комитә үзвләри исә бир өлкәнин әразисиндә јерләшән бүтүн јығынҹагларын гајғысына галырлар. Бунунла белә, онларын һамысындан вәзифәләрини сәдагәтлә јеринә јетирмәләри ҝөзләнилир, чүнки онлар Аллаһа «һесабат верәҹәк»ләр (Ибр. 13:17).
7. Бүтүн мәсиһчиләрин мүәјјән мәнада нөкәрбашы олдуғуну һарадан билирик?
7 Бәс нәзарәтчи кими хидмәт етмәјән бир чох садиг мәсиһчиләр барәдә нә демәк олар? Һәвари Петер бүтүн мәсиһчиләрә үнванладығы мәктубунда гејд етмишди: «Һәр кәс алдығы әнама әсасән, Аллаһын мүхтәлиф јолларла ифадә олунан лүтфүнүн нүмунәви нөкәрбашысы кими бир-биринә хидмәт етсин» (1 Пет. 1:1; 4:10). Хејирхаһлыгдан ирәли ҝәләрәк Аллаһ һамымыза чохлу әнам, истедад, јәни һәмиманлыларымызын рифаһы үчүн истифадә едә биләҹәјимиз баҹарыг вериб. Нәтиҹә етибарилә, Аллаһа хидмәт едәнләрин һамысы нөкәрбашыдыр вә бу үстүнлүк сајәсиндә онлар шәрәфә, етибара вә мәсулијјәтләрә лајиг ҝөрүлүрләр.
БИЗ АЛЛАҺА МӘХСУСУГ
8. Јадда сахламалы олдуғумуз биринҹи принсип һансыдыр?
8 Инди биз нөкәрбашы кими јадда сахламалы олдуғумуз үч әсас принсипә диггәт јетирәҹәјик. Биринҹиси: һамымыз Аллаһа мәхсусуг вә Она һесабат верәҹәјик. Павел јазмышды: «Сиз өзүнүзә мәхсус дејилсиниз, чүнки [Мәсиһин ганы илә өдәнилмиш фидјә гурбанлығы сајәсиндә] баһа гијмәтә алынмысыныз» (1 Кор. 6:19, 20). Јеһоваја мәхсус олдуғумуз үчүн һәр биримиз Онун әмрләринә табе олмаг мәсулијјәти дашыјырыг, Онун әмрләри исә ағыр дејил (Ром. 14:8; 1 Јәһ. 5:3). Биз һәмчинин Мәсиһин дә гулларыјыг (Филип. 1:1). Кечмишдәки нөкәрбашылар кими, бу ҝүн бизә дә бөјүк сәрбәстлик верилиб, анҹаг бу сәрбәстлик мәһдуддур. Биздән ҝөстәришләрә әмәл етмәк тәләб олунур. Аллаһын тәшкилатында нә гәдәр мәсулијјәтимизин олмасындан асылы олмајараг, һәр биримиз Аллаһын вә Мәсиһин гулларыјыг.
9. Иса аға илә нөкәр арасындакы мүнасибәтләри нүмунә әсасында неҹә ҝөстәрди?
9 Иса бизә аға илә нөкәр арасындакы мүнасибәтләри баша дүшмәјә көмәк едир. Бир дәфә о, шаҝирдләринә бүтүн ҝүнү ишләдикдән сонра евә гајыдан нөкәр барәдә данышды. Сизҹә, ағасы нөкәрә: «Тез сүфрәјә кеч, әјләш», — деди? Јох, әксинә, о: «Шам јемәјими һазырла, өнлүјүнү тах вә мән јејиб гуртаранадәк мәнә гуллуг ет, сонра өзүн дә јејәрсән», — деди. Иса бу нүмунәни неҹә тәтбиг етди? О деди: «Сизә тапшырылмыш ишләри ҝөрүб гуртаранда дејин: “Биз һеч нәјә јарамајан нөкәрләрик. Биз садәҹә ишимизи ҝөрдүк”» (Лука 17:7—10).
10. Нәдән ҝөрүнүр ки, Јеһова Онун үчүн етдијимиз һәр бир шеји гијмәтләндирир?
10 Әлбәттә, Јеһова бизим Онун үчүн етдијимиз һәр бир шеји гијмәтләндирир. Мүгәддәс Китаб бизи әмин едир: «Аллаһ әдаләтсиз дејил ки,.. Онун адына бәсләдијиниз мәһәббәти вә чәкдијиниз зәһмәти унутсун» (Ибр. 6:10). Јеһова биздән ҝүҹүмүздән артыг һеч нә тәләб етмир. Үстәлик, Онун тәләбләри бизим хејримизәдир вә һәддән артыг ағыр дејил. Бунунла белә, Исанын мәсәлиндә дејилдији кими, нөкәр һеч вахт өз марагларыны биринҹи јерә гојараг өзүнү разы салмаға чалышмыр. Ејнилә, биз дә өзүмүзү Јеһоваја һәср едәндә Онун марагларыны һәјатымызда биринҹи јерә гојаҹағымыза сөз вермишдик. Елә дејил?
ЈЕҺОВА БИЗДӘН НӘ ТӘЛӘБ ЕДИР?
11, 12. Нөкәрбашы кими, биз һансы хүсусијјәти тәзаһүр етдирмәли вә һансылардан гачынмалыјыг?
11 Икинҹи принсип: нөкәрбашы кими, һамымыз ејни әсас нормалара ујғун јашамалыјыг. Дүздүр, мүәјјән мәсулијјәтләр бүтүн јығынҹаг үзвләринә јох, јалныз бәзиләринә верилир. Бир чох мәсулијјәтләр исә һамыја һәвалә едилир. Мәсәлән, Иса Мәсиһин шаҝирди, о ҹүмләдән Јеһова Аллаһын шаһиди олдуғумуз үчүн биздән башгаларына мәһәббәт ҝөстәрмәк тәләб олунур. Иса Мәсиһин дедији кими, мәһәббәт һәгиги мәсиһчиләрин фәргләндириҹи хүсусијјәтидир (Јәһ. 13:35). Биз јалныз һәмиманлыларымызы севмәклә кифајәтләнмәли дејилик, һәмчинин иманымыза шәрик олмајан инсанлара да мәһәббәт ҝөстәрмәјә чалышмалыјыг. Бу, һамымызын едә биләҹәји вә етмәли олдуғу бир шејдир.
12 Һәмчинин биздән нүмунәви давранмаг тәләб олунур. Биз Аллаһын Кәламында мүһакимә олунан һәрәкәтләрдән вә һәјат тәрзиндән гачынмалыјыг. Павел јазмышды: «Нә әхлагсызлар, нә бүтпәрәстләр, нә зинакарлар, нә гејри-тәбии ҹинси әлагә үчүн истифадә едилән кишиләр, нә кишибазлар, нә оғрулар, нә тамаһкарлар, нә ички дүшкүнләри, нә налајиг сөз данышанлар, нә дә сојғунчулар Аллаһын падшаһлығына ҝирмәјәҹәкләр» (1 Кор. 6:9, 10). Дүздүр, Аллаһын салеһлик нормаларына риајәт етмәк үчүн сәј тәләб олунур. Анҹаг бу ҹүр сәј ҝөстәрмәјин бизә чохлу фајдасы вар. Мәсәлән, бизим јахшы сағламлығымыз, башгалары илә арамызда сүлһ мүнасибәти вә Аллаһла достлуғумуз олаҹаг. (Јешаја 48:17, 18 ајәләрини оху.)
13, 14. Бүтүн мәсиһчиләрин үзәринә һансы мәсулијјәт гојулуб вә биз буна неҹә јанашмалыјыг?
13 Кечмишдә нөкәрбашы чохлу ишләмәли олурду. Ејни шеји бизим һаггымызда да демәк олар. Бизә дәјәрли әнам — һәгигәт һаггында дәрин биликләрә јијәләнмәк имканы верилиб. Аллаһ бизим бу биликләри башгалары илә бөлүшмәјимизи истәјир (Мат. 28:19, 20). Павел јазырды: «Гој бизи Мәсиһин хидмәтчиләри вә Аллаһын мүгәддәс сирринин нөкәрбашылары кими танысынлар» (1 Кор. 4:1). Павел мүгәддәс сиррә, јәни Мүгәддәс Китаб һәгигәтләринә ҝөрә мәсулијјәт дашыдығыны вә Ағасы Иса Мәсиһин тапшырдығы кими, бу һәгигәтләри башгаларына өјрәтмәли олдуғуну билирди (1 Кор. 9:16).
14 Башгаларына һәгигәти чатдырмагла онлара мәһәббәт ҝөстәрмиш олуруг. Әлбәттә, мәсиһчиләрин вәзијјәтләри мүхтәлиф олдуғундан хидмәтдә ејни дәрәҹәдә иштирак едә билмирләр. Јеһова буну баша дүшүр. Ән ваҹиби одур ки, һамы әлиндән ҝәләни етсин. Бунунла биз Аллаһа вә јахынларымыза тәмәннасыз мәһәббәт тәзаһүр етдирмиш олуруг.
САДИГ ГАЛМАҒЫН ВАҸИБЛИЈИ
15-17. а) Нәјә ҝөрә нөкәрбашы садиг олмалыдыр? б) Иса сәдагәтсизлијин нәтиҹәсини нүмунә әсасында неҹә ҝөстәрди?
15 Јадда сахламалы олдуғумуз үчүнҹү принсип: биз садиг вә етибарлы инсан олмалыјыг. Нөкәрбашынын чохлу ҝөзәл хүсусијјәтләри вә габилијјәтләри ола биләр, анҹаг әҝәр о, мәсулијјәтсиз давранар вә ја ағасына сәдагәтсиз олардыса, бүтүн бунлар әһәмијјәтини итирәрди. Ишиндә уғурлу олмаг вә ағасыны разы салмаг истәјән нөкәр үчүн садиглик олдугҹа ваҹибдир. Павелин сөзләрини хатырлајаг: «Нөкәрбашыдан исә сәдагәт тәләб олунур» (1 Кор. 4:2).
16 Әмин ола биләрик ки, әҝәр сәдагәтли олсаг, Аллаһ бизи мүтләг мүкафатландыраҹаг. Јох, әҝәр сәдагәтсиз олсаг, зәрәр чәкәҹәјик. Бу принсип Исанын талант һаггындакы мәсәлиндән ајдын ҝөрүнүр. Аға онун пулуну дөвријјәјә бурахан садиг нөкәри тәрифләди вә ону бол-бол мүкафатландырды. Ағасынын она һәвалә етдикләринә гаршы мәсулијјәтсиз давранан нөкәр исә «јарамаз вә тәнбәл» адландырылды. Һәмин гулун талантыны әлиндән алдылар, өзүнү исә бајыра атдылар. (Матта 25:14—18, 23, 26, 28—30 ајәләрини оху.)
17 Башга бир вахт Иса сәдагәтсизлијин һансы нәтиҹәләрә ҝәтириб чыхардығыны вурғулајараг демишди: «Бир дөвләтли адамын евиндә нөкәрбашы варды. Бир ҝүн она хәбәр чатды ки, нөкәрбашы онун малыны исраф едир. Онда о, нөкәрбашыны јанына чағырыб деди: “Бу нәдир сәнин һаггында ешидирәм? Ишин барәдә һесабат вер, чүнки сән артыг бу еви идарә етмәјәҹәксән”» (Лука 16:1, 2). Нөкәрбашы ағасынын мал-мүлкүнү талан етдији үчүн ағасы ону говмаг гәрарына ҝәлди. Бу, бизим үчүн бөјүк дәрсдир! Әлбәттә, биз һеч вахт Аллаһын тапшырыгларына бармагарасы бахмаг истәмәрик.
ӨЗҮМҮЗҮ БАШГАЛАРЫ ИЛӘ МҮГАЈИСӘ ЕТМӘК ДҮЗҜҮНДҮРМҮ?
18. Нәјә ҝөрә өзүмүзү башгалары илә мүгајисә етмәмәлијик?
18 Һәр биримиз өзүмүздән соруша биләрик: «Мән нөкәрбашы кими дашыдығым мәсулијјәтә неҹә јанашырам?» Әҝәр өзүмүзү башгалары илә мүгајисә етсәк, проблемләр јарана биләр. Мүгәддәс Китаб бизә мәсләһәт ҝөрүр: «Гој һәр кәс өз ишини сынагдан кечирсин, онда өзүнү башгалары илә мүгајисә етмәдән өзүнә бахыб севинәҹәк» (Галат. 6:4). Өзүмүзү башгалары илә мүгајисә етмәк әвәзинә, јахшы оларды ки, диггәтимизи шәхсән едә биләҹәјимиз шејләрә ҹәмләјәк. Бу, бизи тәкҹә тәкәббүрлүкдән дејил, һәмчинин мәјуслугдан да горујаҹаг. Өзүмүзү гијмәтләндирмәјин сајәсиндә вәзијјәтин дәјишдијини дәрк едәҹәјик. Ола билсин, сәһһәтимизлә бағлы проблемләр, јашлылыг вә ја мүхтәлиф мәсулијјәтләр уҹбатындан әввәлләр ҝөрдүјүмүз ишләри јеринә јетирә билмирик. Бүтүн бунлара бахмајараг, бизим даһа чох шеј етмәјә ҝүҹүмүз чатар. Бәс онда нәјә ҝөрә хидмәтимизи ҝенишләндирмәјәк?
19. Мәсулијјәтләр алмајанда нәјә ҝөрә руһдан дүшмәмәлијик?
19 Инди исә ҝәлин малик олдуғумуз вә ја әлдә етмәк истәдијимиз мәсулијјәтләри нәзәрдән кечирәк. Мәсәлән, гардаш јығынҹагда ағсаггал кими хидмәт етмәк вә ја конгресләрдә чыхышлар етмәк истәјә биләр. Бу мәсулијјәтләрә јарарлы олмаг үчүн сәј ҝөстәрмәк јахшыдыр, анҹаг онлары үмид етдијимиз вахтда алмајанда руһдан дүшмәмәлијик. Баша дүшмәдијимиз сәбәбләрдән бәзи мәсулијјәтләри алмаг үчүн дүшүндүјүмүздән даһа чох ҝөзләмәли олуруг. Јәгин јадыныздадыр, Муса өзүнү исраиллиләри Мисирдән чыхартмаға һазыр һисс етсә дә, о, 40 ил ҝөзләмәли олду. Бунун сајәсиндә онун инадкар вә үсјанкар халга рәһбәрлик етмәк үчүн лазыми кејфијјәтләр инкишаф етдирмәјә кифајәт гәдәр вахты олду (Һәв. иш. 7:22—25, 30—34).
20. Јонатанын нүмунәсиндән нә өјрәнирик?
20 Елә ола биләр ки, мүәјјән мәсулијјәтләр бизә һеч вахт верилмәсин. Буну Јонатанын нүмунәсиндән ҝөрмәк олар. О, Шаулун оғлу олдуғу үчүн бүтүн Исраил үзәриндә падшаһ олмалы иди. Лакин Аллаһ ондан јашҹа чох ҹаван олан Давуду падшаһ сечди. Јонатан буна неҹә мүнасибәт ҝөстәрди? О, буну гәбул етди, үстәлик, өз һәјатыны тәһлүкәјә атараг Давуду мүдафиә етди. О, Давуда деди: «Исраилин падшаһы сән олаҹагсан, мән сәндән сонра икинҹи олаҹағам» (1 Шам. 23:17). Јонатанын нүмунәсиндән нә өјрәнә биләрсән? О, вәзијјәтлә барышды вә атасындан фәргли олараг, Давуда пахыллыг етмәди. Башгалары һәр һансы тәјинат аланда пахыллыг етмәк әвәзинә, һамымыз үзәримизә дүшән мәсулијјәтләри јеринә јетирмәк үчүн әлимиздән ҝәләни етмәлијик. Әмин ола биләрик ки, јени дүнјада Јеһова хидмәтчиләринин Онун ирадәсинә мүвафиг олан бүтүн истәкләрини јеринә јетирәҹәк.
21. Биз нөкәрбашы кими дашыдығымыз мәсулијјәтә неҹә јанашмалыјыг?
21 Ҝәлин һәмишә јадда сахлајаг ки, биз гәддар ағаја хидмәт етмәк мәҹбуријјәтиндә олан нөкәр јох, Аллаһын нөкәрбашыларыјыг. Јеһова бизә етибар едир вә бир даһа һеч вахт тәкрарланмајаҹаг бир ишдә — сон ҝүнләрдә хош хәбәрин тәблиғиндә иштирак етмәк имканы вермәклә бизи бөјүк шәрәфә лајиг ҝөрүб. О, һәмчинин бизә һәвалә етдији мәсулијјәтләри јеринә јетирмәклә бағлы бөјүк сечим азадлығы да вериб. Ҝәлин бундан сонра да садиг нөкәрбашы олаг вә һеч вахт унутмајаг ки, Каинатда ән гүдрәтли Шәхсә хидмәт етмәк бөјүк шәрәфдир.
[12–ҹи сәһифәдәки шәкил]
Мәсулијјәтимизин нәдән ибарәт олмасындан асылы олмајараг, ҝәлин садиг галаг