«Аллаһын дәрин дүшүнҹәләрини» арашдырын

«Руһ һәр шеји, Аллаһын дәрин дүшүнҹәләрини белә арашдырыр» (1 КОРИНФЛИЛӘРӘ 2:10).

1. Мүгәддәс Китабы өјрәнмәјә башлајан инсаны һансы һәгигәтләр севиндирир?

БИР ЧОХ баҹы-гардашлар илк дәфә һәгигәт һаггында өјрәнәндә дујдуглары севинҹ һиссини һәлә дә хатырлајырлар. Биз Јеһованын адынын ваҹиблијини, Онун нә үчүн пислијә јол вердијини, бә’зиләринин нәјә ҝөрә ҝөјә ҝетдијини вә салеһ инсанлар үчүн һансы үмидин олдуғуну өјрәндик. Ола билсин, өзүмүз нә вахтса Мүгәддәс Китабы арашдырмышыг, лакин орадакы һәгигәтләр бәшәријјәтин әксәријјәтиндән ҝизли галдығы кими, биздән дә ҝизли галмышдыр. Биз сујун алтындакы ҝөзәл мәрҹан рифләрини ҝөрмәјә чалышан адама охшајырдыг. Амма онун хүсуси аләти јохдурса, о чох аз шеј ҝөрәҹәк. Суалты ҝөзлүјүн, јахуд алты шүшәдән олан гајығын көмәјилә о, илк дәфә бөјүк марагла ал-әлван мәрҹанлары, балыглары, дәниз анемонларыны вә дәниздәки диҝәр е’ҹазкар ҹанлылары сејр едир. Ејнилә, кимсә бизә Мүгәддәс Јазылары баша дүшмәјә тәзә-тәзә көмәк едәндә биз ‘Аллаһын дәрин дүшүнҹәләринин’ илк гығылҹымларыны ҝөрмүшдүк (1 Коринфлиләрә 2:8-10).

2. Аллаһын Кәламыны өјрәнмәкдән әлдә етдијимиз севинҹ нә үчүн даими ола биләр?

² Биз Мүгәддәс Китаб һәгигәтләрини јалныз сәтһи билмәклә кифајәтләнмәлијикми? ‘Аллаһын дәрин дүшүнҹәләри’ ифадәси Онун мүгәддәс руһу илә мәсиһчиләрә ачдығы, лакин диҝәрләриндән ҝизли галан һикмәтини баша дүшмәји өзүнә дахил едир (1 Коринфлиләрә 2:7). Јеһованын һәдди-һүдуду олмајан һикмәтини тәдгиг етмәк бизә неҹә дә бөјүк севинҹ ҝәтирир! Биз һеч вахт Аллаһын һикмәти һаггында һәр шеји билмәјәҹәјик. Әҝәр «Аллаһын дәрин дүшүнҹәләрини» даим арашдырырыгса, Мүгәддәс Китабын әсас тә’лимләрини илк дәфә өјрәндијимиз заман дујдуғумуз севинҹ һәмишә үрәјимиздә олаҹаг.

3. Биз нәјә ҝөрә иманымызын тәмәлини тәшкил едән шејләри јахшы дәрк етмәлијик?

³ Нә үчүн «Аллаһын дәрин дүшүнҹәләрини» баша дүшмәлијик? Иманымызын тәмәлини јалныз нәјә инандығымыз јох, буна инандығымызын сәбәбини баша дүшмәјимиз дә тәшкил едир, бу исә өз нөвбәсиндә, иманымызы вә әминлијимизи мөһкәмләндирир. Мүгәддәс Јазылар бизи ‘Аллаһын јахшы, мәгбул вә камил ирадәсини дәрк етмәк’ үчүн ағлымызы ишләтмәјә тәшвиг едир (Ромалылара 12:1, 2). Јеһованын нә үчүн бизә мүәјјән һәјат тәрзи сүрмәји бујурдуғуну анламағымыз Она табе олмаг гәрарымызы мөһкәмләндирир. Беләликлә, «Аллаһын дәрин дүшүнҹәләрини» баша дүшмәјимиз бизә ширникдириҹи ганунсуз ишләрдән чәкинмәк үчүн ҝүҹ верә вә ‘јахшы ишләрдә сә’јли’ олмаға тәшвиг едә биләр (Титуса 2:14).

4. Мүгәддәс Китабы өјрәнмәјә нә дахилдир?

⁴ Дәрин дүшүнҹәләри баша дүшмәк үчүн арашдырмалар апармалыјыг. Арашдырмаг материалы садәҹә охумаг демәк дејил. Бу, мә’луматы диггәтлә тәһлил етмәји вә мә’луматын артыг билдикләримизлә неҹә бағлы олдуғуну ҝөрмәји вә ҝәтирилән сәбәбләри баша дүшмәји өзүнә дахил едир (2 Тимотејә 1:13). Мүгәддәс Китабы арашдыраркән әлдә етдијимиз биликләри мүдрик гәрарлар вермәкдә вә башгаларына көмәк етмәкдә неҹә истифадә едә биләҹәјимизин үзәриндә дүшүнмәлијик. ‘Һәр Мүгәддәс Јазы Аллаһдан илһам алдығы вә фајдалы’ олдуғу үчүн биз јалныз Мүгәддәс Китабын һансыса һиссәсини јох, ‘Аллаһын ағзындан чыхан һәр бир сөзү’ өјрәнмәлијик (2 Тимотејә 3:16, 17; Матта 4:4). Мүгәддәс Китабы өјрәнмәк чалышганлыг вә сә’ј тәләб едә биләр. Анҹаг бу, мәмнунедиҹи дә ола биләр, «Аллаһын дәрин дүшүнҹәләрини» баша дүшмәк исә о гәдәр дә чәтин дејил.

Јеһова һәлимләрә баша дүшмәјә көмәк едир

5. «Аллаһын дәрин дүшүнҹәләрини» кимләр баша дүшә биләр?

⁵ Туталым ки, сән мәктәбдә бир о гәдәр дә јахшы охумамысан вә нәјисә арашдырмаг вәрдишин јохдур. Амма фикирләшмә ки, «Аллаһын дәрин дүшүнҹәләрини» анлаја билмәзсән. Иса јер үзүндә хидмәт етдији заман Јеһова Өз нијјәтини мүдрик вә ағыллылара јох, Онун хидмәтчиләри тәрәфиндән өјрәдилмәк үчүн кифајәт гәдәр һәлим олан савадсыз, ади адамлара ачмышды. Мәктәбләрдә тәһсил аланларла мүгајисәдә онлар көрпә ушаглара бәнзәјирдиләр (Матта 11:25; Һәвариләрин ишләри 4:13). ‘Аллаһын Ону севәнләр үчүн һазырладығы шејләр’ һаггында һәвари Павел һәмиманлыларына јазмышды: «Бизә исә Аллаһ бунлары Өз Руһу илә ачды; она ҝөрә ки, Руһ һәр шеји, Аллаһын дәрин дүшүнҹәләрини белә арашдырыр» (1 Коринфлиләрә 2:9, 10).

6. 1 Коринфлиләрә 2:10 ајәсинин мә’насы нәдир?

⁶ Аллаһын руһу һәр шеји, һәтта Онун дәрин дүшүнҹәләрини неҹә арашдырыр? Јеһова һәр мәсиһчијә ајры-ајрылыгда вәһјләр вермир. О Өз тәшкилатыны бирләшмиш халгына Мүгәддәс Китабы баша дүшмәјә көмәк едән руһу илә истигамәтләндирир (Һәвариләрин ишләри 20:28; Ефеслиләрә 4:3-6). Јер үзүндә олан бүтүн јығынҹаглар Мүгәддәс Китабы ејни програм үзрә өјрәнирләр вә бир нечә ил әрзиндә онун бүтүн тә’лимләрини кечирләр. Мүгәддәс руһ јығынҹаг васитәсилә фәалијјәт ҝөстәрир вә инсанлара «Аллаһын дәрин дүшүнҹәләрини» баша дүшмәк үчүн лазым олан мүнасибәти инкишаф етдирмәјә көмәк едир (Һәвариләрин ишләри 5:32).

‘Аллаһын дәрин дүшүнҹәләри’ өзүнә нәји дахил едир?

7. Нәјә ҝөрә бир чохлары «Аллаһын дәрин дүшүнҹәләрини» баша дүшмүрләр?

⁷ Биз ‘дәрин дүшүнҹәләрин’ чох мүрәккәб олдуғуну фикирләшмәли дејилик. Бәс нә үчүн онлар әксәр инсанлардан ҝизлидир? Она ҝөрә јох ки, Аллаһын һикмәтини мәнимсәмәк чәтиндир. Иш ондадыр ки, Шејтан инсанлары алдадыр, бу сәбәбдән дә онлар Јеһованын Өз тәшкилаты васитәсилә тәгдим етдији көмәји рәдд едирләр (2 Коринфлиләрә 4:3, 4).

8. Павел ефеслиләрә јаздығы мәктубунун үчүнҹү фәслиндә һансы дәрин анлајышлардан данышырды?

⁸ Павелин ефеслиләрә јаздығы мәктубунун үчүнҹү фәсли ҝөстәрир ки, ‘Аллаһын дәрин дүшүнҹәләри’ Јеһованын халгынын кифајәт гәдәр јахшы баша дүшдүјү бир чох һәгигәтләри өзүнә дахил едир. Онларын бә’зиләри бунлардыр: вә’д олунмуш Зүрријјәт, бә’зи инсанларын ҝөјә ҝетмәси вә Аллаһын Падшаһлығы. Павел јазмышды: «Бу сирр башга нәсилләрдә инсан оғулларына, инди Мәсиһин мүгәддәс һәвариләринә вә пејғәмбәрләринә Руһ васитәсилә ачылдығы кими ачылмамышды. Сирр будур ки, јәһуди олмајанлар да Мүждә васитәсилә ејни мирасын ортаглары, ејни бәдәнин үзвләри вә Мәсиһ Исада ҝерчәкләшән вә’дин шәрикләридир». Павел демишди ки, «Аллаһда әзәлдән бәри ҝизләнмиш олан сиррин неҹә тәртиб едилдијини бүтүн инсанлара ајдынлашдырмаг лүтфү» она һәвалә едилмишдир (Ефеслиләрә 3:5-9).

9. «Аллаһын дәрин дүшүнҹәләрини» баша дүшмәјимиз нәјә ҝөрә шәрәфдир?

⁹ Павел Аллаһын ирадәсини изаһ етмәјә давам едәрәк дејир ки, ‘Аллаһын чохҹәһәтли һикмәти инди иманлылар ҹәмијјәти васитәсилә сәмави аләмдәки һөкмранлара вә һакимләрә дә билдирилмәлидир’ (Ефеслиләрә 3:10). Мәләкләр Јеһованын мәсиһчи јығынҹағы илә рәфтарында өзүнү бүрузә верән һикмәти ҝөрәндә вә анлајанда чох шеји өјрәнирләр. Бизим үчүн неҹә дә шәрәфдир ки, һәтта мәләкләри марагландыран шејләри баша дүшүрүк! (1 Петер 1:10-12). Сонра Павел дејир ки, биз мүгәддәсләрлә бирликдә мәсиһчи иманынын ‘ҝенишлијини, узунлуғуну, уҹалығыны вә дәринлијини баша дүшмәјә’ чалышмалыјыг (Ефеслиләрә 3:11, 18). Инди исә ҝәлин анлајышымызы ҝенишләндирәҹәк дәрин дүшүнҹәләрә даир бә’зи нүмунәләрә нәзәр салаг.

Дәрин дүшүнҹәләрә даир нүмунәләр

10, 11. Мүгәддәс Јазылара әсасән, Иса нә заман Аллаһын сәмави ‘гадынынын’ ‘зүрријјәтинин’ әсас һиссәси олду?

¹⁰ Биз билирик ки, Иса Јарадылыш 3:15 (КМ) ајәсиндә һаггында дејилән Аллаһын сәмави ‘гадынынын’ ‘Зүрријјәтинин’ әсас һиссәсидир. Анлајышымызы ҝенишләндирмәк үчүн өзүмүздән соруша биләрик: Иса нә заман вә’д едилмиш Зүрријјәт олду: инсан олмаздан әввәл, инсан кими доғуланда, вәфтиз олунанда, јохса дириләндә?

¹¹ Аллаһ вә’д етмишди ки, пејғәмбәрликдә ‘гадынла’ тәмсил олунан тәшкилатынын сәмави һиссәси иланын башындан вураҹаг бир зүрријјәт дүнјаја ҝәтирәҹәк. Минләрлә ил кечир, амма Аллаһын «гадыны» Шејтаны вә онун әмәлләрини пуч едә биләҹәк һеч бир зүрријјәт дүнјаја ҝәтирмир. Даһа сонра Јешаја өз пејғәмбәрлијиндә һәмин гадыны «сонсуз» вә «руһу әзилмиш» адландырыр (Јешаја 54:1, 5, 6). Нәһајәт, Иса Бет-Лехемдә доғулур. О, вәфтиз олунаркән мүгәддәс руһдан доғулуб Аллаһын руһани оғлу олур вә јалныз бундан сонра Јеһова дејир: «Бу Мәним... Оғлумдур» (Матта 3:17; Јәһја 3:3). Ахыр ки, гадынын ‘зүрријјәтинин’ әсас һиссәси бәлли олур. Бир гәдәр сонра Исанын давамчылары да мүгәддәс руһла мәсһ олунурлар вә мүгәддәс руһдан доғулурлар. Узун мүддәт өзүнү ‘гысыр гадын’ кими һисс едән Јеһованын ‘гадыны’ артыг ‘шәнләнә’ биләрди (Јешаја 54:1; Галатијалылара 3:29).

12, 13. Һансы ајәләр ҝөстәрир ки, јердә олан бүтүн мәсһ олунмуш мәсиһчиләр «садиг вә ағыллы гул» синфини тәшкил едирләр?

¹² Бизә ачыгланан дәрин дүшүнҹәләрә даир икинҹи нүмунә Аллаһын инсанлар арасындан 144 000 нәфәрин сечилмәси нијјәти илә бағлыдыр (Вәһј 14:1, 4). Биз баша дүшүр вә инанырыг ки, истәнилән вахт кәсији әрзиндә јашајан мәсһ олунмуш мәсиһчиләр «садиг вә ағыллы гул» синфини тәшкил едирләр вә онлар, Исанын дедијинә ҝөрә, нөкәрләринә вахтлы-вахтына «јемәк» вермәјә тә’јин олунублар (Матта 24:45). Һансы Мүгәддәс Китаб ајәләри бу тә’лими дүзҝүн баша дүшдүјүмүзү тәсдиг едир? Ола биләрми ки, Иса үмумијјәтлә гардашларыны руһани гида илә мөһкәмләндирән һәр бир мәсиһчини нәзәрдә тутурду?

¹³ Аллаһ Исраил халгына демишди: «Сизсиниз Мәним шаһидләрим, сечдијим гулларым [«гулум», КМ]» (Јешаја 43:10). Лакин ерамызын 33-ҹү илиндә, нисанын 11-дә Иса Исраилин башчыларына билдирди ки, Аллаһ онларын халгыны Өз гулу олмаг үстүнлүјүндән мәһрум етди. О деди: «Аллаһын Сәлтәнәти сиздән алыныб, онун мејвәләрини јетишдирәҹәк бир халга вериләҹәкдир». Иса буну да демишди: «Будур, евиниз бош галыр» (Матта 21:43; 23:38). Исраил халгы Јеһоваја бир гул кими нә садиг, нә дә ағыллы чыхды (Јешаја 29:13, 14). Елә һәмин ҝүн, бир аз кечәндән сонра, Иса сорушду: «Садиг вә ағыллы гул кимдир?» Онун суалынын мәғзи бу иди: «Аллаһын садиг гулу олмаг үчүн һансы ағыллы халг Исраили әвәз едәҹәк?» Һәвари Петер мәсһ олунмуш мәсиһчи јығынҹағына мәктубунда бу суала ҹаваб верди: «Сиз исә... мүгәддәс милләт, Аллаһа мәхсус халгсыныз» (1 Петер 1:4; 2:9). Һәмин руһани халг, јә’ни «Аллаһын Исраили» Јеһованын јени гулу сечилди (Галатијалылара 6:16). Неҹә ки гәдим Исраил халгынын үзвләри бир ‘гулу’ тәшкил едирди, еләҹә дә истәнилән вахт кәсији әрзиндә јер үзүндә јашамыш бүтүн мәсһ олунмуш мәсиһчиләр «садиг вә ағыллы гул» синфини тәшкил едирләр. Аллаһын гулу васитәсилә «јемәк» алмаг неҹә дә шәрәфдир!

Шәхси өјрәнмәдән севинҹ дуја биләрсән

14. Нәјә ҝөрә Мүгәддәс Китабы тәдгиг етмәк ону садәҹә охумагдан даһа чох севинҹ ҝәтирир?

¹⁴ Мүгәддәс Јазылардан јени бир шеј өјрәнәндә мәҝәр онун иманымызы мөһкәмләндирмәси бизи хошбәхт етмирми? Елә буна ҝөрә дә, Мүгәддәс Китабы тәдгиг етмәк ону садәҹә охумагдан даһа севиндириҹи ола биләр. Бу сәбәбдән, нәшрләримизи охујанда өзүндән соруш: бу изаһат арашдырдығым мөвзуја даир билдикләримлә неҹә бағлыдыр? Даһа һансы ајәләр вә дәлилләр бу мәгаләдә едилән јекуну тәсдигләјә биләрди? Әлавә ахтарышлар апармаг лазым ҝәләрсә, суалларыны бир јерә гејд ет вә онлары нөвбәти шәхси өјрәнмә заманы арашдыр.

15. Һансы мөвзулары арашдырмаг олар вә онларын узунмүддәтли фајда ҝәтирмәси үчүн нә етмәк лазымдыр?

¹⁵ Бәли, јени бир шеји өјрәнмәк севинҹ ҝәтирдији үчүн Мүгәддәс Китаб һәгигәтләри һагда билијини дәринләшдир. Мәсәлән, Аллаһын бәшәријјәтин хејри үчүн бағладығы мүхтәлиф әһдләри јахшы-јахшы арашдыр. Исанын Мәсиһ олдуғуну ҝөстәрән пејғәмбәрликләри, јахуд Мүгәддәс Јазылара дахил олан һансыса китабы ајәбәајә өјрәнмәклә иманыны мөһкәмләндирә биләрсән. Әҝәр сәнин доғма дилиндә Јеһованын Шаһидләринин мүасир тарихи һаггында бәһс едән «Јеһованын Шаһидләри — Аллаһын Падшаһлығынын мүждәчиләри»a (рус.) китабы варса, ону охумаг да иманыны мөһкәмләндирәҹәк. «Ҝөзәтчи Гүлләси»нин кечмиш сајларындакы «Охуҹуларын суаллары» рубрикасында чап олунан мәгаләләр, сөзсүз ки, мүәјјән ајәләри даһа јахшы баша дүшмәјә көмәк едәҹәк. Мүәјјән нәтиҹәләрә ҝәтириб чыхаран Мүгәддәс Китаб изаһатларына хүсуси диггәт јетир. Бу сәнә дәркетмә габилијјәтини инкишаф етдирмәјә көмәк едәҹәк (Ибраниләрә 5:14). Өјрәнмә заманы ја Мүгәддәс Китабында, ја да гејд китабчасында гејдләр апар ки, бу мә’лумат сәнә вә көмәк едә биләҹәјин адамлара узунмүддәтли фајда ҝәтирсин.

Ушағыныза Мүгәддәс Китабы арашдырмагдан севинҹ дујмасына көмәк един

16. Ушағыныз Мүгәддәс Китабы арашдырмагдан севинҹ дујсун дејә, она неҹә көмәк едә биләрсиниз?

¹⁶ Ушагларынын руһани иштаһасыны артырмаг үчүн валидејнләр чох шеј едә биләрләр. Фикирләшмәјин ки, онлар дәрин дүшүнҹәләри анлаја билмәзләр. Әҝәр сиз ушагларыныза аиләви өјрәнмәјә һазырлашмалары үчүн бир мөвзу тә’јин етмисинизсә, нә өјрәндикләрини соруша биләрсиниз. Аиләви өјрәнмәләрдә һәм дә практики мәшғәләләр кечирмәк олар. Бунун сајәсиндә ушагларыныз иманларыны мүдафиә вә өјрәндикләринин һәгигәт олдуғуну сүбут етмәји өјрәнәҹәкләр. Бундан әлавә, сиз «“Ҝөзәл торпаға” бахын»b (рус.) адлы брошүранын көмәјилә Мүгәддәс Китаб ҹоғрафијасыны өјрәнә вә һәфтә әрзиндә Мүгәддәс Китабдан охудуғумуз фәсилләрә ајдынлыг ҝәтирә биләрсиниз.

17. Нәјә ҝөрә шәхси өјрәнмә кечирмәкдә таразлы олмалыјыг?

¹⁷ Шәхси өјрәнмә мараглы кечә вә иманыны мөһкәмләндирә биләр, анҹаг јығынҹаг ҝөрүшләринә һазырлашмаг үчүн вахт ајырмаға да диггәт јетир. Ҝөрүшләр Јеһованын бизә «садиг вә ағыллы гул» васитәсилә тә’лим вермәсинин диҝәр үсулудур. Бунунла белә, әлавә ахтарышлар ҝөрүшләрдә, мәсәлән, китабөјрәнмәдә, јахуд Теократик Хидмәт Мәктәбиндә Мүгәддәс Китабын һәфтәлик охунмасында даһа мә’налы шәрһләр вермәјә көмәк едә биләр.

18. Нәјә ҝөрә «Аллаһын дәрин дүшүнҹәләрини» баша дүшмәк үчүн ҝөстәрдијимиз бүтүн сә’јләр өз бәһрәсини верәҹәк?

¹⁸ Аллаһын Кәламыны дәриндән тәдгиг етмәк сәни Јеһоваја даһа да јахынлашдыра биләр. Мүгәддәс Китаб белә өјрәнмәнин дәјәрини ҝөстәрәрәк дејир: «Пул неҹә инсанын сипәридирсә, һикмәт дә еләҹә инсанын сипәридир. Амма билијин фајдасы бундан ибарәтдир: һикмәт она саһиб олана һәјат верәр» (Ваиз 7:12). Буна ҝөрә дә, руһани шејләрә даир анлајышыны дәринләшдирмәк үчүн ҝөстәрдијин сә’јләр өз бәһрәсини верәҹәк. Даим арашдырма апаранлара Мүгәддәс Китаб вә’д едир ки, онлар ‘Аллаһы таныјаҹаглар’ (Сүлејманын мәсәлләри 2:4, 5).

[Һашијәләр]

Изаһ едә биләрсинизми?

• ‘Аллаһын дәрин дүшүнҹәләри’ нәдир?

• Биз нә үчүн даима дәрин дүшүнҹәләри арашдырмалыјыг?

• Нә үчүн ‘Аллаһын дәрин дүшүнҹәләрини’ анламағын ҝәтирдији севинҹ бүтүн мәсиһчиләрә ачыгдыр?

• ‘Аллаһын дәрин дүшүнҹәләриндән’ даһа чох фајдаланмаг үчүн нә едә биләрсән?

[31-ҹи сәһифәдәки шәкил]

Валидејнләр ушагларынын арашдырма апарараг аиләви өјрәнмәјә һазырлашмалары үчүн мөвзу тә’јин едә биләрләр.