Јеһова бизим Али һөкмдарымыздыр!
«Худавәнд Рәббә [«Али Һөкмдар Јеһоваја», ЈД] пәнаһ ҝәтирмишәм» (МӘЗ. 73:28).
1. Павел 1 Коринфлиләрә 7:31 ајәсиндә нәјә истинад едир?
«БУ ДҮНЈАНЫН сәһнәси дәјишир». Бу сөзләри һәвари Павел гәләмә алыб (1 Кор. 7:31). Бурада о, дүнјаны сәһнәјә бәнзәдир. Сәһнәләр бир-бирини әвәз етдикҹә мүсбәт вә мәнфи ролларда чыхыш едән актјорлар јерләрини башгаларына верирләр.
2, 3. а) Јеһованын али һөкмранлығына мејдан охунмасыны нә илә мүгајисә етмәк олар? б) Биз һансы суаллары мүзакирә едәҹәјик?
2 Һал-һазырда даһа мөһтәшәм тамаша ҝедир вә сән дә онун иштиракчысысан. Бу тамашанын әсас сүжет хәтти Јеһова Аллаһын али һөкмранлығынын бәраәт газанмасыдыр. Ону бәзи өлкәләрдәки вәзијјәтлә мүгајисә етмәк олар. Бир тәрәфдә низам-интизамы горујан гануни һөкумәт, диҝәр тәрәфдә исә фырылдагчылыға, зоракылыға әл атан вә гәтл төрәдән ҹинајәткар тәшкилат. Гејри-гануни һөкумәт гануни һөкумәтә мејдан охујур вә бүтүн вәтәндашларын дөвләтә садиглијини сынаға чәкир.
3 Ејни вәзијјәт дүнја мигјасында да мөвҹуддур. ‘Худавәнд Рәббин [«Али Һөкмдар Јеһованын», ЈД]’ гануни һөкумәти тәсис олунуб (Мәз. 71:5). Бунунла белә, дүнјаны «Шәририн» башчылыг етдији ҹинајәткар тәшкилат идарә едир вә бунун уҹбатындан бүтүн бәшәријјәт тәһлүкә алтындадыр (1 Јәһ. 5:19). Бу тәшкилат Аллаһын гануни һөкумәтинә гаршы чыхыр вә бүтүн инсанларын Аллаһын али һөкмранлығына садиглијини сынаға чәкир. Вәзијјәт бу јерә неҹә ҝәлиб чыхды? Аллаһ нәјә ҝөрә буна јол верир? Шәхсән һәр биримиз бу вәзијјәтдә нә едә биләрик?
Тамашанын сүжет хәтти
4. Дүнја мигјасында ҝедән тамашанын сүжет хәттинә бир-бирилә бағлы олан һансы ики мәсәлә дахилдир?
4 Дүнја мигјасында ҝедән бу тамашанын сүжет хәттинә бир-бирилә бағлы олан ики мәсәлә — Јеһованын али һөкмранлығы вә инсанларын нөгсансызлығы дахилдир. Мүгәддәс Јазыларын орижинал мәтниндә Јеһова тез-тез «Али Һөкмдар» адланыр. Мисал үчүн, Аллаһа там етибар едән мәзмурчу охујурду: «Худавәнд Рәббә [«Али Һөкмдар Јеһоваја», ЈД] пәнаһ ҝәтирмишәм» (Мәз. 73:28). Бизим Јеһова Аллаһа Һагг-Таала вә Али Һөкмдар кими бахмаға там әсасымыз вар (Дан. 7:22).
5. Нәјә ҝөрә биз Јеһованын али һөкмранлығына садиг галмалыјыг?
5 Јеһова Јарадан олдуғу үчүн һәм Јер күрәсинин, һәм дә бүтүн Каинатын Али Һөкмдарыдыр. (Вәһј 4:11 ајәсини оху.) Үстәлик, О, Һаким, ганун гојан вә Падшаһдыр, бу сәбәбдән үмумдүнја һөкумәтин мәһкәмә, ганунвериҹи вә иҹраедиҹи һакимијјәти Она мәхсусдур (Јешаја 33:22). Биз Аллаһы Али Һөкмдарымыз кими гәбул етмәлијик, чүнки һәјатымыза ҝөрә Она борҹлујуг вә Ондан асылыјыг. Мүгәддәс Китабда дејилир: «Јеһова тахтыны ҝөјләрдә бәргәрар едиб, О, һәр шејин үзәриндә һөкмранлыг едир». Буну һәмишә јадда сахласаг, Онун али һөкмранлығына садиг галаҹағыг (Мәз. 103:19; Һәв. иш. 4:24).
6. Нөгсансызлыг нәдир?
6 Јеһованын али һөкмранлығына садиг галмаг үчүн биз нөгсансызлығымызы горумалыјыг. «Нөгсансызлыг» өзүнә әхлаги бүтөвлүјү дахил едир. Нөгсансыз инсан һәм дә гүсурсуз вә салеһдир. Әјјуб пејғәмбәр мәһз белә инсан олуб (Әјј. 1:1).
Тамаша башлајыр
7, 8. Шејтан Јеһованын али һөкмранлығынын ганунилијини неҹә шүбһә алтына алды?
7 Тәхминән 6 000 ил бундан әввәл руһани варлыглардан бири Јеһованын али һөкмранлығынын ганунилијини шүбһә алтына алды. Бу үсјанкар һамынын она ибадәт етмәсини истәјирди. Онун сөзләри вә әмәлләри архасында мәһз бу худбин истәк дурурду. О, илк инсанлары — Адәмлә Һәвваны јолдан чыхарараг онларын Аллаһын али һөкмранлығына арха чевирмәсинә наил олду вә Аллаһын јаланчы олдуғуну иддиа едәрәк адына ләкә јахмаға чалышды. (Јарадылыш 3:1—5 ајәләрини оху.) Нәтиҹәдә, бу үсјанкар Аллаһын баш дүшмәни, Шејтан (Дүшмән), Иблис (Бөһтанчы), илан (јаланчы) вә әждаһа (удан) олду (Вәһј 12:9).
8 Шејтан Аллаһа мүхалиф чыхды. Али Һөкмдар Јеһова онун иддиаларына неҹә ҹаваб верәҹәкди? Һәр үч үсјанкары — Шејтаны, Адәми вә Һәвваны дәрһал мәһв едәҹәкдими? Шүбһәсиз, буну етмәјә Онун һәм ҝүҹү, һәм дә сәлаһијјәти варды. Вә бунунла кимин али һөкмдар олдуғу мәлум олаҹагды. Һәмчинин бу сүбут едәҹәкди ки, Јеһова илк инсанлара ганунуну позаҹаглары тәгдирдә ҹәзаландыраҹағыны дејәркән һәгигәти сөјләјирди. Бәс нәјә ҝөрә Јеһова буну етмәди?
9. Шејтан нәји шүбһә алтына алды?
9 Шејтан Адәмлә Һәвваја јалан данышмагла вә онлары Јеһовадан узаглашдырмагла Онун инсанлардан итаәткарлыг тәләб етмәк һүгугуну, еләҹә дә бүтүн шүурлу варлыгларын садиглијини шүбһә алтына алды. Јеһованын али һөкмранлығына садиг галан Әјјубун һадисәсиндән ҝөрдүјүмүз кими, о, бүтүн инсанлары Аллаһдан дөндәрмәјә гадир олдуғуну иддиа етди (Әјј. 2:1—5).
10. Јеһова бәшәријјәт үзәриндә али һөкмранлығыны тәсис етмәји тәхирә салмагла нәјә имкан верди?
10 Јеһова бәшәријјәт үзәриндә али һөкмранлығыны тәсис етмәји тәхирә салмагла иддиаларынын әсаслы олдуғуну сүбут етмәк үчүн Шејтана вахт верди. Һәмчинин О, инсанлара имкан верди ки, Онун али һөкмранлығыны дәстәкләдикләрини ҝөстәрсинләр. Әсрләр боју нә баш верди? Шејтан тәдриҹән ҝүҹлү ҹинајәткар тәшкилат јаратды. Сонда Јеһова бу тәшкилаты вә Иблиси мәһв едәҹәк вә бунунла али һөкмранлығынын ганунилијини там сүбута јетирәҹәк. Јеһова Аллаһ буна о гәдәр әмин иди ки, бу һагда һәлә Еден бағында үсјан баш верәркән пејғәмбәрлик сөјләмишди (Јар. 3:15).
11. Бир чох инсанлар Јеһованын али һөкмранлығыны неҹә дәстәкләмишләр?
11 Бир чох инсанлар иман тәзаһүр етдирәрәк вә нөгсансызлыгларыны горујуб сахлајараг Јеһованын али һөкмранлығыны дәстәкләмиш вә Онун адыны мүгәддәс тутмушлар. Бу сијаһыја Һабил, Ханок, Нуһ, Ибраһим, Сара, Муса, Рут, Давуд, Иса Мәсиһ вә онун еркән шаҝирдләри, еләҹә дә бизим ҝүнләрдә Јеһоваја садигликләрини горујан милјонларла инсанлар дахилдир. Билдијимиз кими, Шејтан өзүндән разы шәкилдә бүтүн бәшәријјәти Аллаһдан узаглашдыраҹағыны иддиа етмишди. Јеһованын али һөкмранлығыны дәстәкләјән инсанлар Шејтанын јаланчы олдуғунун сүбута јетирилмәсиндә вә Јеһованын адынын тәмизә чыхарылмасында иштирак едирләр (Сүл. мәс. 27:11).
Тамашанын сону индидән бәллидир
12. Һарадан билирик ки, Аллаһ пислијә әбәдијјән дөзмәјәҹәк?
12 Биз әминик ки, тезликлә Јеһова али һөкмранлығыны тәсис едәҹәк. О, пислијә әбәдијјән дөзмәк фикриндә дејил. Үстәлик, ахыр ҝүнләрдә јашадығымызы да билирик. Јеһова Дашгын заманы писләри јер үзүндән силди; Содом вә Һоморра шәһәрини, еләҹә дә фирону вә онун ордусуну мәһв етди. Сисра, Санхерив вә онларын ордулары Һагг-Таала гаршысында аҹиз галдылар (Јар. 7:1, 23; 19:24, 25; Чых. 14:30, 31; Һак. 4:15, 16; 2 Пад. 19:35, 36). Буна ҝөрә дә биз әмин ола биләрик ки, Јеһова Аллаһ Онун адына ҝөстәрилән һөрмәтсизлијә вә Шаһидләринә едилән писликләрә әбәдијјән дөзмәк нијјәтиндә дејил. Бундан әлавә, Исанын иштиракына вә бу пис дүнјанын сонуна ишарә едән әламәт ҝөз габағындадыр (Мат. 24:3).
13. Јеһованын дүшмәнләринин агибәтинә дүчар олмамаг үчүн биздән нә тәләб олунур?
13 Јеһованын дүшмәнләринин агибәтинә дүчар олмамаг үчүн биз Онун али һөкмранлығына садиг галмалыјыг. Буну неҹә едә биләрик? Шејтанын ҹинајәткар һакимијјәтиндән узаг дурмагла вә онун әлалтыларындан горхмамагла (Јешаја 52:11; Јәһ. 17:16; Һәв. иш. 5:29). Јалныз белә олан һалда биз сәмави Атамыз Јеһованын али һөкмранлығыны дәстәкләјә биләрик. Үстәлик, О, Өз адыны рүсвајчылыгдан тәмизләјиб Каинатын Али Һөкмдары олдуғуну сүбут етдији заман сағ галмаға үмидимиз олаҹаг.
14. Мүгәддәс Китабын мүхтәлиф һиссәләриндә нәләр ачыгланыр?
14 Бу тамашанын тәфсилатлары барәдә јалныз «Јарадылыш»дан јох, Мүгәддәс Јазылара дахил олан бүтүн китаблардан охумаг олар. Мүгәддәс Китабын илк үч фәслиндә јарадылышдан вә инсанларын ҝүнаһа батмасындан, сон үч фәслиндә исә бәшәријјәтин камиллијә говушмасындан бәһс олунур. Галан сәһифәләрдә исә Али Һөкмдар Јеһованын бәшәријјәтә, јерә вә Каината даир нијјәтини неҹә һәјата кечирдији тәфсилатлары илә изаһ олунур. «Јарадылыш» китабында Шејтанын пејда олмасындан вә пислијин дүнјаја неҹә ҝирмәсиндән сөһбәт ҝетдији һалда, «Вәһј» китабынын сонунҹу фәсилләриндә пислијин арадан галдырылмасындан, Иблисин мәһв едилмәсиндән вә ҝөјдә олдуғу кими, јердә дә Аллаһын ирадәсинин бәргәрар олмасындан сөз ачылыр. Бәли, Аллаһын Кәламында ҝүнаһын вә өлүмүн сәбәбләри ачыгланыр вә онларын дүнја сәһнәсиндән неҹә кәнарлашдырылаҹағындан вә нөгсансыз инсанлар үчүн түкәнмәз севинҹлә вә әбәди һәјатла неҹә әвәз олунаҹағындан данышылыр.
15. Әсас мөвзусу али һөкмранлыг олан тамашанын сону чатанда бир чох хејир-дуалары дадмаг үчүн биз нә етмәлијик?
15 Тезликлә бу дүнјанын сәһнәси тамамилә дәјишиләҹәк. Нечә әсрләрдир ки, давам едән бу тамаша тезликлә сона јетәҹәк вә пәрдә салынаҹаг. Шејтан сәһнәдән чыхарылаҹаг вә әбәдијјән унудулаҹаг; Аллаһын ирадәси исә бүтүн дүнјада јеринә јетәҹәк. Лакин бу һадисәләрин шаһиди олмаг вә Аллаһын Кәламында габагҹадан дејилән сајсыз-һесабсыз хејир-дуалары дадмаг истәјириксә, артыг индидән Јеһованын али һөкмранлығыны дәстәкләмәлијик. Бу мәсәләдә битәрәф мөвге тутмаг гејри-мүмкүндүр. «Рәбб мәнимләдир» демәјә там әсасымыз олсун дејә биз Онун тәрәфиндә олмалыјыг (Мәз. 118:6, 7).
Нөгсансызлығымызы горумаг мүмкүндүр!
16. Аллаһа садиг галмағын мүмкүн олдуғуну һарадан билирик?
16 Биз Јеһованын али һөкмранлығына садиг гала вә нөгсансызлығымызы горуја биләрик. Бунун мүмкүн олдуғуну һәвари Павелин сөзләриндән ҝөрмәк олар. О јазмышды: «Үзләшдијиниз сынагларда гејри-ади бир шеј јохдур, һамы белә сынагларла үзләшир. Анҹаг Аллаһ вәфалы Аллаһдыр, О гојмаз ки, сиз ҝүҹүнүз чатмајан сынаглара мәруз галасыныз вә сынаг вахты дөзә биләсиниз дејә, сизә чыхыш јолу да ҝөстәрәҹәк» (1 Кор. 10:13). Павел һансы сынаглары нәзәрдә тутурду вә Аллаһ бизә чыхыш јолуну неҹә ҝөстәрир?
17-19. а) Исраиллиләр сәһрада һансы сынагла гаршылашдылар? б) Нәјә ҝөрә Јеһованын гаршысында нөгсансызлығымызы горуја биләрик?
17 Сәһрада долашан исраиллиләрин нүмунәсиндән ҝөрүндүјү кими, јаранан вәзијјәт ‘сынаға’ чеврилә, бу исә, өз нөвбәсиндә, инсаны Аллаһын гануну позмаға тәһрик едә биләр. (1 Коринфлиләрә 10:6—10 ајәләрини оху.) Исраиллиләр истәсәјдиләр, сынаға ујмаја биләрдиләр, лакин онлар әксинә даврандылар: Јеһова онлары бир аја бәс едән билдирчинлә тәмин едәндә «зәрәрли шејләри» арзуладылар. Бир мүддәт јемәјә әтләри олмаса да, Аллаһ онлара кифајәт гәдәр манна јетирирди. Бунунла белә, Аллаһ онлара билдирчин ҝөндәрәндә исраиллиләр аҹҝөзлүклә онларын үстүнә ҹумдулар (Сај. 11:19, 20, 31—35).
18 Бундан бир гәдәр әввәл, Мусаја Сина дағында Ганун вериләркән исраиллиләр данаја ибадәт етмәклә вә ҹисмани арзуларына ујмагла бүтпәрәстлик етдиләр. Онлар рәһбәрләри олан Мусанын јохлуғуну ҝөрүб һәдләрини ашдылар (Чых. 32:1, 6). Вәд едилмиш дијарын астанасында оланда минләрлә исраилли Моав гадынлары тәрәфиндән башдан чыхарылараг онларла әхлагсызлыг етдиләр. Бу ҝүнаһа ҝөрә минләрлә исраилли өлүмлә ҹәзаландырылды (Сај. 25:1, 9). Бәзән Исраил халгы ҝилеј-ҝүзар едәрәк үсјан галдырырды; бир дәфә исә нәинки Мусаја, Аллаһа гаршы да дејиндиләр! (Сај. 21:5). Исраиллиләр һәтта Гораһын, Датанын, Авирамын вә онларын тәрәфдарларынын өлүмүндән сонра да јанлыш олараг үсјанкарларын мәһвинин әдаләтсиз олдуғуну дүшүнәрәк ҝилејләндиләр. Нәтиҹәдә, 14 700 нәфәр Аллаһын ҝөндәрдији бәладан өлдү (Сај. 16:41, 49).
19 Бу сынагларын һеч бири исраиллиләрин таб ҝәтирә билмәјәҹәји гәдәр чәтин дејилди. Халг иманыны итирдијиндән, еләҹә дә Јеһованы, Онун мәһәббәт долу гајғысыны вә салеһ јолларыны унутдуғундан бу сынаглара бојун әјди. Исраиллиләрин гаршылашдығы сынаглар кими, бизим дә гаршылашдығымыз сынагларда гејри-ади бир шеј јохдур. Әҝәр вар ҝүҹүмүзлә онлара мүгавимәт ҝөстәрсәк вә Јеһованын көмәјинә бел бағласаг, нөгсансызлығымызы горуја биләҹәјик. Биз буна зәррә гәдәр дә шүбһә етмәмәлијик, чүнки Јеһова «вәфалы Аллаһдыр», О гојмаз ки, биз ‘ҝүҹүмүз чатмајан сынаглара мәруз галаг’. Јеһова Онун ирадәсини иҹра етмәјимизи гејри-мүмкүн едән сынагларла үзләшмәјимизә һеч вахт јол вермәјәҹәк (Мәз. 94:14).
20, 21. Сынагларла үзләшәркән Аллаһ бизә ‘чыхыш јолуну’ неҹә ҝөстәрир?
20 Јеһова сынаглара таб ҝәтирмәјимиз үчүн бизи мөһкәмләндирмәклә ‘чыхыш јолу ҝөстәрир’. Мәсәлән, тәгибчиләр бизи имандан дөндәрмәк үчүн зор тәтбиг едә биләрләр. Бизи дөјмәсинләр, ишҝәнҹә вермәсинләр, јахуд өлдүрмәсинләр дејә онлардан горхуб дедикләрини едә биләрик. Амма һәвари Павелин Аллаһдан илһам алараг 1 Коринфлиләрә 10:13 ајәсиндә јаздығы сөзләр бизи әмин едир ки, үзләшдијимиз сынаглар мүвәггәтидир. Јеһова һеч вахт јол вермәјәҹәк ки, сынаг елә һәддә ҝәлиб чатсын ки, биз Јеһоваја садиг гала билмәјәк. Аллаһ иманымызы мөһкәмләндирә вә нөгсансызлығымызы горумағымыз үчүн бизә лазыми ҝүҹ верә биләр.
21 Јеһова мүгәддәс руһу васитәсилә бизә көмәк едир. Бу руһ һәмчинин сынаглара дөзмәјимиз үчүн Мүгәддәс Китабдан лазыми фикирләри јадымыза салыр (Јәһ. 14:26). Буна ҝөрә дә биз алданыб јанлыш јолла ҝетмәјәҹәјик. Мисал үчүн, биз Јеһованын али һөкмранлығы вә инсан нөгсансызлығы кими ваҹиб мәсәләләрдән аҝаһыг. Буну билән бир чох инсанлар Аллаһын көмәјилә өлүмәдәк садигликләрини горумушлар. Лакин сынаглардан чыхыш јолу онлар үчүн өлүм јох, Јеһованын вердији көмәк олду. Јеһова сынаглара сонадәк таб ҝәтирмәјимиз үчүн бизә дә бу ҹүр көмәк едә биләр. Һәмчинин О, «хиласы мирас алаҹаг адамлара хидмәт етмәк үчүн ҝөндәрилән» садиг мәләкләриндән истифадә едәрәк бизә көмәк едир (Ибр. 1:14). Нөвбәти мәгаләдән ҝөрәҹәјимиз кими, Аллаһын али һөкмранлығыны әбәдијјән дәстәкләмәк шәрәфинә јалныз нөгсансызлыгларыны горујан инсанлар лајиг ҝөрүләҹәкләр. Әҝәр Али Һөкмдарымыз кими Јеһованын әлиндән бәрк-бәрк тутсаг, биз дә белә инсанларын сырасында олаҹағыг!
Неҹә ҹаваб верәрдиниз?
• Нәјә ҝөрә Јеһованы Али Һөкмдарымыз кими гәбул етмәлијик?
• Аллаһ гаршысында нөгсансызлығы горумаг нә демәкдир?
• Һарадан билирик ки, Јеһова тезликлә али һөкмранлығыны тәсис едәҹәк?
• 1 Коринфлиләрә 10:13 ајәсинә әсасән, нәјә ҝөрә демәк олар ки, нөгсансызлығы горумаг мүмкүндүр?
[24-ҹү сәһифәдәки шәкил]
Шејтан Адәмлә Һәвваны Јеһованын әмрини позмаға тәһрик етди
[26-ҹы сәһифәдәки шәкил]
Јеһованын али һөкмранлығынын тәрәфини тутмаға гәти гәрарлы ол!