Мәсиһчиләр башгаларына хидмәт етмәкдән севинҹ дујурлар
“Вермәк алмагдан даһа бөјүк бәхтијарлыг ҝәтирир” (ҺӘВАРИЛӘРИН ИШЛӘРИ 20:35).
1. Бу ҝүн һансы јанлыш дүшүнҹә тәрзи үстүнлүк тәшкил едир вә бу нәјә ҝөрә зәрәрлидир?
ИНСАНЛАР ХХ әсрин сон онилликләри әрзиндә егосентризм һаггында тез-тез данышырлар. Егосентризм, әтрафдакылара лагејд мүнасибәтлә әлагәләндирилән тамаһкарлыг вә худбинлик хүсусијјәтидир. Шүбһә етмәмәк олар ки, егосентризм хүсусијјәти 2000-ҹи илдә азалмамышдыр. Тез-тез, “бунун мәнә нә фајдасы олаҹаг?” вә ја “бундан газанҹым нә олаҹаг?” кими суаллары ешидирик. Белә худбинлик хошбәхтлик ҝәтирмир. Чүнки бу, Исанын бәјан етдији, “вермәк алмагдан даһа бөјүк бәхтијарлыг ҝәтирир” принсипинә зиддир (Һәвариләрин ишләри 20:35).
2. Вермәјин бәхтијарлыг ҝәтирмәси нәдән ҝөрүнүр?
2 Вермәјин алмагдан даһа бөјүк бәхтијарлыг ҝәтирмәси доғрудурму? Бәли. Јегова Аллаһ һаггында дүшүнәк. “Һәјатын гајнағы” Ондадыр (Мәзмур 36:9). Хошбәхт јашамағымыз вә сәмәрәли чалышмағымыз үчүн лазым олан һәр шеји бизә верән Одур. О, “һәр бир јахшы бәхшиш вә һәр камил һәдијјә” Гајнағыдыр (Јагуб 1:17). “Бәхтијар Аллаһ” Јегова даима верир (1 Тимотејә 1:11, ЈД). О, Јараданлары олараг чох шејләр вердији инсанлары севир (Јәһја 3:16). Ади бир аиләјә нәзәр салаг. Әҝәр сиз валидејнсинизсә, онда ушаг тәрбијә етмәјин нә гәдәр фәдакарлыг тәләб етдијини, нә гәдәр вермәк лазым ҝәлдијини билирсиниз. Бунунла јанашы, узун илләр чәкдијиниз әзијјәтләри ушаг дәрк етмир. О, бүтүн бунлары сизин тәрәфиниздән бир борҹ кими гәбул едир. Анҹаг буна бахмајараг, тәмәннасыз сә’јләриниз сајәсиндә ушағынызын мүвәффәгијјәтлә бөјүдүјүнү ҝөрмәјә шад олурсунуз. Нәјә ҝөрә? Она ҝөрә ки, сиз ону севирсиниз.
3. Јеговаја вә һәмиманлыларымыза хидмәт етмәк нәјә ҝөрә бөјүк севинҹ ҝәтирир?
3 Вермәк, Аллаһын һәгиги ибадәтчиләринә дә хас олан хүсусијјәтдир вә буну етмәјә онлары мәһәббәт тәшвиг едир. Јегованы вә һәмиманлыларымызы севдијимиз үчүн, онлара вахт ајырмаға вә диггәт јетирмәјә чох шадыг (Матта 22:37—39). Шәхси мәнафејини ҝүдәрәк Аллаһа хидмәт едән инсанлар, нәтиҹәдә чох аз севинҹ дујурлар. Фәгәт алаҹағындан даһа чох нә верә биләҹәји барәдә дүшүнәрәк, тәмәннасыз хидмәт едәнләр, һәгиги хошбәхтлик әлдә едирләр. Ибадәтимизлә әлагәдар Мүгәддәс Китабда бә’зи сөзләрин неҹә ишләндијинә диггәт јетириләрсә, бу һәгигәт ајдын олаҹагдыр. Бу вә нөвбәти мәгаләдә бу ҹүр үч сөзү мүзакирә едәҹәјик.
Исанын инсанлар үчүн иҹра етдији хидмәт
4. Христиан аләминдә “инсанлар үчүн хидмәт” һансы маһијјәти дашыјыр?
4 Ибадәтимизлә әлагәли олан әһәмијјәтли гәдим Јунан сөзләриндән бири литурҝи́ја сөзүдүр. “Јени Дүнја Тәрҹүмәси”ндә бу сөз “инсанлар үчүн хидмәт”, “халг үчүн хидмәт” вә ја “үмумхалг хидмәти” кими тәрҹүмә олунур. Христиан аләминдә истифадә олунан “литурҝија” сөзү, һәмин Јунан сөзүндән ҝөтүрүлмүшдүрa. Анҹаг Христиан аләминин рәсми литурҝијаларыны чәтин ки, инсанлар үчүн фајдалы хидмәт адландырмаг олар.
5, 6. а) Гәдим Исраилдә инсанлар үчүн һансы хидмәт иҹра олунурду вә бу хидмәт һансы фајданы ҝәтирирди? б) Гәдим Исраилдә иҹра олунан хидмәт, инсанлар үчүн едилән һансы даһа бөјүк хидмәтлә әвәз олунду вә нәјә ҝөрә?
5 Һәвари Павел, литурҝи́ја сөзүнә јахын олан Јунан сөзүнү Исраил каһинләринә аид истифадә етди. О деди: “Һәр каһин ҝүндән-ҝүнә [“халг үчүн”, литурҝи́ја сөзүнүн формасы] хидмәтини јеринә јетирәрәк... ејни гурбанлары дәфәләрлә тәгдим едир” (Ибраниләрә 10:11). Левили каһинләр Исраилдә инсанлар үчүн чох дәјәрли хидмәти иҹра едирдиләр. Онлар, Аллаһын Ганунуну өјрәдир вә халгын ҝүнаһларыны јујан гурбанлары тәгдим едирдиләр (2 Тарихләр 15:3; Малаки 2:7). Каһинләр вә халг Јегованын Ганунуна риајәт едәркән, исраиллиләрин севинмәјә сәбәбләри олурду (Тәснијә 16:15).
6 Исраил каһинләринин инсанлар үчүн иҹра етдикләри хидмәт чох шәрәфли иди, лакин Исраил халгы сәдагәтсизлији уҹбатындан рәдд едилдији заман каһинләрин хидмәти бүтүн дәјәрини итирди (Матта 21:43). Јегова даһа мөһтәшәм хидмәти, бөјүк Баш Каһин Исанын инсанлар үчүн иҹра етдији хидмәти нәзәрдә тутмушду. Биз онун һаггында охујуруг: “Фәгәт О, әбәдијјән галдығы үчүн, даими каһинлијә маликдир. Буна ҝөрә О, Өз васитәсилә Аллаһа јахынлашанлары тамамилә хилас етмәјә гадирдир; чүнки онлар үчүн вәсатәт етмәк мәгсәдилә даим јашамагдадыр” (Ибраниләрә 7:24, 25, И—93).
7. Исанын инсанлар үчүн иҹра етдији хидмәт нәјә ҝөрә мүгајисәедилмәз фајда ҝәтирир?
7 Иса әбәдијјән каһин олараг галаҹаг вә ону һеч ким әвәз етмәјәҹәкдир. Буна ҝөрә дә, инсанлары бүтүнлүклә јалныз о хилас едә биләр. О, бу мүгајисәедилмәз хидмәти әл илә тикилмиш мә’бәддә дејил, б. е. 29-ҹу илиндә фәалијјәтә башлајан, ибадәт үчүн Јегова тәрәфиндән тикилән бөјүк гурулушда иҹра едир. Иса, һазырда ҝөјләрдә, бу мә’бәдин мүгәддәсләр Мүгәддәси адланан һиссәсиндә хидмәт едир. “О, мүгәддәс јердә вә һәгиги Чадырда - инсанын дејил, Рәббин гурдуғу Чадырда хидмәт едир [“хидмәтчидир”, ЈД; литурго́с]” (Ибраниләрә 8:2; 9:11, 12). Белә јүксәк вәзифәдә олмасына бахмајараг, Иса инсанлар үчүн “хидмәтчи” олараг галыр. О, өзүнүн јүксәк сәлаһијјәтиндән алмаг үчүн дејил, вермәк үчүн истифадә едир. Вермәк она севинҹ ҝәтирир. Бу, јердә јашајаркән чәтинликләрә дөзмәк үчүн она ҝүҹ верән, “гаршысына гојулан севинҹ”ин бир һиссәси иди (Ибраниләрә 12:2).
8. Иса Ганун әһдини дәјишмәкдән өтрү инсанлар үчүн хидмәти неҹә иҹра едирди?
8 Исанын инсанлар үчүн иҹра етдији хидмәтин башга саһәси дә вар иди. Павел јазырды: “Инди исә Иса даһа јахшы вә’дләрә әсасланмыш даһа јахшы бир әһдин вәсатәтчиси олдуғуна ҝөрә, даһа ә’ла бир хидмәтә наил олду” (Ибраниләрә 8:6). Муса, Исраил халгы илә Јегова арасындакы мүнасибәтин әсасыны тәшкил едән әһдин васитәчиси олду (Чыхыш 19:4, 5). Иса исә, јени әһдин васитәчиси олду вә бу әһдин сајәсиндә бир чох халглардан руһла мәсһ олунмуш јени халгын - “Аллаһын Исраили”нин доғулмасы мүмкүн олду (Галатијалылара 6:16; Ибраниләрә 8:8, 13; Вәһј 5:9, 10). Инсанлар үчүн едилән неҹә дә ҝөзәл хидмәтдир! Јеговаја мәгбул тәрздә хидмәт едә билмәмиз үчүн васитәчи кими хидмәт едән Исаны таныдығымыза неҹә дә шадыг! (Јәһја 14:6).
Мәсиһчиләр дә инсанлар үчүн хидмәти иҹра едирләр
9, 10. Мәсиһчиләр тәрәфиндән инсанлар үчүн иҹра олунан хидмәтин бә’зи нөвләри һансылардыр?
9 Јер үзүндә Исанын етдији кими, инсанлар үчүн белә ҝөзәл хидмәти һеч ким, јеринә јетирмир. Буна бахмајараг, мәсһедилмиш мәсиһчиләр сәмави мүкафатларыны алдыглары заман Исанын јанында өз јерләрини тутур, сәмави падшаһлар вә каһинләр тимсалында онун инсанлар үчүн етдији хидмәтдә иштирак едирләр (Вәһј 20:6; 22:1—5). Анҹаг јенә дә демәк олар ки, Мәсиһин давамчылары инсанлар үчүн хидмәтләрини јер үзүндә дә иҹра едир вә бу, мәсиһчиләрә бөјүк фәрәһ ҝәтирир. Мәсәлән, Фәләстиндә аҹлыг оланда, Јәһудејадакы јәһуди мәсиһчиләрин аҹынаҹаглы вәзијјәтләрини јүнҝүлләшдирмәк үчүн, һәвари Павел Авропадакы гардашларын вердикләри көнүллү ианәләри ҝәтирди. Бу, инсанлар үчүн едилән хидмәт иди (Ромалылара 15:27; 2 Коринфлиләрә 9:12). Бу ҝүн мәсиһчиләр, гардашлары бәдбәхтчиликләрә дүчар оланда, тәбии фәлакәтләрдән вә диҝәр мәһведиҹи чеврилишләрдән әзијјәт чәкәндә тә’ҹили јардым ҝөстәрәрәк буна бәнзәр хидмәти севинҹлә јеринә јетирирләр (Сүлејманын мәсәлләри 14:21).
10 Павел инсанлар үчүн едилән башга бир хидмәт нөвү барәдә дә јазырды: “Әҝәр иманынызын гурбаны вә хидмәти үстүнә гурбан едилирәмсә севинирәм вә һамынызла бәрабәр севинирәм” (Филипилиләрә 2:17, КМ). Филипилиләрин рифаһына хидмәт едәрәк, Павел инсанлар үчүн хидмәти јеринә јетирирди, буну севинҹ вә сә’јлә едирди. Буна бәнзәр хидмәт бу ҝүн дә иҹра олунур, хүсусилә дә руһани гиданы вахтлы-вахтында верән “садиг вә ағыллы гул” тимсалында хидмәт едән мәсһедилмиш мәсиһчиләр тәрәфиндән (Матта 24:45—47). Бундан әлавә, онлар груп шәклиндә “Иса Мәсиһ васитәсилә Аллаһа мәгбул олан руһани гурбанлар тәгдим етмәк” вә “[онлары] гаранлыгдан Өз валеһедиҹи нуруна Чағыранын фәзиләтләрини е’лан етмәк” үчүн тапшырыг алан “мүгәддәс каһинләр тајфасыны” тәшкил едирләр (1 Петер 2:5, 9). Павел кими, онлар да өзләрини “гурбан” едәрәк, бу шәрәфли вәзифәләри севинҹлә јеринә јетирирләр. Јолдашлары олан “башга гојунлар” да инсанлара Јегова вә Онун нијјәтләри һаггында данышараг онлара гошулур вә јардым едирләрb (Јәһја 10:16; Матта 24:14). Бу, инсанлар үчүн едилән неҹә дә бөјүк вә севинҹли хидмәтдир! (Мәзмур 107:21, 22).
Мүгәддәс хидмәти иҹра един
11. Пејғәмбәр Анна бүтүн мәсиһчиләрә нәдә нүмунә верди?
11 Ибадәтимизлә әлагәли олан башга бир Јунан сөзү - «латре́ја»дыр вә бу сөз “Јени Дүнја Тәрҹүмәси”ндә “мүгәддәс хидмәт” кими тәрҹүмә олунур. Мүгәддәс хидмәт ибадәтлә бағлыдыр. Мисал үчүн, 84 јашлы дул гадын, пејғәмбәр Анна һаггында дејилир ки, о, “мә’бәд әразисиндән һеч ајрылмаз, ҝеҹә-ҝүндүз оруҹ тутуб дуа едәрәк, ибадәтлә [латре́ја сөзүнә гоһум олан Јунан сөзү] мәшғул иди” (Лука 2:36, 37). Анна Јеговаја вәфалы тәрздә хидмәт едирди. О, бизим һамымыз — ҝәнҹләр, јашлылар, кишиләр вә гадынлар үчүн ҝөзәл нүмунәдир. Анна Јеговаја үрәкдән дуа едир вә мә’бәддә мүнтәзәм олараг Она хидмәт едирди; дуа етмәк вә јығынҹаглара ҝетмәк бизим дә мүгәддәс хидмәтимизә дахилдир (Ромалылара 12:12; Ибраниләрә 10:24, 25).
12. Мүгәддәс хидмәтимизин мүһүм һиссәси һансыдыр вә нәјә ҝөрә ону ејни заманда инсанлар үчүн едилән хидмәт һесаб етмәк олар?
12 Һәвари Павел мүгәддәс хидмәтимизин мүһүм һиссәсинә ишарә едәрәк, бу сөзләри јазды: “Онун Оғлунун Мүждәсини тәблиғ едәрәк, руһән хидмәт етдијим Аллаһ шаһидимдир ки, мән даим сизи зикр едирәм” (Ромалылара 1:9). Бәли, хош хәбәри тәблиғ етмәк, садәҹә бизи динләјәнләрә хидмәт етмәк дејил, һәмчинин Јегова Аллаһа ибадәт етмәкдир. Һәссас инсанларла гаршылашыб гаршылашмамағымыздан асылы олмајараг, тәблиғ иши Јеговаја едилән мүгәддәс хидмәтдир. Севимли сәмави Атамызын ҝөзәл хүсусијјәтләри вә нијјәтләри һаггында башгаларына данышмаг сә’јимиз, шүбһәсиз ки, бизә бөјүк севинҹ бәхш едир (Мәзмур 71:23).
Мүгәддәс хидмәти һарада иҹра едирик?
13. Јегованын руһани мә’бәдинин дахили һәјәтиндә мүгәддәс хидмәти иҹра едәнләрин һансы үмиди вар вә онларла бәрабәр кимләр севинир?
13 Павел мәсһедилмиш мәсиһчиләрә јазырды: “Сарсылмаз Падшаһлыға наил олдуғумуза ҝөрә, миннәтдар олаг ки, бу јолла Аллаһа мәгбул сурәтдә горху вә ихласкарлыгла Она хидмәт едәк [“мүгәддәс хидмәти иҹра едәк”, ЈД]” (Ибраниләрә 12:28, И—93). Падшаһлығы әминликлә ҝөзләјән мәсһедилмишләр, Һагг-Тәалаја ибадәт едәрәк иманда сарсылмаз галырлар. Мүгәддәсләр Мүгәддәсиндә вә Јегованын руһани мә’бәдинин дахили һәјәтиндә мүгәддәс хидмәти јалныз онлар иҹра едә биләрләр. Мәсһедилмишләр Иса илә бәрабәр ҝөјдә, мүгәддәсләр Мүгәддәсиндә хидмәт едәҹәкләри заманы сәбирсизликлә ҝөзләјирләр. Башга гојунлар синфиндән олан јолдашлары да онларын бу ҝөзәл үмидинә севинирләр (Ибраниләрә 6:19, 20; 10:19—22).
14. Бөјүк издиһам, Исанын инсанлар үчүн етдији хидмәтдән һансы фајданы әлдә едир?
14 Бәс диҝәр гојунлар һаггында нә демәк олар? Һәвари Јәһјаја ҝөстәрилдији кими, бу сон ҝүнләрдә “либасларыны јујуб, онлары Гузунун ганы илә ағардан” бөјүк издиһам әмәлә ҝәлди (Вәһј 7:14). Бу о демәкдир ки, мәсһедилмиш һәмиманлылары кими, Исанын инсанлар үчүн етдији хидмәтинә вә гурбан вердији камил инсан һәјатына онлар да иман ҝәтирирләр. Ејни заманда, Исанын хидмәти диҝәр гојунлара башга фајданы да ҝәтирир: онлара “[Јегованын] әһдини мөһкәм тутмаға” көмәк едир (Ишаја 56:6). Јени әһд онларла бағланмаса да, бу әһдлә бағлы олан бүтүн ганунлара табе олараг, онун сајәсиндә тәшкил олунмуш һәр шејә гәтијјәтлә риајәт едирләр. Онлар Аллаһын Исраили илә бирләшмиш вә ејни сүфрә архасындан гидаланырлар. Онун нүмајәндәләри илә әмәкдашлыг едәрәк, Аллаһы халг гаршысында иззәтләндирир вә Она мәгбул олан гурбанлары тәгдим едирләр (Ибраниләрә 13:15).
15. Бөјүк издиһам мүгәддәс хидмәтини һарада иҹра едир вә бу хејир-дуа онлар үчүн нә демәкдир?
15 Буна ҝөрә дә, бөјүк издиһам вәһјдә “ағ либас ҝејиб... тахтын вә Гузунун гаршысында дурублар”. Бундан әлавә, “онлар, Аллаһын тахты гаршысындадырлар вә Онун мә’бәдиндә ҝеҹә-ҝүндүз Она хидмәт едирләр [“мүгәддәс хидмәти иҹра едирләр”, ЈД]. Тахтда Отуран исә Өз чадырыны онларын үзәриндә гураҹагдыр” (Вәһј 7:9, 15). Исраилдә јәһудилији гәбул едәнләр Сүлејманын мә’бәдинин хариҹи һәјәтиндә хидмәт едирдиләр. Буна бәнзәр тәрздә, бөјүк издиһам Јеговаја, Онун руһани мә’бәдинин хариҹи һәјәтиндә ибадәт едир. Бу хидмәт онлара севинҹ ҝәтирир (Мәзмур 122:1). Һәтта јердә галан сонунҹу мәсһедилмиш өзүнүн сәмави мирасыны алдыгдан сонра, бөјүк издиһам Јегованын халгы кими Она едилән мүгәддәс хидмәти давам етдирәҹәкдир (Вәһј 21:3).
Мәгбул олмајан мүгәддәс хидмәт
16. Мүгәддәс хидмәтлә әлагәдар һансы хәбәрдарлыглар верилир?
16 Гәдим Исраилин ҝүнләриндә мүгәддәс хидмәт Јегованын ганунларына мүнасиб тәрздә иҹра олунмалы иди (Чыхыш 30:9; Левилиләр 10:1, 2). Бу ҝүн дә, мүгәддәс хидмәтимиз Јеговаја мәгбул олсун дејә мүәјјән тәләбләрә риајәт едилмәлидир. Мәһз буна ҝөрә Павел Колослулара нөвбәти сөзләри јазды: “Сизин үчүн дуа едиб, јалвармагдан ваз кечмирик ки, там һикмәт вә руһани идракла Аллаһын ирадәсини бүтүнлүклә гаврајасыныз ки, Рәббә лајиг шәкилдә һәрәкәт едиб, Ону һәр ҹәһәтдән разы саласыныз; һәр ҹүр хејирли ишдә сәмәрә вериб, Аллаһы танымагда тәрәгги едәсиниз” (Колослулара 1:9, 10). Аллаһа ибадәт етмәјин доғру јолуну тә’јин етмәк бизим ихтијарымыза верилмәјиб. Мүгәддәс Китабын дәгиг билији, руһани анлајыш вә Аллаһа мәгбул мүдриклик бөјүк мә’на кәсб едир. Бунлар олмаса фәлакәтдән гачына билмәрик.
17. а) Мусанын ҝүнләриндә мүгәддәс хидмәт неҹә мурдарланды? б) Мүгәддәс хидмәт бу ҝүн неҹә јанлыш истигамәт ала биләр?
17 Мусанын ҝүнләриндә јашајан исраиллиләри хатырлајаг. Биз охујуруг: “Аллаһ исә онларадан үз дөндәрди, онлары фәзадакы ҹисимләрә гуллуг етмәјә бурахды” (Һәвариләрин ишләри 7:42). Һәмин исраиллиләр, Аллаһын онлардан өтрү етдији гүдрәтли ишләрини ҝөрмүшдүләр. Буна бахмајараг, өз хејирләрини ахтараркән башга илаһиләрә үз тутурдулар. Онлар сәдагәтли дејилдиләр, бунсуз исә мүгәддәс хидмәтимиз Аллаһа мәгбул олмајаҹагдыр (Мәзмур 18:25). Бу ҝүн чәтин ки, кимсә улдузлара вә ја гызыл өкүзләрә ибадәт етмәк үчүн Јеговадан үз дөндәрсин, амма бүтпәрәстлијин башга нөвләри дә вардыр. Иса вар-дөвләтә гуллуг етмәкдән сагындырды, Павел исә тамаһкарлығы бүтпәрәстлик адландырды (Матта 6:24; Колослулара 3:5). Шејтан өзүнү танры кими гәләмә верир (2 Коринфлиләрә 4:4). Бүтпәрәстлијин бу ҹүр нөвләри ҝениш јајылмышдыр вә өзлүјүндә тәләни тәмсил едир. Мисал үчүн, Исанын ардынҹа ҝетдикләрини дүшүнән, һәгигәтдә исә зәнҝинләшмәјә ҹәһд ҝөстәрән, јахуд өз фикирләринә вә өзүнә ҝүвәнән инсанлары ҝөтүрәк. Онлар әслиндә кимә хидмәт едирләр? Онлар, Ишајанын ҝүнләриндә Јегованын адына анд ичән, Онун гүдрәтли ишләрини исә мурдар бүтләрә аид едән јәһудиләрдән нә илә фәргләнирләр? (Ишаја 48:1, 5).
18. Кечмишдә јеринә јетирилән мүгәддәс хидмәтдә дүзҝүн олмајан нә иди, бу јанлышлыг инди нәдә әкс олунур?
18 Иса да хәбәрдарлыг едирди: “Елә саат ҝәлир ки, сизи өлдүрән һәр адам, Аллаһа хидмәт етдијини санаҹагдыр” (Јәһја 16:2). Сонрадан һәвари Павел адланан, “Стефанын өлдүрүлмәсинә разы” олан вә “Рәббин шаҝирдләринә гаршы өлүм вә тәһдидләрлә нәфәс” алан Шаул, шүбһәсиз ки, Аллаһа хидмәт етдијини дүшүнүрдү (Һәвариләрин ишләри 8:1; 9:1). Бу ҝүн етник тәмизләмә вә ҝеносидә сәбәбкар оланларын бә’зиләри дә Аллаһа ибадәт етдикләрини дүшүнүрләр. Чохлары белә дүшүнүрләр, һәгигәтдә исә онлар милләтпәрәстлијин вә тајфа гурулушунун илаһиләринә тапыныр, вар-дөвләти, шәхси мәнлији вә саирәни иззәтләндирирләр.
19. а) Биз мүгәддәс хидмәтимизә неҹә јанашырыг? б) Мүгәддәс хидмәт һансы һалда бизә севинҹ бәхш едәҹәкдир?
19 Иса деди: “Аллаһын олан Рәббә сәҹдә гыл вә јалныз Она гуллуг ет [“мүгәддәс хидмәти иҹра ет”, ЈД]” (Матта 4:10). Иса Шејтана мүраҹиәт едирди, амма онун сөзләринә гулаг асмаг һәр биримиз үчүн неҹә дә ваҹибдир! Каинатын Һөкмдары үчүн мүгәддәс хидмәти иҹра етмәк јүксәк шәрәф, еһтирам ојадан үстүнлүкдүр. Бәс ибадәтимизлә бағлы олан, инсанлар үчүн едилән хидмәт барәсиндә нә дејә биләрик? Бу ҹүр хидмәти гоншуларымызын мәнфәәти үчүн јеринә јетирмәк бөјүк севинҹ ҝәтирир (Мәзмур 41:1, 2; 59:16). Лакин белә хидмәт,- ону бүтүн үрәјимизлә вә дүзҝүн јеринә јетирәриксә бизә һәгиги хошбәхтлик ҝәтирәҹәкдир. Бәс Аллаһа лазыми тәрздә хидмәт едәнләр кимләрдир? Јегова кимләрин мүгәддәс хидмәтини гәбул едир? Бу суаллара ҹавабы, Мүгәддәс Китабда ибадәтимизлә әлагәли раст ҝәлдијимиз үчүнҹү сөзү нәзәрдән кечирәркән тапаҹағыг. Нөвбәти мәгаләдә сөһбәт бу сөз һаггында ҝедәҹәкдир.
[Һашијәләр]
a Христиан аләминдә литурҝијалар, иҹра олунан ја хидмәтләри, ја да ки, Рома Католик килсәсиндә гәбул олунмуш дини ајинләри тәсвир едир.
b Һәвариләрин ишләри 13:2-ҹи ајәсиндә Антакјадакы пејғәмбәрләрин вә мүәллимләрин Јеговаја “хидмәт” етдикләри (литурҝи́ја сөзүнә јахын олан Јунан сөзү) билдирилир. Еһтимал ки, бу хидмәт халга тәблиғ етмәји дә өзүнә дахил едирди.
Сиз неҹә ҹаваб верәрдиниз?
• Иса инсанлар үчүн һансы бөјүк хидмәти иҹра едирди?
• Мәсиһчиләр инсанлар үчүн һансы хидмәти иҹра едирләр?
• Мәсиһчиләрин мүгәддәс хидмәти нәдән ибарәтдир вә о һарада һәјата кечирилир?
• Мүгәддәс хидмәтимиз Аллаһа мәгбул олсун дејә нә әлдә етмәлијик?
[8-ҹи сәһифәдәки шәкил]
Валидејнләр вермәкдән бөјүк севинҹ дујурлар.
[10 вә 11-ҹи сәһифәләрдәки шәкилләр]
Мәсиһчиләр инсанлар үчүн хидмәти, башгаларына көмәк едәрәк вә хош хәбәри бәјан едәрәк иҹра едирләр.
[12-ҹи сәһифәдәки шәкил]
Мүгәддәс хидмәтимиз Аллаһа мәгбул олсун дејә бизә дәгиг билик вә анлајыш лазымдыр.