Әјјуб — тәһәммүл вә нөгсансызлыг нүмунәси
«Гулум Әјјуба јахшы-јахшы нәзәр сала билдинми? Ахы јер үзәриндә онун кимиси јохдур. О, камил, әмәлисалеһ, Аллаһдан горхан вә өзүнү шәрдән узаг сахлајан бир адамдыр» (ӘЈЈУБ 1:8).
1, 2. а) Әјјубун башына ҝөзләнилмәдән һансы фаҹиәләр ҝәлди? б) Фаҹиә баш вермәздән әввәл Әјјубун неҹә јашадығыны тәсвир един.
БИР ЗАМАНЛАР јер үзүндә һеч нәдән корлуг чәкмәјән, вар-дөвләти, нүфузу, сағламлығы вә хошбәхт аиләси олан бир инсан јашајырды. Анҹаг гыса мүддәт әрзиндә онун һәјатында бир-биринин ардынҹа үч фаҹиә баш верди. Гәфилдән вар-дөвләтини итирди. Сонра гәрибә бир туфан онун бүтүн ушагларынын һәјатына сон гојду. Чох кечмәмиш өзү ағыр хәстәлијә тутулду, бүтүн бәдәнини чибан басды. Јәгин ки, Мүгәддәс Јазыларда онун адыны дашыјан китабын баш гәһрәманы Әјјубу таныдыныз (Әјјуб 1 вә 2-ҹи фәсилләр).
2 «Каш ки өтән ајлар ҝери дөнәјди», дејә Әјјуб инләјирди (Әјјуб 3:3; 29:2). Фәлакәт үз верәндә ким өтән ҝүнләрин һәсрәтини чәкмир? Әјјуба ҝәлдикдә, о, салеһ өмүр сүрүрдү. Санки о, бүтүн бәлалардан мүдафиә олунмушду. Адлы-санлы адамлар она һөрмәт едир вә ондан мәсләһәт алырдылар (Әјјуб 29:5-11). О варлы олса да, пулун јерини билирди (Әјјуб 31:24, 25, 28). Растына чыхан јетимләрә, дуллара јардым әлини узадырды (Әјјуб 29:12-16). О, арвадына садиг иди (Әјјуб 31:1, 9, 11).
3. Јеһова Әјјубу неҹә инсан һесаб едирди?
3 Әјјуб Аллаһа ибадәт етдији үчүн гүсурсуз инсан иди. Јеһова онун һаггында белә деди: «Јер үзәриндә онун кимиси јохдур. О, камил, әмәлисалеһ, Аллаһдан горхан вә өзүнү шәрдән узаг сахлајан бир адамдыр» (Әјјуб 1:1, 8). Мә’нәви нөгсансызлығына бахмајараг, фаҹиәләр Әјјубун раһатлығыны позду. Зәһмәти илә газандығы һәр шеј пуч олду, ағры, изтираб вә мә’јуслуг дәјанәтини сынаға чәкди.
4. Әјјубун ағыр сынагларыны нәзәрдән кечирмәк нә үчүн фајдалы олаҹаг?
4 Әлбәттә, Аллаһын хидмәтчиләри арасында һәјатында мүсибәтләр баш верән тәкҹә Әјјуб олмамышдыр. Бир чох мүасир мәсиһчиләр өз башларына ҝәләнләрлә Әјјубун һадисәси арасында бағлылыг ҝөрә биләрләр. Бу сәбәбдән ики суалы нәзәрдән кечирмәјә дәјәр: фәлакәтләрлә үзләшәркән Әјјубун ағыр сынагларыны хатырламаг бизә неҹә көмәк едә биләр? Бу, әзијјәт чәкәнләрә даһа чох ҹаныјананлыг ҝөстәрмәјә неҹә көмәк едир?
Сәдагәт мәсәләси вә нөгсансызлығын сынанмасы
5. Шејтанын иддиаларына ҝөрә Әјјуб Аллаһа нәјә ҝөрә хидмәт едирди?
5 Әјјубун һадисәси мүстәсна һал иди. Әјјубдан хәбәрсиз Шејтан онун Аллаһа тәмиз үрәклә хидмәт етдијини шүбһә алтына алды. Бир дәфә, руһани варлыглар бир јерә топлашан заман Јеһова Әјјубун ҝөзәл кејфијјәтләринә диггәт јетирәндә, Шејтан белә ҹаваб верди: «Ҹанына, евинә, вар-дөвләтинә сипәр олуб ону горујан Сән дејилсәнми?» Бунунла Шејтан иддиа етди ки, Әјјуб, долајысы илә, Аллаһын бүтүн башга хидмәтчиләри Она худбинликдән ирәли ҝәләрәк хидмәт едирләр. Шејтан Јеһоваја деди: «Инди бир әл узадыб онун вар-јохуну әлиндән ал, о, ҝөзүнүн габағында мүтләг Сәнә лә’нәт едәҹәк» (Әјјуб 1:8-11).
6. Шејтан һансы ваҹиб мүбаһисәли суалы галдырды?
6 Бу мүбаһисәли суал чох ваҹиб иди. Шејтан Јеһованын һөкмранлығыны шүбһә алтына алды. Доғруданмы Аллаһ каинаты мәһәббәтлә идарә едә биләр? Вә ја Шејтанын ишарә етдији кими, һәмишә сонда худбинликми гәләбә газанаҹаг? Јеһова хидмәтчисинин нөгсансызлығына вә сәдагәтинә әмин олараг, Шејтана иҹазә верди ки, нүмунә үчүн Әјјубу сынаға чәксин. Беләликлә, Әјјубун үзәринә далбадал мүсибәтләр ҝәтирән мәһз Шејтан иди. Илк һүҹумлары мүвәффәгијјәтсизлијә уғрадыгдан сонра, Шејтан Әјјубу үзүҹү хәстәлијә мүбтәла етди. «Дәри әвәзинә дәри! Инсан ҹанына ҝөрә һәр шејини верәр» дејә Шејтан исрар етди (Әјјуб 2:4).
7. Аллаһын мүасир хидмәтчиләри, Әјјуб кими, һансы сынаглара мә’руз галырлар?
7 Бу ҝүн мәсиһчиләрин чоху Әјјуб гәдәр әзаблара мә’руз галмасалар да, онларын да пајына мүхтәлиф фәлакәтләр дүшүр. Чохлары тә’гибләрлә вә ја аилә проблемләри илә үзләширләр. Игтисади чәтинликләр вә ја зәиф сағламлыг инсаны һалдан салыр. Кимләрсә иманлары уғрунда ҹанларындан кечмишләр. Әлбәттә, биз елә ҝүман етмәмәлијик ки, башымыза ҝәлән һәр фаҹиәнин сәбәбкары Шејтандыр. Әслиндә проблемләрин бә’зиләринин сәбәби һәтта шәхси сәһвләримиз вә ја ирси хәстәликләр дә ола биләр (Галатијалылара 6:7). Һәр биримиз гоҹалығын вә тәбии фәлакәтләрин ҝәтирдији чәтинликләрә мә’руз галырыг. Мүгәддәс Китаб ачыглајыр ки, һал-һазырда Јеһова мө’ҹүзәви шәкилдә хидмәтчиләрини бу фәлакәтләрдән мүһафизә етмир (Ваиз 9:11).
8. Шејтан уғрадығымыз фәлакәтләрдән неҹә истифадә едә биләр?
8 Амма Шејтан уғрадығымыз фәлакәтләрдән иманымызы сарсытмаг үчүн истифадә едә биләр. Һәвари Павел ‘бәдәнинин нештәринин, шејтанын мәләјинин’ ону ‘јумругладығыны’ јазырды (2 Коринфлиләрә 12:7, И–93). Ола билсин, бу, сағламлыгла бағлы проблем, мәсәлән, ҝөзләрин зәифлији вә ја башга шеј иди, һәр һалда Павел баша дүшүрдү ки, Шејтан бу проблемдән вә онун ҝәтирдији мә’јуслугдан ону севинҹдән мәһрум етмәк вә нөгсансызлығыны сарсытмаг үчүн истифадә едә биләр (Сүлејманын мәсәлләри 24:10). Бу ҝүн Шејтан аилә үзвләрини, мәктәб јолдашларыны вә ја диктатор һөкумәтләри Аллаһын хидмәтчиләрини мүхтәлиф үсулларла тә’гиб етмәјә тәһрик едә биләр.
9. Нә үчүн фәлакәт вә ја тә’гибләр бизи һәддиндән артыг тәәҹҹүбләндирмәмәлидир?
9 Бу проблемләрә уғурла неҹә синә ҝәрә биләрик? Биз онлара Јеһоваја олан мәһәббәтимизин вә Онун һөкмранлығына итаәтимизин дәјишмәз олдуғуну ҝөстәрмәк имканы кими бахмалыјыг (Јагуб 1:2-4). Бәлаларымызын сәбәби нә олурса-олсун, Аллаһа сәдагәтин ваҹиблијини анламаг бизә руһани таразлығы горумаға көмәк едәҹәкдир. Һәвари Петер мәсиһчиләрә јазырды: «Севимлиләрим, санки башыныза гәрибә бир иш ҝәлирмиш кими, аранызда баш вериб, сизи сынамаг үчүн олан одлу имтаһана тәәҹҹүб етмәјин» (1 Петер 4:12). Павел исә изаһ едирди: «Аллаһ јолунда Мәсиһ Исаја бағлы олараг јашамаг истәјәнләрин һамысы да тә’гибә мә’руз галаҹагдыр» (2 Тимотејә 3:12). Шејтан Әјјубла етдији кими, Јеһованын мүасир Шаһидләринин дә нөгсансызлығыны индијәдәк шүбһә алтына алыр. Үмумијјәтлә, Мүгәддәс Китабда ҝөстәрилдији кими, Шејтан ахыр ҝүнләрдә Аллаһын халгына һүҹумларыны артырыб (Вәһј 12:9, 17).
Анлашылмазлыг вә бә’зи јанлыш мәсләһәтләр
10. Әјјубун вәзијјәти нә үчүн чәтин иди?
10 Әјјуб башына ҝәлән бәлаларын сәбәбини билмәдији үчүн онун вәзијјәти бизимкиндән даһа чәтин иди. Әјјуб јанлыш олараг белә бир гәнаәтә ҝәлди ки, «верән дә Рәбдир, алан да Рәбдир» (Әјјуб 1:21). Ола билсин, Шејтан гәсдән Әјјубда елә тәәссүрат јаратмаға чалышырды ки, ҝуја бәдбәхтликләринин сәбәбкары Аллаһдыр.
11. Башына ҝәлән мүсибәтләрин Әјјубда јаратдығы һиссләри тәсвир един.
11 Арвадынын ону тәһрик етдији кими, Аллаһы лә’нәтләмәкдән имтина етсә дә, Әјјуб тамамилә руһдан дүшмүшдү (Әјјуб 2:9, 10). О дејирди: ‘Писләрин иши мәнимкиндән јахшы ҝәтирир’ (Әјјуб 21:7-9). Әјјуб тәәҹҹүб ичиндә иди: ‘Аллаһ мәни нә үчүн ҹәзаландырыр?’ Елә вахт олурду ки, о, садәҹә өлмәк истәјирди. «Каш ки мәни өлүләр дијарында ҝизләдәјдин, гәзәбин кечәнәдәк сахлајајдын», дејәрәк нида едирди (Әјјуб 14:13).
12, 13. Үч достунун сөзләри Әјјуба неҹә тә’сир ҝөстәрди?
12 Әјјубун үч досту ҝуја «онун дәрдинә шәрик олмаг вә ону овутмаг үчүн јанына ҝәлдиләр» (Әјјуб 2:11). Анҹаг онлар ‘адаминҹидән тәсәлличиләр’ идиләр (Әјјуб 16:2). Әјјубун үрәјини бошалдараг јүнҝүллүк тапа биләҹәји достлара еһтијаҹы варды, лакин бу үч дост онун чашгынлығыны артырды вә ону даһа да мә’јус етди (Әјјуб 19:2; 26:2).
13 Мәнтигә ујғундур ки, Әјјубда белә суаллар јарана биләрди: «Нә үчүн мән? Нә етмишәм ки, бу мүсибәтләр мәним башыма ҝәлиб?» Достлары онун вәзијјәтини тамамилә јанлыш изаһ едирдиләр. Онлар ҝүман едирдиләр ки, Әјјуб ҹидди ҝүнаһлар төрәдәрәк өзү-өзүнү бу мүсибәтләрә дүчар едиб. Елифаз сорушду: «Кимдир ҝүнаһсыз мәһв олан?... Мәним ҝөрдүјүмә ҝөрә шәр саһәсини белләјәнләр, әзаб тохуму сәпәнләр, әкдикләрини бичәрләр» (Әјјуб 4:7, 8).
14. Нәјә ҝөрә биз әзабларын сәһв давранышын нәтиҹәси олдуғу гәнаәтинә ҝәлмәли дејилик?
14 Дүздүр, әҝәр биз руһ үчүн әкмәк әвәзинә, ҹисмани тәбиәтимиз үчүн әкириксә, проблемләр јарана биләр (Галатијалылара 6:7, 8). Лакин индики системдә неҹә давранмағмыздан асылы олмајараг, бизим дә башымыза бәлалар ҝәлә биләр. Бундан башга, гәтијјән демәк олмаз ки, ҝүнаһсыз инсан бүтүн бәлалардан мүдафиә олунур. «Нөгсансыз, ҝүнаһкарлардан ајрылмыш» Иса Мәсиһ ишҝәнҹә дирәјиндә әзабла өлдүрүлдү, һәвари Јагуб шәһид олду (Ибраниләрә 7:26; Һәвариләрин ишләри 12:1, 2). Елифаз вә диҝәр ики нәфәр јанлыш мүһакимә јүрүтдүјү үчүн, Әјјуб өзүнү мүдафиә едир вә ҝүнаһсыз олдуғуну сүбут етмәјә чалышырды. Анҹаг достларынын Әјјубун лајигли олараг әзаб ҹәкдијини иддиа етмәләри онун Аллаһын әдаләтинә олан бахышына тә’сир едә биләрди (Әјјуб 34:5; 35:2).
Бәдбәхтликлә үзләшәндә көмәк тапырыг
15. Һансы дүшүнҹә тәрзи әзабларла үзләшәркән бизә көмәк едәҹәк?
15 Бәс бизим үчүн бурада ибрәт дәрси вармы? Фаҹиә, хәстәлик вә ја тә’гибләрлә үзләшәндә, бу бизә әдаләтсизлик кими ҝөрүнә биләр. Елә тәәссүрат ојанар ки, башгаларынын башына белә проблемләр ҝәлмир (Мәзмур 73:3-12). Арабир өзүмүзә белә ваҹиб суаллары верә биләрик: «Аллаһа олан мәһәббәтим мәни тәшвиг едирми ки, нә олурса-олсун хидмәти давам етдирим? Мән Јеһоваја Ону ‘утандырана ҹаваб вермәси’ үчүн ҹаваб тәгдим етмәјә чалышыраммы?» (Сүлејманын мәсәлләри 27:11; Матта 22:37). Һеч вахт јол вермәмәлијик ки, башгаларынын дүшүнүлмәмиш сөзләри үрәјимиздә сәмави Атамыза гаршы шүбһә ојатсын. Узун илләр хроники хәстәликдән әзијјәт чәкән садиг мәсиһчи бир дәфә деди: «Мән билирәм ки, Јеһованын јол вердији һәр шејә таб ҝәтирә биләҹәјәм. Мән билирәм ки, О мәнә лазыми ҝүҹү верәҹәкдир. О буну һәмишә едиб».
16. Аллаһын Кәламы чәтинликләрлә үзләшән инсанлара неҹә көмәк едир?
16 Биз Шејтанын фәндләри һаггында Әјјубдан даһа чох билирик. Мәкрли планындан, јә’ни «онун фитнәләриндән хәбәрсиз дејилик» (2 Коринфлиләрә 2:11). Бундан башга, зәнҝин практики мүдриклик бизим үчүн әлчатандыр. Мүгәддәс Китабда биз һәр ҹүр чәтинлијә таб ҝәтирән садиг гадын вә кишиләрин нүмунәләринә раст ҝәлирик. Мәсиһчиләрин әксәријјәтиндән чох әзаб чәкән һәвари Павел јазырды: «Бундан әввәл јазыланларын һамысы бизә тә’лим олараг јазылды ки, тәһәммүл вә Мүгәддәс Јазыларын тәсәллиси илә үмидимиз олсун» (Ромалылара 15:4). Икинҹи Дүнја мүһарыбәси заманы дини е’тигадына ҝөрә һәбсә алынмыш бир авропалы шаһид үч ҝүнлүк јемәк пајыны Мүгәддәс Китаба дәјишмишди. О дејир: «Бу, чох бөјүк хејир-дуа олду. Аҹ галмағыма бахмајараг, о әзијјәтли вахтда мәнимлә бәрабәр башгаларыны да мөһкәмләндирән руһани гида әлдә етдим. Һәмин Мүгәддәс Китабы индијәдәк сахлајырам».
17. Нәјин көмәјилә тәһәммүл едә биләрик?
17 Мүгәддәс Јазылардан алдығымыз тәсәлли илә јанашы, ону анламаға көмәк едән бир чох әдәбијјатларымыз да вардыр. Онларын тәгдим етдији рәһбәрлик проблемләрин өһдәсиндән ҝәлмәјә көмәк едир. Әҝәр «Ҝөзәтчи Гүлләси нәшрләринин индекси»нә (рус.) бахсан, сәнин сынагларына бәнзәр сынагларла үзләшән һәмиманлыларымызын нүмунәләрини тапаҹагсан (1 Петер 5:9). Һәмчинин проблемләрини гајғыкеш ағсаггаллар вә ја башга јеткин мәсиһчиләр илә бөлүшмәјин дә көмәји дәјә биләр. Ән ваҹиби исә дуа едәрәк Јеһованын вә Онун мүгәддәс руһунун көмәјинә ҝүвәнә биләрсән. Павел Шејтанын ‘јумругларына’ неҹә таб ҝәтирирди? О, Аллаһын ҝүҹүнә е’тибар етмәји өјрәнирди (2 Коринфлиләрә 12:9, 10). «Мәни Мөһкәмләндирән васитәсилә һәр шеји етмәјә гадирәм» (Филипилиләрә 4:13, И–93).
18. Мәсиһчиләр бир-бирини неҹә руһландыра биләрләр?
18 Беләликлә, көмәк бизим үчүн әлчатандыр, ону ахтармаға һеч вахт тәрәддүд етмәмәлисиниз. Бир мәсәлдә дејилир: «Сыхынты ҝүнүндә әҝәр зәифләсән, гүввәтин аздыр» (Сүлејманын мәсәлләри 24:10, КМ). Неҹә ки, гурд тахта еви ичәридән јејиб дағыдырса, еләҹә дә руһ дүшкүнлүјү мәсиһчинин нөгсансызлығыны сарсыда биләр. Бу тәһлүкәнин гаршысыны алмаг үчүн Јеһова һәмиманлыларымыз васитәсилә бизә дајаг олур. Һәбс едилдији ҝеҹә мәләк Исаја ҝөрүнүб, ону мөһкәмләндирди (Лука 22:43). Дустаг олан Павел Ромаја ҝедәркән Аппиус базарында вә Үч Меһманханаларда гардашлары ҝөрәндә «Аллаһа шүкүр етди вә руһланды» (Һәвариләрин ишләри 28:15). Бир алман Шаһиди јенијетмә икән Равенсбрүк һәбс дүшәрҝәсинә ҝәтириләндә она едилән көмәји индијәдәк хатырлајыр. «Һәмиманлылар мәни дәрһал тапдылар вә сәмимијјәтлә гаршыладылар. Диҝәр бир сәдагәтли баҹы өз ганадынын алтына алараг, мәнә руһани ана олду» дејә о јада салыр.
«Садиг гал»
19. Шејтанын ҹәһдләринә мүгавимәт ҝөстәрмәкдә Әјјуба нә көмәк етди?
19 Јеһова Әјјубу ‘камил [«нөгсансыз», ЈД] олараг галан’ адам кими тәсвир етди (Әјјуб 2:3). Руһ дүшкүнлүјүнә гапылдығына вә әзабларынын сәбәбини анламадығына бахмајараг, Әјјуб һеч вахт ваҹиб мәсәлә олан садигликдә сарсылмады. О, нөгсансызлығындан дөнмәкдән имтина етди. Әјјуб тә’кид едирди: «Сон нәфәсимә гәдәр камиллијимдән [«нөгсансызлығымдан», ЈД] әл чәкмәјәҹәјәм» (Әјјуб 27:5).
20. Нә үчүн тәһәммүл етмәјә дәјәр?
20 Ејни гәтијјәт истәнилән шәраитдә, сынаглар, мүгавимәтләр вә ја фәлакәтләр гаршысында нөгсансызлығы горумагда бизә көмәк едәҹәк. Иса Смирнадакы јығынҹаға дејир: «Чәкәҹәјин әләмләрдән горхма. Будур, иблис сизләрдән бә’зиләрини зиндана атаҹаг ки, имтаһан олунасыныз. Вә сиз он ҝүн әзаб ичиндә олаҹагсыныз. Өлүм баһасына да олса садиг гал, Мән сәнә һәјат таҹыны верәҹәјәм» (Вәһј 2:10).
21, 22. Фәлакәтләрә таб ҝәтирәркән нәји билмәјимиз бизә тәсәлли верә биләр?
21 Шејтанын идарә етдији бу системдә тәһәммүлүмүз вә нөгсансызлығымыз сынаға чәкиләҹәк. Лакин Иса бизи әмин едир ки, ҝәләҹәјә инамла бахдығымыз үчүн горхмаға һеч бир әсасымыз јохдур. Ваҹиби садиг галмағымыздыр. Павел дејирди ки, ‘сыхынты мүвәггәтидир’, һалбуки «иззәт» вә ја Јеһованын бизә вә’д етдији мүкафат «һеч бир шејлә мүгајисә едилмәз дәрәҹәдә бөјүк, әбәди»дир (2 Коринфлиләрә 4:17, 18). Һәтта Әјјубун да сынаглары, сынагдан әввәл вә сонракы хошбәхт илләри илә мүгајисә етдикдә гысамүддәтли иди (Әјјуб 42:16).
22 Анҹаг һәјатымызда елә анлар ола биләр ки, сынагларымыз сонсуз, изтирабларымыз исә, демәк олар ки, дөзүлмәз ҝөрүнә биләр. Нөвбәти мәгаләдә Әјјубун башына ҝәләнләрин бизә тәһәммүлә даир башга һансы дәрсләри вердијини мүзакирә едәҹәјик. Һәмчинин фәлакәтләрлә үзләшәнләри һансы јолларла мөһкәмләндирә биләҹәјимизи өјрәнәҹәјик.
Неҹә ҹаваб верәрдиниз?
• Әјјубун нөгсансызлығы илә бағлы Шејтан һансы ваҹиб мүбаһисәли суалы галдырды?
• Нә үчүн бәдбәхтликләр бизи һәддиндән артыг тәәҹҹүбләндирмәмәлидир?
• Јеһова таб ҝәтирмәјимиз үчүн бизә неҹә көмәк едир?
[10-ҹу сәһифәдәки шәкилләр]
Арашдырмалар апарараг, јеткин мәсиһчиләрлә сөһбәт едәрәк вә дуада үрәјимизи бошалдараг таб ҝәтирмәк үчүн көмәк әлдә едә биләрик.