Онлар бәдәнләриндәки нештәрләрә таб ҝәтирдиләр
“Бәдәнимә бир нештәр, шејтанын мәләки верилмишдир ки... мәни јумругласын” (2 КОРИНФЛИЛӘРӘ 12:7, И-93).
1. Бу ҝүн инсанлар һансы проблемләрлә гаршылашырлар?
ҺАЛ-ҺАЗЫРДА мүбаризә апардығыныз һәр һансы чәтинлик вармы? Әҝәр беләдирсә, јалныз дејилсиниз. Јашадығымыз “чәтин анларда” садиг мәсиһчиләр ҝүҹлү мүгавимәтләрдән, аиләдә баш верән чәкишмәләрдән, хәстәликләрдән, малијјә чәтинликләриндән, емосионал һәјәҹанлардан, әзизләрини итирмәкдән вә бу кими диҝәр проблемләрдән әзијјәт чәкирләр (2 Тимотејә 3:1-5). Бә’зи өлкәләрдә мөвҹуд олан аҹлыг вә мүһарибәләр бир чох инсанларын һәјатыны тәһлүкә алтына алыр.
2, 3. Гаршылашдығымыз нештәрә бәнзәр әзијјәтләр һансы мәнфи әһвал-руһијјә јарада биләр вә бу ҹүр әһвал-руһијјә нә үчүн тәһлүкәлидир?
2 Бу ҹүр проблемләр, хүсусилә дә әҝәр бир нечә бәдбәхтлик ејни заманда баш верирсә, инсанлары тамам үмидсиз һала сала биләр. Сүлејманын мәсәлләри 24:10 ајәсиндә дејилир: “Сыхынты ҝүнүндә әҝәр зәифләсән, гүввәтин аздыр”. Проблемләр үзүндән јаранан мә’јуслуг бизи лазыми гүввәдән мәһрум етмәјә вә сона гәдәр дөзмәк гәрарымызы зәифләтмәјә габилдир. Бу неҹә баш верир?
3 Мә’јуслуг уҹбатындан објектив дүшүнмә габилијјәтини итирмәк олар. Мәсәлән, проблеми асанлыгла шиширдиб, өзүмүзү аҹиз санмаға башлаја биләрик. Һәтта бә’зиләри: “Аллаһ, сән буна неҹә јол верирсән?” - дејә, өз тәәҹҹүбләрини билдирирләр. Әҝәр белә мәнфи әһвал-руһијјә үрәкдә көк саларса, бу инсаны севинҹдән мәһрум едиб, онун гәлбиндә тәшвиш јарада биләр. Аллаһын хидмәтчиси елә бир үмидсизлијә гапыла биләр ки, “иман уғрунда ҝедән мүбаризәјә” сон гоја биләр (1 Тимотејә 6:12).
4, 5. Бә’зи һалларда Шејтан бизим проблемләримизә неҹә сәбәб олур, буна бахмајараг биз нәјә әмин ола биләрик?
4 Әлбәттә ки, чәкдијимиз изтирабларын сәбәбкары Јеһова Аллаһ дејил (Јагуб 1:13). Аллаһа садиг галмаг истәјимизә ҝөрә бә’зи проблемләрлә гаршылашырыг. Әслиндә Јеһоваја хидмәт едән кәсләр, Аллаһын баш дүшмәни олан Шејтан Иблис үчүн һәдәфә чеврилирләр. “Бу әсрин [пис] танрысы” вахтынын аз галдығы мүддәтдә чалышыр ки, Јеһованы севәнләрин һамысыны, Онун ирадәсини јеринә јетирмәјә сон гојмаға тәһрик етсин (2 Коринфлиләрә 4:4). Шејтан үмумдүнја гардашлығымыза даһа чох әзаб чәкдирмәјә ҹан атыр (1 Петер 5:9). Әлбәттә, демәк олмаз ки, бүтүн проблемләримиздә билаваситә Шејтан ҝүнаһкардыр, лакин о, бизи зәифләтмәк мәгсәдилә, јаранан чәтинликләри өз мәгсәдләриндә истифадә едир.
5 Шејтан вә онун тәләләри нә гәдәр дәһшәтли олса да, биз она галиб ҝәлә биләрик! Биз буна нә үчүн әминик? Она ҝөрә ки, Јеһова Аллаһ бизим уғрумузда мүбаризә апарыр. Аллаһ гајғы ҝөстәриб ки, Онун хидмәтчиләри Иблисин фитнәләриндән хәбәрдар олсунлар (2 Коринфлиләрә 2:11). Аллаһын Кәламы, мәсиһчиләрин башына ҝәлән сынаглардан чох бәһс едир. Мүгәддәс Китабда һәвари Павелин башына ҝәлән һадисә илә әлагәдар “бәдәнимә бир нештәр” ифадәси истифадә олунур. Нә үчүн? Ҝәлин, нәзәрдән кечирәк ҝөрәк, бу сөзү Аллаһын Кәламы неҹә изаһ едир. О заман ҝөрәҹәјик ки, сынаглара таб ҝәтирмәк үчүн Јеһованын көмәјинә јалныз биз еһтијаҹ дујмуруг.
Сынаглар нәјә ҝөрә нештәрә бәнзәјир?
6. Павел “бәдәнимә бир нештәр” дедикдә нәји нәзәрдә тутурду вә бу нештәр нә ола биләрди?
6 Чохсајлы сынаглара таб ҝәтирән Павел, Аллаһдан илһам алараг јазмышдыр: “Бәдәнимә бир нештәр, шејтанын мәләки верилмишдир ки... өјүнмәјим вә мәни јумругласын” (2 Коринфлиләрә 12:7, И-93). Павелин бәдәниндәки нештәр нә иди? Бәдәнин дәринлијинә ишләјән нештәр чох ҝүҹлү әзијјәт верир. Бу метафора, Павелин физики вә ја емосионал, јахуд да, ола билсин, һәр ики ҹәһәтдән әзијјәт чәкдијини анламаға көмәк едир. Бәлкә дә Павел ҝөз хәстәлијиндән вә ја һәр һансы башга физики зәифликдән әзијјәт чәкирди. Јахуд да, ола билсин, бу нештәр, Павелин бир һәвари, тәблиғчи вә мүәллим кими нүфузуну шүбһә алтына алан инсанлар иди (2 Коринфлиләрә 10:10-12; 11:5, 6, 13). Бу нештәр һәр нә олса да, ону арадан галдырмаг мүмкүн дејилди вә Павел буна таб ҝәтирмәлијди.
7, 8. а) “Јумругламаг” ифадәси һансы мә’наны верир? б) Бу ҝүн бизи нараһат едән нештәрләрлә мүбаризә апармаг нәјә ҝөрә олдугҹа ваҹибдир?
7 Нештәрин Павели һәмишә “јумругладығына” диггәт јетирин. Мараглыдыр ки, Павелин истифадә етдији јунан фе’ли “бармаг сүмүкләри” сөзүндән әмәлә ҝәлир. Бу сөз Матта 26:67 ајәсиндә һәрфи мә’нада, 1 Коринфлиләрә 4:11 ајәсиндә исә мәҹази мә’нада истифадә олунур. Бу ајәләрдә “јумругламаг” мә’насы верилир. Шејтан бүтүн варлығы илә Јеһова вә Онун хидмәтчиләринә нифрәт етдији үчүн, Аллаһын бу дүшмәни нештәрин Павели јумругладығына чох шад олурду. Бу ҝүн дә биз, бәдәндәки нештәр үзүндән әзијјәт чәкәндә Шејтан шадланыр.
8 Бу сәбәбдән, Павел кими биз дә нештәрин өһдәсиндән неҹә ҝәләҹәјимизи билмәлијик. Һәјатымыз бундан асылыдыр! Унутмајын: Јеһова истәјир ки, биз Онун, инсанлара һеч бир шејин әзаб вермәјәҹәји јени дүнјасында әбәдијјән јашајаг. Бу ҝөзәл мүкафаты әлдә етмәјимизә көмәк олсун дејә, Аллаһ өз Кәламы олан Мүгәддәс Китабын васитәсилә чохлу нүмунәләр вермәклә ҝөстәрир ки, Онун садиг хидмәтчиләри бәдәнләриндәки нештәрләрин вердији изтираблара мүвәффәгијјәтлә таб ҝәтирә биләрләр. Бу инсанлар да бизим кими садә, гејри-камил олмушлар. Бөјүк “шаһидләр булуду” арасында мөвҹуд олан бу ҹүр нүмунәләр, “гаршымыза гојулан јарышда мәтанәтлә гачмаға” көмәк едәҹәк (Ибраниләрә 12:1). Онларын таб ҝәтирдији сынаглар үзәриндә дүшүнмәк, Шејтан тәрәфиндән бизә гаршы истифадә олунан бәдәндәки һәр һансы нештәрә бизим дә дөзәҹәјимизә әминлијимизи мөһкәмләдир.
Мефибошетә изтираб верән нештәрләр
9, 10. а) Мефибошет бәдәнинә нештәр олан бәлаја неҹә дүчар олду? б) Давуд падшаһ Мефибошетә неҹә мәрһәмәт ҝөстәрди вә биз Давуду неҹә тәглид едә биләрик?
9 Давудун досту Јонатанын оғлу Мефибошети хатырлајаг. Мефибошет беш јашында икән атасы Јонатанын вә бабасы Саулун өлүм хәбәри ҝәлди. Мефибошетин дајәси тәлаш ичиндә “ону алыб гачды; вә гачмаг үчүн тәләсдијиндән ушаг дүшүб топал олду” (2 Самуел 4:4). Шикәст олдугдан сонра Мефибошет, јәгин ки, ушаглыгдан бәдәниндәки нештәр уҹбатындан чохлу изтираб чәкмишдир.
10 Бир нәчә илдән сонра Давуд падшаһ, Јонатана бәсләдији дәрин мәһәббәт сајәсиндә Мефибошетә лүтф ҝөстәрди. Давуд, Саула мәхсус олан бүтүн торпаг вә мүлкү Мефибошетә гајтарды вә Саулун гулу Тсибаны торпаға бахмаға тә’јин етди. Давуд, һәмчинин Мефибошетә деди: “Сән даима мәним сүфрәмдә чөрәк јејәҹәксән” (2 Самуел 9:6-10). Шүбһәсиз ки, Давудун ҝөстәрдији мәрһәмәт вә хејирхаһлыг Мефибошетә тәсәлли верир, онун физики чатышмазлығы уҹбатындан чәкдији изтирабы бир гәдәр јүнҝүлләшдирирди. Бизим үчүн неҹә дә ҝөзәл дәрсдир! Бәдәндәки нештәрдән изтираб чәкәнләрә биз дә мәрһәмәт ҝөстәрмәлијик.
11. Тсиба Мефибошет һаггында нә сөјләди вә бунун јалан олдуғуну һарадан билирик? (Һашијәјә бахын.)
11 Даһа сонра, Мефибошет бәдәниндәки башга бир нештәрлә мүбаризә апармалы олду. Онун гулу Тсиба, оғлу Абшаломун үсјаны үзүндән Јерусәлимдән гачдығы заман Давудун гаршысында Мефибошетә бөһтан атды. Тсиба, Мефибошетин падшаһлығы әлә кечирмәк мәгсәди илә Давуда хаинлик етдијини вә Јерусәлимдә галдығыны сөјләдиa. Давуд Тсибанын бөһтанына инанараг, Мефибошетин бүтүн малыны һәмин јаланчыја верди! (2 Самуел 16:1-4).
12. Баш верән һадисәјә Мефибошет неҹә мүнасибәт ҝөстәрди вә бизә нәдә ҝөзәл нүмунә верди?
12 Нәһајәт, Мефибошет Давудла растлашан заман һәгигәти она данышды. Мефибошет Давуда гошулмаға һазырлашаркән, Тсиба ону алдатмыш вә әвәзинә өзү ҝетмишди. Давуд әдаләти бәрпа етдими? Гисмән. О, торпағы вә мүлкү ики адам арасында бөлдү. Бу, Мефибошет үчүн даһа бир нештәр ола биләрди. О, чохму мә’јус олду? Белә гәрарын әдаләтсиз олдуғуну ирәли сүрәрәк, Давуда гаршы е’тираз етдими? Хејр, о, падшаһын истәјиндән тәвазөкарлыгла разы галды. О, Исраилин гануни падшаһынын хиласына севинәрәк, һадисәнин мүсбәт ҹәһәтләринә диггәт јетирди. Мефибошет, хәстәлијә, бөһтана вә мә’јуслуға таб ҝәтирмәкдә бизә ҝөзәл нүмунә вермишдир (2 Самуел 19:24-30).
Неһемја сынаглара таб ҝәтирди
13, 14. Неһемја, Јерусәлимин диварларыны бәрпа етмәјә гајыданда һансы нештәрләрә таб ҝәтирмәли олду?
13 Ерамыздан әввәл В әсрдә Јерусәлимә гајыдыб, онун дағылмыш диварларыны ҝөрән Неһемјанын мәҹази нештәрини тәсәввүр един. О, шәһәрин там мүдафиәсиз һалда, ораја гајыдан јәһудиләр исә тәлаш ичиндә, үстәлик дә гејри-мүтәшәккил вә Јеһованын ҝөзүндә натәмиз олдуғуну ҝөрдү. Артаксеркс падшаһын Јерусәлим диварларынын бәрпасы үчүн фәрман вермәсинә бахмајараг, Неһемја, бир аз кечмәдән гоншу әразиләрин һөкмдарларынын бу фәрмана һәр ҹүр гаршы чыхдыгларыны ҝөрдү. “Исраил оғулларынын јахшылығыны арамаг үчүн бир адамын ҝәлмиш олмасы онлара бөјүк дәрд олду” (Неһемја 2:10).
14 Бу әҹнәби дүшмәнләр Неһемјанын башладығы иши дајандырмаг үчүн әлләриндән ҝәләни едирдиләр. Онларын тәһдидләри, јаланлары, бөһтанлары, һәдә-горху ҝәлмәләри, һәмчинин онун ҹәсарәтини сындырмаг үчүн ҝөндәрилән ҹасусларын фитнәләри, Неһемјанын бәдәнинә нештәр кими тә’сир ҝөстәрирди. О, дүшмәнләрин һијләсинин тә’сири алтына дүшдүмү? Хејр! О, бүтүнлүклә Јеһоваја бел бағлады вә зәифләмәди. Нәһајәт Јерусәлимин диварлары бәрпа олунду вә бу, Јеһованын Неһемјаја мәһәббәтлә дајаг дурдуғуна ҝүҹлү шәһадәт олду (Неһемја 4:1-12; 6:1-19).
15. Јәһудиләр арасында мөвҹуд олан һансы проблемләр Неһемјаны чох нараһат едирди?
15 Јәһудиләрин рәиси кими Неһемја Аллаһын халгы арасында бир чох проблемләрлә гаршылашмалы олду. Бу чәтинликләр, Исраил халгынын Аллаһла олан мүнасибәтини поздуғу үчүн, Неһемјаја дәрин јара вуран нештәрләрә бәнзәјирди. Варлылар халгдан јүксәк фаизләр алыр, онларын јохсул гардашлары исә борҹларыны гајтармаг вә фарслара верҝиләр өдәмәк үчүн торпагларындан мәһрум олур, һәтта өз ушагларыны гул кими сатмаг мәҹбуријјәтиндә галырдылар (Неһемја 5:1-10). Јәһудиләрин бир чоху шәнбәјә риајәт етмир, левилиләрә вә мә’бәдин ишләринә мадди ҹәһәтдән көмәк ҝөстәрмирдиләр. Бундан башга, онлардан бә’зиләри “Ашдодлу вә Аммони вә Моаблы арвадлар алмышлар”. Бу ҹүр давранышлар, Неһемјаны неҹә дә кәдәрләндирирди! Лакин бу нештәрләрин һеч бири ону руһдан сала билмәди. О, һәр дәфә Аллаһын әдаләтли ганунларыны мүдафиә едирди. Ҝәлин, Неһемја кими биз дә, башгаларынын сахта давранышынын бизи Јеһоваја сәдагәтлә хидмәт етмәкдән узаглашдырмасына һеч заман јол вермәјәк! (Неһемја 13:10-13, 23-27).
Бир чохлары бәдәнләриндәки нештәрә таб ҝәтирмишләр
16-18. Исһаг илә Ривга, Һанна, Давуд вә Һошеа аилә һәјатларында һансы фаҹиәләрә таб ҝәтирмәли олмушлар?
16 Бәдәндәки нештәр кими изтираб верән вәзијјәтләрә инсанларын неҹә таб ҝәтирмәсинә даир Мүгәддәс Китабда чохлу нүмунәләр вар. Бу ҹүр сынаглара ән чох аиләдәки проблемләр сәбәб олур. Есавын ики арвады онун валидејнләри “Исһага вә Ривгаја үрәк аҹысы олдулар”. Ривга, һәтта белә демишдир: “Һетли гызларын әлиндән һәјатымдан бездим” (Јарадылыш 26:34, 35; 27:46, МКШ). Һаннаны вә сонсуз олдуғуна ҝөрә “ону гәзәбләндирән” рәгиби Пениннаны да хатырлајын. Јәгин ки, Һанна бу ҹүр һүҹумлара онлар евдә тәк оланда даһа тез-тез мә’руз галырды. Пенинна башгаларынын јанында да Һаннаны кәдәрләндирирди. Ола билсин ки, Пенинна аилә Шилоја бајрама ҝедән заман гоһум вә достларын јанында да бу ҹүр давранырды. О заман нештәр Һаннанын бәдәнинә даһа дәрин санҹылырды (1 Самуел 1:4-7).
17 Һәсәдә мүбтәла олан Саул падшаһ Давуду тә’гиб етдији заман онун нәләрә таб ҝәтирдијини хатырлајаг. Һәјатыны хилас етмәк үчүн, Давуд Ен-ҝеди сәһрасындакы мағараларда јашамаг, сылдырым гајалара дырмашмаг вә енсиз ҹығырлары кечмәк мәҹбуријјәтиндә галмышды. Әдаләтсизлик ону, јәгин ки, сыхышдырырды, ахы о, Саула һеч бир пислик етмәмишди. Буна бахмајараг, Давуд, Саулун һәсәди уҹбатындан илләрлә ҝизләнмәли олмушду (1 Самуел 24:14, 15; Сүлејманын мәсәлләри 27:4).
18 Пејғәмбәр Һошеанын аилә һәјатында таб ҝәтирдији фаҹиәни тәсәввүр един. Онун арвады зина етмишди. Арвадынын әхлагсызлығы һәр һалда Һошеанын үрәјинә санҹылан нештәр кими иди. Әхлагсызлығы нәтиҹәсиндә арвады гејри-гануни ики ушаг доғанда, Һошеанын изтирабы, јәгин ки, даһа да артды! (Һошеа 1:2-9).
19. Пејғәмбәр Микаја һансы тә’гибләрә таб ҝәтирди?
19 Тә’гибләр дә бәдәнә нештәр ола биләр. Микаја пејғәмбәрин башына ҝәлән әһвалаты нәзәрдән кечирәк. Падшаһ Аһабын әтрафына јаланчы пејғәмбәрләри топламасы вә онларын мәнфур јаланларына инанмасы әдаләти севән Микајаја әзаб верирди. Микаја Аһаба һәмин пејғәмбәрләрин дилиндә “јаланчы бир руһ” олдуғуну дедикдә, јаланчы пејғәмбәрләрин башчысы нә етди? О, “Микајанын јанағына вурду”! Јеһованын Рамот-ҝилеады гајтармаг мүмкүн олмадығыны әввәлҹәдән сөјләмәсинә Аһабын ҝөстәрдији мүнасибәт даһа дәһшәтли иди. Аһаб әмр етди ки, Микајаны зиндана атсынлар вә чох аз јемәк версинләр (1 Краллар 22:6, 9, 15-17, 23-28). Һәмчинин, Јеремјаны вә онун таб ҝәтирдији гәддарлыглары да хатырлајын (Јеремја 20:1-9).
20. Наоми һансы нештәрә таб ҝәтирди вә неҹә мүкафатландырылды?
20 Јахын адамларын өлүмү дә бәдәнә нештәр кими санҹыла билән башга бир аҹынаҹаглы вәзијјәтдир. Наоми әринин вә ики оғлунун иткисинә дөзмәли олмушдур. Бу кәдәрин аҹысыны чәкән Наоми Бејтлеһемә гајытды. Достларындан артыг ону Наоми дејил, башына ҝәләнләрин нә гәдәр аҹы олдуғуну ҝөстәрән Мара ады илә чағырмағы хаһиш етди. Сарсылмаз галдығына ҝөрә, нәтиҹәдә Јеһова Наомини Мәсиһин улу валидејни олаҹаг өвладла мүкафатландырды (Рут 1:3-5, 19-21; 4:13-17; Матта 1:1, 5).
21, 22. Ејуб һансы бәдбәхтликләрлә гаршылашды вә бунлара неҹә мүнасибәт ҝөстәрди?
21 Он әзиз ушағынын ҝөзләнилмәз өлүмүнүн Ејуба неҹә зәрбә вурдуғу һагда дүшүнүн. Үстәлик о, сүрүләриндән вә гулларындан да мәһрум олду. Санки бир ан ичиндә Ејуб һәр шеји итирди. Һәлә Ејуб бу зәрбәләрдән өзүнә ҝәлмәмишди ки, Шејтан она хәстәлик верди. Јәгин Ејуб, бу хәстәликдән өләҹәјини дүшүнүрдү. Ағрылар о гәдәр дөзүлмәз иди ки, изтираблардан гуртулуш кими өлүмү ҝөзләјирди (Ејуб 1:13-20; 2:7, 8).
22 Бүтүн бунлар аз имиш кими, онун арвады гүссә вә кәдәр ичиндә она јахынлашыб деди: “Аллаһа лә’нәт ет вә өл!” Ејуб үчүн бу сөзләр аҹы нештәр кими иди! Үстәлик үч досту тәсәлли вермәк әвәзинә, ону ријакарлыгла иттиһам етдиләр. Онларын фикринҹә Ејуб ҝизлиндә ишләтдији ҝүнаһлара ҝөрә әзаб чәкирди. Онларын бу ҹүр сәһв дүшүнҹә тәрзи Ејубун бәдәнинә нештәри даһа дәрин санҹырды. Һәмчинин, унутмајаг ки, Ејуб бу бәдбәхтликләрин нәјә ҝөрә баш вердијини вә ахырда сағ галаҹағыны билмирди. Лакин “бу ишин һамысында Ејуб суч ишләмәди вә Аллаһа ујғунсузлуг јүкләмәди” (Ејуб 1:22; 2:9, 10; 3:3; 14:13; 30:17). Ејуб ҝөзләнилмәдән чохсајлы нештәрләрин аҹысына мә’руз галса да, Аллаһа олан сәдагәтини горуду. Бу бизи неҹә дә руһландырыр!
23. Бу мәгаләдә һаггында бәһс олунан Аллаһа садиг инсанлар бәдәнләринә нештәр кими санҹылан бүтүн сынаглара нә үчүн таб ҝәтирә билмишләр?
23 Бурада верилән нүмунәләрлә Аллаһын хидмәтчиләринин таб ҝәтирдикләри сынагларын һамысы ҝөстәрилмир. Мүгәддәс Китабда даһа чох нүмунәләр тапмаг олар. Аллаһа садиг инсанларын һамысы бәдәнләриндә нештәрә таб ҝәтирмәли олмушлар. Онлар мүхтәлиф чәтинликләрлә гаршылашмышлар. Буна бахмајараг, онлары бир шеј бирләшдирир: онларын һеч бири Јеһоваја етдикләри хидмәтә сон гојмадылар. Һәјатын чәтинликләринә бахмајараг, Јеһованын вердији гүввә сајәсиндә Шејтана галиб ҝәлдиләр. Онлар буна неҹә таб ҝәтирдиләр? Нөвбәти мәгалә бу суала ҹаваб верәҹәк вә бәдәнимизә нештәр кими санҹылан бүтүн сынаглара неҹә таб ҝәтирә биләҹәјимизи ҝөстәрәҹәк.
[Һашијә]
a Бу ҹүр шөһрәтпәрәстлик планы, јахшылығын гәдрини билән вә тәвазөкар олан Мефибошетә хас дејилди. Шүбһәсиз ки, о, атасы Јонатанын тәмиз ад газандығыны вә Саулун оғлу олса да, Јеһованын Давуду Исраилә падшаһ сечдијини гәбул етдијини билирди (1 Самуел 20:12-17). Аллаһдан горхан вә Давуд падшаһын садиг досту олан Мефибошетин атасы Јонатан ҝәнҹ оғлуна падшаһлығы әлә кечирмәји өјрәтмәзди.
Сиз неҹә ҹаваб верәрдиниз?
• Гаршылашдығымыз чәтинликләри нә үчүн бәдәнә санҹылан нештәрлә мүгајисә етмәк олар?
• Мефибошет вә Неһемјанын таб ҝәтирмәли олдуглары нештәрләрдән бә’зиләри һансылардыр?
• Бәдәнләриндәки мүхтәлиф нештәрләрә таб ҝәтирмәли олан киши вә гадынларла әлагәдар Мүгәддәс Јазыларда бәһс олунан јухарыдакы нүмунәләрдән һансы сизә хүсусилә тә’сир бағышлады вә нәјә ҝөрә?
[9-ҹу сәһифәдәки шәкилләр]
Мефибошет хәстәлијә, бөһтана вә мә’јуслуға бахмајараг таб ҝәтирди.
[10-ҹу сәһифәдәки шәкил]
Неһемја дүшмәнләрин һүҹумуна сарсылмазлыгла таб ҝәтирди.