Аллаһ Кәламынын мүәллимләри кими там тәҹһиз едилибләр
“Бизим габилијјәтимиз Аллаһдандыр” (2 КОРИНФЛИЛӘРӘ 3:5, 6).
1, 2. Тәблиғ фәалијјәти үчүн вахташыры һансы ҹәһдләр ҝөстәрилир, лакин нәјә ҝөрә адәтән онлар боша чыхыр?
ЈЕРИНӘ јетирмәк үчүн һеч бир һазырлығыныз олмајан иши сизә тапшырсајдылар, өзүнүзү неҹә һисс едәрдиниз? Тәсәввүр един: гаршынызда сизә лазым олан һәр бир материал вә аләтләр вар, амма сиз нә едәҹәјинизи вә неҹә едәҹәјинизи билмирсиниз. Ишин тә’ҹили олдуғуну вә инсанларын сизә бел бағладығыны билмәк вәзијјәти даһа да ҝәрҝинләшдирир. Неҹә дә үмидсиз һалдыр!
2 Христиан дүнјасынын килсә нүмајәндәләри мәһз бу ҹүр проблемлә гаршылашырлар. Онлар вахташыры хүсуси груплар тәшкил едир, евдән-евә тәблиғ етмәјә чалышырлар. Адәтән бу ҹүр ҹәһдләр боша чыхыр, чүнки бир һәфтәдән вә ја бир ајдан сонра тәблиғчиләрин һәвәси сојујур. Нәјә ҝөрә? Христиан дүнјасында инсанлары бу ишә һазырламырлар. Өзүнүн дүнјәви вә дини тәһсилләринә бахмајараг, һәтта руһаниләр дә тәблиғ ишинә һазыр дејилләр. Бу, нәјә ҝөрә беләдир?
3. Һансы сөз 2 Коринфлиләрә 3:5, 6 ајәләриндә үч дәфә истифадә олунур вә бу сөз һансы мә’насы дашыјыр?
3 Аллаһын Кәламында инсаны хош хәбәрин һәгиги тәблиғчиси едән сәбәб изаһ едилир. Һәвари Павел јазырды: “Она ҝөрә јох ки, бир шеји өз мүвәффәгијјәтимизмиш кими дүшүнмәјә өзүмүздә габилијјәт вардыр; јох, бизим габилијјәтимиз Аллаһдандыр. О бизи... хидмәткарлары олмаға габил етди” (2 Коринфлиләрә 3:5, 6). Бурада үч дәфә истифадә олунан “габилијјәт” сөзүнә диггәт јетирин. Бу нә демәкдир? Вајнын лүғәтиндә гејд едилир: “Сөһбәт әшјалардан ҝедәндә [јунан сөзү олан габилијјәт] “кифајәт”... инсанлардан ҝедәндә исә “ихтисаслы”, “лајигли” мә’насыны верир” (“Vine’s Expository Dictionary of Biblical Words”). Беләликлә, әҝәр ким исә һәр һансы иши ҝөрмәк габилијјәтинә маликдирсә, бу о демәкдир ки, һәмин адамын бу мәсәләдә сәриштәси вар вә һәвалә олунан иши јеринә јетирмәјә лајигдир. Бәли, хош хәбәри тәблиғ едәнләр бу иши јеринә јетирмәјә там габилијјәтлидирләр. Онлар бу ишә тәҹһиз едилибләр, Аллаһа хидмәт етмәк габилијјәтләри вар вә Онун Кәламыны тәблиғ етмәјә лајигдирләр.
4. а) Павелин нүмунәсиндән неҹә ҝөрүнүр ки, мәсиһчи хидмәти үчүн јалныз сечилмишләр тә’јин едилмир? б) Бизи хидмәтчиләри кими тәҹһиз етмәк үчүн Јеһова һансы үч үсулдан истифадә едир?
4 Инсанлар нәјин сајәсиндә тәҹһиз едилмиш, габилијјәтли тәблиғчи олурлар? Исте’дадлары сајәсиндәми? Јахуд нүфузлу тәһсил оҹагларында тәһсил алдыгларына ҝөрәми? Һәвари Павел бүтүн бунлара малик иди (Һәвариләрин ишләри 22:3; Филипилиләрә 3:4, 5). Лакин Павел тәвазөкарлыгла е’тираф едирди ки, онун Аллаһа хидмәт етмәк һүгугуну нүфузлу тәһсил оҹаглары дејил, Јеһова Аллаһын өзү вериб. Јалныз сечилмишләрми Аллаһа хидмәт үчүн тә’јин едилир? Павел Коринфдәки јығынҹаға јазырды: “Она ҝөрә јох ки... өзүмүздә габилијјәт вардыр”. Бу, ајдынҹа ҝөстәрир ки, һәвалә олунмуш иши јеринә јетирмәләри үчүн, Јеһова бүтүн садиг хидмәтчиләринин габилијјәтли вә баҹарыглы олмаларынын гејдинә галыр. Јеһова бу ҝүн Исанын һәгиги давамчыларыны неҹә тәҹһиз едир? Ҝәлин, Јеһованын истифадә етдији үч үсулу нәзәрдән кечирәк, бунлар Онун: 1) Кәламы, 2) мүгәддәс руһу вә 3) јер үзүндәки тәшкилатыдыр.
Јеһованын Кәламы бизи габилијјәтли едир
5, 6. Мүгәддәс Јазылар Исанын һәгиги давамчыларына неҹә тә’сир ҝөстәрир?
5 Биринҹиси, Аллаһын Кәламы габилијјәтли хидмәтчи олмагда бизә неҹә көмәк едир? Павел јазырды: “Һәр Мүгәддәс Јазы Аллаһдан илһам алмыш вә тә’лим, тәкзиб, ислаһ, салеһлик тәрбијәси үчүн фајдалыдыр ки, Аллаһ бәндәси камил [“һәр шејдә тәҹрүбәли”, ЈД] олуб һәр ҹүр хејирли иш үчүн тәҹһиз едилсин” (2 Тимотејә 3:16, 17). Беләликлә, Мүгәддәс Јазылар бизә һәр шејдә тәҹрүбәли олмаға вә “һәр ҹүр хејирли ишә” - Аллаһын Кәламыны инсанлара өјрәтмәјә тәҹһиз едир. Бәс Христиан дүнјасы килсәләринин тәрәфдарлары һаггында нә демәк олар? Ахы Мүгәддәс Китаб онларда да вар? Неҹә олур ки, ејни китаб бә’зи инсанлара Аллаһа хидмәт үчүн һәр шејдә тәҹрүбәли олмаға көмәк едир, диҝәрләринә исә јох? Проблем, Мүгәддәс Китаба олан мүнасибәтимиздә өз әксини тапыр.
6 Тәәссүфләр олсун ки, бу ҝүн килсәләри зијарәт едәнләрин әксәријјәти Мүгәддәс Китабын хәбәрини “әслиндә олдуғу кими, Аллаһын кәламы олараг” гәбул етмирләр (1 Салониклиләрә 2:13). Христиан дүнјасы бу саһәдә һәсәд апарыласы нүфуза малик дејил. Демәк олармы ки, узун илләр илаһијјат семинаријаларында алдыглары тәһсилин сајәсиндә руһаниләр Аллаһ Кәламынын мүәллимләри олмаға тәҹһиз едилибләр? Әлбәттә, јох. Илаһијјат семинаријаларында тәһсил аланларын бә’зиләри әввәлләр Мүгәддәс Китаба е’тибар етмиш, лакин тәһсилләрини битирдикдән сонра она шүбһә илә јанашмаға башламышлар. Буна ҝөрә дә, артыг онлардан бир чохларынын инанмадығы Аллаһын Кәламыны тәблиғ етмәк әвәзинә, онлар өз гүввәләрини башга саһәләрә јөнәлдирләр, мәсәлән, сијаси мүбаһисәләрдә иштирак едир, “иҹтимаи инҹили” тәблиғ едир, јә’ни тәблиғләрини инсан фәлсәфәләринә әсасландырырлар (2 Тимотејә 4:3). Онлардан фәргли олараг, мәсиһчиләр Иса Мәсиһин нүмунәсини тәглид едирләр.
7, 8. О вахтын дин рәһбәрләриндән фәргли олараг, Иса Мәсиһ Аллаһын Кәламына неҹә мүнасибәт бәсләјирди?
7 Иса Мәсиһ јол вермирди ки, о дөврүн дин рәһбәрләри онун дүшүнҹәсинә тә’сир етсинләр. О, кичик група, мәсәлән, һәвариләринә, јахуд да чохлу инсанлара тә’лим вермәсиндән асылы олмајараг, һәмишә Мүгәддәс Јазылара әсасланырды (Матта 13:10-17; 15:1-11). Бу, ону һәмин дөврүн дин рәһбәрләриндән фәргләндирирди. Онлар садә инсанлара Аллаһын етдији ишләрин дәринлијини анламагда һәр ҹүр манечиликләр төрәдирдиләр. О заманлар мүәллимләрин әксәријјәти дүшүнүрдүләр ки, Мүгәддәс Китабын бә’зи парчалары о гәдәр дәрин мә’налыдыр ки, ону јалныз ән јахын шаҝирд илә, өзү дә пычылты илә вә башы өртүлү мүзакирә етмәк олар. Һәмин дин рәһбәрләри, Аллаһын адынын тәләффүзүнә мөвһуматла јанашдыглары кими, Мүгәддәс Китабын бә’зи ајәләринин мүзакирәсинә дә ејни мүнасибәти бәсләјирдиләр!
8 Мәсиһ онлар кими дејилди. О, “Аллаһын ағзындан чыхан һәр бир сөз” үзәриндә дүшүнмәјин јалныз сечилмишләр үчүн дејил, һамы үчүн ваҹиб олдуғуну дүшүнүрдү. Мәсиһ идракын ачарыны, тәкҹә сечилмиш һәр һансы илаһијјатчылар групуна вермәк нијјәтиндә дејилди. О, шаҝирдләринә демишди: “Сизә гаранлыгда нә сөјләјирәмсә, ону ајдынлыгда сөјләјин; вә гулағыныза пычылдананы дамлардан тәблиғ един” (Матта 4:4; 10:27). Иса Мәсиһ, Аллаһ һаггындакы билији мүмкүн гәдәр даһа чох инсанларла бөлүшмәјә ҹан атырды.
9. Исанын һәгиги давамчылары Мүгәддәс Китабдан неҹә истифадә едирләр?
9 Вердијимиз тә’лимин әсасыны Аллаһын Кәламы тәшкил етмәлидир. Мәсәлән, әҝәр биз Јеһованын Шаһидләринин Падшаһлыг Залында мә’рузә илә чыхыш едириксә, адәтән Мүгәддәс Китабдан сечилмиш ајәләри јалныз охумаг кифајәт етмир. Онлары изаһ етмәк, әјани мисал ҝәтирмәк вә ајәләри мәтнә ујғунлашдырмаг да ваҹибдир. Мәгсәдимиз, Мүгәддәс Китабын сәһифәләриндәки хәбәри инсанларын үрәјинә чатдырмагдыр (Неһемја 8:8, 12). Мәсләһәт вермәк вә ја ислаһедиҹи ҹәза тәдбири ҝөрмәк лазым ҝәлдикдә дә Мүгәддәс Китабдан истифадә етмәк лазымдыр. Јеһованын халгы ајры-ајры дилләрдә данышмаларындан вә мүхтәлиф мәдәнијјәтләрә мәнсуб олмаларындан асылы олмајараг, онларын һамысы Мүгәддәс Китаба - китаблар Китабына дәрин һөрмәтлә јанашырлар.
10. Мүгәддәс Китабын хәбәри бизә неҹә тә’сир ҝөстәрә биләр?
10 Мүгәддәс Китабда јазылан хәбәрләрә лазыми һөрмәтлә јанашыларса, онун ҝүҹүнүн бөјүклүјү ајдын олаҹаг (Ибраниләрә 4:12). О, инсанлары һәјатларыны дәјишиклик етмәјә, мәсәлән, Аллаһын мүһакимә етдији: никаһа гәдәрки ҹинси әлагәјә, зинаја, бүтпәрәстлијә, сәрхошлуг вә оғурлуг кими вәрдишләрә сон гојмаға тәшвиг едир. Мүгәддәс Китаб чохсајлы инсанлара көһнә мәнлији атыб, јени мәнлији ҝејмәјә көмәк етмишдир (Ефеслиләрә 4:20-24). Бәли, әҝәр биз Мүгәддәс Китабы һәр һансы инсан фикирләри вә ән’әнәләриндән үстүн тутур, һәмчинин онун принсипләринә садиг галырыгса, о бизә һәр шејдә тәҹрүбәли вә Аллаһын Кәламынын мүәллимләри кими јахшы тәҹһиз олмағымыза көмәк едәҹәкдир.
Јеһованын руһу бизи габилијјәтли едир
11. Јеһованын мүгәддәс руһу нәјә ҝөрә һаглы олараг јардымчы адланыб?
11 Бундан әлавә, ҝәлин, Аллаһ Кәламынын мүәллимләринин тәҹһиз едилмәсиндә мүгәддәс руһун, јә’ни Аллаһын фәал гүввәсинин ојнадығы ролу нәзәрдән кечирәк. Һеч заман унутмајаг ки, Јеһованын мүгәддәс руһундан ҝүҹлү гүввә мөвҹуд дејил. Јарадан севимли Оғлуна сәлаһијјәт вермишдир ки, бу әзәмәтли гүввәни мәсиһчиләрин хејринә истифадә етсин. Иса Мәсиһ һаглы олараг мүгәддәс руһу јардымчы адландырды (Јәһја 16:7, И-93). Мәсиһ давамчыларыны Јеһовадан мүгәддәс руһун көмәјини истәмәјә тәшвиг едир вә онлары әмин едирди ки, Аллаһ бу көмәји бол-бол верәҹәк (Лука 11:10-13; Јагуб 1:17).
12, 13. а) Мүгәддәс руһун хидмәтдә көмәк етмәси үчүн дуа етмәјимиз нәјә ҝөрә ваҹибдир? б) Фәрисејләр мүгәддәс руһун онларда фәалијјәт ҝөстәрмәдијини неҹә ҝөстәрирдиләр?
12 Хүсусилә дә хидмәтимиздә бизә лазыми көмәји тәгдим едән мүгәддәс руһ һаггында һәр ҝүн дуа етмәлијик. Аллаһын бу фәал гүввәси бизә неҹә тә’сир ҝөстәрә биләр? О, үрәјимизә вә әглимизә тә’сир едәрәк, дәјишилмәмизә, руһән бөјүмәмизә вә јени мәнлик ҝејмәмизә көмәк едир (Колослулара 3:9, 10). Мүгәддәс руһ Мәсиһин ҝөстәрдији гијмәтли кејфијјәтләри инкишаф етдирмәјимизә көмәк едир. Чохларымыз Галатијалылара 5-ҹи фәслин 22, 23 ајәләрини әзбәр билирик. Бу ајәләрдә Аллаһын руһунун сәмәрәләри садаланыр. Биринҹи јердә мәһәббәтдир. Мәһәббәт олмадан Аллаһа хидмәт етмәк мүмкүн дејил. Нәјә ҝөрә?
13 Мәһәббәт һәрәкәтвериҹи бөјүк гүввәдир. Јеһоваја вә јахынларына олан мәһәббәт мәсиһчиләри тәшвиг едир ки, хош хәбәри инсанларла бөлүшсүнләр (Марк 12:28-31). Бу ҹүр мәһәббәтә малик олмадан, Аллаһын Кәламынын габилијјәтли мүәллимләри олмаг мүмкүн дејил. Иса Мәсиһин фәрисејләрдән неҹә фәргләндијинә диггәт јетирин. Матта 9:36 ајәсиндә Иса һаггында дејилир: “Издиһамы ҝөрдүкдә Исанын онлара јазығы ҝәлди; чүнки чобансыз гојунлар кими тагәтсиз вә дағыныг идиләр”. Бәс садә халга фәрисејләр нәҹә јанашырдылар? Онлар дејирдиләр: “Мүгәддәс Ганундан бихәбәр олан бу халг исә мәл’ундур” (Јәһја 7:49). Фәрисејләр халгы севмир, онлара тамамилә нифрәт бәсләјирдиләр. Ајдындыр ки, фәрисејләр мүгәддәс руһун онларда фәалијјәт ҝөстәрмәсинә јол вермирдиләр.
14. Тәблиғ ишиндә Исанын мәһәббәт ҝөстәрмәси бизи нәјә тәшвиг етмәлидир?
14 Иса инсанлара аҹыјырды. Онларын әзаб чәкдикләриндән хәбәрдар иди. Чобансыз гојунлар кими мә’јус, тагәтсиз вә дағыныг олдугларыны билирди. Јәһја 2:25 ајәсиндә дејилир ки, Иса “инсанын ичиндә нә олдуғуну Өзү билирди”. Иса, һәр шејин јарадылышында Јеһованын јанында “маһир уста” олмагла, инсан тәбиәтини дәрин анлајырды (Сүлејманын мәсәлләри 8:30, ЈД, 31). Бу анлајыш Исанын мәһәббәтини даһа да ҝүҹләндирирди. Гој бу ҹүр мәһәббәт тәблиғ фәалијјәтимиздә һәмишә һәрәкәтвериҹи гүввә олсун! Әҝәр бу саһәдә јахшылашмағын лазым олдуғуну һисс едириксә, ҝәлин, мүгәддәс руһу тәгдим етмәси үчүн Јеһоваја дуа едәк вә дуамыза ујғун давранаг. Јеһова дуаларымызы һөкмән ешидәҹәк. Хош хәбәрин тәблиғиндә ән бөјүк баҹарыға малик олан Мәсиһә даһа чох бәнзәмәјимизә көмәк етмәк үчүн, Аллаһ бизә өзүнүн дәфедилмәз гүввәсини ҝөндәрәҹәк.
15. Ишаја 61:1-3 ајәләри Исаја неҹә тәтбиг олунур вә ејни заманда һәмин ајәләр дин алимиләри вә фәрисејләри неҹә ифша едир?
15 Тәблиғ етмәк үчүн Иса сәлаһијјәти һарадан алмышды? О дејирди: “Рәббин Руһу үзәримдәдир” (Лука 4:17-21). Јеһова мүгәддәс руһунун васитәсилә Исаны өз хидмәтчиси тә’јин етди. Исаја әлавә шәһадәтнамә лазым дејилди. Онун дөврүндә јашајан дин рәһбәрләри мүгәддәс руһла тә’јин едилмишдиләрми? Хејр. Онлар, Исанын уҹадан охујуб, өзүнә тәтбиг етдији Ишаја 61:1-3 ајәләриндәки пејғәмбәрлији иҹра етмәјә тәҹһиз едилмәмишдиләр. Бу ајәләри охујун вә икиүзлү дин алимләринин вә фәрисејләрин бу тәсвирә мүвафиг олмадыгларыны өзүнүз ҝөрәҹәксиниз. Онларын јохсуллара тәблиғ етмәли һеч бир хош хәбәрләри јох иди. Мәһбуслара азадлығы вә корлара ҝөзләринин ачылмасыны неҹә тәблиғ едә биләрдиләр? Руһани мә’нада онларын өзләри кор вә инсан ән’әнәләринә көлә идиләр! Онлардан фәргли олараг, биз инсанлара тә’лим вермәк үчүн тәҹһиз олунмушуг.
16. Јеһованын Шаһидләри нә үчүн әминдирләр ки, хидмәтдә онлары габилијјәтли едән Аллаһдыр?
16 Әлбәттә, биз Христиан дүнјасынын илаһијјат академијаларында тәһсил алмамышыг. Илаһијјат семинаријасыны битирдијимиз үчүн Аллаһ Кәламынын мүәллимләри олмамышыг. Бу о демәкдирми ки, бу иш үчүн бизим кифајәт гәдәр сәриштәмиз јохдур? Әлбәттә, јох! Јеһованын өзү бизи Шаһидләри олараг тә’јин едир (Ишаја 43:10-12). Әҝәр биз Онун мүгәддәс руһунун көмәји үчүн дуа едир вә дуамыза мүвафиг даваранырыгса, Аллаһын там габилијјәтли хидмәтчиләри олуруг. Әлбәттә, биз гејри-камилик вә даһи Мүәллимимиз Иса Мәсиһин нүмунәсини дәгиглији илә тәглид етмәјә габил дејилик. Лакин Јеһоваја чох миннәтдарыг ки, бизи Кәламынын мүәллимләри олмаг үчүн мүгәддәс руһунун васитәсилә хидмәтә тәҹһиз вә габилијјәтли едир.
Јеһованын тәшкилаты бизи габилијјәтли едир
17-19. Јеһованын тәшкилатынын тәгдим етдији һәфтәлик беш ҝөрүш, Аллаһа хидмәт етмәјә бизи неҹә һазырлајыр?
17 Ҝәлин, бизи өз Кәламынын хидмәтчиси вә мүәллими кими тәҹһиз етмәкдә Јеһованын истифадә етдији үчүнҹү үсулу нәзәрдән кечирәк? Бу, онун јер үзүндәки тәшкилаты, јә’ни мәсиһчиләр јығынҹағыдыр. Бу ҹүр тәҹһиз иши неҹә һәјата кечирилир? Бизә тәгдим олунан тә’лим програмы һаггында дүшүнүн! Һәр һәфтә беш мәсиһчи јығынҹағында иштирак едирик (Ибраниләрә 10:24, 25). Мәсәлән, Јеһованын тәшкилатынын тәгдим етдији һәр һансы нәшрин васитәсилә китабөјрәнмә ҝөрүшләриндә кичик групларла јығылыб, Мүгәддәс Китабы дәриндән тәдгиг едирик. Дејиләнләри динләјиб, суаллара ҹаваб вермәклә бир-биримизи өјрәдир вә руһландырырыг. Һәмчинин, китабөјрәнмә групунун рәһбәри дә бизә шәхсән диггәт ајырыр вә өјрәдир. Ачыг ҝөрүшдә вә “Ҝөзәтчи Гүлләси” журналыны өјрәндијимиз ҝөрүшләрдә дә руһани ҹәһәтдән бол-бол гидаланырыг.
18 Теократик Хидмәт Мәктәбинин мәгсәди - бизи, башгаларына тә’лим вермәјә тәҹһиз етмәкдир. Тәдрис нитги илә чыхыш едәрәк, Аллаһын Кәламы васитәсилә чохсајлы мүхтәлиф суаллара ҹаваб тапмағы өјрәнирик (1 Петер 3:15). Елә олубму ки, мөвзусу сизә тамамилә таныш олан тәдрис нитгиндән өзүнүз үчүн јени ачылыш едәсиниз? Белә һаллар тез-тез баш верир. Мәҝәр һәр һансы бир суалы башгаларына изаһ едәндә билијимизи артырмырыгмы? Һәтта тапшырыгла чыхыш етмәсәк дә, тә’лимвермә баҹарығымызы артыра биләрик. Мәктәбдә охујан, тәдрис нитги илә чыхыш едән һәр шаҝирддән фајдалы бир шеј өјрәнә биләрик.
19 Хидмәти ҝөрүш дә Аллаһ Кәламынын габилијјәтли мүәллимләри олмагда бизә көмәк едир. Һәр һәфтә бу ҝөрүшдә хидмәтимизә аид мараглы мөвзулар, мүзакирә вә сәһнәҹикләр олур. Һансы тәгдимәни истифадә етмәли? Тәблиғдә хүсуси чәтинликләрин өһдәсиндән неҹә ҝәлмәли? Тәблиғ үчүн даһа һансы имканлары нәзәрдән кечирмәјә дәјәр? Тәкрар башчәкмәдә вә Мүгәддәс Китаб өјрәнмәсиндә баҹарыглы мүәллим олмаға нә көмәк едәр? (1 Коринфлиләрә 9:19-22). Бу ҹүр суаллар хидмәти ҝөрүшдә тәфсилаты илә мүзакирә олунур. Бу ваҹиб ишә бизи тәҹһиз етмәк үчүн програмын чох һиссәси “Бизим Падшаһлыг Хидмәтимиз”дә олан мәгаләләрә әсасланыр.
20. Јығынҹаг ҝөрүшләри вә конгресләрдән даһа чох неҹә фајда әлдә едә биләрик?
20 Ҝөрүшләрә һазырлашараг, онларда иштирак едәрәк вә орада өјрәндикләримизи һәјата кечирәрәк, бир мүәллим кими ҝөзәл вәрдишләр инкишаф етдиририк. Лакин һәр шеј бунунла битмир. Бизим даһа бөјүк ҝөрүшләримиз - бизи Аллаһын Кәламынын мүәллимләри кими тәҹһиз етмәк мәгсәди илә кечирилән вилајәт вә рајон конгресләримиз олур. Биз, бу ҝөрүшләри һәмишә сәбирсизликлә ҝөзләјир, програмы диггәтлә динләјир вә верилән мәсләһәтләри тәтбиг едирик (Лука 8:18).
21. Вердијимиз тә’лимин јахшы сәмәрәләр ҝәтирдијини нә сүбут едир вә бу кимин сајәсиндә баш верир?
21 Јеһованын тәгдим етдији тә’лимләр сәмәрә ҝәтирирми? Ҝәлин дәлилләри нәзәрдән кечирәк. Һәр ил јүз минләрлә инсанлар Мүгәддәс Китабын әсас тә’лимләри илә таныш олур вә Аллаһын онлардан тәләб етдикләринә мүвафиг јашамағы өјрәнирләр. Јеһованын Шаһидләринин сајы артыр, лакин бизләрдән һеч ким бунун өз зәһмәти сајәсиндә олдуғуну сөјләјә билмәз. Иса кими, биз дә һәр шејә реал нөгтеји-нәзәрлә бахмалыјыг. О демишдир: “Әҝәр Мәни ҝөндәрән Атам ҹәлб етмирсә, һеч ким Мәним јаныма ҝәлә билмәз”. Узаг кечмишдә јашајан һәвариләр кими, Аллаһын хидмәтчиләри әсасән садә инсанлардыр вә онларын али тәһсилләри јохдур (Јәһја 6:44; Һәвариләрин ишләри 4:13). Мүвәффәгијјәт әлдә етмәјимиз, һәгигәтә тәмиз үрәкли инсанлары ҹәлб едән Јеһовадан асылыдыр. Павел јазырды: “Мән әкдим, Аполлос суварды, амма Аллаһ бөјүтдү” (1 Коринфлиләрә 3:6).
22. Мәсиһчи хидмәтимизи там јеринә јетирмәјә әмин дејиликсә, нәјә ҝөрә руһдан дүшмәмәлијик?
22 Бәли, Јеһова Аллаһ Кәламынын инсанлара өјрәдилмәсиндә бөјүк рол ојнајыр. Ола билсин ки, өзүмүзү һәмишә баҹарыглы мүәллим кими һисс етмирик. Анҹаг инсанлары өзүнә вә Оғлуна ҹәлб едәнин Јеһова олдуғуну унутмајын. Јеһова бизи Кәламы, мүгәддәс руһу вә јер үзүндәки тәшкилаты васитәсилә башгаларына - Онун һаггында һәлә јени өјрәнмәјә башлајанлара хидмәт етмәк үчүн тәҹһиз едир. Ҝәлин, Јеһованын бизә тәгдим етдији һәр шеји тәтбиг едәрәк, Онун тә’лимләринә һәссас јанашаг вә бунунла да Аллаһ Кәламынын мүәллимләри кими там тәҹһиз олунаг!
Сиз неҹә ҹаваб верәрдиниз?
• Мүгәддәс Китаб бизи тәблиғ ишинә неҹә тәҹһиз едир?
• Аллаһын хидмәтчиләри кими тәҹһиз олмағымызда мүгәддәс руһ һансы ролу ојнајыр?
• Јеһованын јер үзүндәки тәшкилаты бизи хош хәбәрин тәблиғинә неҹә тәҹһиз едир?
• Аллаһа әминликлә хидмәт етмәкдә бизә нә көмәк едир?
[19-ҹу сәһифәдәки шәкил]
Инсанлары өјрәтмәклә, Иса онлара мәһәббәт тәзаһүр етдирирди.