Гој Јеһова сәни әсил азадлыға доғру апарсын
«Азадлығын камил ганунуна диггәтлә [бах]» (ЈАГ. 1:25).
ИЗАҺ ЕДӘ БИЛӘРСӘНМИ?
Азадлыға доғру апаран ганун һансыдыр вә бу ганундан кимләр фајдалана биләр?
Әсил азадлығын сирри нәдәдир?
Һәјата апаран јолдан азмајан инсанларын һамысы һансы азадлыға говушаҹаг?
1, 2. а) Бу ҝүн инсанлар нә дәрәҹәдә азаддырлар вә вәзијјәтин бу јерә ҝәлиб чатмасына сәбәб нәдир? б) Јеһованын хидмәтчиләрини ҝәләҹәкдә неҹә азадлыг ҝөзләјир?
БИЗ тамаһкарлығын, ганунсузлуғун вә зоракылығын ҝетдикҹә артдығы бир дөврдә јашајырыг (2 Тим. 3:1—5). Бунун мүгабилиндә дөвләтләр даһа чох ганунлар гәбул едир, полис нәзарәтини даһа да ҝүҹләндирир вә електрон изләмә системләри гурашдырыр. Бәзи өлкәләрдә ајры-ајры вәтәндашлар тәһлүкәсизликләрини тәмин етмәк мәгсәдилә евләринә сигнализасија гојур, әлавә гыфыллар асыр вә һәтта евләринин әтрафындакы һасара електрик ҹәрәјаны гошурлар. Чохлары ахшамлар евдән бајыра чыхмаға горхур. Валидејнләр, ҝүнүн һансы саатындан асылы олмајараг, ушагларыны һәјәтдә ојнајаркән нәзарәтсиз гојмурлар. Ајдын мәсәләдир ки, азадлыг чәрчивәси ҝетдикҹә даралыр вә вәзијјәт бу истигамәтдә инкишаф етмәјә давам едир.
2 Еден бағында Шејтан иддиа етмишди ки, әсил азадлыг Јеһова Аллаһдан мүстәгил олмаг демәкдир. Заман бунун мәнфур вә дәһшәтли јалан олдуғуну тәсдигләди! Һәгигәтән дә, ҹәмијјәтдә Аллаһын әхлаг вә руһани ганунларына һөрмәт азалдыгҹа инсанлар даһа чох әзијјәт чәкирләр. Ҝетдикҹә писләшән вәзијјәт Јеһованын хидмәтчиләри олан бизләрдән дә тәсирсиз өтүшмүр. Бунунла белә, бизим ҝөзәл үмидимиз вар: елә бир ҝүн ҝәләҹәк ки, бәшәријјәт ҝүнаһ вә чүрүклүк көләлијиндән азад олаҹаг вә Мүгәддәс Китабда «Аллаһын өвладларынын шанлы азадлығы» адландырылан азадлыға говушаҹаг (Ром. 8:21). Јеһова артыг Өз хидмәтчиләрини бу азадлыг үчүн һазырламаға башлајыб. О, буну неҹә едир?
3. Јеһова Мәсиһин давамчыларына һансы гануну вериб вә биз бу мәгаләдә һансы суаллары нәзәрдән кечирәҹәјик?
3 Хидмәтчиләрини ҝәләҹәкдә ҝөзләдији азадлыг үчүн һазырламаг мәгсәдилә Јеһова онлара бир ганун вериб. Јагуб ону «азадлығын камил гануну» адландырыб. (Јагуб 1:25 ајәсини оху.) Адәтән, ганун сөзүнү инсанлар азадлыг јох, мәһдудијјәт кими баша дүшүрләр. Бәс онда «азадлығын камил гануну» нәдир? Бу ганун бизи неҹә азад едир?
АЗАДЛЫҒА ГОВУШДУРАН ГАНУН
4. «Азадлығын камил гануну» нәдир вә ондан кимләр јарарланыр?
4 «Азадлығын камил гануну» дејилдикдә, Мусанын гануну нәзәрдә тутулмур, чүнки бу Ганунун мәгсәди ҝүнаһлары ашкар етмәк иди вә о, Мәсиһин үзәриндә јеринә јетди (Мат. 5:17; Галат. 3:19). Бәс онда Јагуб һансы ганун һагда јазырды? Бу, «Мәсиһин [ганунудур]». Һәмин ганун һәм дә «иман тәләб едән [ганун]» вә «азад халгын гануну» адланыр (Галат. 6:2; Ром. 3:27; Јаг. 2:12). Демәли, камил ганун өзүнә Јеһованын биздән тәләб етдији һәр шеји дахил едир. Бу ганундан һәм мәсһ олунмуш мәсиһчиләр, һәм дә башга гојунлар јарарланырлар (Јәһ. 10:16).
5. Нәјә ҝөрә азадлыг гануну ағыр дејил?
5 Бир чох өлкәләрин долашыг вә ағыр ганунларындан фәргли олараг, бу камил ганун садә әмрләрдән вә әсас принсипләрдән ибарәтдир(1 Јәһ. 5:3). Иса бојундуруғунун раһат, јүкүнүн јүнҝүл олдуғуну демишди (Мат. 11:29, 30). Үстәлик, бу камил ганунун узун-узады гадағалар вә ҹәзалар сијаһысына еһтијаҹы јохдур, чүнки онун әсасыны мәһәббәт тәшкил едир вә бу ганун даш лөвһәҹикләр үзәриндә јох, бизим зеһин вә үрәкләримиздә һәкк олунуб. (Ибраниләрә 8:6, 10 ајәләрини оху.)
КАМИЛ ГАНУН БИЗИ НЕҸӘ АЗАД ЕДИР?
6, 7. Јеһованын тәләбләри барәдә нә демәк олар вә азадлыг гануну бизә һансы имканы верир?
6 Јеһованын шүурлу варлыглар үчүн гојдуғу мәһдудијјәтләр онларын рифаһы вә тәһлүкәсизлији үчүндүр. Нүмунә үчүн енержини вә материјаны идарә едән физики ганунлары ҝөтүрәк. Инсанлар бу ганунларын онлар үчүн јүк олдуғундан шикајәт етмирләр. Әксинә, бу ганунлары гијмәтләндирир вә онларын рифаһы үчүн хидмәт етдијини дәрк едирләр. Ејнилә, Мәсиһин камил ганунунда әкс олунан Јеһованын әхлаг вә руһани нормалары да инсанларын хејри үчүндүр.
7 Азадлыг гануну бизи мүдафиә етмәклә јанашы, өзүмүзә зәрәр вурмадан вә башгаларынын азадлыгларыны вә һүгугларыны позмадан бүтүн дүзҝүн арзуларымызы тәмин етмәк имканы верир. Беләликлә, јалныз арзуларымыз дүзҝүн олдуғу тәгдирдә биз истәдијимиз шејләри едә биләрик. Әсил азадлығын сирри дә елә бундадыр. Башга сөзләрлә десәк, биз Јеһованын севдији шејләри севмәли, нифрәт етдији шејләрә нифрәт етмәлијик. Азадлыг гануну бизә мәһз буну етмәјә көмәк едир (Амос 5:15).
8, 9. Азадлыг ганунуна риајәт едәнләр һансы фајданы әлдә едирләр? Нүмунә әсасында изаһ ет.
8 Гејри-камил олдуғумуз үчүн ҝүнаһлы арзуларымызы дәф етмәк чох чәтиндир. Бунунла белә, азадлыг ганунуна сәдагәтлә риајәт едәндә биз һәтта инди мүәјјән мәнада азад ола биләрик. Бир нүмунәјә диггәт јетирәк. Мүгәддәс Китабы тәзәҹә өјрәнмәјә башлајан Ҹеј адлы бир кишинин түтүндән асылылығы вар иди. О, бу вәрдишин Аллаһа мәгбул олмадығыны биләндә гәрар вермәли олду: ҝүнаһлы бәдәнинин истәкләрини тәмин етмәјә давам етсин, јохса Јеһоваја бојун әјсин? Бәдәни никотин тәләб етсә дә, о, мүдрик гәрар верәрәк Јеһоваја хидмәти сечди. Бу пис вәрдишә галиб ҝәлдикдән сонра о, өзүнү неҹә һисс едирди? О демишди: «Мән инанылмаз дәрәҹәдә азад вә хошбәхт идим».
9 Дүнјанын тәклиф етдији азадлыг инсанлары «бәдәнин истәкләри»ни тәмин етмәјә имкан верир. Ҹеј өз тәҹрүбәсиндән ҝөрдү ки, нәтиҹәдә, онлар ҝүнаһын гулуна чеврилирләр. Анҹаг Јеһованын тәклиф етдији азадлыг, јәни «руһани шејләр барәсиндә дүшүнмәк» инсаны азадлыға говушдурмагла јанашы, «һәјат вә сүлһ»ә доғру апарыр (Ром. 8:5, 6). Ҹеј ону көлә һалына салан бу вәрдишин өһдәсиндән ҝәлмәк үчүн ҝүҹү һарадан алмышды? Әлбәттә ки, өзүндән јох, Аллаһдан. О дејир: «Мән Мүгәддәс Китабы мүнтәзәм шәкилдә арашдырырдым, Аллаһдан мүгәддәс руһ диләјирдим вә мәсиһчи јығынҹағынын мәнә севинҹлә тәгдим етдији көмәкдән јарарланырдым». Бүтүн бунлар әсил азадлыг сорағында олан бизләрә дә көмәк едә биләр. Ҝәлин ҝөрәк неҹә.
АЛЛАҺЫН КӘЛАМЫНА ДИГГӘТЛӘ БАХ
10. Аллаһын ганунуна «диггәтлә бахмаг» нә демәкдир?
10 Јагуб 1:25 ајәсиндә охујуруг: «Азадлығын камил ганунуна диггәтлә бахан вә она бағлы галан... өз ишиндә хошбәхт олаҹаг». Бу ајәдә «диггәтлә бахмаг» кими тәрҹүмә олунан јунан сөзү «бахмаг үчүн әјилмәк» мәнасыны дашыјыр, бунун үчүн исә инсандан бүтүн фикрини ҹәмләмәк тәләб олунур. Бәли, әҝәр биз азадлыг ганунунун зеһнимизә вә үрәјимизә тәсир ҝөстәрмәсини истәјириксә, Мүгәддәс Китабы сәјлә арашдырмалы вә дуа едәрәк охудугларымызын үзәриндә дәриндән дүшүнмәлијик (1 Тим. 4:15).
11, 12. а) Иса һәгигәти өз һәјат јолумуз етмәјин ваҹиблијини неҹә ҝөстәрмишди? б) Абзасдакы нүмунәдән ҝөрүндүјү кими, хүсусилә ҝәнҹләр һансы тәһлүкәдән гачмалыдырлар?
11 Лакин ејни заманда биз Аллаһын Кәламына бағлы галмалыјыг, јәни даима ону тәтбиг етмәлијик, онда һәгигәт бизим һәјат јолумуз олаҹаг. Иса она иман ҝәтирән инсанлара нөвбәти сөзләри дејәндә ејни фикри ифадә етмишди: «Әҝәр мәним сөзләрими гәлбиниздә сахласаныз, демәли, сиз, һәгигәтән, мәним шаҝирдләримсиниз. Сиз һәгигәти дәрк едәҹәксиниз вә һәгигәт сизи азад едәҹәк» (Јәһ. 8:31, 32). Бир лүғәтдә гејд олунур ки, «дәрк етмәк» ифадәси бурада һәм дә «гијмәтләндирмәк» мәнасыны верир, чүнки «һәмин мәлумат ону “дәрк едән” үчүн дәјәрли вә ја ваҹибдир». Демәли, һәгигәти өз һәјат јолумуз едәндә ону там мәнада дәрк етмиш олуруг. Онда биз һаглы олараг дејә биләрик ки, Аллаһын сөзү биздә «фәалијјәт ҝөстәрир» вә сәмави Атамызы јахындан тәглид етмәјимиз үчүн шәхсијјәтимизи формалашдырыр (1 Салон. 2:13).
12 Өзүндән соруш: «Доғруданмы, мән һәгигәти дәрк етмишәм? Һәгигәт мәним һәјат јолума чеврилибми? Јахуд мән һәлә дә дүнјанын тәклиф етдији “азадлығын” арзусундајам?» Мәсиһчи аиләсиндә бөјүјән бир баҹы ҝәнҹлик илләрини хатырлајараг јазыр: «Инсан һәгигәтдә бөјүјәндә Јеһова һаггында һәмишә ешидир. Лакин мән Онунла јахын мүнасибәт гурмаг үчүн бу фүрсәтдән һеч вахт јарарланмамышдым. Онун нифрәт етдији шејләрә нифрәт етмәји вәрдиш етмәмишдим. Һеч вахт инанмырдым ки, Онун үчүн бир әһәмијјәт кәсб едирәм. Дара дүшәндә Она мүраҹиәт етмәји өјрәнмәмишдим. Мән һәмишә өз ағлыма ҝүвәнирдим. Инди дәрк едирәм ки, бу, ағылсызлыг имиш, чүнки, әслиндә, һеч нә билмирдим». Хошбәхтликдән, бу баҹы сонрадан дүшүнҹә тәрзинин тамамилә сәһв олдуғуну анлады вә һәјатында көклү дәјишикликләр етди. О һәтта даими пионер кими хидмәт етмәјә башлады.
МҮГӘДДӘС РУҺ СӘНӘ АЗАДЛЫҒА ГОВУШМАҒА КӨМӘК ЕДӘ БИЛӘР
13. Аллаһын мүгәддәс руһу бизә азадлыға говушмаға неҹә көмәк едир?
13 Биз 2 Коринфлиләрә 3:17 ајәсиндә охујуруг: «Јеһованын руһу һарададырса, орада азадлыг вар». Мүгәддәс руһ бизә азадлыға говушмаға неҹә көмәк едир? Диҝәр шејләрлә јанашы, Аллаһын руһу биздә азадлыг үчүн әһәмијјәтли олан «мәһәббәт, севинҹ, сүлһ, сәбир, јахшылыг, хејирхаһлыг, иман, һәлимлик, тәмкин» кими хүсусијјәтләр јетишдирир (Галат. 5:22, 23). Бу хүсусијјәтләр, хүсусилә дә мәһәббәт олмадан һеч бир ҹәмијјәт сөзүн әсил мәнасында азад ола билмәз вә дүнјадакы вәзијјәт буна бир сүбутдур. Мараглыдыр ки, руһун бәһрәсинә дахил олан хүсусијјәтләри садаладыгдан сонра һәвари Павел әлавә етмишди: «Бунлара гаршы ганун јохдур». Бу, нә демәкдир? Руһун сәмәрәсини инкишаф етдирмәјимизә мәһдудијјәт гојан һеч бир ганун мөвҹуд дејил (Галат. 5:18). Белә бир ганунун һеч бир мәнасы олмазды. Јеһова истәјир ки, биз Мәсиһә хас олан бу хүсусијјәтләри әбәдијјәт боју өзүмүздә јетишдирәк вә һеч бир сәдд гојмадан онлары тәзаһүр етдирәк.
14. Дүнја онун руһуна ујан инсанлары көлә һалына неҹә салыр?
14 Дүнјанын руһунун әсарәтиндә олан вә ҝүнаһлы арзуларынын далынҹа дүшән инсанлар азад олдугларыны фикирләшә биләрләр. (2 Петер 2:18, 19 ајәләрини оху.) Лакин реаллыг бунун там әксидир. Онларын нәфсләрини вә азғын давранышларыны нәзарәт алтында сахламаг үчүн һөкумәтләр сајсыз-һесабсыз гајда-ганунлар тәсис етмәк мәҹбуријјәтиндәдир. Павел демишди: «Ганун салеһ адамлар үчүн јох, ганунсуз, итаәтсиз... адамлар үчүн верилиб» (1 Тим. 1:9, 10). Онлар һәмчинин ҝүнаһын көләсидирләр вә амансыз, гәддар аға олан бәдәнләринин арзуларынын далынҹа дүшүрләр (Ефес. 2:1—3). Мүәјјән мәнада белә инсанлар ичиндә бал олан габын үстүнә ҹуман һәшәратлара бәнзәјирләр. Нәфсләринин ардынҹа дүшән бу инсанлар тезликлә тәләјә дүшдүкләрини анлајырлар (Јаг. 1:14, 15).
МӘСИҺЧИ ЈЫҒЫНҸАҒЫНЫН ҺҮДУДЛАРЫ ЧӘРЧИВӘСИНДӘ АЗАДЛЫГ
15, 16. Јығынҹагла үнсијјәт етмәк бизим үчүн нә дәрәҹәдә ваҹибдир вә биз өзүмүзү нә дәрәҹәдә азад һисс едирик?
15 Мәсиһчи јығынҹағы илә үнсијјәт етмәк һәр һансы бир иҹтимаи клубун үзвү олмаг демәк дејил. Әксинә, Јеһова сәни ҹәлб етдији үчүн сән јығынҹагдасан (Јәһ. 6:44). Буну етмәјә Јеһованы нә тәшвиг етмишди? Бәлкә, сән Онун ҝөзүндә салеһ, Ондан горхан бир адам олмусан? «Әсла јох!» — дејә сән етираз едә биләрсән. Бәс онда Аллаһ сәндә нә ҝөрдү? Аллаһ ҝөрдү ки, үрәјин Онун азадлыг ганунуна һај верәҹәк вә Онун мүлајим тәсиринә бојун әјәҹәк. Јығынҹагда Јеһова сәни руһән гидаландырмагла, јалан дини тәлимләрдән вә мөвһуматлардан азад етмәклә, еләҹә дә Мәсиһә хас олан хүсусијјәтләр инкишаф етдирмәји өјрәтмәклә үрәјини мөһкәмләндирди. (Ефеслиләрә 4:22—24 ајәләрини оху.) Бунун сајәсиндә сән сөзүн әсил мәнасында азад олан јеҝанә бир халгын үзвү олмаг шәрәфинә лајиг ҝөрүлдүн (Јаг. 2:12).
16 Мәсәлән, сән Јеһованы бүтүн үрәкдән севән инсанларын әһатәсиндә оланда, горху һисс едирсән? Даима сәксәкә илә әтрафына бојланыб бахырсан? Падшаһлыг залында киминләсә сөһбәт едәркән әшјаларын јоха чыхмасын дејә онлары әлиндә бәрк-бәрк тутурсан? Јох! Сән өзүнү раһат вә азад һисс едирсән. Бәс һәмиманлыларын олмајан башга инсанларын ичиндә өзүнү бу ҹүр һисс едәрдин? Чох ҝүман ки, јох! Үстәлик, һал-һазырда Аллаһын халгынын малик олдуғу азадлыг гаршыда бизи ҝөзләјән даһа мөһтәшәм азадлығы тәсәввүр етмәјә көмәк едир.
«АЛЛАҺЫН ӨВЛАДЛАРЫНЫН» ШАНЛЫ АЗАДЛЫҒЫ
17. Аллаһын оғулларынын мејдана чыхмасы инсанлара азадлыға говушмаға неҹә көмәк едәҹәк?
17 Јеһованын Ҹәннәтдә јашајаҹаг хидмәтчиләри үчүн һазырладығы азадлыг барәдә јазаркән Павел деди: «Бүтүн хилгәт дә бөјүк сәбирсизликлә Аллаһын оғулларынын мејдана чыхаҹағы вахты ҝөзләјир». Сонра о әлавә етди: «Хилгәт чүрүклүк әсарәтиндән гуртулуб Аллаһын өвладларынын шанлы азадлығына говушаҹагдыр» (Ром. 8:19—21). «Хилгәт» јер үзүндә јашамаг үмидинә малик олан инсанлардыр вә Аллаһын руһла мәсһ олунмуш оғуллары мејдана чыханда бу, онлара хејир-дуалар ҝәтирәҹәк. Ҝөјләр һәјатына говушмуш Аллаһын оғуллары нә заман мејдана чыхаҹаглар? Мәсиһә јер үзүнү бүтүн пис инсанлардан тәмизләмәјә вә бөјүк издиһамы јени дүнјаја апармаға көмәк едәҹәкләри вахтда (Вәһј 7:9, 14).
18. Итаәткар инсанларын азадлығы тәдриҹән неҹә артаҹаг вә сонда онлар неҹә азадлыға говушаҹаглар?
18 Бундан сонра инсанлар онлар үчүн тамамилә јени олан азадлығы дадаҹаглар — онлар Шејтанын вә ҹинләрин тәсириндән азад олаҹаглар (Вәһј 20:1—3). Онда өзүмүзү неҹә дә јүнҝүл вә раһат һисс едәҹәјик! Сонра Мәсиһлә бирҝә ҝөјләрдә падшаһ вә каһин кими хидмәт едән 144 000 нәфәр бәшәријјәти азад етмәјә давам едәҹәк: Адәмдән мирас галан ҝүнаһ вә гејри-камиллик там јох олана гәдәр онлар фидјә гурбанлығынын дәјәрини тәдриҹән тәтбиг едәҹәкләр (Вәһј 5:9, 10). Сонунҹу сынагдан садиг чыхан инсанлар Јеһованын онлара вәд етдији камиллијә вә азадлыға — «Аллаһын өвладларынын шанлы азадлығына» говушаҹаглар. Бир тәсәввүр ет, Аллаһын ҝөзүндә дүзҝүн оланы етмәк үчүн сәнә даһа һеч вахт мүбаризә апармаг лазым ҝәлмәјәҹәк, чүнки бәдәнин, үрәјин вә әглин камил олаҹаг вә там дәјишәрәк Аллаһын хүсусијјәтләрини мүкәммәл сурәтдә әкс етдирә биләҹәксән.
19. Әсил азадлыға апаран јолда галмаг үчүн биздән нә тәләб олунур?
19 «Аллаһын өвладларынын шанлы азадлығына» говушаҹағын ҝүнү сәбирсизликлә ҝөзләјирсәнми? Онда јол вер ки, «азадлығын камил [гануну]» бундан сонра да сәнин үрәк вә әглинә тәсир етсин. Бәли, Мүгәддәс Китабы сәјлә арашдыр. Һәгигәтә ујғун јаша, гој һәгигәт сәнин гәлбиндә олсун. Аллаһдан мүгәддәс руһ дилә. Мәсиһчи јығынҹағындан вә Јеһованын бизә вердији руһани гидадан там фајдалан. Јол вермә ки, Шејтан Һәвваны Аллаһын тәләбләринин инсанын әл-голуну бағладығына инандырараг алдатдығы кими, сәни дә алдатсын. Унутма ки, Шејтан чох һијләҝәрдир. Анҹаг нөвбәти мәгаләдән ҝөрәҹәјик ки, биз Шејтанын торундан гачына биләрик, чүнки «онун фәндләриндән бихәбәр дејилик» (2 Кор. 2:11).
[9–ҹу сәһифәдәки шәкилләр]
Мән һәлә дә дүнјанын тәклиф етдији «азадлығы» арзулајырам?
[9–ҹу сәһифәдәки шәкилләр]
Һәгигәт мәним һәјат јолума чеврилибми?