Сән Јеһованын ҹалалыны әкс етдирирсәнми?
«Биз... Јеһованын ҹалалыны ҝүзҝү кими әкс [етдиририк]» (2 КОР. 3:18).
НЕҸӘ ҸАВАБ ВЕРӘРДИН?
Ҝүнаһлы вәзијјәтимизә бахмајараг, биз Јеһованын ҹалалыны неҹә әкс етдирә биләрик?
Дуалар вә јығынҹаг ҝөрүшләриндә иштирак етмәк бизә Аллаһын ҹалалыны әкс етдирмәјә неҹә көмәк едир?
Нәјин сајәсиндә биз дурмадан Јеһованын ҹалалыны әкс етдиририк?
1, 2. Нәјә ҝөрә Јеһованын хүсусијјәтләрини тәглид едә биләҹәјимизи ҝөзләмәк мәнтиглидир?
ҺАМЫМЫЗ мүәјјән дәрәҹәдә валидејнләримизә бәнзәјирик. Тәәҹҹүблү дејил ки, бәзән оғлан ушағына атасына, гыз ушағына исә анасына охшадығыны дејирләр. Ушаглар да, адәтән, валидејнләринә бәнзәмәјә чалышырлар. Бәс бизим барәмиздә нә демәк олар? Биз сәмави Атамыз Јеһованы тәглид едә биләрикми? Аллаһы һеч вахт ҝөрмәсәк дә, Онун Кәламыны арашдырмагла, тәбиәти мүшаһидә етмәклә вә Мүгәддәс Јазыларын, хүсусилә дә Аллаһын Оғлу олан Иса Мәсиһин сөзләри вә әмәлләри үзәриндә дүшүнмәклә Онун еҹазкар хүсусијјәтләрини ҝөрә биләрик (Јәһ. 1:18; Ром. 1:20). Бәли, Јеһованын ҹалалыны әкс етдирмәк мүмкүндүр.
2 Аллаһ Адәмлә Һәвваны јаратмаздан әввәл, билирди ки, инсанлар Онун онлар үчүн олан ирадәсини јеринә јетирә, хүсусијјәтләрини әкс етдирә вә Она шәрәф ҝәтирә биләрләр. (Јарадылыш 1:26, 27 ајәләрини оху.) Бир мәсиһчи кими, биз Јараданымызын хүсусијјәтләрини тәзаһүр етдирмәлијик. Әҝәр белә етсәк, мәдәнијјәтимиздән, тәһсилимиздән вә ја миллијјәтимиздән асылы олмајараг, Аллаһын ҹалалыны әкс етдирмәк кими ҝөзәл шәрәфә лајиг ҝөрүләҹәјик. Нә үчүн? Она ҝөрә ки, «Аллаһымыз ајры-сечкилик етмәјән Аллаһдыр, һәр халгын ичиндә Ондан горхан вә салеһ һәјат сүрән адамы хошлајыр» (Һәв. иш. 10:34, 35).
3. Јеһоваја хидмәт етмәк бизә неҹә тәсир едир?
3 Мәсһ олунмуш мәсиһчиләр Јеһованын ҹалалыны әкс етдирирләр. Бу сәбәбдән руһдан доғулмуш һәвари Павел јазмышды: «Биз һамымыз ачыг үзлә Јеһованын ҹалалыны ҝүзҝү кими әкс етдирмәклә Онун бәнзәри сәвијјәсинә чатанадәк ҹалал үстүндән ҹалал газанараг дәјиширик» (2 Кор. 3:18). Муса пејғәмбәр үзәриндә Он әмр јазылмыш лөвһәҹикләрлә Сина дағындан јерә енәндә үзү нур сачырды, чүнки бундан әввәл онунла Јеһова данышмышды (Чых. 34:29, 30). Дүздүр, мәсиһчиләрлә бу, һеч вахт баш вермәјәҹәк, лакин онлар инсанлара Јеһова, Онун хүсусијјәтләри вә бәшәријјәтә даир мөһтәшәм нијјәти барәдә данышанда үзләри севинҹдән нур сачыр. Гәдим заманларда истифадә олунан ҹилаланмыш метал ҝүзҝүләр кими, мәсһ олунмуш мәсиһчиләр вә онларын әмәкдашлары һәјат вә хидмәтләриндә Јеһованын ҹалалыны әкс етдирирләр (2 Кор. 4:1). Сән һәрәкәтләринлә вә Падшаһлыг һагда мүнтәзәм тәблиғ етмәклә Јеһованын ҹалалыны әкс етдирирсәнми?
БИЗ АЛЛАҺЫН ҸАЛАЛЫНЫ ӘКС ЕТДИРМӘК ИСТӘЈИРИК
4, 5. а) Павел кими, биз нә илә мүбаризә апарырыг? б) Ҝүнаһ бизә неҹә тәсир едир?
4 Јеһованын хидмәтчиләри олан бизләр етдијимиз һәр шејин Јараданымыза иззәт вә шәрәф ҝәтирмәсини истәјирик. Анҹаг чох вахт һәр шеј истәдијимиз кими олмур. Павел дә бу проблемлә мүбаризә апармалы олурду. (Ромалылара 7:21—25 ајәләрини оху.) Бу мүбаризәнин сәбәбини изаһ едәрәк о јазмышды: «Һамы ҝүнаһ ишләди вә Аллаһын шөһрәтини әкс етдирә билмәди» (Ром. 3:23). Бәли, Адәмдән ҝүнаһы мирас алдығымыз үчүн бүтүн бәшәријјәт әзазил «падшаһ» олан ҝүнаһын әсарәти алтындадыр (Ром. 5:12; 6:12).
5 Ҝүнаһ нәдир? Бу, Јеһованын хүсусијјәтләринә, нормаларына вә ирадәсинә зидд олан һәр бир шејдир. Ҝүнаһ инсанын Аллаһла мүнасибәтләринә хәләл ҝәтирир. Охатана һәдәфә дүшмәјә нәјинсә мане олдуғу кими, ҝүнаһ да бизә һәдәфә дүшмәјә, јәни Аллаһын ҹалалыны әкс етдирмәјә мане олур. Биз гәсдән вә ја тәсадүфән ҝүнаһа јол верә биләрик (Сај. 15:27—31). Ҝүнаһ инсанларда дәрин көк салыб вә онларла Јарадан арасында сәдд чәкир (Мәз. 51:5; Јешаја 59:2; Колос. 1:21). Буна ҝөрә дә бәшәр аиләси, үмумиликдә, Јеһова илә пис мүнасибәтдәдир вә Онун ҹалалыны әкс етдирмәк кими дәјәрли имканы әлдән верир. Шүбһә јохдур ки, ҝүнаһ бәшәријјәтин ән бөјүк бәласыдыр.
6. Ҝүнаһлы вәзијјәтимизә бахмајараг, Јеһованын ҹалалыны неҹә әкс етдирә биләрик?
6 Ҝүнаһлы вәзијјәтимизә бахмајараг, Јеһова бизим үчүн «үмид мәнбәји» олду (Ром. 15:13). О, ҝүнаһы арадан галдырмаг үчүн бир васитә — Иса Мәсиһин фидјә гурбанлығыны тәгдим етди. Әҝәр биз бу гурбанлыға иман едириксә, артыг «ҝүнаһын гулу» дејилик вә мөвгејимиз Јеһованын ҹалалыны әкс етдирмәјә имкан верир (Ром. 5:19; 6:6; Јәһ. 3:16). Јеһова илә бу ҹүр јахшы мүнасибәти горујуб сахласаг, әмин ола биләрик ки, О, бизә индики дөврдә хејир-дуа верәҹәк, ҝәләҹәкдә исә камиллик вә әбәди һәјат бәхш едәҹәк. Дахилимиздә һәлә дә ҝүнаһын олмасына бахмајараг, Аллаһын бизә Онун ҹалалыны әкс етдирә билән инсанлар кими бахмасы, доғрудан да, бөјүк хејир-дуадыр!
ЈЕҺОВАНЫН ҸАЛАЛЫНЫ ӘКС ЕТДИРИРИК
7. Аллаһын ҹалалыны әкс етдирмәк үчүн биз нәји гәбул етмәлијик?
7 Аллаһын ҹалалыны дүзҝүн әкс етдирмәк үчүн ҝүнаһлы олдуғумузу бојнумуза алмалыјыг (2 Салн. 6:36). Биз ҝүнаһлы мејилләримизи гәбул етмәли вә онлары нәзарәт алтында сахламалыјыг ки, һәгигәтән дә Аллаһын ҹалалыны әкс етдирә биләк. Мәсәлән, әҝәр биз порнографијаја бахмаг кими инсаны алчалдан ҝүнаһа јол веририксә, руһани көмәјә еһтијаҹымызын олдуғуну етираф етмәли вә бу көмәји әлдә етмәк үчүн лазыми аддымлар атмалыјыг (Јаг. 5:14, 15). Бу, Јеһоваја там шәкилдә шәрәф ҝәтирән һәјата апаран илк аддым олаҹаг. Јеһованын хидмәтчиләри кими, биз даима өзүмүзү јохламалыјыг ки, Онун салеһлик мејарларына ујғун ҝәлдијимизә әмин олаг (Сүл. мәс. 28:18; 1 Кор. 10:12). Ҝүнаһлы мејилләримиз нә олурса-олсун, Аллаһын ҹалалыны әкс етдирмәк үчүн онларын гаршысыны алмаг ҹәһдләримизә сон гојмамалыјыг.
8. Камил олмасаг да, биз нә етмәлијик?
8 Иса Аллаһы мүкәммәл шәкилдә разы салан вә Онун ҹалалыны әкс етдирән јеҝанә инсан олуб. Ондан фәргли олараг, биз гејри-камилик. Буна бахмајараг, онун нүмунәсини тәглид едә биләрик вә етмәлијик дә (1 Пет. 2:21). Јеһова нәинки бизим уғурларымыза, һәтта Онун ҹалалыны әкс етдирмәк үчүн ҝөстәрдијимиз сәјләримизә дә диггәт јетирир вә онлара хејир-дуа верир.
9. Аллаһын тәләбләринә мүвафиг олмаг истәјән мәсиһчиләрин һәјатында Мүгәддәс Китаб һансы ролу ојнајыр?
9 Мүгәддәс Китаб бизә Јеһованын ҹалалыны даһа јахшы шәкилдә неҹә әкс етдирә биләҹәјимизи баша дүшмәјә көмәк едә биләр. Буна ҝөрә дә Аллаһын Кәламыны дәриндән арашдырмаг вә ону дүшүнәрәк охумаг чох ваҹибдир (Мәз. 1:1—3). Әҝәр Мүгәддәс Китабы һәр ҝүн охусаг, бу, бизә јахшылыға доғру дәјишмәјимизә көмәк едәҹәк. (Јагуб 1:22—25 ајәләрини оху.) Мүгәддәс Китаб биликләри иманымызын әсасыдыр, еләҹә дә ҹидди ҝүнаһлардан гачмаг вә Јеһованы разы салмаг гәтијјәтимизи мөһкәмләндирән бир васитәдир (Мәз. 119:11, 47, 48).
10. Дуа бизә Јеһоваја даһа јахшы хидмәт етмәјә неҹә көмәк едир?
10 Аллаһын ҹалалыны әкс етдирмәк үчүн биз һәм дә «даима» дуа етмәлијик (Ром. 12:12). Јеһоваја мәгбул тәрздә хидмәт етмәјимиз үчүн Ондан көмәк диләмәлијик. Буна ҝөрә дә Ондан хаһиш едә биләрик ки, бизә мүгәддәс руһ, даһа чох иман, сынаглара таб ҝәтирмәк үчүн ҝүҹ вә «һәгигәт сөзүнү дүзҝүн [өјрәтмәк]» баҹарығы версин (2 Тим. 2:15; Мат. 6:13; Лука 11:13; 17:5). Ушаг атасындан асылы олдуғу кими, биз дә сәмави Атамыз Јеһовадан асылы олмалыјыг. Әҝәр Аллаһа даһа јахшы хидмәт етмәк үчүн Ондан бизә көмәк етмәсини хаһиш едириксә, әмин ола биләрик ки, О, көмәјини биздән әсирҝәмәјәҹәк. Ҝәлин һеч вахт Ону бездирдијимизи дүшүнмәјәк! Әксинә, һәмишә дуада Јеһоваја һәмд едәк, миннәтдарлығымызы билдирәк вә һәр заман, хүсусилә дә чәтинлијә дүшәндә Ондан рәһбәрлик диләјәк, еләҹә дә хаһиш едәк ки, бизә мүгәддәс адыны иззәтләндирәҹәк тәрздә Она хидмәт етмәјә көмәк етсин (Мәз. 86:12; Јаг. 1:5—7).
11. Јығынҹаг ҝөрүшләри бизә Аллаһын ҹалалыны әкс етдирмәјә неҹә көмәк едир?
11 Аллаһ гијмәтли сүрүсүнүн гејдинә галмағы «садиг вә ағыллы нөкәр» синфинә һәвалә едиб (Мат. 24:45—47; Мәз. 100:3). Һәмиманлыларынын Јеһованын ҹалалыны неҹә әкс етдирмәси нөкәр синфини чох марагландырыр. Даһа јахшы ҝөрүнмәјимиз үчүн дәрзи палтарымызда дүзәлишләр етдији кими, бизим бир мәсиһчи кими «хариҹи ҝөрүнүшүмүз» јығынҹаг ҝөрүшләриндә јахшылашдырылыр (Ибр. 10:24, 25). Буна ҝөрә дә ҝәлин һәмишә ҝөрүшләримизә вахтында ҝәләк, чүнки әҝәр ҝеҹикмәк вәрдишимиз варса, онда биз Јеһованын үзәримиздә етмәли олдуғу руһани дүзәлишләри бурахаҹағыг.
ҜӘЛИН АЛЛАҺЫ ТӘГЛИД ЕДӘК
12. Биз Аллаһы неҹә тәглид едә биләрик?
12 Јеһованын ҹалалыны әкс етдирмәк үчүн биз «Она бәнзәмәјә» чалышмалыјыг (Ефес. 5:1). Аллаһымызы тәглид етмәјин үсулларындан бири Онун бахышларыны мәнимсәмәкдир. Башга ҹүр јашамаг Онун адыны ләкәләјир вә бизә зәрәр вурур. Јашадығымыз дүнја Шәририн, јәни Шејтан Иблисин әлиндәдир, бу сәбәбдән Јеһованын нифрәт етдији шејләрә нифрәт етмәк, севдији шејләри исә сәмими-гәлбдән севмәк үчүн биздән бөјүк сәј тәләб олунур (Мәз. 97:10; 1 Јәһ. 5:19). Биз үрәкдән әмин олмалыјыг ки, Аллаһа хидмәт етмәјин јеҝанә дүзҝүн јолу һәр шеји Онун шәрәфи наминә етмәкдир. (1 Коринфлиләрә 10:31 ајәсини оху.)
13. Нәјә ҝөрә биз ҝүнаһа нифрәт етмәлијик вә бу, бизи нәјә тәшвиг едәҹәк?
13 Јеһова кими, биз дә ҝүнаһа нифрәт етмәлијик. Биз мүмкүн гәдәр ҝүнаһдан узаг олмалыјыг вә ҝүнаһа јол вермәдән она нә дәрәҹәдә јахын ола биләҹәјимизи јохламаға ҹәһд ҝөстәрмәмәлијик. Мәсәлән, өзүмүзү дөнүклүкдән, јәни Јеһованын ҹалалыны әкс етдирмәк үчүн бизи јарарсыз едәҹәк ҝүнаһдан ҝөзләмәлијик (Ганун. т. 13:6—9). Буна ҝөрә дә ҝәлин дөнүкләрдән вә ја өзүнү гардаш адландырыб, анҹаг Аллаһы рүсвај едән һәр кәсдән — һәтта бу, бизим аилә үзвүмүз олса белә — узаг дураг (1 Кор. 5:11). Дөнүкләрин вә ја Јеһованын тәшкилатыны тәнгид едән инсанларын сөзләрини тәкзиб етмәјә чалышмағын бизә һеч бир фајдасы јохдур. Данылмаз фактдыр ки, дөнүкләрин истәр јазылы шәкилдә, истәрсә дә Интернет васитәсилә јајдыглары мәлуматлары әлдә етмәк руһанилијимиз үчүн тәһлүкәлидир вә дүзҝүн дејил. (Јешаја 5:20; Матта 7:6 ајәләрини оху.)
14. Аллаһын ҹалалыны әкс етдирмәјә чалышаркән һансы хүсусијјәт биздә даһа чох нәзәрә чарпмалыдыр вә нәјә ҝөрә?
14 Сәмави Атамыз Јеһованы тәглид етмәјин ән ваҹиб үсулларындан бири мәһәббәт ҝөстәрмәкдир. Бәли, биз Онун кими мәһәббәтли олмалыјыг (1 Јәһ. 4:16—19). Арамызда һөкм сүрән мәһәббәт бизи Исанын давамчылары вә Јеһованын хидмәтчиләри кими башгаларындан фәргләндирән хүсусијјәтдир (Јәһ. 13:34, 35). Гејри-камиллик уҹбатындан бизә мәһәббәт ҝөстәрмәк бәзән чәтин олса да, һәр заман мәһәббәт тәзаһүр етдирмәјә чалышмалыјыг. Үрәјимиздә мәһәббәт вә Аллаһа мәгбул олан диҝәр хүсусијјәтләр инкишаф етдирмәк бизи пислик вә ҝүнаһ етмәкдән чәкиндирәҹәк (2 Пет. 1:5—7).
15. Мәһәббәт бизим башгалары илә мүнасибәтләримизә неҹә тәсир едир?
15 Мәһәббәт бизи инсанлара үрәкдән хејирхаһлыг етмәјә тәшвиг едир (Ром. 13:8—10). Мәсәлән, һәјат јолдашымыза олан мәһәббәт кәбин јатағымызы ләкәләмәкдән горујаҹаг. Ағсаггаллара олан мәһәббәт вә онларын ишинә олан һөрмәтимиз бизә итаәткар олуб онларын ҝөстәришләринә табе олмаға көмәк едәҹәк. Валидејнләрини севән ушаглар онларын сөзүнә гулаг асаҹаг, онлара еһтирам бәсләјәҹәк вә барәләриндә пис данышмајаҹаглар. Әҝәр инсанлары севириксә, онларын сәвијјәсинин бизимкиндән ашағы олдуғуну дүшүнмәјәҹәјик вә онларла сајмазјана тәрздә данышмајаҹағыг (Јаг. 3:9). Нәһајәт, Аллаһын сүрүсүнү севән ағсаггаллар һәмиманлылары илә нәзакәтлә давранаҹаглар (Һәв. иш. 20:28, 29).
16. Мәһәббәт бизә хидмәтдә неҹә көмәк едир?
16 Мәһәббәт хүсусијјәти хидмәтимиздә дә өзүнү ајдын бүрузә вермәлидир. Јеһоваја дәрин мәһәббәт бәсләдијимиз үчүн биз јол вермәјәҹәјик ки, бәзи инсанларын мәнфи сөзләри вә ја лагејдлији бизи руһдан салсын. Әксинә, биз хош хәбәри тәблиғ етмәјә давам едәҹәјик. Мәһәббәт бизи хидмәтә јахшы һазырлашмаға вә сәмәрәли шәкилдә тәблиғ етмәјә тәшвиг едәҹәк. Әҝәр биз, һәгигәтән дә, Аллаһы вә инсанлары севириксә, Падшаһлыг һагда тәблиғ етмәк тапшырығына ҹансыхыҹы бир иш вә ја ади бир борҹ кими бахмајаҹағыг. Әксинә, ону өзүмүзә бөјүк шәрәф һесаб едәҹәк вә севинҹлә һәјата кечирәҹәјик (Мат. 10:7).
ЈЕҺОВАНЫН ҸАЛАЛЫНЫ ДАИМА ӘКС ЕТДИР
17. Ҝүнаһын бизи Аллаһын ҹалалыны әкс етдирмәјә мане олдуғуну дәрк етмәјимиз һансы фајданы ҝәтирир?
17 Демәк олар ки, дүнја ҝүнаһын нә дәрәҹәдә ҹидди мәсәлә олдуғуну дәрк етмир. Лакин буну бизим барәмиздә демәк олмаз. Буна ҝөрә дә биз ҝүнаһлы мејилләримизлә мүбаризә апармағын ваҹиблијини анлајырыг. Ҝүнаһлы олдуғумузу гәбул етмәјимиз бизи виҹданымызы тәрбијә етмәјә көмәк едир, бу исә, өз нөвбәсиндә, бизи тәшвиг едир ки, дүшүнҹәләримиздә вә үрәјимиздә ҝүнаһлы арзулар баш галдыранда дүзҝүн шәкилдә давранаг (Ром. 7:22, 23). Дүздүр, бәзән биз зәиф олуруг, анҹаг Јеһова һәр бир вәзијјәтдә доғру давранмағымыз үчүн бизи мөһкәмләндирмәјә гадирдир (2 Кор. 12:10).
18, 19. а) Пис руһи гүввәләрлә мүбаризәдә уғур газанмаға бизә нә көмәк едир? б) Бизим гәти гәрарымыз нә олмалыдыр?
18 Бундан әлавә, әҝәр биз Јеһоваја шәрәф ҝәтирмәк истәјириксә, пис руһи гүввәләрә гаршы мүбаризә апармалыјыг. Аллаһын бизә вердији руһани зиреһләр сајәсиндә бу мүбаризәдә мүвәффәгијјәт газана биләрик (Ефес. 6:11—13). Шејтан јорулмаг билмәдән Јеһованы јалныз Онун лајиг олдуғу иззәтдән мәһрум етмәјә чалышыр. Үстәлик, о, Јеһова илә мүнасибәтләримизи позмаг үчүн дәридән-габыгдан чыхыр. Анҹаг биз, еләҹә дә милјонларла гејри-камил киши, гадын вә ушаглар нөгсансызлыгларыны горујанда вә Јеһованын ҹалалыны әкс етдирәндә бу, Шејтан үчүн неҹә дә бөјүк зәрбә олур! Буна ҝөрә дә ҝәлин ҝөјдәки мәләкләр кими, биз дә уҹадан Јеһоваја дурмадан һәмд едәк: «Аллаһымыз Јеһова, Сән шөһрәтә, һөрмәтә вә гүдрәтә лајигсән! Чүнки һәр шејин јараданы Сәнсән вә һәр шеј Сәнин ирадәнлә мөвҹуддур вә јарадылыб» (Вәһј 4:11).
19 Ҝәлин нә олурса-олсун, Јеһованын ҹалалыны әкс етдирмәк нијјәтимиздә гәти олаг. Аллаһ ҝөрәндә ки, бир чох садиг инсанлар Ону тәглид етмәк вә ҹалалыны әкс етдирмәк үчүн әлиндән ҝәләнини едирләр, Онун үрәји даға дөнүр (Сүл. мәс. 27:11). Ҝәлин Давудун дедији нөвбәти сөзләрә шәрик олаг: «Еј Худавәнд Аллаһым, бүтүн гәлбимлә Сәнә шүкүр едәҹәјәм, даим исмини иззәтләндирәҹәјәм» (Мәз. 86:12). Биз мүкәммәл сурәтдә Јеһованын ҹалалыны әкс етдирәҹәјимиз вә Ону әбәдијјән иззәтләндирә биләҹәјимиз ҝүнү бөјүк һәсрәтлә ҝөзләјирик! Итаәткар инсанлар бу арзунун ҝерчәкләшмәсинин шаһиди олаҹаглар. Бәс сән инди Јеһова Аллаһын ҹалалыны әкс етдирирсәнми вә буну әбәдијјәт боју етмәјә гәти гәрарлысанмы?
[27–ҹи сәһифәдәки шәкил]
Сән Јеһованын ҹалалыны бу јолларла әкс етдирирсәнми?