Руһани варлыглар бизә тә’сир едә биләрми?

1. Мәләкләр һаггында нә үчүн өјрәнмәлијик?

ИНСАНЫ јахшы танымаг истәдикдә, адәтән биз онун аиләси илә таныш олуруг. Буна ҝөрә дә, Јеһова Аллаһы јахшы танымаг үчүн биз Онун мәләкләрдән ибарәт олан сәмави аиләси илә таныш олмалыјыг. Мүгәддәс Китабда мәләкләр «Аллаһ оғуллары» адланыр (Әјјуб 38:7, КМ). Аллаһын нијјәтиндә онлар һансы ролу ојнајырлар? Онларын бәшәр тарихинә тә’сири олмушдурму? Мәләкләр бизим һәјатымыза тә’сир едирләрми? Әҝәр едирләрсә, неҹә?

2. Мәләкләр неҹә јараныблар вә онларын сајы нә гәдәрдир?

² Мәләкләр һаггында Мүгәддәс Китабын јүзләрлә ајәсиндә хатырланыр. Бу руһани варлыглар һаггында даһа чох өјрәнмәк үчүн һәмин ајәләрдән бә’зиләрини нәзәрдән кечирәк. Мәләкләр неҹә јараныблар? Колослулара 1:16 ајәсиндә дејилир: «Ҝөјләрдә вә јердә олан... һәр шеј Онун [Иса Мәсиһин] васитәсилә јаранды». Ҝөрүндүјү кими, бүтүн мәләкләри Јеһова Аллаһ Өз илкин Оғлу Иса Мәсиһин васитәсилә јаратмышдыр. Ҝөјдә нә гәдәр мәләк вар? Мүгәддәс Китабдан өјрәнирик ки, мәләкләрин сајы јүз милјонларладыр вә онларын һамысы да чох гүдрәтлидир (Мәзмур 103:20)a.

3. Әјјуб 38:4-7 ајәләриндән мәләкләр һаггында нә өјрәнирик?

³ Аллаһын Кәламы олан Мүгәддәс Китабда дејилир ки, Јер јарадылан заман Аллаһ оғулларынын һамысы «севинҹдән һарај салырды» (Әјјуб 38:4-7). Демәли, мәләкләр инсанларын, һәтта Јерин дә јарадылмасындан әввәл мөвҹуд идиләр. Мүгәддәс Китабын бу парчасы мәләкләрин һиссләрә малик олдуғуну ҝөстәрир, чүнки бурада онларын «бирҝә нәғмә» охумаларындан бәһс едилир. Бундан әлавә, диггәт јетирин ки, «бүтүн Аллаһ оғуллары» бирҝә севинирдиләр. Бу, һәмин дөврдә бүтүн мәләкләрин меһрибан бир аилә кими Јеһова Аллаһа хидмәт етдикләрини ҝөстәрир.

МӘЛӘКЛӘР МӨҺКӘМЛӘНДИРИР ВӘ МҮДАФИӘ ЕДИРЛӘР

4. Мүгәддәс Китаб садиг мәләкләрин инсанларла марагландығыны неҹә ҝөстәрир?

⁴ Инсанын јарадылдығы ҝүндән е’тибарән, садиг мәләкләр бәшәр аиләсини вә Аллаһын нијјәтинин јер үзүндә јеринә јетмәсини диггәтлә мүшаһидә едирләр (Сүлејманын мәсәлләри 8:30, 31; 1 Петер 1:11, 12). Салеһ мәләкләр, заман кечдикҹә инсанларын чохунун өз гајғыкеш Јараданларындан үз дөндәрдикләрини вә Она хидмәт етмәк истәмәдикләрини дә ҝөрүрдүләр. Шүбһәсиз ки, онлар буна чох кәдәрләнирдиләр. Лакин инсанлардан ким исә Јеһованын јолуна гајыданда мәләкләр ҝөјләрдә севинирләр (Лука 15:10). Бу руһани варлыглар инсанларын рифаһы илә марагландыгларына ҝөрә, садиг хидмәтчиләрини мөһкәмләндирмәк вә мүдафиә етмәк үчүн Јеһова онлары дәфәләрлә јер үзүнә ҝөндәрмишди (Ибраниләрә 1:7, 14). Ҝәлин бир нечә нүмунәни нәзәрдән кечирәк.

5. Мүгәддәс Китабда мәләкләрин инсанлара көмәк етдикләринә даир һансы нүмунәләр вар?

⁵ Натәмизликлә долу олан Содом вә Һоморра шәһәрләринин мәһви заманы, ики мәләк салеһ Луту вә гызларыны шәһәрдән кәнара чыхарараг, онлары хилас етди (Јарадылыш 19:15, 16). Бундан јүз илләр сонра, мәләкләр ширләр олан гујуја атылмыш Даниел пејғәмбәри горудулар. Даниел деди: «Аллаһым өз мәләјини ҝөндәриб ширләрин ағзыны бағлады» (Даниел 6:22). Ерамызын Ы әсриндә бир мәләк һәвари Петери зиндандан азад етди (Һәвариләрин ишләри 12:6-11). Јер үзүндәки хидмәтинин башланғыҹында мәләкләр Исаја да дәстәк олдулар (Марк 1:13). Һәмчинин өлүмүндән бир гәдәр әввәл, мәләк она ҝөрүнүб «гүввәт верди» (Лука 22:43). Һәјатынын бу ваҹиб анында мәләкләрин ону дәстәкләмәси, Иса үчүн неҹә дә бөјүк тәсәлли иди!

6. а) Садиг мәләкләр бу ҝүн Аллаһын халгыны неҹә мүдафиә едирләр? б) Бу фәсилдә һансы суаллары мүзакирә едәҹәјик?

⁶ Бу ҝүн мәләкләр Аллаһын хидмәтчиләринә физики бәдәндә ҝөрүнмүрләр. Бу гүдрәтли руһани варлыглар ҝөзә ҝөрүнмәсәләр дә, Аллаһын халгыны горумаға давам едирләр. Онлар илк нөвбәдә руһани зәрәрдән мүдафиә едирләр. Мүгәддәс Китабда дејилир: «Рәбдән горханлары Онун мәләји мүдафиә едәр, онлара зәфәр верәр» (Мәзмур 34:7). Бу сөзләр бизә бөјүк тәсәллидир! Чүнки бизи мәһв етмәк истәјән пис руһани гүввәләр мөвҹуддур. Бу варлыглар кимдирләр? Онлар һарадан пејда олублар? Бизә зәрәр вермәк үчүн нәјә әл атырлар? Бу суаллара ҹаваб тапмаг үчүн, ҝәлин бәшәр тарихинин башланғыҹында баш верән бир һадисәјә нәзәр салаг.

ДҮШМӘНЛӘРИМИЗ ОЛАН РУҺАНИ ВАРЛЫГЛАР

7. Шејтан өз пис нијјәтинә нә дәрәҹәдә мүвәффәг олду?

⁷ Бу китабын 3-ҹү фәслиндән өјрәндијимиз кими, мәләкләрдән бири башгалары үзәриндә рәһбәрлик етмәк истәди вә Аллаһа гаршы чыхды. Сонрадан о, Шејтан Иблис адланды (Вәһј 12:9). Һәвваны алдатдыгдан сонра, Шејтан өз һијләҝәр нијјәтини һәјата кечирмәјә давам етди. Һабил, Ханок вә Нуһ кими бир нечә садиг хидмәтчиләри чыхмаг шәртилә, о, 16 әср әрзиндә, демәк олар ки, бүтүн инсанлары Аллаһдан узаглашдырмаға мүвәффәг олду (Ибраниләрә 11:4, 5, 7).

8. а) Неҹә олду ки, бә’зи мәләкләр ҹин олдулар? б) Нуһун ҝүнләриндә Дашгындан сағ чыхмаг үчүн ҹинләр нә етмәли олдулар?

⁸ Нуһун ҝүнләриндә башга мәләкләр дә Јеһоваја гаршы үсјан етдиләр. Онлар ҝөјдәки мәскәнләрини тәрк етдиләр вә јер үзүнә енәрәк инсан ҹилдинә ҝирдиләр. Нә үчүн? Јарадылыш 6:2 ајәсиндә дејилир: «Аллаһ оғуллары ҝөрдүләр ки, инсан гызлары чох ҝөзәлдир вә бәјәндикләри һәр гызы өзләринә арвад етдиләр». Анҹаг Јеһова бу мәләкләрин ганунсузлугларынын давам етмәсинә јол вермәди. О бу мәләкләрин инсанлары пис јола чәкмәләринә ҝөз јума билмәзди. Аллаһ пис инсанларын һамысыны мәһв етмәк үчүн јер үзүнә Үмумдүнја дашгыны ҝөндәрди. Јалныз Онун садиг хидмәтчиләри хилас олдулар (Јарадылыш 7:17, 23). Үсјанкар мәләкләр, јә’ни ҹинләр өзләринин инсан бәдәнләрини тәрк едиб, ҝөјә гајытмалы олдулар. Онлар ‘ҹинләрин рәиси’ олан Иблисин тәрәфини тутдулар (Матта 9:34).

9. а) Ҹинләр ҝөјә гајыданда нә баш верди? б) Ҹинләр һагда нәји нәзәрдән кечирәҹәјик?

⁹ Үсјанкар мәләкләр ҝөјә гајыданда, өз рәисләри Шејтан кими, онлар да Аллаһын сәмави аиләсинә гәбул едилмәдиләр (2 Петер 2:4). Бу руһани варлыглар инди инсан ҹилдинә ҝирә билмәсәләр дә, инсанлары пис јола чәкмәјә давам едирләр. Шејтан онларын көмәјилә ‘бүтүн дүнјаны алдадыр’ (Вәһј 12:9; 1 Јәһја 5:19). Инсанлары алдатмаг үчүн ҹинләр мүхтәлиф үсуллара әл атырлар (2 Коринфлиләрә 2:11). Ҝәлин онлардан бә’зиләрини нәзәрдән кечирәк.

ҸИНЛӘР ИНСАНЛАРЫ НЕҸӘ АЛДАДЫРЛАР?

10. Спиритизм нәдир?

¹⁰ Инсанлары алдатмаг үчүн ҹинләр спиритизмдән истифадә едиләр. Спиритизм — бирбаша вә ја медиум васитәсилә ҹинләрлә јарадылан әлагәдир. Мүгәддәс Китаб спиритизмлә мәшғул олмағы мүһакимә едир вә бизи онунла бағлы олан һәр шејдән чәкиндирир (Галатијалылара 5:19-21). Тәлә јеми балыгчынын мәгсәдинә неҹә хидмәт едирсә, спиритизм дә ҹинләрә о ҹүр хидмәт едир. Балыгчы һәр балыг нөвү үчүн мүхтәлиф јемләрдән истифадә етдији кими, пис руһлар да спиритизмин һәр бир нөвүнә әл атараг, мүхтәлиф инсанлары өз тә’сирләри алтына салмаға чалышырлар.

11. Фалчылыг нәдир вә нәјә ҝөрә биз онунла бағлы олан һәр шејдән узаг дурмалыјыг?

¹¹ Ҹинләрин «тәлә јемләриндән» бири фалчылыгдыр. Фалчылыг нәдир? Фалчылыг — ҝәләҹәји вә ја мә’лум олмајан бир шеји өјрәнмәк ҹәһдидир. Бура улдуз фалы, картла фала бахмаг, кристал күрә фалы, әл фалы, һәмчинин әшјаларын, әламәтләрин вә јухуларын јозулмасы да аиддир. Чохлары фала бахмағы зәрәрсиз мәшғулијјәт һесаб етсәләр дә, Мүгәддәс Китаб фалчыларын пис руһларла әлбир олдугларыны ҝөстәрир. Мәсәлән, Һәвариләрин ишләри 16:16-18 ајәләриндә бир гыза ҝәләҹәји демәк габилијјәти верән фалчы ҹиндән данышылыр. Лакин ҹин гыздан чыханда, о, фалчылыг баҹарығыны итирди.

12. Өлүләрлә данышмаг ҹәһди нәјә ҝөрә тәһлүкәлидир?

¹² Ҹинләрин инсанлары алдатмаг үсулларындан бири дә өлүләрлә данышмагдыр. Әзизләринин өлүмүндән әзаб чәкән инсанлар чох вахт јалана ујурлар: онлар өләнләрлә данышмағын мүмкүн олдуғуна инанырлар. Медиум, өлән адам һаггында хүсуси мә’лумат чатдыра вә ја онун сәсилә даныша биләр. Бу сәбәбдән, чохлары өлүләрин јашамаға давам етдијинә вә онларла үнсијјәтдә олмагла тәсәлли алаҹагларына инанырлар. Лакин бу ҹүр тәсәлли алдадыҹыдыр. Ејни заманда чох тәһлүкәлидир. Нәјә ҝөрә? Чүнки ҹинләр өлән адамын сәсилә даныша вә онун һаггында медиума мә’лумат верә биләрләр (1 Шамуел 28:3-19). Бундан әлавә, 6-ҹы фәсилдән өјрәндик ки, инсан өләндә өз мөвҹудлуғуна сон гојур (Мәзмур 115:17). Буна ҝөрә дә, ‘өлүләричағыранлар’ пис руһлар тәрәфиндән алданыр вә Аллаһын ганунуну позурлар (Ганунун тәкрары 18:11; Јешаја 8:19). Еһтијатлы олун ки, ҹинләрин бу тәләсинә дүшмәјәсиниз.

13. Әввәлләр ҹинләрдән горхан бир чохлары нәјә наил ола билмишләр?

¹³ Пис руһлар инсанлары нәинки алдадыр, һәтта горхудурлар. Шејтан вә онун ҹинләри ‘вахтларынын аз олдуғуну’ вә тезликлә зәнҹирләнәҹәкләрини билдикләри үчүн, бу ҝүн һәмишә олдуғундан даһа гәддардырлар (Вәһј 12:12, 17). Буна бахмајараг, әввәлләр пис руһлардан горхан минләрлә инсанлар онларын тә’сириндән азад ола билмишләр. Онлар буна неҹә наил олмушлар? Спиритизмә ҹәлб олунмуш инсан нә етмәлидир?

ПИС РУҺЛАРА НЕҸӘ МҮГАВИМӘТ ҜӨСТӘРӘ БИЛӘРИК?

14. Ефесли мәсиһчиләрин нүмунәсини изләјәрәк, пис руһларын тә’сириндән неҹә азад ола биләрик?

¹⁴ Мүгәддәс Китабда пис руһлара мүгавимәт ҝөстәрмәјин вә онларын тә’сириндән азад олмағын үсуллары ҝөстәрилир. Ҝәлин I әсрдә Ефес шәһәриндә јашајан мәсиһчиләрин нүмунәсини нәзәрдән кечирәк. Мәсиһчилији гәбул етмәздән әввәл, онлардан бә’зиләри спиритизмлә мәшғул олурдулар. Спиритизмлә әлагәни кәсмәк гәрарына ҝәлдикдә, онлар һансы аддымы атдылар? Мүгәддәс Китабда дејилир: «Сеһрбазлыг едәнләрдән бир чоху өз китабларыны топлајыб, һамынын ҝөзү гаршысында јандырдылар» (Һәвариләрин ишләри 19:19). Сеһрбазлыгла бағлы олан китаблары мәһв етмәклә, бу јени шаҝирдләр пис руһларын тә’сириндән азад олмаг истәјәнләрә нүмунә гојдулар. Әҝәр Јеһоваја хидмәт етмәк истәјириксә, биз дә спиритизмлә бағлы олан һәр шејдән азад олмалыјыг. Бунлар, спиритизмлә мәшғул олмаға тәшвиг едән вә ону мараглы вә ҹәлбедиҹи бир шеј кими тәгдим едән китаблар, журналлар, филмләр, шүарлар вә мусиги јазылары ола биләр. Бура, һәмчинин писликдән горунмаг үчүн тахылан тилсимләр, ҝөз мунҹуглары вә башга әшјалар да дахилдир (1 Коринфлиләрә 10:21).

15. Пис руһи гүввәләрә гаршы неҹә дура биләрик?

¹⁵ Ефес мәсиһчиләри сеһрбазлыгла бағлы китабларыны јандырдыгдан бир нечә ил сонра, һәвари Павел онлара јазмышды: «Мүбаризәмиз... пис руһи гүввәләрә гаршыдыр» (Ефеслиләрә 6:12). Ҝөрдүјүмүз кими, ҹинләр тәслим олмаг фикриндә дејилдиләр. Онлар үстүн ҝәлмәјә чалышараг, мүбаризәни давам етдирирдиләр. Һәмин мәсиһчиләрә нә көмәк едә биләрди? Павел онлара мәсләһәт едирди: «Бүтүн бунлардан савајы, иман галханыны әлә алын; бунунла шејтанын бүтүн гызмар охларыны сөндүрмәјә гадир олаҹагсыныз» (Ефеслиләрә 6:16). Иман галханымыз нә гәдәр мөһкәм оларса, пис руһи гүввәләрә гаршы бир о гәдәр дә мүвәффәгијјәтли ола биләрик (Матта 17:20).

16. Иманымызы неҹә мөһкәмләндирә биләрик?

¹⁶ Иманымызы неҹә мөһкәмләндирә биләрик? Мүгәддәс Китабы өјрәнмәјә давам етмәклә. Диварын мөһкәмлији онун бүнөврәсиндән асылыдыр. Буна бәнзәр шәкилдә, иманымызын мөһкәмлији дә әсас е’тибары илә өз тәмәлиндән, јә’ни Аллаһын Кәламындан алдығымыз дәгиг биликләрдән асылыдыр. Ҝүндәлик олараг Мүгәддәс Китабы охујуб өјрәнсәк, иманымыз мөһкәмләнәҹәк. Белә бир иман, мөһкәм дивар кими, бизи пис руһларын тә’сириндән горујаҹаг (1 Јәһја 5:5).

17. Пис руһлара гаршы дурмаг үчүн даһа һансы аддымы атмаг ҝәрәкдир?

¹⁷ Ефесли мәсиһчиләр даһа һансы аддымы атмалы идиләр? Онларын әлавә мүдафиәјә еһтијаҹлары вар иди, чүнки ҹиндарлыгла долу олан бир шәһәрдә јашајырдылар. Бу сәбәбдән, Павел онлара јазырды: «Һәр ҹүр дуа вә нијазла, һәр вахт Руһун идарәси илә дуа един» (Ефеслиләрә 6:18). Дүнја бу ҝүн дә ҹинләрин тә’сири алтында олдуғу үчүн, пис руһлардан мүдафиә олунмағы диләјәрәк, Јеһоваја исрарла дуа етмәлијик. Аллаһа ады илә мүраҹиәт етмәк олдугҹа ваҹибдир (Сүлејманын мәсәлләри 18:10). Аллаһдан хаһиш етмәк лазымдыр ки, бизи «шәрдән», јә’ни Шејтан Иблисдән хилас етсин (Матта 6:13). Јеһова бизим сәмими дуаларымыза мүтләг ҹаваб верәҹәкдир (Мәзмур 145:19).

18, 19. а) Пис руһи гүввәләрә галиб ҝәлмәкдә сизә нә көмәк едәҹәк? б) Нөвбәти фәсилдә нәји мүзакирә едәҹәјик?

¹⁸ Пис руһлар тәһлүкәлидирләр. Лакин биз Шејтана гаршы дурсаг вә Аллаһын ирадәсини јеринә јетирәрәк Она јахынлашсаг, онлардан горхмаја биләрик (Јагуб 4:7, 8). Пис руһларын гүввәси мәһдуддур. Онлар Нуһун ҝүнләриндә ҹәзаландырылыблар, инди исә сон һөкмү ҝөзләјирләр (Јәһуда 6). Һәмчинин јадда сахлајын ки, биз Јеһованын гүдрәтли мәләкләринин мүдафиәсинә маликик (2 Падшаһлар 6:15-17). Бу мәләкләр бизим пис руһларла мүбаризәдә галиб ҝәлмәјимизи вә онларын позуҹу тә’сирләринә гаршы дурмағымызы чох истәјирләр. Башга сөзләрлә десәк, салеһ мәләкләр бизи дәстәкләјирләр. Буна ҝөрә дә, ҝәлин һәмишә Јеһованын вә Онун садиг мәләкләринин јанында олаг. Спиритизмин бүтүн формаларындан узаг олмаг вә Аллаһын Кәламындакы мәсләһәтләри тәтбиг етмәк неҹә дә ваҹибдир! (1 Петер 5:6, 7; 2 Петер 2:9). Бу, пис руһи гүввәләрлә мүбаризәдә галиб ҝәлмәјимизә көмәк едәҹәк.

¹⁹ Бәс Аллаһ бу пис руһларын мөвҹудлуғуна вә инсанлара бу гәдәр изтираблар ҝәтирән пислијин олмасына нә үчүн јол верир? Бу суалы нөвбәти фәсилдә мүзакирә едәҹәјик.