Ҹинләрә неҹә мүгавимәт ҝөстәрә биләрик?
«Өз ләјагәтләрини һифз етмәјиб, мәскәнләрини тәрк едән мәләкләри дә [Аллаһ] әсла ачылмаз гандалларла бағлајыб, гаранлыгда бөјүк ҝүнүн мәһкәмәси үчүн һәбсдә сахламышдыр» (ЈӘҺУДА 6).
1, 2. Шејтан Иблис вә ҹинләрлә әлагәдар һансы суаллар ортаја чыхыр?
«АЈЫГ дурун, сајыг олун. Чүнки дүшмәниниз олан шејтан, нә’рә чәкән вә ашырмаг үчүн кимисә ахтаран аслан кими ҝәзир», дејә һәвари Петер хәбәрдарлыг едир (1 Петер 5:8). Ҹинләр һаггында исә һәвари Павел белә сөзләр сөјләјир: «Мән истәмирәм ки, сиз ҹинләрә шәрик оласыныз. Сиз һәм Рәббин касасындан, һәм дә ҹинләрин касасындан ичә билмәзсиниз; һәм Рәббин, һәм дә ҹинләрин сүфрәсинә ортаг ола билмәзсиниз» (1 Коринфлиләрә 10:20, 21).
2 Бәс Шејтан Иблис вә ҹинләр кимдир? Онлар неҹә вә нә заман пејда олмушлар? Аллаһмы онлары јарадыб? Онларын инсанлар үзәриндә тә’сири нә дәрәҹәдә ҝүҹлүдүр? Өзүмүзү онлардан неҹә мүдафиә едә биләрик?
Шејтан вә ҹинләр һарадан пејда олдулар?
3. Неҹә олду ки, Аллаһын бир мәләји Шејтан Иблисә чеврилди?
3 Бәшәр тарихинин әввәлләриндә, Аллаһ инсанлары Еден бағында јерләшдирәндә бир мәләк үсјан галдырды. Нә үчүн? Чүнки Јеһованын сәмави тәшкилатында она ајрылан јер ону гане етмирди. Адәмлә Һәвва јарананда бу мәләк үчүн фүрсәт јаранды ки, онлары һәгиги Аллаһдан дөндәриб өзүнә ибадәт етдирсин. Аллаһа гаршы үсјан галдырараг вә илк инсанлары ҝүнаһа сүрүкләјәрәк бу мәләк Шејтан Иблис олду. Бир гәдәр вахтдан сонра башга мәләкләр дә онун үсјанына гошулдулар. Бу неҹә баш верди? (Јарадылыш 3:1-6; Ромалылара 5:12; Вәһј 12:9).
4. Нуһун ҝүнләриндә баш верән Дашгындан габаг бә’зи үсјанкар мәләкләр нә етмишдиләр?
4 Аллаһдан илһам алмыш Мүгәддәс Јазыларда дејилир ки, Нуһун ҝүнләриндә баш верән бөјүк Дашгындан әввәл бә’зи мәләкләр јер үзүндә јашајан гадынлара гејри-тәбии мараг ҝөстәрмәјә башладылар. «Аллаһ оғуллары ҝөрдүләр ки, инсан гызлары чох ҝөзәлдир вә бәјәндикләри һәр гызы өзләринә арвад етдиләр», дејә Мүгәддәс Китаб нәгл едир. Мәләкләрлә инсанларын гејри-тәбии әлагәләри нәтиҹәсиндә нәһәнҝ адамлар дүнјаја ҝәлди (Јарадылыш 6:2-4). Беләликлә Аллаһын итаәтиндән чыхан бу руһани варлыглар Шејтанын Јеһоваја гаршы галдырдығы үсјана гошулдулар.
5. Јеһова бөјүк Дашгынла бәшәријјәти мәһв едәндә үсјанкар мәләкләрлә нә баш верди?
5 Јеһова јер үзүнә Дашгын ҝәтирәндә нәһәнҝләр аналары илә бирҝә мәһв олдулар. Үсјанкарлар руһани варлыглара чеврилиб, руһани аләмә ҝери дөнмәјә мәҹбур олдулар. Анҹаг онлар Аллаһ гаршысында малик олдуглары ‘ләјагәтләрини’ ҝери ала билмәдиләр вә руһани ‘гаранлыға’ мәһкум олундулар (Јәһуда 6; 2 Петер 2:4).
6. Ҹинләр инсанлары неҹә алдадырлар?
6 Пис мәләкләр «өз ләјагәтләрини» итирәндән Шејтанын ҹин јолдашларына чеврилиб, онун чиркин мәгсәдләринә хидмәт едирләр. О вахтдан бәри ҹинләр артыг инсана чеврилә билмирләр. Анҹаг онлар киши вә гадынлары мүхтәлиф гејри-тәбии ҹинси позғунлуглара тәһрик едә билирләр. Ҹинләр, һәмчинин спиритизмин мүхтәлиф нөвләри илә, мәсәлән, овсун, ҹаду вә ҹиндарлыгла бәшәријјәти аздырыр (Ганунун тәкрары 18:10-13; 2 Салнамәләр 33:6). Пис мәләкләри Шејтанла ејни агибәт — әбәди мәһв ҝөзләјир (Матта 25:41; Вәһј 20:10). Анҹаг ејни заманда, биздән дә мөһкәм дурмаг вә онлара мүгавимәт ҝөстәрмәк тәләб олунур. Јахшы оларды ки, инди биз Шејтанын нә гәдәр ҝүҹлү олдуғуну, һәмчинин она вә ҹинләрә неҹә мүгавимәт ҝөстәрә биләҹәјимизи арашдыраг.
Шејтан нә гәдәр ҝүҹлүдүр?
7. Шејтан дүнја үзәриндә һансы тә’сирә маликдир?
7 Шејтан бүтүн тарих бојунҹа Јеһованын адына гара јахмышдыр (Сүлејманын мәсәлләри 27:11). О, һәм дә инсанларын чохуну өз тә’сири алтына салмышдыр. 1 Јәһја 5:19 ајәсиндә дејилир: «Бүтүн дүнја... шәририн һакимијјәти алтындадыр». Буна ҝөрә дә Иблис Исаны имтаһана чәкәрәк «дүнјанын бүтүн өлкәләринин» һакимијјәтини вә шан-шөһрәтини она тәклиф етмишди (Лука 4:5-7). Шејтан һаггында һәвари Павел дејир: «Әҝәр Мүждәмиз өртүлүдүрсә дә, һәлак оланлар үчүн өртүлүдүр. Онлара ҝәлинҹә, бу әсрин танрысы имансызларын зеһинләрини кор етмишдир ки, ҝөрүнмәз Аллаһын сурәти олан Мәсиһин иззәти һаггындакы Мүждәнин нуру онлары ајдынлатмасын» (2 Коринфлиләрә 4:3, 4). Шејтан «јаланчыдыр вә јаланын атасыдыр», анҹаг өзүнү «нур мәләји» кими ҝөстәрир (Јәһја 8:44; 2 Коринфлиләрә 11:14). Дүнјанын рәһбәрләринин вә онларын тәбәәләринин зеһнини кор етмәјә Шејтанын кифајәт гәдәр ҝүҹү вардыр вә бунун үчүн о, мүхтәлиф үсуллара әл атыр. Јанлыш мә’лумат, о ҹүмләдән, дини јалан вә әфсанәләрлә о, бәшәријјәти алдадыр.
8. Мүгәддәс Китаб Шејтанын тә’сири һаггында нәји ачыглајыр?
8 Шејтанын ҝүҹү вә тә’сири бизим ерадан тәхминән беш әср әввәл Даниел пејғәмбәрин ҝүнләриндә ачыг-ајдын ҝөрүндү. Јеһова Даниели руһландырмаг үчүн мәләклә хәбәр ҝөндәрәндә, «Фарс өлкәсинин һамиси олан мәләк» һәмин мәләјә мүгавимәт ҝөстәрди. «Баш мәләкләрдән бири олан Микаел» көмәјә ҝәләнәдәк о, 21 ҝүн бу садиг мәләји јолундан сахлады. Һәмин һиссәдә һәм дә «Јунан һамиси олан [ҹин] мәләк» һаггында да данышылыр (Даниел 10:12, 13, 20). Вәһј 13:1, 2 ајәләриндә Шејтан сијаси ҹанавара «өз гүввәтини, тахтыны вә бөјүк сәлаһијјәт» верән «әждаһа» кими тәсвир олунур.
9. Мәсиһчиләр кимләрлә мүбаризә апарырлар?
9 Тәәҹҹүблү дејил ки, һәвари Павел јазмышды: «Мүбаризәмиз ган вә әтә гаршы дејилдир, анҹаг рәјасәтләрә, һакимијјәтләрә, бу гаранлыг дүнјанын һөкмранларына, јә’ни сәмави аләмдә олан пис руһи гүввәләрә гаршыдыр» (Ефеслиләрә 6:12). Һәтта бу ҝүн ҹинләр Шејтан Иблисин нәзарәти алтында, үмумиликдә ҝөтүрдүкдә инсан рәһбәрләрини вә бәшәријјәти ҝөзә ҝөрүнмәдән өзләринин тә’сири алтына салараг, онлары ағласығмаз сојгырымлары, террор актлары төрәтмәјә вә ҹанилик етмәјә сөвг едирләр. Ҝәлин инди бу ҝүҹлү руһани варлыглара мүгавимәт ҝөстәрмәјин үсулларыны арашдыраг.
Ҹинләрдән неҹә мүдафиә олуна биләрик?
10, 11. Биз Шејтана вә онун пис мәләкләринә неҹә мүгавимәт ҝөстәрә биләрик?
10 Биз Шејтана вә онун пис мәләкләринә өз ағлымызла вә ҝүҹүмүзлә мүгавимәт ҝөстәрә билмәрик. Павел бизә мәсләһәт верир: «Рәббдә вә Онун үстүн гүдрәтиндә гүввәтләнин». Пис руһани гүввәләрдән мүдафиә олунмаг үчүн биз Аллаһа үз тутмалыјыг. Павел давам едир: «Иблисин һијләләринә гаршы дура билмәк үчүн Аллаһын бүтүн зиреһләрини ҝејинин... Аллаһын бүтүн зиреһләрини ҝөтүрүн ки, сиз пис ҝүндә мүгавимәт ҝөстәриб, әлиниздән ҝәлән һәр шеји етдикдән сонра јериниздә дура биләсиниз» (Ефеслиләрә 6:10, 11, 13).
11 Павел һәмиманлыларыны ики дәфә «Аллаһын бүтүн зиреһләрини» ҝејинмәјә чағырыр. «Бүтүн» сөзү ҝөстәрир ки, бу ишә бармагарасы бахмагла ҹинләрин һүҹумларына мүгавимәт ҝөстәрә билмәрик. Бәс белә исә, ҹинләрә мүгавимәт ҝөстәрмәк үчүн мәсиһчиләрин мүтләг ҝејинмәли олдуглары ваҹиб руһани зиреһләр һансылардыр?
«Јериниздә дурун» — буну неҹә етмәк олар?
12. Мәсиһчиләр һәгигәт гуршағыны белләринә неҹә бағлајырлар?
12 Павел изаһ едир: «Беләликлә, белинизә һәгигәт гуршағыны бағламыш, дөшүнүзә салеһлик зиреһини тахмыш... олараг јериниздә дурун» (Ефеслиләрә 6:14, 15). Бурада ики зиреһин — гуршаг вә ја кәмәрин вә дөшә тахылан зиреһин ады чәкилир. Әсҝәр белини (будлары, гасығы вә гарнын ашағы һиссәси) горумаг вә гылынҹынын ағырлығына дөзмәк үчүн кәмәрини сых бағламалы иди. Һәгигәт дә бизи елә сых әһатә етмәлидир ки, она мүвафиг һәјат сүрәк. Мүгәддәс Китабы һәр ҝүн охујуругму? Буну бүтүн аилә илә бирликдә едирикми? Аиләви олараг ҝүндәлик ајәни һәр ҝүн мүзакирә едирикми? ‘Садиг вә ағыллы гулун’ нәшрләрини өјрәнирикми? (Матта 24:45). Әҝәр беләдирсә, демәли биз Павелин мәсләһәтинә әмәл етмәјә чалышырыг. Бундан башга, биздә Мүгәддәс Китабын рәһбәрлијини тәгдим едән видеокассетләр вә ДВД-дискләр вардыр. Һәгигәтә сых бағлы галараг биз мүдрик гәрарлар гәбул едәҹәк вә сәһв аддымлар атмајаҹағыг.
13. Символик үрәјимизи неҹә горуја биләрик?
13 Дөшә тахылан зиреһ әсҝәрин синәсини, үрәјини вә башга ваҹиб органларыны горујур. Мәсиһчи Аллаһын салеһлијини севмәклә вә Онун әдаләтли нормаларына мүвафиг јашамагла өз символик үрәјини, јә’ни дахили варлығыны горуја биләр. Дөшә тахылан символик зиреһ көмәк едәҹәк ки, биз Аллаһын Кәламыны дәјәрдән салмајаг. ‘Пислијә нифрәт едиб, јахшылығы севдикҹә’, биз ајағымызы ‘һәр пис јолдан кәнар гојаҹағыг’ (Амос 5:15; Мәзмур 119:101).
14. ‘Сүлһ Мүждәсини тәблиғ етмәк һазырлығыны ҝејмәк’ нә демәкдир?
14 Империјада јүз километрләрлә узанан јоллары гәт етмәк үчүн, Рома әсҝәрләри јахшы ајаггабы ҝејинирдиләр. Бәс ‘сүлһ Мүждәсини тәблиғ етмәк һазырлығыны ҝејмәк’ мәсиһчи үчүн һансы мә’наны дашыјыр? (Ефеслиләрә 6:15). Бу о демәкдир ки, биз һәмишә фәалијјәтә һазырыг вә фүрсәт дүшән кими Аллаһын Падшаһлығы һаггында хош хәбәри башгалары илә бөлүшүрүк (Ромалылара 10:13-15). Фәал сурәтдә хидмәтдә иштирак етмәк бизи Шејтанын ‘һијләләриндән’ мүдафиә едир (Ефеслиләрә 6:11).
15. а) Иман галханынын ваҹиблијини нә ҝөстәрир? б) Иманымыза зәрәр јетирә биләҹәк ‘гызмар охлар’ нә ола биләр?
15 Павел давам едир: «Бүтүн бунлардан савајы, иман галханыны әлә алын; бунунла шејтанын бүтүн гызмар охларыны сөндүрмәјә гадир олаҹагсыныз» (Ефеслиләрә 6:16). Павел бу мәсләһәтә «бүтүн бунлардан савајы» ифадәси илә башламагла ҝөстәрир ки, бу зиреһ чох ваҹибдир. Бизим иманымыз мөһкәм олмалыдыр. О бизи бөјүк галхан кими Шејтанын ‘гызмар охларындан’ горујур. Шејтанын гызмар охлары нә ола биләр? Бу, дүшмәнләрин, јахуд дөнүкләрин иманымызы зәифләтмәк үчүн јајдығы аҹы јаланлар, јарымһәгигәтләр вә ја тәһгирамиз сөзләр, һәмчинин биздә ҝүндә бир шеј алмаға һәвәс јарадан вә һәтта бизи мал-мүлкү илә ловғаланан инсанларла рәгабәт апармаға тәһрик едән вар-дөвләтә һәрислик ола биләр. Бәлкә дә белә инсанларын даһа бөјүк евләри вә машынлары вар вә ја онлар өз баһалы даш-гашлары вә ән сон дәбдә олан палтарларыны нүмајиш етдирирләр. Анҹаг башгалары нә едирләр-етсинләр, биз бу ‘гызмар охлары’ дәф етмәк үчүн кифајәт гәдәр мөһкәм имана саһиб олмалыјыг. Бәс мөһкәм имана саһиб олараг ону неҹә горуја биләрик? (1 Петер 3:3-5; 1 Јәһја 2:15-17).
16. Иманымызы мөһкәмләтмәјә бизә нә көмәк едәр?
16 Биз мүнтәзәм олараг Мүгәддәс Китабы өјрәнмәклә вә үрәкдән дуалар етмәклә Аллаһа јахынлаша биләрик. Јеһовадан иманымызы мөһкәмләтмәсини хаһиш етмәли, сонра исә лазыми аддымлар атараг дуамыза мүвафиг давранмалыјыг. Мәсәлән, «Ҝөзәтчи Гүлләси»нин һәфтәлик өјрәнмә мәгаләләринин мүзакирә олунмасында иштирак етмәк мәгсәдилә онлара һазырлашырыгмы? Әҝәр Мүгәддәс Китабы вә она әсасланан нәшрләри өјрәнсәк, иманымыз мөһкәм олаҹаг (Ибраниләрә 10:38, 39; 11:6).
17. ‘Хилас дәбилгәсини неҹә ҝөтүрә’ биләрик?
17 Павел руһани зиреһ һаггында сөһбәтинә белә мәсләһәтлә јекун вурур: «Хилас дәбилгәсини вә Руһун гылынҹыны, јә’ни Аллаһын сөзүнү ҝөтүрүн» (Ефеслиләрә 6:17). Дәбилгә әсҝәрин зеһни фәалијјәтинин мәркәзи олан башыны вә бејнини горујурду. Ејнилә, бизим малик олдуғумуз үмид дә зеһнимизи горујур (1 Салониклиләрә 5:8). Бејнимизи дүнјәви мәгсәдләр вә мадди хүлјаларла долдурмаг әвәзинә, Исадан нүмунә ҝөтүрәрәк, фикримизи Аллаһын вердији үмидә ҹәмләмәлијик (Ибраниләрә 12:2).
18. Мүгәддәс Китабы мүнтәзәм охумаға нә үчүн бармагарасы бахмамалыјыг?
18 Шејтан вә онун ҹинләринин тә’сириндән бизи мүдафиә едән сонунҹу зиреһ Аллаһын Кәламы, јә’ни Мүгәддәс Китабда јазылан хәбәрдир. Бу да бир сәбәбдир ки, Мүгәддәс Китабы мүнтәзәм охумаға бармагарасы бахмајаг. Аллаһын Кәламыны дәгиг билмәк бизи Шејтанын јаланларындан, ҹинләрин тәблиғатындан, о ҹүмләдән, дөнүкләрин аҹы сөзләриндән горујур.
‘Һәр вахт дуа един’
19, 20. а) Шејтаны вә онун ҹинләрини нә ҝөзләјир? б) Бизи руһани ҹәһәтдән нә мөһкәмләндирә биләр?
19 Шејтанын, онун ҹинләринин вә бу пис дүнјанын сону јахындыр. Шејтан вахтынын аз олдуғуну билир. О, гәзәблидир вә «Аллаһын әмрләринә риајәт едиб, Исаја олан шәһадәтләринә бағлы галанларла» мүһарибә апарыр (Вәһј 12:12, 17). Шејтана вә онун ҹинләринә мүгавимәт ҝөстәрмәк сон дәрәҹә ваҹибдир.
20 Аллаһын бүтүн зиреһләри ҝејинмәк нәсиһәтинә ҝөрә биз неҹә дә миннәтдарыг! Павел руһани зиреһләр һаггында сөһбәтинә белә јекун вурур: «Һәр ҹүр дуа вә нијазла, һәр вахт Руһун идарәси илә дуа един. Бунун үчүн там мәтанәт ҝөстәрәрәк вә бүтүн мүгәддәсләр үчүн дуа едәрәк ајыг олун» (Ефеслиләрә 6:18). Дуа руһанилијимизи мөһкәмләндирә вә ајыг галмағымыза көмәк едә биләр. Ҝәлин Павелин сөзләринә ҹидди јанашаг вә һәр вахт дуа едәк, чүнки бунун сајәсиндә Шејтана вә онун ҹинләринә мүгавимәт ҝөстәрә биләҹәјик.
Сиз нә өјрәндиниз?
• Шејтан вә онун ҹинләри һарадан пејда олдулар?
• Иблис нә гәдәр ҝүҹлүдүр?
• Өзүмүзү Шејтан вә онун ҹинләриндән неҹә мүдафиә едә биләрик?
• Аллаһын вердији бүтүн зиреһләри неҹә ҝејинә биләрик?
[18-ҹи сәһифәдәки шәкилләр]
Аллаһ оғуллары инсан гызларына диггәт јетирмәјә башладылар.
[20-ҹи сәһифәдәки шәкил]
Алты руһани зиреһи садалајыб изаһ едә биләрсинизми?
[21-ҹи сәһифәдәки шәкилләр]
Бүтүн бунлар бизи Шејтан вә онун ҹинләриндән неҹә горујур?