Бәшәријјәтин проблемләри тезликлә һәлл олунаҹагдыр!
“ҺМАНИТАР фәалијјәт, конфликтләрин сәбәбини арадан галдыран даһа ҝениш стратеҝијанын вә сијасәтин ајрылмаз һиссәси дејилсә, тәәссүфләр олсун ки, мәһдуд дәјәрә маликдир. Тәҹрүбә дәфәләрлә ҝөстәрмишдир ки, әслиндә сијаси маһијјәт дашыјан проблемләри јалныз һуманитар фәалијјәтин көмәји илә һәлл етмәк мүмкүн дејил” (“The State of the World’s Refugees 2000”).
Хејријјәчилик фәалијјәтинә бахмајараг, бәшәријјәтин проблемләри дурмадан артыр. Хејријјәчилијин сијаси проблемләрә тамамилә сон гојаҹағына үмид етмәк олармы? Сөзүн ачығы, чәтин. Бәс даһа нәјә үмид етмәк олар? Ҹавабы һәвари Павелин Ефес мәсиһчиләринә јаздығы мәктубун бир парчасында тапмаг олар. Орада Аллаһын, инсанларын проблемләрини неҹә һәлл едәҹәји барәдә бәһс едилир. Павел, Аллаһын бу ҝүн инсанлары мә’јус һала салан проблемләрин илк сәбәбләрини нәјин васитәсилә һәлл едәҹәјини дә хатырладыр. Ҝәлин Павелин, Ефеслиләрә 1:3-10 ајәләриндә јазылмыш сөзләринә диггәт јетирәк.
“Һәр шеји Мәсиһин башчылығы алтында јенидән бир јерә топламаг”
Һәваринин сөзләринә ҝөрә, Аллаһын нијјәти “вахт тамам олдугда иҹра едиләҹәк” ишләрә аиддир. Бу нә демәкдир? Бу о демәкдир ки, “һәм ҝөјләрдә, һәм дә јердә олан һәр шеји Мәсиһин башчылығы алтында бирләшдирмәк [“јенидән бир јерә топламаг”, ЈД]” үчүн Аллаһ вахт тә’јин едиб (Ефеслиләрә 1:10). Бәли, Аллаһ хүсуси гурулуш ишә салараг онун васитәсилә ҝөјләрдә вә јердә олан һәр шеји өз рәһбәрлији алтында бирләшдириб, әввәлки һармонијаны бәрпа едәҹәк. Ону да гејд етмәјә дәјәр ки, Мүгәддәс Китаб алими И. Һ. Тејерин фикринҹә, “јенидән бир јерә топламаг” ифадәси “(ҝүнаһ үзүндән индијә кими бирлији позулмуш) ҹанлы вә ҹансыз олан һәр шеји өзү үчүн јенидән... Мәсиһин башчылығы алтында топламаг мә’насыны верир”.
Бу ону ҝөстәрир ки, Аллаһ бирлији позан илк сәбәби нәзәрә алыр. Бәшәр тарихинин башланғыҹында улу валидејнләримиз Адәм вә Һәвва, Иблисин Аллаһа гаршы үсјанына гошулдулар. Онлар, нәјин пис, нәјин јахшы олдуғуну өзләри гәрара алмагла мүстәгил олмаг истәдиләр (Тәквин 3:1-5). Аллаһын әдаләтинә мүвафиг олараг онлар Аллаһын аиләсиндән говулдулар вә Онунла мүнасибәтләрини итирдиләр. Адәм вә Һәвва бәшәријјәти, бу ҝүнәдәк һисс етдијимиз гејри-камиллијә дүчар етдиләр (Ромалылара 5:12).
Пислијә мүвәггәти јол верилиб
Бә’зиләри соруша биләр: “Аллаһ пислијә нәјә ҝөрә јол вермишдир? Бизим бу ҝүнә кими чәкдијимиз ағры вә аҹыларын гаршысыны алмаг үчүн, нәјә ҝөрә Аллаһ о заман өз әзәмәтли гүввәсиндән истифадә едәрәк үсјанчылары табе олмаға мәҹбур етмәди?” Илк бахышдан елә ҝәлә биләр ки, мәһз бу ҹүр давранмаг лазым иди. Анҹаг бу ҹүр рәфедилмәз гүввәнин тәтбиг едилмәси нәји ҝөстәрәрди? Мәҝәр ким исә елә илк мүбаһисәдән өз дүшмәнини садәҹә олараг ҝүҹү чатдығы үчүн мәһв етсәјди, хошунуза ҝәләрдими? Әлбәттә ки, јох.
Әслиндә үсјанчылар Аллаһын Гадир олдуғуну дејил, Онун рәһбәрлијинин ганунилијини вә доғрулуғуну шүбһә алтына алдылар. Бу ваҹиб мәсәләләри бирдәфәлик һәлл етмәк үчүн, Јеһова јол верди ки, јаратдығы варлыглар бир мүддәт билаваситә Онун рәһбәрлији олмадан өзбашына јашасынлар (Ваиз 3:1; Лука 21:24). Һәмин вахт баша чатдыгда, Аллаһ јер үзүндә рәһбәрлији јенидән әлә алаҹагдыр. О заман тамамилә ајдын олаҹаг ки, јер үзүндә јашајанлар үчүн сарсылмаз сүлһү, хошбәхтлији вә фираванлығы јалныз Аллаһын рәһбәрлији зәманәт едә биләр. О заман дүнјадакы әзијјәтләрин һамысына сон гојулаҹаг (Мәзмур 72:12-14; Даниел 2:44).
“Дүнја јаранмаздан габаг”
Бүтүн бунлар чохдан, Павелин дедији кими, “дүнја јаранмаздан габаг” Аллаһын нијјәтинә дахил иди (Ефеслиләрә 1:4). Бу, Јер күрәсинин, һәмчинин Адәмлә Һәвванын јаранмасындан әввәлки вахты нәзәрдә тутмур. Үсјан галдырылмаздан габаг мөвҹуд олан дүнја “чох јахшы иди” (Тәквин 1:31). Бәс онда һәвари Павел һансы дүнјадан бәһс едирди? О, Адәмлә Һәвванын нәслиндән ибарәт инсанларын, јә’ни фидијә васитәсилә гуртулуш үмидинә малик олан ҝүнаһлы вә гејри-камил инсанларын дүнјасындан бәһс едирди. Јеһова илк инсанларын ушаглары олмаздан әввәл, фидијә гурбанлығына үмид едән Адәмин нәслини неҹә хилас едәҹәјини әввәлҹәдән билирди (Ромалылара 8:20).
Әлбәттә, бу о демәк дејил ки, Каинатын Һөкмдары, јаранаҹаг һәр һансы фөвгәл’адә вәзијјәтләр үчүн ҝениш стратежи планлар һазырлајан инсанлар кими һәрәкәт едир. Хејр, Гадир Аллаһ садәҹә өз нијјәтини һәјата кечирир. Павел изаһ едир ки, Јеһова проблеми неҹә арадан галдыраҹағыны вә бәшәријјәти ҝүнаһдан бирдәфәлик азад едәҹәјини гәрара алмышдыр. Аллаһ бунун үчүн һансы тәдбири ҝөрүб?
Хиласы ким тәгдим едәҹәк?
Павел, Адәмин ҝүнаһынын нәтиҹәсинин арадан галдырылмасында Мәсиһин руһла мәсһ едилмиш шаҝирдләринин хүсуси рол ојнајаҹағыны дејир. Павел јазыр ки, Иса илә бирликдә сәмави Падшаһлыгда идарә етмәк үчүн Јеһова “бизи Мәсиһдә сечди”. Сонра о изаһ едир ки, Јеһова “бизи габагҹадан Өзү үчүн Иса Мәсиһ васитәсилә оғуллуға тә’јин етди” (Ефеслиләрә 1:4-6). Әлбәттә ки, Јеһова габагҹадан онларын һәр бирини ајры-ајрылыгда оғуллуға тә’јин етмәди. Лакин Шејтан Иблис вә Адәмлә Һәвва тәрәфиндән бәшәријјәтә вурулан пислији арадан галдырмаг үчүн Мәсиһлә бәрабәр идарә едәҹәк инсанлары груп һалында оғуллуға тә’јин етди (Лука 12:32; Ибраниләрә 2:14-18).
Тәәҹҹүблүдүр: Шејтан Аллаһа гаршы үсјан галдырмагла демәк истәјирди ки, Аллаһ инсанлары гүсурлу јарадыб вә тәзјиг алтында, јахуд сынаглар заманы онлар Онун рәһбәрлијини гәбул етмәјәҹәкләр (Ејуб 1:7-12; 2:2-5). Јеһова Аллаһ Адәмин ҝүнаһлы нәслиндән бә’зиләрини, Онун руһани өвладлары олсунлар дејә, “Өз ирадәсинин илтифатыны” һејранедиҹи тәрздә тәзаһүр етдирди. Јеһова, бу кичик групу ҝөјә ҝөтүрмәк нијјәтиндә олду. Һансы мәгсәдлә? (Ефеслиләрә 1:3-6; Јәһја 14:2, 3; 1 Салониклиләрә 4:15-17; 1 Петер 1:3, 4).
Павелин сөзләринә ҝөрә, Аллаһын оғуллуға ҝөтүрүлән бу хидмәтчиләри сәмави Падшаһлыгда “Мәсиһин һәмварисләри” олаҹаглар (Ромалылара 8:14-17). Онлар, инсанлары ағры вә әзаблардан азад етмәк ишиндә падшаһ вә каһинләр кими хидмәт едәҹәкләр (Вәһј 5:10). Һәгигәтән дә, “бүтүн хилгәт индијә кими бирликдә фәрјад едиб доғум ағрысы чәкир”. Лакин бир аздан Аллаһын сечилмиш бу оғуллары Иса илә бирликдә фәалијјәт ҝөстәрмәјә башлајаҹаг вә бүтүн итаәткар инсанлар “чүрүклүјә олан көләлијиндән азад олунуб [јенидән] Аллаһын өвладларынын иззәтли азадлығына говушаҹагдыр” (Ромалылара 8:18-22).
Фидијә васитәсилә хилас
Иса Мәсиһин гурбанлығы сајәсиндә инсанларын ҝүнаһдан азад олмаг үмидләри вар. Бүтүн бунлар Аллаһын инсанлара олан инајәтинин ән валеһедиҹи вә әзәмәтли тәзаһүрү сајәсиндә мүмкүндүр. Павел јазыр: “Мәсиһдә, Мәсиһин ганы васитәсилә хиласа, ҝүнаһларымызын әфвинә маликик” (Ефеслиләрә 1:7, 8).
Аллаһын нијјәтинин һәјата кечирилмәсиндә Иса Мәсиһ әсас ролу ојнајыр (Ибраниләрә 2:10). Мәсиһин фидијә гурбанлығы, Јеһованын өз ганун вә принсипләринә е’тибары гырмадан Адәмин нәслиндән олан бә’зи адамлары сәмави аиләсинә гәбул едиб, бәшәријјәти Адәмин ҝүнаһынын әсарәтиндән азад етмәси үчүн гануни әсас олду (Матта 20:28; 1 Тимотејә 2:6). Јеһова салеһлијинә вә камил әдаләтинә мүвафиг фәалијјәт ҝөстәрир (Ромалылара 3:22-26).
Аллаһын “ирадәсинин сирри”
Минилликләр боју Аллаһ, Јерә аид нијјәтини неҹә јеринә јетирәҹәјини там ачмамышдыр. О, ерамызын Ы әсриндә Исанын давамчыларына “Өз ирадәсинин сиррини” ачды (Ефеслиләрә 1:9). Павел вә диҝәр мәсһ едилмиш мәсиһчиләр, Аллаһын нијјәтинин јеринә јетмәсиндә Иса Мәсиһин ваҹиб рол ојнадығыны ајдын сурәтдә баша дүшдүләр. Ејни заманда өзләринин сәмави Падшаһлыгда Мәсиһин шәрикләри кими хүсуси ролларыны да анламаға башладылар (Ефеслиләрә 3:5, 6, 8-11). Бәли, Иса Мәсиһин вә онун һакимијјәт шәрикләринин әлиндә олан бу Падшаһлығын васитәсилә Аллаһ нәинки ҝөјләрдә, һәм дә јер үзүндә даими сүлһ гураҹаг (Матта 6:9, 10). Бу Падшаһлығын васитәсилә Аллаһ илк нијјәтинә дахил олан шәраитләри јер үзүндә јарадаҹаг (Ишаја 45:18; 65:21-23; Һәвариләрин ишләри 3:21).
Аллаһын јер үзүнү һәр ҹүр әзијјәт вә әдаләтсизликдән тәмизләмәк үчүн тә’јин етдији вахт чох јахындыр. Әслиндә Јеһова һәлә бизим еранын 33-ҹү илинин Пентикост ҝүнүндән јер үзүнү бәрпа етмәјә башламышдыр. Неҹә? О, “ҝөјләрдә олан”ы, јә’ни Мәсиһлә бәрабәр ҝөјләрдә идарә едәҹәк кәсләри топламаға башлады. Онларын арасында ефесли мәсиһчиләр дә варды (Ефеслиләрә 2:4-7). Сонралар, бизим ҝүнләрдә Јеһова “јердә олан”лары топлајыр (Ефеслиләрә 1:10). Үмумдүнја тәблиғ фәалијјәти сајәсиндә бүтүн инсанлара, Иса Мәсиһ башда олмагла Аллаһын Падшаһлығы барәдә хош хәбәр чатдырылыр. Елә бу ҝүнә гәдәр, Мүгәддәс Китабын хәбәринә мејлли олан инсанлар руһани мүдафиә вә шәфа алараг Аллаһ тәрәфиндән топланырлар (Јәһја 10:16). Тезликлә онлар тәмизләнмиш јер үзү ҹәннәтдә әдаләтсизлик вә әзијјәтдән тамамилә азад олаҹаглар (2 Петер 3:13; Вәһј 11:18).
Бу ҝүн еһтијаҹы оланлара һуманитар көмәк ҝөстәрилмәкдә “бөјүк ирәлиләјиш едилмишдир” (“The State of the World’s Children 2000”). Лакин ән бөјүк ирәлиләјиши, бир аздан јерин ишинә мүдахилә едәҹәк сәмави Падшаһлыгда Иса Мәсиһ вә онун шәрикләри едәҹәкләр. Онлар, бизә әзијјәт верән һәр ҹүр мүнагишәни вә пислији көкүндән гопарыб атаҹаглар. Бунунла да, бәшәр аиләсинин бүтүн проблемләри һәлл олунаҹагдыр (Вәһј 21:1-4).
[4-ҹү сәһифәдәки шәкилләр]
Хејријјәчилик бәшәр аиләсинин проблемләрини һәлл едә билмәмишдир.
[6-ҹы сәһифәдәки шәкил]
Мәсиһин фидијә гурбанлығы бәшәријјәтә Адәмин ҝүнаһындан гуртулушу тә’мин етди.
[7-ҹи сәһифәдәки шәкил]
Бу ҝүн руһани мүдафиә вә шәфа тапмаг мүмкүндүр.
[7-ҹи сәһифәдәки шәкилләр]
Хиласкар Падшаһлығын васитәсилә бәшәријјәтин бүтүн проблемләри тезликлә һәлл олунаҹагдыр.