Мәсиһ өз јығынҹағына рәһбәрлик едир

“Будур, Мән, дөврүн сонуна гәдәр һәр ҝүн сизинләјәм” (МАТТА 28:20).

1, 2. а) Дирилмиш Иса давамчыларыны шаҝирдләр һазырламаға ҝөндәрәркән онлара нә вә’д етди? б) Иса, илк мәсиһчиләрин јығынҹағына фәал сурәтдә неҹә рәһбәрлик едирди?

ДИРИЛМИШ Рәһбәримиз Иса Мәсиһ, ҝөјә галхмаздан әввәл шаҝирдләринә ҝөрүнүб деди: “Ҝөјдә вә јер үзүндә бүтүн һакимијјәт Мәнә верилмишдир. Беләликлә, ҝедин, бүтүн халглары шаҝирдим един, онлары Ата, Оғул вә Мүгәддәс Руһ наминә вәфтиз един; сизә әмр етдијим һәр шејә риајәт етмәји онлара өјрәдин; вә будур, Мән, дөврүн сонуна гәдәр һәр ҝүн сизинләјәм” (Матта 23:10; 28:18-20).

² Иса өз давамчыларына шаҝирдләр һазырламаг кими хиласедиҹи ишдә иштирак етмәји бујурмагла бәрабәр, онларла олаҹағыны да вә’д етди. “Һәвариләрин ишләри” китабында гејд олундуғу кими, илк мәсиһчиләрин тарихи сүбут едир ки, јени тәшкил олунан јығынҹаглара рәһбәрлик етмәк үчүн Мәсиһә Аллаһ тәрәфиндән сәлаһијјәт верилмишдир. О, давамчыларыны мөһкәмләтмәк вә онлара јол ҝөстәрмәк үчүн, вә’д едилмиш “јардымчы”ны, јә’ни мүгәддәс руһу ҝөндәрди (Јәһја 16:7, И-93; Һәвариләрин ишләри 2:4, 33; 13:2-4; 16:6-10). Дирилмиш Иса өз табелијиндә олан мәләкләри шаҝирдләринин көмәјинә ҝөндәрди (Һәвариләрин ишләри 5:19; 8:26; 10:3-8, 22; 12:7-11; 27:23, 24; 1 Петер 3:22). Бундан әлавә, Рәһбәримиз олан Мәсиһ, рәһбәрлик шурасы кими тә’јин едилмиш јеткин ағсаггалларын васитәсилә јығынҹаға рәһбәрлик едирди (Һәвариләрин ишләри 1:20, 24-26; 6:1-6; 8:5, 14-17).

3. Бу мәгаләдә һансы суаллар мүзакирә олунаҹаг?

³ Бәс бу ҝүн - “дөврүн сонунда”, Иса мәсиһчи јығынҹағына неҹә рәһбәрлик едир? Онун рәһбәрлијинә табе олмағымыз нәдән ҝөрүнүр?

Ағанын садиг гулу вар

4. а) “Садиг вә ағыллы гул” кимдир? б) Аға садиг гула һансы иши һәвалә едиб?

⁴ Иштиракынын әламәтини тәсвир едәрәк, Иса демишдир: “Белә исә, вахтлы-вахтында онлара јемәк вермәк үчүн, ағасынын өз нөкәрләры үзәринә гојдуғу садиг вә ағыллы гул кимдир? О гул нә бәхтијардыр ки, ағасы ҝәлдији заман, ону бу ҹүр иш ҝөрмәкдә тапаҹагдыр. Сизә доғрусуну дејирәм ки, ағасы бүтүн маликанәсинин идарәсини она тапшыраҹагдыр” (Матта 24:45-47). Аға - Рәһбәримиз олан Иса Мәсиһдир. О, јер үзүндәки маликанәсинә “садиг вә ағыллы гулу”, јә’ни јер үзүндә јашајан мәсһ едилмиш мәсиһчиләри тә’јин едиб.

5, 6. а) Јәһјанын ҝөрдүјү рө’јада “једди гызыл чырагдан” вә “једди улдуз” нәји тәмсил едир? б) “Једди улдузун” Исанын сағ әлиндә олмасыны неҹә изаһ етмәк олар?

⁵ Мүгәддәс Китабын “Вәһј” китабында садиг вә ағыллы гулун Иса Мәсиһә табе олдуғу дејилир. Һәвари Јәһја “Рәббин ҝүнү” адлы рө’јасында “једди гызыл чырагдан вә чырагданларын арасында... инсан оғлуна бәнзәр... сағ әлиндә једди улдуз” олан бирини ҝөрдү. Бу рө’јаны Јәһјаја изаһ едәрәк, Иса деди: “Сағ әлимдә ҝөрдүјүн једди улдузун вә једди гызыл чырагданын сирринә ҝәлинҹә, једди улдуз једди ҹәмијјәтин мәләкләри, једди чырагдан исә једди ҹәмијјәтдир” (Вәһј 1:1, 10-20).

⁶ “Једди гызыл чырагдан”, 1914-ҹү илдән башлајан “Рәббин ҝүнүндә”ки бүтүн мәсиһчи јығынҹагларыны тәмсил едир. Бәс “једди улдуз” нәдир? Бу, илк нөвбәдә, биринҹи әсрдәки јығынҹагларын гејдинә галан, руһдан доғулмуш мәсһ едилмиш ағсаггаллары тәмсил едирa. Бу ағсаггаллар Исанын “сағ әлиндә”, јә’ни онун табелијиндә идиләр. Мәсиһ Иса, “садиг гулу” тәмсил едән мәсиһчиләрин јығынҹағына рәһбәрлик едирди. Лакин мәсһ едилмиш ағсаггалларын сајы инди азалыб. Бәс Мәсиһ бүтүн дүнјада Јеһованын Шаһидләринин 93 000-дән артыг јығынҹағына неҹә рәһбәрлик едир?

7. а) Иса Рәһбәрлик шурасынын васитәсилә јер үзүндәки јығынҹаглара неҹә рәһбәрлик едир? б) Нә үчүн демәк олар ки, мәсиһчи ағсаггаллары мүгәддәс руһла тә’јин олунурлар?

⁷ Биринҹи әсрдә олдуғу кими, бу ҝүн дә, мүвафиг олан мәсһ едилмиш ағсаггаллардан ибарәт кичик бир груп Рәһбәрлик шурасы, јә’ни “садиг вә ағыллы гулун” нүмајәндәләри хүсусунда хидмәт едирләр. Рәһбәрлик шурасынын васитәсилә Рәһбәримиз Иса Мәсиһ, мәсһ едилиб едилмәдијиндән асылы олмајараг, јерли јығынҹагларда јеткин гардашлары ағсаггаллар кими тә’јин едир. Онларын тә’јинатында Јеһованын Исаја вердији мүгәддәс руһ ән ваҹиб ролу ојнајыр (Һәвариләрин ишләри 2:32, 33). Һәр шејдән өнҹә бу ағсаггаллар, мүгәддәс руһун тә’сири алтында Аллаһын Кәламында гәләмә алынмыш тәләбләрә мүвафиг олмалыдырлар (1 Тимотејә 3:1-7; Титуса 1:5-9; 2 Петер 1:20, 21). Намизәдлик вә тә’јинат, гардашлар Јеһоваја мүгәддәс руһун рәһбәрлији үчүн дуа етдикдән сонра верилир. Бундан әлавә, башгаларына мә’лумдур ки, мәс’ул гардашлар Аллаһын руһунун сәмәрәсини тәзаһүр етдирирләр (Галатијалылара 5:22, 23). Буна ҝөрә дә, Павелин мәсләһәти мәсһ едилиб едилмәдијиндән асылы олмајараг, бүтүн ағсаггаллара аиддир: “Өзүнүзә вә бүтүн сүрүјә диггәт един. Мүгәддәс Руһ сизи о сүрүнүн ичиндә нәзарәтчи тә’јин етмишдир” (Һәвариләрин ишләри 20:28). Мәс’ул гардашлар Рәһбәрлик шурасындан ҝөстәришләр алыр вә сүрүјә, јә’ни јығынҹаға көнүллү нәзарәт едирләр. Бунунла да, Мәсиһ бу ҝүн бизимләдир вә јығынҹаглара фәал рәһбәрлик едир.

8. Иса өз давамчыларына рәһбәрлик етмәк үчүн мәләкләрдән неҹә истифадә едир?

⁸ Бу ҝүн давамчыларына рәһбәрлик етмәк үчүн, Иса мәләкләрдән дә истифадә едир. Буғда вә дәлиҹәләр мәсәлиндә ҝөстәрилдији кими, бичин “дөврүн сонунда” олаҹаг. Аға бичиндә кими истифадә едир? Исанын сөзләринә ҝөрә, “бичинчиләр мәләкләрдир”. О әлавә едир: “Инсан Оғлу мәләкләрини ҝөндәрәҹәкдир вә онлар пис јола чәкән бүтүн шејләри вә һагсызлыг ишләдәнләри Онун Падшаһлығындан топлајаҹаглар” (Матта 13:37-41, И-93). Бир дәфә мәләк Филипә истигамәт верәрәк, һәбәшистанлы хәдими тапмагда она көмәк етдији кими, еләҹә дә бу ҝүн, Мәсиһ шүбһәсиз ки, мәләкләрин васитәсилә мәсиһчиләрә һәссас гәлбли инсанлары тапмагда көмәк едир (Һәвариләрин ишләри 8:26, 27; Вәһј 14:6).

9. а) Мәсиһ бу ҝүн јығынҹағына һансы јолла рәһбәрлик едир? б) Мәсиһин рәһбәрлијинин бизә фајда ҝәтирмәсини истәјириксә, һансы суалы нәзәрдән кечирмәлијик?

⁹ Бу ҝүн Иса Мәсиһин өз давамчыларына Рәһбәрлик шурасы, мүгәддәс руһ вә мәләкләр васитәсилә рәһбәрлик етдијини билмәк неҹә дә руһландырыҹыдыр! Һәтта тә’гибләр вә ја диҝәр шәраитләр үзүндән Јеһованын бә’зи хидмәтчиләри мүвәггәти олараг Рәһбәрлик шурасындан ајры дүшсәләр дә, Мәсиһ јенә дә мүгәддәс руһун вә мәләкләрин васитәсилә онлара рәһбәрлик едир. Лакин Мәсиһин рәһбәрлији јалныз она табе олдуғумуз заман фајда ҝәтирир. Мәсиһин рәһбәрлијинә табе олдуғумузу неҹә ҝөстәрә биләрик?

“Итаәт един... табе олун”

10. Јығынҹагда тә’јин едилән ағсаггаллара неҹә һөрмәт ҝөстәрә биләрик?

¹⁰ Рәһбәримиз Иса, јығынҹаглара “инсанлар тимсалында һәдијјәләр” верди; “кимини мүждәчи, кимини ҹәмијјәтин ҝөзәтчиси вә мүәллими тә’јин етди” (Ефеслиләрә 4:8, ЈД, 11, 12). Онлара гаршы мүнасибәтимиз, Мәсиһин рәһбәрлијинә табе олмағымыз барәдә чох шеј дејир. Мәҝәр Мәсиһин бизә руһән јеткин гардашлар вердији үчүн “миннәтдар” олмалы дејиликми (Колослулара 3:15, И-93). Бу гардашлар да бизим һөрмәтимизә лајигдирләр. Һәвари Павел јазырды: “Ҹәмијјәти јахшы идарә едән ағсаггаллар... икигат һөрмәтә лајиг сајылсынлар” (1 Тимотејә 5:17). Јығынҹағын ағсаггалларына миннәтдарлыг вә һөрмәтимизи неҹә ҝөстәрә биләрик? Павел ҹаваб верир: “Өз рәисләринизә итаәт един, онлара табе олун” (Ибраниләрә 13:17). Биз итаәткарлыг ҝөстәрәрәк, онлара табе олмалыјыг.

11. Нәјә ҝөрә тә’јин едилән ағсаггаллара ҝөстәрдијимиз һөрмәт вәфтизимизә ујғун јашајыб јашамадығымызы ҝөстәрир?

¹¹ Рәһбәримиз Мәсиһ камилдир. Һәдијјәләр тимсалында вердији гардашлар исә јох. Буна ҝөрә дә онлар бә’зән сәһвләрә јол верирләр. Буна бахмајараг, Мәсиһин рәһбәрлији васитәсилә һәјата кечирилән гурулуша һөрмәт етмәк чох ваҹибдир. Әслиндә, һәср вә вәфтизимизә мүвафиг јашамаг, јығынҹагда мүгәддәс руһ тәрәфиндән тә’јин олунан һакимијјәти гәбул етдијимизи вә көнүллү сурәтдә она табе олдуғумузу ҝөстәрир. “Мүгәддәс Руһ наминә” вәфтиз олунмаг, мүгәддәс руһун нә олдуғуну билдијимизи вә Јеһованын нијјәтләриндә онун ојнадығы ролу инсанлар гаршысында е’тираф етдијимизи билдирир (Матта 28:19). Бу ҹүр вәфтиз, мүгәддәс руһун рәһбәрлијинә табе олдуғумуз вә онун Мәсиһин давамчылары арасындакы фәалијјәтинә мане олаҹаг һеч бир шеј етмәдијимиз мә’насыны дашыјыр. Бир һалда ки, ағсаггалларын намизәдлијинин ирәли сүрүлмәсиндә вә тә’јинатында мүгәддәс руһ ваҹиб рол ојнајыр, јығынҹағын ағсаггалларыны дәстәкләмәмәјимиз һәср олунмамыза садиг галдығымызы ҝөстәрирми?

12. Јәһуда һакимијјәтә гаршы һөрмәтсиз мүнасибәтә даир һансы нүмунәләри ситат ҝәтирир вә бу бизи нәјә өјрәдир?

¹² Мүгәддәс Китабда итаәткарлығын вә табечилијин дәјәрли олдуғуну ҝөстәрән нүмунәләр вар. Јығынҹагдакы мәс’ул гардашлара һөрмәтсиз јанашан кәсләрә хәбәрдарлыг олараг, Јәһуда үч нүмунә ҝәтирир: “Вај онларын һалына! Чүнки онлар Габилин јолу илә ҝедирләр вә музд әлдә етмәк наминә Билам [“Балам”, КМ] кими јолдан азырлар вә Гораһ кими үсјан етдикләри үчүн һәлак олурлар” (Јәһуда 11). Габил, Јеһованын мәһәббәтлә вердији мәсләһәтинә әһәмијјәт вермәјиб, биләрәкдән нифрәт вә гатиллик јолуна гәдәм гојду (Тәквин 4:4-8). Аллаһын дәфәләрлә вердији хәбәрдарлыға бахмајараг, Балам өз мәнфәәти наминә Аллаһын халгыны лә’нәтләмәјә ҹәһд ҝөстәрди (Сајлар 22:5-28, 32-34; Тәснијә 23:5). Кораһ Исраил халгы арасында шәрәфли мөвгејә малик иди, амма о, бунунла кифајәтләнмәди. О, Аллаһын хидмәтчисинә - јер үзүндә ән тәвазөкар инсан олан Мусаја гаршы үсјан галдырды (Сајлар 12:3; 16:1-3, 32, 33). Габил, Балам вә Кораһ фәлакәтә дүчар олдулар. Доғрудан да, бу нүмунәләр бизи, Јеһованын сәлаһијјәт вердији кәсләри динләмәјә вә онлара һөрмәт етмәјә өјрәдир!

13. Јығынҹағын мәс’ул ағсаггалларына табе олан кәсләрә аид Ишаја һансы хејир-дуалары әввәлҹәдән хәбәр вермишди?

¹³ Мәҝәр Рәһбәримиз Исанын мәсиһчиләр јығынҹағына тә’јин етдији ағсаггалларын рәһбәрлијинә риајәт етмәклә хејир-дуалара малик олмағы истәмәздикми? Ишаја пејғәмбәр әввәлҹәдән демишдир: “Будур, бир падшаһ доғрулугла падшаһлыг едәҹәк вә рәисләр әдаләтлә һөкм едәҹәкләр. Вә инсан јелдән сахланаҹаг бир јер кими вә туфана гаршы өртүлү бир јер кими, гураг јердә ахар сулар кими, јоруҹу дијарда бөјүк гаја көлҝәси кими олаҹаг” (Ишаја 32:1, 2). Бу ағсаггаллардан һәр бири бу ҹүр мүдафиә вә сығынаҹаг “јер кими” олмалыдыр. Һакимијјәтә табе олмаг бизим үчүн чәтиндирсә, ҝәлин, јығынҹагда Аллаһын тә’сис етдији гурулуша табе олмаг үчүн Она дуа едәк.

Ағсаггалларын Мәсиһин рәһбәрлијинә табе олмалары

14, 15. Јығынҹагда рәһбәрлији үзәрләринә ҝөтүрән кәсләрин Мәсиһин рәһбәрлијинә табе олдуглары нәдән ҝөрүнүр?

¹⁴ Һәр бир мәсиһчи, хүсусилә дә ағсаггаллар, Мәсиһин рәһбәрлијинә табе олмалыдыр. Ағсаггаллар јығынҹагда мүәјјән сәлаһијјәтә маликдирләр. Лакин онлар башгаларынын иманы үзәриндә һакимлик етмәјә вә онларын һәјатына нәзарәт етмәјә чалышмырлар (2 Коринфлиләрә 1:24). Ағсаггаллар Мәсиһин бу сөзләринә диггәт јетирирләр: “Милләтләрин башчылары онлара һөкмдарлыг едәрләр вә ағалары үзәрләриндә һакимијјәт сүрәрләр. Сизин аранызда белә олмамалыдыр” (Матта 20:25-27). Ағсаггаллар өз вәзифәләрини јеринә јетирмәклә, сәмими гәлбдән башгаларына хидмәт етмәјә чалышырлар.

¹⁵ Мәсиһчиләр тәшвиг олунурлар: “Рәисләринизи јада салын. Онларын јашајышынын нәтиҹәсинә бахараг, иманларыны тәглид един” (Ибраниләрә 13:7). Биз буну, јығынҹағын ағсаггаллары рәһбәрлији өз үзәрләринә ҝөтүрдүкләринә ҝөрә етмирик. Иса демишдир: “Рәһбәриниз бирдир - Мәсиһдир” (Матта 23:10, ЈД). Ағсаггалларын иманыны она ҝөрә тәглид етмәлијик ки, онлар Рәһбәримиз олан Мәсиһи тәглид едирләр (1 Коринфлиләрә 11:1). Ҝәлин, јығынҹагда баҹы-гардашларла мүнасибәтдә ағсаггалларын Мәсиһин хүсусијјәтләрини неҹә әкс етдирмәјә чалышдыгларыны нәзәрдән кечирәк.

16. Иса, малик олдуғу һакимијјәтә бахмајараг, давамчылары илә неҹә давранырды?

¹⁶ Мәсиһин һәр шејдә гејри-камил инсанлары өтүб кечмәсинә вә Атасындан тајы-бәрабәри олмајан һакимијјәт алмасына бахмајараг, шаҝирдләри илә мүлајим давраныр, билијини нүмајиш етдирәрәк, өзүнү онлардан үстүн тутмурду. Иса давамчыларына гаршы һәссас вә аҹыјан иди, онларын тәләбатларыны нәзәрә алырды (Матта 15:32; 26:40, 41; Марк 6:31). О, һеч заман шаҝирдләриндән баҹара билдикләриндән артыг тәләб етмирди, онларын үзәринә чох ағыр јүк дә гојмурду (Јәһја 16:12). Иса “һәлим вә гәлбдән тәвазөкар” иди. Онун чох инсанлара тәравәт ҝәтирмәси дә тәәҹҹүблү дејилди (Матта 11:28-30).

17. Јығынҹағын үзвләри илә мүнасибәтдә, ағсаггаллар Мәсиһин тәвазөкарлығыны неҹә тәглид етмәлидирләр?

¹⁷ Әҝәр Рәһбәримиз Мәсиһ бу гәдәр тәвазөкар идисә, онда јығынҹагда рәһбәрлији өз үзәрләринә ҝөтүрәнләр даһа чох тәвазөкар олмалыдырлар! Онлар малик олдуглары сәлаһијјәтдән суи-истифадә етмәкдән чәкинир вә нитгләри илә башгаларында тәәссүрат ојатмаға чалышмырлар (1 Коринфлиләрә 2:1, 2). Әксинә, бу гардашлар Мүгәддәс Китабын һәгигәт сөзләрини садәлик вә һәлимликлә демәјә чалышырлар. Ејни заманда, ағсаггаллар башгаларынын еһтијаҹларыны нәзәрә алараг, онлара гаршы тәләбләриндә мүлајим олмаға чалышырлар (Филипилиләрә 4:5). Имканларымызын мәһдудлуғуну биләрәк, ағсаггаллар гардашларын гејри-камиллијинә ҝөрә ҝүзәштә ҝедирләр (1 Петер 4:8). Мәҝәр һәлим вә гәлбдән тәвазөкар ағсаггалларла үнсијјәтдә олмаг әсл тәравәт ҝәтирмирми? Әлбәттә, ҝәтирир.

18. Исанын башгаларына гаршы мүнасибәтиндән ағсаггаллар нә өјрәнә биләрләр?

¹⁸ Иса, һәтта ушаглара гаршы да мүлајим иди. Һәвариләри Исанын јанына ушаглар ҝәтирән кәсләри мәзәммәт едән заман, о деди: “Гојун ушаглар Мәним јаныма ҝәлсинләр”. Иса, “онлары гуҹаглајыб, әлләрини үзәрләринә гојараг, хејир-дуа верди” (Марк 10:13-16). Иса сәмими вә хејирхаһ адам иди; инсанлар она доғру ҹан атырдылар. Онлар Исадан горхмурдулар. Һәтта ушаглар да өзләрини онун јанында раһат һисс едирдиләр. Ағсаггаллар да бу ҹүр мүлајим, башгаларына гаршы сәмими вә хејирхаһдырлар. Һамы, һәтта ушаглар да, онларла бир јердә өзләрини раһат һисс едирләр.

19. “Мәсиһин ағлы” нә демәкдир вә бунун үчүн нә ҝәрәкдир?

¹⁹ Ағсаггалларын Иса Мәсиһи нә дәрәҹәдә тәглид етмәләри, ону нә гәдәр јахшы танымаларындан асылыдыр. Павел белә бир суал верди: “Рәббин ағлыны ким дәрк етмишдир ки, Она тә’лим версин?” Сонра о ҹаваб верди: “Биз исә Мәсиһин ағлына маликик” (1 Коринфлиләрә 2:16). Мәсиһин ағлына малик олмаг, онун дүшүнҹә тәрзини вә шәхсијјәтинин бүтүн хүсусијјәтләрини билмәк демәкдир. Бу бизә, Исанын бу вә ја диҝәр вәзијјәтдә неҹә даврандығыны анламаға көмәк едәҹәк. Јалныз тәсәввүр един, Рәһбәримиз Мәсиһи нә дәрәҹәдә јахшы таныја биләрик! Амма бунун үчүн Исанын һәјаты вә онун бизә вердији нүмунә һаггында даима дүшүнәрәк, Инҹили диггәтлә тәдгиг етмәк лазымдыр. Әҝәр ағсаггаллар Мәсиһин рәһбәрлијинә даһа чох риајәт етмәјә ҹан атырларса, о заман јығынҹағын үзвләри онларын иманыны тәглид етмәји даһа чох истәјирләр. Јығынҹағын үзвләри севинҹлә Рәһбәрләри Исанын изләри илә јеридикдә, ағсаггаллар бундан мәмнунлуг дујурлар.

Мәсиһин рәһбәрлијинә табе олмаға давам един

20, 21. Вә’д едилән јени дүнјаны ҝөзләјәркән биз нәјә гәти гәрарлы олмалыјыг?

²⁰ Мәсиһин рәһбәрлијинә һәмишә табе олмаг бизим үчүн һәјати ваҹибдир. Индики системинин сону јахынлашдыгҹа бизим вәзијјәтимиз, б. е. ә. 1473-ҹү илдә Моаб дүзәнлијиндә исраиллиләрин башына ҝәлән вәзијјәтә чох охшајыр. Онлар вә’д едилән дијарын астанасында икән, Аллаһ өз пејғәмбәри Мусанын васитәсилә деди: “Рәббин аталарына вермәк үзрә онлара анд етдији дијара.... сән [Јешу] ҝирәҹәксән (Тәснијә 31:7, 8). Јешу Исраилә рәһбәр тә’јин олунду. Вә’д едилән дијара дахил олмаг үчүн, Јешунун рәһбәрлијинә табе олмаг лазым иди.

²¹ Мүгәддәс Китаб бизә дејир: “Рәһбәриниз бирдир - Мәсиһдир”. Аллаһын вә’д етдији салеһлик өмүр сүрәҹәк јени дүнјасына јолу бизә јалныз Мәсиһ ҝөстәрәҹәк (2 Петер 3:13). Буна ҝөрә дә, ҝәлин һәјатымызын бүтүн саһәләриндә Мәсиһин рәһбәрлијинә табе олмаға гәти гәрарлы олаг.

[Һашијә]

Хатырлајырсынызмы?

• Мәсиһ илк мәсиһчи јығынҹагларына неҹә рәһбәрлик едирди?

• Мәсиһ јығынҹаглара бу ҝүн неҹә рәһбәрлик едир?

• Јығынҹагда рәһбәрлији өз үзәрләринә ҝөтүрән кәсләрә нә үчүн табе олмалыјыг?

• Ағсаггалларын Мәсиһи өз Рәһбәрләри кими гәбул етмәкләри нәдән ҝөрүнүр?

[15-ҹи сәһифәдәки шәкил]

Мәсиһ ағсаггаллары сағ әлиндә тутараг өз јығынҹағына рәһбәрлик едир.

[16-ҹы сәһифәдәки шәкилләр]

“Өз рәисләринизә итаәт един... онлара табе олун”.

[18-ҹи сәһифәдәки шәкил]

Иса садә вә мүлајим инсан иди. Мәсиһчи ағсаггаллары ону тәглид етмәјә ҹан атырлар.