Ирәлијә ҹан атараг тәрәгги ет
МҮГӘДДӘС КИТАБ принсипләрини һәјатында тәтбиг етмәји өјрәнәндә сәндә дәрин көк салмыш дүшүнҹә, данышыг вә давраныш тәрзи јаваш-јаваш дәјишмәјә башлады. Бу дәјишиклијин чоху һәтта Теократик Хидмәт Мәктәбинә јазылмаздан әввәл баш вермишди. Һал-һазырда, јәгин ки, сән руһани ҹәһәтдән инкишаф едәрәк һәјатыны Јеһоваја һәср етмисән. Анҹаг бу о демәкдирми ки, артыг инкишаф етмәк лазым дејил? Әсла. Вәфтиз садәҹә башланғыҹдыр.
Һәвари Павел Тимотејә ‘тәрәггиси һамыја ашкар олсун’ дејә, һәм мәсләһәтә, һәм дә хидмәтдә она һәвалә едилән мәсулијјәтләрә ‘фикир вермәји’, онларла мәшғул олмағы тапшыранда Тимотеј артыг ағсаггал кими хидмәт едирди (1 Тим. 4:12-15). Һәгигәт јолунда тәзә јеримәјә башламағындан, јахуд мәсиһчи һәјатында зәнҝин тәҹрүбә газанмағындан асылы олмајараг, тәрәгги етмәјә ҹан атмалысан.
Билик вә дәјишиклик
Ефеслиләрә 3:14-19 ајәләриндә охујуруг ки, һәвари Павел һәмиманлыларынын һәгигәтин ‘нә гәдәр ҝениш, узун, уҹа вә дәрин олдуғуну баша дүшмәјә ҝүҹләринин јетмәси’ үчүн дуа едирди. Буна ҝөрә дә јығынҹаға тәлим вермәк, ислаһ етмәк вә мөһкәмләндирмәк үчүн Иса инсанлар тимсалында һәдијјәләр верди. Аллаһын илһамланмыш Кәламы үзәриндә мүнтәзәм олараг дүшүнмәклә јанашы, тәҹрүбәли мүәллимләрин рәһбәрлији бизә руһани ҹәһәтдән ‘бој атмаға’ көмәк едәҹәк (Ефес. 4:11-15).
Белә инкишафа һәм дә ‘әглән јениләшмәк’ дахилдир. Бу, Аллаһын вә Мәсиһин дүшүнҹә тәрзини мәнимсәмәк вә онлар кими дүшүнмәк демәкдир. Инкишаф етмәк үчүн онларын дүшүнҹә тәрзинин мүтәмади олараг бизә тәсир етмәсинә јол вермәк вә ‘јени мәнлији ҝејинмәк’ лазымдыр (Ефес. 4:23, 24). Мүждәләри арашдыраркән Исанын һәјаты һаггында олан бу һекајәләрә риајәт етмәли олдуғун бир рәһбәрлик кими бахырсанмы? Исанын хасијјәтинин мүәјјән ҹәһәтләрини ҝөрмәјә вә онлары тәглид етмәјә ҹәһд ҝөстәрирсәнми? (1 Пет. 2:21).
Сөһбәтләринин мөвзусундан руһани ҹәһәтдән нә гәдәр ирәлиләдијин ајдын ҝөрүнә биләр. Јени мәнлији ҝејинәнләр данышыгларында јалана, тәһгирамиз, әдәбсиз вә зәрәрли сөзләрә јол вермирләр. Әксинә, «динләјәнләрә немәт версин» дејә, инкишаф үчүн јахшы сөзләр сөјләјирләр (Ефес. 4:25, 26, 29, 31; 5:3, 4; Јәһуда 16). Һәм тәкликдә, һәм дә јығынҹаг ҝөрүшләриндә сөјләдикләри сөзләрдән вә ҹаваблардан ҝөрүнүр ки, һәгигәт онларын һәјатыны дәјишир.
‘Һәр ҹүр тәлимин күләји илә чалхаланыб ора-бура сүрүкләнмирсәнсә’, бу да тәрәгги етдијинә нишанәдир (Ефес. 4:14). Мәсәлән, дүнјадакы јени фикирләрин, нормаларын, јахуд әјләнҹә нөвләринин ҝүҹлү далғасына неҹә реаксија верирсән? Сәндә руһани мәсулијјәтләр үчүн ајырдығын вахтдан кәсиб бу кими шејләрин архасынҹа гачмаға мејл јаранырмы? Белә етсән, руһани ҹәһәтдән инкишаф едә билмәјәҹәксән. Руһани ишләр үчүн вахты сатын алмаг неҹә дә мүдрик һәрәкәтдир! (Ефес. 5:15, 16).
Башгалары илә рәфтарын да руһани инкишафынын ҝөстәриҹиси ола биләр. Баҹы-гардашлара гаршы ‘шәфгәтли олуб, онлары бағышламағы’ өјрәнмисәнми? (Ефес. 4:32).
Һәр шеји Јеһованын истәдији кими етмәкдә тәрәггин һәм јығынҹагда, һәм дә евдә ајдын ҝөрүнмәлидир. Бу, һәмчинин мәктәбдә, иҹтимаи јерләрдә вә иш јериндә дә тәзаһүр олунмалыдыр (Ефес. 5:21–6:9). Әҝәр бүтүн бу вәзијјәтләрдә Аллаһа мәгбул кејфијјәтләри тамлығы илә әкс етдирирсәнсә, демәли руһани тәрәггин өзүнү бүрузә верир.
Алдығын әнамдан истифадә ет
Јеһова һәр биримизә баҹарыг вә истедад вериб. О истәјир ки, биз бу әнамлардан башгаларынын рифаһы үчүн истифадә едәк вә буну елә тәрздә едәк ки, бизим васитәмизлә Өз лүтфүнү тәзаһүр етдирә билсин. Бунунла бағлы һәвари Петер јазырды: «Һәр кәс, Аллаһын чохҹәһәтли лүтфүнүн јахшы тәсәррүфатчысы кими, алдығы әнам илә бир-биринә хидмәт етсин» (1 Пет. 4:10). Сән тәсәррүфатчы ролуну неҹә јеринә јетирирсән?
Петер давам едир: «Данышан, елә данышсын ки, санки Аллаһын сөзләрини нәгл едир» (1 Пет. 4:11). Бу ајә Аллаһы уҹалтмаг үчүн Онун Кәламы илә там һәмаһәнҝ данышмағын ваҹиблијини вурғулајыр. Һәмчинин данышыг тәрзин дә Јеһованы иззәтләндирмәлидир. Теократик Хидмәт Мәктәбиндә верилән тәлим алдығын әнамдан бу ҹүр истифадә етмәјә — башгаларына көмәк етмәклә Аллаһы иззәтләндирмәјә көмәк едәҹәк. Буну мәгсәд тутараг, мәктәбдән нә дәрәҹәдә фајдаландығыны неҹә мүәјјән едә биләрсән?
Нечә дәрсин үзәриндә ишләјиб битирдијин, һансы тапшырыглары алдығын һагда дүшүнмәкдәнсә, тәлимин тәгдим етдијин һәмд гурбанларынын кејфијјәтини нә дәрәҹәдә јахшылашдырдығы барәдә фикирләш. Мәктәб бизи тәблиғдә даһа сәмәрәли олмаға һазырлајыр. Буна ҝөрә дә өзүндән соруш: «Хидмәтдә нә һагда данышаҹағыма доғрудан да һазырлашыраммы? Шаһидлик етдијим инсанлара сәмими мараг ҝөстәрмәји өјрәнмишәмми? Нөвбәти дәфә мүзакирә етмәк үчүн ачыг суал сахлајараг, тәкрар башчәкмә үчүн тәмәл гојураммы? Әҝәр кимәсә Мүгәддәс Китабы өјрәдирәмсә, үрәјә јол тапан мүәллим олмаға чалышыраммы?»
Руһани инкишафыны хидмәтдә сәнә верилән мәсулијјәтләрлә өлчмә. Сәнин тәрәггин алдығын тапшырыглардан јох, онлары неҹә јеринә јетирмәјиндән ҝөрүнәҹәк. Әҝәр тапшырығына өјрәтмәк дә дахилдирсә, өзүндән соруш: «Өјрәтмәк баҹарығындан һәгигәтән дә истифадә етдимми? Материалы гулаг асанларын һәјатына тәсир едәҹәк тәрздә чатдырдыммы?»
Алдығын әнамдан истифадә етмәк өзүнә тәшәббүс ҝөстәрмәји дә дахил едир. Хидмәтдә башгалары илә әмәкдашлыг етмәк үчүн өзүн тәшәббүс ҝөстәрирсәнми? Јығынҹағыныздакы јени, ҝәнҹ, јахуд сағламлығы зәиф олан тәблиғчиләрә көмәк етмәк үчүн фүрсәт ахтарырсанмы? Падшаһлыг Залынын јығышдырылмасында вә ја конгресләрлә бағлы мүхтәлиф ишләрдә көнүллү олараг иштирак едирсәнми? Вахташыры көмәкчи пионер кими хидмәт едә биләрсәнми? Даими пионер кими хидмәт етмәјә вә ја тәблиғчијә даһа чох еһтијаҹ олан јығынҹагда көмәк етмәјә шәраитин јол верирми? Әҝәр гардашсанса, хидмәти көмәкчиләр вә ағсаггаллар үчүн тәләбләрә ҹаваб вермәјә ҹан атырсанмы? Көмәк етмәјә вә үзәринә мәсулијјәт ҝөтүрмәјә һазыр олмағын тәрәгги етмәјинин әламәтидир (Мәз. 110:3).
Тәҹрүбәнин ролу
Әҝәр бир мәсиһчи кими тәҹрүбәнин аз олдуғуну дүшүнүрсәнсә, руһдан дүшмә. Аллаһын Кәламы «наданы [«тәҹрүбәсизи», ЈД] мүдрик едир» (Мәз. 19:7; 119:130; Сүл. мәс. 1:1-4). Мүгәддәс Китабын мәсләһәтләринә әмәл едәндә Јеһованын мүкәммәл мүдриклијиндән фајда әлдә едирик, бу исә тәкҹә тәҹрүбә сајәсиндә әлдә едилән истәнилән биликдән даһа дәјәрлидир. Бунунла белә, Јеһоваја хидмәтдә тәрәгги етдикҹә биз дәјәрли тәҹрүбә топлајырыг. Бу тәҹрүбәдән фајдалы шәкилдә неҹә истифадә едә биләрик?
Һәјатда мүхтәлиф вәзијјәтләрлә үзләшәндә инсанда белә дүшүнмәјә мејл јарана биләр: «Бу ҹүр вәзијјәтә әввәлләр дә дүшмүшәм. Нә етмәк лазым ҝәлдијини билирәм». Бәс бу, мүдриклик олардымы? Сүлејманын мәсәлләри 3:7 ајәсиндә хәбәрдарлыг едилир: «Өз ҝөзүндә өзүнү һикмәтли санма» (Сүл. мәс. 3:7). Һәјатда мүхтәлиф вәзијјәтләрин өһдәсиндән ҝәләркән, сөзсүз ки, әлдә етдијимиз тәҹрүбә сајәсиндә даһа чох амили нәзәрә алаҹағыг. Лакин руһани ҹәһәтдән инкишаф едириксә, тәҹрүбә әлдә етдикҹә зеһнимизә вә үрәјимизә һәкк олунаҹаг ки, Јеһованын хејир-дуасы олмадан уғур газана билмәрик. Белә олдугда бизим тәрәггимиз мүхтәлиф вәзијјәтләрдә өзүмүзә ҝүвәнмәјимиздән јох, һәјатда рәһбәрлик үчүн Јеһоваја үз тутмағымыздан ҝөрүнүр. Бу, баш верән һәр шејә Јеһованын јол вердијинә әминлијимиздә вә сәмави Атамыза етибар едиб, Онунла сәмими мүнасибәтләри горумағымызда өзүнү бүрузә верир.
Һәмишә ирәлијә ҹан ат
Һәвари Павел руһани ҹәһәтдән јеткин мәсһ олунмуш мәсиһчи олмасына бахмајараг, баша дүшүрдү ки, һәјаты әлдә етмәк үчүн һәмишә ирәлијә ‘ҹан атмалыдыр’ (Филип. 3:13-16). Сән дә онун нөгтеји-нәзәринә шәриксәнми?
Нә дәрәҹәдә тәрәгги етмисән? Инкишафыны јени мәнлији нә дәрәҹәдә ҝејинмәјин, Јеһованын һакимијјәтинә нә дәрәҹәдә табе олмағын вә алдығын әнамлардан Јеһованы иззәтләндирмәк үчүн нә гәдәр сәјлә истифадә етмәјинлә өлч. Теократик Хидмәт Мәктәбиндә тәлим алдыгҹа, Аллаһын Кәламында адлары чәкилән кејфијјәтләр сәнин данышыг вә өјрәтмә тәрзиндә ҝетдикҹә өзүнү бүрузә вермәлидир. Бу саһәләрдә инкишаф етмәјә диггәт јетир. Бунлардан севинҹ дуј. Белә олдугда, сәнин тәрәггин һамыја ашкар олаҹаг.