Мәсиһчи бирлијимиз Аллаһа иззәт ҝәтирир
«Руһун бирлијини горумаға үрәкдән чалышын» (ЕФЕС. 4:3).
1. Биринҹи әсрдә Ефесдә јашајан мәсиһчиләр Аллаһы неҹә иззәтләндирирдиләр?
ГӘДИМ Ефес јығынҹағында һөкм сүрән бирлик һәгиги Аллаһ олан Јеһованы иззәтләндирирди. Бөјүк тиҹарәт мәркәзи олан бу шәһәрдә јашајан мәсиһчиләрин бәзиләри варлы гулдарлар олдуғу һалда, диҝәрләри гул, ја да олдугҹа касыб идиләр (Ефес. 6:5, 9). Башгалары һәвари Павелин үч ај әрзиндә синагогда тәблиғ едәркән һәгигәти онун дилиндән ешидән јәһудиләр иди. Диҝәрләри исә әввәлләр Артемида илаһәсинә ибадәт едир вә сеһрбазлыгла мәшғул олурдулар (Һәв. иш. 19:8, 19, 26). Ҝөрдүјүмүз кими, һәгиги дин ҹәмијјәтин мүхтәлиф тәбәгәләриндән олан инсанлары бирләшдирмишди. Павел јахшы билирди ки, јығынҹагда һөкм сүрән бирлик Јеһованы иззәтләндирир. О демишди: «[Јеһоваја] јығынҹаг... васитәсилә ешг олсун» (Ефес. 3:21).
2. Ефес јығынҹағынын бирлијини тәһлүкә гаршысында гојан нә иди?
2 Лакин Ефес јығынҹағынын бирлији тәһлүкә алтында иди. Павел һәмин јығынҹағын ағсаггалларыны хәбәрдар едирди: «Сизин араныздан адамлар пејда олаҹаг вә шаҝирдләри ардынҹа апармаг үчүн һәгигәти тәһриф едәҹәкләр» (Һәв. иш. 20:30). Бундан әлавә, бәзи гардашлар Павелин һаггында данышдығы «итаәтсиз адамларда фәалијјәт ҝөстәрән» вә нифаг салан руһдан тамамилә азад олмамышдылар (Ефес. 2:2; 4:22).
Бирлијин ваҹиблијини вурғулајан мәктуб
3, 4. Павелин ефеслиләрә јаздығы мәктубда бирлијин ваҹиблији неҹә вурғуланыр?
3 Павел дәрк едирди ки, әҝәр мәсиһчиләр бундан сонра да бирҝә әмәкдашлыг етмәк истәјирдиләрсә, онда һәр бири бирлијин һөкм сүрмәси үчүн әлиндән ҝәләни әсирҝәмәмәли иди. Аллаһ Павели әсас мөвзусу бирлик олан «Ефеслиләрә мәктуб»у јазмаға илһамландырмышды. Мәсәлән, Павел јазмышды ки, Аллаһ һәр шеји ‘Мәсиһдә бирләшдирмәји гәрарлашдырыб’ (Ефес. 1:10). О һәмчинин мәсиһчиләри тикилини тәшкил едән мүхтәлиф дашлара бәнзәтмишди. «Бүтүн тикили онунла... һәмаһәнҝ шәкилдә бирләшәрәк уҹалыб Јеһова үчүн мүгәддәс мәбәд олур» (Ефес. 2:20, 21). Бундан әлавә, Павел јәһудиләрдән вә башга милләтләрдән олан мәсиһчиләр арасындакы бирлији вурғулады вә гардашларын һамысынын Аллаһ тәрәфиндән јарадылдығыны хатырлатды. О, Јеһованы Ата адландырараг ‘ҝөјдә вә јердә олан һәр аиләнин өз ады илә [Она] борҹлу олдуғуну’ да гејд етди (Ефес. 3:5, 6, 14, 15).
4 «Ефеслиләрә мәктуб»ун дөрдүнҹү фәслини арашдыраркән нөвбәти суаллара ҹаваб тапаҹағыг: нәјә ҝөрә бирлик үчүн сәј тәләб олунур? Јеһова арамызда бирлији неҹә јарадыр? Бирлији горујуб сахламаға бизә һансы хүсусијјәтләр көмәк едәҹәк? Јахшы оларды ки, бу мәгаләдән даһа чох фајда әлдә етмәк үчүн һәмин фәсли башдан-ајаға кими охујасан.
Нәјә ҝөрә бирлији горумаг үчүн сәј тәләб олунур?
5. а) Нәјин сајәсиндә мәләкләр Аллаһа бирлик ичиндә хидмәт едирләр? б) Бирлијимизи горумағы чәтинләшдирән нәдир?
5 Павел Ефесдәки гардашлара јалварырды: «Руһун бирлијини горумаға үрәкдән чалышын» (Ефес. 4:3). Бунун ваҹиблијини баша дүшмәк үчүн ҝәлин Аллаһын мәләкләринин нүмунәсинә нәзәр салаг. Јер үзүндә јашајан һеч бир ҹанлы диҝәринә там бәнзәмир. Бурадан белә нәтиҹәјә ҝәлирик ки, Јеһованын јаратдығы милјонларла мәләјин һәр бири диҝәриндән фәргләнир (Дан. 7:10). Онларын һамысы Јеһоваја гулаг асдығы вә ирадәсини јеринә јетирдији үчүн вәһдәт ичиндә Она хидмәт едир. (Мәзмур 103:20, 21 ајәләрини оху.) Садиг мәләкләрдән фәргли олараг, мәсиһчиләрин чохлу ҝөзәл хүсусијјәтләри илә јанашы, гүсурлары да вар. Бирлијимизи горумағы чәтинләшдирән дә елә будур.
6. Һансы хүсусијјәтләр мүхтәлиф гүсурлары олан баҹы-гардашлара бир-бири илә әмәкдашлыг етмәјә көмәк едә биләр?
6 Гејри-камил инсанлар бир-бири илә әмәкдашлыг етмәјә чалышанда араларында асанлыгла чәтинликләр јарана биләр. Нүмунә үчүн Јеһоваја бирҝә хидмәт едән ики гардашы ҝөтүрәк. Онлардан бири һәлим, ејни заманда чох вахт ҝеҹикән, диҝәри исә һәмишә вахтында ҝәлән, анҹаг кәмһөвсәләдир. Онлар сәһви бир-бириндә ҝөрә биләрләр. Амма јаддан чыхарырлар ки, онларын өзләриндә дә сәһв вар. Бу ики гардашын Јеһоваја һәмаһәнҝ шәкилдә бирҝә хидмәт етмәси неҹә мүмкүндүр? Ҝәлин ҝөрәк, Павелин нөвбәти ајәләрдә мәсләһәт ҝөрдүјү хүсусијјәтләр онлара неҹә көмәк едә биләр. О јазырды: ‘Сизә јалварырам: там тәвазөкарлыг, һәлимлик, сәбир вә мәһәббәтлә бир-биринизә гаршы дөзүмлү олун, сүлһүн бирләшдириҹи телләри ичиндә руһун бирлијини горумаға үрәкдән чалышын’ (Ефес. 4:1—3).
7. Гејри-камил баҹы-гардашларымызла бирлик ичиндә јашамағы өјрәнмәк нәјә ҝөрә олдугҹа ваҹибдир?
7 Гејри-камил инсанларла бирлик ичиндә Јеһоваја хидмәт етмәји өјрәнмәк олдугҹа ваҹибдир, чүнки јалныз бир һәгиги дин вар. «Дәвәт олундуғунуз үмид бир олдуғу кими, бир бәдән, бир руһ, бир Аға, бир иман, бир вәфтиз вардыр... Бүтүн инсанларын Атасы Аллаһ да бирдир» (Ефес. 4:4—6). Јеһова Өз руһуну вә хејир-дуаларыны јалныз бир халга верир. Һәтта јығынҹагда кимсә бизим хәтримизә дәјсә белә, биз башга һара ҝедә биләрик ки? Әбәди һәјатын сөзләрини јалныз вә јалныз бурада ешитмәк олар (Јәһ. 6:68).
Бирлијимизи мөһкәмләндирән «инсанлар тимсалында һәдијјәләр»
8. Арамызда нифаг сала биләҹәк тәсирләрә гаршы мөһкәм дурмағымыз үчүн Мәсиһ кимләрдән истифадә едир?
8 Павел јығынҹағы бирләшдирмәк үчүн Исанын «инсанлар тимсалында һәдијјәләр»и неҹә вердијини гәдим дөврләрдә әсҝәрләр арасында ҝениш јајылмыш адәтин әсасында әјани шәкилдә ҝөстәрди. Бәзән гәләбә чалмыш әсҝәрләр јаделли әсирләри евләринә ҝәтирирдиләр ки, арвадларына ев ишләриндә көмәк етсинләр (Мәз. 68:1, 12, 18). Буна бәнзәр тәрздә, Исанын бу дүнја үзәриндә гәләбә чалмасы сајәсиндә онун чохлу көнүллү гуллары олду. (Ефеслиләрә 4:7, 8 ајәләрини оху.) Иса бу символик әсирләрдән неҹә истифадә едир? «О, кимини һәвари, кимини пејғәмбәр, кимини мүждәчи, кимини дә чобан вә мүәллим тәјин едиб ки, онлар хидмәт иши үчүн мүгәддәсләри мүкәммәлләшдирсинләр, Мәсиһин бәдәнини мөһкәмләндирсинләр. Нәтиҹәдә биз һамымыз иманда бирлијә... јетишәк» (Ефес. 4:11—13).
9. а) «Инсанлар тимсалында һәдијјәләр» олан нәзарәтчиләр бирлијимизи горумаға неҹә көмәк едирләр? б) Нәјә ҝөрә јығынҹағын һәр бир үзвү бирлији горумаг үчүн әлиндән ҝәләни етмәлидир?
9 Гајғыкеш чобанлар кими, «инсанлар тимсалында һәдијјәләр» олан бу нәзарәтчиләр бизә бирлији горумаға көмәк едирләр. Мәсәлән, јығынҹағын ағсаггалы ики гардашын ‘бир-бирини рәгабәтә тәһрик етдијини’ ҝөрәндә онлара тәкликдә «мүлајимҹәсинә» мәсләһәт верә биләр. Белә етмәклә о, јығынҹағын бирлијини даһа да мөһкәмләндирмиш олур (Галат. 5:26—6:1). Бир мүәллим кими исә, онлар бизә Мүгәддәс Китаб тәлимләри әсасында иманымызы мөһкәмләндирмәјә көмәк едирләр. Бунунла бирлијимизи горујур вә мәсиһчи јеткинлијинә доғру ирәлиләмәкдә бизә дәстәк олурлар. Павел бунун сәбәбини изаһ едәрәк јазырды: «Белә ки, даһа инсанларын фырылдағы, кәләји, усталыгла ујдурдуғу јаланындан доған һәр ҹүр тәлим күләјинин ора-бура апардығы, дәниз далғаларынын атыб-тутдуғу ушаг кими олмајаг» (Ефес. 4:13, 14). Бәдәнимизин һәр бир үзвү диҝәр үзвләри лазыми шејләрлә тәмин едәрәк онлары мөһкәмләндирдији кими, һәр бир мәсиһчи дә үмумдүнја гардашлыг бирлијини мөһкәмләндирмәк үчүн әлиндән ҝәләни әсирҝәмәмәлидир. (Ефеслиләрә 4:15, 16 ајәләрини оху.)
Өзүндә ҝөзәл хүсусијјәтләр јетишдир
10. Әхлагсыз давраныш бирлијимизә неҹә хәләл ҝәтирә биләр?
10 Фикир вердинсә, Павелин ефеслиләрә јаздығы мәктубунун дөрдүнҹү фәслиндә ҝөстәрилир ки, јеткин мәсиһчиләр кими бирлијә наил олмаг үчүн мәһәббәт тәзаһүр етдирмәк зәруридир. Даһа сонра орада буну неҹә едә биләҹәјимиздән бәһс едилир. Әввәла, әсил мәһәббәт ҹинси әхлагсызлыға вә позғун давраныша јол вермир. Павел гардашларыны тәшвиг едирди ки, «башга милләтләр кими» давранмасынлар. Белә инсанлар «абыр-һәјаны бүсбүтүн итирәрәк... өзләрини позғунлуг ҝирдабына гәрг едибләр» (Ефес. 4:17—19). Јашадығымыз позғун дүнја бирлијимизи тәһлүкә алтына алыр. Инсанлар әдәбсиз ләтифәләр сөјләјир, әхлагсызлығы тәрәннүм едән маһнылар охујур, верилишләрә, филмләрә вә клипләрә бахырлар; онлар истәр ҝизлинҹә, истәрсә дә ачыгҹа әхлагсызлыг едирләр. Һәтта ешгбазлыг етмәк, јәни аилә гурмаг фикриндә олмадығы инсана ҝуја ондан хошу ҝәлдијини ҝөстәрмәк белә мәсиһчини Јеһовадан вә јығынҹагдан узаглашдыра биләр. Нәјә ҝөрә? Чүнки бу, асанлыгла әхлагсызлыгла нәтиҹәләнә биләр. Үстәлик, аиләли инсанын зинаја ҝәтириб чыхаран бу һәрәкәти ушаглары валидејнләриндән, ҝүнаһсыз тәрәфи исә һәјат јолдашындан гәддарҹасына ајыра биләр. Һәгигәтән дә, бу, бирлији позур! Буна ҝөрә дә Павел һаглы олараг нөвбәти сөзләри дејир: «Сиз Мәсиһи белә танымамысыныз»! (Ефес. 4:20, 21).
11. Мүгәддәс Китаб мәсиһчиләри һансы дәјишикликләри етмәјә сәсләјир?
11 Павел бирлијимизи позан дүшүнҹә тәрзиндән гачынмағын вә башгалары илә сүлһ вә бирлик ичиндә јашамаға көмәк едән хүсусијјәтләри инкишаф етдирмәјин ваҹиблијини вурғуламышды. Биз охујуруг: «Әввәлки давраныш тәрзинизә хас олан вә алдадыҹы арзулары илә позғунлашан көһнә шәхсијјәти әјниниздән чыхармалы, әглинизи һәрәкәтә ҝәтирән гүввә илә јениләшмәли, Аллаһын ирадәси илә һәгиги салеһлик вә сәдагәт ичиндә јарадылмыш јени шәхсијјәтә бүрүнмәлисиниз» (Ефес. 4:22—24). Бәс биз ‘әглимизи һәрәкәтә ҝәтирән гүввә илә’ неҹә ‘јениләшә’ биләрик? Бунун үчүн Аллаһын Кәламындан вә јеткин мәсиһчиләрин нүмунәсиндән өјрәндијимиз шејләрин үзәриндә миннәтдарлыгла дүшүнәрәк әлимиздән ҝәләни етмәлијик. Белә етдијимиз тәгдирдә биз «Аллаһын ирадәси илә... јарадылмыш» јени шәхсијјәтә бүрүнә биләрик.
Нитг әнамындан дүзҝүн истифадә етмәји өјрән
12. Һәгигәти данышмаг бирлијә неҹә сәбәб олур вә нәјә ҝөрә дүрүст олмаг бәзиләринә чәтиндир?
12 Аиләдә вә јығынҹагда һәгигәти сөјләмәк хүсусилә ваҹибдир. Сәмими, ачыг вә мүлајим данышыг тәрзи инсанлары бир-биринә јахынлашдырыр (Јәһ. 15:15). Инсан јахынларына јалан данышса вә сонрадан бу үзә чыхса, онларын бир-биринә олан етибары сарсылаҹаг. Павелин нөвбәти сөзләри нәјә ҝөрә јаздығыны баша дүшмәк чәтин дејил. О демишди: «Гој һәр кәс јахынына һәгигәти сөјләсин, чүнки биз һамымыз бир бәдәнин үзвләријик вә бир-биримизә мәхсусуг» (Ефес. 4:25). Истәр ушаглыгдан, истәрсә дә сонрадан јалан данышмаға вәрдиш едән инсанлара дәјишилмәк чәтин ола биләр. Јеһова белә инсанларын сәјини гијмәтләндирир вә онлара көмәк едир.
13. Инсан тәһгирамиз данышыға неҹә сон гоја биләр?
13 Јеһова бизә данышығымыза ҹидди фикир вермәји өјрәдәрәк јығынҹагда вә аиләдә бир-биримизин һөрмәтини сахламаға вә бирлијимизи горумаға көмәк едир. «Гој дилиниздән һеч бир пис сөз чыхмасын... Гој кин, һирс, гәзәб, гышгырыг, тәһгирамиз данышыг, үмумијјәтлә һәр ҹүр пислик сиздән узаг олсун» (Ефес. 4:29, 31). Тәһгирамиз данышыгдан гачынмаг үчүн башгаларына даһа чох һөрмәт етмәји өјрәнмәлијик. Мәсәлән, арвады илә кобуд данышан әр Јеһованын гадынлара неҹә јанашдығыны өјрәндикҹә она гаршы мүнасибәтини дәјишмәјә чалышмалыдыр. Аллаһ һәтта бәзи гадынлары мүгәддәс руһла мәсһ едәрәк Мәсиһин һакимијјәт шәрикләри олмаг шәрәфинә лајиг ҝөрүб (Галат. 3:28; 1 Пет. 3:7). Һәмишә әринин үстүнә гышгыран гадын исә Исадан нүмунә ҝөтүрмәли вә дәјишилмәлидир. Башгалары Исаны һөвсәләдән чыхаранда белә о, өзүнә һаким олурду (1 Пет. 2:21—23).
14. Өзүндән чыхмаг нәјә ҝөрә тәһлүкәлидир?
14 Тәһгирамиз данышыг чох вахт гәзәби ҹиловламамагдан ирәли ҝәлир. Бу да бир-биринә јахын олан инсанларын арасына нифаг сала биләр. Гәзәб алов кимидир. О, тез бир заманда нәзарәтдән чыха вә фәлакәт төрәдә биләр (Сүл. мәс. 29:22). Наразылығыны билдирмәјә әсасы олса да, инсан башгалары илә ҝөзәл мүнасибәтләринә хәтәр дәјмәсин дејә вар ҝүҹү илә гәзәбини ҹиловламаға чалышмалыдыр. Мәсиһчиләр бир-бирини бағышламалы, ҝилеј-ҝүзар етмәмәли вә олуб-кечәнләри дилә ҝәтирмәмәлидирләр (Мәз. 37:8; 103:8, 9; Сүл. мәс. 17:9). Павел ефеслиләрә мәсләһәт ҝөрүрдү: «Гәзәбләнсәниз дә ҝүнаһ ишләмәјин; гој һирсиниз ҝүн батмамыш сојусун, Иблисә фүрсәт вермәјин» (Ефес. 4:26, 27). Гәзәбини ҹиловламајан инсан Иблисә јығынҹагда бирлији позмаға вә һәтта араја мүнагишә салмаға шәраит јарадыр.
15. Башгасынын әшјасыны иҹазәсиз ҝөтүрмәк нә илә нәтиҹәләнә биләр?
15 Јығынҹагда бирлији горујуб сахламаг үчүн биз башгаларынын әшјаларыны иҹазәсиз ҝөтүрмәмәлијик. Мүгәддәс Китабда дејилир: «Оғурлуг едән даһа оғурлуг етмәсин» (Ефес. 4:28). Јеһованын халгы арасында бир-биринә етибар вар. Әҝәр мәсиһчи бу етибардан суи-истифадә едәрәк башгасынын әшјасыны иҹазәсиз ҝөтүрәрсә, бирлијимизә зәрәр вурмуш олаҹаг.
Бизи бирләшдирән Аллаһ севҝиси
16. Бирлијимизи мөһкәмләндирмәк үчүн нитг әнамындан неҹә истифадә етмәлијик?
16 Аллаһа олан мәһәббәт һәр биримизи башгаларыны севмәјә тәшвиг едир ки, бунун да нәтиҹәсиндә мәсиһчи јығынҹағында бирлик һөкм сүрүр. Аллаһын хејирхаһлығына ҝөрә миннәтдарлыг бизи нөвбәти мәсләһәтә ҹанла-башла риајәт етмәјә тәшвиг едир: «Зәрурәтә ҝөрә иманы мөһкәмләндирән сөз сөјләјин ки, сизи динләјәнләрә фајда ҝәтирсин. Бир-биринизә гаршы хејирхаһ, шәфгәтли олун, Аллаһ Мәсиһ васитәсилә сизи үрәкдән бағышладығы кими, сиз дә бир-биринизи үрәкдән бағышлајын» (Ефес. 4:29, 32). Јеһова бизим кими гејри-камил инсанлары үрәкдән бағышлајыр. Башгаларынын гејри-камиллијини ҝөрәндә биз дә онлары бағышламалы дејиликми?
17. Нәјә ҝөрә биз вар ҝүҹүмүзлә бирлијимизи горумаға чалышмалыјыг?
17 Јеһованын халгы арасындакы бирлик Она иззәт ҝәтирир. Онун руһу бизи бирлији горумаға тәшвиг едир. Әлбәттә, биз мүгәддәс руһун рәһбәрлијинә гаршы чыхмаг истәмирик. Павел јазмышды: «Аллаһын мүгәддәс руһуну кәдәрләндирмәјин» (Ефес. 4:30). Бирлијимиз мисилсиз дәјәрә малик олан хәзинәдир вә ону ҝөз бәбәјимиз кими горумалыјыг. Бу, бизә севинҹ, Јеһоваја исә иззәт ҝәтирир. «Беләликлә, Аллаһын севимли өвладлары олдуғунуз үчүн Она бәнзәмәјә чалышын вә мәһәббәт јолунда јеријин» (Ефес. 5:1, 2).
Неҹә ҹаваб верәрдиниз?
• Һансы хүсусијјәтләр бизә бирлији горумаға көмәк едир?
• Давранышымызла бирлији неҹә горуја биләрик?
• Данышыг тәрзимиз бизә башгалары илә әмәкдашлыг етмәјә неҹә көмәк едәҹәк
[17-ҹи сәһифәдәки шәкил]
Мүхтәлиф инсанлар бирлик ичиндә јашајырлар
[18-ҹи сәһифәдәки шәкил]
Ешгбазлыг етмәјин тәһлүкәли олдуғуну дәрк едирсәнми?