Һагсызлыглара таб ҝәтирин
«Рәббин гулу исә тоггушмаја баш гошмамалы, амма һамы илә сакит рәфтар етмәли... һагсызлыглара таб ҝәтирмәлидир» (2 ТИМОТЕЈӘ 2:24).
1. Хидмәтдә бә’зән нәјә ҝөрә кобуд данышан инсанларла растлашырыг?
ШӘХСӘН сәнә вә һәмиманлыларына пис мүнасибәт бәсләјәнләрлә гаршылашанда неҹә давранырсан? Сон ҝүнләри тәсвир едәркән һәвари Павел пејғәмбәрлик етмишдир ки, инсанлар «күфр данышан... бөһтанчы, нәфсини сахламајан, азғын» олаҹаглар (2 Тимотејә 3:1-5, 12). Еһтимал ки, белә инсанларла хидмәтдә вә ја башга шәраитләрдә растлашмысан.
2. Бизимлә кобудҹасына данышан инсанларла мүдрикликлә давранмағымыза көмәк едә билән Мүгәддәс Китаб ајәләри һансылардыр?
2 Инсан бизимлә кобуд данышырса, бу һеч дә онун әдаләти севмәдијини билдирмир. Даима чәтинликләрлә гаршылашдыглары вә үмидсизлијә гапылдыглары үчүн бә’зиләри өз гәзәбини әтрафдакы инсанларын үзәринә төкүрләр (Ваиз 7:7). Чохлары јашадыглары вә ишләдикләри јердә кобуд нитг ади һала чеврилдији үчүн белә давранырлар. Бу, башгаларынын һансы сәбәбә ҝөрә кобуд данышдыгларыны баша дүшмәкдә көмәк едир, лакин о демәк дејил ки, биз мәсиһчиләр дә бу ҹүр данышыг тәрзини тәглид етмәлијик. Биз кобудлуға неҹә реаксија ҝөстәрмәлијик? Сүлејманын мәсәлләри 19:11 ајәсиндә дејилир: «Инсанын ағлы һиддәти ләнҝидәр». Ромалылара 12:17, 18 ајәләриндә дә бизә мәсләһәт верилир: «Һеч кимә пислик әвәзинә пислик етмәјин... Мүмкүнсә, әлиниздән ҝәлдији гәдәр бүтүн адамларла сүлһдә олун».
3. Хош хәбәри инсанлара чатдырмаг үчүн нәјә ҝөрә сүлһсевәр олмалыјыг?
3 Әҝәр биз доғрудан да сүлһсевәриксә, бу бизим нитгимиздә вә әмәлләримиздә, һәмчинин симамызда вә сәсимизин тонунда әкс олунаҹаг (Сүлејманын мәсәлләри 17:27). Һәвариләрини тәблиғ етмәјә ҝөндәрәндә Иса онлара тапшырмышды: «Евә ҝирәркән ев сакинләрини саламлајын [«ев сакинләринә сүлһ диләјин», The New English Bible]. Әҝәр о ев ләјагәтли исә, саламыныз [сүлһүнүз] онун үзәринә ҝәлсин; ләјагәтли дејилсә, саламыныз [сүлһүнүз] сизә ҝери дөнсүн» (Матта 10:12, 13). Инсанлара чатдырдығымыз хәбәр хош хәбәрдир. Мүгәддәс Китаб ону «сүлһ Мүждәси», «Аллаһын лүтфү һаггындакы Мүждә» вә ‘Падшаһлыг һаггында олан Мүждә’ адландырыр (Ефеслиләрә 6:15; Һәвариләрин ишләри 20:24; Матта 24:14, И–93). Бизим мәгсәдимиз башгаларынын е’тигадыны тәнгид етмәк вә ја онларла мүбаһисә апармаг јох, Аллаһын Кәламындан олан хош хәбәри бөлүшмәкдир.
4. Ҝәлишинин мәгсәдини билдирмәјә маҹал тапмамыш ев саһиби сәнә «бу мәни марагландырмыр» дејәндә, нә демәк олар?
4 Мисал үчүн ев саһиби бизи ахыраҹан динләмәјиб «бу мәни марагландырмыр» дејә, сөзүмүзү кәсә биләр. Онда белә демәк олар: «Мән сизин үчүн Мүгәддәс Китабдан јалныз бир ајә охумаг истәрдим». Ола билсин, һәмин адам буна е’тираз етмәсин. Башга һалларда исә белә демәк олар: «Садәҹә олараг ону демәк истәјирдим ки, тезликлә јер үзүндә әдаләтсизлик олмајаҹаг вә бүтүн инсанлар бир-биринә мәһәббәт бәсләјәҹәкләр». Әҝәр ајдын олса ки, һәмсөһбәтин динләмәк истәмир, әлавә олараг дејә биләрсән: «Дејәсән вахтында ҝәлмәмишик». Һәтта ев саһиби бизә сәрт ҹаваб версә белә, биз белә бир нәтиҹәјә ҝәлмәлијикми ки, о ‘ләјагәтли дејил’? Инсанларын реаксијасындан асылы олмајараг, Мүгәддәс Китабын бизә ‘һамы илә сакит рәфтар етмәји... һагсызлыглара таб ҝәтирмәји’ мәсләһәт етдијини јадда сахламалыјыг (2 Тимотејә 2:24).
Ҹаһил тә’гибчи
5, 6. Шаул Исанын давамчылары илә неҹә давранырды вә нәјә ҝөрә?
5 Ерамызын биринҹи әсриндә Шаул адлы бир адам кобуд данышығы вә амансызлығы илә танынмышдыр. Мүгәддәс Китабда дејилир ки, о ‘Рәббин шаҝирдләринә гаршы өлүм вә тәһдидләрлә нәфәс алырды’ (Һәвариләрин ишләри 9:1, 2). О, сонрадан күфр данышан вә тә’гибчи олдуғуну е’тираф етмишдир (1 Тимотејә 1:12). Ола билсин, Шаулун гоһумларындан бә’зиләри артыг мәсиһчи идиләр, лакин буна бахмајараг о, Мәсиһин давамчыларына пис јанашырды. О дејирди: «Күфр етмәјә мәҹбур етмәјә чалышдым. Онлара гаршы һәддиндән артыг азғынлашыб, һәтта, јад шәһәрләрдә белә, онлары тә’гиб едирдим» (Һәвариләрин ишләри 23:16; 26:11; Ромалылара 16:7, 11). Амма Шаулун бу ҹүр давранмасына бахмајараг мәсиһчиләрин онунла мүбаһисәјә ҝиришмәләри һагда һеч бир мә’лумат јохдур.
6 Шаул нәјә ҝөрә белә давранырды? Илләр кечдикдән сонра о јазырды: «[Мән] ҹаһиллик вә имансызлыгла һәрәкәт едирдим» (1 Тимотејә 1:13). О ‘әҹдадларынын гануну әсасында ҹидди тәрбијә олунмуш’ фәрисеј иди (Һәвариләрин ишләри 22:3). Шаулун мүәллими Гамлијел ҝениш дүнја ҝөрүшүнә малик олса да, онун үнсијјәтдә олдуғу баш каһин Гајафа фанатик иди. Гајафа Иса Мәсиһин е’дам олунмасына ҝәтириб чыхаран суи-гәсдин башчысы иди (Матта 26:3, 4, 63-66; Һәвариләрин ишләри 5:34-39). Бир гәдәр сонра Гајафа һәвариләри дөјмәк әмри вермиш вә онлара Исанын ады илә тәблиғ етмәји ҹидди сурәтдә гадаған етмишдир. Гајафанын сәдрлик етдији Синедрионун иҹласындан Стефан даша басылмаг үчүн бајыра чыхарылмышдыр (Һәвариләрин ишләри 5:27, 28, 40; 7:1-60). Шаул Стефанын е’дам едилмәсини мүшаһидә едирди. Гајафа она Исанын Дәмәшгдәки давамчыларыны јахаламаг вә фәалијјәтләрини дајандырмаг үчүн сәлаһијјәт вермишди (Һәвариләрин ишләри 8:1; 9:1, 2). Гајафа Шаулу һимајә етдији үчүн, о елә дүшүнүрдү ки, онун һәрәкәтләри Аллаһ үчүн ҝөстәрдији сә’ји сүбут едир; әслиндә исә онун иманы чатмырды (Һәвариләрин ишләри 22:3-5). Мәһз бу сәбәбдән Шаул Исанын һәгигәтән дә Мәсиһ олдуғуну баша дүшмүрдү. Лакин дирилдилмиш Иса Дәмәшгә ҝедән јолда онунла мө’ҹүзәви шәкилдә данышанда о, буну дәрк етди (Һәвариләрин ишләри 9:3-6).
7. Дәмәшг јолунда Иса илә растлашдыгдан сонра Шаулла нә баш верди?
7 Бир гәдәр сонра Һананја адлы бир мәсиһчијә Шаулун јанына ҝедиб она тәблиғ етмәк тапшырығы верилди. Бу тапшырыг сәнә верилсәјди, өзүнү неҹә һисс едәрдин? Һананја бу тә’гибчидән горхса да, онунла мүлајим данышды. Иса илә Дәмәшг јолунда растлашдыгдан сонра, Шаулда бөјүк дәјишикликләр баш верди (Һәвариләрин ишләри 9:10-22). О, сонрадан һәвари Павел сә’јлә тәблиғ едән мәсиһчи миссионери кими танынмаға башлады.
Һәлим, лакин ҹәсарәтли
8. Иса өз Атасыны тәглид едәрәк ҝүнаһкарларла неҹә давранырды?
8 Иса Падшаһлыг һаггында сә’јлә тәблиғ едирди, һәмчинин о һәлим, лакин инсанларла мүнасибәтдә ҹәсарәтли иди (Матта 11:29). О, пис адамлары өз јолларындан дөнмәјә дә’вәт едән сәмави Атасынын дүшүнҹә тәрзини тәглид едирди (Јешаја 55:6, 7). Әҝәр ҝүнаһкарлар јахшылыға тәрәф дәјишикликләр едирдиләрсә, онда Иса буна диггәт јетирир вә онлары руһландырырды (Лука 7:37-50; 19:2-10). Инсанлар һагда заһири ҝөрүнүшүнә ҝөрә нәтиҹә чыхармаг әвәзинә, өз Атасы кими Иса онлары хејирхаһлыг, мүлајимлик вә сәбирлә төвбәјә ҝәтирмәјә чалышырды (Ромалылара 2:4). Јеһованын ирадәси ондан ибарәтдир ки, мүхтәлиф мәншәли инсанлар төвбәјә ҝәлсин вә хилас олсун (1 Тимотејә 2:3, 4).
9. Јешаја 42:1-4 ајәләриндә јазылан пејғәмбәрликдән Иса һаггында нә өјрәнирик?
9 Маттанын јаздығы Мүждәдә Јеһованын Иса Мәсиһә мүнасибәти һаггында пејғәмбәрлик сөзләри ҝәтирилир: «Будур, Мәним сечдијим Бәндә; Мәним мәһәббәтим Ондадыр вә ҹаным Ондан разыдыр. Руһуму Онун үзәринә гојаҹағам, вә халглара әдаләт е’лан едәҹәкдир. О, нә мүбаһисә вә нә дә фәрјад едәҹәкдир; вә һеч ким күчәләрдә Онун сәсини ешитмәјәҹәкдир. Әдаләти зәфәрә чатдырмајынҹа, әзилмиш гамышы гырмајаҹаг, вә түстүләнән пилтәни сөндүрмәјәҹәкдир. Вә халглар Онун адына үмид бағлајаҹаглар» (Матта 12:17-21; Јешаја 42:1-4). Бу пејғәмбәрлик сөзләринә мүвафиг олараг Иса сәс-күјлү мүбаһисәләрдә иштирак етмирди. Һәтта чәтин вәзијјәтләрдә белә Иса һәгигәти елә бир тәрздә данышырды ки, сәмими инсанлар һејрәтә ҝәлирди (Јәһја 7:32, 40, 45, 46).
10, 11. а) Фәрисејләрин әксәријјәти онун әлејһинә олсалар да, Иса нәјә ҝөрә онлара тәблиғ едирди? б) Бә’зи һалларда Иса онун әлејһинә оланлара неҹә ҹаваб верирди, лакин нәји етмирди?
10 Хидмәт етдији мүддәтдә Иса бир чох фәрисејләрлә сөһбәт етмишдир. Онлардан бә’зиләри ону сөздә тутмаға чалышсалар да, Иса онларын һамысынын пис нијјәтли олдуғуну дүшүнмүрдү (Лука 7:36-50). Исаја тәнгиди јанашан Шимон адлы бир фәрисеј, еһтимал ки, онунла даһа јахындан таныш олмаг үчүн ону шам јемәјинә дә’вәт етди. Иса дә’вәти гәбул етди вә ораја ҝәлиб, Шимона вә онун гонагларына ваҹиб бир дәрс верди (Јәһја 7:46-51). Диҝәр һалда исә Накдимон адлы бир танынмыш фәрисеј ҝеҹәнин бир вахтында Исанын јанына ҝәлмишдир. Иса ону гаранлығын дүшмәсини ҝөзләдијинә ҝөрә мүһакимә етмәди. Әксинә, Накдимона Аллаһын иман едәнләр үчүн хилас јолуну ачмаг мәгсәдилә Оғлуну ҝөндәрмәклә ҝөстәрдији мәһәббәт һаггында данышды. Иса һәмчинин Аллаһын ирадәсинә мүвафиг олараг давранмағын ваҹиб олдуғуну нәзакәтлә ҝөстәрди (Јәһја 3:1-21). Сонралар башга фәрисејләр Иса һаггында һөрмәтсиз тәрздә данышанда, Накдимон ону мүдафиә етмишдир (Јәһја 7:46-51).
11 Иса она манечилик төрәтмәјә чалышанларын ријакарлығына ҝөз јуммурду. О, әлејһинә чыханлара јол вермирди ки, ону бош мүбаһисәләрә ҹәлб етсинләр. Јери ҝәлдикдә, о, принсип сөјләмәклә, әјани нүмунәдән истифадә етмәк вә ја Мүгәддәс Китаб ајәсини ситат ҝәтирмәклә, гыса вә дәгиг ҹаваблар верирди (Матта 12:38-42; 15:1-9; 16:1-4). Диҝәр һалларда, Иса сөјләдији сөзләрин һеч бир дәјишиклик ҝәтирмәјәҹәјини ҝөрәндә, садәҹә олараг сусурду (Марк 15:2-5; Лука 22:67-70).
12. Она гышгыран адамлара белә, Иса неҹә көмәк едирди?
12 Бә’зән мурдар руһларын тә’сири алтында олан адамлар Исанын үстүнә гышгырырдылар. Белә һалларда о, тәмкинлији горујур вә һәтта онлара көмәк етмәк үчүн Аллаһын она вердији гүввәдән истифадә едирди (Марк 1:23-28; 5:2-8, 15). Бу ҝүн дә хидмәт етдијимиз заман кимсә бизә гәзәбләниб гышгырырса, Иса кими тәмкинли олмалы вә јаранмыш вәзијјәти нәвазиш вә нәзакәтлә һәлл етмәлијик (Колослулара 4:6).
Аиләдә
13. Јеһованын Шаһидләри илә Мүгәддәс Китабы өјрәнәнә онун аилә үзвләри бә’зән нәјә ҝөрә мүгавимәт ҝөстәрирләр?
13 Исанын давамчылары олан бизләрә аиләдә тәмкинлији горумаг даһа ваҹибдир. Мүгәддәс Китаб һәгигәтләринин үрәјинә дәрин из бурахдығы кәс сәмими гәлбдән истәјир ки, онун јахын гоһумлары Аллаһын Кәламына һај версинләр. Лакин Исанын дедији кими, аилә үзвләри буна мәнфи мүнасибәт бәсләјә биләрләр (Матта 10:32-37; Јәһја 15:20, 21). Бу мүхтәлиф сәбәбләрдән баш верә биләр. Бир тәрәфдән, Мүгәддәс Китаб бизи виҹданлы вә мәс’улијјәтли олмаға, һәмчинин башгаларына һөрмәт етмәјә өјрәдир. Диҝәр тәрәфдән исә, Мүгәддәс Јазылара әсасән, һәр бир шәраитдә биз илк нөвбәдә Јарадана табе олмалыјыг (Ваиз 12:1, 13; Һәвариләрин ишләри 5:29). Јеһоваја олан сәдагәтимизи горудуғумуз үчүн, аилә үзвләриндән кимсә нүфузунун азалдығыны дүшүнәрәк, биздән инҹијә биләр. Белә һалларда Иса кими тәмкинлији горумаг чох ваҹибдир! (1 Петер 2:21-23; 3:1, 2).
14-16. Әввәлләр аилә үзвләринин иманына мүгавимәт ҝөстәрән бә’зиләринә дәјишилмәкдә нә көмәк етди?
14 Һазырда Јеһоваја хидмәт едәнләрин бир чоху Мүгәддәс Китабы өјрәнмәјә башлајанда вә һәјатларында дәјишикликләр едәндә, өз һәјат јолдашы вә ја диҝәр гоһумлары тәрәфиндән мүгавимәтә мә’руз галмышлар. Еһтимал ки, аилә үзвләри Јеһованын Шаһидләри һагда мәнфи рә’јләр ешитдикләринә ҝөрә, аиләдә проблемләрин јаранаҹағындан горхмушлар. Өз фикирләрини дәјишмәкдә онлара нә көмәк етмишдир? Әксәр һалларда Мүгәддәс Китабы өјрәнән адамын јахшы нүмунәси мүһүм рол ојнамышдыр. Имана саһиб оланын Мүгәддәс Китабда верилән рәһбәрлијә ардыҹыллыгла риајәт етдијинә ҝөрә, бә’зи һалларда онун гоһумлары јумшалырдылар. Бура мүнтәзәм олараг јығынҹаг ҝөрүшләриндә вә хидмәтдә иштирак етмәк, аилә үзвләринә гајғы ҝөстәрмәк вә һәр бир тәһгирә бахмајараг, тәмкинлији горумаг аиддир (1 Петер 2:12).
15 Ола билсин, өјрәнәнләрин бә’зи гоһумлары јанлыш фикирләрә вә ја мәғрурлуға ҝөрә башланғыҹда Мүгәддәс Китаб һаггында һеч ешитмәк дә истәмирдиләр. Бирләшмиш Штатларда јашајан вә өзүнү вәтәнпәрвәр һесаб едән бир киши, һәјат јолдашынын вилајәт конгресинә ҝетдији үчүн өзүнә мәхсус олан әшјалары јығыб евдән ҝетди. Нөвбәти дәфә исә о, әлиндә түфәнҝ евдән бајыра чыхыб өзүнү өлдүрмәклә һәдәләјирди. Бу ҹүр ағылсыз һәрәкәтләриндә өз арвадынын динини ҝүнаһландырырды. Лакин буна бахмајараг, баҹымыз Мүгәддәс Китаб принсипләринә риајәт етмәји давам етдирирди. О, Јеһованын Шаһиди олдугдан ијирми ил сонра, әри дә Шаһид олду. Албанијада јашајан бир гадын гызынын Јеһованын Шаһидләри илә Мүгәддәс Китабы өјрәндијинә вә сонрадан вәфтиз олундуғуна ҝөрә гәзәбли иди. О, 12 дәфә гызынын Мүгәддәс Китабыны ҹырмышды. Бир дәфә гадын гызынын столун үстүнә гојдуғу Мүгәддәс Китабы ачды. Тәсадүфән Матта 10:36 ајәсини охуду вә анлады ки, орада јазылан сөзләр она аиддир. Лакин јенә дә гызы үчүн нараһат олдуғундан ону ҝәмијә кими јола салды. Бу ҝәми илә гызы башга Шаһидләрлә бирликдә Италијада кечириләҹәк конгресә јола дүшмәли иди. Конгресин нүмајәндәләри арасында һөкм сүрән мәһәббәти, онларын гуҹаглашмаларыны вә тәбәссүмләрини ҝөрәндә, онларын хошбәхт ҝүлүшләрини ешидәндә ананын һиссләри дәјишмәјә башлады. Бир мүддәт сонра о, Мүгәддәс Китабы өјрәнмәјә разы олду. Бу ҝүн о, әввәлләр һәгигәтә мүгавимәт ҝөстәрәнләрә көмәк етмәјә чалышыр.
16 Бир дәфә әлиндә бычаг олан бир киши, Падшаһлыг Залына јахынлашан арвадынын габағыны кәсәрәк, она налајиг сөзләр деди вә кобуд сурәтдә ону иттиһам етди. Гадын нәвазишлә ҹаваб верди: «Падшаһлыг Залына ҝәл вә һәр шеји өз ҝөзләринлә ҝөрәҹәксән». О белә дә етди вә һазырда мәсиһчиләрин јығынҹағында ағсаггал кими хидмәт едир.
17. Мәсиһчи аиләләриндә вәзијјәт ҝәрҝинләшәндә, Мүгәддәс Китабын һансы принсипи көмәк едә биләр?
17 Һәтта мәсиһчи аиләләриндә белә гејри-камиллијин уҹбатындан бә’зән вәзијјәт ҝәрҝинләшә вә кобуд сөзләрә јол верилә биләр. Гәдим Ефес шәһәриндә јашајан мәсиһчиләрә верилән мәсләһәт диггәтәлајигдир: «Гој һәр ҹүр кин, һиддәт, гәзәб, чығырты, күфр, һәр нөв пис нијјәтлә бәрабәр сиздән узаг олсун» (Ефеслиләрә 4:31). Јәгин ки, Ефесдә јашајан мәсиһчиләрә әтраф мүһит, онларын гејри-камиллији вә әввәлки јашајыш тәрзи тә’сир ҝөстәрирди. Дәјишикликләр етмәкдә онлара нә көмәк едә биләрди? Онлар ‘руһән вә әглән јениләшмәли идиләр’ (Ефеслиләрә 4:32). Аллаһын Кәламыны өјрәнмәли, һәјатларына неҹә тә’сир ҝөстәрәҹәји үзәриндә дүшүнмәли, һәмиманлылары илә үнсијјәтдә олмалы вә үрәкдән дуа етмәли идиләр. Бу заман руһун сәмәрәси онларын һәјатларынын һәр бир саһәсиндә өз тә’сирини ҝөстәрәрди. Ефеслиләр ‘бир-биринә гаршы лүтфкар, шәфгәтли олмалы вә Аллаһ Мәсиһдә онлары бағышладығы кими, онлар да бир-бирини бағышламағы’ өјрәнмәли идиләр (Ефеслиләрә 4:32). Башгаларынын нә етдијиндән асылы олмајараг биз тәмкинли, шәфгәтли, лүтфкар вә бағышламаға һазыр олмалыјыг. Һәгигәтән дә биз ‘пислик әвәзинә пислик етмәли’ дејилик (Ромалылара 12:17, 18). Аллаһы тәглид едәрәк, мәһәббәт тәзаһүр етдирмәк һәр вахт ән јахшы давраныш тәрзидир (1 Јәһја 4:8).
Бүтүн мәсиһчиләр үчүн нәсиһәт
18. 2 Тимотејә 2:24 ајәсиндә верилән нәсиһәт нәјә ҝөрә Ефесдәки ағсаггаллар үчүн вахтлы-вахтында иди вә бүтүн мәсиһчиләр ондан неҹә фајдалана биләрләр?
18 ‘Һагсызлыглара таб ҝәтирмәк’ нәсиһәти бүтүн мәсиһчиләрә аиддир (2 Тимотејә 2:24). Лакин бу нәсиһәт илк нөвбәдә Ефес шәһәриндә ағсаггал кими хидмәт едән Тимотејә верилмишдир. Јығынҹаг үзвләринин бә’зиләри шәхси бахышларыны вә јалан тә’лимләри јајырдылар. Онлар Мусанын Ганунунун мәғзини ахыра гәдәр баша дүшмүрдүләр вә имана, мәһәббәтә вә тәмиз виҹдана кифајәт гәдәр әһәмијјәт вермирдиләр. Онларын мәғрурлуғу фикир ајрылығына сәбәб олурду, чүнки онлар Мәсиһин тә’лимләринин мәғзини вә Аллаһа садиг галмағын нә дәрәҹәдә ваҹиб олдуғуну баша дүшмәјәрәк, сөзләрә ҝөрә мүбаһисә едирдиләр. Јаранмыш вәзијјәти һәлл етмәк үчүн Тимотеј Мүгәддәс Китаб һәгигәтинә там сурәтдә риајәт етмәли вә ејни заманда гардашларла мүлајим давранмалы иди. Бизим ҝүнләрдә хидмәт едән ағсаггаллар кими, Тимотеј дә билирди ки, сүрү она мәхсус дејил вә башгалары илә елә рәфтар етмәк лазымдыр ки, мәсиһчи мәһәббәти вә бирлији даһа да мөһкәмләнсин (Ефеслиләрә 4:1-3; 1 Тимотејә 1:3-11; 5:1, 2; 6:3-5).
19. Нәјә ҝөрә бизим һәр биримиз үчүн ‘тәвазөкарлыға мејл салмаг’ ваҹибдир?
19 Аллаһ Өз халгыны ‘тәвазөкарлыға мејл салмаға’ тәшвиг едир (Сефанја 2:3). «Тәвазөкарлыг» кими тәрҹүмә олунан ибрани ифадәси тәһгирләрә сәбрлә дөзән, әсәбиләшмәјән вә пислијә писликлә ҹаваб вермәјән инсана аид едилир. Ҝәлин чәтин вәзијјәтләрдә белә тәмкинлији горумаг вә Јеһованы лајигинҹә тәмсил етмәк үчүн Ондан тә’кидлә көмәк истәјәк.
Сиз нә өјрәндиниз?
• Тәһгир едилдијимиз заман Мүгәддәс Китабын һансы ајәләри бизә көмәк едә биләр?
• Шаул нәјә ҝөрә кобуд инсан иди?
• Иса Мәсиһин нүмунәси мүхтәлиф мәншәли инсанларла рәфтар етмәкдә неҹә көмәк едир?
• Аилә үзвләримизлә үнсијјәт едәркән нәјә ҝөрә нитгимизә диггәт јетирмәлијик?
[10-ҹу сәһифәдәки шәкил]
Һананјанын Шаул һагда ешитдикләри пис олса да, она гаршы хејирхаһ иди.