Јалныз әмәлләрлә дејил, Аллаһын лүтфү илә хилас олдуг
«Иманла хилас олдунуз... Әмәлләрдән асылы дејил ки, һеч ким өјүнмәсин» (ЕФЕСЛЫЛӘРӘ 2:8, 9).
1. Мәсиһчиләр башгаларындан фәргли олараг, әлдә етдикләри наилијјәтләрә неҹә мүнасибәт бәсләјирләр вә нә үчүн?
БИЗИМ ҝүнләрдә инсанлар әлдә етдикләри наилијјәтләрилә фәхр едиб тез-тез онларла өјүнүрләр. Амма Мәсиһин давамчылары белә етмир. Мәсиһчиләр өз шәхси наилијјәтләрини, һәтта Аллаһа хидмәтдә етдикләри ишләрини белә нәзәрә чарпдырмаға чалышмырлар. Јеһованын хидмәтчиләри Аллаһын халгынын дүнја мигјасында ҝөрдүјү ишләринә ҝөрә чох севинирләр. Анҹаг бу бөјүк ишдә өз роллары илә өјүнмүрләр. Онлар хидмәтдә дүзҝүн мотивләрин шәхси наилијјәтләрдән даһа ваҹиб олдуғуну анлајырлар вә әминдирләр ки, ҝәләҹәкдә әбәди һәјат ән’амыны шәхси ишләринә ҝөрә дејил, инамларына вә Аллаһын лүтфүнә ҝөрә алаҹаглар (Лука 17:10; Јәһја 3:16).
2, 3. Павел нә илә ‘өјүнүрдү’ вә нә үчүн?
2 Һәвари Павел дә буну јахшы дәрк едирди. ‘Бәдәниндәки нештәрдән’ гуртулмаг үчүн Аллаһа үч дәфә дуа етдикдән сонра Јеһова она белә ҹаваб верир: «Лүтфүм сәнә јетәр; чүнки Мәним гүдрәтим зәифликдә камилләшир». Павел Аллаһдан ҝәлән бу ҹавабы һәлимликлә гәбул едиб дејир: «Буна ҝөрә, даһа чох өз зәифликләримлә мәмнунијјәтлә өјүнәҹәјәм ки, Мәсиһин гүдрәти ичимдә сакин олсун». Биз дә Павел кими, һәлим олмалыјыг (2 Коринфлиләрә 12:7-9).
3 Бир мәсиһчи кими Павел бөјүк ишләр ҝөрсә дә, е’тираф едирди ки, онлары һансыса хүсуси габилијјәтинин сајәсиндә јеринә јетирмир. О тәвазөкарлыгла дејирди: «Бүтүн мүгәддәсләрдән ән кичији олдуғум һалда, Мәсиһин кәшфолунмаз зәнҝинлијини јәһуди олмајанлара мүждәләмәк... лүтфү мәнә бәхш едилди» (Ефеслиләрә 3:8, 9). Павелин бу сөзләриндән нә өз ҝөзүндә салеһ олдуғуну, нә дә етдији ишләрлә өјүндүјүнү ҝөрүрүк. «Аллаһ мәғрурлара гаршы дурур, тәвазөкарлара исә лүтф верир» (Јагуб 4:6; 1 Петер 5:5). Павелин һәлимлијиндән нүмунә ҝөтүрүб биз дә өзүмүзү гардашларымызын ‘ән кичији’ санырыгмы?
«Бир-биринизи өзүнүздән јухары сајын»
4. Нә үчүн башгаларыны өзүмүздән үстүн сајмаг һәмишә асан олмур?
4 Һәвари Павел мәсиһчиләрә мәсләһәт едирди: «Рәгабәт вә ја шөһрәтпәрәстликлә һеч бир шеј етмәјин, амма тәвазөкарлыгла бир-биринизи өзүнүздән јухары сајын» (Филипилиләрә 2:3). Әлбәттә, мәс’улијјәтли вәзифә дашыјырыгса, бу мәсләһәтә әмәл етмәк о гәдәр дә асан дејил. Ола биләр, дүнјаја һаким олан рәгабәт руһу бизә дә мүәјјән дәрәҹәдә өз тә’сирини ҝөстәриб. Мәсәлән, бәлкә һәлә ушаг икән евдә баҹы-гардашларымызла вә ја мәктәбдә синиф јолдашларымызла рәгабәт апармаға өјрәшмишдик. Јахуд мәктәбдә бизи даима ән габагҹыл шаҝирд вә ја мәктәбин ән јахшы идманчысы адыны дашымаға тәшвиг едирдиләр. Сөзсүз ки, һәр һансы бир иши јахшы јеринә јетирмәк үчүн әлимиздән ҝәләни етмәјимиз тәгдирәлајигдир. Амма унутмајаг ки, мәсиһчиләр һәр һансы бир иши едәндә буну шан–шөһрәт хатиринә дејил, башгаларына фајда ҝәтириб өзләринин руһланмасы үчүн едирләр. Буна бахмајараг, һәмишә илк сыраларда олуб тә’риф алмаг истәји тәһлүкәли ола биләр. Соруша биләрсән: ахы неҹә?
5. Дахилимиздәки рәгабәт руһуну ҹиловламасаг, о нәјә ҝәтириб чыхара биләр?
5 Әҝәр бир кәс дахилиндә ҝизләнән рәгабәт вә ја егоизм руһуну ҹиловламаса, ҝет-ҝедә башгаларына һөрмәти азалаҹаг вә артыг һеч кими бәјәнмәјәҹәк. Белә инсан башгаларынын габилијјәтләринә вә ја јығынҹагда малик олдуғу үстүнлүкләринә пахыллыг етмәјә башлаја биләр. Сүлејманын мәсәлләри 28:22 ајәсиндә дејилир: «Хәсис вар-дөвләт ардынҹа дүшәр, билмәдән јохсуллуға јетишәр». О гүррәләниб сәлаһијјәти олмајан бир вәзифәјә вә ја мәс’улијјәтә әл узада биләр. Һәтта өзүнү тәмизә чыхармаг хатиринә башгаларыны тәнгид атәшинә тутуб дејинмәјә дә башлаја биләр. Бу ҹүр һәрәкәтләр мәсиһчијә һеч јарашмыр (Јагуб 3:14-16). Белә инсанлар дүшүнүрләр ки, бүтүн дүнја јалныз онларын әтрафында фырланыр.
6. Мүгәддәс Китаб рәгабәт руһуна даир бизи нәдән хәбәрдар едир?
6 Мүгәддәс Китаб мәсиһчиләри ‘шөһрәтпәрәст олмамаға, бир-бирини һирсләндирмәмәјә, бир-биринә пахыллыг етмәмәјә’ сәсләјир (Галатијалылара 5:26). Ҝөрүнүр, һәвари Јәһја бу ҹүр тора дүшмүш бир мәсиһчи һаггында данышырды: «Мән ҹәмијјәтә бир шеј јаздым, амма араларында рәислик етмәји севән Диотреф бизи гәбул етмир. Буна ҝөрә, әҝәр ҝәлсәм онун ҝөрдүјү ишләри јада салаҹағам. О, һаггымызда пис сөзләр јајыр». Сәнҹә, мәсиһчинин бу ҹүр давранмасы кәдәрли дејилми? (3 Јәһја 9, 10).
7. Иш јериндә рәгабәтлә гаршылашан мәсиһчи өзүнү неҹә апармалыдыр?
7 Сөзсүз ки, мәсиһчи вахташыры рәгабәтлә гаршылашмалы олур. Мәсәлән, дүнјәви ишдә елә олур ки, ејни мәһсулу, јахуд ејни хидмәт нөвүнү тәгдим едән фирма вә ја шәхсләр бир-бирләринин рәгибинә чеврилирләр. Һәтта бу заман да мәсиһчи өз ишини һөрмәтҹил сурәтдә вә мәһәббәтлә апармалыдыр. О гејри-гануни вә Мүгәддәс Китаб принсипләринә зидд ҝедән ишләрә баш гошмајаҹаг вә иш јолдашларынын ичиндә јалныз өз мәнфәәтини ҝүдән адам кими танынмајаҹаг. Белә мәсиһчи һәр һансы бир ишдә һамыдан габагда олмағы һәјатда ән ваҹиб шеј һесаб етмәјәҹәк. Әҝәр мәсиһчи бу ҹүр принсипләрә дүнјәви ишдә риајәт едирсә, онда баҹы-гардашларла мүнасибәтиндә онлара даһа чох риајәт етмәлидир.
Өзүнү башгасы илә мүгајисә етмә
8, 9. а) Јығынҹағын ағсаггаллары нә үчүн бир-бириләри илә рәгабәт апармырлар? б) 1 Петер 4:10 ајәси һансы мә’нада бүтүн мәсиһчиләрә аиддир?
8 Мәсиһчинин өз хидмәтинә олан мүнасибәти ашағыдакы ајәдә ҝөзәл тәсвир едилир: «Гој һәр кәс өз ишини сынасын вә о заман башгасы илә дејил, өзү илә ифтихара сәбәб олсун» (Галатијалылара 6:4, 5). Јығынҹағын ағсаггаллары да бир-бирләри илә рәгабәт апармадыгларыны баша дүшдүкләри үчүн чијин-чијинә чалышыб сых әмәкдашлыг едирләр. Онлардан һәр бири јығынҹағын рифаһы наминә әлиндән ҝәләни етдији үчүн севинҹ һисси дујур. Буну етмәклә онлар сүлһү позан рәгабәт руһунун јаранмасына јол вермир вә јығынҹагда бирлијин олмасына даир ҝөзәл нүмунә верирләр.
9 Ағсаггалларын һамысы ејни дејил. Онлар да бир-бириндән јашларына, һәјат тәҹрүбәсинә вә ја мүәјјән габилијјәтләринә ҝөрә фәргләнирләр. Бу сәбәбдән, Јеһованын тәшкилатында ағсаггаллар мүхтәлиф вәзифә дашыјыр. Ағсаггаллар өз араларында фәрг гојмурлар, чүнки бу мәсләһәт һәмишә онларын јадындадыр: «Һәр кәс, Аллаһын чохҹәһәтли лүтфүнүн јахшы тәсәррүфатчысы кими, алдығы ән’ам илә бир-биринә хидмәт етсин» (1 Петер 4:10). Бу ајә Јеһованын бүтүн хидмәтчиләринә аиддир, белә ки, һамы мүәјјән дәрәҹәдә «ән’ама», јә’ни дәгиг билијә вә мәсиһчи хидмәтиндә иштирак етмәк кими шәрәфли үстүнлүјә маликдир.
10. Мүгәддәс хидмәтимиз Јеһоваја јалныз һансы һалда мәгбул олаҹаг?
10 Бизи мүгәддәс хидмәтә өзүмүзү башгаларындан уҹа тутмаг истәји дејил, мәһәббәт вә Јеһоваја олан сәдагәтимиз тәшвиг едирсә, онда хидмәтимиз Аллаһа хош ҝедәҹәк. Она ҝөрә дә, хидмәтдә етдијимиз ишләрә таразлы нөгтеји-нәзәрлә јанашмаг чох ваҹибдир. Биз башгаларынын мотивләрини билмәсәк дә, Јеһова ‘үрәкләри јохлајыр’ (Сүлејманын мәсәлләри 24:12; 1 Шамуел 16:7). Буну нәзәрә алараг, вахташыры өзүмүзә бу суалы версәк јахшы олар: Јеһоваја хидмәт етмәјә мәни тәшвиг едән нәдир? (Мәзмур 24:3, 4; Матта 5:8).
Ишимизә дүзҝүн мүнасибәт
11. Хидмәтимизлә әлагәдар һансы суаллара ҹаваб версәк јахшы олар?
11 Јеһованын биздән разы галмасы мотивләримизин дүзҝүн олуб-олмамасындан асылыдырса, онда иманымыздан ирәли ҝәлән ишләр нә гәдәр ваҹиб олмалыдыр? Әҝәр хидмәтимизи дүзҝүн мотивлә јеринә јетиририксә, нә гәдәр етдијимизи сајмаг чохму ваҹибдир? Әслиндә бу суаллара ҹаваб версәк јахшы олар. Белә ки биз рәгәмләри иманымыздан үстүн тутмуруг вә фикримизин јалныз јахшы һесабат вермәкдә галмасыны истәмирик.
12, 13. а) Тәблиғ хидмәтимиз һаггында нә үчүн һесабат апарырыг? б) Тәблиғ иши һаггында олан үмумдүнја һесабатына нәзәр салсаг, нәјә севинә биләрик?
12 «Јеһованын ирадәсини јеринә јетирмәк үчүн тәшкил олунмушуг» (рус.) китабында олан бу сөзләрә бир фикир вер: «Иса Мәсиһин еркән давамчылары тәблиғ ишиндә әлдә едилән нәтиҹәләрлә марагланырдылар (Марк 6:30). «Һәвариләрин ишләри» китабында дејилир ки, Пентикост ҝүнү шаҝирдләрин үзәринә мүгәддәс руһ төкүләндә орада 120 нәфәрә јахын адам иштирак едирди. Бир гәдәр вахтдан сонра шаҝирдләрин сајы үч минә, даһа сонра исә беш мин нәфәрә чатды... (Һәв. иш. 1:15; 2:5-11, 41, 47; 4:4; 6:7). Шүбһәсиз, јығынҹағын инкишафы шаҝирдләри чох руһландырырды». Ејни тәрздә, Јеһованын Шаһидләри дә Исанын ашағыдакы сөзләри јеринә јетсин дејә бүтүн дүнјада кечирилән хидмәтләри һагда дәгиг һесабат апармаға чалышырлар. «Сәмави Сәлтәнәт [Падшаһлыг] һаггында олан бу Мүждә милләтләрин һамысына шәһадәт олараг бүтүн дүнјада тәблиғ олунаҹагдыр; вә сон о заман ҝәләҹәк» (Матта 24:14). Бу ҹүр һесабатларын сајәсиндә үмумдүнја тәблиғ ишинин неҹә ирәлиләдијини, һараларда хүсусән көмәјә еһтијаҹ дујулдуғуну, һансы нөв вә һансы мигдарда әдәбијјатын лазым олдуғуну ҝөрмәк олар.
13 Беләликлә, тәблиғ ишимиз һагда һесабат вермәјимиз бизи падшаһлыг хәбәрини даһа сәмәрәли сурәтдә јајмаға тәшвиг едир. Бундан башга, гардашларымызын дүнјанын диҝәр јерләриндә неҹә хидмәт етдикләрини ешидәндә мәҝәр руһланмырыгмы? Тәшкилатымызын бүтүн дүнја үзрә бөјүмәси вә инкишафы һагда өјрәнәндә үрәјимиз севинҹлә долур, даһа чох хидмәт етмәк арзумуз јараныр вә Јеһованын бизә хејир-дуа вердијинә бир даһа әмин олуруг. Үмумдүнја һесабатына шәхси һесабатымызын да дахил олмасы бизи чох фәрәһләндирир. Дүздүр, бизим һесабатымыз јекун һесабатла мүгајисәдә кичикдир, амма о да Јеһованын нәзәриндән јајынмыр (Марк 12:42, 43). Унутма ки, сәнин һесабатын олмасајды, үмумдүнја һесабаты бүтөв олмазды.
14. Тәблиғ вә тә’лим ишиндән башга, Јеһоваја ибадәт өзүнә даһа нәләри дахил едир?
14 Әлбәттә, Јеһованын һәср едилмиш хидмәтчиләри кими, етдијимиз һәр бир шеји һесабатда јазмырыг. Мәсәлән, Мүгәддәс Китабы мүнтәзәм олараг өјрәндијимиз, мәсиһчи јығынҹагларында иштиракымыз вә јахуд јығынҹагда бизә е’тибар едилән мәс’улијјәтләр, баҹы-гардашларымыза ҝөстәрдијимиз көмәк, үмумдүнја Падшаһлыг ишини мадди ҹәһәтдән дәстәкләдијимиз вә саир һаггында һесабатларымызда мә’лумат вермирик. Дүздүр, вердијимиз һесабат бизә тәблиғ ишиндә даһа да сә’јлә иштирак етмәјә вә зәифләмәмәјә көмәк едир. Амма еһтијатлы олмалыјыг ки, јахшы һесабата санки әбәди һәјата дахил олмаға иҹазә верән вәсигә кими мүнасибәт ҝөстәрмәјәк.
«Јахшы ишләрә сә’јли бир халг»
15. Һәјатымызы јалныз әмәлләримизлә хилас едә билмәсәк дә, онлар нәјә ҝөрә ваҹибдир?
15 Сөзсүз ки, јалныз әмәлләримизлә хилас ола билмәрик, амма онлар да аз әһәмијјәт кәсб етмир. Бу сәбәбдән, Мүгәддәс Китаб мәсиһчиләри ‘хүсуси вә јахшы ишләрә сә’јли бир халг’ адландырыр вә онлары бир-бирләрини ‘мәһәббәтә вә хејирли ишләрә тәшвиг’ едир (Титуса 2:14; Ибраниләрә 10:24). Мүгәддәс Китабын Јагуб адлы јазычысы да бу фикри тәсдигләјир: «Бәдән руһ олмадыгда өлү олдуғу кими, иман да әмәлләр олмадыгда өлүдүр» (Јагуб 2:26).
16. Әмәлләримиздән даһа ваҹиб нәдир вә өзүмүзү нәдән ҝөзләмәлијик?
16 Бәли, әмәлләримиз ваҹибдир, амма онлары етмәјә бизи тәшвиг едән һиссләр даһа ваҹибдир. Буна ҝөрә мотивләримизи вахташыры нәзәрдән кечирмәк мүдрик оларды. Һеч бир инсан башгасынын үрәјиндә олан һиссләри дәгиг билмир, бу сәбәбдән, башгаларыны мүһакимә етмәкдән өзүмүзү ҝөзләмәлијик. «Сән кимсән ки, башгасынын гулуну мүһакимә едирсән?» дејә Мүгәддәс Китаб бизә суал верир. «О гул өз ағасы гаршысында һаглы вә ја һагсыз чыхар» (Ромалылара 14:4). Бизи, һамынын ағасы олан Јеһова вә Онун тә’јин етдији һаким Иса Мәсиһ мүһакимә едәҹәк. Онлар бизи тәкҹә ишләримизин әсасында дејил, мотивләримизин, һәјат шәраитимизин, мәһәббәтимизин вә сәдагәтимизин дә әсасында мүһакимә едәҹәк. Һәвари Павел јазырды: «Чалыш ки, өзүнү Аллаһа сынагдан чыхмыш, утанмаға әсасы олмајан вә һәгигәт сөзүнү доғрулугла өјрәдән бир ишчи кими тәгдим едәсән». Буну јеринә јетириб јетирмәдијимизә исә дәгигликлә јалныз Јеһова илә Иса Мәсиһ гәрар верә биләр (2 Тимотејә 2:15; 2 Петер 1:10; 3:14).
17. Әлимиздән ҝәләни етмәјә чалышаркән нә үчүн Јагуб 3:17 ајәсини унутмамалыјыг?
17 Јеһова јеринә јетирә билмәјәҹәјимиз шејләри биздән ҝөзләмир. Јагуб 3:17 ајәсинә әсасән «јухарыдан назил олан һикмәт» һәр шејдән башга «мүлајимдир». Сәнҹә, Јеһованы бу ҹәһәтдән тәглид етмәк мүдрик олмаздымы? Бу, һәм өзүмүзүн, һәм дә гардашларымызын гаршысына мүмкүн олмајан тәләбләр гојмамаға бизә көмәк едәҹәк.
18. Әҝәр әмәлләримизә вә Јеһованын лүтфүнә таразлы шәкилдә јанашырыгса, онда нәјә үмид едә биләрик?
18 Иманымыздан ирәли ҝәлән ишләримизә вә Јеһованын лүтфүнә таразлы шәкилдә јанашсаг, онда Јеһованын хидмәтчиләринин фәргләндириҹи хүсусијјәти олан севинҹ һиссини даим горујуб сахлајаҹағыг (Јешаја 65:13, 14). Нә гәдәр етдијимиздән асылы олмајараг, Јеһованын Өз халгынын үзәринә төкдүјү хејир-дуалара ҝөрә биз дә севинәҹәјик. Әлимиздән ҝәләни етмәк үчүн ‘дуа вә нијаз едәрәк шүкранла’ Аллаһдан көмәк диләјә биләрик. О заман там әмин ола биләрик ки, ‘Аллаһын һәр ҹүр ағылдан үстүн олан сүлһү Мәсиһ Иса васитәсилә үрәкләримизи вә дүшүнҹәләримизи горујаҹаг (Филипилиләрә 4:4-7). Бәли, биз јалныз әмәлләримизлә дејил, Јеһованын лүтфү илә хилас ола биләрик. Бу фикир бизи неҹә дә руһландырыр.
Изаһ едә биләрсәнми нәјә ҝөрә мәсиһчиләр...
• шәхси наилијјәтләри илә өјүнмәкдән чәкинирләр?
• өзләрини рәгабәт руһуну тәзаһүр етдирмәкдән ҝөзләјирләр?
• тәблиғ хидмәтләринә даир һесабат верирләр?
• һәмиманлыларыны мүһакимә етмирләр?
[23-ҹү сәһифәдәки шәкил]
«Лүтфүм сәнә јетәр».
[24 вә 25-ҹи сәһифәләрдәки шәкилләр]
Ағсаггаллардан һәр бири јығынҹағын рифаһы наминә әлиндән ҝәләни етдији үчүн севинҹ һисси дујур.
[26 вә 27-ҹи сәһифәләрдәки шәкилләр]
Сәнин һесабатын олмасајды, үмумдүнја һесабаты бүтөв олмазды.