Јығынҹағы инкишаф етдирмәјә давам един
«Бир-биринизә тәскинлик верин вә бир-биринизи инкишаф етдирин» (1 САЛОН. 5:11).
1. Мәсиһчи јығынҹағынын үзвү олмаг һансы хејир-дуалары ҝәтирир вә буна бахмајараг, һансы проблемләр мөвҹуддур?
МӘСИҺЧИ јығынҹағынын үзвү олмаг неҹә дә бөјүк хејир-дуадыр! Сәнин Јеһова илә ҝөзәл мүнасибәтләрин вар. Онун Кәламынын тәгдим етдији рәһбәрлијә етибар етмәјин сәни дүзҝүн олмајан һәјат тәрзинин пис нәтиҹәләриндән сипәр кими горујур. Сәнин әтрафында сәнин јахшылығыны истәјән әсил достларын вар. Бәли, хејир-дуалары садаламагла гуртармаг олмаз. Лакин бир чох мәсиһчиләр бу вә ја диҝәр проблемләрлә мүбаризә апарырлар. Онлардан бәзиләри Аллаһын Кәламынын дәринликләрини баша дүшмәкдә көмәјә еһтијаҹ дуја биләрләр. Ола билсин, диҝәрләри хәстәликдән, руһ дүшкүнлүјүндән вә ја дүшүнүлмәмиш гәрарларынын нәтиҹәләриндән әзијјәт чәкирләр. Бунунла јанашы, биз һамымыз аллаһсыз дүнјада јашајырыг.
2. Гардашларымыз чәтинликлә үзләшәндә биз нә етмәлијик вә нәјә ҝөрә?
2 Һәмиманлыларымызын әзабыны вә ја проблемләрлә чарпышдығыны ҝөрмәк һеч биримизә хош дејил. Һәвари Павел јығынҹағы бәдәнә бәнзәдәрәк гејд едир ки, «әҝәр бир үзв әзаб чәкирсә, диҝәрләри дә онунла бәрабәр әзаб чәкир» (1 Кор. 12:12, 26). Белә һалларда баҹы-гардашларымыза дајаг олмаға чалышмалыјыг. Мүгәддәс Јазыларда јығынҹаг үзвләринин бир-биринә чәтинликләрин өһдәсиндән ҝәлмәкдә неҹә көмәк етдикләринә даир бир чох нүмунәләр јер алыб. Онлары нәзәрдән кечирдикҹә бу ҹүр көмәклији неҹә ҝөстәрә биләҹәјини дүшүн. Јеһованын јығынҹағы инкишаф етсин дејә гардашлара руһани көмәклији неҹә ҝөстәрә биләрсән?
‘Ону јанларына алдылар’
3, 4. Акила вә Прискила Аполлоса неҹә көмәк етдиләр?
3 Аполлос Ефес шәһәринә көчәндә артыг хош хәбәрин сәјли тәблиғчиси иди. «Һәвариләрин ишләри» китабында дејилир: «Бу адам... јалныз Јәһјанын вәфтизиндән хәбәрдар олдуғу һалда, руһҹа сәјли олуб, Рәбб барәсиндәки һәгигәти бәјан едиб, доғрулугла өјрәдирди». Аполлосун «Ата, Оғул вә Мүгәддәс Руһ» исмилә вәфтиздән бихәбәр олмасындан белә бир нәтиҹәјә ҝәлмәк олар ки, она ја Вәфтизчи Јәһјанын шаҝирдләри, ја да ерамызын 33-ҹү илинин Пентикост бајрамындан әввәл Исанын давамчылары шаһидлик етмишдиләр. Аполлос сәјли олса да, онун бәзи ваҹиб шејләрдән хәбәри јох иди. Һәмиманлылары илә үнсијјәтдә олмасы она неҹә көмәк етди? (Һәв. иш. 1:4, 5; 18:25; Мат. 28:19).
4 Мәсиһчи әр-арвад Акила вә Прискила Аполлосун синагогда ҹәсарәтлә тәблиғ етдијини ешидиб ону јанларына алдылар вә дәгигликлә һәр шеји она баша салдылар. (Һәвариләрин ишләри 18:24—26 ајәләрини оху.) Онлар буну мәһәббәтдән ирәли ҝәләрәк етдиләр. Әлбәттә, Акила вә Прискила Аполлосда ону тәнгид етдикләри тәәссүраты ојатмадан она нәзакәтлә көмәк етмәк истәјирдиләр. Аполлос садәҹә олараг еркән мәсиһчи јығынҹағынын тарихи илә таныш дејилди. Шүбһә јохдур ки, Аполлос белә ваҹиб мәлуматлары онунла бөлүшән јени достларына чох миннәтдар иди. Бу мәлуматын сајәсиндә о, Ахајадакы гардашлара «чох јардым етди» вә бөјүк шаһидлик верди (Һәв. иш. 18:27, 28).
5. Мәһәббәт Падшаһлығын минләрлә тәблиғчисини нәјә тәшвиг едир вә бу, һансы бәһрәләри ҝәтирир?
5 Мәсиһчи јығынҹағында бир чохлары вахтилә онлара Мүгәддәс Китабы баша дүшмәјә көмәк едәнләрә үрәкдән миннәтдардырлар. Һәтта чохлары онлары өјрәдән баҹы-гардашларла сых достлуг мүнасибәтләри гурмушлар. Инсанлара һәгигәти баша дүшмәјә көмәк етмәк үчүн әксәр һалларда онларла бир нечә ај әрзиндә мүнтәзәм олараг Мүгәддәс Китабы өјрәнмәк лазым ҝәлир. Лакин Падшаһлығын тәблиғчиләри бунун өлүм-дирим мәсәләси олдуғуну дәрк етдикләри үчүн бу ҹүр фәдакарлыг ҝөстәрмәјә һазырдырлар (Јәһ. 17:3). Инсанын һәгигәти мәнимсәдијини, она ујғун јашамаға вә Јеһованын ирадәсини јеринә јетирмәјә башладығыны ҝөрмәк бизә неҹә дә бөјүк севинҹ ҝәтирир!
«Гардашлар Тимотеј һагда јахшы фикирдә идиләр»
6, 7. а) Нәјә ҝөрә Павел јол јолдашы вә әмәкдашы кими Тимотеји сечди? б) Тимотеј она ҝөстәрилән көмәк сајәсиндә нә дәрәҹәдә инкишаф етди?
6 Икинҹи миссионер сәјаһәти заманы һәвари Павел вә Сила Листраја баш чәкәндә орада тәхминән 20 јашларында олан ҝәнҹ Тимотејлә ҝөрүшдүләр. «Листра вә Конјада олан гардашлар Тимотеј һагда јахшы фикирдә идиләр». Тимотејин анасы Евники вә нәнәси Лоида һәср олунмуш мәсиһчи идиләр, лакин онун атасы онларын иманына шәрик дејилди (2 Тим. 1:5). Ола билсин, Павел бу аилә илә илк дәфә бир нечә ил бундан әввәл һәмин әразијә баш чәкән заман таныш олмушду. Амма инди Тимотеј Павелин диггәтини хүсусилә ҹәлб етмишди, чүнки бу ҝәнҹ башгаларындан чох фәргләнирди. Беләликлә, јерли ағсаггаллар шурасынын разылығы илә Тимотеј миссионер хидмәтиндә Павелин көмәкчиси олду. (Һәвариләрин ишләри 16:1—3 ајәләрини оху.)
7 Тимотејин јашҹа ондан бөјүк олан әмәкдашындан өјрәнмәли олдуғу чох шеј варды. Лакин Тимотеј о дәрәҹәдә инкишаф етмишди ки, мүәјјән вахтдан сонра Павел ону әминликлә башга јығынҹаглара баш чәкмәјә ҝөндәрир вә ону нүмајәндәси тәјин етмишди. Павеллә тәгрибән 15 ил чәкән әмәкдашлығы сајәсиндә вахтилә тәҹрүбәсиз вә ола билсин, утанҹаг олан Тимотеј јахшы нәзарәтчи сәвијјәсинә чатды (Филип. 2:19—22; 1 Тим. 1:3).
8, 9. Јығынҹағын үзвләри ҝәнҹләри хидмәтә неҹә тәшвиг едә биләр? Нүмунә чәкин.
8 Мәсиһчи јығынҹағындакы бир чох ҝәнҹ оғлан вә гызларын инкишаф етмәләри үчүн ҝениш имканлары вар. Јеһоваја хидмәтдә ҝөзәл нүмунә верән баҹы-гардашлар бу ҝәнҹләри руһландырыб онларла үнсијјәт етсәләр, бу, онлары Јеһованын јығынҹағында мәсулијјәтләрә ҹан атмаға вә буна наил олмаға тәшвиг едә биләр. Јығынҹағына бир нәзәр сал! Тимотеј кими хидмәтдә јарарлы олаҹаг ҝәнҹләри ҝөрүрсәнми? Сәнин көмәк вә дәстәјин сајәсиндә онлар пионер, бет-елли, миссионер вә ја сәјјар нәзарәтчи ола биләрләр. Онлара белә мәгсәдләрә ҹан атмаға неҹә көмәк едә биләрсән?
9 Артыг 20 илдир ки, Бет-Ел аиләсинин үзвү олан Мартин 30 ил бундан әввәл рајон нәзарәтчиси илә бирҝә хидмәтдә оларкән гардашын она ҝөстәрдији марағы миннәтдарлыгла хатырлајыр. Ҝәнҹликдә Бет-Елдә хидмәт едән бу гардаш һәмин илләр барәдә бөјүк шөвглә данышырды. О, Мартини тәшвиг етмишди ки, Јеһованын тәшкилатында бу ҹүр хидмәт етмәји гаршысына мәгсәд гојсун. Мартин һесаб едир ки, бу унудулмаз сөһбәт сонралар һәјатында вердији гәрарлара бөјүк тәсир ҝөстәрмишди. Ким билир, сәнин ҝәнҹ достларынла руһани мәгсәдләр барәдә данышмағын онлара нә дәрәҹәдә јахшы тәсир ҝөстәрә биләр!
«Гәмҝинләрә тәскинлик верин»
10. Епафродит өзүнү неҹә һисс едирди вә нәјә ҝөрә?
10 Епафродит иманына ҝөрә һәбсдә олан һәвари Павелә баш чәкмәк үчүн Филипидән Ромаја узун вә јоруҹу јол гәт етмишди. Ону Павелин јанына филипилиләр ҝөндәрмишди. О јалныз филипилиләрин ҝөндәрдији һәдијјәләри ҝәтирмәк мәгсәдилә ҝәлмәмишди, һәм дә Павелин чәтин анларында она көмәк етмәк үчүн бир аз галмағы планлашдырмышды. Лакин Епафродит Ромада оларкән хәстәләнди вә ‘өлүм ајағына’ дүшдү. Епафродит тапшырығыны јеринә јетирмәдијини дүшүнүб мәјуслуға гапылды (Филип. 2:25—27).
11. а) Нәјә ҝөрә јығынҹагда кимсә депрессијаја дүшәндә тәәҹҹүбләнмәмәлијик? б) Павел Епафродитлә әлагәдар нә мәсләһәт ҝөрдү?
11 Бу ҝүн мүхтәлиф тәзјигләр үзүндән инсанлар депрессијаја дүшүрләр. Үмумдүнја Сәһијјә Тәшкилатынын вердији мәлумата ҝөрә, дүнја әһалисинин бешдә бири һәјатынын мүәјјән дөврүндә депрессијадан әзијјәт чәкир. Јеһованын халгы бундан мүдафиә олунмајыб. Аиләсинин мадди тәләбатларынын гајғысына галаркән инсанын үзләшдији чәтинликләр, хәстәликләр, мүвәффәгијјәтсизлик үзүндән јаранан мәјуслуг вә диҝәр амилләр онда руһ дүшкүнлүјү әмәлә ҝәтирә биләр. Филипилиләр Епафродитә неҹә көмәк едә биләрдиләр? «Ону Рәббә аид бири кими, там севинҹлә гәбул един вә беләләринә һөрмәт един. Чүнки о, Мәсиһин иши уғрунда ҹаныны тәһлүкә гаршысында гојараг, өлүмә јахын иди ки, сизин мәнә хидмәтинизин әскиклијини долдурсун», — дејә Павел јазыр (Филип. 2:29, 30).
12. Депрессијада оланлары нә руһландыра биләр?
12 Биз дә руһдан дүшән вә ја депрессијада олан гардашлары руһландырмалыјыг. Әлбәттә, онларын Јеһоваја хидмәтләри һагда чохлу мүсбәт шејләр даныша биләрик. Ола билсин, онлар мәсиһчи олмаг вә ја таммүддәтли хидмәтә башламаг үчүн һәјатларында бөјүк дәјишикликләр етмишләр. Биз онларын сәјини гијмәтләндиририк вә онлары әмин едә биләрик ки, Јеһова да онларын етдији һәр шеји гијмәтләндирир. Јеһованын садиг хидмәтчиләриндән кимсә гоҹалыг вә ја хәстәлик уҹбатындан Она әввәлки гәдәр хидмәт едә билмәсә дә, узун илләр әрзиндә хидмәт етдијинә ҝөрә һөрмәтә лајигдир. Һәмиманлымызын депрессијаја дүшмәсинә сәбәб нә олурса-олсун, Јеһова бүтүн садиг хидмәтчиләринә мәсләһәт верир: «Ҹәсарәтсизләри руһландырын [«гәмҝинләрә тәскинлик верин», ЈД], зәифләрә јардым един, һамыја гаршы сәбирли олун» (1 Салон. 5:14).
‘Ону бағышлајыб, тәсәлли верин’
13, 14. а) Коринф јығынҹағы һансы ҹидди тәдбири ҝөрдү вә бунун сәбәби нә иди? б) Ҝүнаһкар инсанын јығынҹагдан кәнар едилмәсинин һансы мүсбәт нәтиҹәләри олду?
13 Биринҹи әсрдә Коринф јығынҹағында бир нәфәр әхлагсыз һәјат тәрзи сүрүр вә төвбә етмирди. Онун һәрәкәти јығынҹағын тәмизлијини тәһлүкә алтына алыр, һәтта имансызлары дәһшәтә ҝәтирирди. Буна ҝөрә дә Павел, һаглы олараг, ону јығынҹагдан кәнар етмәк ҝөстәришини верди (1 Кор. 5:1, 7, 11—13).
14 Бу ҹәза тәдбиринин мүсбәт нәтиҹәләри олду: јығынҹаг пис тәсирдән мүдафиә олунду вә ҝүнаһкар сәһвини бојнуна алыб үрәкдән төвбә етди. Павел һәмин адамын төвбә етмәсинин әмәлиндән ҝөрүндүјүнү нәзәрә алараг јығынҹаға јаздығы икинҹи мәктубда ону бәрпа етмәји бујурду. Лакин јығынҹагдан јалныз бу тәләб олунмурду. Павел һәм дә төвсијә етди ки, јығынҹаг төвбә едән инсаны ‘бағышлајыб, тәсәлли версин ки, белә бир адам һәддиндән артыг кәдәрә гәрг олмасын’. (2 Коринфлиләрә 2:5—8 ајәләрини оху.)
15. Төвбә едиб јығынҹагда бәрпа олунанлара гаршы мүнасибәтимиз неҹә олмалыдыр?
15 Биз бу һадисәдән нә өјрәнирик? Киминсә јығынҹагдан кәнар едилмәси бизи кәдәрләндирир. Ола билсин, онлар Аллаһын адына ләкә ҝәтириб, јығынҹағы рүсвај едиб, һәтта шәхсән бизә гаршы ҝүнаһ ишләдибләр. Бунунла белә, бу мәсәләни арашдырмаг үчүн тәјин олунмуш ағсаггаллар, Јеһованын рәһбәрлијинә әсасән, төвбә едән адамы бәрпа етмәк гәрарыны верәндә бу, Јеһованын ону бағышладығыны ҝөстәрир (Мат. 18:17—20). Мәҝәр биз Ону тәглид етмәли дејиликми? Сәрт олмаг, үрәјимиздә кин сахламаг вә ону бағышламагдан имтина етмәк Јеһоваја гаршы чыхмаға бәрабәрдир. Јеһованын јығынҹағында сүлһү вә бирлији горумаг вә Онун рәғбәтини итирмәмәк үчүн мәҝәр биз һәгигәтән дә төвбә едән вә јығынҹагда бәрпа олунан инсанлара ‘мәһәббәт ҝөстәрмәли’ дејиликми? (Мат. 6:14, 15; Лука 15:7).
«О мәнә... јарарлыдыр»
16. Нәјә ҝөрә Павел Маркы өзү илә ҝөтүрмәк истәмирди?
16 Инди бахаҹағымыз нүмунәдән ҝөрәҹәјик ки, бизи мәјус едән инсанлара гаршы үрәјимиздә кин сахламалы дејилик. Јәһја Марк һәвари Павели чох мәјус етмишди. Неҹә? Павеллә Барнаба биринҹи миссионер сәјаһәтләринә башлајанда көмәк етмәк үчүн Марк да онларла ҝетди. Амма о, Мүгәддәс Китабда гејд олунмајан бир сәбәбә ҝөрә әмәкдашларыны јары јолда гојуб евинә гајытды. Бу гәрар Павели о гәдәр мәјус етмишди ки, икинҹи миссионер сәјаһәтини планлашдыранда Маркы бир даһа өзләри илә ҝөтүрүб-ҝөтүрмәмәјин үстүндә Барнаба илә араларында мүбаһисә дүшмүшдү. Биринҹи сәјаһәтләри заманы баш верәнләр уҹбатындан Павел Маркын бир даһа онларла ҝетмәсини истәмирди. (Һәвариләрин ишләри 13:1—5, 13; 15:37, 38 ајәләрини оху.)
17, 18. Павеллә Марк арасында јаранмыш проблемин өз һәллини тапдығы һарадан мәлумдур вә биз бундан нә өјрәнә биләрик?
17 Маркын Барнаба илә бирҝә миссионер фәалијјәтинә башга әразидә давам етмәсиндән ҝөрүнүр ки, о, Павелин реаксијасынын ону руһдан салмасына јол вермәмишди (Һәв. иш. 15:39). Онун садиг вә етибарлы инсан олмасы Павелин бу һадисәдән бир нечә ил сонра онун барәсиндә јаздығы сөзләриндән ҝөрүнүр. Павел Ромада һәбсдә оларкән Тимотејә јаздығы мәктубда дејир: «Маркы да өзүнлә ҝәтир; чүнки о мәнә хидмәт үчүн јарарлыдыр» (2 Тим. 4:11). Бәли, Марк артыг Павелин рәғбәтини газанмышды.
18 Бу һадисәдән өзүмүзә ибрәт дәрси ҝөтүрә биләрик. Марк јахшы миссионер олмаг үчүн лазыми кејфијјәтләр инкишаф етдирмишди. О, Павелин ону өзү илә ҝөтүрмәк истәмәдијинә ҝөрә бүдрәмәди. Онларын икиси дә руһани инсан иди вә онлар бир-бирләринә кин сахламырдылар. Әксинә, сонралар Павел Маркы гијмәтли әмәкдаш кими гәбул едирди. Бундан белә нәтиҹәјә ҝәлирик ки, гардашлар чәтинликләри арадан галдырдыгдан вә проблемләри һәлл етдикдән сонда јахшы оларды ки, ирәли ҝетсинләр вә башгаларынын руһән инкишаф етмәсинә көмәк етсинләр. Башгаларынын мүсбәт ҹәһәтләрини ҝөрмәк јығынҹағын инкишаф етмәсинә сәбәб олур.
Јығынҹаг вә сән
19. Мәсиһчи јығынҹағынын бүтүн үзвләри бир-бирләринә неҹә көмәк едә биләрләр?
19 Бу чәтин «ахыр ҝүнләрдә» сән јығынҹагдакы баҹы-гардашларын көмәјинә еһтијаҹ дујдуғун кими, онларын да сәнин көмәјинә еһтијаҹы вар (2 Тим. 3:1). Ола билсин, бәзән баҹы-гардашларымыз гаршыларына чыхан чәтинликләрин өһдәсиндән неҹә ҝәлмәји билмирләр, анҹаг Јеһова һәмишә билир. Вә О, онлары дүз јола јөнәлтмәк үчүн јығынҹағын һәр бир үзвүндән, о ҹүмләдән сәндән истифадә едә биләр (Јешаја 30:20, 21; 32:1, 2). Буна ҝөрә дә ҝәлин Павелин «етдијиниз кими, бир-биринизә тәскинлик верин вә бир-биринизи инкишаф етдирин» нәсиһәтинә ҹидди јанашаг! (1 Салон. 5:11).
Неҹә ҹаваб верәрдиниз?
• Нәјә ҝөрә биз һәмиманлыларымызы мөһкәмләндирмәлијик?
• Сән башгаларына һансы чәтинликләрин өһдәсиндән ҝәлмәкдә јардым ҝөстәрә биләрсән?
• Нәјә ҝөрә биз јығынҹағымыздакы баҹы-гардашларын көмәјинә еһтијаҹ дујуруг?
[11-ҹи сәһифәдәки шәкил]
Һәмиманлымызын чәтинлији јарананда биз она көмәклик ҝөстәрә биләрик
[12-ҹи сәһифәдәки шәкил]
Мәсиһчи јығынҹағындакы бир чох ҝәнҹ оғлан вә гызларын инкишаф етмәләри үчүн ҝениш имканлары вар