Мәсиһә вә онун садиг гулуна сәдагәтлијик
«Ағасы бүтүн маликанәсинин идарәсини она тапшыраҹагдыр» (МАТТА 24:45-47).
1, 2. а) Мүгәддәс Китаба әсасән бизим Рәһбәримиз кимдир? б) Нәдән ҝөрүнүр ки, Мәсиһ һәр бир јығынҹагда баш верәнләрлә јахындан танышдыр?
«ӨЗҮНҮЗӘ “рәһбәр” дедиртмәјин; чүнки Рәһбәриниз бирдир — Мәсиһдир» (Матта 23:10, ЈД). Бу сөзләрлә Иса Мәсиһ давамчыларына ачыг-ајдын деди ки, јер үзүндә инсанлардан һеч ким онларын рәһбәри олмајаҹаг. Онларын анҹаг бир сәмави Рәһбәри олаҹаг, о да Иса Мәсиһдир. Бу вәзифәјә ону Аллаһ тә’јин едиб. Јеһова ону «өлүләрдән дирилтди... бүтүн шејләрин үзәриндә рәһбәр олмаг үзрә, Ону иманлылар ҹәмијјәтинә верди. Ҹәмијјәт исә, Онун Бәдәнидир» (Ефеслиләрә 1:20-23, И–93).
2 Мәсиһ јығынҹагда ‘бүтүн шејләрин үзәриндә рәһбәр’ тә’јин олундуғу үчүн, орада баш верәнләрин һамысы онун нәзарәти алтындадыр. Һеч бир шеј онун диггәтиндән јајынмыр. О, һәр јығынҹағын руһани вәзијјәтини диггәтлә мүшаһидә едир. Ерамызын биринҹи әсринин сонунда һәвари Јәһјаја верилән вәһјдә бу даһа ајдын ҝөрүнүр. Бурада јазылан једди јығынҹаға Иса беш дәфә демишди ки, онларын әмәлләриндән, јахшы вә зәиф ҹәһәтләриндән хәбәрдардыр вә мүвафиг олараг, онлара мәсләһәт вериб руһландырырды (Вәһј 2:2, 9, 13, 19; 3:1, 8, 15). Биз әмин ола биләрик ки, Мәсиһ Кичик Асијада, Фәләстиндә, Суријада, Бабилистанда, Јунаныстанда, Италијада вә башга јерләрдә олан јығынҹагларда да руһани вәзијјәтин нә јердә олдуғу илә јахындан таныш иди (Һәвариләрин ишләри 1:8). Бәс бизим ҝүнләрдә неҹә?
Садиг гул
3. Нәјә ҝөрә Мәсиһи башла вә онун јығынҹағыны бәдәнлә мүгајисә етмәк мүнасибдир?
3 Дириләндән сонра вә ҝөјә, Атасынын јанына галхмаздан бир гәдәр әввәл Иса давамчыларына демишди: «Ҝөјдә вә јер үзүндә бүтүн һакимијјәт Мәнә верилмишдир... вә будур, мән, дөврүн сонуна гәдәр һәр ҝүн сизинләјәм» (Матта 28:18-20). Иса давамчыларына сөз верди ки, онлара даима рәһбәрлик едәҹәк. Һәвари Павел ефеслиләрә вә колослулара мәктубунда Башы Мәсиһ олан мәсиһчи јығынҹағыны ‘бәдәнлә’ мүгајисә етди (Ефеслиләрә 1:22, 23; Колослулара 1:18). Бир китабда дејилир ки, «бу бәнзәтмә јалныз Башла бирҝә олмағын ваҹиблијини дејил, һәм дә бәдән үзвләринин Баша табе олмасыны билдирир. Бәдән үзвләри Башын аләтидир» («The Cambridge Bible for Schools and Colleges»). 1914-ҹү илдә падшаһлыг тахтына чыхандан сонра Мәсиһ һансы групу өз аләти кими истифадә едир? (Даниел 7:13, 14).
4. Малаки пејғәмбәрин сөзләринә әсасән, Јеһова илә Мәсиһ руһани мә’бәди јохламаға ҝәләндә орада нә ҝөрдүләр?
4 Малаки пејғәмбәр әввәлҹәдән демишдир ки, «Худавәнд» Јеһова, тахта јениҹә галхмыш Оғлу, «әһд елчиси» Иса Мәсиһлә бирликдә «мә’бәдинә» вә ја руһани ибадәт евинә ҝәләҹәк, ону мүһакимә едиб јохлајаҹаг. Аллаһын евинин мүһакимәси үчүн мүәјјән олунмуш ‘вахт’, ҝөрүнүр, 1918-ҹи илдән башлајыбa (Малаки 3:1; 1 Петер 4:17). Аллаһы тәмсил етдијини вә Она һәгигәтән ибадәт етдијини иддиа едәнләр лазыми гајдада јохланылды. Әсрләр боју Аллаһы рүсвај едән тә’лимләр јајан вә Биринҹи Дүнја мүһарибәсиндәки гырғынларда әли олмуш Христиан дүнјасынын килсәләри Аллаһ тәрәфиндән рәдд олундулар. Мәсһ олунмуш мәсиһчиләрин садиг галығы имтаһан олунду, аловла тәмизләнди вә Јеһоваја мәгбул олан вә ‘салеһликлә гурбанлар ҝәтирән’ халг олду (Малаки 3:3).
5. Исанын өз иштиракы илә әлагәдар сөјләдији пејғәмбәрлијә әсасән садиг гул ким олду?
5 Малакинин пејғәмбәрлијинә ујғун олараг, Иса давамчыларына өзүнүн иштиракына вә ‘дөврүн сонуна’ даир әламәтләри сөјләјәндә ораја «гул» синфинин дә тәсвирини дахил етмишди. О демишди: «Вахтлы-вахтында онлара јемәк вермәк үчүн, ағасынын өз нөкәрләры үзәринә гојдуғу садиг вә ағыллы гул кимдир? О гул нә бәхтијардыр ки, ағасы ҝәлдији заман, ону бу ҹүр иш ҝөрмәкдә тапаҹагдыр. Сизә доғрусуну дејирәм ки, ағасы бүтүн маликанәсинин идарәсини она тапшыраҹагдыр» (Матта 24:3, 45-47). Мәсиһ 1918-ҹи илдә ‘гулу’ јохламаг үчүн «ҝәлдији заман» 1879-ҹу илдән бәри бу журналдан вә Аллаһын Кәламына әсасланан диҝәр нәшрләрдән истифадә едәрәк ‘вахтлы-вахтында јемәк верән’ руһла мәсһ олунмуш садиг шаҝирдләринин галығыны тапыр, онлары өзүнүн аләти вә ја ‘гулу’ кими гәбул едиб 1919-ҹу илдә јер үзүндәки бүтүн маликанәсинин идарәсини онлара тапшырыр.
Мәсиһин јер үзүндәки маликанәсинин идарәси
6, 7. а) Иса садиг ‘гулуну’ һансы башга сөзлә адландырмышды? б) ‘Нөкәрбашынын’ ишинә нә дахилдир?
6 Иса өз иштиракы вә јер үзүндә ону тәмсил едәҹәк ‘гулун’ олмасы илә бағлы пејғәмбәрлик сөјләмәздән бир нечә ај әввәл бу ‘гул’ һаггында сөһбәт ачды, ону башга ҹүр адландырараг гулун ҝәләҹәкдәки вәзифәсини даһа да ајдынлашдырды: «Вахтлы-вахтында онлара јемәк пајларыны вермәк үчүн ағасынын нөкәрләри үзәринә гојдуғу садиг вә ағыллы нөкәрбашы кимдир? Һәгигәти сизә дејирәм ки, ағасы бүтүн маликанәсинин идарәсини она тапшыраҹагдыр» (Лука 12:42, 44).
7 Бурада гул нөкәрбашы адландырылыр. Бу сөз јунан дилиндән тәрҹүмәдә «еви идарә едән» мә’насыны дашыјыр. Нөкәрбашы синфи садәҹә олараг Мүгәддәс Китабдан мараглы фикирләри изаһ едән бир груп зијалы олмајаҹагды. «Вахтлы-вахтында» фајдалы руһани гида вермәкдән әлавә, ‘садиг нөкәрбашы’ Мәсиһин нөкәрләринин һамысынын үзәриндә тә’јин олунур ки, Мәсиһин ‘бүтүн маликанәсини’, јер үзүндәки јығынҹағыны вә онун фәалијјәтини идарә етсин. Исанын бүтүн маликанәсинә нә дахилдир?
8, 9. Гула һансы ‘маликанәни’ идарә етмәк тапшырылыб?
8 Гулун үзәринә дүшән мәс’улијјәтә Мәсиһин давамчыларынын өз фәалијјәтләрини јеринә јетирмәк үчүн истифадә етдији мадди әмлака, башга сөзлә Јеһованын Шаһидләринин үмумдүнја мәркәзи идарәси, филиаллары, һабелә бүтүн дүнјада ибадәт үчүн нәзәрдә тутулан Падшаһлыг вә конгрес залларына нәзарәт дә дахилдир. Даһа ваҹиби исә одур ки, гул синфи һәфтәлик ҝөрүшләрдә вә мүнтәзәм кечирилән конгресләрдә Мүгәддәс Китабын өјрәнилмәси илә әлагәдар руһани ҹәһәтдән фајдалы програмын һазырланмасына нәзарәт едир. Бу ҹүр ҝөрүшләрдә пејғәмбәрликләрин јеринә јетмәси вә Мүгәддәс Китаб принсипләринин ҝүндәлик һәјатда неҹә тәтбиг едилмәси һаггында данышылыр.
9 Нөкәрбашынын вәзифәсинә һәм дә «Сәмави Сәлтәнәт һаггында олан бу Мүждә»нин тәблиғинә вә бүтүн халглардан шаҝирд һазырламаг ишинә нәзарәт етмәк дахилдир. Шаҝирд һазырламаг исә инсанлара јығынҹағын Башы Мәсиһин тапшырдығы һәр шејә риајәт етмәји өјрәтмәк демәкдир (Матта 24:14; 28:19, 20; Вәһј 12:17). Тәблиғ вә тә’лим иши мәсһ олунмушларын садиг көмәкчиләри бөјүк издиһамын топланмасына сәбәб олмушдур. ‘Бүтүн милләтләрин ҹаһ-ҹәлалы’ олан бу инсанлар, шүбһәсиз ки, садиг гула һәвалә едилмиш дәјәрли ‘маликанәнин’ бир һиссәсидирләр (Вәһј 7:9; Һаггај 2:7).
Садиг гулун тәмсилчиси
10. Биринҹи әсрдә јығынҹаглар үчүн гәрарлары ким гәбул едирди вә бу јығынҹаглара һансы тә’сири ҝөстәрирди?
10 Садиг гул өз үзәринә дүшән ҹидди вәзифәдән ирәли ҝәләрәк бир чох гәрарлар гәбул етмәли олур. Еркән мәсиһчи јығынҹағында Јерусәлимдәки һәвариләр вә ағсаггаллар гул синфинин тәмсилчиси кими, бүтүн мәсиһчи јығынҹағынын рифаһы үчүн гәрарлар гәбул едирди (Һәвариләрин ишләри 15:1, 2). Биринҹи әсрдә фәалијјәт ҝөстәрән бу рәһбәрлик шурасы чыхардығы гәрарлары јығынҹаглара мәктублар вә мүхтәлиф гардашлар васитәсилә чатдырырды. Еркән мәсиһчиләр бу ҹүр ајдын рәһбәрлијә чох севинирдиләр вә онларын рәһбәрлик шурасы илә һәвәслә әмәкдашлыг етмәләри сүлһү вә бирлији горујурду (Һәвариләрин ишләри 15:22-31; 16:4, 5; Филипилиләрә 2:2).
11. Мәсиһ өз јығынҹағына рәһбәрлик вермәк үчүн кимдән истифадә едир вә биз онлара неҹә јанашмалыјыг?
11 Биринҹи әсрдә олдуғу кими, бу ҝүн дә мәсһ олунмуш ағсаггаллардан ибарәт кичик бир груп Мәсиһин давамчыларынын Рәһбәрлик Шурасыны тәшкил едир. Јығынҹағын Башы Мәсиһ ‘сағ әлинин’ ҝүҹү илә бу садиг инсанлара Падшаһлыг ишинә нәзарәт етмәјә јол ҝөстәрир (Вәһј 1:16, 20). Бу јахынларда јердәки һәјатыны битирмиш вә узун илләр Рәһбәрлик Шурасынын үзвү олмуш Алберт Шредер өз һәјаты һаггында јазаркән демишди: «Рәһбәрлик Шурасы һәр чәршәнбә кечирилән ҝөрүшүнү дуа илә башлајыр вә Јеһова Аллаһдан руһунун рәһбәрлијини диләјир. Һәр бир мәсәләнин вә һәр бир гәрарын Аллаһын Кәламына мүвафиг олмасындан өтрү чохлу сә’ј ҝөстәрилир»b. Бу ҹүр сәдагәтли мәсһ олунмушлар е’тибара лајигдирләр. Хүсусилә онларла әлагәдар һәвари Павелин ҝөстәришинә диггәт јетирмәлијик: «Өз рәисләринизә итаәт един, онлара табе олун; чүнки... онлар һәр заман сизин ҹанларынызын гејдинә галырлар» (Ибраниләрә 13:17).
Садиг гула лајигинҹә һөрмәт бәсләјирик
12, 13. Гул синфинә һөрмәт бәсләмәјә һансы сәбәбләримиз вар?
12 Садиг гул синфинә лајигинҹә һөрмәт бәсләмәјин әсас сәбәби одур ки, белә етмәклә онларын Ағасы Иса Мәсиһин өзүнә һөрмәт бәсләмиш олуруг. Павел мәсһ олунмушлар барәсиндә јазырды: «Чағрылдығы заман азад олан адам Мәсиһин гулудур. Сиз чох баһа гијмәтә алынмысыныз» (1 Коринфлиләрә 7:22, 23; Ефеслиләрә 6:6). Бунун үчүн дә садиг гулун вә онун Рәһбәрлик Шурасынын ҝөстәришләринә сәдагәтлә табе оланда биз гулун Ағасы Мәсиһә табе олуруг. «Ата Аллаһын иззәти үчүн» Иса Мәсиһин Рәбб олмасыны играр етмәјин бир јолу да Мәсиһин јер үзүндәки маликанәсини идарә етмәк үчүн истифадә етдији аләтә лајигинҹә һөрмәт бәсләмәкдир (Филипилиләрә 2:11).
13 Садиг гула һөрмәтлә јанашмағын диҝәр сәбәби ондан ибарәтдир ки, Мүгәддәс Јазылар јердәки мәсһ олунмушлар һаггында «Аллаһын рүһән мәскән салдығы» «мә’бәд» кими данышыр. Буна ҝөрә дә онлар ‘мүгәддәсдирләр’ (1 Коринфлиләрә 3:16, 17; Ефеслиләрә 2:19-22). Иса мәһз бу мүгәддәс мә’бәд синфинә өз јер үзү маликанәсини е’тибар едиб. Демәли, јығынҹагда елә һүгуглар вә мәс’ул ишләр вардыр ки, онлар јалныз гул синфинә мәхсусдур. Бу сәбәбдән, јығынҹагдакыларын һамысы садиг гулдан вә онун Рәһбәрлик Шурасындан ҝәлән ҝөстәришләрә риајәт етмәји өзләринә мүгәддәс борҹ билир. Һәгигәтән дә, ‘башга гојунлар’ Ағасынын марагларыны ҝүдмәкдә гул синфинә көмәк етмәји өзләри үчүн бөјүк шәрәф санырлар (Јәһја 10:16).
Гул синфини сәдагәтлә дәстәкләјирик
14. Јешајанын пејғәмбәрлик етдији кими, башга гојунлар мәсһ олунмушларын ардынҹа неҹә ҝедир вә ‘гул’ кими онлара неҹә хидмәт едирләр?
14 Башга гојунларын руһани Исраилин мәсһ олунмуш үзвләринә табе олаҹагларыны һәлә Јешаја пејғәмбәр габагҹадан хәбәр вермишди: «Рәбб белә дејир: “Мисирлиләрин вар-дөвләти, Кушун тиҹарәт ҝәлири, уҹабојлу Севалылар јаныныза ҝәлиб гулунуз олаҹаг. Онлар буховланаҹаг вә ардынызҹа ҝедәҹәк, гаршынызда јерә сәрилиб, јалвараҹаг: “Аллаһ јалныз сизинләдир вә башга бириси јохдур. Бундан савајы Аллаһ јохдур”» (Јешаја 45:14). Бу ҝүн башга гојунлар да, мәҹази мә’нада десәк, мәсһ олунмушларын вә Рәһбәрлик Шурасынын ардынҹа ҝедәрәк, онларын рәһбәрлијинә әмәл едирләр. Башга гојунлар ‘гул’ кими, јә’ни әмәкләри үчүн һагг тәләб етмәдән, һәвәслә өз ҝүҹләрини вә вәсаитләрини сәрф едәрәк Исанын јер үзүндәки мәсһ олунмуш давамчыларына тапшырдығы үмумдүнја тәблиғ ишини дәстәкләјирләр (Һәвариләрин ишләри 1:8; Вәһј 12:17).
15. Јешаја 61:5, 6 ајәләриндә башга гојунларла руһани Исраил арасындакы мүнасибәт неҹә пејғәмбәрлик едилмишдир?
15 Башга гојунлар гул синфинин вә онун Рәһбәрлик Шурасынын нәзарәти алтында Јеһоваја хидмәт етдикләри үчүн миннәтдардырлар вә бундан бөјүк севинҹ дујурлар. Онлар мәсһ олунмушлары «Аллаһын Исраили»нин үзвләри кими гәбул едирләр (Галатијалылара 6:16). Бу символик «јаделлиләр» вә «әҹнәбиләр» ‘Рәббин каһинләри, Аллаһын хидмәтчиләри’ олан руһани Исраилин рәһбәрлији алтында севинҹлә «әкинчилик вә бағбанлыг» едирләр (Јешаја 61:5, 6). Онлар Падшаһлыг һаггындакы мүждәни бөјүк һәвәслә тәблиғ едир вә бүтүн халглардан шаҝирдләр һазырлајырлар. Онлар һәгигәтлә јениҹә мараглананларын гејдинә галмагда гул синфинә ҹанла-башла көмәк едирләр.
16. Башга гојунлары садиг вә ағыллы гула сәдагәтлә дајаг олмаға нә тәшвиг едир?
16 Башга гојунлар баша дүшүрләр ки, садиг гулун вахтлы-вахтында вердији руһани гиданын онлара бөјүк фајдасы вар. Онлар тәвазөкарлыгла е’тираф едирләр ки, садиг вә ағыллы гул олмасајды, дәјәрли Мүгәддәс Китаб һәгигәтләри, мәсәлән, Јеһованын али һакимијјәти, Онун адынын тәмизә чыхарылмасы, Падшаһлыг, јени ҝөјләр вә јени јер, руһ, өлүләрин вәзијјәти, Јеһова, Иса вә мүгәддәс руһ һаггында һәгигәт барәдә чох аз шеј биләр, ја да һеч нә билмәздиләр. Башга гојунлар сәдагәтдән вә бөјүк миннәтдарлыгдан ирәли ҝәләрәк, Исанын бу системин сонунда јашајан мәсһ олунмуш ‘гардашларына’ дајагдырлар (Матта 25:40).
17. Рәһбәрлик Шурасы шәраитә ујғунлашараг нә едир вә нөвбәти мәгаләдә сөһбәт нәдән ҝедәҹәк?
17 Сајларынын азалдығына ҝөрә, мәсһ олунмушлар Мәсиһин маликанәсини идарә етмәк үчүн јығынҹагларын һамысында хидмәт едә билмирләр. Бунун үчүн дә, Рәһбәрлик Шурасы башга гојунларын сырасындан гардашлары Јеһованын Шаһидләринин филиалларына, вилајәтләрә, рајонлара вә јығынҹаглара нәзарәт етмәк үчүн тә’јин едир. Мәсиһә табе олан бу чобанлара мүнасибәтимизин Исаја вә онун садиг гулуна олан сәдагәтимизлә әлагәси вармы? Бу мөвзу нөвбәти мәгаләдә мүзакирә олунаҹаг.
[Һашијәләр]
a Бу һагда даһа әтрафлы өјрәнмәк үчүн «Ҝөзәтчи Гүлләси»нин 2004-ҹү ил 1 мај сајынын 22-25 сәһифәләринә вә 1992-ҹи ил 1 декабр сајынын (рус.) 13-ҹү сәһифәсинә бахын.
b «Ҝөзәтчи Гүлләси»нин 1988-ҹи ил 1 март сајынын (инҝ.) 10-17 сәһифәләринә бахын.
Тәкрар үчүн суаллар
• Рәһбәримиз кимдир вә онун јығынҹагдакы вәзијјәтдән хәбәрдар олмасыны нә ҝөстәрир?
• ‘Мә’бәд’ јохланыларкән кимләрин садиг гул кими фәалијјәт ҝөстәрмәси ашкар олду вә онлара һансы маликанә е’тибар едилди?
• Садиг гулу сәдагәтлә дәстәкләмәк үчүн һансы сәбәбләримиз вар?
[25-ҹи сәһифәдәки шәкилләр]
Нөкәрбашынын нәзарәт етдији маликанәјә әмлак, руһани програм вә тәблиғ иши дахилдир.
[26-ҹы сәһифәдәки шәкил]
Башга гојунлар сә’јлә хидмәт едәрәк садиг гул синфини дәстәкләјирләр.