«Сүлһ Мәнбәји Олан» Јеһова Аллаһ
«Гој сүлһ мәнбәји олан Аллаһ сизләрлә олсун» (РОМ. 15:33).
1, 2. «Јарадылыш» китабынын 32 вә 33-ҹү фәсилләриндә һансы һадисә тәсвир олунуб вә бунун нәтиҹәси нә олду?
БУ ҺАДИСӘ Иордан чајынын шәрг тәрәфиндә, Јаббог вадисинин јахынлығында јерләшән Пенуелин әтраф әразиләриндә баш вермишди. Есав хәбәр тутур ки, әкиз гардашы Јагуб ата јурдуна гајыдыр. Онун илк оғуллуг һаггыны Јагуба сатмасындан 20 ил өтсә дә, Јагуб горхурду ки, гардашы һәлә дә она кин сахлајыр вә ону өлдүрмәк истәјир. Есав 400 нәфәр ҝөтүрүб артыг гардаш ҝөзү илә бахмадығы Јагубун үстүнә ҝедир. Гардашынын гәзәбинә туш ҝәләҹәјиндән еһтијат едән Јагуб бир-биринин ардынҹа Есава һәдијјә кими 550-дән чох мал-гара ҝөндәрир. Јагуб һәр бир гуллугчусуна тапшырыр ки, бу һәдијјәләрин онун гардашындан олдуғуну десинләр.
2 Нәһајәт, гардашлар ҝөрүшүрләр! Јагуб ҹәсарәтлә Есава тәрәф ҝедәрәк она тәзим едир, һәтта буну бир јох, једди дәфә едир. Јагуб гардашынын көнлүнү алмаг үчүн артыг ән ваҹиб аддымы атмышды. О, Јеһоваја дуа едәрәк ону Есавын әлиндән гуртармағы хаһиш етмишди. Јеһова онун дуасына ҹаваб вердими? Бәли. Мүгәддәс Китабда дејилир: «Есав Јагубу гаршыламаг үчүн гачыб ону гуҹаглады вә бојнуна сарылыб өпдү» (Јар. 32:11—20; 33:1—4).
3. Јагубла Есавын һадисәсиндән нә өјрәнирик?
3 Јагубла Есавын һадисәси ҝөстәрир ки, һәмиманлыларымызла проблемләри һәлл етмәк үчүн биз сәј ҝөстәрмәли вә конкрет аддымлар атмалыјыг, әкс һалда, мәсиһчи јығынҹағында сүлһ позулаҹаг. Јагуб гардашы илә барышмаға чалышды. Лакин о, буну гардашына гаршы ҝүнаһ ишләтдији вә ондан үзр истәмәли олдуғуна ҝөрә етмәди. Есав илк оғуллуг һаггына дәјәр вермәдији үчүн ону өзү бир бошгаб шорбаја ҝөрә Јагуба сатмышды (Јар. 25:31—34; Ибр. 12:16). Бунунла белә, Јагубун нүмунәсиндән баҹы-гардашларла сүлһү горумаг үчүн бөјүк сәј ҝөстәрмәк лазым олдуғуну өјрәнирик. Һәмчинин бу ҝөстәрир ки, һәгиги Аллаһ сүлһ јаратмаг наминә ҝөстәрдијимиз сәјләримизә хејир-дуа верир вә дуаларымызы ҹавабсыз гојмур. Мүгәддәс Китабда башгалары илә сүлһү неҹә горуја биләҹәјимизә даир диҝәр нүмунәләр дә вар. Ҝәлин онлара диггәт јетирәк.
Ән бөјүк нүмунә
4. Аллаһ бәшәријјәти ҝүнаһ вә өлүмдән гуртармаг үчүн һансы тәдбири ҝөрдү?
4 «Сүлһ мәнбәји олан» Јеһова Аллаһ башгалары илә сүлһү неҹә горумаға даир ән бөјүк нүмунәдир (Ром. 15:33). Јеһова бизим Онунла дост олмағымыз мүмкүн олсун дејә нә едиб? Ҝәлин бунун үзәриндә бир аз дүшүнәк. Адәмлә Һәвванын ҝүнаһлы нәсли кими, биз дә «ҝүнаһын өдәдији һагг»а, јәни өлүмә лајигик (Ром. 6:23). Лакин Јеһова бөјүк мәһәббәтиндән ирәли ҝәләрәк бизи ҝүнаһ вә өлүмдән гуртармаг гәрарына ҝәлди. Бунун үчүн О, севимли Оғлуну камил бир инсан кими јер үзүнә ҝөндәрди. Оғул көнүллү олараг Атасынын ирадәсинә бојун әјди вә һәјатыны бизим уғрумузда гурбан верди (Јәһ. 10:17, 18). Һәгиги Аллаһ севимли Оғлуну јенидән һәјата гајтарды. О, ҝөјә гајытды вә төвбә едән ҝүнаһкарлары әбәди өлүмдән хилас етмәк гүввәсинә малик олан төкүлән ганынын дәјәрини Атасына тәгдим етди. (Ибраниләрә 9:14, 24 ајәләрини оху.)
5, 6. Исанын төкүлән ганы ҝүнаһлы бәшәријјәтә Аллаһла барышмаға неҹә көмәк едир?
5 Ҝүнаһ уҹбатындан инсанлар Аллаһын дүшмәни олмушлар. Бәс Исанын фидјә гурбанлығы бизә Аллаһла барышмаға неҹә көмәк едир? Јешаја 53:5 ајәсиндә дејилир: «Бизим әмин-аманлығымыз үчүн о ҹәза алды, онун јаралары илә биз шәфа тапдыг». Исанын фидјә гурбанлығы сајәсиндә итаәткар инсанлар үчүн Онунла дост олмаг имканы јаранды. «Биз онун [Исанын] ганы илә өдәнмиш фидјә васитәсилә азадлыға, бәли,.. ҝүнаһларымызын әфвинә јетиширик» (Ефес. 1:7).
6 Мүгәддәс Китабда дејилир: «Аллаһ долғунлуғун бүтүнлүклә онда [Мәсиһдә] топланмасыны... мәгбул билди». Нәјә ҝөрә? Чүнки Мәсиһ Аллаһын нијјәтинин јеринә јетмәсиндә әсас рол ојнајыр. Бәс Аллаһын нијјәти нәдир? «Јердәки вә ҝөјдәки шејләрин һамысыны» Мәсиһин төкүлмүш ганы васитәсилә Өзү илә барышдырмагдыр. «Һамысы» сөзү алтында «јердәки вә ҝөјдәки» шејләр нәзәрдә тутулур. Бәс онда «јердәки вә ҝөјдәки» шејләр нәдир? (Колослулара 1:19, 20 ајәләрини оху.)
7. Аллаһын Өзү илә барышдырдығы «јердәки вә ҝөјдәки» шејләр ифадәси алтында кимләр нәзәрдә тутулур?
7 Аллаһын оғуллары кими салеһ елан едилән мәсһ олунмуш мәсиһчиләрин Исанын фидјә гурбанлығы сајәсиндә Аллаһла сүлһ мүнасибәтләриндә олмаг имканы вар. (Ромалылара 5:1 ајәсини оху.) «Ҝөјдәки» шејләр ифадәси алтында мәһз онлар нәзәрдә тутулур, чүнки онлар ҝөјләр үмидинә маликдирләр. Мәсһ олунмуш мәсиһчиләр «јер үзәриндә һөкмранлыг едәҹәкләр», еләҹә дә каһинләр кими Аллаһа хидмәт едәҹәкләр (Вәһј 5:10). «Јердәки» шејләр дејилдикдә исә јер үзүндә әбәди һәјата говушаҹаг төвбә етмиш инсанлар нәзәрдә тутулур (Мәз. 37:29).
8. Јеһова бәшәријјәти Өзү илә барышдырмаг үчүн нә етди вә Онун нүмунәси үзәриндә дүшүнмәк бизә һәмиманлыларымызла јаранан проблемләри һәлл етмәкдә неҹә көмәк едир?
8 Павелин Ефесдәки мәсһ олунмуш мәсиһчиләрә јаздығы сөзләрдән онун фидјә гурбанлығыны нә дәрәҹәдә гијмәтләндирдијини ҝөрмәк олар: «Мәрһәмәти бол олан Аллаһ... биз һәлә тәгсирләримиздә өлү икән, бизи Мәсиһлә бирликдә һәјата гајтарды (бәли, сиз лүтф сајәсиндә хилас олдунуз)» (Ефес. 2:4, 5). Јер вә ја ҝөј үмидинә малик олмағымыздан асылы олмајараг, Аллаһын бизә ҝөстәрдији лүтф вә мәрһәмәтин әвәзини һеч вахт гајтара билмәјәҹәјик. Бәшәријјәти Өзү илә барышдырмаг үчүн Јеһованын нәләрдән кечдији һагда дүшүнәндә үрәјимиз миннәтдарлыгла долур. Бәзән јығынҹагда сүлһ вә бирлијин позулмасы тәһлүкәси јараныр. Белә һалларда биз Аллаһын нүмунәси үзәриндә дүшүнмәли вә сүлһү горумалыјыг.
Ибраһимин вә Исһагын нүмунәсиндән нә өјрәнирик?
9, 10. Лутун вә Ибраһимин чобанлары арасында мүбаһисә дүшәндә Ибраһим сүлһпәрвәр инсан олдуғуну неҹә ҝөстәрди?
9 Мүгәддәс Китабда Ибраһим пејғәмбәр һаггында дејилир: «“Ибраһим Јеһоваја иман ҝәтирди вә буна ҝөрә салеһ сајылды” сөзләри јеринә јетди вә она “Јеһованын досту” дејилди» (Јаг. 2:23). Ибраһимин Јеһоваја олан иманы башгалары илә сүлһ мүнасибәтини горумагда бүрузә верирди. Мәсәлән, Ибраһимин сүрүләри артдыгҹа онун чобанлары илә гардашы оғлу Лутун чобанлары арасында тез-тез мүбаһисә дүшүрдү (Јар. 12:5; 13:7). Ибраһим вә Лут гәрара ҝәлдиләр ки, проблемдән ән јахшы чыхыш јолу ајрылмагдыр. Ибраһим белә бир чәтин вәзијјәтдә өзүнү неҹә апарды? О фикирләшмирди ки, јашҹа Лутдан бөјүк вә Јеһова илә хүсуси мүнасибәти олдуғу үчүн сон гәрары өзү вермәлидир. Әксинә, о, өзүнү әсил сүлһпәрвәр инсан кими ҝөстәрди.
10 Ибраһим Лута деди: «Гој мәнимлә сәнин вә чобанларымла чобанларын арасында мүбаһисә олмасын, чүнки биз гоһумуг. Бүтүн торпаглар ҝөзүнүн өнүндә дејилми? Ҝәл ајрылаг. Әҝәр сән сола ҝетсән, мән саға ҝедәҹәјәм, сән саға ҝетсән, мән сола ҝедәҹәјәм». Лут ән мәһсулдар торпағы сечди, анҹаг Ибраһим буна ҝөрә она үрәјиндә кин сахламады (Јар. 13:8—11). Сонра дүшмәнләр Луту әсир апаранда Ибраһим тәрәддүд етмәдән гардашы оғлуну онларын әлиндән хилас етди (Јар. 14:14—16).
11. Филиштлиләрлә гоншу олан Ибраһим онларла сүлһү неҹә горујурду?
11 Ҝөрәк Ибраһим Кәнан торпағында јашајаркән гоншу филиштлиләрлә сүлһү неҹә горујурду. Филиштлиләр Ибраһимин гуллугчуларынын Беер-Шевада газдығы су гујусуну гәсб етмишдиләр. Ҝөрәсән гардашы оғлуну дөрд падшаһын әлиндән гуртаран Ибраһим белә вәзијјәтдә неҹә давранды? Вурушараг гујуну өзүнә гајтармаг әвәзинә, Ибраһим сусмаға үстүнлүк верди. Бир мүддәтдән сонра филиштлиләрин падшаһы Ибраһимлә сүлһ мүгавиләси бағламаг үчүн она баш чәкди. Јалныз филиштлиләрин падшаһы Ибраһимә онун нәсли илә хејирхаһ давранаҹағына анд ичдирәндән сонра Ибраһим оғурланмыш гују мәсәләсини онун нәзәринә чатдырды. Буну ешидән падшаһ тәәҹҹүбләнди вә гујуну Ибраһимә гајтарды. Ибраһим исә бу торпагда гәриб кими динҹ вә раһат јашамаға давам едирди (Јар. 21:22—31, 34).
12, 13. а) Исһаг атасынын нүмунәсини неҹә изләјирди? б) Јеһова Исһагын сүлһү горумаг сәјләринә неҹә хејир-дуа верирди?
12 Ибраһимин оғлу Исһаг, атасы кими, сүлһпәрвәр инсан иди. Буну Исһагын филиштлиләрлә мүнасибәтиндән ҝөрмәк олар. Гытлыг уҹбатындан Исһаг аиләсилә бирҝә Неҝевдә јерләшән вә гуру әрази олан Беер-Лахај-Роини тәрк етди. О, шималда јерләшән вә мәһсулдар торпаг олан Ҝерарда мәскән салды. Бурада Јеһова она хејир-дуа верди вә онун мәһсулу бол, мал-гарасы исә чох олду. Филиштлиләр Исһага пахыллыг етмәјә башладылар. Онлар Исһагын атасы кими варлы, дөвләтли олмасыны истәмирдиләр, бу сәбәбдән вахтилә Ибраһимин хидмәтчиләринин һәмин әразидә газдыглары гујулары торпагла долдурдулар. Сонда филиштлиләрин падшаһы Исһага деди: «Јанымыздан ҝет». Филиштлиләрлә сүлһү горумаг хатиринә Исһаг падшаһын дедијинә әмәл етди (Јар. 24:62; 26:1, 12—17).
13 Бурада Исһагын чобанлары башга гују газдылар. Филиштли чобанлар сујун онлара мәхсус олдуғуну дедиләр. Анҹаг Исһаг, атасы Ибраһим кими, гују үстүндә дава-далаш етмәди, о, адамларына башга гују газмағы тапшырды. Филиштлиләр бу гујунун да онлара мәхсус олдуғуну дедиләр. Сүлһ хатиринә Исһаг аиләсини вә бөјүк әмлакыны ҝөтүрүб башга јерә көчдү. Бурада онун хидмәтчиләри даһа бир гују газдылар вә Исһаг онун адыны Реховот гојду. Бир вахт сонра о, даһа мәһсулдар әрази олан Беер-Шеваја көчдү. Бурада Јеһова она хејир-дуа вериб деди: «Горхма, чүнки Мән сәнинләјәм. Гулум Ибраһимә ҝөрә сәнә хејир-дуа верәҹәјәм вә нәслини чохалдаҹағам» (Јар. 26:17—25).
14. Филиштлиләрин падшаһы Исһагла сүлһ мүгавиләси бағламаға ҝәләндә о, сүлһпәрвәр инсан олдуғуну неҹә ҝөстәрди?
14 Шүбһәсиз ки, Исһагын хидмәтчиләринин газдыглары гујулары истифадә етмәк һүгугуна ҝөрә дөјүшмәјә имканы вар иди. Филиштлиләрин падшаһынын мәмурлары илә бирҝә Исһагын јанына, Беер-Шеваја онунла сүлһ мүгавиләси бағламаға ҝәлмәси буна бир сүбутдур. Падшаһ Исһага деди: «Биз ҝөрдүк ки, Рәбб, доғрудан да, сәнинләдир». Лакин сүлһ хатиринә Исһаг бундан габаг бир јох, бир нечә дәфә көчмәји сечмишди. Бу дәфә дә Исһаг падшаһла сүлһдә олмаг истәдијини ҝөстәрди. Мүгәддәс Китабда дејилир: «Исһаг онлара зијафәт верди вә онлар јејиб-ичдиләр. Сәһәр тездән галхыб бир-бирләринә анд ичдиләр. Исһаг онлары јола салды вә онлар сағ-саламат онун јанындан ҝетдиләр» (Јар. 26:26—31).
Јагубун ән севимли оғлундан нә өјрәнирик?
15. Нәјә ҝөрә Јусифин гардашлары онунла сакит даныша билмирдиләр?
15 Исһагын оғлу Јагуб да «мүлајим бир адам» иди (Јар. 25:27). Мәгаләнин әввәлиндә артыг гејд олундуғу кими, Јагуб гардашы Есавла барышмаг истәјирди. Шүбһәсиз, Јагуб сүлһпәрвәр олмағы атасы Исһагдан өјрәнмишди. Бәс Јагубун оғуллары һагда нә демәк олар? Онун 12 оғлу вар иди вә о, Јусифи һамысындан чох истәјирди. Јусиф атасына итаәт едир вә онун һөрмәтини сахлајырды. Үстәлик, о, атасынын етибарыны газанмышды (Јар. 37:2, 14). Лакин Јусифин бөјүк гардашлары она о гәдәр пахыллыг едирдиләр ки, онунла сакит даныша билмирдиләр. Онлар Јусифлә гәддарҹасына давранараг ону көләлијә сатдылар, лакин аталарына дедиләр ки, ҝуја Јусифи вәһши һејван парчалајыб (Јар. 37:4, 28, 31—33).
16, 17. Јусифин гардашлары илә рәфтарындан онун сүлһпәрвәр инсан олдуғу неҹә ҝөрүнүр?
16 Јеһова Јусифи хејир-дуаландырды. Бир мүддәтдән сонра Јусиф Мисирдә фирондан сонра икинҹи адам олду. Өлкәләриндә аҹлыг һөкм сүрән заман Јусифин гардашлары јемәк алмаг үчүн Мисирә ҝәлдиләр. Анҹаг онлар Јусифлә ҝөрүшәндә о, Мисир задәҝанларынын гијафәтиндә олдуғундан ону таныја билмәдиләр (Јар. 42:5—7). Јусиф бу фүрсәтдән истифадә едәрәк она вә атасына етдикләри гәддарлыға ҝөрә гардашларындан гисас ала биләрди! Лакин о, гардашлары илә барышмаға үстүнлүк верди. Онларын, һәгигәтән дә, пешман олдуглары ајдын оланда Јусиф өзүнү онлара таныдыб деди: «Инди мәни бураја сатдығыныз үчүн кәдәрләнмәјин вә тәәссүфләнмәјин, чүнки Аллаһ һәјатынызы горумаг үчүн мәни сиздән габаг бураја ҝөндәрди». Сонра Јусиф бүтүн гардашларыны өпдү вә онларын бојнуна сарылыб ағлады (Јар. 45:1, 5, 15).
17 Аталары Јагуб вәфат етдикдән сонра гардашлар фикирләшдиләр ки, Јусиф онлардан гисас ала биләр. Онлар өз горхуларыны Јусифлә бөлүшәндә о «ағлады» вә онлара деди: «Горхмајын, мән һәм сизи, һәм дә өвладларынызы сахлајаҹағам». Сүлһпәрвәр инсан олан «Јусиф онлара үрәкләринҹә олан сөзләрлә тәсәлли верди» (Јар. 50:15—21).
«Нәсиһәт олараг јазылыб»
18, 19. а) Бу мәгаләдә арашдырылан нүмунәләрдән сән өзүн үчүн һансы ибрәт дәрси ҝөтүрдүн? б) Нөвбәти мәгаләдә биз нәји мүзакирә едәҹәјик?
18 Һәвари Павел јазыб: «Әввәлҹәдән јазыланларын һамысы... бизә нәсиһәт олараг јазылыб ки, дөзүм вә Мүгәддәс Јазылардан алдығымыз тәсәлли сајәсиндә үмидимиз олсун» (Ром. 15:4). Сүлһпәрвәр олмагда бизә ән јахшы нүмунә олан Јеһованын, еләҹә дә Ибраһимин, Исһагын, Јагубун вә Јусифин нүмунәләриндән нә өјрәндик?
19 Јеһованын бизим Онунла барышмағымызын мүмкүн олмасы үчүн етдикләри барәдә фикирләшсәк, башгалары илә сүлһү горумаг үчүн әлимиздән ҝәләни едәҹәјик. Ибраһимин, Исһагын, Јагубун, еләҹә дә Јусифин нүмунәсиндән ҝөрдүјүмүз кими, валидејнләр бу саһәдә ушагларына ҝөзәл нүмунә ола биләрләр. Бундан башга, бу нүмунәләр ҝөстәрир ки, Јеһова сүлһү горумаг сәјләримизә хејир-дуа верир. Павелин Јеһованы «сүлһ мәнбәји олан Аллаһ» адландырмасы тәәҹҹүблү дејил. (Ромалылара 15:33; 16:20 ајәләрини оху.) Нөвбәти мәгаләдә биз сүлһү горумағын ваҹиблијини вә буну неҹә етмәји мүзакирә едәҹәјик.
Нә өјрәндиниз?
• Јагуб Есавла ҝөрүшәҹәјини биләндә онунла барышмаг үчүн нә етди?
• Бәшәријјәти Өзү илә барышдырмаг үчүн Јеһованын етдикләри сәнә неҹә тәсир едир?
• Сүлһпәрвәр инсанлар олан Ибраһимин, Исһагын, Јагубун вә Јусифин нүмунәсиндән нә өјрәндин?
[23 сәһифәдәки шәкил]
Гардашы илә барышмаг үчүн Јагубун атдығы ән ваҹиб аддым һансы иди?