Тәһәммүлүнүзә Аллаһа ихлас әлавә един
“Иманыныза... тәһәммүл, тәһәммүлүнүзә Аллаһа ихлас... әлавә един” (2 ПЕТЕР 1:5-7).
1, 2. а) Ушаг һансы ҹәһәтдән бөјүмәлидир? б) Руһән инкишаф етмәк нә дәрәҹәдә ваҹибдир?
ҺӘР БИР ушаг јалныз физики ҹәһәтдән дејил, һәмчинин әгли ҹәһәтдән дә инкишаф етмәли вә даһа јеткин олмалыдыр. Вахт кечдикҹә о, бөјүјүб јеткин киши, ја да гадын олаҹаг вә ушаглығы илә видалашаҹаг. Бу һагда һәвари Павел демишдир: “Мән көрпә икән, көрпә кими данышыр, көрпә кими дүшүнүр, көрпә кими мүһакимә едәрдим; боја-баша чатдыгда исә, көрпә давранышларыны тәрк етдим” (1 Коринфлиләрә 13:11).
2 Павелин сөзләри руһән инкишаф етмәјә даир ваҹиб фикри вурғулајыр. Мәсиһчиләр руһани көрпәлији тәрк едиб, “әглән... камил” олмалыдырлар (1 Коринфлиләрә 14:20). Онлар ирәлијә доғру ҹан атмалы вә “Мәсиһин долғунлуг гамәтинин өлчүсүнә” јетишмәлидирләр. О заман онлар “һәр ҹүр тә’лимин күләји илә чалхаланан вә ора-бура сүрүкләнән көрпә ушаглар” олмајаҹаглар (Ефеслиләрә 4:13, 14).
3, 4. а) Руһән јеткин олмаг үчүн нә етмәлијик? б) Аллаһа мәгбул һансы кејфијјәтләри тәзаһүр етдирмәлијик вә онлар нә дәрәҹәдә ваҹибдир?
3 Биз руһән неҹә јеткин ола биләрик? Физики инкишаф нормал шәраитдә өз-өзүнә баш верир, руһани инкишаф исә дүшүнүлмүш сә’јләр тәләб едир. Белә инкишаф, Аллаһын Кәламындан әлдә етдијимиз дәгиг биликләрдән вә һәмин биликләрә мүвафиг давранмагдан башлајыр (Ибраниләрә 5:14; 2 Петер 1:3). Бу, өз нөвбәсиндә, Аллаһа мәгбул кејфијјәтләри тәзаһүр етдирмәјимизә имкан јарадыр. Физики инкишафын мүхтәлиф саһәләриндә олдуғу кими, Аллаһа мәгбул олан мүхтәлиф кејфијјәтләрин инкишафы да ејни вахтда баш верир. Һәвари Петер јазырды: “Бүтүн сә’јинизи сәрф едәрәк, иманыныза фәзиләт, фәзиләтинизә билик, билијинизә нәфсә һаким олмағы, нәфсә һаким олмаға тәһәммүл, тәһәммүлүнүзә Аллаһа ихлас, ихласыныза гардаш севҝиси вә гардаш севҝисинә мәһәббәти әлавә един” (2 Петер 1:5-7).
4 Петерин садаладығы һәр бир кејфијјәт олдугҹа ваҹибдир вә бунлардан һеч биринә е’тинасыз јанашмаг олмаз. О әлавә едир: “Әҝәр бунлар сиздә варса вә артырса, Рәббимиз Иса Мәсиһи танымагда фәалијјәтсиз вә сәмәрәсиз галмајаҹагсыныз” (2 Петер 1:8). Тәһәммүлүмүзә Аллаһа ихлас, јә’ни сәдагәт әлавә етмәјин зәрурилијинә хүсуси диггәт јетирәк.
Тәһәммүл зәруридир
5. Нә үчүн бизә тәһәммүл ҝәрәкдир?
5 Һәм Петер, һәм дә Павел Аллаһа ихласы тәһәммүл илә әлагәләндирирләр (1 Тимотејә 6:11). Тәһәммүлә малик олан инсан јалныз чәтинликләрә таб ҝәтириб, гәтијјәтини горумур. О, һәмчинин сәбир, мәтанәт вә дөзүмлүлүк ҝөстәрир, сынаглар, мүгавимәтләр, тәзјигләр вә тә’гибләр заманы үмидини итирмир. Биз “Аллаһ јолунда Мәсиһ Исаја бағлы олараг” јашајырыг вә буна ҝөрә дә тә’гиб олунаҹағымызы билирик (2 Тимотејә 3:12). Әҝәр биз, Јеһоваја мәһәббәтимизи сүбута јетириб, хилас үчүн ваҹиб олан кејфијјәтләри инкишаф етдирмәк истәјириксә, тәһәммүл ҝөстәрмәлијик (Ромалылара 5:3-5; 2 Тимотејә 4:7, 8; Јагуб 1:3, 4, 12). Тәһәммүлсүз әбәди һәјата наил олмаг мүмкүн дејил (Ромалылара 2:6, 7; Ибраниләрә 10:36).
6. Сона гәдәр сәбир етмәк үчүн нә етмәлијик?
6 Мәсиһчи јолуна гәдәм гојаркән атдығымыз аддымлар нә гәдәр јахшы олса да, нәтиҹәдә һәр шеј бизим тәһәммүлүмүздән асылы олаҹаг. Иса демишдир: “Ахыра гәдәр сәбр едән хилас олаҹагдыр” (Матта 24:13). Бәли, ја бу системдәки һәјатымызын сонуна гәдәр, ја да пис системин сонуна гәдәр сәбир етмәлијик. Һәр неҹә олса да, Аллаһ гаршысында нөгсансызлығымызы горумалыјыг. Амма әҝәр тәһәммүлүмүзә Аллаһа ихлас әлавә етмириксә, биз Јеһованы разы салыб, әбәди һәјата наил ола билмәјәҹәјик. Бәс, Аллаһа ихлас нә демәкдир?
Аллаһа ихлас нә демәкдир?
7. Аллаһа ихлас нә демәкдир вә бу бизи нәјә тәшвиг едир?
7 Аллаһа ихлас — Јеһова Аллаһа еһтирам, ибадәт вә хидмәт етмәк демәкдир. Бу хидмәт исә, Јеһованын һәр шеји әһатә едән һакимијјәтини дәстәкләмәк истәјинә әсасланыр. Бу ҹүр тәһәммүл тәзаһүр етдирмәк үчүн, бизә Јеһова вә Онун јоллары һаггында дәгиг билик әлдә етмәк ҝәрәкдир. Биз Аллаһы бир шәхсијјәт кими даһа јахындан танымалыјыг. Бу, Она гаршы сәмими һиссләри инкишаф етдирмәјә тәшвиг едәҹәк ки, бу да давранышымызда вә һәјат тәрзимиздә өзүнү ҝөстәрәҹәк. Биздә, мүмкүн гәдәр Јеһоваја бәнзәмәк истәји олмалыдыр, јә’ни биз Онун јолларыны өјрәнмәли вә кејфијјәтләрини әкс етдирмәлијик (Ефеслиләрә 5:1). Аллаһа ихлас, биздә етдијимиз һәр бир ишдә Ону мәмнун етмәк истәјини ојадыр (1 Коринфлиләрә 10:31).
8. Аллаһа ихлас илә хүсуси сәдагәт арасындакы сых бағлылығы ҝөстәрин.
8 Аллаһа ихлас ҝөстәрмәк үчүн, биз јалныз вә јалныз Јеһоваја ибадәт етмәлијик, һеч бир шеј үрәјимиздә Онун јерини тутмалы дејил. Бизи Јарадан Одур вә Онун биздән “хүсуси сәдагәт” ҝөзләмәјә там һаггы вар (Тәснијә 4:24, ЈД; Ишаја 42:8). Бунунла белә, Јеһова бизи Она ибадәт етмәјә мәҹбур етмир. О истәјир ки, сәдагәтимиз үрәкдән олсун. Һәјатымызы сәһмана салмаға, бүтүнлүклә Аллаһа һәср олунмаға вә буна мүвафиг јашамаға мәһз Јеһоваја олан мәһәббәтимиз тәшвиг едир вә бу мәһәббәт Онун һаггында олан дәгиг биликләрә әсасланыр.
Аллаһла мүнасибәтинизи инкишаф етдирин
9, 10. Јеһова илә сых мүнасибәтләримизи неҹә инкишаф етдириб, горуја биләрик?
9 Аллаһа һәср олунмамызы вәфтизлә символлашдырдыгдан сонра, биз Онунла мүнасибәтимизи мөһкәмләтмәјә давам етмәли, Она ҝет-ҝедә даһа да јахынлашмалыјыг. Јеһоваја јахынлашмаг вә Она сәдагәтлә хидмәт етмәк арзусу исә, Онун Кәламыны бундан сонра да өјрәнмәјә вә үзәриндә дүшүнмәјә тәшвиг едәҹәкдир. Аллаһын руһунун әглимизә вә үрәјимизә тә’сир етмәсинә јол вермәклә, Јеһоваја олан мәһәббәтимизи артырмыш олуруг. Онунла олан мүнасибәтимиз һәјатымызда башлыҹа јери тутмаға давам едир. Јеһованы өзүмүзә ән јахшы Дост саныр вә Ону һәмишә мәмнун етмәк истәјирик (1 Јәһја 5:3). Биз Аллаһла олан хош мүнасибәтимизә даһа да севинирик вә лазым ҝәлдикдә бизә мәһәббәтлә тә’лим вериб, бизи ислаһ етдијинә ҝөрә Она миннәтдарыг (Тәснијә 8:5).
10 Јеһова илә олан дәјәрли мүнасибәтләримизи мөһкәмләтмәк үчүн даима сә’ј ҝөстәрмириксә, һәмин мүнасибәтләр зәифләјә биләр. Әҝәр белә бир шеј баш верәрсә, онда ҝүнаһкар Аллаһ олмајаҹаг, чүнки “О һеч биримиздән узаг дејил” (Һәвариләрин ишләри 17:27). Нә јахшы ки, Јеһова һеч заман елә бир сәдд јаратмыр ки, Она јахынлашмаг бизә чәтин олсун! (1 Јәһја 5:14, 15). Сөзсүз ки, Јеһова илә сых мүнасибәтләримизи горумаг үчүн, биз сә’ј ҝөстәрмәлијик. Лакин Аллаһ, Она јахынлашмаға көмәк едәрәк, ихласымызы инкишаф етдириб, горумаг үчүн лазым олан һәр шеји верир (Јагуб 4:8). Јеһованын мәһәббәтлә тәгдим етдикләрини лазымынҹа неҹә истифадә едә биләрик?
Руһән ҝүҹлү галын
11. Аллаһа ихласымыз һансы саһәләрдә тәзаһүр олуна биләр?
11 Аллаһа олан дәрин мәһәббәтимиз бизи тәшвиг едәҹәк ки, Она олан ихласымызын дәринлијини әмәлләримизлә ҝөстәрәк. Павел дә бизи буна тәшвиг едир: “Чалыш ки, өзүнү Аллаһа сынагдан чыхмыш, утанмаға әсасы олмајан вә һәгигәт сөзүнү доғрулугла өјрәдән бир ишчи кими тәгдим едәсән” (2 Тимотејә 2:15). Бу ҹүр давранмаг үчүн, мүнтәзәм олараг Мүгәддәс Китабы өјрәнмәк, јығынҹаг ҝөрүшләринә ҝетмәк вә тәблиғ хидмәтиндә иштирак етмәк үчүн јахшы графикә риајәт етмәлијик. Јеһова илә сых мүнасибәтләримизи горумагда бизә ‘дурмадан дуа етмәк’ вәрдиши дә көмәк едәр (1 Салониклиләрә 5:17). Бүтүн бунларын васитәсилә Аллаһа олан ихласымыз әмәлләрлә тәзаһүр олунаҹагдыр. Әҝәр бунлардан биринә е’тинасыз јанашарыгса, руһән хәстәләнәр вә Шејтанын тәләләринин гурбаны ола биләрик (1 Петер 5:8).
12. Сынагларын өһдәсиндән мүвәффәгијјәтлә неҹә ҝәлә биләрик?
12 Бундан әлавә, әҝәр биз руһән ҝүҹлү вә фәал галырыгса, чохсајлы сынаглары гаршыламаг бизим үчүн асан олаҹаг. Сынаглары исә онун мәнбәји олан кәс ағырлашдыра биләр. Аилә үзвләринин, гоһум вә ја гоншуларын ҝөстәрдији е’тинасызлыға, мүгавимәтә вә тә’гибләрә таб ҝәтирмәк даһа чәтиндир. Мәсиһчијә хас олан принсипләрә ҝүзәштә ҝетмәјә тәшвиг едән мәкрли тәзјигләрлә мәктәбдә вә ја иш јериндә дә гаршылаша биләрик. Мә’јуслуг, хәстәлик вә сыхынты физики гүввәмизи зәифләдәр вә иманын сынағына таб ҝәтирмәји чәтинләшдирә биләр. Лакин биз “Аллаһын Ҝүнүнүн зүһуруну ҝөзләјиб, ону сүр’әтләндирәрәк мүгәддәс вә Аллаһа ихласкар бир һәјат” јашамагда мәтанәт ҝөстәрсәк, бүтүн чәтинликләрин өһдәсиндән мүвәффәгијјәтлә ҝәлә биләҹәјик (2 Петер 3:11, 12). Бу ҹүр давранараг севинҹимизи горујаҹаг вә Аллаһын бизә хејир-дуа верәҹәјинә әмин олаҹағыг (Сүлејманын мәсәлләри 10:22).
13. Аллаһа даима ихласкар олмаг үчүн биз нә етмәлијик?
13 Аллаһа ихласкар оланларын һәр бири Шејтан үчүн һәдәф олсалар да, бизим горхмаға әсасымыз јохдур. Нәјә ҝөрә? Она ҝөрә ки, “Рәбб [Јеһова] Она ихлас едәнләри имтаһандан неҹә хилас етмәји... билир” (2 Петер 2:9). Сынаглара таб ҝәтирмәк вә Јеһованын бизи хилас етмәси үчүн, “һөрмәтсизлији вә дүнјәви еһтираслары рәдд едиб, бу дүнјада тәмкинли, салеһ вә Аллаһ јолуна ујғун бир өмүр” сүрмәлијик (Титуса 2:12). Бир мәсиһчи кими ајыг олмалыјыг ки, ҹисмани еһтирас вә мәшғулијјәтлә бағлы олан һеч бир зәифлик Аллаһа ихласымызы позуб, мәһв етмәсин. Ҝәлин бу тәһлүкәләрдән бә’зиләринә диггәт јетирәк.
Аллаһа олан ихласа гаршы јаранан тәһлүкәләрдән горунун
14. Вар-дөвләт далынҹа дүшмәк тәләси бизи өзүнә чәкирсә, нәји јадда сахламалыјыг?
14 Вар-дөвләт далынҹа дүшмәк бир чохлары үчүн тәләјә чеврилир. Биз, “Аллаһ јолунун газанҹ мәнбәји олдуғуну” дүшүнмәклә өз-өзүмүзү алдада биләрик. Бу исә бизи, һәмиманлыларымызын е’тибарындан суи-истифадә етмәјә тәһрик едә биләр (1 Тимотејә 6:5). Һәтта сәһв олараг белә бир нәтиҹәјә ҝәлә биләрик ки, алдығымыз пулу гајтара билмәјәҹәјимизи габагҹадан биләрәк, имканлы мәсиһчидән борҹ истәмәкдә гәбаһәт бир шеј јохдур (Мәзмур 37:21). Лакин “индики вә ҝәләҹәк һәјат үчүн үмид” мадди шејләр әлдә етмәкдән јох, Аллаһа ихласдан ибарәтдир (1 Тимотејә 4:8). ‘Дүнјаја һеч бир шеј ҝәтирмәдијимиз вә орадан һеч бир шеј дә апара билмәдијимиз’ үчүн, сәмими гәлбдән даһа да чалышаҹағыг ки, ‘әлимиздә оланла кифајәтләнәрәк Аллаһ јолуна бағлы галаг вә јемәјимиз, палтарымыз варса, бунларла кифајәтләнәк’ (1 Тимотејә 6:6-11).
15. Зөвг далынҹа дүшмәк Аллаһа ихласкар олмағымызы сыхышдырыб арадан чыхармаг тәһлүкәси јарадырса, һансы тәдбири ҝөрә биләрик?
15 Зөвг далынҹа дүшмәк Аллаһа ихласымызы сыхышдырыб арадан чыхара биләр. Бу саһәдә бизә тә’ҹили дәјишиклик етмәк лазым дејилми? Сөзсүз ки, бәдән үчүн мәшг вә истираһәт мүәјјән гәдәр фајдалыдыр. Лакин әбәди һәјатла мүгајисәдә онларын фајдасы аздыр (1 Јәһја 2:25). Бу ҝүн чохлары ‘зөвгү Аллаһдан чох севирләр. Аллаһ јолунда имиш кими ҝөрүнүр, амма о јолун гүдрәтини инкар едирләр’, бу ҹүр адамлардан исә биз үз дөндәрмәлијик (2 Тимотејә 3:4, 5). Аллаһа ихласкар олмаға хүсуси диггәт јетирән кәсләр исә “өзләринә ҝәләҹәк үчүн јахшы тәмәл олаҹаг бир хәзинә” топлајырлар ки, “әбәди һәјата наил олсунлар” (1 Тимотејә 6:19).
16. Һансы ҝүнаһлы еһтираслар бә’зи инсанлары Аллаһын әдаләтли тәләбләринә мүвафиг јашамаға гојмур вә биз бу еһтираслара неҹә үстүн ҝәлә биләрик?
16 Аллаһа ихласы, алкогол вә наркотик маддәләрдән суи-истифадә, әхлагсызлыг вә ҝүнаһлы еһтираслар пуч едә биләр. Бу ҹүр сынагларын тә’сиринә дүшәрәк, Аллаһын әдаләтли нормаларына мүвафиг ола билмәјәҹәјик (1 Коринфлиләрә 6:9, 10; 2 Коринфлиләрә 7:1). Һәтта Павел ҝүнаһкар бәдәни илә даима мүбаризә апармалы олмушдур (Ромалылара 7:21-25). Јанлыш истәкләри кәнар етмәк үчүн ҹидди тәдбирләр ҝөрмәк лазымдыр. Беләликлә биз, әхлагҹа тәмиз галмаг гәрарында гәтијјәтли олмалыјыг. Павел бизә дејир: “Дахили варлығынызын дүнјәви јөнләрини — ҹинси әхлагсызлыг, натәмизлик, шәһвәт, пис еһтирас вә бүтпәрәстлик олан тамаһкарлығы — өлдүрүн” (Колослулара 3:5). Дахили варлығымызын үзвләрини бу ҹүр ҝүнаһлар үчүн өлдүрмәкдә гәтијјәт тәләб олунур, чүнки јанлыш истәкләри бүтүнлүклә көкүндән кәсмәк лазымдыр. Бу натәмиз дүнјада јашајараг, көмәк үчүн үрәкдән етдијимиз дуалар јанлыш истәкләри гопарыб атмаға, әдаләтә вә Аллаһа ихласа ҹан атмаға көмәк едәҹәк.
17. Нәсиһәтә неҹә јанашмалыјыг?
17 Мә’јуслуг тәһәммүлүмүзү зәифләдиб, Аллаһа олан ихласымыза зәрәр јетирә биләр. Јеһованын хидмәтчиләринин бир чоху мә’јуслуға дүчар олмушлар (Сајлар 11:11-15; Езра 4:4; Јунус 4:3). Мәсәлән, бизи ҹидди сурәтдә мәзәммәт едәндә вә ја нәсиһәт вердикләринә ҝөрә өзүмүзү тәһгир олунмуш һисс едәндә, гәзәблә гарышмыш мә’јуслуг һисси бизә хүсусилә чох әзијјәт верир. Лакин мәзәммәт вә нәсиһәт Аллаһын бизимлә марагландығына, Онун бизим гејдимизә галдығына шәһадәт едир (Ибраниләрә 12:5-7, 10, 11). Нәсиһәтә тәнбеһ кими јох, салеһлик јолу илә јеримәк имканы кими јанашмаг лазымдыр. Әҝәр тәвазөкарыгса, ‘тәрбијә үчүн едилән мәзәммәтин һәјат јолу олдуғуну’ дәрк едәрәк, нәсиһәтләри јүксәк гијмәтләндирәҹәк вә гәбул едәҹәјик (Сүлејманын мәсәлләри 6:23). Бу, Аллаһа ихласкар олмаға ҹан атараг, руһән тез бөјүмәјимизә көмәк едәҹәк.
18. Инҹиклик баш верән заман, үзәримизә һансы мәс’улијјәт дүшүр?
18 Анлашылмазлыг вә инҹиклик үзүндән Аллаһа ихласкар олмағымызла чәтинлик јарана биләр. Анлашылмазлыг вә инҹиклик инсаны раһатлыгдан мәһрум едиб, ону дүшүнҹәсиз һәрәкәтә — руһани баҹы-гардашлардан ајрылмаға тәһрик едә биләр (Сүлејманын мәсәлләри 18:1). Анҹаг унутмаг олмаз ки, башгаларына гаршы үрәјиндә кин сахлајыб, даима әдавәт апармагла, Јеһова илә мүнасибәти позмаг олар (Левилиләр 19:18). Бундан әлавә, “ҝөрдүјү гардашыны севмәјән ҝөрмәдији Аллаһы неҹә севә билир?” (1 Јәһја 4:20). Иса Дағүстү тәблиғиндә шәхси мүнагишәләри дәрһал һәлл етмәјин ваҹиблијини вурғулады. О, динләјиҹиләринә белә деди: “Әҝәр өз гурбаныны гурбанҝаһ гаршысына ҝәтирдијин заман орада јадына дүшсә ки, гардашынын сәнә гаршы бир шикајәти вар, гурбаныны орада гурбанҝаһын гаршысында гој, ҝет әввәлҹә гардашын илә барыш вә ондан сонра ҝәл, гурбаныны тәгдим ет” (Матта 5:23, 24). Үзр диләмәк аҹыгла дејилмиш сөздән вә ја едилмиш һәрәкәтдән әмәлә ҝәлән јаранын сағалмасына көмәк едәр. Әҝәр биз үзр диләјиб, пис даврандығымызы е’тираф едәриксә, бу, јаранан инҹиклији арадан галдырар вә јахшы мүнасибәтләри бәрпа етмәјә көмәк едәр. Чәтинликләри һәлл етмәјә даир Иса башга мәсләһәт дә вермишдир (Матта 18:15-17). Јаранан чәтинликләри һәлл етмәк үчүн ҝөстәрдијимиз сә’ј сәмәрә ҝәтирдикдә биз неҹә дә севинирик! (Ромалылара 12:18; Ефеслиләрә 4:26, 27).
Исанын нүмунәсини тәглид един
19. Исанын нүмунәсини тәглид етмәк нә үчүн олдугҹа ваҹибдир?
19 Сынаглардан гачынмаг мүмкүн дејил, амма јол вермәк олмаз ки, онларын уҹбатындан әбәди һәјата апаран јолдан узаглашаг. Унутмајын ки, Јеһова бизи сынаглардан гуртармаға гадирдир. “Бизи асанлыгла чашдыран” һәр нә варса “тәрк едиб, гаршымыза гојулан јарышда мәтанәтлә” гачараг, ҝәлин “иманымызын Баниси вә Камилләшдириҹиси олан Исаја бахаг” (Ибраниләрә 12:1-3). Әҝәр Исанын нүмунәсини диггәтлә өјрәниб, сөһбәтимиздә вә давранышымызда ону тәглид етмәјә чалышырыгса, бу, Аллаһа ихласы инкишаф етдириб, ону даһа чох тәзаһүр етдирмәкдә бизә көмәк едәҹәк.
20. Тәһәммүл вә Аллаһа ихлас һансы мүкафатлары ҝәтирир?
20 Тәһәммүл вә Аллаһа ихлас бир-бири илә сых бағлыдыр — һәр ики кејфијјәт бирликдә хиласа наил олмагда бизә көмәк едир. Бу дәјәрли кејфијјәтләри тәзаһүр етдирәрәк, биз, Аллаһа мүгәддәс хидмәтимизи давам етдирә биләрик. Биз, һәтта сынагларла гаршылашан заман белә севинҹ дујаҹағыг, чүнки ихлас вә тәһәммүл кими кејфијјәтләри тәзаһүр етдирдијимиз үчүн Јеһованын нәҹиб мәһәббәтини үзәримиздә һисс едәҹәк вә Онун хејир-дуаларыны алаҹағыг (Јагуб 5:11). Бундан савајы, Исанын өзү демишдир: “Өз ҹанларынызы сәбирлә хилас един” (Лука 21:19).
Сиз неҹә ҹаваб верәрдиниз?
• Тәһәммүл нәјә ҝөрә бөјүк әһәмијјәт кәсб едир?
• Аллаһа ихлас нә демәкдир вә һансы саһәләрдә тәзаһүр етдирилир?
• Аллаһла сых мүнасибәти неҹә инкишаф етдириб, горуја биләрик?
• Аллаһа олан ихласымыза гаршы һансы тәһлүкәләр мөвҹуддур вә онлардан неҹә гачына биләрик?
[8 вә 9-ҹу сәһифәләрдәки шәкилләр]
Аллаһа ихлас чох саһәләрдә тәзаһүр едилир.
[10-ҹу сәһифәдәки шәкилләр]
Аллаһа олан ихласа гаршы тәһлүкәләрдән горунун.