Никаһынызда ‘үчгат ипи’ горујун
«Үчгат ип тез гырылмаз» (ВАИЗ 4:12).
1. Илк инсан ҹүтүнү никаһда ким бирләшдирди?
БИТКИ вә һејванат аләмини јаратдыгдан сонра Јеһова Аллаһ илк инсан олан Адәми јаратды. Бир гәдәр сонра Аллаһ Адәми дәрин јухуја верди вә габырғасындан бирини ҝөтүрүб она камил бир көмәкчи јаратды. Адәм ону ҝөрүб деди: «Бах, нәһајәт, бунун сүмүјү мәним сүмүјүмдән, бәдәни мәним бәдәнимдәндир» (Јар. 1:27; 2:18, 21-23). Јеһова илк инсан ҹүтүнү никаһда бирләшдирмәклә вә онлара хејир-дуа вермәклә илк гадынын јаранмасынын нијјәтинә ујғун олдуғуну ҝөстәрди (Јар. 1:28; 2:24).
2. Шејтан Адәмлә Һәвванын арасыны неҹә вурду?
2 Әфсуслар олсун ки, чох кечмәмиш Аллаһын јаратдығы никаһ гурулушу һүҹума мәруз галды. Бу неҹә олду? Шејтан адланан пис руһани варлыг Һәвваны алдадараг онлары гадаған олунмуш ағаҹын мејвәсиндән јемәјә тәһрик етди. Сонра Адәм Аллаһын гануни һөкмранлығына вә дүзҝүн рәһбәрлијинә гаршы үсјан галдыран арвадына гошулду (Јар. 3:1-7). Јеһова онлары етдикләри ишә ҝөрә ҹаваб вермәјә чағыранда артыг илк әр-арвадын мүнасибәтинин позулдуғу ајдын ҝөрүнүрдү. Адәм арвадыны тәгсирләндирәрәк деди: «Мәнимлә бирҝә олмаг үчүн вердијин гадын о ағаҹын мејвәсиндән верди, мән дә једим» (Јар. 3:11-13).
3. Бәзи јәһудиләрин һансы сәһв бахышлары вар иди?
3 Шејтан әрлә арвадын арасыны вурмаг үчүн әсрләр боју мүхтәлиф һијләләрә әл атыб. Мисал үчүн, бәзән о, дин рәһбәрләриндән истифадә едәрәк никаһа даир Мүгәддәс Јазылара зидд бахышлары јајырды. Бәзи јәһуди рәһбәрләри әрләрә ҹүзи шејләрә ҝөрә, мәсәлән, јемәји дузлу етдијинә ҝөрә өз арвадларыны бошамаға иҹазә вермәклә Аллаһын нормаларыны дәјәрдән салырдылар. Амма ҝөрүн Иса нә деди: «Ким ҹинси әхлагсызлыгдан башга сәбәблә арвадыны бошајыб башгасы илә евләнәрсә, зина едәр; бошанмыш гадынла евләнән дә зина едәр» (Мат. 19:9).
4. Бу ҝүн никаһ гурулушу һансы һүҹума мәруз галыр?
4 Шејтан бу ҝүн дә никаһ телләрини позмаг үчүн дәридән-габыгдан чыхыр. Ејниҹинсли инсанлар арасында никаһ, никаһда олмајан ики нәфәрин бирҝә јашамасы вә бошанманын асанлашмасы ҝөстәрир ки, Шејтан никаһын дағыдылмасында бөјүк наилијјәтләр әлдә едиб. (Ибраниләрә 13:4 ајәсини оху.) Биз мәсиһчиләр никаһа даир ҝениш јајылмыш јанлыш нөгтеји-нәзәрин тәсиринә дүшмәкдән өзүмүзү неҹә горуја биләрик? Ҝәлин хошбәхт вә уғурлу никаһын бәзи ҹәһәтләрини нәзәрдән кечирәк.
Никаһда Јеһованын јери
5. «Үчгат ип» ифадәси никаһа аид едилдикдә һансы мәнаны дашыјыр?
5 Никаһын уғурлу олмасы үчүн әрлә арвадын һәјатында Јеһованын јери олмалыдыр. Онун Кәламында дејилир: «Үчгат ип тез гырылмаз» (Ваиз 4:12). «Үчгат ип» ифадәси мәҹази мәна дашыјыр. Бу ифадә никаһа аид едиләндә о демәкдир ки, ипин икиси әрлә арваддыр вә онлар Јеһова Аллаһы тәмсил едән бир әсас иплә бирләшибләр. Бунун сајәсиндә әрлә арвад чәтинликләрин өһдәсиндән ҝәлмәк үчүн руһани ҝүҹ-гүввә әлдә едир вә аилә һәјатында хошбәхт олур.
6, 7. а) Аллаһын онларын никаһында олмалары үчүн әрлә арваддан нә тәләб олунур? б) Бир баҹы өз әриндә ән чох нәји гијмәтләндирир?
6 Бәс никаһларынын «үчгат ип» кими олмасы үчүн әрлә арваддан нә тәләб олунур? Мәзмурчу Давуд охујурду: «Еј Аллаһым, Сәнин истәјинә әмәл етмәк мәнә зөвг верир, ганунун гәлбимдәдир» (Мәз. 40:8). Аллаһа мәһәббәтимиз бизи Она сәмими-гәлбдән хидмәт етмәјә тәшвиг едир. Беләликлә, һәм әр, һәм дә арвад Јеһова илә сых мүнасибәт гурмалы вә Онун ирадәсини јеринә јетирмәкдән севинҹ дујмалы, һәмчинин һәјат јолдашынын Аллаһа мәһәббәтини мөһкәмләндирмәјә чалышмалыдыр (Сүл. мәс. 27:17).
7 Аллаһын ганунлары һәгигәтән дә мәсиһчинин гәлбиндәдирсә, о, иман, үмид вә мәһәббәт кими хүсусијјәтләр тәзаһүр етдирәҹәк, бу хүсусијјәтләр исә никаһ телләрини мөһкәмләндирмәјә көмәк едәҹәк (1 Кор. 13:13). 50 илидир ки, әрдә олан Сандра адлы бир мәсиһчи дејир: «Әримдә ән чох гијмәтләндирдијим, онун Мүгәддәс Китаб әсасында рәһбәрлик вә мәсләһәтләр вермәси вә Јеһованы мәндән чох севмәсидир». Әрләр, ејни сөзләри сизин һаггынызда да демәк олармы?
8. Никаһда «јахшы музд» алмаг үчүн нә лазымдыр?
8 Сиз бир аилә кими руһани ишләри вә Падшаһлығын марагларыны һәјатынызда биринҹи јерә гојурсунузму? Бундан әлавә, һәгигәтәнми Јеһоваја хидмәтдә һәјат јолдашыныза әмәкдаш кими бахырсыныз? (Јар. 2:24). Мүдрик падшаһ Сүлејман јазмышды: «Ики адам бир адамдан јахшыдыр, чүнки зәһмәтләри үчүн јахшы музд алаҹаглар» (Ваиз 4:9). «Јахшы музд» алмаг үчүн, јәни Аллаһын хејир-дуасына сәбәб олан Онунла мөһкәм вә севҝи долу мүнасибәт инкишаф етдирмәк үчүн әрлә арвад чох чалышмалыдыр.
9. а) Әрләрин вәзифәси нәдән ибарәтдир? б) Колослулара 3:19 ајәсинә әсасән, әрләр өз арвадлары илә неҹә давранмалыдырлар?
9 Аллаһын аилә һәјатында олуб-олмасынын ҝөстәриҹиси әрлә арвадын Онун тәләбләринә мүвафиг олмаг үчүн сәј ҝөстәриб-ҝөстәрмәмәсидир. Әрләрин аиләнин физики вә руһани тәләбатларынын гејдинә галмаг кими әсас вәзифәси вар (1 Тим. 5:8). Үстәлик, онлар арвадларынын емосионал тәләбатларына гаршы диггәтли олмаға тәшвиг олунурлар. Колослулара 3:19 ајәсиндә охујуруг: «Еј әрләр, өз арвадларынызы севин вә онларла сәрт давранмајын». Мүгәддәс Китабы тәдгиг едән бир алим изаһ етмишдир ки, бурада истифадә олунан «сәрт давранмаг» ифадәси «онлара аҹы сөзләр демәји, вурмағы, һәмчинин мәһәббәт, гајғы, тәминат, мүдафиә вә көмәкдән мәһрум етмәји» өзүнә дахил едир. Ајдындыр ки, бу ҹүр шејләрә мәсиһчи аиләсиндә јер јохдур. Әр мәһәббәтлә башчылыг етсә, һәјат јолдашы она даһа бөјүк мәмнунијјәтлә табе олаҹаг.
10. Мәсиһчи арвад никаһдакы мөвгејинә неҹә мүнасибәт ҝөстәрмәлидир?
10 Јеһованын онларын никаһында олмасыны истәјән мәсиһчи арвадлар да Аллаһын тәләбләринә мүвафиг олмалыдырлар. Һәвари Павел јазырды: «Гадынлар! Рәббә табе олур кими, әрләринизә табе олун. Чүнки... Мәсиһ иманлылар ҹәмијјәтинин Башы олдуғу кими, әр дә арвадын башыдыр» (Ефес. 5:22, 23). Шејтан Һәвваја Аллаһдан мүстәгил олмағын даими хошбәхтлик ҝәтирәҹәјини дејәрәк јалан сөјләди. Бу ҝүн белә руһ өзүнү бир чох никаһларда бүрузә верир. Амма никаһа Аллаһын ҝөзү илә бахан гадын үчүн башчылығыны мәһәббәтлә иҹра едән әринә табе олмаг хошаҝәлмәз дејил. Онлар унутмурлар ки, Јеһова Һәвваны әринә «мүнасиб» көмәкчи кими јаратмышды. Шүбһәсиз ки, Јеһова бу вәзифәни шәрәфли һесаб едир (Јар. 2:18). Аллаһын аиләдә гадына вердији јери гијмәтләндирән мәсиһчи арвад һәгигәтән дә әринин «таҹыдыр» (Сүл. мәс. 12:4).
11. Бир гардаш аиләсиндә хошбәхтлијә неҹә наил олмушдур?
11 Аллаһын никаһда олмасы үчүн әр-арвад һәм дә Онун Кәламыны бирҝә арашдырмалыдыр. 55 илдир ки, хошбәхт аилә һәјаты сүрән Ҹералд дејир: «Никаһын хошбәхт олмасы үчүн ән ваҹиби Мүгәддәс Китабы бирҝә охујуб-арашдырмагдыр». О әлавә едир: «Бирликдә иш ҝөрмәк, хүсусилә дә Аллаһа ибадәт етмәк әрлә арвады бир-биринә вә Јеһоваја јахынлашдырыр». Мүгәддәс Китабы бир јердә өјрәнмәк аиләләрә Јеһованын нормаларыны унутмамаға, Онунла мүнасибәтләрини мөһкәмләндирмәјә вә даима тәрәгги етмәјә көмәк едир.
12, 13. а) Нәјә ҝөрә бирҝә дуа етмәк әр-арвад үчүн чох ваҹибдир? б) Даһа һансы руһани ишләр никаһ телләрини мөһкәмләндирир?
12 Хошбәхт әр-арвад һәм дә бирҝә дуа едир. Әр Јеһоваја дуада ‘гәлбини ачыб бошалданда’ вә чәтинликләри барәдә конкрет дуа едәндә, әлбәттә ки, бу онларын никаһ телләрини мөһкәмләндирмәјә билмәз (Мәз. 62:8). Мәсәлән, Күлли-Ихтијар Аллаһдан дуада рәһбәрлик диләдикдән сонра әрлә арвада истәнилән фикир ајрылығынын өһдәсиндән ҝәлмәк неҹә дә асан олаҹаг! (Мат. 6:14, 15). Дуаларына мүвафиг давранараг бир-бирләринә көмәк, ‘тәһәммүл етмәјә вә бир-бирләрини бағышламаға’ һәр икисинин дә гәти гәрарлы олмасы неҹә дә јахшы оларды! (Колос. 3:13). Унутмајын ки, сизин дуа етмәјиниз Аллаһа бел бағладығынызы ҝөстәрир. Падшаһ Давуд демишди: «Һамынын ҝөзү [«үмидлә», ЈД] Сәнә бахыр» (Мәз. 145:15). Јеһоваја үмидлә дуа едәндә Онун ‘гајғымыза галдығыны’ биләрәк аз нараһатчылыг кечиририк (1 Пет. 5:7).
13 Бундан савајы, Јеһованын никаһынызда олмасы үчүн јығынҹаг ҝөрүшләринә ҝетмәк вә бирликдә тәблиғ етмәк лазымдыр. Бу ҝөрүшләрдә аиләли инсанлар Шејтанын аиләләри дағытмаг үчүн истифадә етдији ‘һијләләрә’ неҹә гаршы дурмағы өјрәнирләр (Ефес. 6:11). Тез-тез бирҝә хидмәт едән әр-арвад «мөһкәм [вә] сарсылмаз» олмағы өјрәнир (1 Кор. 15:58).
Чәтинликләр јарананда
14. Никаһда ҝәрҝинлијин јаранмасына нәләр сәбәб ола биләр?
14 Әлбәттә, јухарыда ҝәтирилән мәсләһәтләр һеч дә јени вә ја гејри-ади дејил, бәс нәјә ҝөрә онлары һәјат јолдашынла ачыгҹа мүзакирә етмәјәсән? Бәлкә, һансыса саһәләрә даһа чох диггәт јетирмәјиниз лазымдыр. Мүгәддәс Китабда дејилир ки, һәтта никаһларында Аллаһ олан әр-арвадын да «һәјатда әзијјәти олаҹаг» (1 Кор. 7:28). Гејри-камиллик, ганунсузлуг һөкм сүрән дүнјанын пис тәсири вә Шејтанын фитнәләри уҹбатындан һәтта Аллаһын садиг хидмәтчиләринин дә никаһында бөјүк ҝәрҝинлик јарана биләр (2 Кор. 2:11). Лакин Јеһова белә ҝәрҝинлијин өһдәсиндән ҝәлмәкдә бизә көмәк едир вә бу мүмкүндүр. Садиг Әјјуб мал-гарасыны, гуллугчуларыны вә ушагларыны итирсә дә, Мүгәддәс Китабын дедијинә ҝөрә, «бүтүн бу һадисәләр баш верәркән Әјјуб өзүнә ҝүнаһ газанмады вә Аллаһы тәгсирләндирмәди» (Әјј. 1:13-22).
15. Инсанлар ҝәрҝин анларда өзләрини неҹә апарырлар вә белә вәзијјәтдә әр, јахуд арвад неҹә давранса даһа јахшы олар?
15 Әјјубун арвады исә она деди: «Јенә дә камил олараг галаҹагсан? Ләнәт ет Аллаһа, өл гуртар!» (Әјј. 2:9). Бәли, фаҹиә баш верәндә, јахуд чәтин вәзијјәт јарананда ҝүҹлү емосијалар инсаны дүшүнүлмәмиш һәрәкәтләрә сөвг едә биләр. Һикмәтли бир инсан демишди: «Ҝерчәк гәсбкарлыг һикмәтли адамы дәли едәр» (Ваиз 7:7, КМ). Әҝәр чәтин вәзијјәт јарананда һәјат јолдашын аҹы сөзләр дејирсә, сакит галмаға чалыш. Һәјат јолдашына ҹаваб гајтарсан, нәтиҹәдә биринизин, јахуд һәр икинизин дә ағзындан вәзијјәти даһа да писләшдирәҹәк сөз чыха биләр. (Мәзмур 37:8 ајәсини оху.) Буна ҝөрә дә, һәјат јолдашынын мәјуслуг вә дилхорлугдан ирәли ҝәләрәк дедији «дүшүнүлмәмиш сөзләр»инә фикир вермә (Мәз. 106:33).
16. а) Исанын Матта 7:1-5 ајәләриндә дедији сөзләри никаһа неҹә тәтбиг етмәк олар? б) Никаһда таразлы олмаг нә үчүн чох ваҹибдир?
16 Әр-арвад бир-бириндән чох шеј тәләб етмәли дејил. Әр вә ја арвад һәјат јолдашынын мүәјјән бир хүсусијјәтини ҝөрүб фикирләшә биләр: «Мән ону дәјишә биләрәм». Сән һәјат јолдашына тәдриҹән ирәлиләјишләр етмәјә мәһәббәт вә сәбирлә көмәк едә биләрсән. Лакин унутма ки, Иса башгасында хырда сәһв ахтаран инсаны гардашынын ҝөзүндә «түкү» ҝөрән, өз ҝөзүндә исә «тири» ҝөрмәјәнлә мүгајисә етди. Иса бизи тәшвиг едир: «Мүһакимә етмәјин ки, мүһакимә олунмајасыныз». (Матта 7:1-5 ајәләрини оху.) Бу сөзләр ҹидди нөгсанлара ҝөз јуммаг мәнасыны вермир. Тәхминән 40 ил евли олан Роберт дејир: «Бир-бири илә ачыг вә сәмими олмаг вә әсаслы мәзәммәти гәбул етмәјә һазыр олмаг үчүн әрлә арваддан конкрет дәјишикликләр етмәк тәләб олуна биләр». Буна ҝөрә таразлы ол. Һәјат јолдашында ҝөрмәк истәдијин хүсусијјәтләр олмадығына ҝөрә мәјус олмагданса, онун инди малик олдуғу мүсбәт хүсусијјәтләри гијмәтләндирмәји вә севмәји өјрән (Ваиз 9:9).
17, 18. Проблемләр дәфедилмәз кими ҝөрүнәндә көмәји кимдән ала биләрик?
17 Һәјатда вәзијјәтин дәјишмәси сынаға чеврилә биләр. Ушаглары олан әр-арвад чәтинликләрлә гаршылаша биләр. Әр-арваддан бири, јахуд ушаг ҹидди хәстәләнә, јашлы валидејнләрә хүсуси гајғы тәләб олуна вә ја бөјүјән ушаг еви тәрк едә биләр. Диҝәр дәјишикликләр теократик тәјинатларла бағлы ола биләр. Бүтүн бунлар мүнасибәтләрдә ҝәрҝинлијә вә нараһатчылыға сәбәб ола биләр.
18 Әҝәр никаһда јаранан ҝәрҝинлијин сон һәддә чатдығыны һисс едирсәнсә, нә етмәк олар? (Сүл. мәс. 24:10). Тәслим олма! Шејтаны Јеһованын хидмәтчиләриндән биринин һәгиги ибадәтдән дөнмәси гәдәр севиндирән башга бир шеј јохдур. Әрлә арвад белә едәрсә, о даһа чох севинәр. Буна ҝөрә, никаһынызын «үчгат ип» галмасы үчүн әлиниздән ҝәләни един. Мүгәддәс Китабда, шиддәтли сынаглара бахмајараг, Аллаһа садиг галан бир чох инсанларын нүмунәси јазылыб. Мәсәлән, бир дәфә Давуд үрәјини Јеһоваја бошалдараг демишди: «Рәһм ет мәнә, еј Аллаһ, инсанлар... мәни сыхышдырырлар» (Мәз. 56:1). Нә вахтса инсанлар сәни дә сыхышдырыбмы? Ҝәрҝинлијинә јад вә ја јахын адамын сәбәб олмасындан асылы олмајараг, јадда сахла ки, Давуд дөзүмлү олмаг үчүн гүввә алды, сән дә ала биләрсән. О демишди: «Рәббә үз тутдум, О мәнә ҹаваб верди, О һәр бир дәһшәтдән мәни хилас етди» (Мәз. 34:4).
Әлдә едәҹәјимиз хејир-дуалар
19. Биз Шејтанын һүҹумларыны неҹә дәф едә биләрик?
19 Јашадығымыз сон ҝүнләрдә әрлә арвад ‘бир-биринә тәскинлик вермәли вә бир-бирини инкишаф етдирмәлидир’ (1 Салон. 5:11). Унутма: Шејтан иддиа едир ки, биз өз мәнфәәтимизи ҝүддүјүмүз үчүн Јеһоваја садиг галырыг. О, Аллаһ гаршысында нөгсансызлығымызы сарсытмаг үчүн, никаһын дағылмасы да дахил олмагла, һәр бир үсула әл атаҹаг. Шејтанын һүҹумларыны дәф етмәк үчүн биз бүтүн үрәкдән Јеһоваја ҝүвәнмәлијик (Сүл. мәс. 3:5, 6). Павел јазырды: «Мәни мөһкәмләндирән... васитәсилә һәр шеји етмәјә гадирәм» (Филип. 4:13).
20. Аллаһын никаһда јери олмасы һансы хејир-дуалары ҝәтирир?
20 Аллаһын никаһда јери олмасы бир чох хејир-дуалар ҝәтирир. Буну 51 ил евли олан Ҹоел вә онун арвады һаггында демәк олар. О дејир: «Мән арвадыма вә ҝөзәл мүнасибәтләримизә ҝөрә Јеһоваја даима тәшәккүр едирәм. О, мәним әсл көмәкчимдир». Бунун сирри нәдәдир? «Биз һәмишә бир-биримизә хејирхаһлыг, сәбир вә мәһәббәт ҝөстәрмәјә чалышырыг». Һеч ким буну мүкәммәл сурәтдә едә билмәз. Буна бахмајараг, Мүгәддәс Китаб принсипләрини тәтбиг етмәк вә Јеһованын никаһынызда јери олмасы үчүн әлиниздән ҝәләни един. Белә даврансаныз, никаһыныз ‘тез гырылмајан үчгат ип’ кими олаҹаг (Ваиз 4:12).
Јадыныздадырмы?
• Никаһда Јеһованын јери олмасы нә демәкдир?
• Чәтинликләр јарананда әрлә арвад нә етмәлидир?
• Никаһынызда Јеһованын јери олуб-олмадығыны неҹә өјрәнә биләрсиниз?
[18-ҹи сәһифәдәки шәкилләр]
Бирҝә дуа етмәк әрлә арвада чәтинликләрин өһдәсиндән ҝәлмәјә көмәк едир