Сонун јахынлашдығы вахтда итаәткарлығы инкишаф етдир
“Милләтләрин итаәти она [Шилоја] олаҹагдыр” (ТӘКВИН 49:10).
1. а) Јеһоваја итаәткарлыг кечмиш заманларда чох вахт нәји нәзәрдә тутурду? б) Итаәткарлыға аид Јагуб һансы пејғәмбәрлији етмишди?
ЈЕҺОВАЈА итаәткарлыг чох вахт Онун нүмајәндәләринә итаәткарлығы нәзәрдә тутурду. Һәмин нүмајәндәләр мәләкләр, тајфа башчылары, һакимләр, каһинләр, пејғәмбәрләр вә падшаһлар идиләр. Һәтта Исраил падшаһларынын тахтына Јеһованын тахты дејилирди (1 Тарихләр 29:23). Амма әфсуслар олсун ки, Исраил рәһбәрләринин бир чоху Аллаһа итаәткар дејилдиләр вә буна ҝөрә дә һәм өзләринин, һәм дә вәтәндашларынын башына бәла ачырдылар. Јеһова исә Она садиг галанлары үмидсиз гојмурду. О, салеһләрин үзәринә, онларын мәмнунијјәтлә табе олаҹаглары әбәди бир Падшаһ гојаҹағыны вә’д едәрәк тәсәлли верирди (Ишаја 9:6, 7). Тајфа башчысы Јагуб өлүм јатағында икән, ҝәләҹәк рәһбәр һаггында пејғәмбәрлик етмишдир: “Шило ҝәлинҹәјә гәдәр, Падшаһлыг әсасы Јәһудадан, һөкмдарлыг әсасы да ајагларынын арасындан ҝетмәјәҹәкдир; вә милләтләрин итаәти она олаҹагдыр” (Тәквин 49:10).
2. “Шило” нә демәкдир вә онун падшаһлыг һакимијјәти нә гәдәр ҝениш јајылмалы иди?
2 “Шило” гәдим ибрани сөзүдүр вә мә’насы “Саһиби Одур” демәкдир. Бәли, Шило Падшаһлыг әсасы илә тәмсил едилән һакимијјәт, һөкмдарлыг әсасы илә тәмсил едилән әмретмә һаггыны мирас алаҹагдыр. Бундан әлавә, онун падшаһлыг һакимијјәти јалныз Јагубун нәслини дејил, бүтүн “милләтләри” әһатә едәҹәкдир. Бу, Јеһованын Ибраһимә вердији вә’дә мүвафигдир: “Сәнин зүрријјәтин дүшмәнләринин гапысына һаким олаҹагдыр; вә зүрријјәтиндә јерин бүтүн милләтләри хејир-дуа алаҹаглар” (Тәквин 22:17, 18). Ерамызын 29-ҹу илиндә Јеһова Исаны мүгәддәс руһла мәсһ едәрәк, һәмин “зүрријјәтин” ким олдуғуну тәсдиг етди (Лука 3:21-23, 34; Галатијалылара 3:16).
Исанын илк Падшаһлығы
3. Иса ҝөјә галхан заман һансы һөкмдарлығы алды?
3 Иса ҝөјә галхдыгда она дүнја халглары үзәриндә һөкмдарлыг әсасы дәрһал верилмәди (Мәзмур 110:1). Лакин она итаәт едәҹәк вәтәндашлары үзәриндә һөкм сүрәҹәк бир “падшаһлыг” верилди. Бу падшаһлығын нә олдуғуну һәвари Павел изаһ етмишдир: “[Аллаһ] бизи [руһла мәсһ едилмиш мәсиһчиләри] гаранлыг һакимијјәтиндән хилас едиб, Өз севимли Оғлунун Падшаһлығына көчүртдү” (Колослулара 1:13, И–93). Бу хилас ерамызын 33-ҹү илинин Пентикост ҝүнү, Исанын садиг давамчыларынын үзәринә мүгәддәс руһ төкүлән заман башланды (Һәвариләрин ишләри 2:1-4; 1 Петер 2:9).
4. Исанын илк шаҝирдләри һансы саһәләрдә итаәткарлыг ҝөстәрирдиләр вә Иса онлары бир груп кими неҹә адландырды?
4 “Мәсиһин сәфирләри” олан руһла мәсһ едилмиш шаҝирдләр, һәмин руһани падшаһлыгда онларын һәмвәтәнләри олаҹаг кәсләри итаәткарлыгла топламаға башладылар (2 Коринфлиләрә 5:20; Ефеслиләрә 2:19; Һәвариләрин ишләри 1:8). Бундан әлавә, Падшаһлары Иса Мәсиһин лүтфүндән јарарланмаг үчүн, онлар “бир фикирдә вә ејни рә’јдә” галмалы идиләр (1 Коринфлиләрә 1:10). Бир груп кими онлар “садиг вә ағыллы гулу”, јахуд садиг нөкәрбашыны тәшкил едирдиләр (Матта 24:45; Лука 12:42).
Аллаһын ‘нөкәрбашысына’ итаәткарлығын ҝәтирдији хејир-дуалар
5. Кечмиш заманлардан бәри Јеһова өз халгыны неҹә өјрәдирди?
5 Јеһова һеч заман өз халгыны мүәллимсиз гојмамышдыр. Мәсәлән, јәһудиләр Бабилдән гајытдыгдан сонра, Езра вә диҝәр баҹарыглы адамлар халга Аллаһын ганунларыны садәҹә охумурдулар, һәмчинин онун ‘мә’насыны верирдиләр вә охудугларыны онлара анладырдылар’ (Неһемја 8:8).
6, 7. Гул синфи өзүнүн Рәһбәрлик шурасы васитәсилә руһани гиданы вахтлы-вахтында неҹә верир вә бу гул синфинә табе олмаг нәјә ҝөрә ваҹибдир?
6 Ерамызын 49-ҹу илиндә сүннәт мәсәләси ортаја чыхан заман гул синфинин илк рәһбәрлик шурасы бу мәсәләјә дуа илә јанашды вә Мүгәддәс Јазылара әсасланан гәрар гәбул етди. Гәрар мәктуб васитәсилә билдирилдикдә, јығынҹаглар верилән рәһбәрлијә табе олдулар вә Аллаһдан бол-бол хејир-дуалар алдылар (Һәвариләрин ишләри 15:6-15, 22-29; 16:4, 5). Еләҹә дә бизим дөврдә, садиг гул өзүнүн Рәһбәрлик шурасы васитәсилә мәсиһчи битәрәфлији, ганын мүгәддәслији, наркотик маддәләрдән вә түтүндән истифадә етмәк кими бир чох мәсәләләри ајдын етди (Ишаја 2:4; Һәвариләрин ишләри 21:25; 2 Коринфлиләрә 7:1). Јеһова, Кәламына вә садиг гула итаәт ҝөстәрән халгына хејир-дуа верди.
7 Гул синфинә табе олараг, Аллаһын халгы, һәмчинин Ағаја, јә’ни Иса Мәсиһә дә табе олур. Бизим ҝүнләрдә бу табечилик даһа ҝениш мә’на дашыјыр, белә ки, Јагубун өлүм јатағында сөјләдији пејғәмбәрлијә әсасән Исанын сәлаһијјәти инди даһа бөјүкдүр.
Шило Јерин гануни Һөкмдары олур
8. Мәсиһин һакимијјәти неҹә вә нә заман ҝенишләнди?
8 Јагубун пејғәмбәрлијиндә әввәлҹәдән дејилир ки, “милләтләрин итаәти” Шилоја олаҹагдыр. Бурадан ҝөрүнүр ки, Мәсиһин һөкмдарлығы јалныз руһани Исраили әһатә етмәјәҹәк. Бәс онун һөкмдарлығы нә дәрәҹәдә ҝениш олаҹагдыр? Вәһј 11:15 (И–93) ајәсиндә дејилир: “Дүнјанын падшаһлығы Рәббимизин вә Онун Мәсиһинин Падшаһлығы олду; вә О, әбәди олараг шаһлыг едәҹәкдир”. Мүгәддәс Китабда ачыгланыр ки, Иса бу һакимијјәти пејғәмбәрҹәсинә дејилән “једди вахт”ын — “диҝәр халгларын вахты”нын сонунда, јә’ни 1914-ҹү илдә алмышдырa (Даниел 4:16, 17; Лука 21:24). Һәмин илдә Мәсиһин Хиласкар Падшаһ кими ҝөзә ҝөрүнмәз “ҝәлиши” башланды вә онун үчүн “дүшмәнләринин арасында падшаһлыг” етмәјин вахты чатды (Матта 24:3; Мәзмур 110:2).
9. Иса Падшаһлығы алдыгда нә етди вә бу, бәшәријјәтә, хүсусилә дә онун шаҝирдләринә һансы долајы тә’сири ҝөстәрди?
9 Иса падшаһлыг сәлаһијјәтини алдыгда илк нөвбәдә, итаәтсизлијин тәҹәссүмү олан Шејтаны вә онун ҹинләрини “јер үзүнә” атды. О ҝүндән бәри бу пис руһлар бәшәријјәтин башына ҝөрүнмәмиш фәлакәтләр ачырлар, бундан әлавә елә бир шәраит јарадырлар ки, Јеһоваја итаәткарлыг чох чәтинләшир (Вәһј 12:7-12; 2 Тимотејә 3:1-5). Лакин Шејтанын руһани мүһарибәси илк нөвбәдә “Аллаһын әмрләринә риајәт едиб, Исаја олан шәһадәтләринә бағлы галан” мәсһ едилмишләрә, һәмчинин онларын јолдашлары олан “башга гојунлара” гаршы јөнәлдилиб (Вәһј 12:17; Јәһја 10:16).
10. Мүгәддәс Китабын јеринә јетән һансы пејғәмбәрликләри, Шејтанын мәсиһчиләрә гаршы апардығы мүһарибәдә мүвәффәгијјәтсиз олаҹағына зәманәт верир?
10 Лакин Шејтанын ҹәһдләри мүвәффәгијјәтсизлијә мәһкум едилиб, чүнки инди “Рәббин ҝүнү”дүр вә Исанын гәләбә чалмасына һеч нә мане ола билмәјәҹәк (Вәһј 1:10; 6:2). Мәсәлән, о гајғы ҝөстәрәҹәк ки, 144 мин руһани исраилли мөһүрләнсин. О, һәмчинин “һәр милләтдән, бүтүн гәбиләләрдән, халглардан вә дилләрдән олан, кимсәнин сајмаға гадир олмадығы бөјүк бир издиһамы” да мүдафиә едәҹәкдир (Вәһј 7:1-4, 9, 14-16). Лакин бу издиһам, мәсһ едилмиш һәмкарларындан фәргли олараг, Исанын јер үзүндә јашајан итаәткар вәтәндашлары олаҹаглар (Даниел 7:13, 14). Онларын дүнја сәһнәсиндә ҝөрүнмәләри, Шилонун “дүнјанын падшаһлығы” үзәриндә һөкмдарлыг етдијинә ашкар әламәтдир (Вәһј 11:15, И–93).
‘Мүждәјә итаәт етмәјин’ вахтыдыр
11, 12. а) Индики дүнја системинин сонунда јалныз кимләр сағ галаҹагдыр? б) “Дүнјанын руһу”на ујан кәсләрдә һансы хүсусијјәтләр јараныр?
11 Әбәди јашамаг истәјәнләрин һамысы итаәткарлыға өјрәнмәлидирләр, чүнки Мүгәддәс Китабда ајдын шәкилдә дејилир ки, “Аллаһы танымајан вә Рәббимиз Иса барәсиндәки Мүждәјә итаәт етмәјәнләр” Аллаһын гисас ҝүнүндә сағ галмајаҹаглар (2 Салониклиләрә 1:8, И–93). Лакин бу ҝүн һәр јанда мөвҹуд олан пислик вә Мүгәддәс Китабын ганунларына вә принсипләринә итаәтсизлик руһу хош хәбәрә итаәт етмәји чох чәтинләшдирир.
12 Мүгәддәс Китаб Аллаһа гаршы олан бу руһу “дүнјанын руһу” адландырыр (1 Коринфлиләрә 2:12). Бу руһун инсанлара неҹә тә’сир етдијини изаһ едәрәк, һәвари Павел биринҹи әсрдә Ефес шәһәриндә јашајан мәсиһчиләрә јазырды: “Бир заманлар бу ҝүнаһлара ҝөрә һәрәкәт етдиниз, бу дүнјанын ҝедишинә, һавадакы һакимијјәтин, јә’ни инди итаәтсиз инсанларда фәал олан руһун һөкмранына ујдунуз. Бир заманлар бизим һамымыз да ҹисмани тәбиәтимизин еһтирасларына ујараг, бәдәнин вә әглин истәкләрини јеринә јетирәрәк бу ҹүр инсанларын арасында јашадыг вә диҝәрләри кими тәбиәтән Аллаһын гәзәбинә мә’руз идик” (Ефеслиләрә 2:2, 3).
13. Мәсиһчиләр дүнјанын руһуна әсаслы сурәтдә неҹә мүгавимәт ҝөстәрә биләрләр вә бу һансы фајдалы нәтиҹәләри верир?
13 Хошбәхтликдән Ефесдә јашајан мәсиһчиләр бу итаәтсизлик руһуна гул галмадылар. Әксинә, онлар Аллаһын руһуна табе олараг, Онун бол вә хејирли сәмәрәләрини әлдә едәрәк Аллаһын итаәткар өвладлары олдулар (Галатијалылара 5:22, 23). Еләҹә дә бу ҝүн, Каинатда ән гүдрәтли гүввә олан Аллаһын руһу милјонларла инсанлара Јеһоваја итаәткар олмагда көмәк едир. Бунун да сајәсиндә онлар сона гәдәр “үмидин вердији там е’тимада” наил олурлар (Ибраниләрә 6:11; Зәкарја 4:6).
14. Иса ахыр ҝүнләрдә јашајан бүтүн мәсиһчиләрин итаәтини сынајаҹаг конкрет проблемләр һаггында неҹә хәбәрдарлыг етди?
14 Шилонун да бөјүк көмәјини унутмајаг. О, атасы илә бирликдә јол вермәјәҹәк ки, һансыса дүшмәнләр — ҹинләр, јахуд инсанлар — бизим итаәткарлығымызы ҝүҹүмүздән артыг имтаһан етсинләр (1 Коринфлиләрә 10:13). Бундан әлавә, Иса, руһани мүһарибәни апармагда бизә көмәк етмәк үчүн, ахыр ҝүнләрдә үзләшәҹәјимиз бир сыра конкрет проблемләри тәсвир етди. О, бу проблемләри һәвари Јәһјаја рө’јада вердији једди мәктубда тәсвир етмишдир (Вәһј 1:10, 11). Бу мәктубларда о дөврүн мәсиһчиләри үчүн олдугҹа ваҹиб олан, лакин әсас е’тибары илә 1914-ҹу илдә башланан “Рәббин ҝүнү”нә аид едилән нәсиһәтләр верилмишди. Бу сәбәбдән, ҝәлин һәмин мәктублара диггәт јетирәкb.
Лагејдликдән, әхлагсызлыгдан вә вар-дөвләт далынҹа дүшмәкдән гачынын
15. Нәјә ҝөрә Ефес јығынҹағында мөвҹуд олан проблемләрдән гачынмалыјыг вә биз буну неҹә едә биләрик? (2 Петер 1:5-8).
15 Исанын илк мәктубу Ефесдәки јығынҹаға үнванланыб. Иса тәһәммүлүнә ҝөрә јығынҹағы тә’рифләдикдән сонра деди: “Анҹаг сәндән бир шикајәтим вардыр: сән илк мәһәббәтиндән әл чәкмисән” (Вәһј 2:1-4). Бу ҝүн, вахтилә сә’ј ҝөстәрән бә’зи мәсиһчиләр дә Аллаһа олан илк ҹошғун мәһәббәтләрини итирибләр. Бу итки Аллаһла олан мүнасибәти зәифләдә биләр вә белә бир вәзијјәт тә’ҹили олараг диггәт тәләб едир. Илк мәһәббәти неҹә гајтармаг олар? Бу ишдә Мүгәддәс Китабы мүнтәзәм өјрәнмәк, јығынҹаг ҝөрүшләриндә иштирак етмәк, дуа етмәк вә дүшүнмәк көмәк едә биләр (1 Јәһја 5:3). Бәли, бу, ‘бүтүн сә’јимизи’ тәләб едир, анҹаг, шүбһәсиз ки, бүтүн бунлар әбәс олмајаҹагдыр (2 Петер 1:5-8). Әҝәр өз үзәриндә апардығын дүрүст анализ мәһәббәтинин сојудуғуну ҝөстәрирсә, Исанын мәсләһәтинә табе олараг вәзијјәти тезҹә дүзәлтмәјә чалыш: “Һарадан дүшдүјүнү јадда сахла, төвбә ет вә әввәлҹә етдикләринә әмәл ет” (Вәһј 2:5).
16. Пергама вә Тиатира јығынҹагларында руһани ҹәһәтдән һансы тәһлүкәли тә’сирләр мөвҹуд иди вә Исанын онлара үнванладығы сөзләр нәјә ҝөрә инди дә актуалдыр?
16 Пергама вә Тиатирада олан мәсиһчиләр исә нөгсансызлыгларына, тәһәммүл етдикләринә вә сә’ј ҝөстәрдикләринә ҝөрә тә’рифә лајиг ҝөрүлдүләр (Вәһј 2:12, 13, 18, 19). Лакин онлара гәдим вахтларда Исраил халгыны ҹинси әхлагсызлыг вә Баала ибадәтлә парчалајан Баламын вә Изебелин натәмиз руһуну әкс етдирән кәсләр тә’сир едирдиләр (Сајлар 31:16; 1 Краллар 16:30, 31; Вәһј 2:14, 16, 20-23). Бәс бизим дөврүмүз, “Рәббин ҝүнү” һаггында нә демәк олар? Инди дә бу ҹүр зәрәрли тә’сирләр мөвҹуддурму? Бәли, чүнки әхлагсызлыг Аллаһын халгы арасында јығынҹагдан кәнар олунмаға ән чох сәбәб олан амилдир. Бу сәбәбдән, јығынҹағын ичиндә, јахуд кәнарда позуҹу тә’сир ҝөстәрән кәсләрлә үнсијјәт етмәмәк неҹә дә ваҹибдир! (1 Коринфлиләрә 5:9-11; 15:33). Шилонун итаәткар вәтәндашлары олмаг истәјәнләр, һәмчинин истәр јазылы сурәтдә, истәрсә дә електрон формада верилән шүбһә доғуран әјләнҹәләрдән вә порнографијалардан да гачынаҹаглар (Амос 5:15; Матта 5:28, 29).
17. Сардисдә вә Лаодикијада олан мәсиһчиләрин өз руһани вәзијјәтләринә даир фикирләри вә әһвал-руһијјәләри Исанын онлара гаршы нөгтеји-нәзәриндән неҹә фәргләнирди?
17 Бир нечә нәфәри чыхмаг шәрти илә, Сардисдәки јығынҹаг үмумијјәтлә тә’рифә лајиг дејилди. Онун сағ олдуғуну ҝөстәрән “ады”, јә’ни заһири ҝөрүнүшү варды, лакин онда руһанилијә гаршы е’тинасызлыг о гәдәр көк салмышды ки, Иса ону “өлү” һесаб едирди. Мүждәјә итаәт етмәк тамамилә рәсми характер дашыјырды. Сардис јығынҹағы неҹә дә ҹидди төһмәт алмышды! (Вәһј 3:1-3). Лаодикијадакы јығынҹагла да вәзијјәт тәхминән ејни иди. Бу јығынҹаг “зәнҝинәм” дејәрәк өз мадди сәрвәти илә өјүнүрдү, лакин о, Мәсиһин нөгтеји-нәзәриндән “заваллы, јазыг, јохсул, кор вә чылпаг” иди (Вәһј 3:14-17).
18. Аллаһын ҝөзүндә руһән “илыг” олмагдан неҹә гачынмаг олар?
18 Бу ҝүн, бир вахтлар сәдагәтини горујан бә’зи мәсиһчиләр дә итаәтсизлик јолу илә ҝедирләр. Ола билсин ки, онлар бу дүнјанын руһунун тә’сири алтында һансы зәманәдә јашадығымызы унутмуш вә Мүгәддәс Китабы өјрәнмәјә, дуаја, мәсиһчи јығынҹагларына вә хидмәтә гаршы руһән “илыг” мүнасибәт ҝөстәрмәјә башламышлар (2 Петер 3:3, 4, 11, 12). Бу ҹүр инсанлара Мәсиһә итаәт едәрәк руһани сәрвәт топламаг, јә’ни “[Мәсиһдән] одла тәмизләнмиш гызыл” алмаг неҹә дә ваҹибдир! (Вәһј 3:18). Бу ҹүр һәгиги сәрвәтә саһиб олан инсан ‘јахшы ишләрлә варлы олур, әлиачыгдыр вә өз малыны диҝәрләри илә бөлүшмәјә һазырдыр’. Бу ҹүр һәгиги дәјәрли ишләри ҝөрәрәк, биз ‘ҝәләҹәк үчүн јахшы тәмәл олаҹаг бир хәзинә топлајырыг ки, әбәди һәјата наил олаг’ (1 Тимотејә 6:17-19).
Итаәткарлыгларына ҝөрә тә’рифәлајиг ҝөрүлүбләр
19. Иса Измирлә Филаделфијада олан мәсиһчиләри нәјә ҝөрә тә’рифләјир вә онлары нәјә чағырыр?
19 Измирдә вә Филаделфијада олан јығынҹаглар итаәткарлығын ҝөзәл нүмунәси идиләр, белә ки, Иса онлара үнванладығы мәктубунда һәмин мәсиһчиләри нәјәсә ҝөрә мәзәммәт етмир. О, Измирдәки мәсиһчиләрә деди: “Сәнин әмәлләриндән, әзабындан вә јохсуллуғундан (амма сән зәнҝинсән) хәбәрдарам” (Вәһј 2:9). Бу мәсиһчиләр, дүнјәви сәрвәтләри илә ловғаланан, әслиндә исә јохсул вәзијјәтиндә олан лаодикијалылардан неҹә дә фәргләнирдиләр! Әлбәттә ки, киминсә Мәсиһә сәдагәт вә итаәткарлыг ҝөстәрмәси Иблисә сәрф етмирди. Буна ҝөрә дә Иса хәбәрдарлыг етмишдир: “Чәкәҹәјин әләмләрдән горхма. Будур, иблис сизләрдән бә’зиләрини зиндана атаҹаг ки, имтаһан олунасыныз. Вә сиз он ҝүн әзаб ичиндә олаҹагсыныз. Өлүм баһасына да олса садиг гал, Мән сәнә һәјат таҹыны верәҹәјәм” (Вәһј 2:10). Иса филаделфијалылары да тә’рифләди: “Мәним сөзүмә риајәт етдин [јә’ни сөзүмә итаәт етдин] вә Мәним адымы инкар етмәдин. Будур, тезликлә ҝәлирәм! Малик олдуғуна мөһкәм сарыл ки, кимсә таҹыны чалмасын” (Вәһј 3:8, 11).
20. Бу ҝүн милјонларла инсанлар неҹә вә һансы вәзијјәтләрә бахмадан Исанын сөзләринә риајәт едирләр?
20 “Рәббин ҝүнү”ндән, јә’ни 1914-ҹү илдән башлајараг садиг галыг вә онун јолдашлары олан милјонларла башга гојунлар да хидмәтдә сә’јлә иштирак едәрәк вә нөгсансызлыгларында мөһкәм дурараг Исанын сөзләринә риајәт едирләр. Бә’зи мәсиһчиләр биринҹи әсрдә јашамыш гардашлары кими, Мәсиһә итаәт етдикләринә ҝөрә изтираб чәкмишләр; һәтта онлары зиндана салыр вә һәбс дүшәрҝәләринә јоллајырдылар. Башгалары, Исанын сөзләринә табе олараг, һәр јанда онлары тамаһкарлыг вә ҹаһ-ҹалал әһатә етсә дә ‘ҝөзләрини садә’ (ЈД) сахлајырлар (Матта 6:22, 23). Бәли, һәр ҹүр вәзијјәтдә вә истәнилән шәраитдә Исанын һәгиги давамчылары итаәткарлыглары илә Јеһованын үрәјини севиндирмәјә давам едирләр (Сүлејманын мәсәлләри 27:11).
21. а) Гул синфи һансы руһани вәзифәни јеринә јетирмәји давам етдирәҹәк? б) Шилоја һәгигәтән дә итаәткар олмаг истәјимизи неҹә ҝөстәрә биләрик?
21 Бөјүк фәлакәт јахынлашдыгҹа “садиг вә ағыллы гул” бундан сонра да Ағалары Мәсиһә дәјишмәз итаәт ҝөстәрмәји давам етдирмәкдә гәти гәрарлыдырлар. Бу, Аллаһын халгы үчүн вахтлы-вахтында гида һазырламағы өзүнә дахил едир. Ҝәлин, Јеһованын ҝөзәл теократик тәшкилатыны вә тәшкилатын тәгдим етдикләрини бундан сонра да гијмәтләндирәк. Беләликлә биз ҝөстәрәҹәјик ки, өз вәтәндашларыны әбәди һәјатла мүкафатландыраҹаг Шилоја табе олуруг (Матта 24:45-47; 25:40; Јәһја 5:22-24).
[Һашијәләр]
a “Једди вахт” һаггында әлавә мә’луматы Јеһованын Шаһидләри тәрәфиндән дәрҹ едилән “Әбәди һәјата апаран билик” китабынын 10-ҹу фәслиндә тапа биләрсиниз.
b Једди мәктуб һаггында әтрафлы мә’луматы Јеһованын Шаһидләри тәрәфиндән дәрҹ едилән “Вәһј. Мөһтәшәм зирвәси јахындыр!” (рус.) китабынын 33-ҹү сәһифәсиндән е’тибарән тапа биләрсиниз.
Хатырлајырсынызмы?
• Јагубун өлүм јатағында сөјләдији пејғәмбәрлијә әсасән Иса һансы ролу ојнамалыдыр?
• Исаны Шило кими гәбул етдијимизи неҹә ҝөстәририк вә биз һансы руһдан гачынмалыјыг?
• “Вәһј” китабында једди јығынҹаға үнванланмыш мәктубларда бу ҝүнкү ҝүнә аид һансы мәсләһәтләр вар?
• Измир вә Филаделфија кими гәдим шәһәрләрдә јашамыш мәсиһчиләри һансы саһәләрдә тәглид едә биләрик?
[26-ҹы сәһифәдәки шәкилләр]
Јеһова садиг “нөкәрбашы”ја итаәт едән халгына хејир-дуа верир.
[27-ҹи сәһифәдәки шәкил]
Шејтанын ҝөстәрдији тә’сирин уҹбатындан Аллаһа итаәткар олмаг чох чәтиндир.
[29-ҹу сәһифәдәки шәкилләр]
Јеһова илә олан сых мүнасибәтләр Она итаәткар олмаға көмәк едир.