‘Илк дирилмә’ артыг башлајыб!
«Мәсиһә аид олан өлүләр ән әввәл дириләҹәкләр» (1 САЛОНИКИЛИЛӘРӘ 4:16).
1, 2. а) Өләнләр үчүн һансы үмид вар? б) Сән дирилмәјә нә үчүн инанырсан? (Һашијәјә бахын.)
«ДИРИЛӘР өләҹәкләрини билир». Адәмин ҝүнаһ ишләтдији ҝүндән бәри өлүм гачылмаздыр. Тарих бојунҹа дүнјаја ҝәлән һәр бир инсан өләҹәјини билир, буна ҝөрә дә бу суаллар чохларыны дүшүндүрүр: «Өлүмдән сонра нә олаҹаг? Өлүләр һансы вәзијјәтдәдирләр?» Мүгәддәс Китаб бу суаллара белә ҹаваб верир: «Өлүләр һеч нә билмир» (Ваиз 9:5).
2 Бәс онлар үчүн һәр һансы үмид вармы? Бәли, вар. Әҝәр Аллаһ бәшәријјәтә даир илк нијјәтини јеринә јетирәҹәксә, демәли, өлүләр үчүн дә үмид јери олмалыдыр. Нечә әсрләрдир ки, Аллаһын садиг хидмәтчиләри Јеһованын, Шејтаны мәһв едәҹәк вә вурдуғу зәрәри арадан галдыраҹаг Зүрријјәтлә бағлы вә’динә иман едирләр (Јарадылыш 3:15). Онлардан чоху артыг өлмүшдүр. Бу вә диҝәр вә’дләрин јеринә јетмәсини ҝөрмәк үчүн онлар һәјата гајытмалыдырлар (Ибраниләрә 11:13). Бу мүмкүндүрмү? Әлбәттә. Һәвари Павел демишдир: «Һәм салеһ, һәм дә салеһ олмајан өлүләрин дирилмәси олаҹагдыр» (Һәвариләрин ишләри 24:15). Бир дәфә Павел үчүнҹү мәртәбәдән јыхылыб өлән Ефтик адлы бир ҝәнҹи дирилтди. Бу, Мүгәддәс Китабда гәләмә алынан доггуз дирилмәдән ахырынҹысыдыр (Һәвариләрин ишләри 20:7-12)a.
3. Исанын Јәһја 5:28, 29 ајәсиндә јазылан сөзләриндән шәхсән сән неҹә тәсәлли алырсан вә нә үчүн?
3 Садаланан доггуз дирилмә Павелин сөзләринә инанмаға әсас верир. Онлар һәм дә Исанын вә’динә е’тибарымызы мөһкәмләндирир: «Елә бир саат ҝәлир ки, гәбирләрдә оланларын һамысы Онун [Исанын] сәсини ешидәҹәкләр вә гәбирләриндән чыхаҹаглар» (Јәһја 5:28, 29). Бу сөзләр гәлбимизи неҹә дә исиндирир! Әзизләри өлүм јухусуна ҝедән милјонларла инсанлар үчүн бунлар неҹә дә тәсәлливериҹидир!
4, 5. Мүгәддәс Китабда һансы мүхтәлиф дирилмәләрдән данышылыр вә бу мәгаләдә һансы дирилмәдән сөһбәт ҝедәҹәк?
4 Бир чох инсанларын дирилмәси Аллаһын Падшаһлығы јер үзүндә сүлһү бәргәрар едән заман олаҹаг (Мәзмур 37:10, 11, 29; Јешаја 11:6-9; 35:5, 6; 65:21-23). Анҹаг бундан өнҹә башга дирилмәләр олмалы иди. Әввәлҹә Иса Мәсиһ дирилмәли иди ки, гурбанынын дәјәрини бизим үчүн Аллаһа тәгдим етсин. Ерамызын 33-ҹү илиндә өлән Иса үч ҝүндән сонра дирилди.
5 Сонра исә мәсһ олунмушлардан ибарәт «Аллаһын Исраили»нин үзвләри сәмави Падшаһлыгда Иса Мәсиһә говушмалыдырлар. Орада онлар ‘даим Рәбб илә олаҹаглар’ (Галатијалылара 6:16; 1 Салоникилиләрә 4:17). Бу, Мүгәддәс Китабда ‘илк дирилмә’ адланыр (Вәһј 20:6). Бу дирилмә битәндән сонра гаршысында Ҹәннәтдә әбәди јашамаг имканы ачылан милјонларла инсаны дирилтмәјин вахты чатаҹаг. Ҝөјдә вә ја јер үзүндә јашамаг үмидинә малик олмағымыздан асылы олмајараг, ‘илк дирилмә’ һамымызы марагландырыр. Бу дирилмә неҹә вә нә заман баш верир?
«Һансы бәдәнлә?»
6, 7. а) Мәсһ олунмушларын ҝөјә ҝедә билмәләри үчүн нә баш вермәлидир? б) Онлар һансы бәдәндә дириләҹәкләр?
6 Коринфлиләрә јаздығы биринҹи мәктубунда Павел илк дирилмә һаггында суал галдырыр: «Өлүләр неҹә дириләҹәкләр? Вә һансы бәдәнлә ҝәләҹәкләр?» Сонра о өз суалына ҹаваб верир: «Сәнин әкдијин шеј өлмәсә, һәјата говушмаз... Лакин Аллаһ о тохума истәдији кими бәдән верир... сәмавиләрин ҹалалы башга, дүнјәвиләринки дә башгадыр» (1 Коринфлиләрә 15:35-40).
7 Павелин сөзләриндән ајдын олур ки, руһла мәсһ олунмушлар сәмави мүкафатларыны алмаздан габаг өлмәлидирләр. Онлар өләндә бәдәнләри торпаға гајыдыр (Јарадылыш 3:19). Аллаһын мүәјјән етдији вахтда онлар сәмави һәјат үчүн мүнасиб олан бәдәнлә дирилирләр (1 Јәһја 3:2). Аллаһ, һәмчинин онлара өлмәзлик бәхш едир. Онлар өлмәзлији дүнјаја ҝәлдикләри заман өлмәз руһ шәклиндә алмырлар. Павел дејир: «Өлүмлү варлығымыз өлмәзлији ҝејмәлидир». Өлмәзлик Аллаһын бәхшишидир вә ону јалныз биринҹи дирилмәдә иштирак едәнләр ‘ҝејинирләр’ (1 Коринфлиләрә 15:50, 53; 2 Коринфлиләрә 5:1, 2, 8).
8. Һарадан билирик ки, Аллаһ 144 000 нәфәри мүхтәлиф динләрдән сечмир?
8 Илк дирилмәдә јалныз 144 000 нәфәр иштирак едир. Јеһова онлары ерамызын 33-ҹү илинин Пентикост ҝүнүндә, Исаны дирилдәндән бир аз сонра сечмәјә башлады. Онларын һәр биринин ‘алнында Онун [Исанын] вә Атасынын ады јазылмышдыр’ (Вәһј 14:1, 3). Демәли, бу инсанлар чохсајлы мүхтәлиф динләрдән сечилмирләр. Онларын һамысы мәсиһчидир вә Атанын, јә’ни Јеһованын адыны дашымагла фәхр едирләр. Дирилдикдән сонра онлар ҝөјдә тапшырыг алырлар. Аллаһын һүзурунда хидмәт етмәк имканыны онлары чох севиндирир.
Артыг башлајыб?
9. Вәһј 12:7 вә 17:14 ајәләри илк дирилмәнин башладығы вахты тәхмин етмәјә неҹә көмәк едир?
9 Илк дирилмә нә заман башлајыб? Онун артыг башладығына әсаслы сүбутлар вар. Мәсәлән, ҝәлин «Вәһј» китабынын ики фәслини мүгајисә едәк. Әввәлҹә 12-ҹи фәслә нәзәр салаг. Бурада биз охујуруг ки, тахта тәзәҹә галхмыш Иса Мәсиһ мүгәддәс мәләкләри илә бирликдә Шејтан вә онун ҹинләринә гаршы вурушур (Вәһј 12:7-9). Бу журналда тез-тез ҝөстәрилдији кими, бу дөјүш 1914-ҹү илдә башлајыбb. Анҹаг диггәт јетирин ки, һеч бир мәсһ олунмушун Иса илә бирликдә бу сәмави мүһарибәдә иштирак етдији дејилмир. Инди исә 17-ҹи фәслә бахаг. Бурада охујуруг ки, ‘Бөјүк Бабилин’ мәһвиндән сонра Гузу халглара «галиб ҝәләҹәкдир». Сонра исә дејилир ки, дә’вәт едилмишләр, сечилмишләр вә садигләр һәмин вахт Гузу илә бирликдәдирләр (Вәһј 17:5, 14). ‘Дә’вәт едилмишләр, сечилмишләр вә садигләр’ Иса илә бирликдә Шејтанын дүнјасыны тамамилә мәһв етмәк үчүн, о вахта кими артыг дирилмәлидирләр. Мәнтигәујғундур ки, Һар-Меҝидондан габаг өлән мәсһ олунмушлар 1914-ҹү ил вә Һар-Меҝидон арасындакы вахт мүддәтиндә дирилирләр.
10, 11. а) 24 ағсаггал кими тәмсил едир вә онлардан бири Јәһјаја нә ачыглајыр? б) Бундан һансы гәнаәтә ҝәлә биләрик?
10 Илк дирилмәнин нә заман башладығыны даһа дәгиг дејә биләрикми? Вәһј 7:9-15 ајәләриндә јазылан мараглы мә’лумата диггәт јетирәк. Бурада һәвари Јәһја ‘кимсәнин сајмаға гадир олмадығы бөјүк бир издиһамы’ тәсвир едир. Издиһамын ким олдуғуну Јәһјаја 24 ағсаггалдан бири ачыглајыр. Бу ағсаггаллар Мәсиһин сәмави иззәтә говушмуш падшаһлыг шәрикләрини тәмсил едирләрc (Лука 22:28-30; Вәһј 4:4). Јәһја өзү дә сәмави үмидә малик иди, лакин бу ағсаггал онунла данышанда о, һәлә дә јердә иди. Буна ҝөрә дә, бу ҝөрүнтүдә о, һәлә сәмави мүкафатларыны алмамыш јердәки мәсһ олунмушлары тәмсил едир.
11 Бәс 24 ағсаггалдан биринин бөјүк издиһамын ким олдуғуну Јәһјаја ачыгламасындан һансы нәтиҹәјә ҝәлә биләрик? Еһтимал ки, бу група дахил олан дирилән мәсһ олунмушлар бу ҝүн Аллаһын һәгигәтләринин ачыгланмасында иштирак едирләр. Буну билмәк нә үчүн ваҹибдир? Чүнки бөјүк издиһамын әслиндә ким олдуғу јердәки мәсһ олунмушлара 1935-ҹи илдә ачыгланды. Әҝәр бу ваҹиб һәгигәтин ачыгланмасында 24 ағсаггалдан бири иштирак етмишдирсә, демәли, о ән узағы 1935-ҹи илдә дирилмәли иди. Бурадан белә гәнаәтә ҝәлә биләрик ки, илк дирилмә 1914-1935-ҹи илләр арасында башламышдыр. Бәс бу тарихи даһа дәгиг өјрәнмәк олармы?
12. Илк дирилмәнин 1918-ҹи илин јазында башландығыны нә үчүн фәрз етмәк олар?
12 Мүгәддәс Китаба әсасән бир-биринә паралел олдуғу ҝүман едилән нөвбәти һадисәләри нәзәрдән кечирмәк бизим үчүн фајдалы олар. Иса Мәсиһ ерамызын 29-ҹу илинин пајызында Аллаһын Падшаһлығынын ҝәләҹәк Падшаһы кими мәсһ олунду. Ерамызын 33-ҹү илинин јазында, үч ил јарымдан сонра о, гүдрәтли руһани шәхсијјәт кими дирилдилди. Бәс онда ҝүман етмәк олармы ки, Иса 1914-ҹү илин пајызында тахта чыхдығы үчүн садиг мәсһ олунмуш давамчыларынын дирилмәси үч ил јарым сонра, 1918-ҹи илин јазында башламышдыр? Бу мараглы фәрзијјәдир. Буну Мүгәддәс Китабын әсасында иддиа едә билмәсәк дә, бу фикир илк дирилмәнин Мәсиһин иштиракынын башламасындан аз сонра башладығыны ҝөстәрән диҝәр Мүгәддәс Китаб ајәләринә зидд ҝетмир.
13. Илк дирилмәнин 1 Салониклиләрә 4:15-17 ајәләринә әсасән Мәсиһин иштиракынын еркән дөврүндә башладығы гәнаәтинә неҹә ҝәлмәк олар?
13 Мәсәлән Павел јазырды: «Сағ олан вә Рәббин ҝәлишинәдәк јашајан бизләр, һеч вәҹһлә ҝөзләрини һәјата јуммуш оланлардан габаг Онун јанына ҝетмәјәҹәјик. Чүнки Рәбб Өзү јүксәк нида илә, баш мәләјин сәдасы вә Аллаһын шејпуру илә ҝөјдән енәҹәк; вә Мәсиһә аид олан өлүләр ән әввәл дириләҹәкләр. Ондан сонра јашајыб, сағ галан бизләр, онларла бәрабәр Рәбби һавада гаршыламаг үчүн булудлар ичиндә галдырылаҹағыг; вә бу јолда даим Рәбб илә олаҹағыг» (1 Салониклиләрә 4:15-17). «Рәббин ҝәлиши» кими тәрҹүмә олунан ифадә әслиндә јунан дилиндә «Рәббин иштиракы» демәкдир. Анҹаг диггәт јетирин ки, Павел онун иштиракынын сонундан данышмырды. Буна ҝөрә дә, Мәсиһин иштиракы башламаздан әввәл өлән мәсһ олунмушлар Мәсиһин иштиракы заманы сағ оланлардан габаг ҝөјләр һәјатына дирилирләр. Бу о демәкдир ки, илк дирилмә Мәсиһин иштиракынын еркән дөврүндә башлајыб, онун иштиракы заманы давам едир. Мәсһ олунмушларын һамысы ејни вахтда дирилмир, илк дирилмә мүәјјән мүддәт әрзиндә баш верир.
«Онларын һәр биринә ағ либас верилиб»
14. а) «Вәһј» китабынын 6-ҹы фәслиндә јазылан ҝөрүнтүләр нә заман јеринә јетир? б) Вәһј 6:9 ајәсиндә нә тәсвир олунур?
14 «Вәһј» китабынын 6-ҹы фәслиндә јазылмыш диҝәр сүбута диггәт јетирәк. Бурада Иса ат белиндә отуран фатеһ кими тәсвир едилир (Вәһј 6:2). Дүнјанын һәр јериндә мисли ҝөрүнмәмиш мүһарибәләр ҝедир (Вәһј 6:4). Аҹлыг ҝениш јајылмышдыр (Вәһј 6:5, 6). Инсанлар өлүмҹүл хәстәликләрдән гырылырлар (Вәһј 6:8). Бүтүн бунлар 1914-ҹү илдән дүнјада һөкм сүрән вәзијјәтә ујғун ҝәлир. Анҹаг бунунла бәрабәр башга бир һадисә дә баш верир. Ҝәлин Вәһј 6:9 (И–93) ајәсиндә тәсвир олунан гурбанҝаһа нәзәр салаг. Онун алтында ‘Аллаһын сөзүндән вә малик олдуглары шәһадәтдән өтрү гәтл едилмишләрин ҹанлары’ вардыр. ‘Һәр мәхлуга һәјат [јә’ни ҹан] верән ган’ олдуғундан, әслиндә гурбанҝаһын алтындакы ҹанлар ҹәсарәт вә сә’јлә хидмәт етдикләринә ҝөрә Исанын өлдүрүлән садиг хидмәтчиләринин ганыдыр (Левилиләр 17:11).
15, 16. Вәһј 6:10, 11 ајәләринин нә үчүн илк дирилмәјә аид олдуғуну изаһ един.
15 Салеһ Һабилин ганы кими, бу мәсиһчи шәһидләрин дә ганы һагг-әдаләтин бәрпа олунмасы үчүн фәрјад едир (Јарадылыш 4:10). «Онлар јүксәк сәслә чығырыб, дејирдиләр: “Еј мүгәддәс вә һәгиги Мөвла, нә вахта кими һөкм етмәјиб, јер үзүндә јашајанлардан ганымызын интигамыны алмајаҹагсан?”» Сонра нә баш верир? «Онларын һәр биринә ағ либас верилиб, дејилди ки, өзләри кими өлдүрүләҹәк һәмкарларынын вә гардашларынын сајы тамамланынҹаја гәдәр, гыса бир мүддәт даһа истираһәт етсинләр» (Вәһј 6:10, 11).
16 Бу ағ либаслар гурбанҝаһын алтында олан ган ҝөлмәчәсинәми верилди? Әлбәттә ки, јох! Либаслар, ганлары мәҹази мә’нада гурбанҝаһын үстүндә ахыдылан кәсләрә верилди. Онлар өз һәјатларыны Исанын ады наминә гурбан вермиш вә инди руһани шәхсијјәт кими дирилдилмишләр. Буну һарадан билирик? «Вәһј»ин әввәлки фәсилләриндән охујуруг: «Ким галиб ҝәләрсә, ағ палтар ҝејәҹәк вә Мән онун адыны һәјат китабындан әсла силмәјәҹәјәм». Һәмчинин 24 ағсаггалын ‘ағ палтар ҝејдијини вә башында гызыл таҹ’ олдуғуну хатырлајаг (Вәһј 3:5; 4:4). Беләликлә, мүһарибә, аҹлыг вә хәстәликләр бәшәријјәти сарсытмаға башлајан заман гурбанҝаһын алтындакы ганла тәмсил олунан 144 000-нин өлән үзвләри ҝөјләр һәјатына дирилдилмиш вә онлара символик ағ либаслар верилмишди.
17. Ағ либаслары аланлар һансы мә’нада ‘истираһәт етмәлидирләр’?
17 Бу јениҹә дириләнләр ‘истираһәт етмәлидирләр’. Онлар сәбирлә Аллаһын гисас ҝүнүнү ҝөзләмәлидирләр. Онларын ‘һәмкарлары’, јә’ни јер үзүндәки мәсһ олунмуш гардашлары һәлә сынаглар гаршысында өз нөгсансызлыгларыны сүбут етмәлидирләр. Аллаһын һөкмүнүн вахты ҝәләндә онларын ‘истираһәти’ гуртараҹаг (Вәһј 7:3). Дириләнләр о заман Иса Мәсиһлә бирликдә писләри, о ҹүмләдән ҝүнаһсыз мәсиһчиләрин ганыны төкәнләри мәһв едәҹәкләр (2 Салониклиләрә 1:7-10).
Бизим үчүн бу нә демәкдир?
18, 19. а) Һансы сәбәбләрә ҝөрә сиз елә гәнаәтә ҝәлирсиниз ки, илк дирилмә артыг башлајыб? б) Илк дирилмә һаггында өјрәндикләриниз сиздә һансы һиссләри ојадыр?
18 Аллаһын Кәламында илк дирилмәнин дәгиг тарихи дејилмир, анҹаг онун мүәјјән мүддәт әрзиндә — Мәсиһин иштиракы заманы баш вердији ачыгланыр. Илк нөвбәдә Мәсиһин иштиракы башламаздан әввәл өлән мәсһ олунмушлар дирилирләр. Мәсиһин иштиракы заманы ахырадәк садиг галыб, јер үзүндәки һәјатларыны битирән мәсһ олунмушлар «бир ҝөз гырпымында» ҝүҹлү руһани варлыглара чеврилирләр (1 Коринфлиләрә 15:52). Мәсһ олунмушларын һамысымы сәмави мүкафатларыны Һар-Меҝидондан габаг алаҹаг? Биз буну билмирик. Анҹаг билирик ки, Аллаһын тә’јин етдији вахтда 144 000 нәфәрин һамысы сәмави Сион дағында дураҹаг.
19 Һәмчинин билирик ки, 144 000 нәфәрин әксәријјәти артыг ҝөјләрдә Мәсиһә говушуб. Јер үзүндә онларын јалныз кичик бир гисми галыб. Аллаһын һөкм ҝүнүнүн сүр’әтлә јахынлашдығына бу неҹә дә ҝүҹлү сүбутдур! Шејтанын бүтүн дүнјасы тезликлә мәһв едиләҹәк, өзү исә дибсиз дәринликләрә атылаҹагдыр. Сонра јер үзүндә јашамаг үмидинә малик оланларын дирилмәси башлајаҹаг вә садиг инсанлар Исанын фидијә гурбанлығы сајәсиндә Адәмин итирдији камиллијә чатаҹаглар. Јеһованын Јарадылыш 3:15 ајәсиндә јазылан пејғәмбәрлији мөһтәшәм сурәтдә јеринә јетәҹәк. Белә бир дөврдә јашамаг неҹә дә бөјүк шәрәфдир!
[Һашијәләр]
a Диҝәр сәккиз дирилмә һаггында 1 Падшаһлар 17:21-23; 2 Падшаһлар 4:32-37; 13:21; Марк 5:35, 41-43; Лука 7:11-17; 24:34; Јәһја 11:43-45; Һәвариләрин ишләри 9:36-42 ајәләриндә јазылыб.
b Мәсиһин иштиракынын 1914-ҹү илдән башладығына даир Мүгәддәс Јазылара әсасланан сүбуту Јеһованын Шаһидләри тәрәфиндән дәрҹ олунмуш «Мүгәддәс Китаб әслиндә нә өјрәдир?» китабынын 215-218-ҹи сәһифәләриндән тапа биләрсиниз.
c 24 ағсаггалын сәмави мөвгеләрини тутан мәсһ олунмушлары тәмсил етдији һагда мә’луматы Јеһованын Шаһидләри тәрәфиндән дәрҹ олунмуш «Вәһј. Онун мөһтәшәм зирвәси јахындыр!» китабынын 77-ҹи сәһифәсиндән (рус.) тапа биләрсиниз.
Неҹә изаһ едәрдиниз?
Ашағыдакы ајәләрин көмәјилә ‘илк дирилмәнин’ вахтыны неҹә мүәјјән етмәк олар?
• 1 Коринфлиләрә 15:23; 1 Салоникилиләрә 4:15-17