Бу дүнјанын сону неҹә ҝәләҹәк?
«Сиз... зүлмәтдә дејилсиниз ки, ҝүн ишығы оғруну јахаладығы кими, һәмин о ҝүн дә сизи гәфил јахаласын» (1 САЛОН. 5:4).
ИЗАҺ ЕДӘ БИЛӘРСИНИЗМИ?
Нөвбәти ајәләрдә һәлә «ҝөзлә ҝөрүнмәјән» һансы һадисәләрдән бәһс олунур?
1. Бизә ојаг галмагда вә сынаглара синә ҝәрмәкдә нә көмәк едәҹәк?
ТЕЗЛИКЛӘ биз бүтүн дүнјаны сарсыдаҹаг һадисәләрин шаһиди олаҹағыг. Мүгәддәс Китаб пејғәмбәрликләринин јеринә јетмәси буну сүбут едир. Буна ҝөрә дә биз ојаг галмалыјыг. Бәс ојаг галмаға бизә нә көмәк едәҹәк? Һәвари Павел бизи диггәтимизи «ҝөзлә ҝөрүнмәјән шејләрә» ҹәмләмәјә тәшвиг едир. Бәли, Јеһованын бизә вердији әбәди јашамаг үмидини — истәр ҝөјдә, истәрсә дә јер үзүндә — даима јадда сахламалыјыг. Контекстдән ҝөрүндүјү кими, Павел бу сөзләри һәмиманлыларыны диггәтләрини алаҹаглары ҝөзәл мүкафата јөнәлтмәјә тәшвиг етмәк мәгсәди илә јазмышды. Лакин бунун үчүн онлар садиг галмалы идиләр. Бу, онлара һәм дә сынаглара вә тәгибләрә синә ҝәрмәкдә көмәк едәҹәкди (2 Кор. 4:8, 9, 16—18; 5:7).
2. а) Үмидимизин мөһкәм олмасы үчүн биздән нә тәләб олунур? б) Бу вә нөвбәти мәгаләдә сөһбәт нәдән ҝедәҹәк?
2 Һәвари Павелин нәсиһәтиндә чох ваҹиб бир принсип јер алыб: үмидимиз мөһкәм галсын дејә биз јалныз ҝөзүмүзүн өнүндә олан шејләрә бахмамалыјыг. Диггәтимизи һәлә ҝөзлә ҝөрүнмәјән, лакин бөјүк әһәмијјәт кәсб едән һадисәләрә ҹәмләмәлијик (Ибр. 11:1; 12:1, 2). Буна ҝөрә дә ҝәлин әбәди һәјат үмидимизлә сых бағлы олан ҝәләҹәкдә баш верәҹәк он һадисәјә диггәт јетирәкa.
СОН ҜӘЛМӘМИШДӘН ӨНҸӘ НӘЛӘР БАШ ВЕРӘҸӘК?
3. а) 1 Салоникилиләрә 5:2, 3 ајәләринә әсасән, һансы һадисә баш вермәлидир? б) Сијаси лидерләр нә едәҹәкләр вә бу ишдә онлара кимләрин гошулма еһтималы вар?
3 Һәмин һадисәләрдән бири Павелин салоникилиләрә үнванладығы мәктубда гејд олунур. (1 Салоникилиләрә 5:2, 3 ајәләрини оху.) О, «Јеһованын ҝүнү»ндән данышыр. «Јеһованын ҝүнү» дејилдикдә јалан динин мәһв едилмәсилә башлајаҹаг вә Һар-Маҝедон мүһарибәси илә сона чатаҹаг бир дөвр нәзәрдә тутулур. Лакин Јеһованын ҝүнү башламаздан өнҹә дүнја лидерләри «сүлһ вә тәһлүкәсизлик» бәјанатлары илә чыхыш едәҹәкләр. Бу, бир вә ја бир нечә ардыҹыл баш верәҹәк һадисәләрә аид ола биләр. Ола билсин, милләтләр дүшүнәҹәкләр ки, ҹәмијјәтин бөјүк проблемләриндән бәзиләрини һәлл етмәк әрәфәсиндәдирләр. Бәс дини лидерләр барәдә нә демәк олар? Бу дүнјанын бир һиссәси олдуглары үчүн, еһтимал ки, онлар да сијаси лидерләрә гошулаҹаглар (Вәһј 17:1, 2). Руһаниләрин бу ҹүр давранышы гәдим Јәһудадакы јаланчы пејғәмбәрләрин давранышындан һеч дә фәргләнмәјәҹәк. Јеһова онлар һагда демишди: «“Сүлһ, сүлһ” дејирләр, амма сүлһ јохдур» (Јер. 6:14; 23:16, 17).
4. Әксәр инсанлардан фәргли олараг, биз нәји дәрк едирик?
4 «Сүлһ вә тәһлүкәсизлик» бәјанатынын кимдән ҝәләҹәјиндән асылы олмајараг, бу, Јеһованын ҝүнүнүн башладығына бир ишарә олаҹаг. Буна ҝөрә дә Павел демишди: «Гардашлар, сиз... зүлмәтдә дејилсиниз ки, ҝүн ишығы оғруну јахаладығы кими, һәмин о ҝүн дә сизи гәфил јахаласын. Ахы сиз һамыныз нурун... оғулларысыныз» (1 Салон. 5:4, 5). Әксәр инсанлардан фәргли олараг, биз ҹари һадисәләрин Мүгәддәс Китаба әсасән һансы мәна дашыдығыны дәрк едирик. «Сүлһ вә тәһлүкәсизлик» бәјанаты һагда пејғәмбәрлик неҹә јеринә јетәҹәк? Биз сәбир едиб ҝөзләмәлијик. Буна ҝөрә дә ҝәлин әзмкарлыгла ојаг галыб ајыг олаг (1 Салон. 5:6; Сеф. 3:8).
АГИБӘТИНДӘН БИХӘБӘР ОЛАН «МӘЛИКӘ»
5. а) «Бөјүк мүсибәт» неҹә башлајаҹаг? б) Агибәтиндән бихәбәр олан мәликә нәји тәмсил едир?
5 Бундан сонра һәлә ҝөзлә ҝөрүнмәјән һансы һадисә баш верәҹәк? Павел јазыр: «Инсанлар “сүлһ вә тәһлүкәсизлик” дејәркән... онлар да гәфил мәһвә уғрајаҹаглар». Бу гәфил мәһвин илкин мәрһәләси «Бөјүк Бабил»ә гаршы һүҹум олаҹаг. Фаһишә кими дә танынан «Бөјүк Бабил» дүнјадакы јалан динләрин һамысынын рәмзидир (Вәһј 17:5, 6, 15). Христианлыг да дахил олмагла, бүтүн јалан динләрә едилән бу һүҹум «бөјүк мүсибәт»ин артыг башладығына ишарә едәҹәк (Мат. 24:21; 2 Салон. 2:8). Чохлары үчүн бу һадисә тамамилә ҝөзләнилмәз олаҹаг. Нәјә ҝөрә? Чүнки фаһишә та о вахта гәдәр өзүнү һеч вахт јас тутмајаҹаг мәликә һесаб едәҹәк. Лакин о, бирдән-бирә баша дүшәҹәк ки, агибәтиндән бихәбәр имиш. О, чох тез бир заманда, санки, «бир ҝүн ичиндә» мәһв едиләҹәк (Вәһј 18:7, 8).
6. Јалан дин кимләр тәрәфиндән мәһв едиләҹәк?
6 Аллаһын Кәламында гејд олунур ки, фаһишәјә онбујнузлу «вәһши һејван» һүҹум едәҹәк. «Вәһј» китабыны арашдырдыгда бәлли олур ки, вәһши һејван Бирләшмиш Милләтләр Тәшкилатыны (БМТ), «он бујнуз» исә «ал гырмызы рәнҝли вәһши һејван»ы дәстәкләјән бүтүн һазыркы сијаси гүввәләри тәмсил едирb (Вәһј 17:3, 5, 11, 12). Һүҹум нә дәрәҹәдә виранедиҹи олаҹаг? БМТ-јә дахил олан милләтләр фаһишәнин вар-дөвләтини талан едәҹәк, онун ич үзүнү ачаҹаг, «әтини јејәҹәк», сонра да «јандырыб күлә чевирәҹәк». О, һәмишәлик мәһв едилиб ҝедәҹәк. (Вәһј 17:16 ајәсини оху.)
7. «Вәһши һејван»ын һүҹумуна сәбәб нә олаҹаг?
7 Мүгәддәс Китаб пејғәмбәрлијиндә бу һүҹума нәјин сәбәб олаҹағы да ачыгланыр. Аллаһ неҹәсә сијаси лидерләрин үрәјинә «бу фикри», јәни фаһишәни тар-мар етмәк фикрини салаҹаг (Вәһј 17:17). Мүһарибәләри гызышдыран дин дүнјада дағыдыҹы гүввә олараг галмагдадыр. Бу сәбәбдән, ола билсин, милләтләр фаһишәни мәһв етмәјин онларын милли марагларына хидмәт етдијини зәнн едәҹәкләр. Лидерләр динләрә һүҹум чәкәндә өз фикирләрини иҹра етдикләрини дүшүнәҹәкләр. Лакин, әслиндә, Аллаһ бүтүн јалан динләри мәһв етмәк үчүн онлардан бир васитә кими истифадә едәҹәк. Беләликлә, һадисәләрин ҝедишаты ҝөзләнилмәдән тамамилә дәјишәҹәк вә Шејтанын дүнјасы дахили парчаланма нәтиҹәсиндә өз-өзүнә гаршы чыхаҹаг; Шејтан бунун гаршысыны алмагда аҹиз олаҹаг (Мат. 12:25, 26).
АЛЛАҺЫН ХАЛГЫНА ҺҮҸУМ
8. «Магог өлкәсиндән олан... [Гогун]» һүҹуму нә демәкдир?
8 Јалан динин мәһв едилмәсиндән сонра Аллаһын хидмәтчиләри һәлә дә «әмин-аманлыг ичиндә», диварсыз јашајаҹаглар (Јез. 38:11, 14). Јеһоваја ибадәтиндән галмајан вә илк бахышдан аҹиз кими ҝөрүнән халгла нә баш верәҹәк? Ҝөрүнүр, бу халг вар-ҝүҹләрини топлајан бир чох милләтләрин һүҹумуна мәруз галаҹаг. Аллаһын Кәламында бу һүҹум «Магог өлкәсиндән олан... [Гогун]» һүҹуму адланыр. (Језекел 38:2, 15, 16 ајәләрини оху.) Бу һүҹума мүнасибәтимиз неҹә олмалыдыр?
9. а) Мәсиһчиләри нараһат едән әсас мәсәлә һансыдыр? б) Иманымызы мөһкәмләндирмәк үчүн биз инди һансы аддымлары атмалыјыг?
9 Аллаһын халгына едиләҹәк һүҹум барәдә габагҹадан билмәјимиз бизи тәлаша салмыр. Чүнки бизи нараһат едән әсас мәсәлә өз хиласымыз јох, Јеһованын адынын мүгәддәс тутулмасы вә Онун али һөкмранлығына бәраәт газандырылмасыдыр. Јеһова 60 дәфәдән чох бәјан етмишди: «Онда биләҹәксиниз ки... [Јеһова] Мәнәм» (Јез. 6:7). Буна ҝөрә дә биз Језекелин пејғәмбәрлијинин бу мөһтәшәм һиссәсинин јеринә јетәҹәји вахты бөјүк сәбирсизликлә ҝөзләјирик вә инанырыг ки, «Јеһова Она садиг инсанлары сынаглардан неҹә гуртармағы... билир» (2 Пет. 2:9). Нә гәдәр ки о вахт ҝәлмәјиб, биз иманымызы мөһкәмләндирмәк үчүн һәр бир фүрсәтдән истифадә етмәк истәјирик ки, ҝәләҹәкдә үзләшәҹәјимиз сынаглардан асылы олмајараг, Јеһоваја садиг галаг. Буну неҹә етмәлијик? Биз дуа етмәли, Аллаһын Кәламыны арашдырмалы, онун үзәриндә дүшүнмәли вә Падшаһлыг һаггында хош хәбәри башгалары илә бөлүшмәлијик. Белә етсәк, лөвбәр ҝәмини мөһкәм сахладығы кими, әбәди һәјат үмиди дә бизә Аллаһа садиг галмаға көмәк едәҹәк (Ибр. 6:19; Мәз. 25:21).
МИЛЛӘТЛӘР ЈЕҺОВАНЫ ТАНЫМАГ МӘҸБУРИЈЈӘТИНДӘ ГАЛАҸАГЛАР
10, 11. Һансы һадисә Һар-Маҝедонун башланмасына тәкан верәҹәк вә бу заман нә баш верәҹәк?
10 Јеһованын халгына һүҹум едиләндә бу, һансы сарсыдыҹы һадисәјә тәкан верәҹәк? Јеһова Оғлу Иса Мәсиһ вә сәмави ордусу васитәсилә халгыны мүдафиә едәҹәк (Вәһј 19:11—16). Бу, «Гадир Аллаһын бөјүк ҝүнүндә баш верәҹәк мүһарибәјә» — Һар-Маҝедона ҝәтириб чыхараҹаг (Вәһј 16:14, 16).
11 Һәмин мүһарибә һагда Јеһова Језекел васитәсилә бәјан етмишди: «“Бүтүн дағларымда гылынҹы Гогун үстүнә ҝетмәјә чағыраҹағам” Худавәнд Рәбб белә бәјан едир, “һәр кәс бир-биринин үстүнә гылынҹ чәкәҹәк”». Тәлаша дүшмүш Шејтанын тәрәфдарлары о гәдәр чашгынлыг ичиндә олаҹаглар ки, силаһларыны бир-бирләринә гаршы — әсҝәр әсҝәрә гаршы — тушлајаҹаглар. Шејтанын гурдуғу бүтүн бу систем дармадағын едиләҹәк. Јеһова дејир: «[Гогун], ордуларынын вә јанында ҝәлән чохлу халгын үстүнә... од вә күкүрд јағдыраҹағам» (Јез. 38:21, 22). Аллаһын мүдахиләсинин нәтиҹәси нә олаҹаг?
12. Милләтләр нә етмәк мәҹбуријјәтиндә галаҹаглар?
12 Милләтләр дәрк етмәли олаҹаглар ки, онлары мәһв етмәк әмрини Јеһова вериб. Ола билсин, сонра гәдимдә исраиллиләри Гырмызы дәнизәдәк тәгиб едән Мисир әсҝәрләри кими, Шејтанын ордусу да дәһшәт ичиндә гышгыраҹаг: «[Јеһова] онларын тәрәфиндә бизә гаршы дөјүшүр» (Чых. 14:25). Бәли, милләтләр Јеһованы танымаг мәҹбуријјәтиндә галаҹаглар. (Језекел 38:23 ајәсини оху.) Биз бу һадисәләрин башланғыҹына нә дәрәҹәдә јахыныг?
БАШГА БИР ИМПЕРИЈА ОЛМАЈАҸАГ
13. Даниелин тәсвир етдији һејкәлин бешинҹи һиссәси һагда биз нәји билирик?
13 «Даниел» китабындакы пејғәмбәрлијин көмәјилә биз вахт ахынынын һансы нөгтәсинә чатдығымызы мүәјјән едә биләрик. Даниел мүхтәлиф метал нөвләриндән ибарәт олан вә ҝөрүнүшҹә инсана охшајан бир һејкәл тәсвир едир (Дан. 2:28, 31—33). Бу һејкәл бир-биринин ардынҹа дүнја сәһнәсинә чыхан, еләҹә дә Аллаһын кечмишдәки вә мүасир халгына бөјүк тәсир ҝөстәрән империјалары тәмсил едир. Һәмин империјалар бунлардыр: Бабил, Мидија-Фарс, Јунаныстан, Рома вә бизим ҝүнләрдә һөкмранлыг едән сонунҹу империја. Даниелин пејғәмбәрлијини арашдыраркән ҝөрүрүк ки, сөзүҝедән сонунҹу империја һејкәлин ајаг вә ајаг бармаглары илә тәмсил олунуб. Биринҹи Дүнја мүһарибәси заманы Британија вә Бирләшмиш Штатлар хүсуси әмәкдашлыға башладылар. Бәли, Даниелин тәсвир етдији һејкәлин бешинҹи һиссәси Инҝилтәрә-Америка дүнја империјасыдыр. Һејкәлин сонунҹу һиссәси олан ајаглар дүнја сәһнәсиндә даһа һеч бир империјанын пејда олмајаҹағына ишарә едир. Ајаг вә ајаг бармагларынын дәмир вә ҝилин гарышығы кими тәсвир олунмасы Инҝилтәрә-Америка дүнја империјасынын зәиф вәзијјәтдә олдуғундан хәбәр верир.
14. Һар-Маҝедон башлајанда һансы империја дүнјада лидерлик едәҹәк?
14 Һәмин пејғәмбәрликдә ҝөстәрилир ки, бөјүк бир дашла тәмсил олунан Аллаһын Падшаһлығы 1914-ҹү илдә Јеһованын али һөкмранлығынын рәмзи олан дағдан гопарылыб. Бу даш чох сүрәтлә мәгсәдинә — һејкәлин ајагларына јахынлашыр. Һар-Маҝедонда ајаглар вә һејкәлин галан һиссәләри дармадағын едиләҹәк. (Даниел 2:44, 45 ајәләрини оху.) Беләликлә, Һар-Маҝедон башлајанда Инҝилтәрә-Америка дүнја империјасы һәлә дә дүнјада лидерлик едән империја олаҹаг. Бу пејғәмбәрлијин там јеринә јетмәсини өз ҝөзләримизлә ҝөрмәк неҹә дә һәјәҹанландырыҹы олаҹаг!c Бәс Шејтан үчүн Јеһова нә һазырлајыб?
АЛЛАҺЫН БАШ ДҮШМӘНИНИН АГИБӘТИ
15. Һар-Маҝедондан сонра Шејтан вә онун ҹинләри илә нә баш верәҹәк?
15 Биринҹиси, Шејтан јер үзүндәки тәшкилатынын неҹә јерлә јексан едиләҹәјинә башдан сонадәк бахмаг мәҹбуријјәтиндә галаҹаг. Нөвбәти һәдәф исә онун өзү олаҹаг. Һәмин һадисәләр һаггында һәвари Јәһја бизә хәбәр верир. (Вәһј 20:1—3 ајәләрини оху.) «Әлиндә дибсиз үмманын ачары» олан Иса Мәсиһ Шејтаны вә онун ҹинләрини буховлајыб үммана атаҹаг вә онлар орада мин ил галаҹаг (Лука 8:30, 31; 1 Јәһ. 3:8). Бу һадисә иланын башындан вурулмасынын илкин мәрһәләси олаҹагd (Јар. 3:15).
16. Шејтанын дибсиз үммана атылмасы нә демәкдир?
16 Шејтанын вә онун ҹинләринин атылаҹағы дибсиз үмман нәји тәмсил едир? Јәһјанын бурада истифадә етдији ависос сөзүнүн мәнасы «чох вә ја олдугҹа дәрин» демәкдир. Бу сөз һәм дә «дибсиз, уҹсуз-буҹагсыз» вә «сонсуз бошлуг» кими дә тәрҹүмә едилир. Беләликлә, бу, Јеһовадан вә Онун тәјин етдији мәләкдән, јәни «әлиндә дибсиз үмманын ачары» олан Иса Мәсиһдән башга, һеч кәс үчүн әлчатан дејил. Бурада Шејтан фәалијјәтсиз, санки, өлү вәзијјәтдә олаҹаг ки, «милләтләри аздырмасын». Нәһајәт ки, «нәрилдәјән шир»ин сәси кәсиләҹәк (1 Пет. 5:8).
ӘМИН-АМАНЛЫГ ДӨВРҮНДӘН ӘВВӘЛ БАШ ВЕРӘҸӘК ҺАДИСӘЛӘР
17, 18. а) Бу мәгаләдә биз һәлә «ҝөзлә ҝөрүнмәјән» һансы һадисәләри арашдырдыг? б) Бу һадисәләрдән сонра һансы дөвр башлајаҹаг?
17 Гаршыда бизи дүнјаны сарсыдаҹаг ваҹиб һадисәләр ҝөзләјир. Биз бөјүк сәбирсизликлә «сүлһ вә тәһлүкәсизлик» бәјанатлары һаггындакы пејғәмбәрлијин неҹә јеринә јетәҹәјини ҝөзләјирик. Даһа сонра биз Бөјүк Бабилин неҹә мәһв едиләҹәјинин, Магог дијарындан олан Гогун һүҹумунун вә Һар-Маҝедон мүһарибәсинин шаһиди олаҹағыг. Шејтан ҹинләри илә бирҝә дибсиз үммана атылаҹаг. Бу һадисәләрдән сонра, бүтүн писликләр мәһв едиләндә һәјатымызда јени сәһифә ачылаҹаг — биз «әмин-аманлығын боллуғундан» зөвг алаҹағымыз Мәсиһин Миниллик Һөкмранлығына дахил олаҹағыг (Мәз. 37:10, 11).
18 Индиҹә арашдырдығымыз бу беш һадисәдән әлавә, биз диггәтимизи «ҝөзлә ҝөрүнмәјән» диҝәр һадисәләрә дә јөнәлтмәлијик. Һәмин һадисәләр нөвбәти мәгаләдә мүзакирә едиләҹәк.
[Һашијәләр]
a Бу вә нөвбәти мәгаләдә һәмин он һадисә мүзакирә олунаҹаг.
b «Вәһј. Онун мөһтәшәм зирвәси јахындыр!» китабынын 251-дән 258-дәк сәһифәләринә (рус., түрк.) бахын.
c Даниел 2:44 ајәсиндәки «бүтүн әввәлки падшаһлыглары әзиб-дағыдаҹаг» ифадәси алтында һејкәлин мүхтәлиф һиссәләри илә тәмсил олунан падшаһлыглар вә ја дүнја империјалары нәзәрдә тутулур. Лакин паралел Мүгәддәс Китаб пејғәмбәрлијиндә ҝөстәрилир ки, «Гадир Аллаһын бөјүк ҝүнүндә» јер үзүнүн бүтүн падшаһлары Јеһоваја гаршы топланаҹаг (Вәһј 16:14; 19:19—21). Беләликлә, Һар-Маҝедонда јалныз һејкәлин мүхтәлиф һиссәләри илә тәмсил олунан падшаһлыглар јох, бу дүнјанын бүтүн падшаһлыглары мәһв едиләҹәк.
d Шејтан вә онун ҹин мәләкләри миниллијин сонунда «одлу-күкүрдлү ҝөлә» атыланда Шејтанын башы тамамилә әзиләҹәк (Вәһј 20:7—10; Мат. 25:41).
[4 вә 5–ҹи сәһифәдәки чәрчивә/шәкилләр]
БАШ ВЕРӘҸӘК БЕШ ҺАДИСӘ
1 Сүлһ вә тәһлүкәсизлијинин елан едилмәси
2 Милләтләрин «Бөјүк Бабил»ә һүҹум чәкиб мәһв етмәси
3 Јеһованын халгына һүҹум едилмәси
4 Һар-Маҝедон мүһарибәси
5 Шејтан вә онун ҹинләринин дибсиз үммана атылмасы