Аллаһын Падшаһлығынын ҝәтирәҹәји гуртулуш јахындыр!
«Сәлтәнәтин ҝәлсин. Ҝөјдә олдуғу кими, јердә дә Сәнин ирадән олсун» (МАТ. 6:10).
1. Исанын әсас тәлими нәдән ибарәт иди?
ИСА МӘСИҺИН Дағүстү тәблиғинә нүмунәви дуа дахилдир. Бу дуада онун әсас тәлими јығҹам шәкилдә тәсвир едилир. О, давамчыларына белә дуа етмәји өјрәдирди: «Сәлтәнәтин ҝәлсин. Ҝөјдә олдуғу кими, јердә дә Сәнин ирадән олсун» (Мат. 6:9-13). Иса «шәһәрләри вә кәндләри долашыб тәблиғ едәрәк Аллаһын Сәлтәнәтини мүждәләјирди» (Лука 8:1). Мәсиһ давамчыларыны тәшвиг едирди: «Әввәлҹә Аллаһын Сәлтәнәтини вә Онун салеһлијини ахтарын» (Мат. 6:33). Бу мәгаләни арашдыраркән хидмәтиндә бу материалдан неҹә истифадә едәҹәјинә диггәт јетир. Мәсәлән, бу суаллара неҹә ҹаваб верәрдин: Падшаһлыг мүждәси нә дәрәҹәдә ваҹибдир? Бәшәријјәт нәдән хилас олунмалыдыр? Аллаһын Падшаһлығы неҹә хилас едәҹәк?
2. Падшаһлыг мүждәси нә дәрәҹәдә ваҹибдир?
2 Иса пејғәмбәрлик етмишдир: «Сәмави Сәлтәнәт һаггында олан бу Мүждә халгларын һамысына шәһадәт олараг бүтүн дүнјада тәблиғ олунаҹагдыр; вә сон о заман ҝәләҹәкдир» (Мат. 24:14). Аллаһын Падшаһлығы һаггында хош хәбәр олдугҹа ваҹибдир. Бу, дүнјада сәсләнән ән ваҹиб хәбәрдир! Бүтүн дүнјада Јеһованын Шаһидләринин 100 000-дән чох јығынҹағында Аллаһын тәхминән једди милјон хидмәтчиси Падшаһлығын артыг гурулдуғуну бәјан едәрәк мисилсиз тәблиғ ишиндә иштирак едир. Падшаһлығын гурулмасы хош хәбәрдир, чүнки бу, јерин ишләрини тамамилә нәзарәт алтына ҝөтүрмәк үчүн Аллаһын артыг ҝөјләрдә һөкумәт тәсис етдијини билдирир. Падшаһлығынын рәһбәрлији алтында Јеһованын ирадәси ҝөјдә олдуғу кими, јердә дә иҹра олунаҹаг.
3, 4. Аллаһын ирадәси јер үзүндә иҹра едиләндә нәләр баш верәҹәк?
3 Аллаһын ирадәсинин јер үзүндә иҹра едилмәси бәшәријјәтә һансы хејир-дуалары ҝәтирәҹәк? Јеһова инсанларын «ҝөзләриндән бүтүн јашлары силәҹәкдир. Артыг өлүм мөвҹуд олмајаҹаг; артыг нә кәдәр, нә фәрјад, нә дә ағры олаҹагдыр» (Вәһј 21:4). Инсанлар мирас алдыглары ҝүнаһ вә гејри-камиллик үзүндән хәстәләниб өлмәјәҹәкләр. Аллаһын јаддашында олан өлүләрин әбәди јашамаг имканы олаҹаг, чүнки Мүгәддәс Китабда вәд едилир: «Һәм салеһ, һәм дә салеһ олмајан өлүләрин дирилмәси олаҹагдыр» (Һәв. иш. 24:15). Артыг мүһарибә, хәстәликләр, аҹлыг олмајаҹаг вә Јер күрәси Ҹәннәтә чевриләҹәк. Һәтта инди тәһлүкәли олан һејванлар да инсанларла вә бир-бирләри илә сүлһдә јашајаҹаглар (Мәз. 46:9; 72:16; Јешаја 11:6-9; 33:24; Лука 23:43).
4 Буна ҝөрә дә тәәҹҹүблү дејил ки, Падшаһлығын рәһбәрлијинин ҝәтирәҹәји ҝөзәл хејир-дуалары Мүгәддәс Китаб белә тәсвир едир: «Мәзлумлар өлкәни мүлк олараг алаҹаг, әмин-аманлығын боллуғундан зөвг тапаҹаг». Бәс пислик төрәдәнләр һаггында нә демәк олар? Мүгәддәс Јазыларда габагҹадан дејилир: «Бир аз ҝөзлә, пис јох олаҹаг». Амма Јеһоваја «үмид бағлајанлар өлкәни мүлк олараг алаҹаг» (Мәз. 37:9-11).
5. Индики системин агибәти неҹә олаҹаг?
5 Бүтүн бунларын һәјата кечмәси үчүн индики систем өзүнүн бир-бири илә әдавәтдә олан һөкумәтләри, динләри вә тиҹарәт системләри илә арадан галдырылмалыдыр. Сәмави һөкумәтин һәјата кечирәҹәји мәһз бу олаҹаг. Даниел пејғәмбәр Аллаһдан илһам алараг сөјләмишди: «О [инди мөвҹуд олан] падшаһларын дөврүндә ҝөјләрин Аллаһы [ҝөјдә] һеч вахт дағылмајан бир падшаһлыг гураҹаг вә бу падшаһлыг башга халгын әлинә кечмәјәҹәк. О бүтүн әввәлки [индики] падшаһлыглары әзиб-дағыдаҹаг, өзү исә әбәди галаҹаг» (Дан. 2:44). Сонра Аллаһын Падшаһлығы, јәни јени сәмави һөкумәт јер үзүндәки јени инсан ҹәмијјәти үзәриндә һөкмранлыг едәҹәк. Һәмин вахт «јени ҝөјләр вә јени јер» олаҹаг вә ‘онларда салеһлик өмүр сүрәҹәк (2 Пет. 3:13).
Гуртулуша инди даһа чох еһтијаҹ вар
6. Мүгәддәс Китаб пис дүнјанын нә дәрәҹәдә бәрбад һалда олдуғуну неҹә тәсвир едир?
6 Шејтан, Адәм вә Һәвва өзләри үчүн нәјин дүз вә нәјин сәһв олдуғуну гәрара алмағы истәјәрәк Аллаһа гаршы үсјан галдырмагла бәшәр аиләсини фәлакәтли јола сүрүкләдиләр. Тәхминән 1 600 ил сонра, Бөјүк Дашгындан әввәл ‘јер үзүндәки инсанларын шәр әмәлләри чох иди вә һәр заман онларын үрәјиндәки фикирләр вә нијјәтләр пислијә доғру јөнәлирди’ (Јар. 6:5). Дашгындан тәхминән 1 300 ил кечәндән сонра јер үзүндәки вәзијјәтин аҹынаҹаглы олдуғуну ҝөрән Сүлејман бу сөзләри јазды: «Чохдан өлүб ҝетмиш адамлары һәлә дири галанлардан даһа хошбәхт сајдым. Бунлардан да хошбәхт о адамдыр ки, һәлә дүнјаја ҝәлмәјиб, сәма алтында едилән пислији ҝөрмәјиб» (Ваиз 4:2, 3). Тәхминән 3 000 ил сонра, бизим ҝүнләрдә, пислик ҝетдикҹә артыр.
7. Аллаһ тәрәфиндән гуртулуша нә үчүн инди даһа чох еһтијаҹ дујулур?
7 Дүздүр, пислик һәмишә олуб, амма Аллаһын Падшаһлығы тәрәфиндән гуртулуша бу ҝүн даһа чох еһтијаҹ дујулур. Кечән әсрдә вәзијјәт әввәлләр олдуғундан даһа аҹынаҹаглы олмушду вә ҝет-ҝедә писләшмәкдәдир. Мисал үчүн, бир институтун һесабатында дејилир: «Тәкҹә [20-ҹи] әсрдә баш верән мүһарибәләрин гурбанлары, ерамызын әввәлки јүзилликләриндә өләнләрин сајындан үч дәфә чохдур» («Wорлдwатҹһ Ынституте»). 1914-ҹү илдән етибарән мүһарибәләрдә 100 милјондан чох инсан һәјатыны итирмишдир. Бир енсиклопедијаја әсасән, Икинҹи Дүнја мүһарибәсиндә 60 милјонадәк инсан өлүб. Бәзи дөвләтләрин нүвә силаһына малик олдуғуну нәзәрә алсаг, инсанлар дүнја әһалисинин бөјүк һиссәсини мәһв етмәјә гадирдирләр. Елмдә вә тибдә әлдә олунан наилијјәтләрә бахмајараг, һәр ил аҹлыгдан тәхминән беш милјон ушаг тәләф олур. («Мүгәддәс Китаб әслиндә нә өјрәдир?» китабынын 9-ҹу фәслинә бахын.)
8. Инсанларын мин илләрлә идарә етмәси нәји сүбут едир?
8 Инсанларын пислији арадан галдырмаг ҹәһдләри боша чыхыб. Бу дүнјанын сијаси, тиҹарәт вә дини гурулушлары инсанларын сүлһә, фираванлыға вә сағламлыға олан башлыҹа еһтијаҹларыны һеч вахт тәмин етмәмишдир. Онлар бәшәријјәтин бөјүк проблемләрини һәлл етмәк әвәзинә, онлары даһа да артырыблар. Шүбһәсиз ки, инсанларын мин илләрлә идарә етмәси нөвбәти сөзләрин доғрулуғуну сүбут едир: «Инсанын өмрү өз әлиндә дејил. Аддымларыны дүзәлтмәк ҝедән адамын иши дејил» (Јер. 10:23). Бәли, «бир нәфәрин башга адама ағалыг етмәси башына бәла олур» (Ваиз 8:9). Үстәлик, «бүтүн хилгәт индијә кими бирликдә фәрјад едиб доғум ағрысы чәкир» (Ром. 8:22).
9. Һәгиги мәсиһчиләр «ахыр ҝүнләрдә» вәзијјәтин неҹә олаҹағыны билирләр?
9 Бизим зәманә һаггында Мүгәддәс Китабда пејғәмбәрлик едилмишдир: «Ахыр ҝүнләрдә чәтин анлар ҝәләҹәкдир». Инсан һакимијјәтинин рәһбәрлији алтында олан ахыр ҝүнләрдәки вәзијјәти тәсвир етдикдән сонра һәмин пејғәмбәрликдә дејилир: «Пис адамлар вә сахтакарлар... ҝетдикҹә даһа бетәр олаҹаглар». (2 Тимотејә 3:1-5, 13 ајәләрини оху.) Мәсиһчиләр бунун белә олаҹағыны билирләр, чүнки «бүтүн дүнја... шәририн [Шејтанын] һакимијјәти алтындадыр» (1 Јәһ. 5:19). Анҹаг севиндириҹи һалдыр ки, тезликлә Аллаһ Ону севәнләри гуртараҹаг. Бу инсанлар ити сүрәтлә писләшән дүнјадан хилас олунаҹаглар.
Гуртулуш јалныз Јеһовадан ҝәләҹәк
10. Нәјә ҝөрә гуртулуш јалныз Јеһовадан ҝәләҹәк?
10 Хош хәбәри тәблиғ едәркән вурғула ки, гуртулуш јалныз Јеһовадан ҝәләҹәк. Өз хидмәтчиләрини истәнилән пис вәзијјәтдән хилас етмәјә јалныз Онун ҝүҹү вә истәји вар (Һәв. иш. 4:24, 31; Вәһј 4:11). Биз әмин ола биләрик ки, Јеһова халгыны һәмишә хилас едәҹәк вә нијјәтләрини һәјата кечирәҹәк, чүнки О анд ичмишдир: «Мүтләг дүшүндүјүм кими олаҹаг». Онун сөзү ‘бош јерә јанына гајытмаз’. (Јешаја 14:24, 25; 55:10, 11 ајәләрини оху.)
11, 12. Аллаһ хидмәтчиләринә һансы зәманәти верир?
11 Јеһова зәманәт верир ки, писләрин үзәриндә һөкмүнү иҹра едәндә Өз хидмәтчиләрини хилас едәҹәк. Аллаһ Јеремја пејғәмбәри гаты ҝүнаһкарларын јанына ҝөндәриб ҹәсарәтли олмағы тапшыранда она деди: «Горхма». Јеремја нә үчүн горхмамалы иди? Чүнки Јеһова «сәни гуртармаг үчүн Мән сәнинлә олаҹағам» деди (Јер. 1:8). Ејнилә, Јеһова пис Содом вә Һоморраны мәһв етмәздән әввәл Луту вә онун аиләсини һәмин әразидән чыхармаг үчүн ики мәләјини ҝөндәрди. Сонра исә Јеһова «Содом вә Һоморранын үзәринә... одлу күкүрд јағдырды» (Јар. 19:15, 24, 25).
12 Јеһова бүтүн дүнјада олан хидмәтчиләрини гуртармаға гадирдир. О, гәдимдәки пис дүнјаны Дашгынла мәһв едәркән, «Нуһ да дахил олмагла, сәккиз нәфәрин ҹаныны сахлады» (2 Пет. 2:5). Јеһова индики пис системи мәһв едәндә јенә салеһләри гуртараҹаг. Буна ҝөрә Онун Кәламында дејилир: «Өлкәдәки һәлим үрәклиләр, Рәббә мејл салын! Салеһлијә мејл салын! Тәвазөкарлыға мејл салын! Бәлкә сиз Рәббин гәзәб ҝүнүндә гуртула билдиниз» (Сеф. 2:3). Дүнја мигјасында баш верәҹәк һәмин һадисәдән сонра «әмәлисалеһләр јер үзүндә сакин олаҹаг, камилләр бурада галаҹаг. Пис адамлар бу торпагдан атылаҹаг» (Сүл. мәс. 2:21, 22).
13. Јеһова һәјатларыны итирмиш хидмәтчиләрини неҹә гуртараҹаг?
13 Аллаһын бир чох хидмәтчиләри хәстәлик, тәгиб вә диҝәр сәбәбләрдән һәјатларыны итирмишләр (Мат. 24:9). Бәс онлар неҹә гуртулаҹаглар? Артыг гејд едилдији кими, ‘салеһләрин дирилмәси олаҹагдыр’ (Һәв. иш. 24:15). Јеһованын Өз хидмәтчиләрини гуртармасына һеч нәјин мане олмадығыны билмәк неҹә дә тәсәлливериҹидир!
Әдаләтли һөкумәт
14. Биз Аллаһын Падшаһлығынын әдаләтли һөкумәт олдуғуна нә үчүн әминик?
14 Тәблиғ заманы изаһ едә биләрсән ки, Јеһованын сәмави Падшаһлығы әдаләтли һөкумәтдир. Чүнки бу һөкумәт Аллаһын һагг-әдаләт вә мәһәббәт кими еҹазкар кејфијјәтләрини әкс етдирир (Ганун. т. 32:4; 1 Јәһ. 4:8). Аллаһ бу Падшаһлығы Иса Мәсиһә — јери идарә етмәк үчүн ән мүнасиб шәхсә һәвалә едиб. 144 000 мәсһ едилмиш мәсиһчинин јер үзүндән сатын алынмасы вә ҝөјләр һәјатына дирилдиләрәк Мәсиһлә бәрабәр јер үзүнү идарә етмәси дә Јеһованын нијјәтинә дахил иди (Вәһј 14:1-5).
15. Аллаһын Падшаһлығынын рәһбәрлији илә инсан рәһбәрлији арасындакы тәзад нәдән ибарәтдир?
15 Иса Мәсиһин вә 144 000 һакимијјәт шәрикинин рәһбәрлији илә гејри-камил инсанларын рәһбәрлији арасында неҹә дә бөјүк тәзад олаҹаг! Индики системин рәһбәрләри адәтән гәддар олур вә өз вәтәндашларыны милјонларла инсанларын тәләфинә сәбәб олан мүһарибәләрә тәһрик едирләр. Тәәҹҹүблү дејил ки, Мүгәддәс Јазылар бизә, «гуртара билмәјән бәшәр оғлуна» ҝүвәнмәмәји мәсләһәт ҝөрүр! (Мәз. 146:3). Мәсиһин рәһбәрлији неҹә дә валеһедиҹи олаҹаг! Иса демишдир: «Еј бүтүн јорғунлар вә јүкләри ағыр оланлар, Мәним јаныма ҝәлин вә Мән сизә раһатлыг верәрәм. Бојундуруғуму үзәринизә ҝөтүрүн вә Мәндән өјрәнин; чүнки Мән һәлим вә гәлбдән тәвазөкарам; вә ҹаныныза раһатлыг тапарсыныз. Чүнки бојундуруғум асан вә јүкүм јүнҝүлдүр» (Мат. 11:28-30).
Ахыр ҝүнләр сона јетмәк үзрәдир!
16. Ахыр ҝүнләр неҹә сона чатаҹаг?
16 Индики систем 1914-ҹү илдән етибарән өз сон ҝүнләрини јашајыр (Мат. 24:3). Исанын «бөјүк мәшәггәт» адландырдығы һадисә чох тезликлә баш верәҹәк. (Матта 24:21 ајәсини оху.) Мисли ҝөрүнмәмиш бу мәшәггәт Шејтанын дүнјасыны тамамилә дармадағын едәҹәк. Бәс бөјүк мәшәггәт неҹә башлајаҹаг вә нә илә гуртараҹаг?
17. Мүгәддәс Китабда бөјүк мәшәггәтин башланғыҹы неҹә тәсвир олунур?
17 Бөјүк мәшәггәт гәфләтән башлајаҹаг. Бәли, «Рәббин [Јеһованын] Ҝүнү» ҝөзләнилмәдән, «инсанлар: “Сүлһ вә тәһлүкәсизлик”, — дејәндә» ҝәләҹәк. (1 Салоникилиләрә 5:2, 3 ајәләрини оху.) Габагҹадан дејилмиш мәшәггәт, милләтләр өзләринин бәзи бөјүк проблемләринин һәллинә јахын олдуғуну дүшүнәндә башлајаҹаг. Јалан динин дүнја империјасы олан «Бөјүк Бабил»ин гәфил мәһви дүнја үчүн ҝөзләнилмәз олаҹаг. Бөјүк Бабил үзәриндә һөкм иҹра едиләндә падшаһлары вә башгаларыны тәәҹҹүб бүрүјәҹәк (Вәһј 17:1-6, 18; 18:9, 10, 15, 16, 19).
18. Шејтан Јеһованын халгына һүҹум едәндә Јеһова буна неҹә мүнасибәт ҝөстәрәҹәк?
18 Һәлледиҹи мәгамда «ҝүнәшдә, ајда вә улдузларда әламәтләр олаҹагдыр» вә «Инсан Оғлунун әламәти ҝөјдә ҝөрүнәҹәк». О заман биз ‘јухары баха [биләрик], чүнки гуртулушумуз јахынлашыр’ (Лука 21:25-28; Мат. 24:29, 30). Шејтан, јәни Гог өз ордусуну Аллаһын халгына гаршы чыхараҹаг. Анҹаг Јеһованын Өз садиг хидмәтчиләринә едилән бу һүҹума мүнасибәти һагда Мүгәддәс Китабда дејилир: «Сизә тохунан Онун ҝөз бәбәјинә тохунмуш олур» (Зәк. 2:8). Буна ҝөрә дә Шејтанын онлары мәһв етмәк ҹәһди мүвәффәгијјәтсиз олаҹаг. Нә үчүн? Чүнки Һөкмдар Аллаһ Јеһова хидмәтчиләрини гуртармаг үчүн дәрһал һәрәкәтә кечәҹәк (Јез. 38:9, 18).
19. Нәјә ҝөрә әмин ола биләрик ки, Аллаһын руһани варлыглар ордусу Шејтанын дүнјасыны мәһв едәҹәк?
19 Аллаһ халглара гаршы тәдбир ҝөрәндә онлар Онун Јеһова олдуғуну биләҹәкләр (Јез. 36:23). Аллаһ Шејтан системинин јер үзүндәки галан һиссәсини мәһв етмәк үчүн Мәсиһ Исанын рәһбәрлији алтында чохсајлы руһани варлыглар ордусу ҝөндәрәҹәк (Вәһј 19:11-19). Бир дәфә јалныз бир мәләјин бир ҝеҹәдә Аллаһын дүшмәнләриндән ‘јүз сәксән беш мин нәфәри гырдығыны’ хатырласаг әмин ола биләрик ки, сәмави орду бөјүк мәшәггәтин јүксәк нөгтәси олан Һар-Меҝидонда Шејтанын јер үзүндәки һәр бир галығыны асанлыгла мәһв едәҹәк (2 Пад. 19:35; Вәһј 16:14, 16). Шејтан вә онун ҹинләри мин иллијә дибсиз дәринликләрә атылаҹаг. Ахырда онлар мәһв едиләҹәкләр (Вәһј 20:1-3).
20. Јеһова Падшаһлығы васитәсилә нәләри һәјата кечирәҹәк?
20 Бунунла да јер писликдән тәмизләнәҹәк вә салеһ инсанлар бүтүн дүнјада әбәди јашајаҹаглар. Јеһованын Бөјүк Хиласкар олдуғу бәлли олаҹаг (Мәз. 145:20). Падшаһлығынын васитәсилә О Өз һөкмранлығына бәраәт газандыраҹаг, мүгәддәс исмини тәгдис едәҹәк вә јер үчүн олан мөһтәшәм нијјәтини һәјата кечирәҹәк. Ҝәлин бу хош хәбәри бәјан едәрәк вә ‘әбәди һәјата мејлли оланлара’ (ЈД) Аллаһын Падшаһлығы тәрәфиндән гуртулушун јахын олдуғуну дәрк етмәјә көмәк едәрәк хидмәтимиздән севинҹ дујаг! (Һәв. иш. 13:48).
Јадыныздадырмы?
• Иса Падшаһлығынын ваҹиблијини неҹә вурғулады?
• Нәјә ҝөрә гуртулуша еһтијаҹ һәмишәкиндән даһа бөјүкдүр?
• Бөјүк мәшәггәтдә һансы һадисәләрин олаҹағыны ҝөзләјирик?
• Јеһованын Бөјүк Хиласкар олдуғу нәдән бәлли олаҹаг?
[12 вә 13-ҹү сәһифәләрдәки шәкилләр]
Аллаһын Кәламында бизим ҝүнләрдә бүтүн дүнјада мисилсиз тәблиғ ишинин олаҹағы пејғәмбәрлик едилмишдир
[15-ҹи сәһифәдәки шәкил]
Јеһова Нуһу вә онун аиләсини хилас етдији кими, бизи дә хилас едә биләр
[16-ҹы сәһифәдәки шәкил]
Јеһова «бүтүн јашлары силәҹәкдир. Артыг өлүм мөвҹуд олмајаҹаг» (Вәһј 21:4)