Ҝәнҹләр, гој сизин тәрәггиниз һамыја ашкар олсун

«Бу ишләрә фикир вер вә онларла мәшғул ол ки, сәнин тәрәггин һамыја ашкар олсун» (1 ТИМ. 4:15).

1. Аллаһ ҝәнҹләрә нәји арзулајыр?

«ЕЈ ҜӘНҸ, ҹаванлығында севин, гој үрәјин сәни ҹаванлыг ҝүнләриндә севиндирсин» (Ваиз 11:9). Бу сөзләри гәдим Исраилин мүдрик падшаһы Сүлејман јазмышдыр. Онларын мүәллифи олан Јеһова Аллаһ сиз ҝәнҹләрин нәинки ҝәнҹлик чағларында, еләҹә дә бүтүн һәјатыныз бојунҹа хошбәхт олмағынызы истәјир. Лакин бу дөврдә ҝәнҹләр чох вахт онларын ҝәләҹәк хошбәхтликләринә тәсир едә биләҹәк ҹидди сәһвләрә јол верирләр. Һәтта Аллаһын садиг хидмәтчиси олан Әјјуб ‘ҝәнҹликдә етдији ҝүнаһларына’ ҝөрә дәрин тәәссүф һисси кечирирди (Әјј. 13:26). Јенијетмәлик вә ҝәнҹлијин еркән дөврүндә ҝәнҹ мәсиһчиләр чох вахт ҹидди әрарлар гәбул етмәли олурлар. Сәһв гәрарлар инсана дәрин емосионал јара вура вә бүтүн һәјатына тәсир едә биләҹәк проблемләр јарада биләр (Ваиз 11:10).

2. Ҹидди сәһвләрдән гачынмаг үчүн ҝәнҹләр Мүгәддәс Китабын һансы мәсләһәтинә риајәт етмәлидирләр?

² Ҝәнҹләр сағлам дүшүнҹә тәзаһүр етдирмәлидирләр. Һәвари Павелин Коринфдәки мәсиһчиләрә вердији мәсләһәтә диггәт јетирәк. О јазмышды: «Әглән ушаг олмајын... камил олун» (1 Кор. 14:20). Јеткин инсан кими дүшүнмәк вә мүлаһизә јүрүтмәк габилијјәтинә јијәләнмәк мәсләһәтинә әмәл етмәк ҝәнҹләрә ҹидди сәһвләрдән гачынмаға көмәк едәҹәк.

3. Јеткинлијә неҹә наил ола биләрсән?

³ Ҝәнҹләр, јеткинлијә чатмаг үчүн сәј тәләб олундуғуну унутмајын. Павел Тимотејә демишди: «Гој һеч ким сәнин ҝәнҹлијинә хор бахмасын. Амма сөздә, рәфтарда, мәһәббәтдә, руһда, иманда вә паклыгда иманлылара нүмунә ол. ...Мүгәддәс Јазылары ҹәмијјәтә охумагла, нәсиһәт вә тәлим вермәклә мәшғул ол. [...] Бу ишләрә фикир вер вә онларла мәшғул ол ки, сәнин тәрәггин һамыја ашкар олсун» (1 Тим. 4:12-15). Ҝәнҹ мәсиһчиләр тәрәгги етмәли вә бу, башгаларына ашкар олмалыдыр.

Тәрәгги нәдир?

4. Руһән тәрәгги етмәк өзүнә нәји дахил едир?

⁴ Тәрәгги «инкишаф етмәк, јахшылыға доғру дәјишмәк» демәкдир. Павел Тимотеји сөздә, давранышда, мәһәббәтдә, иманда, паклыгда, һәмчинин хидмәтиндә тәрәгги етмәси үчүн чалышган олмаға тәшвиг едирди. О чалышмалы иди ки, нүмунәви һәјат сүрсүн. Бунун үчүн Тимотејә руһән тәрәгги етмәк ҝәрәк иди.

5, 6. а) Тимотејин тәрәггиси өзүнү нә заман бүрузә верди? б) Мүасир ҝәнҹләр тәрәгги етмәкдә Тимотеји неҹә тәглид едә биләрләр?

⁵ Ерамызын 61-64-ҹү илләриндә Павел бу мәсләһәти јазан заман артыг Тимотеј тәҹрүбәли ағсаггал иди. О, јениҹә руһән тәрәгги етмәјә башламамышды. Ерамызын 49-50-ҹи илләриндә Тимотеј, еһтимал ки, 20 јашларында оланда онун руһани ҹәһәтдән инкишаф етдијини ҝөрән «Листра вә Конјада олан гардашлар Тимотеј һагда јахшы фикирдә идиләр» (Һәв. иш. 16:1-5). Һәмин вахт Павел Тимотеји өзү илә миссионер сәјаһәтинә апарды. Бир нечә ај әрзиндә Тимотејин тәрәггисини мүшаһидә едән Павел ону Салоник шәһәринә ҝөндәрди ки, орадакы мәсиһчиләри мөһкәмләндирсин вә онлара тәсәлли версин. (1 Салоникилиләрә 3:1-3, 6 ајәләрини оху.) Ајдындыр ки, Тимотеј башгаларына ашкар олан тәрәггијә ҝәнҹлик чағларындан башламышды.

⁶ Ҝәнҹләр, руһани кејфијјәтләри индидән инкишаф етдирин ки, тәрәггиниз вә Мүгәддәс Китаб һәгигәтләрини өјрәтмәк баҹарығыныз ајдын ҝөрүнсүн. Артыг 12 јашында оланда Иса «һикмәтдә... тәрәгги едирди» (Лука 2:52). Ҝәлин һәјатын үч саһәсиндә: 1) ҹидди проблемләрлә үзләшәндә, 2) аилә гурмаға һазырлашанда, 3) јахшы хидмәтчи олмаға сәј ҝөстәрәндә тәрәггимизи неҹә ашкар едә биләҹәјимизи нәзәрдән кечирәк (1 Тим. 4:6).

‘Сағламдүшүнҹәли олмагла’ проблемләрә синә ҝәр

7. Ҹидди чәтинликләр ҝәнҹләрә неҹә тәсир едир?

⁷ Он једди јашлы Керолa адлы баҹымыз дејир: «Бәзән емосионал, физики вә әгли ҹәһәтдән о гәдәр јорулурдум ки, сәһәрләр һеч јеримдән галхмаг белә истәмирдим». Ону әлдән салан нә иди? Керолун он јашы оланда валидејнләри бошанды вә о, Мүгәддәс Китабын әхлаг нормаларыны гәбул етмәјән анасы илә јашамалы олду. Ола билсин, сән дә Керол кими јахшылыға доғру дәјишәҹәјинә үмидин аз олдуғу ҝәрҝин вәзијјәтләрлә гаршылашырсан.

8. Тимотеј һансы чәтинликләрлә мүбаризә апармалы олурду?

⁸ Руһән тәрәгги едәркән Тимотеј дә хошаҝәлмәз чәтинликләрлә үзләширди. Мәсәлән, о, тез-тез мәдә ағрыларындан әзијјәт чәкирди (1 Тим. 5:23). Павел бир һәвари кими ону нүфуздан салан инсанларын јаратдығы проблемләри һәлл етмәк үчүн Тимотеји Коринфә ҝөндәрәндә јығынҹағы онунла әмәкдашлыг етмәјә тәшвиг етди ки, онларын јанында «горхусуз олсун» (1 Кор. 4:17; 16:10, 11). Ҝөрүнүр, Тимотеј утанҹаг иди.

9. Сағламдүшүнҹәли олмаг нә демәкдир вә горхаглыг руһу илә онун арасында фәрг нәдән ибарәтдир?

⁹ Бир мүддәт сонра көмәк етмәк мәгсәдилә Павел Тимотејә хатырлатды: «Аллаһ бизә горхаглыг руһу дејил, гүдрәт, мәһәббәт вә нәфсә һаким олмаг [«сағлам дүшүнҹә», ЈД] руһу вермишдир» (2 Тим. 1:7). Сағламдүшүнҹәли олмаг өзүнә дүзҝүн шәкилдә һәм дүшүнмәји, һәм дә мүлаһизә јүрүтмәји дахил едир. Һәмчинин бу, һәр шеји истәдијимиз кими дејил, олдуғу кими гәбул етмәк демәкдир. Руһән јеткин олмајан бәзи ҝәнҹләр чох јатмагла, телевизора бахмагла, наркотик маддәләрә вә ја спиртли ичкиләрә гуршанмагла, даим әјләнҹә мәҹлисләринә ҝетмәклә вә әхлагсызлыгла мәшғул олмагла проблемләри унутмаға чалышараг горхаглыг руһу тәзаһүр етдирирләр. Мүгәддәс Китаб мәсиһчиләри ‘Аллаһа гаршы һөрмәтсизлији вә дүнјәви еһтираслары рәдд едиб, бу дүнјада тәмкинли [«сағламдүшүнҹәли», ЈД], салеһ вә Аллаһ јолуна ујғун бир өмүр сүрмәјә’ тәшвиг едир (Тит. 2:12).

10, 11. Сағлам дүшүнҹә руһән мөһкәм олмагда бизә неҹә көмәк едир?

¹⁰ Мүгәддәс Китаб ҝәнҹләри ‘сағламдүшүнҹәли олмаға’ (ЈД) сәсләјир (Тит. 2:6). Проблемләрин өһдәсиндән ҝәлмәк үчүн Аллаһа дуа едир вә Онун вердији ҝүҹә архаланырсанса, демәли, сән бу мәсләһәтә риајәт едирсән. (1 Петер 4:7 ајәсини оху.) Бунунла да сәнин гәлбиндә ‘Аллаһын тәмин етдији гүввәтә’ гаршы әминлик јаранаҹаг (1 Пет. 4:11).

¹¹ Керола көмәк едән мәһз сағлам дүшүнҹә вә дуа иди. О дејир: «Анамын әхлагсыз һәјат тәрзинә гаршы гәти мөвге тутмаг һәјатда етмәли олдуғум ән чәтин шејләрдән бири иди. Лакин дуа һәгигәтән мәнә көмәк етди. Јеһованын мәнимлә олдуғуну билирәм, буна ҝөрә дә артыг һеч нәдән горхмурам». Унутма ки, чәтинликләр сәни ‘тәмизләјә’ вә мөһкәмләндирә биләр (Мәз. 105:17-19; Мәрс. 3:27). Һансы чәтинликләрлә гаршылашмағындан асылы олмајараг, Аллаһ сәни һеч вахт тәрк етмәјәҹәк. О, ‘сәнә көмәк едәҹәк’ (Јешаја 41:10).

Хошбәхт никаһа һазырлыг

12. Нәјә ҝөрә евләнмәк истәјән мәсиһчи Сүлејманын мәсәлләри 20:25 ајәсиндәки принсипә әмәл етмәлидир?

¹² Бәзи ҝәнҹләр никаһа дахил олмагла бәдбәхтчиликдән, тәнһалыгдан, сыхынтыдан вә евдә олан проблемләрдән јаха гуртараҹагларыны дүшүнәрәк еркән јашларында евләнирләр. Лакин евлилик анды чох ҹидди мәсәләдир. Мүгәддәс Китабын јазылдығы дөврдә бәзиләри дүшүнмәдән вә нәтиҹәләри нәзәрә алмадан анд ичирдиләр. (Сүлејманын мәсәлләри 20:25 ајәсини оху.) Чох вахт ҝәнҹләр евлилијин нә гәдәр ҹидди олдуғуну дәрк етмирләр. Иш-ишдән кечәндән сонра онлар баша дүшүрләр ки, сән демә, никаһа фикирләшдикләриндән даһа чох шеј дахил имиш.

13. Киминләсә ҹидди мүнасибәт гурмаг истәјәнләр өзләринә һансы суаллары вермәлидирләр вә һансы мәсләһәтләр онлар үчүн фајдалы ола биләр?

¹³ Киминләсә ҹидди мүнасибәт гурмаг фикринә дүшмәздән өнҹә өзүндән соруш: «Мән нәјә ҝөрә евләнмәк истәјирәм? Евлиликдән нә ҝөзләјирәм? Бир-биримизә ујғун ҝәлирикми? Аилә мәсулијјәтләринин өһдәсиндән ҝәлә биләҹәјәмми?» «Садиг вә ағыллы гул» өзүмүзү дахилән тәдгиг етмәјимизә көмәк етмәк үчүн бу мөвзуја даир вахташыры олараг мәгаләләр чап едирb (Мат. 24:45-47). Белә мәгаләләри Јеһовадан ҝәлән мәсләһәт кими гәбул ет. Орада јазыланлары диггәтлә арашдыр вә онлары тәтбиг ет. Һеч заман јол вермә ки, «ат јахуд гатыр кими шүурсуз» оласан (Мәз. 32:8, 9). Никаһын нә олдуғуна даир сәнин там анлајышын олмалыдыр. Әҝәр өзүнү ҹидди мүнасибәтләрә һазыр билирсәнсә, онда ‘паклыгда нүмунәви олмағы’ унутма (1 Тим. 4:12).

14. Әҝәр евләнсән, руһани јеткинлик аилә һәјатында сәнә неҹә көмәк едә биләр?

¹⁴ Руһани јеткинлик тојдан сонра да мүвәффәгијјәт ҝәтирир. Јеткин мәсиһчи ‘Мәсиһин долғунлуг гамәтинин өлчүсүнә чатмаға’ чалышыр (Ефес. 4:11-14). О, вар ҝүҹү илә Мәсиһә бәнзәмәјә ҹан атыр. Бизим үчүн нүмунә олан Мәсиһ өз ‘гајғысына галмырды’ (Ром. 15:3). Һәр ики тәрәф өзүнүн дејил, бир-биринин мәнфәәтини ҝүдәрсә, онда аилә сүлһүн вә әмин-аманлығын һөкм сүрдүјү јуваја чевриләҹәк (1 Кор. 10:24). Әр арвадыны фәдакарҹасына севәҹәк, арвад исә, өз нөвбәсиндә, Исанын өз Башына табе олдуғу кими, әринә табе олаҹаг (1 Кор. 11:3; Ефес. 5:25).

«Өз хидмәтини там шәкилдә иҹра ет»

15, 16. Хидмәтдә руһани тәрәггин башгаларына ашкар олсун дејә нә едә биләрсән?

¹⁵ Павел диггәти Тимотејин ваҹиб тапшырығына јөнәлдәрәк деди: «Аллаһын вә... Иса Мәсиһин һүзурунда сәнә анд верирәм: Аллаһын кәламыны тәблиғ ет». Сонра о әлавә етди: «Мүждәчи ишини јеринә јетир, өз хидмәтини там шәкилдә иҹра ет» (2 Тим. 4:1, 2, 5). Тимотеј она һәвалә олунан тапшырығын өһдәсиндән ҝәлмәк үчүн ‘иман сөзләри илә бәсләнмәли’ иди. (1 Тимотејә 4:6 ајәсини оху.)

¹⁶ Сән иман сөзләри илә неҹә бәсләнә биләрсән? Павел јазмышды: «Мүгәддәс Јазылары ҹәмијјәтә охумагла, нәсиһәт вә тәлим вермәклә мәшғул ол. Бу ишләрә фикир вер вә онларла мәшғул ол» (1 Тим. 4:13, 15). Јахшы шәхси өјрәнмә олмадан тәрәгги етмәк гејри-мүмкүндүр. «Мәшғул ол» ифадәси һансыса бир ишин ичиндә олмаг демәкдир. Шәхси өјрәнмәјә нә дәрәҹәдә ҹидди јанашырсан? ‘Аллаһын дәрин дүшүнҹәләринә’ далырсанмы? (1 Кор. 2:10). Јохса сән буна сәтһи јанашырсан? Өјрәндикләринин үзәриндә дүшүнмәк сәни руһән тәрәгги етмәјә тәшвиг едәҹәк. (Сүлејманын мәсәлләри 2:1-5 ајәләрини оху.)

17, 18. а) Сән һансы габилијјәтә јијәләнмәлисән? б) Тимотејин әһвал-руһијјәсинә бәнзәр әһвал-руһијјә инкишаф етдирмәк сәнә хидмәтдә неҹә көмәк едәҹәк?

¹⁷ Мишел адлы ҝәнҹ пионер баҹымыз дејир: «Хидмәтимин сәмәрәли олмасы үчүн өзүмә јахшы шәхси өјрәнмә ҹәдвәли тутмушам вә мүнтәзәм олараг јығынҹаг ҝөрүшләриндә иштирак едирәм. Бунун сајәсиндә даима руһән инкишаф едирәм». Пионер хидмәти тәблиғдә Мүгәддәс Китабдан мәһарәтлә истифадә етмәкдә вә руһани јеткинлијә доғру ирәлиләмәкдә сәнә көмәк едәҹәк. Јахшы мүталиә етмәјә вә ҝөрүшләрдә долғун шәрһләр вермәјә чалыш. Руһани ҹәһәтдән јеткин бир ҝәнҹ кими, сәнә тәјин олунмуш материалдан кәнара чыхмамаг шәртилә Теократик Хидмәт Мәктәбиндә тәдрис нитгләри илә чыхыш етмәлисән.

¹⁸ ‘Мүждәчи ишини јеринә јетирмәк’ хидмәтдә даһа сәмәрәли олмаг вә башгаларынын хилас олмасына көмәк етмәк демәкдир. Бунун үчүн өјрәтмәк баҹарығыны инкишаф етдирмәк тәләб олунур (2 Тим. 4:2). Тимотеј Павелдән чох шеј өјрәндији кими, сән дә тәҹрүбәли тәблиғчиләрлә әмәкдашлыг едәркән онлардан тәлим вермәјин үсулларыны өјрәнәҹәксән (1 Кор. 4:17). Көмәк етдији инсанлары нәзәрдә тутараг Павел деди ки, онлара јалныз хош хәбәри дејил, ‘өз ҹаныны’ белә вермишди, јәни һәјатыны онлара көмәк етмәјә һәср етмишди. Она ҝөрә ки, бу инсанлар Павел үчүн әзиз идиләр (1 Салон. 2:8). Павелин хидмәтә даир вердији нүмунәни тәглид етмәк үчүн сән Тимотејин әһвал-руһијјәсини тәглид етмәлисән: о, нәвазишлә башгаларынын гајғысына галырды вә «Мүждәни јајмаг ишиндә» Павелә ‘хидмәт едирди’. (Филипилиләрә 2:19-23 ајәләрини оху.) Бәс сән хидмәтдә фәдакарлыг руһу тәзаһүр етдирирсәнми?

Тәрәгги әсил мәмнунлуг ҝәтирир

19, 20. Јеткинлијә доғру тәрәгги етмәк нәјә ҝөрә мәмнунлуг ҝәтирир?

¹⁹ Руһани ҹәһәтдән тәрәгги етмәк үчүн сәј тәләб олунур. Лакин әҝәр сәбирлә өјрәтмәк баҹарығыны инкишаф етдирсән, мүәјјән мүддәтдән сонра бир чохларыны руһән ‘зәнҝинләшдирәҹәксән’ вә нәтиҹәдә онлар сәнин ‘севинҹин, јахуд ифтихар едәҹәк таҹын’ олаҹаглар (2 Кор. 6:10; 1 Салон. 2:19). Таммүддәтли хидмәт едән Фред дејир: «Инди башгаларына көмәк етмәјә һәмишәкиндән чох вахт сәрф едирәм. Һәгигәтән дә, вермәк алмагдан даһа чох хошбәхтлик ҝәтирир».

²⁰ Јеткинлијә доғру тәрәгги етмәкдән дујдуғу севинҹ вә мәмнунлуг һаггында ҝәнҹ пионер баҹымыз Дафни дејир: «Јеһованы бир Шәхсијјәт кими таныдыгҹа Онунла мүнасибәтим даһа сых олду. Инсан баҹардығы гәдәр Јеһованы разы салмаға чалышанда әсил мәмнунлуг дујур!» Башгалары сәнин руһән тәрәгги етдијини һәмишә ҝөрмәсәләр дә, Јеһова буну һәмишә ҝөрүр вә гијмәтләндирир (Ибр. 4:13). Шүбһә јохдур ки, сиз ҝәнҹләр сәмави Атамыза һәмд едә вә Ону иззәтләндирә биләрсиниз. Беләликлә, Онун гәлбини севиндирмәјә давам един вә гој сизин тәрәггиниз һамыја ашкар олсун! (Сүл. мәс. 27:11).

[Һашијәләр]

Сиз нә өјрәндиниз?

• Руһани ҹәһәтдән тәрәгги етмәк өзүнә нәји дахил едир?

• Чәтинликләрлә үзләшәндә...

никаһа һазырлашанда...

хидмәтдә...

• тәрәггини башгаларына неҹә ашкар едә биләрсән?

[15-ҹи сәһифәдәки шәкил]

Дуа чәтинликләрә синә ҝәрмәкдә сәнә көмәк едә биләр

[16-ҹы сәһифәдәки шәкил]

Ҝәнҹ тәблиғчиләр тәлим вермәјин еффектив үсулларына неҹә јијәләнә биләрләр?