Бир-биринизә гаршы мәһәббәтиниз олсун
“Әҝәр бир-биринизә гаршы мәһәббәтиниз олса, бундан һәр кәс Мәним шаҝирдләрим олдуғунузу биләҹәк” (ЈӘҺЈА 13:35).
1. Иса өлүмүндән бир аз әввәл һансы кејфијјәтә хүсуси диггәт јетирди?
“ӨВЛАДЛАРЫМ!” (Јәһја 13:33). Иса, өлүмүндән бир ҝүн әввәл ахшам үстү өз шаҝирдләринә бу ҹүр нәвазишлә мүраҹиәт етди. Исанын бундан өнҹә шаҝирдләринә бу ҹүр нәвазишлә мүраҹиәт етмәси һаггында Мүждәдә һеч нә дејилмир. О, бу хүсуси ҝеҹәдә өз давамчыларына олан дәрин мәһәббәтини билдирмәк үчүн бу зәриф сөзү истифадә етди. Үмумијјәтлә, һәмин ҝеҹә Иса тәхминән 30 дәфә мәһәббәтдән сөз етди. Иса бу кејфијјәтә нәјә ҝөрә бу гәдәр диггәт јетирди?
2. Мәһәббәт ҝөстәрмәк мәсиһчиләр үчүн нәјә ҝөрә бу гәдәр ваҹибдир?
2 Иса мәһәббәтин нәјә ҝөрә бу гәдәр ваҹиб олдуғуну изаһ етди. О деди: “Әҝәр бир-биринизә гаршы мәһәббәтиниз олса, бундан һәр кәс Мәним шаҝирдләрим олдуғунузу биләҹәк” (Јәһја 13:35; 15:12, 17). Мәсиһин давамчысы олмагла, гардашлыг мәһәббәти ҝөстәрмәјин арасында сых бағлылыг вар. Исанын һәгиги давамчылары һансыса хүсуси палтар, јахуд ән’әнә илә дејил, бир-бирләринә олан сәмими вә инҹә мәһәббәтлә танынырлар. Әввәлки мәгаләнин башланғыҹында дејилдији кими, бу хүсуси мәһәббәти тәзаһүр етдирмәк, Мәсиһин давамчысы олмаг үчүн лазым олан үч әсас тәләбин икинҹисидир. Бу тәләбә бундан сонра да мүвафиг олмаг үчүн бизә нә көмәк едә биләр?
“Бу јолда даһа чох тәрәгги един”
3. Һәвари Павел мәһәббәтә даир һансы нәсиһәти верди?
3 Бу ҹүр гејри-ади мәһәббәт, биринҹи әсрдә јашамыш мәсиһчиләрин арасында олдуғу кими, мүасир мәсиһчиләрин дә арасында нәзәрә чарпаҹаг дәрәҹәдә ҝөрүнүр. Һәмин илк мәсиһчиләрә һәвари Павел јазырды: “Гардаш мәһәббәтинә ҝәлинҹә, сизә бу барәдә јазмағыма еһтијаҹыныз јохдур; чүнки Аллаһ сизә бир-биринизи севмәји өјрәтмишдир. Әслиндә сиз... гардашларын һамысы илә белә давранырсыныз”. Буна бахмајараг, Павел “бу јолда даһа чох тәрәгги един” дејә, әлавә едир (1 Салониклиләрә 3:12; 4:9, 10). Биз дә Павелин нәсиһәтинә диггәт јетирмәли вә бир-биримизә “даһа чох” мәһәббәт ҝөстәрмәјә чалышмалыјыг.
4. Павелин вә Исанын сөзләринә ҝөрә, биз кимләрә хүсуси диггәт ајырмалыјыг?
4 Аллаһдан илһам алан Павел елә һәмин мәктубунда һәмиманлыларыны ‘ҹәсарәтсизләри руһландырмаға’ вә ‘зәифләрә јардым етмәјә’ тәшвиг едир (1 Салониклиләрә 5:14). Башга мәктубунда о, мәсиһчиләрә хатырладыр ки, “гүввәтлиләр гүввәтсизләрин зәифликләринә дөзмәли”дир (Ромалылара 15:1). Иса да зәифләрә көмәк етмәји бујурмушду. Иса тутулаҹағы ҝеҹә Петерин ону тәрк едәҹәјини габагҹадан билдирдикдән сонра, она деди: “Сән дә бир заман дөнүб өз гардашларына гүввәт вер”. Нәјә ҝөрә? Она ҝөрә ки, онлар да Исаны тәрк едәҹәкләр вә нәтиҹә е’тибары илә көмәјә еһтијаҹ дујаҹаглар (Лука 22:32; Јәһја 21:15-17). Беләликлә, Аллаһын Кәламы бизә руһани ҹәһәтдән зәиф оланлара вә мәсиһчи јығынҹағындан узаглашанлара мәһәббәт ҝөстәрмәји бујурур (Ибраниләрә 12:12). Биз буну нәјә ҝөрә етмәлијик? Ҹавабы Исанын ҝәтирдији ики ајдын мәсәлдән ҝөрүрүк.
Итирилмиш гојун вә итирилмиш дирһәм
5, 6. а) Иса һансы ики гыса мәсәли чәкди? б) Бу мәсәлләр Јеһова һаггында нәји ҝөстәрир?
5 Јолундан сапмыш кәсләрә Јеһованын неҹә јанашдығыны ҝөстәрмәк үчүн, Иса ики гыса мәсәл ҝәтирди. Биринҹиси чобан һаггында иди. Иса деди: “Сизләрдән јүз гојуну олан ким, онлардан бирини итирдији заман, дохсан доггузуну сәһрада бурахараг, итмиш оланы тапынҹаја гәдәр архасынҹа ҝетмәз? Тапдыгда исә, ону севинҹлә чијинләринә гојар вә евә ҝәлдији заман өз достларыны вә гоншуларыны јығыб, дејәр: “Мәним севинҹимә шәрик олун, мән итмиш гојунуму тапдым!” Сизә дејирәм ки, беләҹә дә ҝөјдә, төвбә едән бир ҝүнаһкара ҝөрә, төвбәјә еһтијаҹы олмајан дохсан доггуз салеһ инсан үчүн олдуғундан даһа чох севинҹ олаҹагдыр” (Лука 15:4-7).
6 Икинҹи мәсәл, дирһәмини итирмиш гадын һаггында иди. Иса деди: “Он дирһәми олан һансы гадын бир дирһәм итирсә, чыраг јандырыб, еви сүпүрүб ону тапынҹаја гәдәр ахтармаз? Вә тапдығы заман өз рәфигәләрини вә гоншуларыны јығыб дејәр: “Мәним севинҹимә шәрик олун, мән итирилмиш дирһәми тапдым!” Беләликлә, сизә дејирәм ки, төвбә едән бир ҝүнаһкар үчүн дә Аллаһын мәләкләри һүзурунда севинҹ олур” (Лука 15:8-10).
7. Итирилмиш гојун вә итирилмиш дирһәм мәсәлиндән һансы ики нүмунәни ҝөтүрмәк олар?
7 Бу гыса мәсәлләрдән нә өјрәнирик? Бунлар бизә 1) руһани ҹәһәтдән зәифләјән кәсләрә һансы һиссләрлә јанашмалы вә 2) онлара көмәк етмәк үчүн нә етмәли олдуғумузу ҝөстәрир. Ҝәлин буики нүмунәни әтрафлы нәзәрдән кечирәк.
Итирилмишләр, анҹаг дәјәрлидирләр
8. а) Чобан вә гадын иткиләринә неҹә мүнасибәт ҝөстәрдиләр? б) Онларын өз иткиләринә олан мүнасибәтләри бизә нәји ҝөстәрир?
8 Һәр ики мәсәлдә инсанлар нә исә итирирләр, амма онларын бу иткијә ҝөстәрдикләри мүнасибәтә диггәт јетирәк. Чобан: “99 гојунум олан јердә бир гојун нәдир ки, онсуз да кечинәрәм” демәди. Гадын да: “Бир дирһәм нәдир ки, ондан өтрү нараһат олам? Мәнә доггузу да бәс едәр” дејә дүшүнмәди. Әксинә, чобан јеҝанә имиш кими итирилмиш гојунуну ахтарды. Гадын да башга пулу јох имиш кими тәлаш ичиндә иди. Һәр ики һадисәдә итән шеј саһиби үчүн дәјәрли иди. Бу нәји ҝөстәрир?
9. Чобанын вә гадынын кечирдикләри нараһатчылыг һисси нәји әкс етдирир?
9 Һәр ики мәсәлин сонунда Исанын дедикләринә диггәт јетирәк: “Ҝөјдә, төвбә едән бир ҝүнаһкара ҝөрә... даһа чох севинҹ олаҹагдыр” вә “Беләликлә, сизә дејирәм ки, төвбә едән бир ҝүнаһкар үчүн дә Аллаһын мәләкләри һүзурунда севинҹ олур”. Бунунла, чобанын вә гадынын нараһатчылығы, мүәјјән гәдәр Јеһованын вә Онун сәмави варлыгларынын кечирдикләри һиссләри әкс етдирир. Чобанын вә гадынын итирдикләри онларын ҝөзләриндә дәјәрли олдуғу кими, Аллаһын халгындан узаг дүшән кәсләр дә Јеһованын ҝөзүндә дәјәрли олараг галырлар (Јеремја 31:3). Ола билсин, бу ҹүр инсанлар руһән зәифләјибләр, лакин бу о демәк дејил ки, онлар Аллаһа гаршы үсјан галдырырлар. Һәтта руһән зәифләдикләри һалда белә онлар, еһтимал ки, Јеһованын тәләбләринә мүәјјән дәрәҹәдә мүвафигдирләр (Мәзмур 119:176; Һәвариләрин ишләри 15:29). Буна ҝөрә дә, гәдимдә олдуғу кими, Јеһова онлары “үзү өнүндән” атмаг истәмир (2 Краллар 13:23).
10, 11. а) Јығынҹагдан ајры дүшән кәсләрә неҹә јанашмалыјыг? б) Исанын чәкдији ики мәсәлә әсасән, онларын гејдинә галдығымызы неҹә ифадә едә биләрик?
10 Јеһова вә Иса кими, биз дә руһән зәифләјәнләр вә мәсиһчи јығынҹағындан узаг дүшәнләр үчүн чох нараһат олуруг (Һезекиел 34:16; Лука 19:10). Биз руһән зәифләјән кәсләрдән үмидимизи үзмүрүк, онлар бизим үчүн садәҹә олараг итән кәсләрә бәнзәјирләр. Биз: “Зәифләјән бир кәсдән өтрү нәјә ҝөрә нараһат олаг? Јығынҹаг онсуз да кечинәр”, дејә дүшүнмүрүк. Әксинә, јығынҹагдан ајры дүшән, лакин гајытмаг истәјән кәсләрә, биз дә Јеһованын ҝөзү илә дәјәрли инсанлар кими бахырыг.
11 Бәс онларын гејдинә галдығымызы неҹә ифадә едә биләрик? Исанын чәкдији ики мәсәл ҝөстәрир ки, биз буну 1) тәшәббүс, 2) нәвазиш вә 3) сә’ј ҝөстәрәрәк едә биләрик. Ҝәлин бу үч саһәни ајры-ајрылыгда нәзәрдән кечирәк.
Тәшәббүс ҝөстәрин
12. ‘Итмиш оланын архасынҹа ҝедир’ ифадәси чобанын әһвал-руһијјәси һаггында нә дејир?
12 Биринҹи мәсәлдә Иса дејир ки, чобан ‘итмиш оланын архасынҹа ҝедир’. О, тәшәббүс ҝөстәрир вә дүшүнүлмүш аддымлар атараг итмиш гојуну ахтармаға јола дүшүр. Ону нә чәтинликләр, нә тәһлүкә, нә дә мәсафә сахлајыр. О, гојуну “тапынҹаја гәдәр” ахтармаға давам едир (Лука 15:4).
13. Гәдимдә Аллаһын садиг хидмәтчиләри зәиф оланларын еһтијаҹына неҹә мүнасибәт ҝөстәрирдиләр вә биз онлары неҹә тәглид едә биләрик?
13 Буна бәнзәр шәкилдә, руһландырылмаға еһтијаҹ дујанлара көмәк етмәк үчүн, чох вахт даһа ҝүҹлүнүн тәшәббүс ҝөстәрмәси лазым ҝәлир. Буну Аллаһын гәдимдә јашамыш садиг хидмәтчиләри дә анлајырдылар. Мәсәлән, Саул падшаһын оғлу Јонатан јахын досту Давудун руһландырылмаға еһтијаҹы дујдуғуну ҝөрүб, “галхды вә ормана Давудун јанына ҝетди вә онун әлини Аллаһ илә гүввәтләндирди” (1 Самуел 23:15, 16). Јүзилликләр сонра, һөкмдар Неһемја бә’зи јәһуди гардашларынын зәифләдијини ҝөрдүкдә, ләнҝимәдән “галхыб”, онлары ‘Јеһованы хатырламаға’ тәшвиг етди (Неһемја 4:14). Бу ҝүн биз дә, зәиф оланлары мөһкәмләндирмәк үчүн “галхмалы”, јә’ни тәшәббүс ҝөстәрмәлијик. Бәс бу иши јығынҹагда кимләр ҝөрмәлидир?
14. Мәсиһчи јығынҹағында зәифләрә фәал сурәтдә ким јардым етмәлидир?
14 “Зәиф әлләри гүввәтләндирин вә әсән дизләри мөһкәмләндирин. Үрәкләри горхаг оланлара дејин: Гүввәтләнин, горхмајын”. Бу сөзләр башлыҹа олараг мәсиһчи ағсаггалларына аиддир (Ишаја 35:3, 4; 1 Петер 5:1, 2). Амма Павелин “ҹәсарәтсизләри руһландырын” вә “зәифләрә јардым един” нәсиһәти јалныз ағсаггаллара верилмәмишди. Павел бүтүн “салониклиләрин ҹәмијјәтинә” мүраҹиәт етмишди (1 Салониклиләрә 1:1; 5:14). Беләликлә, мәсиһчиләрин һамысы зәифләрә фәал сурәтдә јардым етмәлидир. Һәр бир мәсиһчи, мәсәлдәки чобан кими, итмиш оланы ахтармаға тәшвиг дујмалыдыр. Әлбәттә ки, ағсаггалларла әмәкдашлығымыз бу саһәдә даһа чох фајда ҝәтирәҹәкдир. Јығынҹагда руһани ҹәһәтдән зәифләјәнләрә сән дә јардым едә биләрсәнми?
Нәвазиш ҝөстәрин
15. Нәјә ҝөрә, еһтимал ки, чобан гојуну чијинләринә гојур?
15 Нәһајәтдә итмиш гојунуну тапан чобан нә едәҹәкдир? ‘Ону чијинләринә гојаҹагдыр’ (Лука 15:5). Неҹә дә тә’сирли вә ајдын тәфсилатдыр! Гојун, ола билсин, бир нечә ҝүн намә’лум јерләрдә ҝәзиб долашмыш вә еһтимал ки, һәтта асланларын һүҹуму кими тәһлүкәјә мә’руз галмышдыр (Ејуб 38:39, 40). Аҹ галдығындан зәифләдијинә шүбһә јохдур. Сүрүјә гајытмаг үчүн, тәкбашына чәтинликләрә таб ҝәтирмәјә ҝүҹү галмамышдыр. Буна ҝөрә дә, чобан әјилир, гојуну нәвазишлә галдырыр вә чәтинликләри гәт едәрәк ону сүрүјә гајтарыр. Чобанын бу ҹүр гајғыкешлијини биз неҹә тәглид едә биләрик?
16. Биз чобанын итмиш гојуна ҝөстәрдији нәвазиши нәјә ҝөрә тәглид етмәлијик?
16 Јығынҹагдан узаглашан инсан, еһтимал ки, руһани ҹәһәтдән зәифләмишдир. Чобандан узаглашан гојун кими, ола билсин, о да дүшмәнчиликлә долу дүнјада әбәс јерә долашмышдыр. Мәсиһчи јығынҹағынын вердији мүһафизәдән мәһрум олараг, “нә’рә чәкән вә ашырмаг үчүн кимисә ахтаран аслан кими” ҝәзән Иблисин һүҹумлары гаршысында һәмишәкиндән даһа чох мүдафиәсиз олмушдур (1 Петер 5:8). Бундан әлавә, о, руһани гиданын чатышмазлығындан зәифләмишдир. Буна ҝөрә дә, ајдын мәсәләдир ки, јығынҹаға гајытмаг үчүн гаршысындакы чәтинликләри тәкбашына гәт етмәјә ҝүҹү чатмајаҹагдыр. Бу сәбәбдән, мәҹази мә’нада десәк, биз әјилмәли, зәиф инсаны нәвазишлә галдырмалы вә ону ҝери ҝәтирмәлијик (Галатијалылара 6:2). Биз буну неҹә едә биләрик?
17. Зәифләмиш мәсиһчини зијарәт едәркән, һәвари Павели неҹә тәглид едә биләрик?
17 Һәвари Павел дејирди: “Ким зәиф дејил ки, мән зәиф олмајым?” (2 Коринфлиләрә 11:29; 1 Коринфлиләрә 9:22). Павел инсанлара, о ҹүмләдән зәифләрә шәфгәт ҝөстәрирди. Зәифләјән кәсләрә биз дә шәфгәт ҝөстәрмәлијик. Руһән зәифләмиш мәсиһчини зијарәт едәркән, онун Јеһованын ҝөзүндә дәјәрли олдуғуна вә башга Шаһидләрин дә ону ҝөзләдијинә әмин един (1 Салониклиләрә 2:17). Она билдирин ки, һәмиманлылары она көмәк етмәјә һазырдырлар вә ‘дар ҝүндә’ онун үчүн гардаш олмаг истәјириләр (Сүлејманын мәсәлләри 17:17, МКШ; Мәзмур 34:18). Сәмими сөзләримиз ону јаваш-јаваш үрәкләндирәрәк јығынҹаға гајытмасына көмәк едә биләр. Бәс даһа сонра нә етмәк олар? Гадын вә итирилмиш дирһәм һаггындакы мәсәл, бу саһәдә бизә рәһбәрлик верир.
Сә’ј ҝөстәрин
18. а) Мәсәлдәки гадын вәзијјәти нәјә ҝөрә үмидсиз санмыр? б) Гадын һансы ҹидди сә’ји ҝөстәрир вә бунун нәтиҹәси нә олур?
18 Дирһәмини итирмиш гадын вәзијјәтин чәтин, лакин үмидсиз олмадығыны баша дүшүр. Әҝәр дирһәм тикан басмыш ҝениш тарлаја вә ја буланыг дәрин ҝөлә дүшсәјди, еһтимал ки, гадын ону ахтармагдан ваз кечәрди. Лакин дирһәмин евдә, әлчатан јердә олдуғуну биләрәк, диггәтлә вә сә’јлә ахтармаға башлајыр (Лука 15:8). Гадын әввәлҹә чырағы јандырыр. Сонра дирһәмин ҹинҝилтисини ешитмәк үмиди илә дөшәмәни сүпүрмәјә башлајыр. Сонунда, чырағын ишығында ҝүмушүн парылтысы нәзәринә чарпынҹаја гәдәр сә’јлә евин күнҹләрини ахтарыр. Гадынын ҝөстәрдији ҹидди сә’ј мүкафатланыр!
19. Зәифләрә көмәк етмәјә даир, итирилмиш дирһәм мәсәлиндәки гадындан нә өјрәнирик?
19 Мәсәлдәки бу тәфәррүат бизә ону хатырладыр ки, Мүгәддәс Јазыларын үзәримизә гојдуғу мәс’улијјәти јеринә јетирмәјә, јә’ни зәифләрә јардым етмәјә ҝүҹүмүз чатар. Ејни заманда бу ишин сә’ј тәләб етдијини дә анлајырыг. Мәсәлән, һәвари Павел Ефес шәһәриндән олан ағсаггаллара демишди: “Бу ҹүр зәһмәт чәкәрәк, зәифләрә јардым етмәк... ҝәрәкдир” (Һәвариләрин ишләри 20:35а). Унутмајаг ки, гадын дирһәми ара-сыра ахтармырды. О, “тапынҹаја гәдәр” мәгсәдјөнлү ахтарды. Буна бәнзәр шәкилдә биз дә, руһән зәифләмиш инсана көмәк етдикдә сә’јлә вә мәгсәдјөнлү шәкилдә чалышмалыјыг. Буну неҹә едә биләрик?
20. Зәифләрә јардым етмәк үчүн нә етмәк олар?
20 Руһән зәифләјән инсана иманыны мөһкәмләндирмәкдә вә миннәтдарлыг һиссини артырмагда неҹә көмәк етмәк олар? Ола билсин, Мүгәддәс Јазылара әсасланан мүвафиг нәшрләрин васитәсилә Мүгәддәс Китабы өјрәнмәк лазымдыр. Һәгигәтән дә зәифләмиш инсанла Мүгәддәс Китабы өјрәнмәк она ардыҹыл вә әсаслы сурәтдә көмәк етмәјә имкан јарадыр. Еһтимал ки, хидмәти көмәкчи бу иш үчүн кимин даһа мүвафиг олдуғуну мүәјјән едә биләр. О, һансы мөвзулары вә һансы нәшри өјрәнмәјин даһа фајдалы олаҹағыны дејә биләр. Ишини јеринә јетирмәк үчүн мәсәлдәки гадынын мүвафиг аләтләри олдуғу кими, Аллаһын, зәифләрә көмәк етмәк кими үзәримизә гојдуғу мәс’улијјәти јеринә јетирмәк үчүн бизим дә мүвафиг вәсаитләримиз вар. Јени ики нәшримиз бу саһәдә хүсусилә фајдалы олаҹагдыр. Бунлар “Јеҝанә һәгиги Аллаһа ибадәт един” вә “Јеһоваја јахынлаш” китабларыдырa.
21. Зәифләрә јардым неҹә һамымыза хејир-дуа ҝәтирир?
21 Зәифләрә јардым етмәк һамыја хејир-дуа ҝәтирир. Көмәк алан кәс әсл достлара говушдуғу үчүн севинҹ һисси дујур. Биз исә бу ан јалныз вермәкдән дујулан севинҹ һиссини дадырыг (Лука 15:6, 9; Һәвариләрин ишләри 20:35б). Јығынҹағын һәр бир үзвү башгаларына сидги-үрәкдән гајғы ҝөстәрәндә, јығынҹаг үмумиликдә мәһәббәтдә бөјүјүр. Ән башлыҹасы исә, гајғыкеш Чобанларымыз олан Јеһова вә Исаја иззәт ҝәтиририк, белә ки, онлар кими биз дә зәифләрә јардым етмәк арзусундајыг (Мәзмур 72:12-14; Матта 11:28-30; 1 Коринфлиләрә 11:1; Ефеслиләрә 5:1). Бунлар, бир-биримизә гаршы бундан сонра да мәһәббәтимиз олсун дејә чалышмаг үчүн әсаслы амилләрдир!
[Һашијә]
a Јеһованын Шаһидләри тәрәфиндән нәшр едилиб.
Изаһ едә биләрсинизми?
• Нәјә ҝөрә һәр биримиз мәһәббәт ҝөстәрмәлијик?
• Нәјә ҝөрә зәифләрә дә мәһәббәт ҝөстәрмәлијик?
• Итирилимиш гојун вә итирилмиш дирһәм һаггындакы мәсәлдән нә өјрәнирик?
• Зәифләјән кәсләрә әмәлдә неҹә јардым едә биләрик?
[24 вә 25-ҹи сәһифәләрдәки шәкилләр]
Зәифләрә көмәк едәрәк биз тәшәббүс, нәвазиш вә сә’ј ҝөстәририк.
[24 вә 25-ҹи сәһифәләрдәки шәкилләр]
Зәифләрә јардым етмәк һамымыза хејир-дуа ҝәтирир.