Унутма, вахт ҝөзләмир!
«Аллаһын сөзүнү тәблиғ ет, бу иши јубанмадан... ҝөр» (2 ТИМ. 4:2).
ИЗАҺ ЕДӘ БИЛӘРСӘНМИ?
Еркән мәсиһчиләрин јубанмадан тәблиғ етмәләринин сәбәби нә иди?
Хидмәтимизин тәхирәсалынмаз олдуғуну унутмамаг үчүн нә етмәлијик?
Нәјә ҝөрә Падшаһлыг һаггында тәблиғ етмәк инди һәмишәкиндән даһа тәҹилидир?
1, 2. «Јубанмадан» тәблиғ етмәк барәдә һансы суаллар ортаја чыхыр?
ПЕШӘЛӘРИ һәјатлары хилас етмәклә бағлы олан адамлар өз ишләрини, адәтән, тәхирә салмадан иҹра едирләр. Мәсәлән, јанғынсөндүрәнләр зәнҝ ҝәлән кими, өзләрини јубанмадан һадисә јеринә чатдырырлар; онлар баша дүшүрләр ки, бу, өлүм-дирим мәсәләсидир.
2 Биз, Јеһованын Шаһидләри, инсанларын хилас олмаларыны истәјирик. Буна ҝөрә дә Падшаһлыг һагда хош хәбәри бәјан етмәк тапшырығына ҹидди јанашырыг. Дүздүр, бизә, јанғынсөндүрәнләр кими, јеримиздән дәрһал сычрајыб һараса гачмаг лазым ҝәлмир. Бәс онда Павел: «Аллаһын сөзүнү тәблиғ ет, бу иши јубанмадан... ҝөр», — нәсиһәти верәндә нәји нәзәрдә тутурду? (2 Тим. 4:2). Биз јубанмадан неҹә тәблиғ едә биләрик? Нәјә ҝөрә бизим ишимиз бу гәдәр тәҹилидир?
НӘЈӘ ҜӨРӘ ТӘБЛИҒ ИШИ БУ ГӘДӘР ТӘҸИЛИДИР?
3. Инсанларын хош хәбәрә һај вермәләри вә ја ону рәдд етмәләри нә илә нәтиҹәләнә биләр?
3 Тәблиғ ишинин инсанларын һәјатыны неҹә хилас етдији барәдә дүшүнәндә, јәгин ки, хош хәбәри онлара чатдырмағын ваҹиб олдуғуну дәрк едирсән (Ром. 10:13, 14). Аллаһын Кәламында дејилир: «Пис адама “әлбәттә, өләҹәксән” дедијим заман ҝүнаһындан дөнүб әдаләтли вә салеһ ишләр ҝөрәрсә... әлбәттә, өлмәјиб јашајаҹаг. Бу адамын етдији ҝүнаһлардан һеч бири онун әлејһинә јада салынмајаҹаг» (Јез. 33:14—16). Мүгәддәс Китаб хош хәбәри тәблиғ едәнләрә мүраҹиәт едир: «Һәм өзүнү, һәм дә сәнә гулаг асанлары хилас едәҹәксән» (1 Тим. 4:16; Јез. 3:17—21).
4. Нәјә ҝөрә биринҹи әсрдә дөнүклүк баш галдырмамышдан өнҹә тәблиғ етмәк олдугҹа ваҹиб иди?
4 Павелин нәјә ҝөрә Тимотеји јубанмадан тәблиғ етмәјә тәшвиг етдијини баша дүшмәк үчүн биз бу мәгаләнин әсас ајәсинин контекстинә нәзәр салмалыјыг. Биз охујуруг: «Аллаһын сөзүнү тәблиғ ет, бу иши јубанмадан, һәм сабит, һәм дә ҝәрҝин вахтда ҝөр, бүтүн сәбрини вә тәлим вермәк габилијјәтини топлајараг тәнбеһ ет, мәзәммәт ет, үрәкләндир. Чүнки елә бир зәманә ҝәләҹәк ки, инсанлар сағлам тәлимдән имтина едәҹәк, гулагларына хош ҝәләни ешитмәк үчүн өз истәкләринә ујғун мүәллим сечәҹәкләр. Онлар һәгигәтә гулаг асмајаҹаг[лар]» (2 Тим. 4:2—4). Иса габагҹадан демишди ки, дөнүклүк баш галдыраҹаг (Мат. 13:24, 25, 38). Бу сәбәбдән һәмин вахт ҝәлиб чатмамыш Тимотеј «Аллаһын сөзүнү» һәтта јығынҹағын ичиндә тәблиғ етмәли иди ки, мәсиһчиләр ҹәлбедиҹи јалан тәлимләрә алданараг јолларыны азмасынлар. Чүнки сөһбәт инсанларын һәјатындан ҝедирди. Бәс бизим ҝүнләр барәдә нә демәк олар?
5, 6. Сизин әразиниздә ҝениш јајылан фикир вә ја тәлимләр һансылардыр?
5 Бизим ҝүнләрдә дөнүклүк даһа чох јајылыб (2 Салон. 2:3, 8). Бу ҝүн инсанларын гулагларына хош ҝәлән тәлимләр һансылардыр? Мәсәлән, бу, бир чох јерләрдә дини чаларларла тәблиғ едилән тәкамүл нәзәријјәсидир. Бу нәзәријјә, адәтән, елми дилдә тәгдим олунса да, демәк олар ки, дүнјәви динә чеврилиб вә инсанларын Аллаһа вә бир-бирләринә олан мүнасибәтләринә тәсир едир. Диҝәр мәшһур тәлим исә одур ки, ҝуја Аллаһ инсанларла марагланмыр вә буна ҝөрә бизим Онунла марагланмағымыза һеч бир сәбәб јохдур. Нәјә ҝөрә милјонларла инсанлары руһани јухуја гәрг едән бу тәлимләр олдугҹа ҹәлбедиҹидир? Чүнки онларын әсасында бу фикир дурур: «Үрәјин истәдијини ет, онсуз да һеч кәс сәни мәсулијјәтә ҹәлб етмәјәҹәк». Һәгигәтән дә, бунлар чохларынын ешитмәк вә инанмаг истәдији тәлимләрдир. (Мәзмур 10:4 ајәсини оху.)
6 нсанларын гулагларына хош олан тәлимләр јалныз бунлар дејил. Бу ҝүн һәлә дә килсәјә ҝедәнләрин бәзиләри истәјирләр ки, онларын: «Нә едирсән ет, Аллаһ онсуз да сәни севир», — дејән мүәллимләри олсун. Кешишләр вә диҝәр дин хадимләри инсанлары инандырыблар ки, дини ајинләр, мессалар, оруҹ вә дини рәмзләрә ибадәт онлара Аллаһын хејир-дуасыны газандырыр. Бунунла онлар инсанларын гулагларына хош ҝәлән шејләри сөјләјирләр. Онлара гулаг асанлар нә гәдәр тәһлүкәли вәзијјәтдә олдугларыны һеч ағылларына белә ҝәтирмирләр (Мәз. 115:4—8). Әҝәр биз онлары руһани јухудан ојадыб әсил Мүгәддәс Китаб һәгигәтләрини баша дүшмәјә көмәк етсәк, онлар да Аллаһын Падшаһлығынын ҝәтирәҹәји хејир-дуалары дадаҹаглар.
ЈУБАНМАДАН ТӘБЛИҒ ЕТМӘК НӘ ДЕМӘКДИР?
7. Хидмәтин тәхирәсалынмаз олдуғуну дәрк етдијимизи неҹә ҝөстәрә биләрик?
7 Виҹданлы ҹәрраһ бүтүн диггәтини ишинә ҹәмләмәлидир. Ахы хәстәнин һәјаты онун әлиндәдир. Биз мәсиһчиләрин алдығымыз тапшырығын тәхирәсалынмаз олдуғуну дәрк етмәси диггәтимизи она ҹәмләмәкдә, јәни гаршылашдығымыз инсанлара һансы мөвзуларын, суалларын вә мәлуматларын мараглы олаҹағы барәдә дүшүнмәкдә өзүнү бүрузә верир. Хидмәтимизин тәхирәсалынмаз олдуғуну дәрк етмәјимиз һәмчинин бизи тәшвиг едәҹәк ки, ҹәдвәлимиздә дәјишикликләр едәк вә инсанлара онларын бизә даһа чох гулаг асмаға мејилли олдуглары вахтда баш чәкәк (Ром. 1:15, 16; 1 Тим. 4:16).
8. Јубанмадан һәрәкәтә кечмәк, адәтән, өзүнә нәји дахил едир?
8 Хидмәтин тәхирәсалынмаз олдуғуну дәрк етмәк һәм дә ишләри ваҹиблијинә ҝөрә сыраламаг демәкдир. (Јарадылыш 19:15 ајәсини оху.) Белә бир вәзијјәти тәсәввүр ет: анализин ҹавабыны аландан сонра һәким сәни өз отағына дәвәт едиб ҹидди шәкилдә дејир: «Вәзијјәтин чох ағырдыр. Һөкмән бир ај әрзиндә хәстәлијинә чарә гылмалысан». Јәгин ки, сән һәјәҹан сигналы ҝәлән кими һадисә јеринә тәләсән јанғынсөндүрәндән фәргли олараг, дәрһал јериндән сычрајыб отағы тәрк етмәздин. Әксинә, һәкимин мәсләһәтләринә диггәтлә гулаг асандан сонра евә ҝедиб ҹидди шәкилдә һансы ишин сәнин үчүн даһа ваҹиб олдуғуну ҝөтүр-гој едәрдин.
9. Нәјә ҝөрә демәк олар ки, Павел Ефесдә оларкән тәблиғ ишини һеч вахт тәхирә салмырды?
9 Павелин хидмәтин тәхирәсалынмаз олдуғуну дәрк етдији онун Ефес ағсаггалларына Асија әјаләтиндә хош хәбәри тәблиғ етмәси барәдә дедији сөзләрдән ҝөрүнүр. Биз бундан өзүмүзә ибрәт дәрси ҝөтүрә биләрик. (Һәвариләрин ишләри 20:18—21 ајәләрини оху.) О, шәһәрә ајаг басдығы илк ҝүндән етибарән евдән-евә тәблиғ едәрәк инсанлара хош хәбәри чатдырырды. Үстәлик, о, ики ил әрзиндә «һәр ҝүн Тираннын мәктәбиндә мәрузәләрлә чыхыш [едирди]» (Һәв. иш. 19:1, 8—10). Диггәт јетирдијимиз кими, Павелин хидмәтин тәҹили олдуғуну дәрк етдији онун ҹәдвәлиндән ҝөрүнүрдү. «Бу иши јубанмадан... ҝөр» чағырышы һеч дә бизи һәддән артыг јүкләмәк мәгсәдилә дејилмәмишди. Бунунла белә, тәблиғ хидмәти һәјатымызда биринҹи јердә дурмалыдыр.
10. Нәјә ҝөрә биз севинмәлијик ки, тәхминән 100 ил бундан әввәл Мүгәддәс Китаб Тәдгигатчылары хош хәбәри тәхирә салмадан тәблиғ едибләр?
10 1914-ҹү илдән әввәл кичик груп олан вә тәблиғ фәалијјәтинә башлајан Мүгәддәс Китаб Тәдгигатчыларынын нүмунәсиндән ҝөрүрүк ки, хидмәтин тәхирәсалынмаз олдуғуну дәрк етмәк нә демәкдир. Гардашларын сајы бир нечә мин олса да, онлар һансы вахтда јашадыгларыны анлајырдылар вә ҹанла-башла Аллаһын Падшаһлығы барәдә тәблиғ едирдиләр. Бу гардашлар јүзләрлә гәзетләрдә моизәләр чап етмәклә јанашы, рәнҝли слајд вә кинокадрлардан ибарәт «Јарадылыш фотодрамы»ны нүмајиш етдирирдиләр. Бу үсулларын сајәсиндә милјонларла инсанлар хош хәбәри ешитдиләр. Әҝәр онлар өз ишләрини тәхирә салмадан ҝөрмәсәјдиләр, биз дә дахил олмагла, бу ҝүн хош хәбәри нә гәдәр инсан ешидәрди? (Мәзмур 119:60 ајәсини оху.)
ХИДМӘТИН ТӘХИРӘСАЛЫНМАЗ ОЛДУҒУНУ ҺЕЧ ВАХТ УНУТМА
11. Бәзи мәсиһчиләрин хидмәтин тәхирәсалынмаз олдуғуну унутмаларына нә сәбәб олмушду?
11 Диггәти јајындыран шејләр инсана тәблиғ фәалијјәтинин ваҹиб олдуғуну унутдура биләр. Шејтан өз системини елә гуруб ки, башымыз тамамилә шәхси мәгсәдләримизә вә ваҹиб олмајан ишләрә гарышсын (1 Пет. 5:8; 1 Јәһ. 2:15—17). Јеһоваја хидмәти вахтилә һәјатларында биринҹи јерә гојанлар инди онун нә гәдәр ваҹиб олдуғуну унудублар. Мәсәлән, биринҹи әсрдә јашајан Димас адында мәсиһчи вахтилә Павелин әмәкдашларындан бири иди. Лакин сонра аллаһсыз дүнја онун диггәтини јајындырды. Руһани гардашы олан Павели дар ҝүнүндә мөһкәмләндирмәјә давам етмәк әвәзинә, Димас ону тәрк едиб өз ишинин далынҹа ҝетди (Филим. 23, 24; 2 Тим. 4:10).
12. Инди һансы имканымыз вар вә ҝәләҹәкдә бизим әбәди олараг һансы имканларымыз олаҹаг?
12 Бу дүнја онун тәклиф етдији имканлардан бизим даһа чох јарарланмағымызы истәјир. Лакин тапшырығымызын тәхирәсалынмаз олдуғуну унутмамаг үчүн Шејтанын тәблиғатына ујмамалыјыг. Биз вар ҝүҹүмүзлә «әсил һәјатдан бәрк-бәрк [јапышмаға]» чалышмалыјыг (1 Тим. 6:18, 19). Јәгин сән, шүбһә етмирсән ки, Аллаһын Падшаһлығы јери идарә едәндә севимли мәшғулијјәтләримизә истәдијимиз гәдәр вахт ајыра биләҹәјик. Анҹаг инсанлара Һар-Маҝедондан сағ чыхмаға көмәк етмәк имканы бир даһа олмајаҹаг.
13. Мәсиһчи оландан сонра биз тапшырығымызын тәхирәсалынмаз олдуғуну унутмамаг үчүн нә етмәлијик?
13 Дүнјадакы әксәр инсанларын ағылсызҹасына руһани мәнада јатдығыны нәзәрә алсаг, биз тапшырылан ишин тәҹили олдуғуну унутмамаг үчүн нә етмәлијик? Бир вахтлар өзүмүзүн дә руһани зүлмәтдә јатдығымызы јада салмалыјыг. Лакин бизи ојатдылар вә Павелин јаздығы кими, Мәсиһ үзәримизә нур сачды. Инди биз нур дашыјыҹылары олмаг шәрәфинә лајиг ҝөрүлмүшүк. (Ефеслиләрә 5:14 ајәсини оху.) Павел буну гејд етдикдән сонра белә бир мәсләһәт верди: «Диггәтли олун, дүшүнҹәсизләр кими јох, мүдрикләр кими һәрәкәт един вә пис зәманәдә јашадығымызы нәзәрә алараг, вахтынызын гәдрини билин» (Ефес. 5:15, 16). Бу гәдәр писликләрин арасында ҝәлин бизә руһән ојаг галмаға көмәк едән ишләр үчүн вахт ајыраг.
БИЗ ЧОХ МҮҺҮМ БИР ЗӘМАНӘДӘ ЈАШАЈЫРЫГ
14-16. Инди Падшаһлыг һагда тәблиғ етмәји даһа да тәҹили едән нәдир?
14 Һәр заман тәхирәсалынмаз олан мәсиһчи хидмәти бу ҝүн һәмишәкиндән даһа ваҹибдир. Аллаһын Кәламында тәсвир олунан ахыр ҝүнләрин әламәти 1914-ҹү илдән бәри даһа ајдын нәзәрә чарпыр (Мат. 24:3—51). Бәшәријјәтин мөвҹудлуғу һәлә һеч вахт бу дәрәҹәдә тәһлүкә алтында олмамышды. Бу јахынларда әлдә едилән разылашмалара бахмајараг, һәлә дә дүнјанын апарыҹы дөвләтләринин арсеналында дөјүшә һазыр вәзијјәтдә сахланылан 2000-ә јахын нүвә башлығы вар. Нүвә силаһларынын «итмәси» барәдә һөкумәт нүмајәндәләри тәрәфиндән јүзләрлә мәлуматын дахил олдуғу билдирилир. Ҝөрәсән, бу силаһларын бәзиләри террористләрин әлинә кечмәјиб ки? Мүшаһидәчиләр гејд едирләр ки, террористләрин башладығы мүһарибә нәтиҹәсиндә инсан нәсли асанлыгла кәсилә биләр. Лакин мүһарибә бәшәријјәтин мөвҹудлуғуну тәһлүкәјә атан јеҝанә амил дејил.
15 «Иглим дәјишиклији 21-ҹи әсрдә бәшәријјәтин сағламлығы үчүн тәһлүкә јарадан ән бөјүк проблемдир», — дејә 2009-ҹу илдә «Лансет» журналы вә Лондон Университет Коллеҹи бәјан етмишдир. Һәмин һесабатда дејилирди: «Иглим дәјишиклијинин фәсадлары нөвбәти онилликләрдә јер үзүнүн әксәр сакинләринин сәһһәтинә өз тәсирини ҝөстәрәҹәк вә милјардларла инсанларын һәјаты вә фираванлығыны тәһлүкәјә атаҹаг». Иглим дәјишиклијинин фәсады дејилдикдә океанда сујун сәвијјәсинин галхмасы, гураглыг, дашгынлар, епидемијалар, гасырғалар вә түкәнмәк үзрә олан тәбии ресурслар үзәриндә ҝедән мүһарибәләр нәтиҹәсиндә бүтүн дүнјада баш верә биләҹәк дағынтылар нәзәрдә тутулур. Бәли, мүһарибә вә тәбии фәлакәтләр сивилизасијаны тәһлүкә алтына атыр.
16 Бәзи инсанлар дүшүнүрләр ки, нүвә мүһарибәси тәһлүкәси «әламәти»н јеринә јетмәсинә тәкан верәҹәк һадисәләрә ҝәтириб чыхардаҹаг. Лакин әксәр инсанлар бу әламәтин әсил мәнасыны баша дүшмүр. Әслиндә, узун мүддәтдир ки, ајдын ҝөрүнән бу әламәт Мәсиһин иштиракынын реал олдуғуна вә бу системин өз сонуна сүрәтлә јахынлашдығына ишарә едир (Мат. 24:3). Әламәти тәшкил едән һадисәләр һәлә бу дәрәҹәдә габарыг шәкилдә өзүнү бүрузә вермәмишди. Инсанларын руһани јухудан ојанмаларынын вахты ҝәлиб чатыб. Бизим хидмәтимиз онлара ојанмаға көмәк едә биләр.
17, 18. а) Сон ҝүнләрдә јашамағымыз бизә неҹә тәсир едир? б) Инсанлары Падшаһлыг һагда хош хәбәрә мүнасибәтини дәјишмәјә нә тәшвиг едә биләр?
17 Јеһоваја олан мәһәббәтимизи сүбут етмәјә вә сон ҝүнләр үчүн нәзәрдә тутулан тәблиғ ишини јекунлашдырмаға аз вахт галыб. Павелин биринҹи әсрдә Ромадакы мәсиһчиләрә дедији сөзләр бизим үчүн даһа актуалдыр: «Һансы зәманәдә јашадығымызы вә артыг јухудан ојанмағын вахты ҝәлдијини билирсиниз. Һал-һазырда хиласымыз, имана ҝәлдијимиз вахтда олдуғундан даһа јахындыр» (Ром. 13:11).
18 Бу сон ҝүнләрдә баш верән һадисәләр бәзиләрини руһани тәләбатлары барәдә дүшүнмәјә вадар едир. Диҝәрләри инсан һөкумәтләринин игтисади чәтинликләрин, нүвә тәһлүкәсинин, ҹинајәткарлығын вә әтраф мүһитин чиркләнмәсинин гаршысыны ала билмәдикләри һагда дүшүнәндә бәшәријјәтин көмәјә еһтијаҹы олдуғу гәнаәтинә ҝәлирләр. Башгаларыны исә руһани тәләбатлары барәдә дүшүнмәјә тәшвиг едән аиләләриндәки һадисәләр, мәсәлән, хәстәлик, бошанма вә ја әзиз адамларындан киминсә өлүмү ола биләр. Биз хидмәтдә иштирак етдијимиз тәгдирдә белә инсанлара көмәк едә биләрик.
ҺӘРӘКӘТӘ КЕЧӘНЛӘР
19, 20. Хидмәтин тәхирәсалынмаз олмасы бир чох мәсиһчиләри һәјатларында һансы дәјишикликләри етмәјә тәшвиг едиб?
19 Бир чох мәсиһчиләр хидмәтин тәхирәсалынмаз олдуғуну дәрк едиб тәблиғдә даһа чох иштирак етмәјә башлајырлар. Мәсәлән, Еквадордан олан бир ҝәнҹ ҹүтлүк 2006-ҹы илдә кечирилән «Ҝөзүнүзү сағлам сахлајын» адлы бирҝүнлүк конгресдән сонра һәјатыны садәләшдирмәк гәрарына ҝәлди. Онлар лазымсыз әшјалардан ибарәт олан сијаһы тәртиб етдиләр вә үч ајын ичиндә бөјүк мәнзилдән кичик мәнзилә көчдүләр, әшјаларынын бәзиләрини сатдылар вә борҹларыны өдәдиләр. Тезликлә онлар көмәкчи пионер кими хидмәт етмәјә башладылар вә рајон нәзарәтчисинин тәклифи илә тәләбат олан јығынҹаға кечдиләр.
20 Шимали Америкадан олан гардаш исә јазыр: «Мән вә һәјат јолдашым 2006-ҹы илдә кечирилән рајон конгресиндә иштирак едәндә вәфтиз олмағымыздан 30 ил кечмишди. Конгресдән машынла евә гајыданда һәјаты садәләшдирмәк барәдә верилән мәсләһәтләри неҹә тәтбиг едә биләҹәјимизи јол боју мүзакирә етдик (Мат. 6:19—22). Бизим үч евимиз, торпаг саһәмиз, баһалы машынларымыз, гајығымыз вә фургон евимиз вар иди. Өзүмүзү лап ағылсыз мәсиһчиләр кими һисс едирдик. Биз гәрара ҝәлдик ки, таммүддәтли хидмәтә ҹан атаг. 2008-ҹи илдә биз дә, гызымыз кими, даими пионер олдуг. Һәмиманлыларымызла сых әмәкдашлыг етмәк неҹә дә севиндириҹидир! Биз тәләбат олан әразиләрдә хидмәт едирдик. Бундан әлавә, Јеһоваја даһа чох хидмәт етмәк бизи Она даһа да јахынлашдырыр. Хүсусилә дә инсанлар Аллаһын Кәламындакы һәгигәти ешидиб ону баша дүшәндә ҝөзләриндә јаранан о ишылтыны ҝөрмәк бизә севинҹ верир».
21. Бизи һәрәкәтә тәшвиг едән билик һансыдыр?
21 Биз билирик ки, тезликлә «аллаһсызларын мәһв едиләҹәји Һөкм [ҝүнү]» бу пис системә сон гојаҹаг (2 Пет. 3:7). Аллаһын Кәламындан әлдә етдијимиз биликләр бизи бөјүк мүсибәтин вә јени дүнјанын ҝәлиши барәдә сәјлә ҹар чәкмәјә тәшвиг едир. Биз бу ҝүн дә ҝәләҹәјә олан әсил үмид барәдә инсанлара данышмағын нә гәдәр тәҹили олдуғуну дәрк едирик. Там шәкилдә бу тәҹили ишдә иштирак етмәклә биз Аллаһа вә инсанлара әсил мәһәббәт тәзаһүр етдирмиш олуруг.