Павелин нүмунәсини тәглид едәрәк руһән инкишаф ет
«Мүбаризәдә јахшы чарпышдым, гачышы битирдим, иманы һифз етдим» (2 ТИМ. 4:7).
1, 2. Тарсуслу Шаул һәјатында һансы дәјишикликләри етди вә һансы ваҹиб иши гәбул етди?
БУ АДАМ ағыллы вә ҹәсарәтли олса да, ‘ҹисмани тәбиәтинин еһтирасларына ујмушду’ (Ефес. 2:3). Бир гәдәр сонра о өзүну ‘ҹаһиллик вә имансызлыгла һәрәкәт едән’ адам кими тәсвир етмишди (1 Тим. 1:13). Бу адам Тарсуслу Шаулдур.
2 Бир мүддәтдән сонра Шаул һәјатында көклү дәјишикликләр етди. О, әввәлки һәјат тәрзиндән әл чәкди вә ‘өз мәнфәәтини дејил, бир чохларынын мәнфәәтини’ ахтармаға башлады (1 Кор. 10:33). Шаул онун әдавәтинин гурбаны олмуш инсанлара гаршы мүлајим вә шәфгәтли олду. (1 Салоникилиләрә 2:7, 8 ајәләрини оху.) Павел јазырды: «Мән... вәзифәләндирилдим. Бүтүн мүгәддәсләрдән ән кичији олдуғум һалда, Мәсиһин кәшфолунмаз зәнҝинлијини јәһуди олмајанлара мүждәләмәк... мәнә бәхш едилди» (Ефес. 3:7-9).
3. Павелин мәктубларыны вә хидмәти һаггында јазыланлары арашдырмаг бизә неҹә көмәк едә биләр?
3 Һәм дә Павел кими танынан Шаул һәгигәти баша дүшмәкдә бөјүк ирәлиләјишләр етди (Һәв. иш. 13:9). Һәгигәтдә тез инкишаф етмәјин үсулларындан бири, Павелин мәктубларыны вә хидмәти һаггында јазыланлары арашдырмаг, һәмчинин иман нүмунәсини тәглид етмәкдир. (1 Коринфлиләрә 11:1; Ибраниләрә 13:7 ајәләрини оху.) Ҝәлин ҝөрәк Павелин нүмунәси бизи јахшы шәхси өјрәнмә графикини тәртиб етмәјә, инсанлара гаршы сәмими мәһәббәт јетишдирмәјә вә өзүмүзә дүзҝүн мүнасибәт бәсләмәјә неҹә тәшвиг едәҹәк.
Павелин шәхси өјрәнмәси
4, 5. Шәхси өјрәнмәнин Павелә һансы фајдасы олду?
4 ‘Гамлијелин ајаглары алтында, әҹдадларынын гануну әсасында ҹидди тәрбијә’ алан Павел Мүгәддәс Јазылардан мүәјјән билијә малик иди (Һәв. иш. 22:1-3; Филип. 3:4-6). О вәфтиз олунандан дәрһал сонра дүшүнмәк үчүн «Әрәбистана» — ја Сурија сәһрасына, ја да, ола билсин, Әрәбистан јарымадасынын сакит јерләриндән биринә ҝетди (Галат. 1:17). Ҝөрүнүр, Павел Исанын Мәсиһ олдуғуну сүбут едән ајәләрин үзәриндә дүшүнмәк, үстәлик, гаршыда ону ҝөзләјән ишә һазырлашмаг истәјирди. (Һәвариләрин ишләри 9:15, 16, 20, 22 ајәләрини оху.) Павел руһани шејләр үзәриндә дүшүнмәк үчүн сәј ҝөстәрирди.
5 Павел шәхси өјрәнмә нәтиҹәсиндә Мүгәддәс Јазылардан әлдә етдији билик вә анлајыш сајәсиндә һәгигәти инсанлара мүвәффәгијјәтлә өјрәдирди. Мәсәлән, Писидијанын Антакја шәһәриндәки синагогда чыхыш едәркән о, Исанын Мәсиһ олдуғуну сүбут етмәк үчүн Ибраниҹә Мүгәддәс Јазылардан ән азы беш ајә ситат ҝәтирди вә бир нечә дәфә онлара истинад етди. Онун Мүгәддәс Китабдан ҝәтирдији дәлилләр о гәдәр инандырыҹы иди ки, «јәһудиләрдән вә јәһуди дининә дөнүб Аллаһа ибадәт едәнләрдән бир чоху» даһа чох өјрәнмәк үчүн «Павелин вә Барнабанын ардынҹа ҝетди» (Һәв. иш. 13:14-44). Бир нечә илдән сонра бир груп Рома јәһудиләри Павелин кирәләдији евә ҝәләндә о, «Аллаһын Сәлтәнәтини ҹидди шәкилдә онлара бәјан едиб... изаһ едирди. Мусанын Ганунуна вә пејғәмбәрләрин китабларына әсасланараг, онлары Иса барәсиндә игна етмәјә чалышырды» (Һәв. иш. 28:17, 22, 23).
6. Сынагларла үзләшәндә Павел нәјин сајәсиндә руһән мөһкәм галды?
6 Сынагларла үзләшәндә Павел Мүгәддәс Јазылары арашдырмаға давам едирди, бу исә ону мөһкәмләндирирди (Ибр. 4:12). Ромада һәбсдә оланда, едамындан әввәл Павел Тимотејдән «китаблары, хүсусән дәри үзәриндә јазылмыш китаблары» ҝәтирмәји хаһиш етди (2 Тим. 4:13). Еһтимал ки, бу сәнәдләр Ибраниҹә Мүгәддәс Јазыларын бир парчасы иди вә Павел дәриндән арашдырмалар апаранда онлардан истифадә едирди. Мүгәддәс Јазылары шәхсән арашдырмасы сајәсиндә әлдә етдији билик Павелин мәтанәтли галмасында ваҹиб рол ојнамышдыр.
7. Мүгәддәс Китабы мүнтәзәм өјрәнмәјин ҝәтирдији фајдалары садала.
7 Мүгәддәс Китабы мүнтәзәм өјрәнмәјимиз вә мәгсәдјөнлү шәкилдә үзәриндә дүшүнмәјимиз мәсиһчи кими инкишаф етмәјимизә көмәк едәҹәк (Ибр. 5:12-14). Аллаһын Кәламынын дәјәри һагда мәзмурчу охујурду: «Ағзындан чыхан ганун мәним үчүн минләрлә гызылдан, ҝүмүшдән даһа гијмәтлидир. Әмрләрин мәни дүшмәнләримдән даһа мүдрик едир, чүнки онлар һәмишә мәнимләдир. Ајағымы һәр пис јолдан кәнар гојдум ки, сөзләринә бағлы галым» (Мәз. 119:72, 98, 101). Сән дә Мүгәддәс Китабы мүнтәзәм өјрәнирсәнми? Аллаһын Кәламыны һәр ҝүн охумагла вә охудугларынын үзәриндә дүшүнмәклә Аллаһа хидмәтдә ала биләҹәјин тәјинатлара һазырлашырсанмы?
Шаул инсанлары севмәји өјрәнди
8. Шаул иудаизмә мәнсуб олмајанлара неҹә мүнасибәт ҝөстәрирди?
8 Мәсиһчи олмаздан әввәл, Шаул өз дининә сәјлә јанашырды вә иудаизмә мәнсуб олмајан инсанлар ону аз марагландырырды (Һәв. иш. 26:4, 5). Шаулун ҝөзү гаршысында јәһудиләрин Стефаны дашгалаг етмәси онун үрәјинҹә иди. Јәгин, буна тамаша етмәклә Шаул мәсиһчиләри тәгиб етмәкдә өзүнә бәраәт газандырды вә ола билсин, Стефанын өлдүрүлмәсини лајигли ҹәза һесаб едирди (Һәв. иш. 6:8-14; 7:54–8:1). Мүгәддәс Китабда дејилир: «Шаул... евдән евә ҝирәрәк ҹәмијјәти мәһв едирди. Кишиләри вә гадынлары сүрүјәрәк зиндана атырды» (Һәв. иш. 8:3). О ‘онлара гаршы һәддиндән артыг азғынлашыб, һәтта јад шәһәрләрдә белә онлары тәгиб едирди’ (Һәв. иш. 26:11).
9. Шаулун инсанлара мүнасибәтинин дәјишмәсинә нә сәбәб олду?
9 Иса Шаула ҝөрүнәндә о, Дәмәшгә, Мәсиһин шаҝирдләринә зүлм вермәјә јола дүшмүшдү. Аллаһын Оғлунун фөвгәлтәбии нуру ону кор етди вә о, башгаларындан асылы олду. Јеһова Һананја васитәсилә Шаулун ҝөзләринә шәфа верәндә онун инсанлара мүнасибәти һәмишәлик дәјишди (Һәв. иш. 9:1-30). Мәсиһин давамчысы оландан сонра о, инсанларла Иса кими давранмаг үчүн чох чалышмалы олду. Бу, зоракылыгдан әл чәкмәк вә «бүтүн адамларла сүлһдә» олмаг демәк иди. (Ромалылара 12:17–21 ајәләрини оху.)
10, 11. Павел инсанлара сәмими мәһәббәти неҹә тәзаһүр етдирирди?
10 Павел башгалары илә јалныз сүлһдә олмагла кифајәтләнмирди. О, инсанлара сәмими мәһәббәт тәзаһүр етдирмәк истәјирди вә мәсиһчи хидмәти она бу имканы верирди. Биринҹи миссионер сәјаһәти заманы о, хош хәбәри Кичик Асијада тәблиғ едирди. Шиддәтли мүгавимәтә бахмајараг, Павел вә әмәкдашлары һәлим инсанлара мәсиһчи олмаға көмәк етмәкдән јајынмадылар. Листра вә Конјада Павел өлүм тәһлүкәси илә үзләшсә дә, әмәкдашлары илә јенидән бу шәһәрләрә баш чәкди (Һәв. иш. 13:1-3; 14:1-7, 19-23).
11 Бир гәдәр сонра онлар Македонијанын Филипи шәһәриндә Аллаһа јахынлашмаг истәјән адамлары ахтарырдылар. Лидија адлы јәһуди прозелити хош хәбәри динләди вә мәсиһчилији гәбул етди. Шәһәрин рәисләри Павели вә Силаны дәјәнәклә дөјүб зиндана атдылар. Лакин Павел зинданбана тәблиғ етди вә о, аиләси илә бирҝә вәфтиз олунуб Јеһованын хидмәтчиси олду (Һәв. иш. 16:11-34).
12. Гәддар Шаулу Иса Мәсиһин хејирхаһ һәвариси олмаға нә тәшвиг етди?
12 Нәјә ҝөрә вахтилә тәгибчи олмуш Шаул тәгиб етдији инсанларын етигадыны гәбул етди? Бу гәддар адамы хејирхаһ вә мәһәббәтли һәвари олмаға вә башгалары Аллаһ вә Мәсиһ һаггында һәгигәти өјрәнсинләр дејә һәјатыны тәһлүкәјә атмаға һазыр олмаға нә тәшвиг етди? Павелин өзү изаһ едир: ‘Өз лүтфү илә мәни чағыран Аллаһ, Өз Оғлуну мәндә изһар етмәјә разы олду’ (Галат. 1:15, 16). Павел Тимотејә јазмышды: «Мән мәһз она ҝөрә мәрһәмәтә наил олдум ки, Мәсиһ Иса Өз камил тәһәммүлүнү илк олараг мәним үзәримдә зүһур етдирсин вә әбәди һәјат үчүн Она иман етмәли оланларын нүмунәси олум» (1 Тим. 1:16). Јеһова Павели бағышлады. Павелә ҝөстәрилән бу лүтф вә мәрһәмәт ону тәшвиг етди ки, хош хәбәри тәблиғ етмәклә башгаларына мәһәббәт тәзаһүр етдирсин.
13. Бизи башгаларына мәһәббәт ҝөстәрмәјә тәшвиг едән нә олмалыдыр вә буну неҹә едә биләрик?
13 Јеһова бизим дә ҝүнаһларымызы вә сәһвләримизи бағышлајыр (Мәз. 103:8-14). Мәзмурчу сорушурду: «Ја Рәбб, бизим тәгсирләримизи сијаһыја алсајдын, еј Худавәнд, ким бунун гаршысында дајана биләр?» (Мәз. 130:3). Аллаһын мәрһәмәти олмадан һеч биримиз севиндириҹи мүгәддәс хидмәтдә иштирак етмәзди, нә дә ки, һеч биримизин әбәди һәјата үмиди олмазды. Аллаһ һамымыза бөјүк илтифат тәзаһүр етдирди. Буна ҝөрә Павел кими хош хәбәри тәблиғ етмәклә, һәгигәти өјрәтмәклә вә һәмиманлыларымызы мөһкәмләндирмәклә биздә дә башгаларына мәһәббәт тәзаһүр етдирмәк истәји олмалыдыр. (Һәвариләрин ишләри 14:21-23 ајәләрини оху.)
14. Хидмәтимизи неҹә ҝенишләндирә биләрик?
14 Павел хош хәбәрин тәблиғчиси кими тәрәгги етмәк истәјирди вә Исанын нүмунәси она јахшы тәсир бағышламышды. Аллаһын Оғлу инсанлара бәсләдији мисилсиз мәһәббәтини тәблиғ етмәклә ҝөстәрирди. Иса демишди: «Мәһсул чох, ишчиләр исә аздыр. Беләликлә, мәһсулун Саһиби олан Рәббә јалварын ки, Өз мәһсулуну јығмаға ишчиләр ҝөндәрсин» (Мат. 9:35-38). Павел сәјлә хидмәт едәрәк даһа чох ишчиләрин олмасы үчүн етдији дуаларына ујғун давранырды. Бәс сәнин һаггында нә демәк олар? Хидмәтинин кејфијјәтини јахшылашдыра биләрсәнми? Јахуд Падшаһлыг һаггында хош хәбәрин тәблиғинә сәрф етдијин вахты артыра биләрсәнми, ола билсин, һәтта бунун үчүн пионер хидмәтинә башлајасан? Ҝәлин башгаларына ‘һәјат кәламыны мөһкәм тутмаға’ көмәк етмәклә сәмими мәһәббәт ҝөстәрәк (Филип. 2:15).
Павелин өзүнә мүнасибәти
15. Павел өзүнә вә һәмиманлыларына неҹә јанашырды?
15 Бир хидмәтчи кими Павел бизим үчүн башга бир саһәдә дә ҝөзәл нүмунә гојуб. Мәсиһчи јығынҹағында она бир чох тапшырыглар һәвалә олунса да, о, јахшы билирди ки, бу хејир-дуалар она лајиг олдуғуна, јахуд баҹарығына ҝөрә верилмәјиб. Павел бу хејир-дуалары Аллаһын лүтфүнә ҝөрә алдығыны анлајырды. О етираф едирди ки, диҝәр мәсиһчиләр дә хош хәбәри мәһарәтлә тәблиғ едирләр. Аллаһын халгы арасында малик олдуғу мөвгејинә бахмајараг, о, һәлим иди. (1 Коринфлиләрә 15:9-11 ајәләрини оху.)
16. Сүннәт мәсәләси илә әлагәдар Павел һәлимлији вә тәвазөкарлығы неҹә ҝөстәрди?
16 Ҝәлин ҝөрәк Павел Суријанын Антакја шәһәриндә јаранан проблеми неҹә һәлл етди. Бу шәһәрдәки мәсиһчи јығынҹағы сүннәт мәсәләсинә ҝөрә ики јерә парчаланмышды (Һәв. иш. 14:26–15:2). Һәвари Павел сүннәт едилмәмиш гејри-јәһудиләрә тәблиғ ишинә башчылыг етдији үчүн өз-өзүнә фикирләшә биләрди ки, гејри-јәһудиләри јахшы таныјыр вә буна ҝөрә дә бу проблеми даһа јахшы һәлл едә биләр. (Галатијалылара 2:8, 9 ајәләрини оху.) Сәјләри һеч бир нәтиҹә вермәјәндә о, һәлимликлә вә тәвазөкарлыгла низам-интизама риајәт едәрәк бу мәсәләни мүзакирә етмәк үчүн Јерусәлимдә олан рәһбәрлик шурасынын јанына ҝетди. Мәсәлә мүзакирә едиләндә, гәрар чыхарыланда вә ону елчи тәјин едәндә шура үзвләри илә там шәкилдә әмәкдашлыг едирди (Һәв. иш. 15:22-31). Белә етмәклә Павел әмәкдашларыны ‘һөрмәтдә габаглады’ (Ром. 12:10б).
17, 18. а) Павел һәмиманлыларына неҹә јанашырды? б) Ефесли ағсаггалларын Павелин ҝетмәсинә мүнасибәтләри онун неҹә инсан олдуғуну ҝөстәрир?
17 Һәлим олан Павел јығынҹаглардакы баҹы-гардашлара сојуг јанашмырды. Әксинә, онлара бағлы иди. О, ромалылара јаздығы мәктубунун сонунда 20-дән чох адамы адбаад саламлады. Онларын чоху Мүгәддәс Јазыларын даһа һеч бир јериндә хатырланмыр вә јалныз бәзиләринин хүсуси тапшырыглары варды. Лакин онлар Јеһованын садиг хидмәтчиләри иди вә Павел онлары чох севирди (Ром. 16:1-16).
18 Павелин һәлим вә достјана мүнасибәти јығынҹаглары мөһкәмләндирирди. О, ахырынҹы дәфә ефесли ағсаггалларла ҝөрүшәндә онлар «Павелин бојнуна сарылыб, ону өпүрдүләр. Онлары ән чох кәдәрләндирән, онун үзүнү артыг ҝөрмәјәҹәкләринә даир дедији сөзләр иди». Тәкәббүрлү, адамајовушмаз инсанын ајрылыб ҝетмәси белә мүнасибәт доғурмазды (Һәв. иш. 20:37, 38).
19. Һәмиманлыларымызла «тәвазөкарлыгла» неҹә даврана биләрик?
19 Руһән инкишаф етмәк истәјәнләрин һамысы Павел кими һәлим олмалыдыр. О, һәмиманлыларыны сәсләјирди: «Рәгабәт вә ја шөһрәтпәрәстликлә һеч бир шеј етмәјин, амма тәвазөкарлыгла бир-биринизи өзүнүздән јухары сајын» (Филип. 2:3). Биз бу мәсләһәтә неҹә әмәл едә биләрик? Үсуллардан бири, јығынҹағымыздакы ағсаггалларла әмәкдашлыг етмәк, онларын рәһбәрлијинә риајәт етмәк вә ҹидди ҝүнаһ ишләдәнләрә гаршы вердикләри гәрарлары дәстәкләмәкдир. (Ибраниләрә 13:17 ајәсини оху.) Диҝәр үсул, бүтүн баҹы-гардашларымызы јүксәк гијмәтләндирмәкдир. Јеһованын халгынын јығынҹаглары адәтән мүхтәлиф милләтләрдән, мәдәнијјәтләрдән, иргдән вә етник груплардан олан инсанлардан ибарәтдир. Мәҝәр Павел кими биз дә диҝәрләри илә мәһәббәтлә вә үзҝөрәнлик етмәдән давранмағы өјрәнмәли дејиликми? (Ром. 12:10а; Һәв. иш. 17:26). ‘Неҹә ки, Мәсиһ бизи гәбул етди, Аллаһын иззәти үчүн биз дә бир-биримизи еләҹә гәбул етмәјә’ тәшвиг олунуруг (Ром. 15:7).
Һәјат үчүн «јарышда мәтанәтлә гачаг»
20, 21. Һәјат үчүн јарышы мүвәффәгијјәтлә гачмаға нә көмәк едәҹәк?
20 Мәсиһчинин һәјатыны узунмәсафәли гачыша бәнзәтмәк олар. Павел јазмышды: «Гачышы битирдим, иманы һифз етдим. Бундан сонра мәним үчүн салеһлик таҹы һазыр дурур. Адил Һаким олан Рәбб о Ҝүн ону мәнә вә јалныз мәнә дејил, Онун зүһуруну һәрарәтлә арзулајанларын һамысына верәҹәкдир» (2 Тим. 4:7, 8).
21 Павелин нүмунәсини тәглид етмәјимиз әбәди һәјат үчүн јарышда мүвәффәгијјәтлә гачмаға көмәк едәҹәк (Ибр. 12:1). Буна ҝөрә дә ҝәлин Мүгәддәс Китабы мүнтәзәм өјрәнмәклә, инсанлара мәһәббәтимизи артырмагла вә тәвазөкарлығы горумагла руһән инкишаф едәк.
Неҹә ҹаваб верәрдиниз?
• Мүгәддәс Јазылары мүнтәзәм өјрәнмәјин Павелә фајдасы нә олду?
• Нәјә ҝөрә инсанлары дәриндән севмәк һәгиги мәсиһчиләр үчүн ваҹибдир?
• Һансы хүсусијјәтләр үзҝөрән олмамағымыза көмәк едә биләр?
• Павелин нүмунәси јығынҹағымыздакы ағсаггалларла әмәкдашлыг етмәјә неҹә көмәк едә биләр?
[23-ҹү сәһифәдәки шәкил]
Павел кими, ҝүҹү Мүгәддәс Јазылардан ал
[24-ҹү сәһифәдәки шәкил]
Башгалары илә хош хәбәри бөлүшмәклә мәһәббәт тәзаһүр етдир
[25-ҹи сәһифәдәки шәкил]
Билирсәнми гардашлар Павели нә үчүн севирдиләр?