Аллаһын халгынын гајғысына галан нәзарәтчиләр

ИСА МӘСИҺ јер үзүндә оланда онун «јахшы чобан» олдуғу ајдын ҝөрүнүрдү (Јәһ. 10:11). Бир дәфә о, ардынҹа ҝедән ҹамааты ҝөрәндә «онларын һалына аҹыды, чүнки бу адамлар чобансыз гојунлар кими јазыг вә дағыныг идиләр» (Мәт. 9:36). Бутрус вә диҝәр һәвариләр онун чох гајғыкеш инсан олдуғуну ҝөрүрдүләр. Иса Исраилин дырнагарасы чобанларындан јерлә ҝөј гәдәр фәргләнирди; бу чобанлар сүрү илә һеч марагланмырдылар, гојунлар пәрән-пәрән олмушду, руһани ҹәһәтдән аҹлыг чәкирди (Һизг. 34:7, 8). Иса өз нүмунәси илә һәвариләрә инсанлара тәлим вермәји, онларын гејдинә галмағы, һәтта лазым ҝәлсә, онларын уғрунда һәјатларыны фәда етмәји өјрәтмишди. Шаҝирдләрә мөмин инсанлара Јеһованын — ҹанларыны горујан «чобанын вә нәзарәтчинин» јанына гајытмаға көмәк етмәјин јолуну ҝөстәрмишди (1 Бут. 2:25).

² Бир дәфә Бутрусла сөһбәтиндә Иса Аллаһын сүрүсүнү бәсләмәјин вә отармағын ваҹиблијини вурғуламышды (Јәһ. 21:15—17). Шүбһәсиз, бу сөһбәт Бутруса дәрин тәсир бағышламышды, чүнки сонралар о, мәсиһи јығынҹағынын ағсаггалларына нөвбәти мәсләһәти вермишди: «Аллаһын сизә әманәт етдији сүрүнү отарыб она нәзарәт един. Буну зорла јох, Аллаһ гаршысында көнүл хошлуғу илә, һагсыз газанҹ һәрислијиндән јох, ҹанла-башла един. Аллаһын әманәти үзәриндә ағалыг етмәјин, әксинә, сүрүјә нүмунә олун» (1 Бут. 5:1—3). Бутрусун сөзләри бу ҝүн јығынҹаға нәзарәт едән инсанлара да аиддир. Ағсаггаллар Исадан нүмунә ҝөтүрәрәк үрәкдән, һәвәслә сүрүнүн гејдинә галырлар, Јеһованын тапшырдығы ишә рәһбәрлик едирләр (Ибр. 13:7).

³ Мүгәддәс руһун рәһбәрлији илә тәјин олунмуш нәзарәтчиләрә ҝөрә Јеһоваја үрәкдән миннәтдарыг. Онларын бизә чох бөјүк көмәји дәјир. Мәсәлән, онлар бизи руһландырыр, һәр биримизин ајры-ајрылыгда гејдинә галыр. Иман әһлинин руһани гида алдығы ибадәт ҝөрүшләринә ҹанла-башла рәһбәрлик едирләр (Ром. 12:8). Сүрүнү пис тәсирдән, мәсәлән, пис инсанлардан горумаг үчүн әлләриндән ҝәләни едирләр (Әшј. 32:2; Тит. 1:9—11). Онларын тәблиғ ишинә рәһбәрлик етмәси бизи һәр ај бу ишдә фәал олмаға тәшвиг едир (Ибр. 13:15—17). Инсан тимсалында һәдијјәләр олан бу ағсаггаллар васитәсилә Јеһова јығынҹаглары мөһкәмләндирир (Ефес. 4:8, 11, 12).

НӘЗАРӘТЧИЛӘР ҮЧҮН ТӘЛӘБЛӘР

⁴ Јығынҹағын гејдинә јахшы галмаг үчүн нәзарәтчиләр Мүгәддәс Китабдакы тәләбләрә ҹаваб вермәлидирләр. Демәк олар ки, јалныз бу тәләбләрә ҹаваб верән нәзарәтчиләр мүгәддәс руһ тәрәфиндән тәјин олунублар (Һәв. 20:28). Бәли, нәзарәтчиләр үчүн тәләбләр јүксәкдир, ахы онларын бојнуна дүшән иш чох мәсулијјәтли ишдир. Амма бу тәләбләр о дәрәҹәдә јүксәк дејил ки, Јеһованы севән вә Она үрәкдән хидмәт етмәк истәјән мәсиһи онлара ҹаваб верә билмәсин. Нәзарәтчиләрин Аллаһын Кәламындакы өјүд-нәсиһәтләрә әмәл етдији онларын һәјат тәрзиндән ајдын ҝөрүнмәлидир.

⁵ Һәвари Булус Тимутијә биринҹи мәктубунда вә Титуса мәктубунда нәзарәтчи олмаг истәјәнләр үчүн әсас тәләбләри садаламышды. 1 Тимутијә 3:1—7 ајәләриндә јазылыб: «Нәзарәтчи олмаға ҹан атан јахшы шеј арзулајыр. Елә исә нәзарәтчи гүсурсуз, тәк бир гадынла евли, һәр шејдә һәддини билән, сағлам дүшүнҹәли, низам-интизамлы, гонагпәрвәр, тәлим вермәкдә сәриштәли, дәрракәли олмалыдыр. О, сәрхошлуг етмәмәли, зоракы, давакар вә пулпәрәст олмамалыдыр. Аиләсини јахшы идарә етмәли, ушаглары итаәткар вә тәрбијәли олмалыдыр. (Ахы инсан өз аиләсини идарә едә билмирсә, Аллаһын јығынҹағынын гајғысына неҹә галаҹаг?) О һәмчинин имана тәзә ҝәләнләрдән олмамалыдыр ки, гүррәләниб Иблисә чыхарылмыш һөкмә дүчар олмасын. Бундан әлавә, кәнар адамлар да онун һаггында јахшы фикирдә олмалыдырлар ки, һеч ким ону гынамасын вә о, Иблисин тәләсинә дүшмәсин».

⁶ Булус Титуса белә јазмышды: «Мән сәни Критдә она ҝөрә гојдум ки, јарымчыг ишләри гајдаја саласан вә ҝөстәриш вердијим кими, шәһәрләрдә ағсаггаллар тәјин едәсән. Ағсаггал гүсурсуз вә тәк бир гадынла евли олмалыдыр. Онун ушаглары позғун һәјат сүрмәкдә вә итаәтсизликдә иттиһам олунмамалы, иманлы олмалыдырлар. Бәли, нәзарәтчи Аллаһын нөкәрбашысы кими гүсурсуз олмалыдыр. О, инадкар, тез өзүндән чыхан, сәрхошлуг едән, зоракы, һарам газанҹ һәриси олмамалыдыр. Әксинә, јахшылығы севмәли, гонагпәрвәр, сағламдүшүнҹәли, салеһ, сәдагәтли олмалы вә өзүнә һаким олмағы баҹармалыдыр. О, тәлим верәркән Аллаһын етибара лајиг сөзүнә бағлы галмалыдыр ки, сағлам тәлимин сајәсиндә һәм гардашлары үрәкләндирсин, һәм дә бу тәлимә зидд ҝедәнләри тәнбеһ едә билсин» (Тит. 1:5—9).

⁷Нәзарәтчиләр үчүн Мүгәддәс Китабдакы тәләбләр илк бахышдан һәддән артыг јүксәк ҝөрүнсә дә, гардашлар тәрәгги етмәк мәгсәдиндән әл чәкмәмәлидирләр. Онлар нәзарәтчиләрдән ҝөзләнилән кејфијјәтләри әкс етдирәндә јығынҹагдакылара ҝөзәл нүмунә гојурлар. Булусун јаздыгларына әсасән, Аллаһ инсан тимсалында олан бу һәдијјәләри вериб ки, «мүгәддәсләри өјрәтсинләр, хидмәт ишини ҝөрсүнләр, Мәсиһин бәдәнини инша етсинләр, та о вахтаҹан ки биз һамымыз иманда бирлијә вә Аллаһын Оғлуну танымагда вәһдәтә, јеткин инсан сәвијјәсинә, Мәсиһә мәхсус долғунлуғун инкишаф дәрәҹәсинә јетишәк» (Ефес. 4:8, 12, 13).

⁸ Нәзарәтчи чох ҝәнҹ вә имана тәзә ҝәләнләрдән олмамалыдыр. О, тәҹрүбәли мәсиһи олмалы, Мүгәддәс Китабы јахшы билмәли, дәриндән баша дүшмәли вә баҹы-гардашлары үрәкдән севмәлидир. Нәзарәтчи сәһв иш тутанларла данышмаға вә онлара мәсләһәт вермәјә чәкинмәмәлидир, чүнки бу јолла јығынҹагдакылары пис тәсирдән горујур (Әшј. 32:2). О, јығынҹагдакылар арасында руһани ҹәһәтдән јеткин вә сәмими-гәлбдән Аллаһын халгынын гајғысына галан бир инсан кими танынмалыдыр.

⁹ Нәзарәтчиләр үчүн тәләбләрә ҹаваб верән гардашын һәјат тәрзиндән һикмәтли олдуғу ҝөрүнмәлидир. Евлидирсә, Мүгәддәс Китабын никаһа даир тәләбләринә мүвафиг ҝәлмәли, јәни тәк бир гадынла евли олмалы вә аиләсини јахшы идарә етмәлидир. Нәзарәтчинин иманда олан ушаглары итаәткар вә тәрбијәли олмалы, позғун һәјат сүрмәкдә вә итаәтсизликдә иттиһам олунмамалыдыр; онда јығынҹаг һәмин гардаша аилә мәсәләләри вә мәсиһи һәјаты илә бағлы мәсләһәт үчүн үрәклә јахынлашаҹаг. Нәзарәтчи гүсурсуз олмалыдыр, бундан әлавә, кәнар адамлар да онун һаггында јахшы фикирдә олмалыдыр. О, һеч бир налајиг һәрәкәтдә иттиһам едилмәмәлидир ки, јығынҹағын адына ләкә ҝәлмәсин. Ҹидди ҝүнаһ ишләтдији үчүн тәзәликҹә төһмәт алмыш адам нәзарәтчи тәјин олуна билмәз. Нәзарәтчи јухарыдакы тәләбләрә ҹаваб верирсә, јығынҹагдакылар һәвәслә онун нүмунәсини изләјәҹәк вә өз руһани рифаһыны она етибар едә биләҹәкләр (1 Кор. 11:1; 16:15, 16).

¹⁰ Бу ҝүн тәләбләрә ҹаваб верән гардашлар гәдимдә Аллаһын халгына хидмәт етмиш «мүдрик, бәсирәтли, дүнјаҝөрмүш» Исраил ағсаггалларынын ишинә бәнзәр иши һәјата кечирирләр (Ган. 1:13). Ағсаггаллар да һамы кими ҝүнаһлыдыр, лакин онлары јығынҹагда вә ҹәмијјәт арасында әмәлисалеһ вә Аллаһдан горхан, узун мүддәт әрзиндә Аллаһын принсипләринә ујғун јашајан бир инсан кими таныјырлар. Онлар нөгсансыз олдуглары үчүн јығынҹагда алныачыг, үзүағдырлар (Ром. 3:23).

¹¹ Нәзарәтчи мәсулијјәтинә јарарлы олан гардашлар һәр шејдә, о ҹүмләдән башгалары илә рәфтарда һәдди билир. Онлар фанатик дејилләр. Һәјат тәрзләриндән ҝөрүнүр ки, бу гардашлар таразлы вә өзүнә һаким олан инсанлардыр. Онларын таразлы олдуглары јемәк-ичмәк, истираһәт, мәшғулијјәт вә әјләнҹә кими мәсәләләрдә ајдын ҝөрүнүр. Нәзарәтчиләр ичкидә һәдди ашмырлар ки, һеч ким онлары сәрхошлугда вә ја әјјашлыгда иттиһам етмәсин. Һәмчинин спиртли ичкинин тәсири алтында зеһни күтләшән инсан өзүнү идарә едә билмир, буна ҝөрә дә о, јығынҹағын руһани рифаһынын гајғысына гала билмәз.

¹² Јығынҹагда нәзарәтчи олмаг үчүн гардашдан мүәјјән низам-интизам тәләб олунур. Онун хариҹи ҝөрүнүшүндән, евинин вәзијјәтиндән вә ҝүндәлик мәшғулијјәтиндән нүмунәви инсан олдуғу ҝөрүнмәлидир. О, ишини сонраја сахламамалыдыр: нәјин ваҹиб олдуғуну дәрк етмәли вә ишини буна ујғун планлашдырмалыдыр. Јеһова Аллаһын принсипләринә бағлы галмалыдыр.

¹³ Нәзарәтчи дәрракәли олмалыдыр. О, ағсаггаллар шурасында бирлији горумалы вә шурадакы диҝәр гардашларла сых әмәкдашлыг етмәлидир. Нә өзү һагда јүксәк фикирдә олмалы, нә дә башгаларына гаршы һәддән артыг тәләбкар олмалыдыр. Дәрракәли инсан кими нәзарәтчи өзүндәнразы олмамалы, өз фикрини диҝәр ағсаггалларын фикриндән үстүн тутмамалыдыр. Чүнки, ола билсин, һәмин ағсаггаллар һансыса кејфијјәт вә ја баҹарығы даһа јахшы тәзаһүр етдирир. Нәзарәтчинин дәрракәли олдуғу һәмчинин гәрарларыны Аллаһын Кәламына әсасландырмағындан вә Иса Мәсиһин нүмунәсини тәглид етмәјиндән ҝөрүнүр (Филип. 2:2—8). Ағсаггал давакар вә зоракы олмамалы, әксинә, башгаларыны өзүндән үстүн сајараг онлара һөрмәт ҝөстәрмәлидир. Һәмишә өз фикрини башгаларына јеридәрәк инадкарлыг етмәмәлидир. О, тез өзүндән чыхмамалыдыр, башгалары илә сүлһдә олмалыдыр.

¹⁴ Јығынҹагда нәзарәтчи тәјин олунан гардаш һәмчинин сағламдүшүнҹәли, јәни таразлы олмалы, тез-тәләсик гәрар чыхармамалыдыр. О, Јеһова Аллаһын принсипләрини јахшы баша дүшмәли вә дүзҝүн тәтбиг етмәлидир. Сағламдүшүнҹәли инсан мәсләһәт вә ҝөстәриши гәбул едир, икиүзлүлүк етмир.

¹⁵ Һәвари Булус Титуса јазмышды ки, нәзарәтчи јахшылығы севмәли, салеһ вә сәдагәтли олмалыдыр. Бу кејфијјәтләр онун башгалары илә рәфтарындан вә гәтијјәтлә доғрулуғун тәрәфини тутмағындан ҝөрүнмәлидир. Онун Јеһоваја сәдагәти сарсылмаздыр. Һәмишә салеһ принсипләри әлдә рәһбәр тутур. О, етибарлы инсандыр. Сөзүн әсл мәнасында гонагпәрвәр вә фәдакардыр, башгаларына әл тутур (Һәв. 20:33—35).

¹⁶ Јахшы нәзарәтчи олмаг үчүн гардаш тәлим вермәкдә сәриштәли олмалыдыр. Булусун Титуса јаздығы сөзләрә әсасән, «о, тәлим верәркән Аллаһын етибара лајиг сөзүнә бағлы галмалыдыр ки, сағлам тәлимин сајәсиндә һәм гардашлары үрәкләндирсин, һәм дә бу тәлимә зидд ҝедәнләри тәнбеһ едә билсин» (Тит. 1:9). О, мәнтиг ишләтмәји, сүбутлар ҝәтирмәји, етиразын өһдәсиндән ҝәлмәји баҹармалыдыр. Мүгәддәс Китабы елә изаһ етмәлидир ки, башгаларынын иманыны вә әминлијини артырсын. Нәзарәтчи бу үсулларла тәлим вермәји һәм әлверишли, һәм дә чәтин вахтда баҹармалыдыр (2 Тим. 4:2). Ҝүнаһ ишләјән адамы јумшаг шәкилдә мәзәммәт етмәк, јахуд шүбһәси олан адамы инандырмаг вә ону имандан доған ишләрә тәшвиг етмәк үчүн нәзарәтчијә сәбир ҝәрәкдир. Нәзарәтчи сәһнәдән вә фәрди шәкилдә тәлим вермәји баҹармалыдыр — бу, мүтләгдир.

¹⁷ Ағсаггал мүждәчилик ишиндә ҹанла-башла иштирак етмәлидир. Нәзарәтчиләрин бу саһәдә Иса Мәсиһдән нүмунә ҝөтүрмәјә ҹан атдығы ајдын ҝөрүнмәлидир. Хош хәбәри тәблиғ етмәк Исанын һәјатынын ән ваҹиб иши иди. О, шаҝирдләрини дүшүнүрдү, онлара мәһарәтли мүждәчи олмаға көмәк едирди (Марк 1:38; Лука 8:1). Ағсаггал, чох мәшғул олса да, вахт ајырыб тәблиғ ишиндә иштирак едәндә јығынҹагдакылары да бу ишдә фәал олмаға тәшвиг едир. О, өз аиләси вә јығынҹагдакыларла хидмәтә чыханда онлар да руһланыр, о да (Ром. 1:11, 12).

¹⁸ Илк бахышдан нәзарәтчиләр үчүн олан бу тәләбләр һәддән артыг јүксәк ҝөрүнә биләр. Дүздүр, һеч бир нәзарәтчи Мүгәддәс Китабдакы бу тәләбләрә бүтүнлүклә ҹаваб верә билмәз. Лакин елә олмамалыдыр ки, јухарыда ҝөстәрилән кејфијјәтләрин һансындаса онун ҹидди нөгсаны олсун. Һәр ағсаггалын мүәјјән саһәдә үстүн ҹәһәти вар. Үмумиликдә исә ағсаггаллар шурасы Аллаһын јығынҹағына нәзарәт ишини лазыми шәкилдә һәјата кечирмәк үчүн тәләб олунан бүтүн зәрури кејфијјәтләрә маликдир.

¹⁹ Ағсаггаллар, бир шура олараг, гардашын намизәдлијини ирәли сүрәндә һәвари Булусун нөвбәти мәсләһәтини јадда сахламалыдыр: «Һәр биринизә дејирәм: өзүнүз барәдә лүзумундан артыг фикирләшмәјин. Һәр кәс өзү һаггында Аллаһын она вердији иман чәрчивәсиндә дүшүнсүн вә сағлам дүшүнҹәни горујуб сахласын» (Ром. 12:3). Һеч бир ағсаггал өзү һагда јүксәк фикирдә олмамалыдыр. Киминсә намизәдлији мүзакирә олунанда һеч ким өзүнү «һәддән артыг салеһ» апармамалыдыр (Ваиз 7:16). Мүгәддәс Китабын ағсаггаллар үчүн тәләбләрини нәзәрә алараг шура намизәдлији мүзакирә олунан гардашын тәләбләрә кифајәт гәдәр ҹаваб вериб-вермәдијини мүәјјән едәҹәк. Ағсаггаллар намизәдлик ирәли сүрәндә инсанын гејри-камил олдуғуну нәзәрә алмалы, гәрәзли вә икиүзлү олмамалы, Јеһованын салеһлик нормаларына һөрмәт етмәли вә јығынҹағын рифаһыны дүшүнмәлидирләр. Онлар һәр бир гардашын намизәдлијини нәзәрдән кечирәркән Аллаһдан мүгәддәс руһ истәмәли вә онун Мүгәддәс Китаб тәләбләринә нә дәрәҹә ујғун олуб-олмадығыны мүзакирә етмәлидирләр. Бу, онларын үзәринә дүшән ән ҹидди мәсулијјәтләрдән биридир; онлар буну һәвари Булусун «һеч кәсин үзәринә тәләм-тәләсик әл гојма» нәсиһәтинә ујғун олараг етмәлидирләр (1 Тим. 5:21, 22).

РУҺУН БӘҺРӘСИ

²⁰ Руһән јеткин гардашларын һәјат тәрзиндән ҝөрүнүр ки, онлар мүгәддәс руһун рәһбәрлијинә ујғун јашајыр вә онун бәһрәсини тәзаһүр етдирирләр. Булус руһун бәһрәсинин доггуз ҹәһәтини садалајыр. Бунлар «мәһәббәт, севинҹ, сүлһ, сәбир, хејирхаһлыг, јахшылыг, иман, мүлајимлик, өзүнә һаким олмаг»дыр (Гал. 5:22, 23). Бу нәзарәтчиләр баҹы-гардашлара тәравәт ҝәтирир, ејни заманда онлара мүгәддәс ибадәти иҹра етмәјә вә бир-бирилә вәһдәтдә олмаға көмәк едирләр. Ағсаггалларын давраныш тәрзиндән вә чәкдикләри зәһмәтдән ҝөрүнүр ки, онлар мүгәддәс руһ тәрәфиндән тәјин олунублар (Һәв. 20:28).

БИРЛИЈИ МӨҺКӘМЛӘНДИРӘН ГАРДАШЛАР

²¹ Јығынҹағын бирлији бүтүн ағсаггалларын бир-бири илә әмәкдашлығындан асылыдыр. Онларын хасијјәти бир-бириндән тамамилә фәргләнә вә фикирләри үст-үстә дүшмәјә биләр, буна бахмајараг, онлар бир-бирини һөрмәтлә динләмәли, араларында бирлији горумалыдырлар. Әҝәр һеч бир Мүгәддәс Китаб принсипи позулмурса, һәр кәс ағсаггаллар шурасынын сон гәрарына бојун әјмәли вә ону дәстәкләмәлидир. Ҝүзәштә ҝетмәји баҹаран инсан ҝөстәрир ки, о, јухарыдан назил олан сүлһпәрвәр вә мүлајим һикмәтә ујғун давраныр (Јаг. 3:17, 18). Һеч бир ағсаггал өзүнү башгаларындан үстүн тутмамалы вә һеч кимин үзәриндә ағалыг етмәмәлидир. Ағсаггаллар јығынҹағын рифаһы үчүн бир-бирилә әмәкдашлыг едәндә, әслиндә, Јеһова илә әмәкдашлыг етмиш олурлар (1 Кор., фәс. 12; Кол. 2:19).

МӘСУЛИЈЈӘТЛӘРӘ ҸАН АТЫН

²² Јеткин гардаш нәзарәтчи олмаға ҹан атмалыдыр (1 Тим. 3:1). Амма ағсаггал кими хидмәт етмәк үчүн чалышганлыг вә фәдакарлыг тәләб олунур. Бу о демәкдир ки, ағсаггал баҹы-гардашлара көмәк етмәјә вә онларын руһани гајғысыны чәкмәјә һазыр олмалыдыр. Нәзарәтчи олмаға ҹан атмаг Аллаһын Кәламындакы тәләбләрә ҹаваб вермәјә ҹан атмаг демәкдир.

ВӘЗИЈЈӘТ ДӘЈИШӘНДӘ

²³ Ола билсин, узун илләр сәдагәтлә хидмәт едән бир гардаш сонрадан хәстәлик, гоҹалыг вә ја башга бир сәбәб уҹбатындан мәсулијјәтини јеринә јетирә билмәсин. Амма нә гәдәр ки тәјинаты гүввәдәдир, она ағсаггал кими јанашыб һөрмәтини сахламаг лазымдыр. Имканларынын мәһдуд олмасы о демәк дејил ки, о, ағсаггал тәјинатындан имтина етмәлидир. Аллаһын халгынын гајғысына галан диҝәр зәһмәткеш ағсаггаллар кими о да икигат һөрмәтә лајигдир.

²⁴ Әҝәр гардаш һәр һансы бир сәбәбә ҝөрә тәјинатындан имтина етмәк истәјирсә, бу, онун шәхси гәрарыдыр (1 Бут. 5:2). Буна бахмајараг, јенә дә она һөрмәт ҝөстәрилмәлидир. О, ағсаггал ишини вә мәсулијјәтини јеринә јетирмәсә дә, јығынҹағын рифаһы үчүн чох иш ҝөрә биләр.

ЈЫҒЫНҸАГДА МӘСУЛИЈЈӘТЛӘР

²⁵ Ағсаггаллар јығынҹагда ағсаггал шурасынын координатору, хидмәт нәзарәтчиси, «Ҝөзәтчи гүлләси» мүзакирәсини апармаг вә Мәсиһи һәјаты вә ибадәти ҝөрүшүнүн нәзарәтчиси кими мүхтәлиф мәсулијјәтләри јеринә јетирирләр. Ағсаггалларын чоху груп нәзарәтчиси кими хидмәт едир. Ағсаггалларын бу мәсулијјәтләрә тәјинатынын мүддәти јохдур. Әлбәттә, әҝәр гардаш башга јерә көчүрсә, сәһһәтиндә олан проблемә ҝөрә мәсулијјәтини јеринә јетирә билмирсә вә јахуд Мүгәддәс Китабын тәләбләринә ҹаваб вермәдији үчүн тәјинатындан азад олунурса, онун јеринә башга ағсаггал сечилир. Нәзарәтчиләрин сајынын аз олдуғу јығынҹагларда тәләбләрә ҹаваб верән јени ағсаггаллар тәјин олунана гәдәр бир ағсаггал бир нечә мәсулијјәти иҹра едә биләр.

²⁶ Ағсаггаллар шурасынын координатору шуранын ҝөрүшүндә сәдрлик едир. Беләликлә, о, диҝәр ағсаггалларла бирҝә тәвазөкарлыгла Аллаһын үммәтинин гајғысына галыр (Ром. 12:10; 1 Бут. 5:2, 3). Гардаш јахшы тәшкилатчы олмалы вә ҹанла-башла рәһбәрлик етмәлидир (Ром. 12:8).

²⁷ Катиб јығынҹағын сәнәд ишләрини ҝөрүр вә алдығы мәлуматлары ағсаггаллара чатдырыр. Лазым ҝәләрсә, башга ағсаггал вә ја сәриштәли јығынҹаг хидмәтчиси она көмәк едә биләр.

²⁸ Тәблиғ фәалијјәти вә хидмәтлә бағлы олан бүтүн ишләрлә хидмәт нәзарәтчиси мәшғул олур. О, графикини елә гурур ки, һәр ајын бир һәфтәсону бир група баш чәксин. Јалныз бир нечә групдан ибарәт олан јығынҹагларда исә һәр група илдә ики дәфә дә баш чәкә биләр. Група баш чәкән заман тәблиғ ҝөрүшләрини апарыр, групла хидмәтә чыхыр, тәблиғчиләрә инсанларла тәкрар сөһбәт апармаға вә Мүгәддәс Китаб дәрсләрини кечирмәјә көмәк едир.

ГРУП НӘЗАРӘТЧИСИ

²⁹ Јығынҹагда груп нәзарәтчиси олмаг ән шәрәфли вәзифәләрдән биридир. Онун үзәринә нөвбәти мәсулијјәтләр дүшүр: 1) групда һәр кәсин руһани вәзијјәти илә јахындан марагланмаг; 2) һәр кәсин хидмәтдә мүнтәзәм, һәвәслә вә севинҹлә иштирак етмәсинә көмәк етмәк вә 3) групдакы јығынҹаг хидмәтчиләринә инкишаф етмәјә вә мәсулијјәтләрә ҹан атмаға көмәк етмәк. Һансы гардашын бу мәсулијјәтә јарарлы олдуғуна ағсаггаллар шурасы гәрар верир.

³⁰ Ишин маһијјәтини нәзәрә алсаг, јахшы оларды ки, груп нәзарәтчиси ағсаггал олсун. Ағсаггал олмадығы тәгдирдә, бу иши мүнасиб јығынҹаг хидмәтчиси ҝөрә биләр. Белә олан һалда јығынҹаг көмәкчиси ағсаггал олмадығы үчүн груп хидмәтчиси адланыр. О, бу иши ағсаггалын нәзарәти алтында едир.

³¹ Груп нәзарәтчисинин әсас иши мүждәчилик фәалијјәтинә рәһбәрлик етмәкдир. Онун хидмәтдә мүнтәзәм, ҹанла-башла вә һәвәслә иштирак етмәси групдакылара сирајәт едәҹәк. Тәблиғчиләр бирликдә хидмәт етмәкдән севинҹ дујдуглары вә фајда әлдә етдикләри үчүн јахшы оларды ки, групун тәблиғ вахты әксәријјәт үчүн мүнасиб олсун (Лука 10:1—16). Нәзарәтчинин әлиндә һәмишә кифајәт гәдәр саһә олмалыдыр. О, адәтән, тәблиғ ҝөрүшүнү кечирир вә һәмин ҝүн үчүн тәблиғчиләрин хидмәтини тәшкил едир. О, ҝедә билмәјәндә башга ағсаггалдан вә ја јығынҹаг хидмәтчисиндән, јахуд да тәҹрүбәли тәблиғчидән ҝөрүшү кечирмәји хаһиш етмәлидир. Бунун сајәсиндә тәблиғчиләр башсыз галмајаҹаг.

³² Груп нәзарәтчиси хидмәт нәзарәтчисинин ҝәлишинә әввәлҹәдән һазырлашмалы, групуна хәбәр вермәли вә бунун онлара һансы фајданы ҝәтирәҹәјини изаһ етмәлидир. Групдакыларын һамысынын нәзарәтчинин ҝәлишиндән хәбәри олса, онлар бу тәдбирдә һәвәслә иштирак едәҹәкләр.

³³ Групларда тәблиғчиләрин сајы чох олмамалыдыр. Бу, нәзарәтчијә групдакылары јахшы танымаға имкан јарадыр. Гајғыкеш ағсаггал кими о, һәр кәслә јахындан марагланыр. Онлара көмәк едәрәк һәвәсләндирир ки, хидмәтдә вә јығынҹагда актив шәкилдә иштирак етсинләр. Һәмчинин о, һәр кәсә руһани ҹәһәтдән мөһкәм галмаг үчүн әлиндән ҝәлән көмәји ҝөстәрир. Хәстәликдән әзијјәт чәкәнләрә вә ја мәјуслуға гапыланлара шәхсән баш чәкир. Руһландырыҹы сөзү вә мәсләһәти илә гардашлары јығынҹагда мәсулијјәтләрә ҹан атмаға вә баҹы-гардашлара дәстәк олмаға тәшвиг едир. Ајдындыр ки, груп нәзарәтчиси гүввәсини әсасән өз групундакылара көмәк етмәјә сәрф едир. Лакин бир ағсаггал вә нәзарәтчи кими о, јығынҹагдакыларын һамысы илә марагланмалы вә еһтијаҹ јарандыгда көмәк етмәлидир (Һәв. 20:17, 28).

³⁴ Груп нәзарәтчисинин вәзифәләриндән бири групунун тәблиғ һесабатларыны јығмагдыр. Јығылан һесабатлар катибә өтүрүлүр. Тәблиғчиләр һесабатларыны вахтында вермәклә груп нәзарәтчисинә көмәк етмиш олурлар. Онлар һесабаты һәр ајын ахырында груп нәзарәтчисинә верә вә ја ибадәт евиндәки һесабат гутусуна ата биләрләр.

ЈЫҒЫНҸАҒЫН ХИДМӘТ КОМИТӘСИ

³⁵ Мүәјјән мәсулијјәтләри ағсаггал шурасынын координаторундан, катибдән вә хидмәт нәзарәтчисиндән ибарәт јығынҹағын хидмәт комитәси иҹра едир. Мәсәлән, хидмәт комитәси ибадәт евиндә тој вә јас мәрасимләринин кечирилмәсинә иҹазә верир вә тәблиғчиләри тәблиғ групларына тәјин едир. Комитә һәмчинин өнҹүл вә көмәкчи өнҹүл әризәләрини, еләҹә дә хидмәтлә бағлы бир сыра әризәләри тәсдиг едир. Хидмәт комитәси ағсаггаллар шурасынын нәзарәти алтында фәалијјәт ҝөстәрир.

³⁶ Филиал бу гардашларын, еләҹә дә «Ҝөзәтчи гүлләси» мүзакирәсини апаран гардашын, Мәсиһи һәјаты вә ибадәти ҝөрүшүнүн нәзарәтчисинин вә ағсаггаллар шурасыны тәшкил едән диҝәр гардашларын мәсулијјәтләринә даир ҝөстәришләр верир.

³⁷ Һәр јығынҹағын ағсаггаллар шурасы мүнтәзәм ҝөрүшүб јығынҹағын руһани рифаһы илә бағлы мәсәләләри мүзакирә едир. Бу ҝөрүшләр һәр дәфә рајон нәзарәтчиси зијарәт едән заман, еләҹә дә һәр зијарәтдән үч ај сонра кечирилир. Сөзсүз, еһтијаҹ јаранарса, ағсаггаллар истәдикләри вахт бу ҹүр ҝөрүш тәшкил едә биләрләр.

ИТӘАТКАРЛЫГ

³⁸ Нәзарәтчиләр гејри-камил инсанлардыр. Буна бахмајараг, бүтүн јығынҹаг онлара табе олмалыдыр. Чүнки онлары Јеһова тәјин едиб. Нәзарәтчиләр Онун гаршысында мәсулијјәт дашыјырлар. Онлар Јеһованы вә Онун рәһбәрлијини тәмсил едирләр. Ибраниләрә 13:17 ајәсиндә јазылыб: «Сизә рәһбәрлик едәнләрә итаәт един, онлара табе олун, ахы онлар һесабат верәҹәк адамлар кими ҝеҹә-ҝүндүз сизин гејдинизә галырлар. Гојун онлар буну аһ-зарла јох, севинҹлә етсинләр ки, сизә зәрәр дәјмәсин». Әҝәр гардаш артыг руһун бәһрәсини тәзаһүр етдирмирсә вә Мүгәддәс Китабын тәләбләринә ујғун јашамырса, онда Јеһова ону мүгәддәс руһу илә тәјин етдији кими, бу руһ васитәсилә дә тәјинатдан узаглашдыраҹаг.

³⁹ Чәкдикләри зәһмәтә вә јахшы нүмунә гојдугларына ҝөрә ағсаггаллара миннәтдар олмалыјыг. Булус Салоники јығынҹағына јаздығы мәктубда гардашлара белә бир мәсләһәт верир: «Гардашлар, сиздән риҹа едирик ки, аранызда зәһмәт чәкәнләрә, Ағанын ишиндә сизә рәһбәрлик едәнләрә вә сизә нәсиһәт верәнләрә һөрмәт ҝөстәрәсиниз, чәкдикләри зәһмәтә ҝөрә онлара бөјүк еһтирам вә мәһәббәт бәсләјәсиниз» (1 Салон. 5:12, 13). Ағсаггалларын зәһмәти бизә Аллаһа ибадәт етмәјә көмәк едир вә севинҹимизи артырыр. Булус һәмчинин Тимутијә биринҹи мәктубунда јығынҹагдакыларын ағсаггаллара мүнасибәти илә бағлы јазыр: «Јығынҹағы јахшы идарә едән ағсаггаллар, хүсусән дә, Аллаһын сөзүнү ҹидд-ҹәһдлә данышан вә өјрәдән ағсаггаллар икигат һөрмәтә лајиг ҝөрүлмәлидирләр» (1 Тим. 5:17).

ТӘШКИЛАТДА ДИҜӘР МӘСУЛИЈЈӘТЛӘР

⁴⁰ Бәзән бир нечә ағсаггал Хәстәләрә зијарәт групуна тәјин олунур. Бир нечәси исә Хәстәханаларла әлагә комитәсиндә хидмәт едир, хәстәханалара ҝедир, һәкимләри Јеһованын Шаһидләрини гансыз мүалиҹә етмәјә вә бу мүалиҹә үсулундан даһа ҝениш шәкилдә истифадә етмәјә тәшвиг едир. Диҝәр ағсаггаллар ибадәт евләринин, топланты залларынын тикинтисиндә вә онлара техники хидмәт ҝөстәрилмәсиндә көмәк етмәклә вә ја реҝионал топланты комитәсинин үзвү кими хидмәт етмәклә Аллаһын ишини ирәли апарырлар. Бу гардашларын ағыр зәһмәти вә бу ҹүр фәдакарлығы тәшкилат тәрәфиндән јүксәк гијмәтләндирилир. Бәли, биз белә адамларын гәдрини билмәлијик (Филип. 2:29).

РАЈОН НӘЗАРӘТЧИСИ

⁴¹ Рәһбәрлик Шурасы тәләбләрә ујғун ҝәлән ағсаггалларын рајон нәзарәтчиси тәјин олунмаларына нәзарәт едир. Филиал исә бу гардашлары бир рајона аид јығынҹаглара илдә ики дәфә зијарәт етмәјә тәјин едир. Рајон нәзарәтчиләри һәмчинин уҹгар әразиләрдә хидмәт едән өнҹүлләрә вахташыры баш чәкирләр. Онлар ҹәдвәл тутуб ҝәлишләри барәдә јығынҹаглара кифајәт гәдәр әввәлдән хәбәр ҝөндәрирләр ки, бу зијарәт јығынҹаглара даһа чох фајда ҝәтирсин.

⁴² Ағсаггаллар шурасынын координатору зијарәтлә бағлы ишләри елә тәшкил етмәлидир ки, һамы руһани тәравәт алсын (Ром. 1:11, 12). Бу гардаш рајон нәзарәтчисинин зијарәти, еләҹә дә онун вә әҝәр евлидирсә, һәјат јолдашынын тәләбатлары барәдә мәлумат алдыгдан сонра гардашларын көмәјилә онлара галмаға јер һазырлајыр вә саирә еһтијаҹларынын гајғысына галыр. Координатор нәзарәт етмәлидир ки, һамынын, еләҹә дә рајон нәзарәтчисинин ҝөрүлән тәдбирләрдән хәбәри олсун.

⁴³ Рајон нәзарәтчиси ағсаггаллар шурасынын координатору илә әлагә сахлајыб јығынҹаг вә тәблиғ ҝөрүшләринин ҹәдвәлини дәгигләшдирмәлидир. Ҹәдвәл тәртиб олунанда рајон нәзарәтчисинин тәклифләри вә филиалын ҝөндәрдији ҝөстәришләр нәзәрә алынмалыдыр. Јығынҹаг ҝөрүшләринин, өнҹүлләрлә ҝөрүшүн, ағсаггалларла вә јығынҹаг көмәкчиләри илә ҝөрүшүн, һәмчинин тәблиғ ҝөрүшләринин вахты вә јери һамыја билдирилмәлидир.

⁴⁴ Чәршәнбә ахшамы наһардан сонра рајон нәзарәтчиси јығынҹағын тәблиғчиләринин һесабат карточкаларыны, јығынҹаг ҝөрүшләринә ҝәләнләрин сајыны, саһәләрлә бағлы гејдләри вә малијјә һесабатыны јохлајыр. Бу, она јығынҹағын тәләбатларыны вә бу сәнәдләрә бахан гардашларын һансы көмәјә еһтијаҹ дујдуғуну мүәјјән етмәјә көмәк едәҹәк. Ағсаггаллар шурасынын координатору бу сәнәдләри габагҹадан һазырлајыб рајон нәзарәтчисинә чатдырмалыдыр.

⁴⁵ Рајон нәзарәтчиси зијарәт заманы баҹардығы гәдәр вахт ајырыб баҹы-гардашларла ајры-ајрылыгда үнсијјәт едир. Мәсәлән, ибадәт ҝөрүшүндә, тәблиғдә, наһар едәндә вә саирә вахтларда. Бундан әлавә, о, ағсаггаллар вә јығынҹаг хидмәтчиләри илә ҝөрүшүб онлара мәсулијјәтләрини јеринә јетирмәјә, сүрүнүн гајғысына галмаға көмәк едән Мүгәддәс Китаба әсасланмыш мүнасиб мәсләһәт вә төвсијәләр верир, онлары руһландырыр (Мәс. 27:23; Һәв. 20:26—32; 1 Тим. 4:11—16). Һәмчинин өнҹүлләрлә ҝөрүшүб онлары даһа бөјүк һәвәслә тәблиғ етмәјә тәшвиг едир вә хидмәтдә гаршылашдыглары чәтинликләри ашмаға көмәк едән мәсләһәтләр верир.

⁴⁶ Әҝәр башга мәсәләләрдә көмәјә еһтијаҹ јаранарса, рајон нәзарәтчиси әлиндән ҝәләни едәҹәк ки, һәфтә әрзиндә мәсәлә һәлл олунсун. Әҝәр һәфтә әрзиндә мәсәлә һәлл олунмаса, рајон нәзарәтчиси ағсаггаллара вә ја бу ишлә әлагәси олан адамлара бу мәсәлә илә бағлы Мүгәддәс Китаб әсасында арашдырма апармаға көмәк едәҹәк. Әҝәр мәсәлә илә бағлы филиалын өһдәсинә дүшән бир иш варса, рајон нәзарәтчиси вә ағсаггаллар ора бу һагда әтрафлы мәлумат ҝөндәрмәлидир.

⁴⁷ Зијарәт вахты рајон нәзарәтчиси һәфтәлик ибадәт ҝөрүшләриндә иштирак едир. Ола билсин, бу ҝөрүшләрин кечирилмә гајдасына филиалдан ҝәлән рәһбәрлик әсасында вахташыры дүзәлишләр едилсин. Рајон нәзарәтчиси јығынҹағы руһландыран, һәвәсләндирән, елмләндирән вә мөһкәмләндирән мәрузәләр сөјләјир. О, баҹы-гардашларын Јеһова Аллаһа, Иса Мәсиһә вә тәшкилата олан мәһәббәтини аловландырмаға чалышыр.

⁴⁸ Рајон нәзарәтчисинин ҝәлишинин мәгсәдләриндән бири баҹы-гардашларын хидмәтдә шөвгүнү артырмаг вә фајдалы мәсләһәтләр вермәкдир. Јығынҹагдакыларын чоху өз ишләрини елә дүзүб-гошурлар ки, һәмин һәфтә шаһидлик ишиндә там иштирак едә билсинләр. Бунун үчүн бәзиләри рајон нәзарәтчисинин зијарәт етдији ај көмәкчи өнҹүл кими хидмәт едирләр. Онунла вә ја һәјат јолдашы илә хидмәт етмәк истәјәнләр өз истәкләрини габагҹадан билдирмәлидирләр. Онлары Мүгәддәс Китаб дәрси кечмәјә вә тәкрар сөһбәтләр етмәјә апарсалар, даһа бөјүк фајдасы олар. Әзиз баҹы-гардашлар, сизә үрәкдән миннәтдарыг ки, зијарәт вахты хидмәтдә ҹанла-башла иштирак едирсиниз! (Мәс. 27:17).

⁴⁹ Һәр рајонда илдә ики дәфә рајон топлантысы кечирилир. Бу тәдбирләрин тәшкили рајон нәзарәтчисинин үзәринә дүшүр. О, рајон топлантысы үчүн рајон топлантысы нәзарәтчиси вә рајон топлантысы нәзарәтчисинин көмәкчисини тәјин едир. Онлар рајон топлантысынын тәшкилиндә рајон нәзарәтчиси илә сых әмәкдашлыг едирләр. Бунун сајәсиндә рајон нәзарәтчиси бүтүн диггәтини топлантынын програмына ҹәмләјә билир. Рајон нәзарәтчиси һәмчинин мүнасиб гардашлары топлантынын мүхтәлиф шөбәләринә тәјин едир. О һәмчинин һәр рајон топлантысындан сонра рајонун малијјә һесабатынын јохланмасы үчүн тәдбир ҝөрүр. Ики рајон топлантысындан бири дәвәт олунмуш натиг гисминдә чыхыш едән филиал нүмајәндәсинин иштиракы илә кечирилир. Јолун узаглығы вә ја топланты кечирилән јерин кичик олмасы сәбәбиндән бәзи рајонлар бир нечә һиссәјә бөлүнүр вә һәр һиссә үчүн ајрылыгда рајон топлантысы кечирилир.

⁵⁰ Рајон нәзарәтчиси өз тәблиғ һесабатыны һәр ајын ахыры филиала ҝөндәрир.Әҝәр онун хидмәти илә бағлы хәрҹләри, мәсәлән, јол, јемәк, галмаг үчүн јер вә саирә хәрҹләр јығынҹаг тәрәфиндән өдәнилмирсә, о, хәрҹләрин өдәнилмәси үчүн филиала мүраҹиәт едә биләр. Рајон нәзарәтчиләри әминдирләр ки, онлар Јеһова Аллаһын ишини һәр шејдән үстүн тутсалар, Иса Мәсиһин сөз вердији кими, Аллаһ онларын еһтијаҹларыны өдәјәҹәк (Лука 12:31). Јығынҹаглар онлара фәдакарҹасына хидмәт едән ағсаггаллара гонагпәрвәрлик ҝөстәрмәји өзләринә шәрәф билмәлидирләр (3 Јәһ. 5—8).

ФИЛИАЛ КОМИТӘСИ

⁵¹ Јеһованын Шаһидләринин бүтүн филиалларында үч вә ја даһа чох гардашдан ибарәт филиал комитәси фәалијјәт ҝөстәрир. Бу гардашлар мүәјјән тәләбләрә ҹаваб верән вә руһани ҹәһәтдән јеткин инсанлардыр. Комитә филиалын нәздиндә олан өлкәнин вә ја өлкәләрин мүждәчилик фәалијјәтинә рәһбәрлик едир. Филиал комитәсинин үзвләриндән бири комитәнин координатору вәзифәсини јеринә јетирир.

⁵² Филиал комитәсиндә хидмәт едән гардашлар филиалын әразисиндәки јығынҹаглара аид мәсәләләри һәлл едир. Комитә филиалын әразисиндә Падшаһлыг һагда хош хәбәрин тәблиғ ишинә нәзарәт едир, еләҹә дә саһәнин тәләбатыны өдәмәк үчүн јығынҹаг вә теократик рајонларын тәшкил едилмәсинин гајғысына галыр. Һәмчинин филиал комитәси хүсуси тәјинатлы мүждәчиләрин, хүсуси өнҹүлләрин, өнҹүлләрин вә көмәкчи өнҹүлләрин хидмәтинә диггәт јетирир. Бөјүк топлантылар заманы һәр шејин әдәб-әрканла вә низамла олмасы үчүн комитә зәрури тәдбирләр ҝөрүр вә гардашлара мүвафиг тапшырыглар верир (1 Кор. 14:40).

⁵³ Бәзи өлкәләрдә өлкә комитәси тәјин олунур вә бу комитәнин фәалијјәти башга өлкәдәки филиал комитәсинин нәзарәти алтында һәјата кечирилир. Бунун сајәсиндә өлкә комитәсинин хидмәт етдији әразидә нәзарәт ишини һәјата кечирмәк даһа раһат олур. Өлкә комитәси Бејтел комплексинин вә офисин гајғысына галыр, мәктуб вә һесабатларла мәшғул олур, еләҹә дә һәмин әразинин тәблиғ фәалијјәтинә нәзарәт едир. Өлкә комитәсинин филиал комитәси илә сых әмәкдашлығы сајәсиндә Аллаһын иши ирәли ҝедир.

⁵⁴ Филиал вә өлкә комитәсинин үзвләрини Рәһбәрлик Шурасы тәјин едир.

БАШ ИДАРӘНИН НҮМАЈӘНДӘЛӘРИ

⁵⁵ Рәһбәрлик Шурасы вахташыры филиаллара баш чәкмәк үчүн гардашлар тәјин едир. Бу гардашлар баш идарәни тәмсил едирләр. Онларын әсас иши Бејтел аиләсини руһландырмаг, филиал комитәсинә тәблиғ вә шаҝирд һазырламагла бағлы јаранан суал вә проблемләрин һәллиндә көмәк етмәкдир. Бу гардашлар һәмчинин рајон нәзарәтчиләри илә, еләҹә дә вахташыры хүсуси тәјинатлы мүждәчиләрлә ҝөрүш кечирирләр. Бу заман онларын проблем вә тәләбатларыны мүзакирә едир вә онлары ән ваҹиб ишдә — Падшаһлығын тәблиғи вә шаҝирд һазырламаг ишиндә фәал олмаға тәшвиг едирләр.

⁵⁶ Баш идарәнин нүмајәндәләри Падшаһлығын тәблиғ иши вә јығынҹагларын диҝәр ишләриндәки наилијјәтләри илә марагланырлар. Вахт имкан верирсә, онлар филиалын нәздиндәки тәрҹүмә офисләринә дә баш чәкирләр. Онлар филиала баш чәкәркән чалышырлар ки, мүждәчилик ишиндә дә иштирак етсинләр.

МӘҺӘББӘТ ДОЛУ НӘЗАРӘТ

⁵⁷ Јеткин гардашларын ағыр зәһмәти вә гајғысы бизим рифаһымыза хидмәт едир. Аллаһын халгынын гајғысыны чәкмәјә тәјин едилмиш нәзарәтчиләрә итаәт етмәклә јығынҹағын башы Мәсиһ Иса илә вәһдәтдә оларыг (1 Кор. 16:15—18; Ефес. 1:22, 23). Бунун сајәсиндә Аллаһын руһу бүтүн дүнјадакы јығынҹаглара тәсир едир вә Аллаһын Кәламы үмумдүнја мүждәчилик ишинә рәһбәрлик едир (Зәб. 119:105).