Јарышда дөзүмлә гач
«Ҝәлин... дөзүмлә гачараг гаршымыздакы мәсафәни гәт едәк» (ИБР. 12:1).
1, 2. Һәвари Павел мәсиһчи һәјатыны нә илә мүгајисә етмишди?
ҺӘР ИЛ бир чох јерләрдә марафон гачышлары кечирилир. Бу јарыша гатылан пешәкар идманчыларын јеҝанә мәгсәди галиб ҝәлмәкдир. Әксәр иштиракчыларын мәгсәди исә елә дә бөјүк олмур — онлар үчүн финиш хәттинә чатмаг артыг бөјүк наилијјәтдир.
2 Мүгәддәс Китабда мәсиһчи һәјаты гачышла мүгајисә олунур. Һәвари Павел гәдим Коринф шәһәриндәки һәмиманлыларына јаздығы биринҹи мәктубда онларын диггәтини бу мәгама јөнәлтди. Биз охујуруг: «Мәҝәр билмирсиниз ки, јарышда иштирак едән гачышчыларын һамысы гачыр, анҹаг јалныз бири мүкафата лајиг ҝөрүлүр? Сиз дә елә гачын ки, мүкафаты аласыныз» (1 Кор. 9:24).
3. Нәјә ҝөрә Павел гачышда иштирак едәнләрдән јалныз бир нәфәрин галиб ҝәлдијини јазыр?
3 Павел белә демәклә һәмин мәсиһчиләрдән јалныз бир нәфәрин һәјат мүкафатыны алаҹағыны, галанларынын исә бу јарышда әбәс јерә иштирак етдијиними нәзәрдә тутурду? Әлбәттә ки, јох! Јарышда иштирак едән идманчылар галиб ҝәлмәк үчүн чох ҹидди шәкилдә мәшг едирдиләр вә јарыш заманы вар ҝүҹләри илә гачырдылар. Павел дә истәјирди ки, һәмиманлылары һәјат уғрунда ҝедән гачышда мәһз бу ҹүр иштирак етсинләр. Јалныз белә олдугда онлар мүкафаты — әбәди һәјаты алмаларына үмид едә биләҹәкдиләр. Бәли, бу јарышда иштирак едиб сонадәк мәсафәни гәт едән мәсиһчиләрин һамысы һәмин мүкафаты алыр.
4. Мәсиһчиләр иштирак етдикләри гачышла әлагәдар нәји билмәлидирләр?
4 Һәјат уғрунда ҝедән гачыша гатыланлар үчүн Павелин бу сөзләри нә гәдәр руһландырыҹы олса да, онлары ҹидди дүшүнмәјә вадар едир. Нәјә ҝөрә? Чүнки мүкафат — истәр ҝөјләр һәјаты, истәрсә дә јерүзү Ҹәннәтдә әбәди һәјат һеч нә илә мүгајисә олуна билмәз. Етираф етмәк лазымдыр ки, гаршымыздакы мәсафә узун вә ағырдыр; бу јолда биз чохлу манеәләр, диггәти јајындыран шејләр вә чәтинликләрлә үзләширик (Мат. 7:13, 14). Әфсуслар олсун ки, бәзиләри сүрәтләрини азалтмышлар вә һәтта јарышы дајандырмышлар. Јарышда иштирак едән мәсиһчиләрин бу јолда үзләшдикләри тәлә вә тәһлүкәләр һансылардыр? Бу проблемләрдән неҹә гачынмаг олар? Јарышы уғурла баша вурмаг вә галиб ҝәлмәк үчүн биздән нә тәләб олунур?
Галиб ҝәлмәк үчүн дөзүм ҝәрәкдир
5. Павел Ибраниләрә 12:1 ајәсиндә гачышла әлагәдар нәји ачыглады?
5 Павел Јерусәлим вә Јәһудејада јашајан ибрани мәсиһчиләр үчүн мәктубунда бир даһа гачышла әлагәдар мәгамлара тохунур. (Ибраниләрә 12:1 ајәсини оху.) О нәинки гачышда иштирак етмәјин сәбәбләриндән данышыр, һәмчинин галиб ҝәлмәк үчүн биздән нә тәләб олундуғуну да ачыглајыр. Ҝәлин ҝөрәк Павели бу мәктубу јазмаға нә вадар етмишди вә о, охуҹуларыны нәјә тәшвиг етмәк истәјирди. Сонра биз Павелин ибрани мәсиһчиләрә үнванладығы мәсләһәти вә ондан һансы ибрәт дәрси ҝөтүрә биләҹәјимизи арашдыраҹағыг.
6. Јәһуди дин рәһбәрләри мәсиһчиләри неҹә тәгиб едирдиләр?
6 Аллаһын биринҹи әсрдә јашајан хидмәтчиләринин, хүсусилә дә Јерусәлим вә Јәһудејадакы мәсиһчиләрин сынаг вә чәтинликләри аз дејилди. Халг арасында һәлә дә сөзү кечән јәһуди дин рәһбәрләри һәмин мәсиһчиләрә ҝүн вериб ишыг вермирдиләр. Бир гәдәр әввәл бу дин рәһбәрләри әлләриндән ҝәләни едәрәк Иса Мәсиһин гијамчы кими мүһакимә олунмасына вә ҹани кими едам едилмәсинә мүвәффәг олмушдулар. Онларын мәсиһчиләри тәгиб етмәкдән әл чәкмәк фикирләри јох иди. Мәсәлән, «Һәвариләрин ишләри» китабында биз охујуруг ки, ерамызын 33-ҹү илиндә Әллинҹи ҝүн бајрамында баш вермиш мөҹүзәви һадисәдән сонра онлар дәфәләрлә мәсиһчиләрә һәдә-горху ҝәлмиш вә дурмадан онлары тәгиб етмишдиләр. Садиг мәсиһчиләр сөзүн әсил мәнасында зүлм чәкирдиләр (Һәв. иш. 4:1—3; 5:17, 18; 6:8—12; 7:59; 8:1, 3).
7. Биринҹи әсрдәки мәсиһчиләрин һәјатыны нә ағырлашдырырды?
7 Үстәлик, бу мәсиһчиләр јәһуди системинин дағылмасы әрәфәсиндә јашајырдылар. Иса јәһуди халгынын башына ҝәләҹәк фәлакәт барәдә габагҹадан хәбәр вермишди. О һәмчинин өз давамчыларына сон ҝәлмәздән өнҹә нәләрин баш верәҹәјини демишди, еләҹә дә сағ галмаг үчүн конкрет ҝөстәришләр вермишди. (Лука 21:20—22 ајәләрини оху.) Бунун үчүн онлар нә етмәли идиләр? Иса хәбәрдарлыг етмишди: «Өзүнүзә фикир верин, үрәјинизи гарынгулулуг, сәрхошлуг вә һәјатын гајғылары илә јүкләмәјин ки, о ҝүн үстүнүзә тор кими гәфләтән, бир ан ичиндә ҝәлмәсин» (Лука 21:34, 35).
8. Нәјә ҝөрә бәзи мәсиһчиләр сүрәтләрини азалтмыш вә ја јарышы дајандырмышлар?
8 Һәвари Павел ибраниләрә мәктуб јазанда Исанын бу хәбәрдарлығы сөјләмәсиндән тәхминән 30 ил кечмишди. Бу илләр әрзиндә мәсиһчиләрлә нә баш вермишди? Ҝүндәлик проблемләр вә гајғылар бәзи мәсиһчиләри о дәрәҹәдә өз ағушуна алмышды ки, онлар руһани инкишафларыны дајандырмышдылар. Әслиндә исә, онлар ирәли ҝедәрәк руһән мөһкәм гала биләрдиләр (Ибр. 5:11—14). Диҝәр мәсиһчиләр фикирләширдиләр ки, әҝәр әксәр јәһудиләр кими јашасалар, һәјатлары даһа раһат олаҹаг. Бу јәһудиләр Јеһоваја ибадәтдән тамамилә әл чәкмәмишдиләр, садәҹә олараг Мусанын бәзи ганунларына риајәт едирдиләр. Еркән мәсиһчи јығынҹагларында Мусанын Ганунуна вә јәһуди адәт-әнәнәләринә риајәт етмәјин ваҹиб олдуғуна башгаларыны инандырмаға чалышан мәсиһчиләр дә вар иди вә бәзи мәсиһчиләр онлара инанырдылар, диҝәрләри исә горхдуглары үчүн онлара гулаг асырдылар. Павел бу мәсиһчиләрә руһән ајыг галмаға вә гачышы дөзүмлә давам етдирмәјә көмәк етмәк үчүн нә мәсләһәт ҝөрдү?
9, 10. а) «Ибраниләрә мәктуб»ун 10-ҹу фәслинин сонунҹу ајәләриндә Павел һансы руһландырыҹы сөзләр јазыб? б) Нәјә ҝөрә Павел гәдимдә јашамыш садиг шаһидләрин әмәлләри барәдә јазды?
9 Павелин Јеһовадан илһам алараг ибраниләрдән олан мәсиһчиләри неҹә руһландырдығы диггәтәлајигдир. Бу мәктубун онунҹу фәслиндә Павел вурғулады ки, Мусанын Гануну «ҝәләҹәк хејир-дуаларын... көлҝәси» иди. Еләҹә дә о, Мәсиһин фидјә гурбанлығынын дәјәринин үстүнлүјүнү ајдын шәкилдә ҝөстәрди. Һәмин фәслин сонунҹу ајәләриндә о, охуҹуларыны тәшвиг едир: «Аллаһын ирадәсини јеринә јетириб, Онун вәдинин иҹрасыны ҝөрмәк үчүн сиз ҝәрәк дөзүмлү оласыныз. Чүнки “лап аз” галыб вә “ҝәлишини ҝөзләдијимиз шәхс ҝәләҹәк, ләнҝимәјәҹәк”» (Ибр. 10:1, 36, 37).
10 «Ибраниләрә мәктуб»ун 11-ҹи фәслиндә Павел кечмишдә јашамыш вә бөјүк иман саһиби олан киши вә гадынларын нүмунәси әсасында әсил иманын нә демәк олдуғуну мәһарәтлә изаһ етди. Онун ҝәтирдији бу нүмунәләр јерсиз идими? Әсла! Павел истәјирди ки, һәмиманлылары иманын ҹәсарәт вә дөзүм тәләб етдијини дәрк етсинләр. Гәдимдә јашамыш Јеһованын бу садиг хидмәтчиләринин ҝөзәл нүмунәси ибрани мәсиһчиләри мөһкәмләндирәрәк сынаг вә чәтинликләрин өһдәсиндән ҝәлмәјә көмәк едәҹәкди. О, гәдимдә јашамыш Аллаһын садиг хидмәтчиләринин имандан ирәли ҝәлән әмәлләрини садаладыгдан сонра деди: «Бу ҹүр бөјүк шаһидләр булуду илә әһатә олундуғумуз үчүн ҝәлин бизә ағырлыг едән һәр шеји вә ајагларымыза долашан ҝүнаһы әјнимиздән чыхараг вә дөзүмлә гачараг гаршымыздакы мәсафәни гәт едәк» (Ибр. 12:1).
«Шаһидләр булуду»
11. «Бөјүк шаһидләр булуду»нун нүмунәси үзәриндә дүшүнмәк бизә неҹә тәсир едә биләр?
11 «Бөјүк шаһидләр булуду», мәҹази диллә десәк, кәнарда дуруб јарыша тамаша едән вә ја севимли идманчыларына, јахуд командаларына азаркешлик едән кәсләр дејилдиләр. Мәсиһчиликдән өнҹә јашајан Јеһованын бу садиг хидмәтчиләри јарышын фәал иштиракчылары иди. Онлар гаршыларындакы мәсафәни уғурла гачараг јарышда галиб ҝәлмишдиләр. Һәјатда олмасалар да, сынагдан чыхмыш бу «идманчылар» јарыша тәзәҹә гошуланлар үчүн ҝөзәл нүмунә ола биләрдиләр. Тәсәввүр едирсиниз, јени иштиракчылар пешәкар идманчыларын әһатәсиндә олдугларыны вә ја онлар тәрәфиндән тамаша едилдикләрини билсәјдиләр, һансы һиссләр кечирәрдиләр? Мәҝәр бу, онлары әлләриндән ҝәләни, һәтта бундан да артығыны етмәјә тәшвиг етмәзди? Гәдимдә јашамыш бу шаһидләр тәсдигләјә биләрдиләр ки, нә гәдәр чәтин олса да, јарышда галиб ҝәлмәк мүмкүндүр. «Шаһидләр булуду»нун нүмунәсини јадда сахлајараг биринҹи әсрдәки ибрани мәсиһчиләр дә ҹәсарәт нүмајиш етдирә вә «дөзүмлә гачараг» мәсафәни гәт едә биләрдиләр. Биз дә буну баҹара биләрик.
12. Павелин нүмунә кими чәкдији инсанларла бизим арамызда һансы охшарлыглар вар?
12 Павелин өз мәктубунда адларыны чәкдији бир чох садиг шаһидләрин шәраит вә вәзијјәти ејнилә бизимки кими иди. Мәсәлән, Нуһ гәдим дүнјанын мәһви әрәфәсиндә јашајырды. Биз дә бу системин сонунда јашајырыг. Ибраһим вә Сара доғма дијарларыны тәрк едиб өзләрини һәгиги ибадәтә һәср етмәли вә Јеһованын вәдинин јеринә јетмәсини ҝөзләмәли идиләр. Биз дә өзүмүзү инкар етмәли, еләҹә дә Јеһованын рәғбәтини вә Онун бизим үчүн һазырладығы хејир-дуалары газанмаға чалышмалыјыг. Муса исә Вәд едилмиш дијара ҝәлиб чатмаг үчүн тәһлүкәләрлә долу олан сәһрада долашмалы иди. Өз сонуна јахынлашан бу дүнјада јашајан бизләр дә вәд едилмиш јени дүнјаја үз тутуруг. Мүхтәлиф чәтинликләрлә үзләшән, еләҹә дә уғурлары вә сәһвләри, зәиф вә мөһкәм ҹәһәтләри олан бу инсанларын нүмунәләрини, һәгигәтән дә, арашдырмаға дәјәр (Ром. 15:4; 1 Кор. 10:11).
Онларын мүвәффәгијјәт газанмаларынын сирри
13. Нуһ һансы чәтинликләрлә үзләшди вә онларын өһдәсиндән ҝәлмәкдә Нуһа нә көмәк етди?
13 Јеһованын бу садиг хидмәтчиләринә јарышда дөзүмлә гачмаға вә ону мүвәффәгијјәтлә баша вурмаға нә көмәк етмишди? Павелин Нуһ һаггында дедикләринә нәзәр салаг. (Ибраниләрә 11:7 ајәсини оху.) Нуһ «һәлә ҝөрүнмәјән шејләрлә» бағлы Аллаһ тәрәфиндән хәбәрдар едилмишди. Бүтүн ҹанлылары мәһв едән дашгынын нә олдуғуну Нуһ һәлә билмирди (Јар. 6:17). Бәшәр тарихиндә белә һадисә һәлә олмамышды. Бунунла белә, Нуһ бунун мүмкүнсүз олдуғуну дүшүнмәди. Нәјә ҝөрә? Чүнки о, Јеһованын Өз дедијинә әмәл едәҹәјинә иман едирди. Нуһ фикирләшмирди ки, Аллаһын она вердији тапшырыг һәддән артыг чәтиндир. Әксинә, «Аллаһ она неҹә әмр етмишдисә, о да һәр шеји еләҹә јеринә јетирди» (Јар. 6:22). Тәсәввүр едирсиниз, Нуһ нә етмәли иди? О, ҝәми тикмәли, һејванлары онун ичәрисинә јығмалы, һәм өзләри, һәм дә һејванлар үчүн азугә топламалы, тәблиғ едәрәк инсанлары хәбәрдар етмәли вә аиләсинин руһанилијинин гејдинә галмалы иди. Нуһ үчүн Јеһованын тапшырыгларыны јеринә јетирмәк һеч дә асан олмајыб. Буна бахмајараг, Нуһун иманы вә дөзүмлүјү сајәсиндә о, аиләси илә бирҝә бөјүк хејир-дуалар алды вә сағ галды.
14. Ибраһимлә Сара һансы сынаглара таб ҝәтирдиләр вә онларын нүмунәсиндән биз нә өјрәнирик?
14 «Бөјүк шаһидләр булуду» сијаһысында адлары чәкилән нөвбәти шәхсләр Ибраһимлә Сарадыр. Онлар Ур шәһәриндә өјрәшдикләри шәраити архада гојуб, јени һәјата башламалы идиләр. Ибраһимлә Сара гаршыда онлары нә ҝөзләјәҹәјиндән бихәбәр идиләр. Онлар чәтин шәраитләрдә сарсылмаз иман вә итаәткарлыг нүмајиш етдирәрәк бөјүк нүмунә гојмушлар. Һәгиги ибадәт уғрунда Ибраһимин вердији гурбанлары нәзәрә алсаг, Мүгәддәс Китабда онун «иман ҝәтирәнләрин атасы» адланмасы тәәҹҹүблү дејил (Ром. 4:11). Павел Ибраһимин һәјаты илә јахшы таныш олан инсанларын билдикләри мәгамларын јалныз бәзиләринә тохунду. Буна бахмајараг, Павелин чыхардығы нәтиҹә чох тәсирли иди: «Бу адамларын һамысы [Ибраһим вә онун аиләси дә дахил олмагла] һәјаты иманла баша вурдулар. Онлар вәд едилән шејләри алмасалар да, онлары узагдан ҝөрдүләр вә алгышладылар, һәмчинин о торпагда гәриб вә мүвәггәти сакин олдугларыны бәјан етдиләр» (Ибр. 11:13). Бәли, онларын Јеһоваја олан иманы вә Онунла сых мүнасибәтләри гаршыларындакы мәсафәни дөзүмлә гәт етмәјә көмәк етди.
15. Мусаны Мисирдәки һәјатыны ҝеридә гојуб Аллаһын халгы илә әзијјәтә гатлашмаға нә тәшвиг етмишди?
15 «Шаһидләр булуду»нун арасында Јеһованын диҝәр нүмунәви хидмәтчиси олан Мусанын да ады чәкилир. О, «Аллаһын халгы илә бирликдә әзијјәтә гатлашмағы үстүн [тутараг]» Мисирдәки фираван һәјатыны вә јүксәк мөвгејини архада гојду. Ону буна нә тәшвиг етмишди? Павел ҹаваб верир: «[Муса] ҝөзүнү алаҹағы мүкафатдан чәкмирди... Ҝөзәҝөрүнмәз Аллаһы ҝөрүрмүш кими мәтин иди». (Ибраниләрә 11:24—27 ајәләрини оху.) Муса «мүвәггәти һәзз» верән ҝүнаһын ардынҹа ҝетмәди. Аллаһ вә Онун вәдләри Муса үчүн о гәдәр реал иди ки, бу, ону мисилсиз ҹәсарәт вә дөзүм нүмајиш етдирмәјә тәшвиг етмишди. О, исраиллиләри Мисирдән чыхарыб јорулмаг билмәдән онлара Вәд едилмиш дијара апаран јолда рәһбәрлик едирди.
16. Нәјә ҝөрә Аллаһ Мусаја Вәд едилмиш дијара дахил олмаға иҹазә вермәјәндә о мәјуслуға гапылмады?
16 Ибраһим кими, Мусаја да Аллаһын вәдләринин јеринә јетмәсини өз ҝөзләри илә ҝөрмәк нәсиб олмады. Исраиллиләрин Вәд едилмиш дијара дахил олмаларындан бир гәдәр өнҹә Аллаһ Мусаја билдирди: «Өлкәни узагдан ҝөрәҹәксән, лакин Исраил өвладларына верәҹәјим торпаға ҝирмәјәҹәксән». Нәјә ҝөрә Аллаһ она Вәд едилмиш дијара дахил олмаға иҹазә вермәди? Чүнки бир гәдәр өнҹә халгын үсјанкарлығы уҹбатындан өзләриндән чыхан Муса вә Һарун «Мерива-Гадеш суларында, Исраил өвладларынын өнүндә» Аллаһы иззәтләндирмәдиләр (Ганун. т. 32:51, 52). Буна ҝөрә Муса мәјус олдуму, үрәјиндә кин сахладымы? Јох. Муса халга хејир-дуа верәрәк сөзләрини белә јекунлашдырды: «Еј Исраил! Нә бәхтијарсан, сәнин кимиси вармы? Рәббин гуртардығы халгсан! Рәбб сипәрдир, көмәјинә чатандыр, әзәмәтли гылынҹындыр» (Ганун. т. 33:29).
Бизим үчүн ибрәт дәрси
17, 18. а) Һәјат уғрунда ҝедән гачышла әлагәдар «шаһидләр булуду»на дахил олан инсанлардан нә өјрәнирик? б) Нөвбәти мәгаләдә сөһбәт нәдән ҝедәҹәк?
17 «Бөјүк шаһидләр булуду»на дахил олан инсанларын һәјатыны арашдырандан сонра тамамилә ајдындыр ки, гаршымыздакы мәсафәни сонадәк гачмаг үчүн биз Аллаһа вә Онун вәдләринә сәмими-гәлбдән иман етмәлијик (Ибр. 11:6). Иман бизим һәјатымызда икинҹи дәрәҹәли јох, әсас јери тутмалыдыр. Имансыз инсанлардан фәргли олараг, Јеһованын хидмәтчиләри билирләр ки, ҝәләҹәкдә онлары ҝөзәл һәјат ҝөзләјир. Биз «Ҝөзәҝөрүнмәз Аллаһы» ҝөрдүјүмүз үчүн гаршымыздакы мәсафәни дөзүмлә гачырыг (2 Кор. 5:7).
18 Мәсиһчиләр чох ағыр бир јарышда иштирак едирләр. Бунунла белә, јарышы мүвәффәгијјәтлә баша вурмаг мүмкүндүр. Бәс бизә даһа нә көмәк едә биләр? Бу һагда нөвбәти мәгаләдә өјрәнәҹәјик.
Изаһ едә биләрсинизми?
• Нәјә ҝөрә Павел гәдимдә јашамыш садиг шаһидләрдән бәһс етди?
• «Шаһидләр булуду»ну дүшүнҹәләримиздә ҹанландырмаг гаршымыздакы мәсафәни дөзүмлә гачмаға бизи неҹә тәшвиг едир?
• Нуһ, Ибраһим, Сара вә Муса кими садиг шаһидләрин нүмунәсиндән сән нә өјрәндин?
[19-ҹу сәһифәдәки шәкил]
Ибраһим вә Сара Ур шәһәриндәки раһат һәјатларыны архада гојмаға һазыр идиләр