Јеһованын Кәламы ҹанлыдыр
«Титуса», «Филимона» вә «Ибраниләрә» мәктублардан диггәтәлајиг фикирләр
ЕРАМЫЗЫН 61-ҹи илиндә Ромада илк һәбсдән азадлыға бурахыландан бир мүддәт сонра һәвари Павел Крит адасына баш чәкир. Јығынҹағын руһани ҹәһәтдән нә вәзијјәтдә олдуғуну ҝөрән Павел гардашлары мөһкәмләндирсин дејә Титусу бурада сахлајыр. Бир гәдәр сонра, еһтимал ки, Македонијадан Павел Титуса мәктубунда мәсулијјәтләринин өһдәсиндән ҝәлмәк үчүн ҝөстәришләр верир вә ону бу ишдә дәстәкләјир.
Бир гәдәр әввәл исә, ерамызын 61-ҹи илиндә һәбсдән бурахылдыгдан тез сонра Павел Колос шәһәриндә јашајан мәсиһчи Филимона хаһиш мәктубу јазмышды.
Тәхминән ерамызын 61-ҹи илиндә Павел Јәһудејадакы ибрани һәмиманлыларына мәсиһчилијин иудаизмин үзәриндә үстүнлүјүнү ҝөстәрән бир мәктуб да јазмышды. Бу мәктубларын һәр бириндә бизим үчүн дәјәрли дәрсләр вар (Ибр. 4:12).
САҒЛАМ ИМАНЫ ГОРУЈУБ САХЛАЈЫН
‘Бүтүн шәһәрләрдә ҹәмијјәт ағсаггаллары тәјин етмәк’ барәдә ҝөстәриш вердикдән сонра Павел Титуса мәсләһәт едир ки, «иманда сағлам олсунлар» дејә итаәтсизләри «сәрт шәкилдә мәзәммәт ет»син. О, Критдәки јығынҹагларда оланларын һамысына ‘Аллаһа гаршы һөрмәтсизлији рәдд едиб, бу дүнјада тәмкинли өмүр сүрмәји’ нәсиһәт едир (Тит. 1:5, 10-13; 2:12).
Павел Критдәки гардашлара сағлам иманларыны горујуб сахламаға көмәк етмәк үчүн башга мәсләһәтләр дә верир. О, Титуса дејир ки, ‘бош мүбаһисәләрдән вә мүгәддәс ганун әтрафында ҝедән мүнагишәләрдән узаг олсун’ (Тит. 3:9).
Мүгәддәс Китаб суалларына ҹаваблар:
1:15 — Неҹә ола биләр ки, «һәр шеј» ‘гәлби тәмиз оланлар үчүн тәмиздир’, «мурдарлар вә имансызлар үчүн исә тәмиз» дејил? Бу суала ҹаваб вермәк үчүн Павелин «һәр шеј» демәклә нәји нәзәрдә тутдуғуну билмәлијик. О, Аллаһын Кәламында бирбаша олараг мүһакимә едилән шејләри јох, Мүгәддәс Јазыларын мәсиһчиләрә виҹданларына әсасән гәрар гәбул етмәләринә јол вердији мүәјјән саһәләри нәзәрдә тутурду. Дүшүнҹәси Аллаһын нормаларына мүвафиг олан инсан үчүн белә шејләр тәмиздир. Дүшүнҹәси јанлыш вә виҹданы ләкәли оланлар үчүн исә бу тәмиз дејилa.
3:5 — Мәсһ олунмуш мәсиһчиләр һансы мәнада ‘су илә јујулмагла хилас едилир’ вә ‘мүгәддәс руһла тәзәләнирләр’? ‘Су илә хилас едилмәк’ о демәкдир ки, Аллаһ онлары Исанын фидијә гурбанлығынын ганынын дәјәри илә јујуб, јахуд тәмизләјиб. Онлар Аллаһын руһдан доғулан оғуллары кими ‘јени мәхлуг’ олдуглары үчүн ‘мүгәддәс руһла тәзәләнирләр’ (2 Кор. 5:17).
Бизим үчүн ибрәт дәрсләри:
1:10-13; 2:15. Мәсиһчи нәзарәтчиләри јығынҹагда олан сәһвләрә ҹәсарәтлә дүзәлиш вермәлидирләр.
2:3-5. Биринҹи әсрдә олдуғу кими, бу ҝүн дә јеткин мәсиһчи баҹылар ‘мүгәддәсләрә лајиг тәрздә давранмалы, ифтирачы, шәраб дүшкүнү олмамалы вә хејирхаһлыға’ өјрәтмәлидирләр. Белә етмәклә онлар јығынҹагдакы ‘ҝәнҹ гадынлара’ тәкликдә мәсләһәтләр верә биләрләр.
3:8, 14. ‘Хејирли ишләрлә мәшғул олмаға диггәт вермәјимиз јахшы вә фајдалыдыр’, чүнки бу, Аллаһа хидмәтдә сәмәрәли олмағымыза вә өзүмүзү бу пис дүнјадан горумағымыза көмәк едир.
«МӘҺӘББӘТЛӘ» ӨЈҮД ВЕРИН
Филимон ‘мәһәббәт вә иманда’ нүмунәви олдуғуна ҝөрә тәрифләнир. Онун һәмиманлылары үчүн тәравәт мәнбәји олмасы Павелә «бөјүк севинҹ вә тәсәлли» верир (Филим. 4, 5, 7).
Павел бүтүн нәзарәтчиләрә нүмунә верәрәк Онисимлә бағлы инҹә мәсәләни әмр вермәклә јох, «мәһәббәтлә» хаһиш едәрәк һәлл едир. О, Филимона дејир: «Сәнин итаәтинә әмин олараг, бунлары сәнә јазырам вә билирәм ки, дедикләримдән даһа артыг едәҹәксән» (Филим. 8, 9, 21).
Мүгәддәс Китаб суалларына ҹаваблар:
10, 11, 18 — Әввәлләр «фајдасыз» олан Онисим неҹә ‘фајдалы’ олду? Онисим Колосда јашајан Филимонун евиндән Ромаја гачмыш вә ағасына көнүлсүз хидмәт едән гул иди. Ола билсин, Онисим 1 400 километр мәсафәни гәт етмәк үчүн ағасындан пул да оғурламышды. Һәгигәтән дә о, Филимон үчүн фајдасыз иди. Амма Ромада Павелин көмәјилә мәсиһчи олду. Әввәлләр «фајдасыз» гул олан Онисим инди бир мәсиһчи гардаш кими ‘фајдалы’ олду.
15, 16 — Нәјә ҝөрә Павел Онисимә азадлыг бәхш етмәји Филимондан хаһиш етмәди? Павел ‘Аллаһын Сәлтәнәтини тәблиғ етмәк вә Иса Мәсиһ барәсиндәки һәгигәти өјрәтмәк’ тапшырығындан јајынмаг истәмирди. Буна ҝөрә дә о, гулдарлыг кими сосиал мәсәләләрә гарышмамаг гәрарына ҝәлди (Һәв. иш. 28:31).
Бизим үчүн ибрәт дәрсләри:
2. Филимон өз евини мәсиһчи ҝөрүшләри үчүн тәгдим етмишди. Евимиздә тәблиғ үчүн ҝөрүшләрин кечирилмәси шәрәфдир (Ром. 16:5; Колос. 4:15).
4-7. Иманда вә мәһәббәтдә нүмунәви олан һәмиманлыларымызы тәрифләмәлијик.
15, 16. Һәјатда һадисәләрин хошаҝәлмәз инкишафы һәддән артыг нараһатчылығымыза сәбәб олмамалыдыр. Онисимин һадисәсиндә олдуғу кими, һәр шеј бизим хејримизә чеврилә биләр.
21. Павел Филимондан Онисими бағышлајаҹағыны ҝөзләјирди. Бизим хәтримизә дәјән гардаш да биздән ону бағышламағымызы ҝөзләјә биләр (Мат. 6:14).
«КАМИЛЛИЈӘ ДОҒРУ ТӘРӘГГИ ЕДӘК»
Исанын гурбанлығына иманын Ганунун ишләриндән үстүн олдуғуну сүбут етмәк үчүн Павел мәсиһчилијин Банисинин, онун каһинлијинин, гурбанлығынын вә јени әһдин мөһтәшәмлијини вурғулајыр (Ибр. 3:1-3; 7:1-3, 22; 8:6; 9:11-14, 25, 26). Бу билик, тәбии ки, ибрани мәсиһчиләрә јәһудиләр тәрәфиндән мәруз галдыглары тәгибләрә таб ҝәтирмәјә көмәк етмишди. Павел ибраниләрдән олан һәмиманлыларыны ‘камиллијә доғру тәрәгги етмәјә’ тәшвиг едир (Ибр. 6:2).
Иман мәсиһчиләр үчүн нә дәрәҹәдә ваҹибдир? Павел јазыр: «Иман етмәдән Аллаһа мәгбул олмаг... гејри-мүмкүндүр». О, ибраниләри тәшвиг едир ки, ‘гаршыларына гојулан јарышда мәтанәтлә гачсынлар’ вә буну иманла етсинләр (Ибр. 11:6; 12:1).
Мүгәддәс Китаб суалларына ҹаваблар:
2:14, 15 — Шејтанын ‘өлүм јетирә билмәси’ (ЈД) истәдији һәр кәсә вахтсыз өлүм јетирә билдијиними ҝөстәрир? Хејр. Шејтан Еден бағында пислик јолуна гәдәм гојандан бәри онун јаланлары өлүмә сәбәб олур, чүнки Адәм ҝүнаһ ишләтди вә ҝүнаһла өлүмү бәшәр өвладларына өтүрдү (Ром. 5:12). Бундан әлавә, Шејтанын јер үзүндәки әлалтылары Аллаһын хидмәтчиләрини, Иса илә олдуғу кими, тәгиб едир вә һәтта өлдүрүрләр. Анҹаг бу о демәк дејил ки, о, истәдији һәр бир кәси өлдүрмәјә гадирдир. Әҝәр бу белә олсајды, шүбһә јохдур ки, Јеһованын хидмәтчиләрини јер үзүндән чохдан силәрди. Јеһова Өз халгыны бир груп шәклиндә мүдафиә едир вә Шејтанын онлары мәһв етмәсинә јол вермир. Аллаһ Шејтанын һүҹумлары нәтиҹәсиндә бизләрдән бәзиләринин өлмәсинә јол версә дә, әмин ола биләрик ки, О бизә дәјән һәр бир зәрәри арадан галдыраҹаг.
4:9-11 —Биз Аллаһын «истираһәтинә» неҹә ‘наил олуруг’? Јарадылышын алтынҹы ҝүнүнүн сонунда Аллаһ Јер күрәсинә вә бәшәријјәтә даир нијјәтинин һәјата кечәҹәјинә әмин олараг Өз ишләриндән истираһәт етди (Јар. 1:28; 2:2, 3). Биз әмәлләримизлә өзүмүзә бәраәт газандырмамагла вә Аллаһын хиласымыз үчүн вердији фидијә гурбанлығыны гәбул етмәклә бу ‘истираһәтә наил олуруг’. Өз марагларымызы ҝүдмәк әвәзинә, Јеһоваја иман тәзаһүр етдирәндә вә Онун Оғлуну итаәткарлыгла изләјәндә раһатлыг вә әмин-аманлыг кими хејир-дуалары һәр ҝүн алырыг (Мат. 11:28-30).
9:16 — Јени әһди ‘вәсијјәт едән’ кимдир? Јени әһди вәсијјәт едән Иса олса да, онун тәсисчиси Јеһова Аллаһдыр. Иса бу әһдин Вәсатәтчисидир вә бу әһд онун өз һәјатыны гурбан вермәси илә гүввәјә минди (Лука 22:20; Ибр. 9:15).
11:10, 13-16 — Ибраһимин ҝөзләдији ‘шәһәр’ нә иди? Бу, символик шәһәр иди. Ибраһим Мәсиһ Иса вә онун 144 000 һакимијјәт шәрикиндән ибарәт ‘сәмави Јерусәлими’ ҝөзләјирди. Сәмави иззәтә говушмуш бу һакимијјәт шәрикләри һәмчинин ‘мүгәддәс шәһәр, јени Јерусәлим’ адланырлар (Ибр. 12:22; Вәһј 14:1; 21:2). Ибраһим Аллаһын Падшаһлығынын рәһбәрлији алтында јашамағын һәсрәтини чәкирди.
12:2 — Иса «гаршысына гојулан» һансы «севинҹ уғрунда» ишҝәнҹә дирәјинә «тәһәммүл етди»? Јеһованын адынын тәгдис едилмәси, Аллаһын али һөкмранлығына бәраәт газандырылмасы вә өз һәјатыны фидијә вериб бәшәријјәти өлүмдән азад етмәк дә дахил олмагла, хидмәти сајәсиндә нәләрә наил олунаҹағыны билмәк она севинҹ ҝәтирирди. Иса Падшаһ кими һөкмранлыг едәҹәји вә Баш Каһин кими бәшәријјәтин хејринә хидмәт едәҹәји вахты да сәбирсизликлә ҝөзләјирди.
13:20 — Нәјә ҝөрә јени әһд «әбәди» адландырылыр? Бунун үч сәбәби вар: 1) о һеч вахт әвәз едилмәјәҹәк, 2) онун нәтиҹәси әбәди олаҹаг вә 3) ‘башга гојунлар’ јени әһддән Һар-Меҝидондан сонра да фајдаланаҹаглар (Јәһ. 10:16).
Бизим үчүн ибрәт дәрсләри:
5:14. Аллаһын Кәламы олан Мүгәддәс Китабы чалышганлыгла өјрәнмәли вә өјрәндикләримизи тәтбиг етмәлијик. Биз ‘хејирлә шәри ајырд етмәји’ башга јолла өјрәнә билмәрик (1 Кор. 2:10).
6:17-19. Аллаһын вәдинә вә андына әсасланан мөһкәм үмид һәгигәт јолуну азмамағымыза көмәк едәҹәк.
12:3, 4. Хырда сәһвләрә вә тәгибләрә ҝөрә ‘јорулуб тагәтдән дүшмәкдәнсә’, јеткинлијә ҹан атмалы вә сынаглара дөзмәји өјрәнмәлијик. Биз ‘ганымызы төкүнҹәјә кими’, јәни өлүмәдәк мүгавимәт ҝөстәрмәјә гәтијјәтли олмалыјыг (Ибр. 10:36-39).
12:13-15. Биз јол вермәмәлијик ки, «аҹы көк», јәни јығынҹагда ишләрин неҹә ҝөрүлдүјүнә наразылыг едән һәр бир кәс ‘ајагларымыз үчүн дүз ҹығырлар салмағымыза’ мане олсун.
12:26-28. Аллаһын јох, башгасынын әли илә «јарадылмыш шејләр», јәни бүтүн индики систем, һәтта ‘пис ҝөјләр’ сарсыдылыб јох едилмәлидир. Бу баш верәндә јалныз Падшаһлыг вә ону дәстәкләјәнләр ‘сарсылмајаҹаг’. Падшаһлығы сәјлә тәблиғ етмәк вә онун принсипләри әсасында јашамаг неҹә дә ваҹибдир!
13:7, 17. Јығынҹагдакы нәзарәтчиләрә итаәт етмәк вә табе олмаг нәсиһәтинә риајәт етмәк әмәкдашлыг руһуну тәзаһүр етдирмәјимизә көмәк едәҹәк.
[Һашијә]
a «Ҝөзәтчи Гүлләси»нин 2007-ҹи ил 1 нојабр сајынын 20, 21-ҹи сәһифәләринә бахын.