Сүлһә ҹан атын

«Ҝәлин сүлһә апаран... шејләрә ҹан атаг» (РОМ. 14:19).

1, 2. Нәјә ҝөрә Јеһованын Шаһидләри арасында әсил сүлһ һөкм сүрүр?

БУҜҮНКҮ дүнјада инсанлар арасында әсил сүлһдән әсәр-әламәт јохдур. Һәтта бир өлкәдә јашајан вә ејни дилдә данышан инсанлар белә бир-бири илә чәтин јола ҝедирләр. Онлар арасында дини, сијаси вә иҹтимаи ајры-сечкилик баш алыб ҝедир. Бу инсанлардан фәргли олараг, «һәр милләтдән, һәр гәбиләдән, һәр халгдан» олан Јеһованын хидмәтчиләри арасында, үмуми ҝөтүрдүкдә, әсил сүлһ һөкм сүрүр (Вәһј 7:9).

² Бу сүлһ тәсадүф нәтиҹәсиндә јаранмајыб. Бу, әсас етибарилә, ҝүнаһларымыза ҝөрә һәјатыны гурбан верән Иса Мәсиһә имандан ирәли ҝәлән «Аллаһла арамыздакы сүлһү»н нәтиҹәсидир (Ром. 5:1; Ефес. 1:7). Бундан әлавә, һәгиги Аллаһ Өз садиг хидмәтчиләринә мүгәддәс руһ верир. Билдијимиз кими, онун бәһрәсинин тәркиб һиссәләриндән бири дә сүлһдүр (Галат. 5:22). Арамызда сүлһ вә бирлијин һөкм сүрмәсинин диҝәр сәбәби исә бизим бу «дүнјаја мәхсус» олмамағымыздыр (Јәһ. 15:19). Башга сөзлә, биз бу дүнјанын сијаси ишләриндә битәрәф мөвге тутуруг. Гылынҹларымыздан котан дүзәлтдијимиз үчүн биз вәтәндаш вә дөвләтләрарасы мүһарибәләрдә иштирак етмирик (Јешаја 2:4).

3. Арамыздакы сүлһ сајәсиндә бизим һансы имканымыз вар вә бу мәгаләдә нә мүзакирә олунаҹаг?

³ Арамыздакы сүлһ садәҹә олараг баҹы-гардашларымыза зәрәр ҝәтирәҹәк шејләрдән узаг дурмаг демәк дејил. Ола билсин, бизим јығынҹағымыз мүхтәлиф милләтләрдән вә мәдәнијјәтләрдән олан инсанлардан тәшкил олуб, амма буна бахмајараг, биз бир-биримизи севирик (Јәһ. 15:17). Арамыздакы сүлһ сајәсиндә бизим «һамыја, әләлхүсус иман гардашларымыза» јахшылыг етмәк имканымыз вар (Галат. 6:10). Руһани ҹәннәтимиздәки сүлһ чох гијмәтлидир вә биз ону ҝөз бәбәјимиз кими горумалыјыг. Ҝәлин ҝөрәк јығынҹагда биз буну неҹә едә биләрик.

Сәһвә јол верәндә

4. Биз киминсә хәтринә дәјәндә сүлһә ҹан атдығымызы неҹә ҝөстәрә биләрик?

⁴ Шаҝирд Јагуб јазмышды: «Һәр биримиз дәфәләрлә сәһв едирик. Сөзүндә сәһвә јол вермәјән камил инсандыр» (Јаг. 3:2). Демәли, һәмиманлылар арасында фикир ајрылығы вә анлашылмазлыглар гачылмаздыр (Филип. 4:2, 3). Бунунла белә, јаранан проблемләри јығынҹагда сүлһү позмадан һәлл етмәк мүмкүндүр. Ҝөрәк биз һәмиманлымызын хәтринә дәјәндә Мүгәддәс Китабын һансы мәсләһәтини тәтбиг етмәлијик. (Матта 5:23, 24 ајәләрини оху.)

5. Кимсә бизим хәтримизә дәјәндә сүлһә ҹан атдығымызы неҹә ҝөстәрә биләрик?

⁵ Туталым, кимсә бизә гаршы бир балаҹа сәһв едиб. Һәмин инсанын ҝәлиб биздән үзр истәмәсини ҝөзләмәлијик? 1 Коринфлиләрә 13:5 ајәсиндә дејилир: «[Мәһәббәт] она едилән пислијин һесабыны тутмур». Кимсә бизим хәтримизә дәјәндә биз ону бағышламагла вә олуб-кечәнләри унутмагла әсил сүлһә ҹан атдығымызы ҝөстәририк. (Колослулара 3:13 ајәсини оху.) Бу, ҝүндәлик һәјатда гачылмаз олан хырда проблемләри һәлл етмәјин ән јахшы үсулудур. Бунунла биз һәмиманлыларымызла арамыздакы сүлһү, еләҹә дә гәлб раһатлығымызы горумуш олуруг. Бир мүдрик мәсәлдә дејилир: «Башгасынын ҝүнаһыны бағышламаг она [инсана] шәрәф ҝәтирәр» (Сүл. мәс. 19:11).

6. Бизә гаршы едилән сәһвә ҝөз јуммаг чәтиндирсә, нә етмәлијик?

⁶ Инди ҝәлин башга вәзијјәтә бахаг. Һәмиманлымызын сәһви ҝөзүмүздә о гәдәр бөјүк ҝөрүнүр ки, биз онун үстүндән кечә билмирик. Бәс белә вәзијјәтдә нә етмәлијик? Арамыздакы проблем барәдә башгаларына данышмаг һеч дә мүдрик һәрәкәт дејил. Деди-году јалныз вә јалныз јығынҹагда сүлһүн позулмасына ҝәтириб чыхарыр. Бәс онда мәсәләни сүлһ јолу илә неҹә һәлл етмәк олар? Матта 18:15 ајәсиндә дејилир: «Әҝәр гардашын бир ҝүнаһ иш тутса, ҝет онунла тәкликдә даныш, ҝүнаһыны үзүнә де. Әҝәр о, сәнә гулаг асса, бил ки, сән гардашыны газандын». Дүздүр, Матта 18:15—17 ајәләриндәки мәсләһәтләр ҹидди ҝүнаһлара аиддир. Бунунла белә, 15-ҹи ајәдәки принсипә әсасән, хәтримизә дәјән инсана тәкликдә јахынлашмалы вә мүлајимҹәсинә онунла барышмаға чалышмалыјыгa.

7. Нәјә ҝөрә биз проблемләри тез һәлл етмәлијик?

⁷ Һәвари Павел јазыб: «Гәзәбләнсәниз дә ҝүнаһ ишләмәјин; гој һирсиниз ҝүн батмамыш сојусун, Иблисә фүрсәт вермәјин» (Ефес. 4:26, 27). Иса исә дејиб: «Рәгибинлә мәһкәмәјә ҝедәркән, һәлә јолда икән чалыш онун көнлүнү ал» (Мат. 5:25). Әҝәр биз сүлһү горумаг истәјириксә, проблеми тәхирә салмадан һәлл етмәлијик. Нәјә ҝөрә? Онда һәмин проблем ирин верән ачыг јара кими кәскинләшмәјәҹәк. Ҝәлин мәғрурлуг, пахыллыг, пулпәрәстлик вә тамаһ кими хүсусијјәтләрин гардашларымызла бизим арамыздакы проблемләри тез һәлл етмәјә мане олмасына јол вермәјәк (Јаг. 4:1—6).

Проблем бир чохларыны әһатә едәндә

8, 9. а) Биринҹи әсрдә Рома јығынҹағындакы гардашларын бахышларында һансы фәрг вар иди? б) Павел бу јығынҹағын үзвләринә һансы мәсләһәтләри верди?

⁸ Бәзән јығынҹагда јаранан проблемләр бир чох инсанлары әһатә едир. Биринҹи әсрдә Ромадакы мәсиһчи јығынҹағы буна бир нүмунәдир. Орадакы вәзијјәти нәзәрә алараг һәвари Павел онлара мәктуб јазмышды. Јәһудиләрдән вә гејри-јәһудиләрдән олан мәсиһчиләр арасында мүбаһисә дүшмүшдү. Јығынҹағын бәзи үзвләри виҹданлары зәиф вә ја һәддән артыг һәссас олан мәсиһчиләрә јухарыдан ашағы бахырдылар. Һәвари Павел бу јығынҹаға һансы мәсләһәтләри верди? (Ром. 14:1—6).

⁹ Онун мәсләһәтләри мүбаһисәни јарадан һәр ики тәрәфә аид иди. Мусанын Ганунуна риајәт етмәјә артыг һеч бир еһтијаҹ олмадығыны баша дүшәнләрә о деди ки, гардашларына јухарыдан ашағы бахмасынлар (Ром. 14:2, 10). Бу ҹүр мүнасибәт Ганунда гадаған олунмуш јемәкләри јемәјә һәлә дә пис бахан иманлы инсанлары бүдрәдә биләрди. Павел онлара нәсиһәт верәрәк деди: «Јемәкдән өтрү Аллаһын ишини дағытма!.. Гардашыны бүдрәтмәкдәнсә, јахшысы одур, нә әт је, нә шәраб ич, нә дә бүдрәмәјә сәбәб олан башга бир иш ҝөр» (Ром. 14:14, 15, 20, 21). Даһа һәссас виҹданлары олан мәсиһчиләрә исә Павел ҝениш бахышлары олан гардашларыны сәдагәтсизликдә иттиһам етмәмәји мәсләһәт ҝөрдү (Ром. 14:13). О деди: «Өзүнүз һаггында һәддиндән артыг јүксәк фикирдә олмајын» (Ром. 12:3). Мүбаһисәнин һәр ики тәрәфиндә оланлара Павел нөвбәти мәсләһәти верди: «Буна ҝөрә дә ҝәлин сүлһә апаран вә руһландыран шејләрә ҹан атаг» (Ром. 14:19).

10. Биринҹи әсрдәки Рома јығынҹағындан нүмунә ҝөтүрәрәк мүасир мәсиһчиләр араларындакы проблемләри неҹә һәлл етмәлидирләр?

¹⁰ Биз әмин ола биләрик ки, Ромадакы јығынҹаг Павелин мәсләһәтини гәбул едиб лазыми дәјишикликләр етмишди. Бу ҝүн арамызда фикир ајрылығы јарананда биз дә мүвафиг Мүгәддәс Китаб принсипләрини ахтарыб тапмалы вә тәвазөкарлыгла онлара әмәл етмәлијик. Ромадакы мәсиһчиләр кими, араларында мүбаһисә дүшән мүасир мәсиһчиләрә дә сүлһү горумаг үчүн мүәјјән дәјишикликләр етмәк лазым ҝәлә биләр (Марк 9:50, һашијә).

Көмәјә еһтијаҹ оланда

11. Мәсиһчи онунла һәмиманлысы арасындакы проблем барәдә ағсаггалла сөһбәт етмәк истәјәндә ағсаггал нәји јадда сахламалыдыр?

¹¹ Бәзән мәсиһчи онунла һәмиманлысы вә ја гоһуму арасында јаранан проблем барәдә ағсаггалларла сөһбәт етмәк истәјә биләр. Сүлејманын мәсәлләри 21:13 ајәсиндә дејилир: «Гулағыны тутуб касыбын фәрјадыны ешитмәјәнин фәрјадына ҹаваб верилмәјәҹәк». Әлбәттә ки, ағсаггаллар белә давранмаг истәмирләр. Лакин диҝәр мәсәлдә белә бир хәбәрдарлыг јазылыб: «Иддиасыны әввәл дејән һаглы ҝөрүнәр, амма әлејһдары ҝәлиб ону истинтаг едәр» (Сүл. мәс. 18:17). Ағсаггал она мүраҹиәт едән баҹы вә ја гардаша диггәтлә вә меһрибанҹасына гулаг асмалыдыр. Анҹаг о, проблеми әтрафлы арашдырмадан нәтиҹә чыхармаға тәләсмәмәлидир. Бундан сонра ағсаггал һәмин адамдан хәтринә дејән инсанла сөһбәт едиб-етмәдијини соруша биләр. Ағсаггал һәмчинин онунла сүлһү неҹә горуја биләҹәјини ҝөстәрән Мүгәддәс Китаб принсипләрини дә нәзәрдән кечирә биләр.

12. Мәсәләни һәртәрәфли арашдырмамыш тәләсик гәрар вермәјин тәһлүкәли олдуғуну ҝөстәрән нүмунәләр чәкин?

¹² Мүнагишә заманы јалныз бир тәрәфин фикринә гулаг асыб тәләсик гәрар вермәјин нә гәдәр тәһлүкәли олдуғуну үч Мүгәддәс Китаб нүмунәси ҝөстәрир. Арвады Потифара Јусифин ону зорламаға ҹәһд ҝөстәрдијини дејәндә о, дәрһал бу јалана инанды. Потифар һагсыз јерә гәзәбләнәрәк Јусифи зиндана атды (Јар. 39:19, 20). Сива ағасы Мефибошетин Давудун дүшмәнләри тәрәфинә кечдијини сөјләјәндә Давуд буна инанды вә: «Белә исә, онда Мефибошетин һәр шеји сәниндир», — дејә дәрһал гәрар чыхартды (2 Шам. 16:4; 19:25—27). Падшаһ Артахшастаја исә дедиләр ки, јәһудиләр Јерусәлимин диварларыны бәрпа едиб Фарс империјасына гаршы гијам галдырмаға һазырлашырлар. Падшаһ бу ујдурма мәлумата инаныб Јерусәлимдә ҝедән бәрпа ишләрини дајандырмағы әмр етди. Нәтиҹәдә, јәһудиләр Аллаһын мәбәдиндәки тикинти ишләринә сон гојдулар (Езра 4:11—13, 23, 24). Мәсиһчи ағсаггаллар Павелин Тимотејә вердији мәсләһәтә ујғун давранараг мәсәләни һәртәрәфли арашдырмамыш тәләсик гәрар чыхармајанда мүдрик давранмыш олурлар. (1 Тимотејә 5:21 ајәсини оху.)

13, 14. а) Ики шәхс арасында проблем јарананда нәји јадда сахламалыјыг? б) Ағсаггаллара дүзҝүн гәрар вермәкдә нә көмәк едә биләр?

¹³ Мүгәддәс Китабда дејилир: «Ким дүшүнүр ки, нә исә билир, әслиндә онун һәлә лазымынҹа билији јохдур» (1 Кор. 8:2). Јәни бәзән бизә елә ҝәлә биләр ки, биз ики инсан арасындакы проблеми чох ҝөзәл билирик. Лакин јадда сахламалыјыг ки, бүтүн фактлар бизә мәлум олмаја биләр. Һәмчинин араларында проблем олан инсанлары да јахшы танымаја биләрик. Буна ҝөрә дә мәсәләни арашдыран ағсаггаллар диггәтли олмалыдырлар ки, јалан, јахшы дүшүнүлмүш тактика, еләҹә дә ҝәзән шајиәләр онларын гәрарына тәсир етмәсин. Аллаһын тәјин етдији Һаким Иса Мәсиһ әдаләтлә һөкм едир. Мүгәддәс Китабда дејилир ки, о, ҝөзләринин ҝөрдүјү илә һөкм етмир, гулағы илә ешитдијинә ҝөрә гәрар чыхармыр (Јешаја 11:3, 4). Иса Јеһованын мүгәддәс руһуна ҝөрә һәрәкәт едир. Мәсиһчи ағсаггаллар да ондан нүмунә ҝөтүрмәлидирләр.

¹⁴ Проблемлә бағлы гәрар чыхармаздан әввәл ағсаггаллар Јеһовадан дуада мүгәддәс руһун көмәјини диләмәлидирләр. Һәмчинин онлар мәсләһәт үчүн Аллаһын Кәламына, еләҹә дә садиг вә ағыллы нөкәрин нәшрләринә мүраҹиәт етмәклә бу руһун рәһбәрлијинә табе олмалыдырлар (Мат. 24:45).

Мәҝәр сүлһү нәјин баһасына олурса-олсун горумалыјыг?

15. Һәмиманлысынын ҹидди ҝүнаһындан хәбәр тутан мәсиһчи бу барәдә ағсаггаллара нә заман демәлидир?

¹⁵ Мүгәддәс Китаб мәсиһчиләри сүлһә ҹан атмаға чағырыр. Лакин ејни заманда орада дејилир ки, «јухарыдан назил олан һикмәт илк нөвбәдә сафдыр, сонра сүлһпәрвәр»дир (Јаг. 3:17). Ҝөрдүјүмүз кими, биздән, илк нөвбәдә, саф олмаг, јәни Аллаһын әхлаг вә салеһлик нормаларына риајәт етмәк тәләб олунур. Һәмиманлысынын ҹидди ҝүнаһа јол вердији барәдә хәбәр тутан мәсиһчи ону ҝүнаһыны ағсаггаллара сөјләмәјә тәшвиг етмәлидир (1 Кор. 6:9, 10; Јаг. 5:14—16). Ҝүнаһ ишләдән кәс буну етмирсә, һәмин мәсиһчи ҝедиб өзү бу барәдә ағсаггаллара хәбәр вермәлидир. Әҝәр мәсиһчи белә бир вәзијјәтдә јерсиз олараг сүлһү горумаг наминә сусурса, о ҝүнаһ едир (Лев. 5:1; Сүлејманын мәсәлләри 29:24 ајәсини оху.)

16. Јеһунун падшаһ Јеһорама гаршы ҝөрдүјү тәдбирдән нә өјрәнирик?

¹⁶ Аллаһын салеһлик нормаларына риајәт етмәјин сүлһү горумагдан даһа ваҹиб олдуғуну Јеһу илә баш верән бир һадисә ҝөстәрир. Аллаһ Јеһуну падшаһ Ахавын аиләси үзәриндә һөкмүнү иҹра етмәјә ҝөндәрди. Пис падшаһ олан Јеһорам Ахавла Изевелин оғлу иди. О, арабасына миниб Јеһуну гаршыламаға чыхды вә она деди: «Хејир ола, Јеһу?» Јеһу ҹаваб верди: «Анан Изевелин хаинликләри вә ҹадуҝәрликләри бу гәдәр чох олдуғу һалда неҹә хејир ола биләр?» (2 Пад. 9:22). Сонра Јеһу охуну чәкиб Јеһорамы үрәјиндән вурду. Јеһу һәрәкәтә кечдији кими, ағсаггаллара да төвбә етмәјән ҝүнаһкара гаршы тәдбир ҝөрмәк лазым ҝәлә биләр. Ағсаггаллар белә инсанла сүлһү горумаг хатиринә ону јығынҹагда сахламамалыдырлар. Јығынҹагла Аллаһ арасындакы сүлһ позулмасын дејә онлар төвбә етмәјән шәхси јығынҹагдан кәнар етмәлидирләр (1 Кор. 5:1, 2, 11—13).

17. Јығынҹагда сүлһ позулмасын дејә мәсиһчиләр нә етмәлидирләр?

¹⁷ Чох вахт арамыздакы мүбаһисәләр елә дә ҹидди олмадығы үчүн онлара интизам комитәси тәрәфиндән бахылмасы тәләб олунмур. Белә һалларда мәһәббәт ҝөстәриб баҹы-гардашларымызын хырда сәһвләринә ҝөз јуммаг даһа јахшыдыр. Аллаһын Кәламында дејилир: «Ҝүнаһы өртән мәһәббәт ахтарар, сөзҝәздирән әзиз достлары ајырар» (Сүл. мәс. 17:9). Әҝәр биз бу мәсләһәтә риајәт етсәк, онда јығынҹагда сүлһү, еләҹә дә Јеһова илә достлуғумузу горујаҹағыг (Мат. 6:14, 15).

Сүлһә ҹан атмаг хејир-дуалар ҝәтирир

18, 19. Сүлһә ҹан атмаг һансы хејир-дуалар ҝәтирир?

¹⁸ «Сүлһә апаран» шејләрә ҹан атмаг бизә бол-бол хејир-дуалар ҝәтирир. Јеһова илә мүнасибәтләримиз мөһкәмләнир, үстәлик, руһани ҹәннәтимиздә сүлһ вә бирлијин горунмасында бизим дә пајымыз олур. Баҹы-гардашларымызла сүлһү горујанда биз «сүлһ мүждәсини» тәблиғ етдијимиз инсанларла да сүлһү горумағы өјрәнирик (Ефес. 6:15). Аллаһ бизә һамыјла мүлајим давранмағы вә һагсызлыгла гаршылашанда өзүмүзү әлә алмағы өјрәдир (2 Тим. 2:24).

¹⁹ Билдијимиз кими, ҝәләҹәкдә һәм салеһләрин, һәм дә гејри-салеһләрин дирилмәси олаҹаг (Һәв. иш. 24:15). Бизим бу үмидимиз ҝерчәкләшәндә «бәшәр нәсли дүнјаја ҝәләндән бәри» јер үзәриндә јашајан мүхтәлиф хасијјәти вә мүхтәлиф һәјат тарихчәси олан милјонларла инсанлар һәјата гајтарылаҹаг (Лука 11:50, 51). Биз бу инсанлара сүлһ јолларыны өјрәтмәк кими бөјүк шәрәфә лајиг ҝөрүләҹәјик. Һал-һазырда алдығымыз тәлимин бизә о заман бөјүк көмәји дәјәҹәк.

[Һашијә]

Нә өјрәндиниз?

• Хәтринә дәјдијимиз инсанла неҹә барыша биләрик?

• Кимсә бизим хәтримизә дәјәндә сүлһә ҹан атдығымызы неҹә ҝөстәрә биләрик?

• Нәјә ҝөрә мүбаһисәдә киминсә тәрәфини тутмаг мүдрик һәрәкәт дејил?

• Нәјә ҝөрә Аллаһын нормаларына риајәт етмәк сүлһү горумагдан даһа ваҹибдир? Изаһ един.

[29 сәһифәдәки шәкил]

Јеһова башгаларыны үрәкдән бағышлајанлары севир