Јеһованын Кәламы ҹанлыдыр
Јагубун вә Петерин мәктубларындан диггәтәлајиг фикирләр
ЕРАМЫЗЫН 33-ҹү илинин Пентикост ҝүнүндән тәхминән 30 ил сонра Исанын анабир гардашы шаҝирд Јагуб руһани Исраилин ‘он ики гәбиләсинә’ мәктуб јазыр (Јаг. 1:1). О, мәктубунда һәмиманлыларыны иманда мөһкәм дурмаға вә сынаглара тәһәммүл етмәјә чағырыр. Јығынҹагларда нараһатчылыг доғуран проблемләри арадан галдырмаға даир мәсләһәтләр дә верир.
Б. е. 64-ҹү илиндә мәсиһчиләр Рома императору Нерон тәрәфиндән тәгиб олунмаздан өнҹә, һәвари Петер мәсиһчиләрә үнванладығы илк мәктубуну јазараг онлары иманда мөһкәм галмаға чағырыр. Биринҹи мәктубундан тез сонра јаздығы икинҹи мәктубунда Петер һәмиманлыларыны Аллаһын кәламына диггәт јетирмәјә тәшвиг едир вә хәбәрдарлыг едир ки, Јеһованын ҝүнү јахынлашыр. Јагубун вә Петерин јаздығы мәктублара диггәт јетирмәјимиз бизим үчүн дә фајдалыдыр (Ибр. 4:12).
АЛЛАҺ ОНДАН ‘ИМАНЛА ДИЛӘЈӘНЛӘРӘ’ ҺИКМӘТ ВЕРИР
«Имтаһана дөзән адам хошбәхтдир. Чүнки сынагдан уғурла чыхаркән... һәјат таҹыны алаҹагдыр», — дејә Јагуб јазыр. Јеһова иманла диләјәнләрә сынаглара таб ҝәтирмәк үчүн лазым олан һикмәти верир (Јаг. 1:5-8, 12).
Јығынҹағын ‘мүәллимләриндән’ дә иманлы вә һикмәтли олмаг тәләб олунур. Јагуб инсан дилини ‘бүтүн бәдәни чиркләндирә’ билән ‘кичик бир үзв’ кими тәсвир етдикдән сонра хәбәрдарлыглар едир ки, дүнјаја хас олан хүсусијјәтләр Аллаһла мүнасибәтләримизи поза биләр. О, руһани ҹәһәтдән хәстә оланларын сағалмаг үчүн һансы аддымлары атмалы олдугларыны да јазыр (Јаг. 3:1, 5, 6; 5:14, 15).
Мүгәддәс Китаб суалларына ҹаваблар:
2:13 — Һансы мәнада «мәрһәмәт һөкмә галиб ҝәлир»? Һәр бир инсанын өзү үчүн Аллаһа һесабат вермәсинин вахты ҝәләндә Јеһова бизим башгалары илә мәрһәмәтли давранышымызы нәзәрә алаҹаг вә Оғлунун фидијә гурбанлығы әсасында бизи бағышлајаҹаг (Ром. 14:12). Мәҝәр бу, мәрһәмәт тәзаһүр етдирмәјимиз үчүн бир сәбәб дејилми?
4:5 — Јагуб бурада һансы ајәни ситат ҝәтирир? Јагуб мүәјјән бир ајәни ситат ҝәтирмир. Бу илһамланмыш кәлмәләр, еһтимал ки, Јарадылыш 6:5; 8:21, Сүлејманын мәсәлләри 21:10 вә Галатијалылара 5:17 кими ајәләрин архасындакы үмуми фикрә әсасланыб.
5:20 — «Ҝүнаһкары јанлыш јолундан дөндәрән» кимин ‘ҝүнаһынын үстүнү өртүр’? Ҝүнаһкары пис јолундан дөндәрән мәсиһчи төвбә едәни руһани өлүмдән вә бәлкә дә, әбәди мәһвдән гуртарыр. Бунунла да о, һәмин инсанын ‘бир чох ҝүнаһынын үстүнү өртүр’.
Бизим үчүн ибрәт дәрсләри:
1:14, 15. Ҝүнаһа ҝәтириб чыхаран дүзҝүн олмајан арзулардыр. Буна ҝөрә дә белә арзулары үрәјимиздә сахламамалы, әксинә, иманы мөһкәмләндирән шејләри ‘дүшүнмәли’, үрәк вә дүшүнҹәләримизи онларла долдурмалыјыг (Филип. 4:8).
2:8, 9. «Ајры-сечкилик» ҝөстәрмәк «Һөкмдарымыз Аллаһын» мәһәббәт «Ганунуна» зиддир. Бу сәбәбдән һәгиги мәсиһчиләр ајры-сечкилик етмирләр.
2:14-26. Биз Мусанын Ганунуна иҹра етмәклә, јахуд мәсиһчи ‘әмәлләри’ илә јох, ‘иманла хилас олуруг’. Иман етмәк садәҹә Аллаһын мөвҹудлуғуна инанмаг демәк дејил (Ефес. 2:8, 9; Јәһ. 3:16). Иман Аллаһын ирадәсинә ујғун давранмаға тәшвиг етмәлидир.
3:13-17. «Јухарыдан назил олан һикмәт», әлбәттә ки, ‘дүнјәви, нәфсани вә шејтани һикмәтдән’ үстүндүр! Биз ону ‘ҝизли хәзинә кими арамалыјыг’ (Сүл. мәс. 2:1-5).
3:18. Падшаһлыг һаггында хош хәбәрин тохумуну ‘сүлһ јараданлар сүлһ ичиндә әкмәлидирләр’. Буна ҝөрә чох ваҹибдир ки, биз сүлһә ҹан атанлардан олаг вә мәғрур, давакар вә галмагал салан олмајаг.
ИМАНДА МӨҺКӘМ ДУРУН
Петер һәмиманлыларына ҝөјдәки мираслары илә бағлы ‘јашајан үмидләри’ барәдә хатырладыр. Петер онлара дејир: ‘Сиз сечилмиш нәсил, Һөкмдарын каһин тајфасы, мүгәддәс милләтсиниз’. О, бу мәсәләјә даир конкрет мәсләһәтләр вердикдән сонра онлары ‘һәмфикир, башгаларынын дәрдләринә шәрик, гардаш севән, шәфгәтли, меһрибан, тәвазөкар олмаға’ чағырыр (1 Пет. 1:3, 4; 2:9; 3:8).
‘Һәр шејин [јәһуди системинин] ахыры јахын’ олдуғу үчүн Петер гардашларына ‘ағылларыны башларына јығмағы вә дуа етмәк үчүн ајыг дурмағы’ мәсләһәт ҝөрүр. О онлара дејир: «Ајыг дурун, сајыг олун. [...] Мөһкәм иманла она [Шејтана] гаршы дурун» (1 Пет. 4:7; 5:8, 9).
Мүгәддәс Китаб суалларына ҹаваблар:
3:20-22 — Вәфтиз бизи һансы мәнада хилас едир? Вәфтиз хилас олмаг истәјәнләр үчүн тәләбдир. Анҹаг вәфтиз өзлүјүндә бизи хилас етмир. Хиласа «Иса Мәсиһин дирилмәси илә» наил олуруг. Вәфтизә намизәд иман етмәлидир ки, хилас анҹаг Исанын өз ҹаныны фидијә гурбанлығы кими вердији, дирилдији, һәмчинин бүтүн дириләрин вә өлүләрин үзәриндә һакимијјәтә малик олараг ‘Аллаһын сағында’ отурдуғу үчүн мүмкүндүр. Белә имандан ирәли ҝәләрәк вәфтиз олунмаг ‘сәккиз нәфәрин судан сағ-саламат чыхмасына’ бәнзәјир.
4:6 — ‘Мүждә тәблиғ едилән’ ‘өлүләр’ кимләр иди? Бунлар хош хәбәри ешитмәздән әввәл ‘тәгсирләри вә ҝүнаһлары үзүндән’ өлү оланлар, јәни Јеһова илә мүнасибәтләри олмајанлар иди (Ефес. 2:1). Амма хош хәбәрә иман ҝәтирәндән сонра онлар руһани ҹәһәтдән ‘јашамаға’ башладылар.
Бизим үчүн ибрәт дәрсләри:
1:7. Иманымыз чох гијмәтли олсун дејә онун кејфијјәти сынагдан кечмәлидир. Белә мөһкәм иман сајәсиндә ‘ҹанымызын хиласына наил олуруг’ (Ибр. 10:39). Иманымызын сынанмасындан гачмамалыјыг.
1:10-12. Гәдимдә јашамыш пејғәмбәрләрин мәсһ олунмуш мәсиһчиләрин јығынҹағына даир гәләмә алдыглары дәрин руһани һәгигәтләри мәләкләр тәдгиг етмәк вә баша дүшмәк истәјирдиләр. Анҹаг бүтүн бунлар мәсиһчи јығынҹағы фәалијјәт ҝөстәрмәјә башлајанда ачыгланмаға башланды (Ефес. 3:10). Биз дә мәләкләрин нүмунәсини изләјиб, «Аллаһын дәрин дүшүнҹәләрини» арашдырмаға чалышмалы дејиликми? (1 Кор. 2:10).
2:21. Нүмунәмиз олан Иса Мәсиһи тәглид едәрәк, өлүм баһасына олса белә, Јеһованын һөкмранлығыны дәстәкләмәк үчүн әзаб-әзијјәтләрә гатлашмаға һазыр олмалыјыг.
5:6, 7. Гајғыларымызы Јеһованын үзәринә гојанда О бизә һәгиги ибадәти һәјатымызда биринҹи јерә гојмаға вә сабаһкы ҝүнүн нә ҝәтирәҹәји барәдә һәддиндән артыг нараһат олмамаға көмәк едир (Мат. 6:33, 34).
«ЈЕҺОВАНЫН ҜҮНҮ... ҜӘЛӘҸӘКДИР»
Петер јазыр: «Пејғәмбәрлик һеч заман инсан ирадәсилә ҝәлмәмишдир. Лакин Аллаһын мүгәддәс инсанлары, Мүгәддәс Руһ тәрәфиндән һәрәкәтә ҝәтириләрәк данышырдылар». Аллаһын Кәламындакы пејғәмбәрликләрә диггәт јетирмәјимиз бизи «јаланчы мүәллимләр»дән вә пис тәсир ҝөстәрән диҝәр инсанлардан горуја биләр (2 Пет. 1:21; 2:1-3).
Петер хәбәрдарлыг едир: «Ахыр ҝүнләрдә өз еһтирасларына ҝөрә һәрәкәт едән ришхәндчиләр истеһза едәрәк ҝәләҹәк». «Рәббин [«Јеһованын», ЈД] Ҝүнү исә, ҝеҹә ҝәлән оғру кими ҝәләҹәкдир». Петер ‘Аллаһын ҝүнүнүн зүһуруну ҝөзләјиб, ону сүрәтләндирәнләрин’ һамысына дәјәрли мәсләһәт верәрәк мәктубуна јекун вурур (2 Пет. 3:3, 10-12).
Мүгәддәс Китаб суалларына ҹаваблар:
1:19 — «Дан улдузу» кимдир, о нә вахт пејда олду вә бунун баш вердијини һарадан билирик? «Дан улдузу» Падшаһлыг тахтына отуран Иса Мәсиһдир (Вәһј 22:16). 1914-ҹү илдә Иса, јени ҝүнүн башланғыҹындан хәбәр верәрәк, бир Падшаһ кими, бүтүн каинат үзәриндә пејда олду. Исанын ҝөркәминин дәјишилмәси онун иззәтинин вә Падшаһлыг һакимијјәтиндә олаҹағы вахтын ҝөрүнтүсү иди вә бу, Аллаһын пејғәмбәрлик кәламынын етибарлылығыны ҝөстәрирди. Бу кәлама диггәт јетирмәјимиз мәҹази үрәјимизә нур сачыр вә бунун сајәсиндә дан улдузунун артыг доғдуғуну баша дүшүрүк.
2:4 — «Ҹәһәннәм [«Тáртар», ЈД]» нәдир вә үсјанкар мәләкләр ораја нә вахт атылыблар? Тартар инсанларын јох, јалныз руһани варлыгларын санки һәбсдә олдуглары вәзијјәтдир. Бу вәзијјәтдә оланларын зеһинләри гаранлыглашыб, Аллаһын руһани нуруну ҝөрә билмирләр вә нијјәтләрини анламырлар, һәмчинин ҝәләҹәјә һеч бир үмидләри јохдур. Аллаһ итаәтсиз мәләкләри Нуһун ҝүнләриндә Тартара атды вә онлар мәһв едиләнә гәдәр алчалдылмыш вәзијјәтдә галаҹаглар.
3:17 — «Габагҹадан биләрәк» сөзләрини демәклә Петер нәји нәзәрдә тутурду? Петер өзүнүн вә Мүгәддәс Китабын диҝәр јазычыларынын Аллаһдан илһам алараг јаздыглары ҝәләҹәк һадисәләрә истинад едирди. Бу билик сонсуз олмадығы үчүн белә гәнаәтә ҝәлмәмәлијик ки, еркән мәсиһчиләр ҝәләҹәк һадисәләри бүтүн тәфәррүаты илә билирдиләр. Онларда ҝәләҹәк һадисәләрин јалныз үмуми тәсәввүрү варды.
Бизим үчүн ибрәт дәрсләри:
1:2, 5-7. Аллаһ вә Иса һаггында дәгиг биликдә тәрәгги етмәклә јанашы, иман, тәһәммүл вә Аллаһ гаршысында садиглик кими хүсусијјәтләри сәјлә инкишаф етдирмәјә чалышсаг, онлары ‘танымагда фәалијјәтсиз вә сәмәрәсиз галмајаҹағыг’ (2 Пет. 1:8).
1:12-15. ‘Һәгигәтдә сабит’ галмаг үчүн јығынҹаг ҝөрүшләри, шәхси өјрәнмәмиз вә Мүгәддәс Китабы охумағымыз васитәсилә алдығымыз арамсыз хатырлатмалара еһтијаҹ дујуруг.
2:2. Диггәтли олмалыјыг ки, давранышымыз Јеһованы вә Онун тәшкилатыны рүсвај етмәсин (Ром. 2:24).
2:4-9. Јеһованын кечмишдә етдикләрини нәзәрә алараг әмин ола биләрик ки, О «Она ихлас едәнләри имтаһандан неҹә хилас етмәји, салеһ олмајанлары да... гијамәт ҝүнүнә кими ҹәза алтында неҹә сахламағы билир».
2:10-13. ‘Иззәтли варлыглар’, јәни ағсаггаллар бәзән сәһвә јол версәләр дә, онлар барәдә тәһгирамиз шәкилдә данышмамалыјыг (Ибр. 13:7, 17).
3:2-4, 12. ‘Мүгәддәс пејғәмбәрләр тәрәфиндән габагҹадан сөјләнән сөзләрә, Рәбб вә Хиласкарымызын әмрләринә’ диггәт јетирмәјимиз Јеһованын ҝүнүнүн јахын олдуғуну јадда сахламағымыза көмәк едәҹәк.
3:11-14. ‘Аллаһын ҝүнүнүн зүһуруну ҝөзләјән вә ону сүрәтләндирән’ бизләр нөвбәти амилләрә диггәт јетирмәлијик: 1) физики, әгли, әхлаги вә руһани тәмизлији горујараг ‘мүгәддәс һәјат јашамалыјыг’; 2) «Аллаһа ихласкар» бир һәјата хас олан әмәлләрлә — тәблиғ вә шаҝирд һазырламаг кими ишләрлә мәшғул олмалыјыг; 3) давранышымызда вә хасијјәтимиздә ‘нөгсан’ олмамалыдыр, јәни өзүмүзү бу дүнјадан тәмиз сахламалыјыг; 4) һәр шеји тәмиз нијјәтлә едәрәк «ләкәсиз» олмалыјыг вә 5) Аллаһла, һәмиманлыларымызла вә диҝәр инсанларла «сүлһ ичиндә» јашамалыјыг.