‘Рәбдә гүввәтләнин’

“Рәбдә вә Онун үстүн гүдрәтиндә гүввәтләнин” (ЕФЕСЛИЛӘРӘ 6:10).

1. а) Тәхминән 3 000 ил бундан әввәл һансы гејри-ади дөјүш баш вермишди? б) Нә үчүн гәләбә чалан Давуд олмушду?

ТӘХМИНӘН 3 000 ил бундан әввәл дүшмән ордунун ики нүмајәндәси бир-бирләри илә вурушмаг үчүн дөјүш мејданына чыхдылар. Онлардан бири Давуд адлы ҝәнҹ чобан иди. Онунла дөјүшә чыхан исә гејри-ади гүввәјә малик олан нәһәнҝ Голјат иди. О, тәхминән 57 килограм ағырлығында зиреһ ҝејинмишди. Онун әлиндә ағыр низәси вә бөјүк гылынҹы варды. Давудун исә һеч бир зиреһи јох иди, онун јеҝанә силаһы сапанд иди. Дөјүш мејданына јенијетмә ҝәнҹин чыхмасы филистимли пәһләваны тәһгир етмишди (1 Самуел 17:42-44). Еһтимал ки, баш верәнләри мүшаһидә едәнләр үчүн елә ҝәлирди ки, дөјүшүн нәтиҹәси артыг бәллидир. Лакин дөјүшүн нәтиҹәсини һәмишә физики гүввә мүәјјән етмир (Ваиз 9:11). Гәләбә чалан Давуд олду, чүнки о, Јеһованын гүввәси илә дөјүшүрдү. “Ҹәнҝ Рәббиндир” — демишди Давуд. Беләликлә, Мүгәддәс Китабда дејилдији кими, “Давуд Филистимлини сапандла вә дашла јенди” (1 Самуел 17:47, 50).

2. Мәсиһчиләр һансы дөјүшдә иштирак едирләр?

² Мәсиһчиләр мүһарибәләрдә иштирак етмирләр. Онлар бүтүн инсанларла сүлһдә олмаға чалышырлар, лакин ејни заманда да олдугҹа ҝүҹлү дүшмәнлә руһани мүбаризә апарырлар (Ромалылара 12:18). Һәр бир мәсиһчинин иштирак етдији бу дөјүш һаггында Павел Ефеслиләрә јаздығы мәктубун сонунҹу фәслиндә хатырладыр: “Мүбаризәмиз ган вә әтә гаршы дејилдир, анҹаг рәјасәтләрә, һакимијјәтләрә, бу гаранлыг дүнјанын һөкмранларына, јә’ни сәмави аләмдә олан пис руһи гүввәләрә гаршыдыр” (Ефеслиләрә 6:12).

3. Ефеслиләрә 6:10 ајәсинә әсасән гәләбә чалмаг үчүн бизә нә ҝәрәкдир?

³ Бу “пис руһи гүввәләр”, бизим Јеһова Аллаһла мүнасибәтләримизи позмаг истәјән Шејтан вә онун ҹинләридир. Онлар биздән олдугҹа ҝүҹлү олдуглары үчүн вәзијјәтимиз Давудун вәзијјәтинә бәнзәјир: Аллаһын гүввәсинә бел бағламадан гәләбә чала билмәрик. Павел бизи “Рәббдә вә Онун үстүн гүдрәтиндә” гүввәтләнмәјә әбәс јерә тәшвиг етмирди (Ефеслиләрә 6:10). Һәвари бу нәсиһәтдән сонра сајәсиндә гәләбә чала биләҹәјимиз руһани зиреһләри тәсвир едир вә мәсиһчи кејфијјәтләрини садалајыр (Ефеслиләрә 6:11-17).

4. Бу мәгаләдә һансы ики ваҹиб фикри нәзәрдән кечирәҹәјик?

⁴ Ҝәлин Мүгәддәс Јазыларда дүшмәнимизин ҝүҹү вә тактикасы һаггында нә дејилдијини нәзәрдән кечирәк. Сонра исә өзүмүзү горумаг үчүн һансы аддымлары ата биләҹәјимизи мүзакирә едәҹәјик. Әҝәр Јеһованын рәһбәрлијинә риајәт етсәк, әмин ола биләрик ки, дүшмәнләримиз бизә галиб ҝәлә билмәјәҹәкләр.

Пис руһи гүввәләрә гаршы мүбаризә

5. Ефеслиләрә 6:12 ајәсиндә истифадә олунан “мүбаризә” сөзү бизә Шејтанын әл атдығы үсуллары барәдә нә дејир?

⁵ Павел дејир ки, “мүбаризәмиз... сәмави аләмдә олан пис руһи гүввәләрә гаршыдыр”. Бу гүввәләрин башында дуран “ҹинләрин рәиси” олан Шејтан Иблисдир (Матта 12:24-26). Мүгәддәс Китабда пис руһи гүввәләрә гаршы мүбаризәмиз савашла — әлбәјаха дөјүшлә мүгајисә олунур. Гәдим Јунаныстанда ҝүләш үзрә јарышда һәр бир ҝүләшчи өз рәгибини мүвазинәтдән чыхармаға вә ону јерә вурмаға чалышырды. Еләҹә дә Иблис истәјир ки, биз руһани мүвазинәтимизи итирәк. О, өз мәгсәдинә неҹә чата биләр?

6. Шејтанын бизим иманымызы һансы үсулларла гырмаға чалышдығыны Мүгәддәс Китабын васитәсилә ҝөстәрин.

⁶ Иблис “илан” кими, “нә’рә чәкән... аслан” кими һәрәкәт едә, һәтта “нур мәләји” ҹилдинә ҝирә биләр (2 Коринфлиләрә 11:3, 14; 1 Петер 5:8). Бә’зән бизи тә’гиб етмәк үчүн, јахуд бизи руһдан салмаг үчүн инсанлардан да истифадә едә биләр (Вәһј 2:10). Өз истәк вә арзулары илә олан дүнја бүтүнлүклә Шејтанын ихтијарындадыр вә онларын көмәји илә о бизи өз тәләсинә салмаға чалышыр (2 Тимотејә 2:26; 1 Јәһја 2:16; 5:19). О, Һәвваны неҹә алдатмышдыса, еләҹә дә бизи бу дүнјанын дүшүнҹә тәрзиндән вә руһундан, һәмчинин дөнүк идејаларындан истифадә едәрәк аздырмаға чалышыр (1 Тимотејә 2:14).

7. Ҹинләр нәји едә билмәзләр вә биз һансы үстүнлүјә маликик?

⁷ Кәнардан Шејтанын вә онун ҹинләринин ҝүҹлү силаһа вә бөјүк гүввәјә малик олдуглары ҝөрүнсә дә, онларын имканы мәһдуддур. Бу руһлар бизи сәмави Атамыза мәгбул олмајан пис әмәлләр төрәтмәјә мәҹбур едә билмәзләр. Биз ирадә азадлығына маликик вә өз фикирләримизи вә һәрәкәтләримизи идарә етмәк игтидарындајыг. Бундан савајы, биз тәкбашына мүбаризә апармырыг. Елишанын ҝүнләриндә олдуғу кими, бизим ҝүнләрдә дә “бизимлә оланлар, онларла оланлардан чохдур” (2 Краллар 6:16). Мүгәддәс Китаб бизи әмин едир ки, әҝәр биз Аллаһа табе олуб, Иблисә гаршы дурсаг, о биздән гачаҹагдыр (Јагуб 4:7).

Шејтанын фитнәләриндән бихәбәр дејилик

8, 9. Шејтан Ејубун иманыны зәифләтмәјә чалышараг ону һансы сынаглара чәкди вә биз бу ҝүн һансы руһани тәһлүкәләрлә үзләширик?

⁸ Шејтанын әмәлләри бизә мә’лумдур, чүнки Мүгәддәс Јазылар онун әсас тәләләрини бизә ачыглајыр (2 Коринфлиләрә 2:11). Мәсәлән, Иблис салеһ Ејубун башына чох бәлалар ҝәтирди. Ејуб бөјүк мадди зијана дүшдү, јахынларыны итирди, аиләси тәрәфиндән мүгавимәтләрә мә’руз галды, ағыр хәстәлијә дүчар олду, һабелә икиүзлү достларынын әсассыз иттиһамларыны да динләмәли олду. О, чох мә’јус олмушду вә она елә ҝәлирди ки, Аллаһ ону тәрк едиб (Ејуб 10:1, 2). Һәрчәнд демәк олмаз ки, бу ҝүн белә проблемләр бирбаша Иблис тәрәфиндән төрәдилир, лакин мәсиһчиләр бу кими проблемләрлә гаршылашырлар, Иблис исә бундан истифадә едир.

⁹ Бу сон ҝүнләрдә һәр јердә руһани тәһлүкә илә үзләширик. Биз елә бир дүнјада јашајырыг ки, инсанларын мадди шејләрин гајғысыны чәкмәкдән руһани ишләрә вахтлары галмыр. Телевизија вә журналларда ҹинси әхлагсызлыг мә’јуслуг вә гәлб ағрыдан бир шеј кими дејил, хошбәхтлик ҝәтирән бир шеј кими тәсвир едилир. Вә инсанларын әксәријјәти ‘зөвгү Аллаһдан чох севирләр’ (2 Тимотејә 3:1-5). Бу ҹүр әһвал-руһијјәнин бизи руһани мүвазинәтдән чыхармамасы үчүн иман уғрунда ҝүҹлү мүбаризә апармағымыз ҝәрәкдир (Јәһуда 3).

10-12. а) Әкинчи һаггындакы мәсәли чәкмәклә Иса һансы хәбәрдарлығы етмишдир? б) Бир нүмунәнин әсасында бу дүнјанын бизим руһани ҹәһдләримизи неҹә боға билдијини ҝөстәрин.

¹⁰ Шејтанын ән тә’сирли тәләләриндән бири бу дүнјанын ишләринин вә гајғыларынын бизи тамамилә өзүнә ҹәлб етмәсидир. Әкинчи барәдә мәсәли данышдыгдан сонра Иса хәбәрдарлыг етди ки, бу “дүнјанын гајғысы вә зәнҝинлијин алдадыҹылығы [Падшаһлыг һаггындакы] кәламы боғур” (Матта 13:18, 22). Бурада “боғмаг” кими тәрҹүмә едилмиш јунан сөзү “там боғмаг” мә’насыны верир.

¹¹ Тропик мешәләрдә боған фикус биткисини ҝөрмәк олар. О башга ағаҹын ҝөвдәсинә сармашараг јаваш-јаваш бөјүјүр. Фикусун көкләри ағаҹы һәр тәрәфдән сыхышдырараг, тәдриҹән гүввәтләнир вә узаныр. Вахтилә боған фикусун көкләри торпагдан гидаландырыҹы маддәләрин чохуну өзүнә чәкир, онун чәтири исә ишығын гаршысыны тамамилә алыр. Нәтиҹәдә ағаҹ мәһв олур.

¹² Бунун кими, бу системин нараһатчылыглары, вар-дөвләтә һәрислик вә раһат һәјат тәрзинә ҹан атмаг бизим вахтымызы вә гүввәмизи ҝет-ҝедә даһа чох ала биләр. Әҝәр диггәтимизи бу дүнјанын ишләринә јөнәлтсәк, онда Мүгәддәс Китабы шәхсән өјрәнмәјимиз вә мәсиһчи ҝөрүшләриндә иштиракымыз асанлыгла икинҹи плана кечәр, биз исә руһани гидадан мәһрум ола биләрик. Мадди мәгсәдләр руһани фәалијјәти сыхышдырыр вә нәтиҹәдә биз Шејтан үчүн асан гәнимәт ола биләрик.

Иблисә гаршы дурун

13, 14. Шејтан бизә һүҹум едән заман нә етмәлијик?

¹³ Павел һәмиманлыларыны “Иблисин һијләләринә гаршы” дурмаға тәшвиг едирди (Ефеслиләрә 6:11). Сөзсүз ки, биз Иблиси вә онун ҹинләрини мәһв етмәк игтидарында дејилик. Бу тапшырығы Аллаһ Иса Мәсиһә һәвалә едиб (Вәһј 20:1, 2). Амма нә гәдәр ки, Шејтан һакимијјәт башындадыр биз онун һүҹумларына гаршы дурмалыјыг.

¹⁴ Һәвари Петер дә Шејтана гаршы дурмағын ваҹиблијини вурғуламышды. О јазырды: “Ајыг дурун, сајыг олун. Чүнки дүшмәниниз олан шејтан, нә’рә чәкән вә ашырмаг үчүн кимисә ахтаран аслан кими ҝәзир. Мөһкәм иманла она гаршы дурун вә билин ки, дүнјадакы гардашларыныз да ејни әзаблары чәкирләр” (1 Петер 5:8, 9). Гејд етмәк лазымдыр ки, Иблис нә’рә чәкән аслан кими һүҹум едән заман руһани баҹы-гардашларымызын көмәји олмаса, таб ҝәтирмәк мүмкүн олмаз.

15, 16. Һәмиманлыларын дајаг олмасынын Иблисә гаршы дурмагда бизә неҹә көмәк етдијини Мүгәддәс Китабын нүмунәси әсасында ҝөстәрин.

¹⁵ Африка саванналарынын јахынлығында асланын нәрилтиси ҝәлән кими, антилоплар адәтән дәрһал тәһлүкәдән узаглашана гәдәр бөјүк сүр’әтлә гачырлар. Филләр исә бир-бирләринә дајаг олмагда јахшы нүмунә верирләр. Бир китабда дејилир: “Бир гајда олараг фил сүрүсү мүдафиә мәгсәдилә дөврә гурур. Бөјүкләр дүшмәни гаршылаја биләҹәк даирә јарадыр, кичикләр исә даирәнин ичиндә тәһлүкәсизликдә галырлар” (“Elephants—Gentle Giants of Africa and Asia”). Бу ҹүр гүввәни вә бирлији ҝөрән асланлар филләрә, һәтта балаҹа филләрә дә чох аз һалларда һүҹум едирләр.

¹⁶ Бизи Шејтан вә онун ҹинләри горхудан заман, бизә дә иманда мөһкәм дурараг бир јердә олмаг вә гардашларымызла чијин-чијинә галмаг ҝәрәкдир. Павел Ромада зиндана атылдығы заман онун үчүн “дајаг” (ЈД) олан һәм­иманлыларынын адларыны бир-бир садаламышды (Колослулара 4:10, 11). Бурада “дајаг” кими тәрҹүмә едилән јунан сөзүнә Јунанҹа Мүгәддәс Јазыларда бир дәфә раст ҝәлинир. Вајнын лүғәтиндә изаһ едилир: “Бу сөзүн фе’ли формасы әсәбиләшмәни јүнҝүлләшдирән дәрман мә’насыны дашыјыр” (“Expository Dictionary of New Testament Words”). Јеһованын јеткин хидмәтчиләринин бизә дајаг олмасы, јумшалдыҹы маз кими, емосионал вә физики әзабларымызы јүнҝүлләшдирә биләр.

17. Аллаһа садиг галмагда бизә нә көмәк едә биләр?

¹⁷ Һәмиманлыларымызын бизи руһландырмасы Аллаһа сәдагәтлә хидмәт етмәк гәрарында бизи мөһкәмләндирир. Хүсусилә мәсиһчи ағсаггаллар руһани көмәји ҝөстәрмәкдә тәшәббүсү өз үзәрләринә ҝөтүрүрләр (Јагуб 5:13-15). Аллаһа садиглијимизи горумаг үчүн Мүгәддәс Китабы мүнтәзәм олараг өјрәнмәк, јығынҹаг ҝөрүшләриндә вә конгресләрдә иштирак етмәк лазымдыр. Бундан әлавә Аллаһла сых мүнасибәтләрдә олмаг ваҹибдир. Јесәк дә, ичсәк дә, јахуд башга бир шеј етсәк дә ҝәрәк һәр шеји Аллаһын иззәти үчүн едәк (1 Коринфлиләрә 10:31). Вә тәбии ки, һәгигәт јолундан чыхмамаг үчүн, биз дуа едәрәк Јеһоваја ҝүвәнмәлијик (Мәзмур 37:5).

18. Чәтинликләр уҹбатындан ҝүҹүмүз галмаса да, Аллаһа мәгбул олан шејләри етмәјә нәјә ҝөрә давам етмәлијик?

¹⁸ Һәрдән Шејтан руһән зәиф олдуғумуз заман бизә һүҹум едир. Аслан да зәиф һејвана һүҹум едир. Аиләдәки проблемләр, игтисади чәтинликләр вә ја хәстәлик руһани ҹәһәтдән бизи ҝүҹдән сала биләр. Лакин ҝәлин Аллаһа мәгбул олан шејләри етмәјә давам едәк, неҹә ки, Павел демишдир: “Мән зәиф олдуғум заман гүввәтлијәм” (2 Коринфлиләрә 12:10; Галатијалылара 6:9; 2 Салониклиләрә 3:13). О, бунунла нә демәк истәјирди? Ону демәк истәјирди ки, көмәк үчүн Јеһоваја мүраҹиәт етсәк, зәифликләримизә бахмајараг, ҝүҹлү ола биләрик. Давудун Голјатын үзәриндә чалдығы гәләбә ону ҝөстәрир ки, Аллаһ һәгигәтән дә Өз хидмәтчиләрини мөһкәмләндирмәјә гадирдир. Јеһованын мүасир дөврдә јашајан Шаһидләри ән чәтин анларда өз үзәрләриндә Аллаһын гүввәтли әлини неҹә һисс етдикләрини даныша биләрләр (Даниел 10:19).

19. Јеһованын Өз хидмәтчиләрини мөһкәмләндирдијинә даир бир нүмунә чәкин.

¹⁹ Бир әр-арвад Аллаһын көмәји һаггында јазмышдыр: “Јеһоваја бирҝә хидмәт етдијимиз илләр әрзиндә биз Ондан бол-бол хејир-дуалар алыб, чохлу ҝөзәл инсанларла таныш олмушуг. Чәтинликләрлә гаршылашдығымыз заман Јеһова онларын өһдәсиндән мүвәффәгијјәтлә ҝәлмәји өјрәдир вә бизи мөһкәмләндирирди. Ејуб кими биз дә бу вә ја диҝәр һадисәнин нәјә ҝөрә баш вердијини һәмишә баша дүшә билмирдик, амма ону билирдик ки, Јеһова көмәк етмәјә һәмишә һазыр иди”.

20. Јеһованын һәмишә Өз халгына дајаг олмасы Мүгәддәс Китабда неҹә ҝөстәрилир?

²⁰ Јеһованын әли о гәдәр гыса дејил ки, садиг хидмәтчиләринә дајаг олуб, онлары мөһкәмләндирә билмәсин (Ишаја 59:1). Мәзмурчу Давуд охујурду: “Рәбб јыхыланларын һамысына дајагдыр, гәдди әјиләнләрин һамысыны галдырыр” (Мәзмур 145:14, МКШ). Бизим сәмави Атамыз ‘һәр ҝүн јүкүмүзү дашыјыр’ вә бизи бүтүн лазыми шејләрлә тә’мин едир (Мәзмур 68:19).

“Аллаһын бүтүн зиреһләри” ҝәрәкдир

21. Павел руһани зиреһләрин ваҹиблијини неҹә вурғулады?

²¹ Биз Шејтанын бә’зи тәләләрини нәзәрдән кечирдик вә ҝөрдүк ки, онун һүҹумларына гаршы дурмаг ваҹибдир. Инди исә иманымызы мүвәффәгијјәтлә мүдафиә етмәјә, Шејтанын фитнәләринә гаршы дурмаға вә пис руһи гүввәләрә гаршы мүбаризәдә гәләбә чалмаға көмәк едән даһа бир ваҹиб үсула диггәт јетирмәјә дәјәр. Онун һаггында Павел ефеслиләрә олан мәктубунда ики дәфә хатырладыр. О јазырды: “Иблисин һијләләринә гаршы дура билмәк үчүн Аллаһын бүтүн зиреһләрини ҝејинин... Аллаһын бүтүн зиреһләрини ҝөтүрүн ки, сиз пис ҝүндә мүгавимәт ҝөстәриб, әлиниздән ҝәлән һәр шеји етдикдән сонра јериниздә дура биләсиниз” (Ефеслиләрә 6:11, 13).

22, 23. а) Бизим руһани зиреһләримизә нә дахилдир? б) Нөвбәти мәгаләдә биз нәји нәзәрдән кечирәҹәјик?

²² Бәли, бизә “Аллаһын бүтүн зиреһләрини” ҝејинмәк лазымдыр. Павел Ефеслиләрә мәктубу јаздығы заман ону ромалы әсҝәр горујурду вә олсун ки, бу әсҝәр һәрдән бүтүн зиреһләрини ҝејинирди. Лакин мәһз Аллаһ һәвари Павелә илһам вермишди ки, Јеһованын һәр бир хидмәтчиси үчүн һәјати ваҹиб олан руһани зиреһләри тәсвир етсин.

²³ Аллаһдан олан зиреһләр мәсиһчидә олмалы кејфијјәтләри, һәмчинин Аллаһын вердији руһани зиреһләри өзүнә дахил едир. Нөвбәти мәгаләдә руһани зиреһләрин һәр бир елементини нәзәрдән кечирәҹәјик. Бу, руһани мүһарибәјә јахшы һазыр олуб-олмадығымызы мүәјјән етмәјә көмәк едәҹәкдир. Һәмчинин ҝөрәҹәјик ки, Иса Мәсиһин ҝөзәл нүмунәси Шејтан Иблисә мүвәффәгијјәтлә гаршы дурмагда бизә неҹә көмәк едир.

Сиз неҹә ҹаваб верәрдиниз?

• Мәсиһчиләрин һамысы һансы дөјүшдә иштирак едир?

• Шејтанын бә’зи тәләләрини тәсвир един.

• Һәмиманлыларын дајаг олмасы бизи неҹә мөһкәмләндирә биләр?

• Кимин гүввәсинә бел бағлаја биләрик вә нәјә ҝөрә?

[9-ҹу сәһифәдәки шәкилләр]

Мәсиһчиләр “пис руһи гүввәләрә” гаршы мүбаризә апарырлар.

[10-ҹу сәһифәдәки шәкил]

Индики системин нараһатчылыглары Падшаһлыг һаггындакы кәламы боғмаға гадирдир.

[11-ҹи сәһифәдәки шәкил]

Һәмиманлылар бир-бирләринә дајаг ола биләрләр.

[12-ҹи сәһифәдәки шәкил]

Аллаһдан ҝүҹ истәјирсәнми?