Тәк сүрү, тәк Чобан

«Мәним ардымҹа ҝәлән сизләр дә Исраилин он ики гәбиләсинә һөкм етмәк үчүн он ики тахт үзәриндә отураҹагсыныз» (МАТ. 19:28).

1. Јеһова Ибраһимин нәслинә неҹә јанашырды вә нәјә ҝөрә демәк олмаз ки, О, диҝәр халглара гаршы тамамилә биҝанә иди?

ЈЕҺОВА Ибраһими севирди, буна ҝөрә дә онун өвладларына түкәнмәз мәһәббәт ҝөстәрирди. 15 әсрдән чох вахт әрзиндә О, Ибраһимин нәсли олан Исраил халгына сечилмиш, «өзүнә мәхсус халг» кими јанашырды. (Ганунун тәкрары 7:6 ајәсини оху.) Бу о демәк идими ки, Јеһова бүтүн башга халглара тамамилә лагејд иди? Хејр. О вахтлар Јеһоваја ибадәт етмәк истәјән гејри-исраиллиләр бу сечилмиш халга гошула биләрдиләр. Бу адамлар, јәни прозелитләр халгын бир һиссәси сајылырдылар. Онларла гардаш кими рәфтар едилмәли иди (Лев. 19:33, 34). Һәмчинин онлардан Јеһованын бүтүн ганунларына риајәт етмәк тәләб олунурду (Лев. 24:22).

2. Иса һансы сарсыдыҹы хәбәри сөјләди вә бундан һансы суаллар јараныр?

² Лакин Иса өз ҝүнләриндә олан јәһудиләрә белә бир сарсыдыҹы хәбәр верди: «Аллаһын Сәлтәнәти сиздән алыныб, онун мејвәләрини јетишдирәҹәк бир халга вериләҹәкдир» (Мат. 21:43). Бу јени халг кимләрдән ибарәт олаҹагды вә бу дәјишиклијин бу ҝүн бизә һансы аидијјәти вар?

Јени халг

3, 4. а) Һәвари Петер јени халгын кимләрдән тәшкил олундуғуну неҹә ҝөстәрди? б) Бу јени халга кимләр дахилдир?

³ Һәвари Петер бу јени халгын кимләрдән тәшкил олундуғуну ајдын шәкилдә ҝөстәрир. О, мәсиһчи һәмиманлыларына јазмышды: «Сиз исә, сечилмиш нәсил, Һөкмдарын каһин тајфасы, мүгәддәс милләт, Аллаһа мәхсус халгсыныз ки, сизи гаранлыгдан Өз валеһедиҹи нуруна Чағыранын фәзиләтләрини елан едәсиниз» (1 Пет. 2:9). Исанын Мәсиһ олдуғуну гәбул едән јәһудиләр һәмин халгын илк үзвләри олдулар вә беләликлә Мәсиһин мүәјјән мүддәт әрзиндә ‘бир чохлары үчүн әһди гүввәдә сахлајаҹағына’ даир пејғәмбәрлик јеринә јетди (Дан. 9:27а, ЈД; Мат. 10:6). Сонралар бир чох гејри-јәһудиләр дә бу халга дахил олдулар. Чүнки Петер сөзүнә давам едәрәк демишди: «Сиз бир заманлар халг дејилдиниз, инди исә Аллаһын халгысыныз» (1 Пет. 2:10).

⁴ Петер бурада кимин һаггында данышыр? Мәктубунун әввәлиндә о дејир: «[Аллаһ] јенидән доғулмамызы тәмин едиб, бизи јашајан бир үмидә, ҝөјләрдә сизин үчүн сахланмыш, чүрүмәз, ләкәсиз, солмаз бир мираса чатдырды» (1 Пет. 1:3, 4). Беләликлә, јени халга сәмави үмидә малик олан мәсһ олунмуш мәсиһчиләр дахилдир. Онлар ‘Аллаһын Исраилидир’ (Галат. 6:16). Һәвари Јәһја ҝөрүнтүдә руһани исраиллиләрин сајынын 144 000 олдуғуну ҝөрмүшдү. Онлар «каһин» кими хидмәт етмәк вә Иса илә ‘бәрабәр мин ил сәлтәнәт сүрмәк’ үчүн ‘Аллаһа вә Гузуја аид олаҹагларын илки кими инсанлар арасындан сатын алындылар’ (Вәһј 5:10; 7:4; 14:1, 4; 20:6; Јаг. 1:18).

Исраил халгы даһа кимләри тәмсил едир?

5. а) «Аллаһын Исраили» ифадәси кимә аиддир? б) Нә үчүн демәк олар ки, «Исраил» сөзү һәмишә мәсһ олунмушлара аид ишләнмир?

⁵ Демәли, ајдындыр ки, Галатијалылара 6:16 ајәсиндә гејд олунан «Аллаһын Исраили» ифадәси јалныз вә јалныз мәсһ олунмуш мәсиһчиләрә аиддир. Бәс Исраил халгынын мәсһ олунмушлары јох, башга мәсиһчиләри тәмсил етдији һаллар да олмушдуму? Исанын садиг һәвариләринә дедији сөзләрдән бу суалын ҹавабыны тапмаг олар: «Атам Мәнә бир сәлтәнәт тапшырдығы кими Мән дә сизә бир сәлтәнәт тапшырырам ки, Мәним Сәлтәнәтимдә сүфрәмдә јејиб-ичәсиниз вә Исраилин он ики гәбиләсинә һөкм етмәк үчүн тахтларда отурасыныз» (Лука 22:28—30). Бу, Мәсиһин миниллик һөкмранлығы заманы, ‘јениләнмә’ дөврүндә баш верәҹәк. (Матта 19:28 ајәсини оху.)

6, 7. Матта 19:28 вә Лука 22:30 ајәләриндә јазылан ‘Исраилин он ики гәбиләси’ ифадәси кимләрә аиддир?

⁶ Миниллик һөкмранлыг дөврүндә 144 000 нәфәр сәмави падшаһ, каһин вә һаким кими хидмәт едәҹәк (Вәһј 20:4). Онлар кимләри мүһакимә едәҹәк вә кимләрин үзәриндә һөкмранлыг едәҹәкләр? Матта19:28 вә Лука 22:30 ајәләринә әсасән, онлар «Исраилин он ики гәбиләсинә» һөкм едәҹәкләр. ‘Исраилин он ики гәбиләси’ бу контекстдә кимләри тәмсил едир? Јер үзүндә јашамаға үмид едән — Исанын фидјә гурбанлығына иман ҝәтирән, лакин һөкмдарын каһин тајфасына дахил олмајан бүтүн инсанлары. (Леви гәбиләси Исраилин он ики гәбиләсинин сијаһысына дахил едилмәмишди.) Бу контекстдә Исраилин он ики гәбиләси илә тәмсил олунанлар 144 000 нәфәрин каһин кими хидмәт етмәсиндән руһани фајда әлдә едәҹәк инсанлардыр. Каһин синфинә дахил олмајан бу инсанлар да Аллаһын халгыдыр. Аллаһ онлары гәбул едир вә севир. Буна ҝөрә дә, Аллаһын онлары Өз гәдим халгына бәнзәтмәси мүнасибдир.

⁷ Буна мүвафиг олараг, бөјүк мәшәггәтдән әввәл 144 000 руһани исраиллинин һәмишәлик мөһүрләндијини ҝөрдүкдән сонра һәвари Јәһја «һәр милләтдән» олан сајсыз-һесабсыз ‘бөјүк издиһамы’ да ҝөрмүшдү (Вәһј 7:9). Онлар бөјүк мәшәггәтдән сағ чыхыб мин ил падшаһлыг едәҹәк Мәсиһин һөкмранлығы алтында јашајаҹаглар. Һәмин вахт милјонларла дирилән инсанлар онлара гошулаҹаглар (Јәһ. 5:28, 29; Вәһј 20:13). Бу адамларын һамысы бирликдә Исанын вә онун 144 000 һакимијјәт шәрикинин һөкм етдији ‘Исраилин он ики гәбиләсини’ тәшкил едәҹәк (Һәв. иш. 17:31; 24:15; Вәһј 20:12).

8. Кәффарә ҝүнүндә баш верәнләр 144 000 нәфәрлә диҝәр инсанлар арасындакы әлагәни неҹә тәмсил едир?

⁸ Мәсһ олунмуш 144 000 нәфәрлә диҝәр инсанлар арасындакы бу мүнасибәт һәр ил кечирилән Кәффарә ҝүнүндә баш верәнләрлә тәмсил олунурду (Лев. 16:6—10). Баш каһин илк нөвбәдә «һәм өзү, һәм дә аиләси үчүн» бир буғаны ҝүнаһ гурбаны кими тәгдим етмәли иди. Беләликлә, Исанын гурбанлығы биринҹи нөвбәдә онун аилә үзвләри олан вә ҝөјдә онунла бирликдә хидмәт едәҹәк каһинләрә тәтбиг олунур. Бундан башга Кәффарә ҝүнүндә диҝәр исраиллиләрин ҝүнаһлары үчүн ики тәкә тәгдим олунурду. Һәмин тәкәләр кимләри тәмсил едир? Каһинләр тајфасынын 144 000 нәфәри тәмсил етдији бу контекстдә диҝәр исраиллиләр јер үзүндә јашамаға үмид едән инсанлары тәмсил едир. Беләликлә, бу контекстдә ‘Исраилин он ики гәбиләси’ Исанын руһдан доғулмуш гардашларына јох, онун фидјә гурбанлығына иман ҝәтирән бүтүн инсанлара аиддирa.

9. Језекелин мәбәд ҝөрүнтүсүндә каһинләр вә каһин олмајан исраиллиләр кимләри тәмсил едир?

⁹ Диҝәр нүмунәјә бахаг. Језекел пејғәмбәрә Јеһованын мәбәди һагда әтрафлы ҝөрүнтү верилмишди (Јез., 40—48-ҹи фәсилләр). Һәмин ҝөрүнтүдә каһинләр тәлим верәрәк вә Јеһовадан мәсләһәт вә дүзәлишләр алараг мәбәддә чалышырдылар (Јез. 44:23—31). Мүхтәлиф гәбиләләрин үзвләри исә ибадәт етмәк вә гурбанлар тәгдим етмәк үчүн ҝәлирдиләр (Јез. 45:16, 17). Бу контекстдә каһинләр мәсһ олунмушлары, каһин тајфасына мәнсуб олмајан исраиллиләр исә јер үзүндә јашамаға үмид едән инсанлары тәмсил едир. Ҝөрүнтү ики групун һәмрәјликлә бирҝә чалышдығыны вә каһин синфинин тәмиз ибадәтдә рәһбәрлији үзәринә ҝөтүрдүјүнү вурғулајыр.

10, 11. а) Бу ҝүн Исанын һансы сөзләринин јеринә јетдијини ҝөрүрүк? б) Башга гојунларла бағлы һансы суал мејдана чыхыр?

¹⁰ Иса мәсһ олунмуш давамчыларындан ибарәт «кичик сүрү» илә ејни «ағылдан» олмајан ‘башга гојунлардан’ сөз ачмышды (Јәһ. 10:16; Лука 12:32). О демишди: «Онлары да ҝәтирмәлијәм. Мәним сәсими ешидәҹәкләр; вә тәк сүрү, тәк Чобан олаҹагдыр». Бу сөзләрин јеринә јетмәсини ҝөрмәк инсанын иманыны неҹә дә мөһкәмләндирир! Ики груп инсан — мәсһ олунмушлардан ибарәт кичик груп вә башга гојунлардан ибарәт бөјүк издиһам бир сүрү шәклиндә бирләшмишдир. (Зәкәријјә 8:23 ајәсини оху.) Башга гојунлар символик мәнада руһани мәбәдин дахили һәјәтиндә хидмәт етмәсәләр дә, һәмин мәбәдин хариҹи һәјәтиндә хидмәт едирләр.

¹¹ Бәс әҝәр Јеһова һәрдән башга гојунлары каһин синфинә дахил олмајан Исраиллиләрлә тәмсил едирдисә, демәли, јер үзүндә јашамаға үмид едәнләр дә Хатирә Ҝеҹәсиндәки символлардан гәбул етмәлидирләр? Инди бу суалын ҹавабыны арашдыраҹағыг.

Јени әһд

12. Јеһова һансы јени тәдбирин олаҹағыны габагҹадан демишди?

¹² «О ҝүнләрдән сонра Исраил халгы илә бағлајаҹағым әһд беләдир: Ганунуму онларын дахилинә гојуб үрәкләринә јазаҹағам. Мән онларын Аллаһы, онлар да Мәним халгым олаҹаг»,— сөзләрини демәклә Јеһова халгы үчүн јени тәдбир тәсис едәҹәјини габагҹадан хәбәр вермишди (Јер. 31:31—33). Бу јени әһд васитәсилә Јеһованын Ибраһимә вердији вәд бирдәфәлик вә мөһтәшәм сурәтдә јеринә јетәҹәкди. (Јарадылыш 22:18 ајәсини оху.)

13, 14. а) Јени әһдин иштиракчылары кимләрдир? б) Бу әһддән кимләр фајдаланыр вә онлар јени әһдә неҹә ‘итаәт едирләр’?

¹³ Иса өлүмүндән габагкы ҝеҹә бу јени әһдә истинад едәрәк демишди: «Бу каса Мәним сизин үчүн төкүлән ганымла ҝерчәкләнән Әһди-Ҹәдиддир» (Лука 22:20; 1 Кор. 11:25). Мәсиһчиләрин һамысымы јени әһдә дахилдир? Хејр. Бәзиләри һәмин ахшам о касадан ичән һәвариләр кими јени әһдин иштиракчыларыдырb. Иса исә Падшаһлыгда бирликдә идарә етмәк үчүн онларла башга бир әһд дә бағлады (Лука 22:28—30). Онлар Иса илә бирликдә Падшаһлыгда олаҹаглар (Лука 22:15, 16).

¹⁴ Бәс јер үзүндә, һәмин Падшаһлығын һакимијјәти алтында јашајаҹаг инсанлар һагда нә демәк олар? Онлар јени әһддән фајдалананлардыр (Галат. 3:8, 9). Онлар иштиракчы олмасалар да, тәләбләринә риајәт етмәклә бу әһдә ‘итаәт едирләр’. Бу һагда Јеһова Јешаја пејғәмбәр васитәсилә дејир: «Рәббә хидмәт етмәк, Онун адыны севмәк, Онун гулу олмаг үчүн шәнбә ҝүнүнә риајәт едән, о ҝүнү мурдарламајан, әһдимә итаәт едән, Рәббә бел бағлајан бүтүн јаделлиләри Мүгәддәс дағыма ҝәтириб дуа евимдә севиндирәҹәјәм». Сонра Јеһова әлавә едир: «Чүнки Мәним евим бүтүн халглар үчүн дуа еви адландырылаҹаг» (Јешаја 56:6, 7).

Символлардан кимләр гәбул етмәлидир?

15, 16. а) Һәвари Павел јени әһди нә илә әлагәләндирир? б) Нә үчүн јер үзүндә јашамаға үмид едәнләр Хатирә Ҝеҹәсиндәки символлардан гәбул етмәмәлидирләр?

¹⁵ Јени әһдә дахил оланларын ‘ән Мүгәддәс Јерә ҝирмәјә ҹәсарәти вардыр’. (Ибраниләрә 10:15—20 ајәләрини оху.) Онлар ‘сарсылмаз Сәлтәнәтә наил’ олаҹаг кәсләрдир (Ибр. 12:28). Беләликлә, јалныз Иса илә бирликлә ҝөјдә падшаһ вә каһин кими хидмәт едәҹәк шәхсләр јени әһди тәмсил едән ‘касадан’ ичмәлидирләр. Јени әһдин иштиракчысы олан бу мәсиһчиләр Гузуја нишанланыблар (2 Кор. 11:2; Вәһј 21:2, 9). Һәр ил гејд олунан Хатирә Ҝеҹәсинә ҝәлән башга мәсиһчиләр исә символлардан гәбул етмир, мәрасими һөрмәтҹил шәкилдә мүшаһидә едирләр.

¹⁶ Һәмчинин Павел дә јер үзүндә јашамаға үмид едәнләрин Хатирә Ҝеҹәсиндә символлардан гәбул етмәли олмадығыны баша дүшмәјә бизә көмәк едир. О, мәсһ олунмуш мәсиһчиләрә демишди: «Чүнки бу чөрәји једијиниз вә бу касадан ичдијиниз һәр заман, сиз Рәббин өлүмүнү О ҝәлинҹәјәдәк елан етмиш олурсунуз» (1 Кор. 11:26). Иса Мәсиһ нә заман ‘ҝәлир’? Мәсһ олунмуш ҝәлин синфинә аид олан ахырынҹы мәсиһчиләри сәмави евинә апаранда (Јәһ. 14:2, 3). Демәли, Рәббин ахшам јемәји даима гејд олунмајаҹаг. Нә гәдәр ки, гадынын нәслинә дахил оланларын һамысы сәмави мүкафатларыны алмајыблар, онларын јер үзүндә галанлары бу символлардан гәбул етмәјә давам едәҹәк (Вәһј 12:17). Амма јер үзүндә јашајаҹаг инсанлар символлардан гәбул етмәли олсајды, онда ҝәрәк Хатирә Ҝеҹәси әбәдијјән гејд едиләјди.

‘Онлар Мәним халгым олаҹаг’

17, 18. Језекел 37:26, 27 ајәләриндә јазылмыш пејғәмбәрлик неҹә јеринә јетир?

¹⁷ Јеһова халгы арасында бирлик олаҹағыны нөвбәти сөзләрлә габагҹадан билдирмишди: «Мән онларла сүлһ әһди бағлајаҹағам. Бу онларла әбәди бир әһд олаҹаг. Онлары орада јерләшдирәҹәк вә сајларыны чохалдаҹағам. Мүгәддәс мәканымы әбәди олараг онларын арасында гураҹағам. Мәним мәскәним онларын арасында олаҹаг. Мән онларын Аллаһы, онлар да Мәним халгым олаҹаг» (Јез. 37:26, 27).

¹⁸ Аллаһын халгынын бүтүн үзвләри бу мөһтәшәм вәдин, сүлһ әһдинин јеринә јетмәсиндән фајда әлдә едә биләрләр. Бәли, Јеһова бүтүн итаәткар хидмәтчиләринин сүлһдә олаҹағына зәманәт верир. Аллаһын руһунун сәмәрәси онларын арасында өзүнү ајдын бүрузә верир. Бурада Онун саф мәсиһчи ибадәтини тәсвир едән мүгәддәс мәканы онларын арасындадыр. Онлар һәгигәтән дә Аллаһын халгыдыр, чүнки бүтпәрәстлијин бүтүн нөвләрини рәдд едиб јалныз Јеһова Аллаһа ибадәт едирләр.

19, 20. Јеһованын «Мәним халгым» адландырдығы инсанларын сырасына кимләр дахилдир вә јени әһд сајәсиндә нә мүмкүн олмушдур?

¹⁹ Бизим ҝүнләримиздә бу ики групун бир сүрүдә бирләшмәсинин шаһиди олмаг инсаны һәгигәтән дә вәҹдә ҝәтирир. Сајы даима артан бөјүк издиһам ҝөјдә јашамаға үмид етмәсә дә, бу үмидә малик оланларла әмәкдашлыг етмәкдән гүрур дујур. Онлар Аллаһын Исраилинә гошулараг Јеһованын «Мәним халгым» адландырдығы инсанларын сырасына дахил олублар. Мәһз һәмин инсанларын үзәриндә бу пејғәмбәрлик јеринә јетир: «О ҝүн чохлу милләтләр Рәббә бағланаҹаг вә Мәним халгым олаҹаг. О заман аранызда јашајаҹағам». (Зәк. 2:11; 8:21; Јешаја 65:22; Вәһј 21:3, 4 ајәләрини оху.)

²⁰ Бүтүн бунларын һәјата кечмәси јени әһдин сајәсиндә мүмкүн олмушдур. Мүхтәлиф милләтләрдән олан милјонларла инсан Јеһованын севимли халгынын үзвләри олмушдур (Мик. 4:1—5). Онлар тәләбләринә риајәт етмәклә әһдә бундан сонра да итаәт етмәјә гәти гәрарлыдырлар (Јешаја 56:6, 7). Белә етмәклә онлар Аллаһын Исраили илә бирликдә даим хејир-дуа алыб сүлһ ичиндә јашајырлар. Арзумуз будур ки, сиз дә инди вә әбәдијјән бу хејир-дуалары аланларын ичиндә оласыныз!

[Һашијәләр]

Јадыныздадырмы?

• 144 000 нәфәрин һөкм едәҹәји «Исраилин он ики гәбиләсинә» кимләр дахилдир?

• Мәсһ олунмушларын јени әһддә ојнадығы рол нәдән ибарәтдир вә башга гојунлар јени әһддән неҹә фајдаланырлар?

• Хатирә Ҝеҹәсиндәки символлардан бүтүн мәсиһчиләр гәбул етмәлидирләрми?

• Бизим ҝүнләримиздә һансы бирлијин олаҹағы пејғәмбәрлик едилмишди?

[25-ҹи сәһифәдәки һесабат/шәкил]

(Мәтнә нәшрдә бах)

Чохлу сајда инсан инди Аллаһын Исраили илә бирликдә хидмәт едир

7,313,173

4,017,213

1,483,430

373,430

1950 1970 1990 2009