Ҝәлин һеч вахт «мүвәггәти сакин» олдуғумузу унутмајаг
«Гәриб вә мүвәггәти сакин олан сизләрдән риҹа едирәм... ҹисмани истәкләрдән узаг дурун» (1 ПЕТ. 2:11).
НЕҸӘ ҸАВАБ ВЕРӘРДИН?
Нәјә ҝөрә демәк олар ки, мәсһ олунмуш мәсиһчиләр мүвәггәти сакиндирләр?
Һансы мәнада башга гојунлар мүвәггәти сакиндирләр?
Сән нәји сәбирсизликлә ҝөзләјирсән?
1, 2. Петер «сечилмишләр» дејәркән кимләри нәзәрдә тутурду вә нәјә ҝөрә онлара «мүвәггәти сакин» дејә мүраҹиәт едирди?
ИСА МӘСИҺИН ҝөјә галхмасындан тәхминән 30 ил сонра, һәвари Петер «Понт, Галатија, Каппадокија, Асија вә Битинијаја сәпәләнмиш гәрибләрә... сечилмишләрә мәктуб» үнванламышды (1 Пет. 1:1, 2). Петер «сечилмишләр» сөзү илә мүгәддәс руһла мәсһ едилмиш, Мәсиһлә бирҝә ҝөјдә идарә етмәк үчүн «јени һәјат» алан вә «ҹанлы үмидә» говушан инсанлара мүраҹиәт етмишди. (1 Петер 1:3, 4 ајәләрини оху.) Бәс нәјә ҝөрә о, бу сечилмишләри сонрадан «гәриб вә мүвәггәти сакин» адландырыр? (1 Пет. 2:11). Бүтүн дүнјада мәсһ олунмуш, јәни сечилмиш олдугларыны иддиа едәнләрин сајы һәр 650 фәал Шаһидә 1-и дүшдүјү һалда, бу, бизим үчүн һансы мәнаны кәсб едир?
2 Биринҹи әсрдәки мәсһ олунмушларын «мүвәггәти сакин» адланмасы мүнасиб иди. Һал-һазырда һәјатда олан бу групун галыглары јер үзүндә әбәди јашамајаҹаглар. Мәсһ олунмуш «кичик сүрү»нүн үзвү олан һәвари Павел јазмышды: «Бизим вәтәнимиз исә ҝөјләрдир. Биз орадан хиласкарымыз вә Ағамыз Иса Мәсиһин ҝәлишини сәбирсизликлә ҝөзләјирик» (Лука 12:32; Филип. 3:20). Вәтәни ҝөјләр олан мәсһ олунмушлар өләндән сонра јер үзүнү тәрк едәрәк даһа јахшы бир һәјата — ҝөјләрдә өлмәз һәјата говушурлар. (Филипилиләрә 1:21—23 ајәләрини оху.) Беләликлә, бу инсанлары, сөзүн әсил мәнасында, Шејтан дүнјасынын «мүвәггәти сакин»ләри адландырмаг олар.
3. Башга гојунларла бағлы һансы суал јараныр?
3 Бәс башга гојунлар һагда нә демәк олар? (Јәһ. 10:16). Мүгәддәс Китаб онларын јер үзүнүн даими сакинләри олаҹагларыны өјрәдир. Бәли, онлар јер үзүндә онларын әбәди јашајаҹаглар! Бәс нәјә ҝөрә демәк олар ки, онлар да мүвәггәти сакиндирләр?
ХИЛГӘТ ИНДИЈӘ КИМИ ИНИЛДӘЈИР
4. Дүнја лидерләри нәјин гаршысыны алмагда аҹиздирләр?
4 Һәлә ки, Јеһова Шејтанын пис системинин мөвҹуд олмасына јол верир, Шејтанын Аллаһа гаршы галдырдығы үсјан нәтиҹәсиндә, мәсиһчиләр дә дахил олмагла, һәр кәс әзијјәт чәкмәјә давам едәҹәк. Ромалылара 8:22 ајәсиндә охујуруг: «Биз билирик ки, бүтүн хилгәт индијә кими инилдәјиб әзаб чәкир». Дүнја лидерләри, алимләр вә хејријјәчиләр нә гәдәр чалышсалар да, бунун гаршысыны алмагда аҹиздирләр.
5. Милјонларла инсанлар 1914-ҹү илдән етибарән һансы аддымы атыр вә нәјә ҝөрә?
5 1914-ҹү илдән етибарән көнүллү олараг милјонларла инсанлар Аллаһ тәрәфиндән тахта јүксәлдилмиш Падшаһ Иса Мәсиһин тәбәәләри олмағы сечирләр. Онлар Шејтан дүнјасынын бир һиссәси олмаг вә ону дәстәкләмәк истәмирләр. Әксинә, һәјатларыны вә имканларыны Аллаһын Падшаһлығыны, онун марагларыны дәстәкләмәк үчүн сәрф едирләр (Ром. 14:7, 8).
6. Һансы мәнада Јеһованын Шаһидләрини гәриб вә ја мүвәггәти сакин адландырмаг олар?
6 Бәли, дүнјанын 200-дән чох өлкәсиндә јашајан Јеһованын Шаһидләри гануна табе олан вәтәндашлардыр. Анҹаг һарада јашамаларындан асылы олмајараг, онлар гәриб вә ја мүвәггәти сакин кими һәјат сүрүрләр. Сијаси вә иҹтимаи мәсәләләрдә битәрәфлик мөвгеләрини горујуб-сахламагда гәти гәрарлы олан бу инсанлар артыг индидән өзләрини Аллаһын јарадаҹағы јени дүнјанын вәтәндашы һесаб едирләр. Мүвәггәти сакин кими јашадыглары гејри-камил дүнјанын сонуна аз галдығыны ҝөрмәк онлары чох севиндирир.
7. Аллаһын хидмәтчиләри неҹә вә һарада даими сакин олаҹаглар?
7 Тезликлә Иса Мәсиһ һакимијјәтиндән истифадә едәрәк Шејтанын пис системини мәһв едәҹәк. Мәсиһин мүкәммәл һакимијјәти јер үзүнү ҝүнаһдан вә әзаб-әзијјәтдән азад едәҹәк. Бу һакимијјәт Јеһованын али һөкмранлығынын доғрулуғуна даир галдырылан үсјанын ҝөрүнән вә ҝөрүнмәјән бүтүн нәтиҹәләрини јох едәҹәк. Аллаһын садиг хидмәтчиләри јерүзү Ҹәннәтин даими сакинләри олаҹаглар. (Вәһј 21:1—5 ајәләрини оху.) Һәмин вахт хилгәт там мәнада «чүрүклүк әсарәтиндән гуртулуб Аллаһын өвладларынын шанлы азадлығына говушаҹагдыр» (Ром. 8:21).
ҺӘГИГИ МӘСИҺЧИЛӘРДӘН НӘ ТӘЛӘБ ОЛУНУР?
8, 9. «Ҹисмани истәкләрдән узаг дурун» демәклә Петерин нәји нәзәрдә тутдуғуну изаһ ет.
8 Петер мәсиһчиләрдән нә тәләб олундуғуну изаһ едәрәк нөвбәти сөзләри јазмышды: «Әзизләрим, гәриб вә мүвәггәти сакин олан сизләрдән риҹа едирәм: ҹанынызла савашан ҹисмани истәкләрдән узаг дурун» (1 Пет. 2:11). Бу мәсләһәт, илк нөвбәдә, мәсһ олунмуш мәсиһчиләрә үнванланса да, Исанын башга гојунларына да аиддир.
9 Бәзи арзуларын Јараданын тәләбләринә ујғун олараг тәмин олунмасында пис һеч нә јохдур. Әслиндә, онлар инсанын һәјатына һәзз гатыр. Мәсәлән, ләззәтли јејиб-ичмәк, тәравәт ҝәтирән мәшғулијјәт вә үрәкачан үнсијјәт кими арзуларымызын олмасы нормалдыр. Һәмчинин инсанын өз һәјат јолдашы илә ҹинси әлагәдә олмаг истәји дә тәбиидир (1 Кор. 7:3—5). Амма Петер «ҹисмани истәкләр» алтында конкрет олараг ҹанымызла савашан истәкләри нәзәрдә тутур. Бәзи Мүгәддәс Китаб тәрҹүмәләриндә истифадә олунан «еһтирас» вә ја «ҝүнаһлы арзулар» кими ифадәләр бунун нә демәк олдуғуну ајдын ҝөстәрир. Сөзсүз ки, Јеһованын нијјәтинә зидд ҝедән вә ја Аллаһла мүнасибәтә мәнфи тәсир ҝөстәрән һәр бир истәк јолверилмәздир. Башга сөзлә, әҝәр истәкләримизи јанлыш тәрздә һәјата кечиририксә, бу, бизә һәјатымыз баһасына баша ҝәлә биләр.
10. Мәсиһчиләри бу дүнјанын бир һиссәси олмаға тәһрик етмәк үчүн Шејтан һансы үсуллара әл атыр?
10 Шејтанын мәгсәди һәгиги мәсиһчиләри бу системдә «мүвәггәти сакин» олдуглары фикриндән дашындырмагдыр. О, бизим вар-дөвләт далынҹа гачмағымызы вә әхлагсызлыға гуршанмағымызы, өзүмүзү һамыдан үстүн тутараг һәр шејдә биринҹи олмаға чалышмағымызы вә милләтчилик руһуна гапылмағымызы истәјир. Бу ҹүр пис ҹисмани арзулардан узаг дурмаға гәтијјәтли олмагла Шејтанын натәмиз дүнјасынын бир һиссәси олмаг истәмәдијимизи ҝөстәририк. Бунунла сүбут едирик ки, биз бу дүнјада мүвәггәтијик. Бизим истәјимиз Аллаһын салеһлик өмүр сүрән јени дүнјасынын даими сакини олмагдыр.
НҮМУНӘВИ ДАВРАНЫШ
11, 12. Бәзән инсанлар әҹнәбиләрә неҹә јанашырлар вә Јеһованын Шаһидләри барәдә нә дүшүнүрләр?
11 Петер «мүвәггәти сакин» олан мәсиһчиләрдән нә тәләб олундуғуну изаһ едәрәк 12-ҹи ајәдә сөзләринә белә давам едир: «Башга милләтләрин арасында бундан сонра да нүмунәви давранын ки, сизә гара јаханлар јахшы ишләринизи мүшаһидә едиб јохлама ҝүнүндә Аллаһы мәдһ етсинләр». Өз өлкәләриндә јашамајан әҹнәбиләр, јәни мүвәггәти сакинләр бәзән тәнгид атәшинә мәруз галырлар. Садәҹә данышыг, давраныш вә ҝејим тәрзләринә, һәтта, ола билсин, ҝөрүнүшләринә ҝөрә әтрафдакы инсанлардан фәргләндикләри үчүн онлара пис инсан кими бахырлар. Анҹаг онларын јахшы әмәлләри, јәни нүмунәви давранышы үнванларына дејилән иттиһамларын әсассыз олдуғуну сүбут едир.
12 Ејнилә, һәгиги мәсиһчиләр әтрафларындакы инсанлардан бир чох саһәләрдә — үнсијјәт етдикләри мөвзулара вә ја сечдикләри әјләнҹәләрә ҝөрә фәргләнирләр. Инсанлар чох вахт онлары хариҹи ҝөрүнүшләриндән таныјырлар. Јанлыш мәлуматлары олан бәзиләри онлары пис инсанлар кими гәләмә верә биләр. Диҝәрләри исә сүрдүкләри һәјат тәрзинә ҝөрә онлары тәрифләјә биләр.
13, 14. «Һикмәтин доғрулуғу әмәлләриндән бәлли олур» ифадәси һансы мәнаны дашыјыр? Нүмунә чәкин.
13 Бәли, бизим нүмунәви давранышымыз јерсиз тәнгидин гаршысыны ала биләр. Һәтта Иса Мәсиһ, Аллаһа там садиглијини горујуб сахлајан јеҝанә инсан белә, һагсыз јерә иттиһамлара мәруз галмышды. Бәзиләри ону «гарынгулу вә шәраб дүшкүнү, верҝијығанларын вә ҝүнаһлыларын досту» адландырырды. Лакин о, Аллаһа хидмәт етмәклә ҝөстәрдији мүдриклик сајәсиндә онун һаггында ирәли сүрүлән фикирләрин јанлыш олдуғуну сүбут етди. О белә сөзләр деди: «Һикмәтин доғрулуғу әмәлләриндән бәлли олур» (Мат. 11:19). Ејни шејләрин бу ҝүн дә шаһиди олуруг. Мәсәлән, Зелтерсдәки (Алманија) Бет-Ел комплексинин гоншулуғунда јашајан бәзиләри орада хидмәт едән баҹы-гардашлара гәрибә инсанлар кими јанашырдылар. Лакин Зелтерсин мери онлары мүдафиә едәрәк демишди: «Бурада хидмәт едән Шаһидләрин өз һәјатлары вар вә бу әразидә јашајан инсанлара һеч бир манечилик төрәтмирләр».
14 Бу јахынларда Москвада (Русија) јашајан Јеһованын Шаһидләри дә ејни вәзијјәтлә үзләшмишдиләр. Онлар бир нечә јанлыш һәрәкәтдә иттиһам олунурдулар. 2010-ҹу илин ијун ајында Франсанын Страсбург шәһәриндә јерләшән Авропа Инсан Һүгуглары Мәһкәмәси белә бир гәрар чыхарды: «Мәһкәмә гәнаәтә ҝәлмишдир ки, [москвалы] әризәчиләрин дин вә бирләшмәк азадлығы һүгугуна мүдахилә едилмәси әсассыз олуб. Милли мәһкәмәләр әризәчи-иҹманын [аиләләри дағытмагда, инсанлары интиһара вә тибби мүалиҹәдән имтина етмәјә тәһрик етмәкдә ҝүнаһлы олдугларыны сүбут едән] “ишлә бағлы вә кифајәт гәдәр” сәбәбләр ҝәтирмәјибләр». Беләликлә, «милли мәһкәмәләр тәрәфиндән тәјин едилән санксија дахили ганунвериҹилијин мүхтәлиф һаллара ујғунлашмамасыны нәзәрә алараг һәддән артыг сәрт характер дашымыш вә ҝүдүлән һәр һансы гануни мәгсәдләрә мүвафиг олмамышдыр».
ЛАЈИГЛИ ТӘРЗДӘ ИТАӘТКАРЛЫГ ҜӨСТӘРМӘК
15. Бүтүн дүнјада һәгиги мәсиһчиләр һансы Мүгәддәс Китаб принсипинә риајәт едирләр?
15 Москвадакы, о ҹүмләдән бүтүн дүнјадакы Јеһованын Шаһидләри Петерин мәсиһчиләр үчүн јаздығы нөвбәти тәләбә риајәт едирләр. О демишди: «Ағамызын хатиринә инсан һакимијјәтләринә табе олун. Ән јүксәк вәзифә тутдуғуна ҝөрә падшаһа... табе олун» (1 Пет. 2:13, 14). Биз бу пис дүнјанын бир һиссәси дејилик. Буна бахмајараг, һакимијјәт даирәләринин ганунлары Аллаһын ганунларына зидд ҝетмәдији тәгдирдә биз көнүллү олараг онлара табе олуруг. (Ромалылара 13:1, 5—7 ајәләрини оху.)
16, 17. а) Бизим дөвләтә гаршы чыхмадығымызы нә сүбут едир? б) Бәзи сијаси хадимләр нәји етираф едирләр?
16 Јеһованын Шаһидләри бу системдә «мүвәггәти сакин» кими јашајырлар, анҹаг бу, онларын һөкумәтә гаршы чыхмаг вә башгаларыны мүһакимә етмәк истәдикләрини ҝөстәрмир. Онлар нә өзләри һөкумәтә гаршы чыхырлар, нә дә сијаси вә ја иҹтимаи мәсәләләрлә бағлы өз гәрарларыны гәбул етмәкдә башгаларына мане олурлар. Бәзи дини груплардан фәргли олараг, Јеһованын Шаһидләри сијасәтә гарышмырлар. Онлар һеч вахт һакимијјәт даирәләринә сијаси мәсәләләрлә бағлы өз фикирләрини диктә етмәјә чалышмырлар. Онларын иҹтимаи асајиши позмаға вә һакимијјәти нүфуздан салмаға ҹәһд ҝөстәрә биләҹәкләринә даир ирәли сүрүлән иддиалар тамамилә әсассыздыр!
17 Петерин «падшаһа һөрмәт бәсләјин» мәсләһәтинә әсасән, вәзифәли шәхсләрә табе олмагла мәсиһчиләр онларын мөвгејинә һөрмәт вә еһтирам бәсләдикләрини ҝөстәрирләр (1 Пет. 2:17). Һәрдән сәлаһијјәтли шәхсләр етираф едирләр ки, Јеһованын Шаһидләринә ҝөрә нараһат олмаг үчүн әсаслы сәбәб јохдур. Мәсәлән, Бранденбург вилајәтинин назирләр кабинетинин кечмиш үзвү, сонралар исә Алманија парламентинин үзвү олмуш сијаси хадим Стефан Рих демишдир: «Јеһованын Шаһидләринин дүшәрҝәләрдә вә һәбсханалардакы давранышы, јәни СС гаршысында дөзүмлүлүк вә диҝәр дустаглара инсанпәрвәрлик ҝөстәрмәләри кечмишдә олдуғу кими, бу ҝүн дә демократик конститусијалы бир дөвләтин ајагда галмасы үчүн ваҹибдир. Әҹнәбиләрә, сијаси вә ја идеоложи бахышлары мүхтәлиф олан инсанлара гаршы ҝүнбәҝүн артан гәддарлығы нәзәрә алсаг, бу ҹүр хејирхаһлыг өлкәмизин һәр бир вәтәндашы үчүн өнәмлидир».
МӘҺӘББӘТИН ТӘЗАҺҮРҮ
18. а) Үмумдүнја гардашлығы севмәјимиз нәјә ҝөрә тәбиидир? б) Бәзи инсанлар Јеһованын Шаһидләри барәдә һансы сөзләри демишләр?
18 Һәвари Петер јазмышды: «Һәр ҹүр инсана һөрмәт един, бүтүн гардашлығы севин, Аллаһдан горхун» (1 Пет. 2:17). Јеһованын Шаһидләриндә Аллаһ горхусу вар, јәни онлар Ону наразы салмамагдан горхурлар. Аллаһа олан бу һөрмәт Онун ирадәсини јеринә јетирмәјә тәшвиг едир. Онлар ејни истәјә малик олан баҹы-гардашлардан ибарәт үмумдүнја гардашлыгла бирликдә Јеһоваја хидмәт етмәкдән севинҹ дујурлар. Буна ҝөрә дә, онлар үчүн «бүтүн гардашлығы» севмәк тәбии һалдыр. Буҝүнкү худбин дүнјада бу гәдәр надир олан гардашлыг мәһәббәти Јеһованын Шаһиди олмајан инсанлар үчүн тәәҹҹүблү ҝәлир. Мәсәлән, Америка туризм аҝентлији илә әмәкдашлыг едән бәләдчи 2009-ҹу илдә Алманијада кечирилән бејнәлхалг конгресдә Шаһидләрин әҹнәби гонаглара ҝөстәрдикләри мәһәббәт вә көмәјә һејран галмышды. О дејир ки, бәләдчи ишләдији узун илләр әрзиндә һеч вахт белә бир шејин шаһиди олмајыб. Сонра Шаһидләрдән бири белә демишди: «О, бизим һаггымызда бөјүк шөвг вә һејранлыгла данышырды». Конгрес заманы Јеһованын Шаһидләрини мүшаһидә едән инсанларын белә сөзләр дедијини ешитмисинизми?
19. Биз нә етмәјә гәтијјәтли олмалыјыг вә нә үчүн?
19 Өјрәндијимиз кими Јеһованын Шаһидләри бир чох үсулларла ҝөстәрирләр ки, онлар Шејтан дүнјасында, һәгигәтән дә, «мүвәггәти сакин» кими јашајырлар. Онлар бу ҹүр јашамаға гәтијјәтлидирләр. Онларын тезликлә Аллаһын әдаләтли јени дүнјасынын даими сакинләри олаҹагларына үмидләри мөһкәм тәмәлә маликдир. Сән дә јени дүнјаны сәбирсизликлә ҝөзләјирсәнми?
[20–ҹи сәһифәдәки шәкил]
Биз Шејтан дүнјасыны дәстәкләмирик
[20–ҹи сәһифәдәки шәкил]
Биз Аллаһын јени дүнјасыны дәстәкләјирик
[22–ҹи сәһифәдәки шәкил]
Мүгәддәс Китаб һәгигәтләри бу русијалы аиләнин бирләшмәсинә көмәк етди