Јеһованын никаһ әнамыны, һәгигәтәнми, гијмәтләндирирсән?
«Гој Јеһова сизә әр евиндә раһатлыг бәхш етсин» (РУТ 1:9, ЈД).
БУ СУАЛЛАРЫН ҸАВАБЫНЫ ТАП
Нәјә әсасән дејә биләрик ки, кечмишдә јашајан Аллаһын хидмәтчиләри Онун никаһ әнамыны гијмәтләндирирдиләр?
Һарадан билирик ки, бизим киминлә аилә гурмағымыз Јеһова үчүн әһәмијјәтсиз дејил?
Сән никаһла бағлы һансы мәсләһәти тәтбиг етмәји планлашдырырсан?
1. Аллаһ Адәм үчүн Һәвваны јараданда о, һансы һиссләри кечирмишди?
«БАХ, нәһајәт, бунун сүмүјү мәним сүмүјүмдән, бәдәни мәним бәдәнимдәндир. Адына “гадын” дејиләҹәк, чүнки о, кишидән ҝөтүрүлүб» (Јар. 2:23). Аллаһ илк инсан олан Адәмә һәјат јолдашы бәхш едәндә о неҹә дә хошбәхт иди! Тәәҹҹүблү дејил ки, о, өз хошбәхтлијини поетик диллә ифадә етди! Јеһова Адәми дәрин јухуја вердикдән сонра габырғасындан ҝөзәл бир гадын јаратмышды. Адәм онун адыны Һәвва гојду. Аллаһ онлары бирләшдирди вә онлар хошбәхт әр-арвад олдулар. Буҝүнкү әр-арвадларла мүгајисәдә Адәмлә Һәвва бир-бирләринә даһа јахын идиләр, чүнки Һәвва Адәмин габырғасындан јарадылмышды.
2. Киши вә гадыны бир-биринә ҹәлб едән нәдир?
2 Мисилсиз һикмәт саһиби олан Јеһова киши вә гадыны онлары бир-биринә ҹәлб едән романтик мәһәббәт бәсләмәк баҹарығы илә јарадыб. Бир енсиклопедијада дејилир: «Киши вә гадын евләнәркән бир-бирләри илә ҹинси әлагәдә олаҹагларына вә һәмишә бир-бирләринә романтик мәһәббәт бәсләјәҹәкләринә үмид едирләр» («The World Book Encyclopedia»).
НИКАҺ ӘНАМЫНЫ ГИЈМӘТЛӘНДИРӘНЛӘР
3. Ибраһим оғлу Исһага неҹә арвад тапды?
3 Аллаһын садиг хидмәтчиси олан Ибраһим никаһы јүксәк гијмәтләндирирди. Буна ҝөрә дә о, оғлу Исһага арвад тапмаг үчүн гулбашыны Месопотамијаја ҝөндәрди. Бу гулбашынын дуасы онун ишини аванд етди. Аллаһдан горхан Ребека (Ривга) Исһагын севимли һәјат јолдашы олду вә Јеһованын Ибраһимә нәслинин давам едәҹәјинә даир вердији вәдин јеринә јетмәсиндә мүәјјән рол ојнады (Јар. 22:18; 24:12—14, 67). Бундан белә бир нәтиҹә чыхартмамалыјыг ки, инсан — нијјәтинин нә гәдәр јахшы олмасындан асылы олмајараг — ондан хаһиш етмәјәндә ара дүзәлтмәклә мәшғул олмалыдыр. Мүасир дөврдә чохлары һәјат јолдашыны өзләри сечир. Дүздүр, Аллаһ евләнәнләрин кәбинини габагҹадан ҝөјдә кәсмир, лакин мәсиһчиләр Аллаһдан дуада рәһбәрлик диләсәләр вә мүгәддәс руһун рәһбәрлијинә табе олсалар, Аллаһ онлара һәјатын бу вә диҝәр саһәләриндә јардымчы олаҹаг (Галат. 5:18, 25).
4, 5. Шулам гызы илә чобан арасында әсил мәһәббәтин олдуғуна сәни нә әмин едир?
4 Гәдим Исраилдә јашајан ҝөзәл Шулам гызы рәфигәләринин ону падшаһ Сүлејманын чохсајлы арвадларындан бири олмаға мәҹбур етмәләрини истәмирди. О деди: «Еј Јерусәлим гызлары, мәнә анд ичин ки, ичимдән ҝәлмәјинҹә мәндә севҝи ојатмаға чалышмајаҹагсыныз» (Нәғмә. н. 8:4, ЈД). Шулам гызы илә чобан бир-бирләринә хүсуси мүнасибәт бәсләјирдиләр. Гыз тәвазөкарҹасына деди: «Мән Шарон нәрҝизијәм, дәрәләрдә битән занбағам». Оғлан исә ҹаваб верди: «Мәним јарым гызлар арасындадыр, елә бил бир занбаг тиканлар арасындадыр» (Нәғмә. н. 2:1, 2). Онлар, һәгигәтән дә, бир-бирләрини севирдиләр.
5 Шулам гызы вә чобан, ән әсасы, Аллаһы севдикләри үчүн онларын аиләси мөһкәм олаҹагды. Шулам гызы севдији оғлана демишди: «Мәни гәлбинин башында, голунун үстүндә бир мөһүр кими сахла. Чүнки севҝи өлүм гәдәр гүввәтлидир, гысганҹлыг өлүләр дијары кими мөһкәмдир, онун оду аловланыр, о, атәшдир [«Јаһын атәшидир», ЈД, (јәни мәһәббәт Аллаһдандыр)] тамамилә јандырыб-јахыр. Севҝини үмман сулар сөндүрә билмәз, ону чағлајан чајлар батыра билмәз. Бир инсан севҝиси уғрунда вар-јохуну версә белә, һамы она хор бахар» (Нәғмә. н. 8:6, 7). Ахы нәјә ҝөрә аилә гурмаг нијјәтиндә олан мәсиһчи бундан азына гане олсун?
СЕЧИМИН АЛЛАҺ ҮЧҮН ӨНӘМЛИДИР
6, 7. Һарадан билирик ки, киминлә аилә гураҹағымыз Јеһова үчүн өнәмлидир?
6 Сәнин киминлә евләнәҹәјин Јеһова үчүн өнәмлидир. Кәнан халглары илә әлагәдар Јеһова исраиллиләрә тапшырмышды: «Онларла гоһум олмајын, оғулларына гыз вериб, оғулларыныза онлардан гыз алмајын. Чүнки онлар өвладларынызы Мәним ардымҹа ҝетмәкдән дөндәриб, башга аллаһлара гуллуг етдирәҹәкләр. Онда Рәббин сизә гаршы гәзәби аловланаҹаг вә тезликлә сизи јох едәҹәк» (Ганун. т. 7:3, 4). Бундан хејли мүддәт сонра јашајан каһин Езра демишди: «Сиз хәјанәт етмисиниз. Исраилин ҝүнаһыны даһа да артырараг јаделли арвадлар алмысыныз» (Езра 10:10). Һәвари Павел исә һәмиманлыларына јазмышды: «Әр сағ икән арвад она бағлыдыр. Әҝәр әри өлүм јухусуна ҝетсә, гадын азаддыр вә истәдији адама әрә ҝедә биләр, бу шәртлә ки, о адам Ағамызын хидмәтчиси олсун» (1 Кор. 7:39).
7 Јеһованын һәср олунмуш хидмәтчиси иманына шәрик олмајан инсанла аилә гурурса, онда о, Аллаһа гаршы итаәтсизлик едир. Езранын ҝүнләриндәки исраиллиләр өзләринә «јаделли арвадлар» алмагла Аллаһа хәјанәт етмишдиләр. Мүгәддәс Јазылардакы ајдын ҝөстәришләри позмаг үчүн бәһанә ахтармаг бөјүк сәһвдир (Езра 10:10; 2 Кор. 6:14, 15). Имансызла аилә гуран мәсиһчи нүмунәви дејил вә Аллаһын никаһ әнамыны, әслиндә, гијмәтләндирмир. Вәфтиз олмуш мәсиһчи бу аддымы атарса, Аллаһын халгы арасындакы бәзи мәсулијјәтләриндән мәһрум ола биләр. Белә олан һалда: «Јеһова, мән биләрәкдән сөзүндән чыхмышам, амма, нә олар, хејир-дуаны мәндән әсирҝәмә», — дејә дуа етмәк мәнтигсиз оларды.
СӘМАВИ АТАМЫЗ ҺАМЫДАН ЈАХШЫ БИЛИР
8. Нәјә ҝөрә Аллаһын никаһла әлагәдар рәһбәрлијини изләмәлијик? Нүмунә әсасында изаһ ет.
8 Машын истеһсалчысы онун неҹә ишләдијини дәгиг билир. Башга бириси машыны јығмаг истәсә, о һәтта она лазыми тәлимат верә биләр. Бәс әҝәр һәмин адам бу тәлиматлара мәһәл гојмадан машынын һиссәләрини өзү билдији кими јығарса, онда нә баш верәр? Ән јахшы һалда машын ишләмәјәҹәк, лакин бу, фәлакәтлә дә нәтиҹәләнә биләр. Ејнилә, әҝәр гураҹағымыз аиләнин хошбәхт олмасыны истәјириксә, никаһын Баниси олан Јеһованын мәсләһәтләрини гулагардына вурмамалыјыг.
9. Нәјә ҝөрә демәк олар ки, Јеһова тәнһалыг һиссини баша дүшүр вә никаһын инсана хошбәхтлик бәхш етдијини билир?
9 Јеһова бәшәријјәт вә никаһла бағлы һәр шеји билир. О, Өзү инсанлары ҹинси әлагәдә олмаг тәләбаты илә јарадыб ки, онлар төрәјиб чохалсынлар (Јар. 1:28). Аллаһ тәнһалыг һиссини чох јахшы баша дүшүр, чүнки илк гадыны јаратмаздан өнҹә демишди: «Инсанын тәк олмасы јахшы дејил, Мән она мүнасиб олан бир көмәкчи јарадаҹағам» (Јар. 2:18). Үстәлик, Јеһова никаһын инсана нә гәдәр бөјүк севинҹ вердијиндән дә бихәбәр дејил. (Сүлејманын мәсәлләри 5:15—18 ајәләрини оху.)
10. Аиләли мәсиһчиләрин ҹинси мүнасибәтләрини һансы амилләр тәнзимләмәлидир?
10 Адәмин өвладларына өтүрдүјү ҝүнаһ уҹбатындан бу ҝүн һеч бир никаһы мүкәммәл адландырмаг олмаз. Лакин әҝәр Јеһованын хидмәтчиләри Онун Кәламындакы ҝөстәришләрә әмәл едәрләрсә, никаһ онлара әсил хошбәхтлик ҝәтирә биләр. Нүмунә үчүн һәвари Павелин никаһда интим мүнасибәтләрә даир вердији ајдын мәсләһәтләрә диггәт јетирәк. (1 Коринфлиләрә 7:1—5 ајәләрини оху.) Мүгәддәс Јазыларда тәләб олунмур ки, әрлә арвад јалныз дүнјаја өвлад ҝәтирмәк мәгсәдилә бир-бири илә ҹинси әлагәдә олсунлар. Јахынлыг онларын һәм емосионал, һәм дә физики тәләбатларыны өдәјә биләр. Лакин никаһ дахилиндә позғун һәрәкәтләрә јол вермәк Аллаһа мәгбул дејил. Шүбһә јохдур ки, мәсиһчи әр-арвадлар аилә һәјатынын бу ваҹиб саһәсиндә нәвазишлә давранмалы вә бир-биринә сәмими мәһәббәт ҝөстәрмәлидирләр. Вә әлбәттә ки, онлар Јеһоваја хош ҝетмәјән һәр бир һәрәкәтдән өзләрини ҝөзләмәлидирләр.
11. Рут Јеһованын ирадәсинә ујғун даврандығы үчүн һансы мүкафаты алды?
11 Никаһ бәдбәхтчилик вә ағыр јүк олмамалыдыр, әксинә, инсана севинҹ ҝәтирмәлидир. Хүсусилә дә мәсиһчинин еви динҹлик вә әмин-аманлығын һөкм сүрдүјү јер олмалыдыр. Тәхминән 3000 ил бундан әввәл баш вермиш бир һадисәјә нәзәр салаг. Јашлы дул гадын Наоми әрләрини итирмиш ики ҝәлини — Орпа вә Рутла бирҝә Моавдан Јәһудаја ҝедирди. Бу заман Наоми һәлә өмүрләринин ҝәнҹлик чағыны јашајан ҝәлинләрини өз халгларынын јанына гајытмалары үчүн дилә тутмаға башлады. Моавлы Рут Наоми илә галды, о, һәгиги Аллаһа садиг иди. Аллаһын әсил хидмәтчиси олан јашлы Боаз Руту әмин етди ки, «ганады алтына сығынмаг» үчүн ҝәлдији Исраилин Аллаһы Јеһовадан бол мүкафат алаҹаг (Рут 1:9; 2:12). Аллаһын никаһ әнамына јүксәк гијмәт верән Рут онун арвады олду. О, Аллаһын јени дүнјасында дирилән заман Иса Мәсиһин улу нәнәси олдуғуну биләндә севинәҹәк (Мат. 1:1, 5, 6; Лука 3:23, 32). Јеһованын ирадәсинә ујғун шәкилдә давранан Рутун мүкафаты неҹә дә бөјүк олду!
НИКАҺЫН УҒУРЛУ ОЛМАСЫ ҮЧҮН ЕТИБАРЛЫ МӘСЛӘҺӘТЛӘР
12. Никаһла әлагәдар етибарлы мәсләһәтләри һарадан тапа биләрик?
12 Никаһын Баниси Јеһова аилә һәјатынын уғурлу олмасы үчүн нәји билмәли олдуғумузу бизә ачыглајыр. Һеч бир инсанын бу саһәдә олан билији Онунку гәдәр ола билмәз. Јалныз Мүгәддәс Китаб никаһла әлагәдар етибарлы вә дүзҝүн мәсләһәтләр мәнбәјидир. Буна ҝөрә дә кимсә бунунла бағлы мәсләһәт вермәк истәјирсә, онун мәсләһәти мәһз бу китаба әсасланмалыдыр. Мәсәлән, һәвари Павел Аллаһдан илһам алараг јазмышды: «Гој һәр бириниз арвадыны өзүнү севдији кими севсин; арвад да әринә дәрин һөрмәт бәсләсин» (Ефес. 5:33). Јеткин мәсиһчиләр үчүн бурада гаранлыг галан һеч нә јохдур. Мәсәлә онларын һәмин мәсләһәтләри тәтбиг едиб-етмәмәләриндәдир. Әҝәр онлар, һәгигәтән дә, никаһа әнам кими бахырларса, онда о мәсләһәтләрә риајәт едәҹәкләрa.
13. Әҝәр әр 1 Петер 3:7 ајәсиндәки мәсләһәтә әмәл етмирсә, нә баш верә биләр?
13 Мәсиһчи әр арвады илә мәһәббәтлә давранмалыдыр. Һәвари Петер јазмышды: «Еј әрләр, һәр бириниз һәјат јолдашынызла билијә әсасән давранын. Гадын даһа зәиф олуб зәриф бир габа бәнзәдији үчүн ону гијмәтләндирин ки, дуаларынызын гаршысыны һеч нә кәсмәсин. Ахы сиз дә онларла бирликдә Аллаһын лүтфү илә верилән һәјат әнамынын варисисиниз» (1 Пет. 3:7). Әҝәр әр Јеһованын бу мәсләһәтини тәтбиг етмирсә, бу, онун дуаларына манечилик төрәдәҹәк. Белә олан һалда онларын һәр икисинин дә руһани вәзијјәтинә зәрәр дәјә биләр, мәсәлән, бу, мүнасибәтләринин даһа да ҝәрҝинләшмәсинә, мүбаһисәләрә вә кобуд рәфтара ҝәтириб чыхара биләр.
14. Севән гадын аиләсинә неҹә тәсир едә биләр?
14 Јеһованын Кәламыны әлдә рәһбәр тутан вә Онун мүгәддәс руһуна әсасән давранан гадын евинин сакит вә хошбәхт ҝушә олмасы үчүн чох шеј едә биләр. Өз арвадыны севмәк, ону физики вә руһани зәрәрдән горумаг Аллаһдан горхан әр үчүн тәбиидир. Гадын әринин ону севмәсинә еһтијаҹ дујур, буна ҝөрә дә о, елә хүсусијјәтләр тәзаһүр етдирир ки, әри ону даһа чох севсин. Сүлејманын мәсәлләри 14:1 ајәсиндә дејилир: «Һикмәтли гадын евини гурар, сәфеһ гадын ону әли илә учурар». Мүдрик вә севән гадын аиләсинин хошбәхт вә мүвәффәгијјәтли олмасы үчүн әлиндән ҝәләни әсирҝәмир. Үстәлик, бунунла о, Аллаһын никаһ әнамыны, доғрудан да, гијмәтләндирдијини ҝөстәрир.
15. Ефеслиләрә 5:22—25 ајәләриндә һансы мәсләһәт верилир?
15 Әрлә арвад Исанын јығынҹагла неҹә рәфтар етмәсиндән нүмунә ҝөтүрәндә Аллаһын никаһ әнамыны гијмәтләндирдикләрини, еләҹә дә бир-бирләрини севдикләрини вә бир-бирләринә һөрмәт етдикләрини ҝөстәрирләр. (Ефеслиләрә 5:22—25 ајәләрини оху.) Јеһова бир-бирләрини үрәкдән севән вә һеч вахт дикбашлығын, ушаг кими бир-бирләриндән күсмәјин вә мәсиһчиләрә хас олмајан бу кими диҝәр хүсусијјәтләрин никаһларына хәләл дәјмәсинә јол вермәјән мәсиһчи әр-арвадлары бол-бол мүкафатландырыр!
ГОЈ ҺЕЧ КӘС ОНЛАРЫ АЈЫРМАСЫН
16. Нәјә ҝөрә бәзи мәсиһчиләр субај галырлар?
16 Инсанларын әксәријјәти һәјатларынын мүәјјән мәрһәләсиндә евләнмәји планлашдырырлар. Лакин Јеһованын бәзи хидмәтчиләри үрәкләринә јатан вә Јеһоваја мәгбул олан һәјат јолдашы тапа билмәдикләри үчүн һәлә дә субајдырлар. Бәзиләриндә исә Аллаһын бәхш етдији субајлыг әнамы вар вә бу әнам онлара башлары никаһын јаратдығы чәтинликләрә гарышмадан өзләрини Јеһоваја хидмәтә һәср етмәјә имкан верир. Әлбәттә, субајлыг илләриндән Јеһованын тәсис етдији чәрчивә дахилиндә истифадә етмәк лазымдыр (Мат. 19:10—12; 1 Кор. 7:1, 6, 7, 17).
17. а) Исанын никаһла әлагәдар дедији һансы сөзләри јаддашымыза һәкк етмәлијик? б) Әҝәр мәсиһчи башгасынын һәјат јолдашына тамаһ салмаға башлајыбса, о, дәрһал нә етмәлидир?
17 Субај вә ја евли олмағымыздан асылы олмајараг, һәр биримиз Исанын бу сөзләрини јаддашымыза һәкк етмәлијик: «Мәҝәр охумамысыныз ки, Јарадан башланғыҹдан онлары киши вә гадын олараг јарадыб вә белә дејиб: “Буна ҝөрә дә инсан өз ата-анасындан ајрылыб арвадына бағланаҹаг вә икиси бир бәдән олаҹаг”? Беләликлә, онлар артыг ики јох, бир бәдәндир. Буна ҝөрә дә Аллаһын бир бојундуругда бирләшдирдијини гој һеч кәс ајырмасын» (Мат. 19:4—6). Башгасынын һәјат јолдашына тамаһ салмаг ҝүнаһдыр (Ганун. т. 5:21). Әҝәр мәсиһчинин үрәјиндә бу ҹүр арзу баш галдырыбса, бу, она бөјүк емосионал ағры версә белә, (чүнки худбин арзунун онда инкишаф етмәсинә јол вериб) ону үрәјиндән силиб атмаг үчүн дәрһал һәрәкәтә кечмәлидир (Мат. 5:27—30). Јанлыш дүшүнҹә тәрзимизи дүзәлтмәк вә һијләҝәр үрәјимизин ҝүнаһлы арзуларыны дәф етмәк олдугҹа ваҹибдир (Јер. 17:9).
18. Никаһы Аллаһын әнамы һесаб етмәли олдуғумуз барәдә нә фикирләширсән?
18 Јеһова Аллаһ вә Онун ҝөзәл никаһ әнамындан аз вә ја үмумијјәтлә һеч нә билмәјән инсанларын бир чоху белә никаһы мүәјјән мәнада гијмәтләндирир. Мәҝәр «хошбәхт Аллаһ» олан Јеһоваја хидмәт едән бизләр, никаһ әнамы да дахил олмагла, Онун бизә бәхш етдији һәр шеји даһа чох гијмәтләндирмәли вә онлардан севинҹ дујмалы дејилик? (1 Тим. 1:11).
[Һашијә]
a Никаһ мөвзусунун даһа әтрафлы мүзакирәси үчүн «Өзүнүзү Аллаһын мәһәббәтиндә сахлајын» китабынын 10 вә 11-ҹи фәсилләринә бах.
[6–ҹы сәһифәдәки јазы]
Уғурлу никаһ Јеһоваја шәрәф, аиләнин бүтүн үзвләринә исә бөјүк хошбәхтлик ҝәтирир
[5–ҹи сәһифәдәки шәкил]
Рут Аллаһын никаһ әнамыны гијмәтләндирирди
[7–ҹи сәһифәдәки шәкил]
Сән Јеһованын никаһ әнамыны, һәгигәтәнми, гијмәтләндирирсән?